sábado, 25 de novembro de 2017

Esquerda Unida solicita que a Escola Infantil do Monte da Vila sexa a nova Casa da Xuventude

Edificio da EEI Monte da Vila (Foto: Todogrove.es)
O Grupo Municipal de EU someterá a debate, no pleno de novembro, unha moción na que solicitan que o inmoble que ata este ano albergaba a Escola Infantil no Monte da Vila sexa usado como Casa da Xuventude.  Un espazo que acolla as actividades e servizos adecuados ás necesidades da mocidade do Grove. A proposta, que leva emparellada a creación dun Plan Integral da Mocidade, tratarase no punto de mocións de urxencia ao non estar incluída na orde do día do pleno. 


Moción íntegra 


CREACIÓN DUNHA CASA DA XUVENTUDE E UN PLAN INTEGRAL DA MOCIDADE NO CONCELLO DO GROVE

venres, 24 de novembro de 2017

25N - Fronte á violencia patriarcal: igualdade radical


25 de Novembro de 2017
Día Internacional contra a Violencia Machista 
  
Fronte á violencia patriarcal: igualdade radical  

A violencia machista é unha vulneración dos dereitos humanos das mulleres, que afecta á sociedade en todas as súas estruturas. O número de vítimas asasinadas en Galicia va construíndo un relato vergoñento: dende 2010 as cifras de feminicidio elévanse a 54. Mentres contamos mulleres asasinadas, comprobamos con asombro que algunhas institucións lanzan campañas que, lonxe de pular pola igualdade, reflicten e repiten conductas patriarcais nas que se impón a desigualdade. 

Ano tras ano lembramos que os datos falan por si mesmos e sitúan as declaracións institucionais e as leis aprobadas en constatacións do desinterese continuo por parte da administración en dotar de medios estes acordos para facer efectivo o seu cumprimento. 

A violencia machista perpetrada nos asasinatos de mulleres é a expresión violenta máis visible, pero existen múltiples violencias non tan evidentes que de seguro responden a unha insoportable cultura patriarcal. A educación en igualdade é un dos piares imprescindibles para traballar cara a erradicación desta lacra

Non podemos consentir que existan escravas traficadas para consumo sexual dos homes. A prostitución é unha forma lexitimadora da violencia machista onde se aluga o uso do corpo de mulleres e nenas, lexitimando con iso á consideración da muller como un ser inferior susceptible de ser usado e comprado. As agresións sexuais non só aumentan senón que, nalgúns casos, pasaron de ser actos criminais individuais a formas grupais cada vez máis presentes nas nosas festas e noutros acontecementos masivos. Exemplo disto é o que está a acontecer estes días co xuízo das presuntas violacións dos “sanfermins”, e a exposición mediática na que á vítima se presenta como responsable da agresión na que se cuestioana a súa conduta só por ser muller.

A notoria expansión que está adquirindo a demanda de aluguer dos ventres de mulleres, non só ten un significado ostentoso de diferenza de clase e xenófobo, senón tamén de que o patriarcado, cada vez con menos escrúpulos, pretende comerciar legalmente cos nosos corpos, valéndose da necesidade e amparándose na desigualdade.

Tentar lexislar a custodia compartida imposta sen acordo das partes e obviando a situación de vulnerabilidade e violencia á que poden estar sometidas as mulleres e os menores é unha irresponsabilidade.

A fenda salarial existente entre mulleres e homes en traballos de igual valor é a fórmula que o Estado opresor ten para manifestar que seguimos sendo cidadás de segunda clase, condicionando a nosa autonomía económica para manternos subordinadas. 

Precisamos políticas transversais, contundencia e decisión política para aumentar os recursos económicos e humanos destinados ao desenvolvemento de políticas de igualdade activas, integrais e participativas.


xoves, 16 de novembro de 2017

Esquerda Unida insta ao goberno a usar os 1,5 millóns restantes do crédito do Auditorio para amortizar débeda

Os esquerdistas critican que se asinase o crédito de 4.500.000 €, un día antes de que se coñecese a cantidade concedida pola subvención da Deputación. Piden que Cacabelos demostre “honradez” e amortice débeda en lugar de usar os 1,5M de forma electoralista co PGD como el mesmo afirmou en pleno. 

O Grove, 16 de novembro de 2017.- Logo de coñecer que o pasado luns o goberno municipal asinara o crédito de 4.500.000 € destinados á construción do Auditorio no Monte da Vila e a apertura dunha rúa por detrás da Casa da Cultura, e que tan só un día despois a Deputación de Pontevedra anunciara que o Concello do Grove contaría coa subvención máxima (1.500.000 €) do Plan de Reequilibro Territorial destinado á mesma fin, Esquerda Unida critica que Cacabelos “non agardase a coñecer a contía da subvención para solicitar un crédito menor e non provocar un endebedamento moi próximo ao 75%”.

Para Esquerda Unida, “isto é un claro exemplo de que Cacabelos quere utilizar uns cartos que foron solicitados para o auditorio para outras finalidades distintas de xeito electoralista e pouco ético”. Os esquerdistas remítense ao pleno da aprobación da solicitude de subvención, no que pediron ao goberno que a cantidade do crédito para o Auditorio que fora concedida se destinase a amortizar a débeda do citado crédito. Unha cuestión “á que se negou de maneira rotunda Cacabelos, anunciando que usaría eses cartos para facer obras en diferentes rúas co consentimento exclusivo do PGD”, indican dende a agrupación de esquerdas.

Así, Esquerda Unida denuncia que o goberno municipal está endebedando o futuro do Concello do Grove, “de forma premeditada e cunha fin electoralista, xa que con este crédito o endebedamento sitúase no 73% dun máximo do 75%”. Entenden que Cacabelos “era coñecedor desta liña de subvencións e a pesar diso forzou aos partidos da oposición para aprobar un crédito moi superior ao preciso e así contar cuns cartos para un uso non lícito” e afirman que “estivo enganando aos partidos da oposición, ás asociación culturais e aos veciños en xeral para obter un financiamento que de outro xeito veríase obrigado a xustificar e negociar por separado”. Deste xeito, o alcalde disporá de 1,5 millóns, máis 400.000 € do Plan Concellos que se ían destinar ao auditorio pero son incompatibles con esta subvención.

Por ese motivo, os esquerdistas instan a Cacabelos a que demostre a súa “honradez” e destine o 1,5 m sobrantes dos crédito a amortizar débeda. 

Coordinadora Local de Esquerda Unida
O Grove

martes, 14 de novembro de 2017

Esquerda Unida denuncia que a falta de patrulla nocturna facilite actos vandálicos na carpa auditorio




Na carpa pódense ver butacas rotas, lonas esnaquizadas e restos de comida polo chan. Os esquerdistas, que denuncian os actos vandálicos, solicitan vixilancia e volven esixir que se poña en funcionamento o servizo nocturno da Policía Local.



O Grove, 14 de novembro de 2017. A agrupación local de Esquerda Unida ven de denunciar publicamente a permisividade que o concello ofrece aos vándalos para usar e esnaquizar o mobiliario público. Aos actos vandálicos sucedidos nos últimos meses en diferentes rúas locais agora súmanselle os estragos ocasionados na carpa auditorio instalada na praza do Corgo e que pon de manifesto que o Grove precisa dun servizo nocturno de Policía Local, situación que levan reclamando os esquerdistas dende o comezo do mandato. [ver outras novas relacionadas]



Butacas rotas, a lona do escenario esnaquizado, restos de comida e bebida... son unha mostra do estado no que se atopa a carpa auditorio. Os esquerdistas, que aportan fotos, denuncian calquera tipo de acto vandálico contra o patrimonio público, pero advirten que o goberno municipal ten responsabilidade no sucedido, “pois a carpa é accesible ao non quedar totalmente pechada, ninguén controla o acceso e a falta de Policía Local pola noite permite que calquera poida facer un botellón, unha festa, ou simplemente abrigarse do frío dentro da carpa e con elo, que os que decidan ocasionar estragos o poidan facer con total impunidade, tal e como sucedeu estes días”.



Por ese motivo, Esquerda Unida solicita que o goberno faga a súa labor e vixíe o acceso a “unha carpa que lle está ocasionando un gasto ao concello e aos veciños do Grove” e esixen que “dunha vez por todas poña a funcionar o servizo nocturno da Policía Local para evitar que actos como os sucedidos se volvan a repetir”.

Coordinadora Local de Esquerda Unida

O Grove


luns, 6 de novembro de 2017

Esquerda Unida nomea a José Antonio Otero novo coordinador local no Grove

Na asemblea celebrada o sábado no Grove, a agrupación esquerdista renovou os seus órganos de dirección local. José A. Otero, que releva a Juan Lamelas como coordinador, asegurou que asume o cargo “con gran ilusión e ganas de poñerse a traballar”.
O Grove, 6 de novembro de 2017.- Dando cumprimento aos estatutos emanados da XII Asemblea Nacional de Esquerda Unida, celebrada no mes de xuño, a agrupación local do Grove celebrou o pasado sábado a súa asemblea na que se renovaron os seus órganos de dirección internos e se elixiu o novo coordinador local.
A asemblea contou coa participación dun 70% da militancia, que tras un rico debate aprobou por unanimidade o informe de xestión presentado por Juan Lamelas, coordinador saínte e voceiro do grupo municipal. Por unanimidade foi tamén elixida a nova coordinadora local –máximo órgano de dirección– que decidiu nomear a José Antonio Otero, actual concelleiro da corporación municipal xunto a Lamelas, como novo coordinador da agrupación esquerdista do Grove.
Arroupado pola militancia, Otero asegurou que asume o cargo “con gran ilusión e ganas de poñerse a traballar”. Na nova coordinadora local continuarán tanto Lamelas como outros militantes que xa viñan formando parte da dirección e “incorpóranse novos compañeiros e compañeiras que veñen a enriquecer o traballo que levará adiante a agrupación”.
O desenvolvemento da asemblea e a aprobación por unanimidade dos documentos e propostas presentadas vén a sinalar a gran cohesión interna existente na formación grovense e a confianza da militancia na liña de traballo que vén desenvolvendo tanto a agrupación como o seu grupo municipal.
Tras as votación e a intervención de José Antonio Otero como novo coordinador local, a mesa presidencial abriu quenda de intervencións onde os asistentes puxeron xa tarefas á nova dirección, sobre todo no referente á mellora da comunicación e a ampliar o coñecemento de veciñas e veciños do Grove das propostas e posturas de Esquerda Unida nos distintos asuntos da vida municipal.
Membros da nova coordinadora:
1.   José Antonio Otero González
2.   Juan Lamelas Alfonso
3.   José Antonio Gondar Triñanes
4.   Ana Viso Vázquez
5.   José Antonio Taboada Magdalena
6.   Ana Cristina Domínguez Domínguez
7.   David Gondar Prieto
8.   Sonia Gondar Gondar




Coordinadora local de Esquerda Unida

O Grove

mércores, 1 de novembro de 2017

O Pleno aproba a moción de EU por unha política agroforestal en defensa do interese público

O Pleno do mes de outubro aprobou por maioría –unicamente o PP se abstivo– a moción presentada polo Grupo Municipal de Esquerda Unida solicitando unha política agroforestal en defensa do interese público.

Moción completa:

POR UNHA POLÍTICA AGROFORESTAL EN DEFENSA DO INTERESE PÚBLICO

luns, 28 de agosto de 2017

Esquerda Unida solicita medidas de seguridade para a vindeira Festa do Marisco

A agrupación esquerdista insta ao goberno municipal a imitar a seguridade usada durante a Festa do Albariño e instale obstáculos de formigón para pechar o recinto da festa. Tamén pide que busquen a colaboración doutros concellos para contar con máis efectivos da Policía Local durante o evento gastronómico.

O Grove, 28 de agosto de 2017.- Tralos atentados sucedidos en Cataluña e os diferentes atentados terroristas acontecidos en diferentes países de Europa nos últimos meses, todos eles utilizando o sistema de atropelo, a Agrupación Local de Esquerda Unida considera preciso extremar as medidas de seguridade na vindeira Festa do Marisco, un evento que atrae a máis de 200.000 persoas nos dez días que dura o a festa gastronómica de interese nacional.

O Ministerio de Interior anunciou o pasado 19 de agosto que a mesa extraordinaria da ameaza terrorista decidiu manter o nivel 4 de alerta pero con reforzos en diferentes dispositivos, facendo referencia aos dispositivos de seguridade en lugares de afluencia masiva como zonas turísticas ou eventos masivos. Para Esquerda Unida un deses eventos masivos é a vindeira Festa do Marisco que terá lugar do 5 ao 15 de outubro. Os esquerdistas indican que o recinto utilizado para desenrolar as actividades non é totalmente pechado e conta con numerosas posibilidades de acceso rodado, por ese motivo solicitan que se instalen barreiras de formigón para bloquear toda posibilidade de acceso incontrolado de vehículos. A modo exemplo poñen a vila veciña de Cambados, onde este ano o goberno decidiu facer uso deste sistema co fin de evitar calquera tipo de altercado durante a celebración da Festa do Albariño.


Do mesmo modo, os esquerdistas instan ao goberno a buscar a colaboración con outras administracións e concellos para contar con máis efectivos da Policía Local durante os dez días de duración do evento e facer un plan se seguridade acorde ao nivel de alerta e a un evento gastronómico que opta a ser de interese turístico internacional.

venres, 25 de agosto de 2017

Esquerda Unida critica as formas de Cacabelos coa obra de peonalización da rúa Castelao

Os esquerdistas entenden que o Alcalde tivo tempo suficiente para negociar e habilitar estacionamentos antes do comezo das obras. Tamén denuncian o que consideran un novo incumprimento dos acordos cos edís esquerdistas.

O Grove, 25 de agosto de 2017.- Juan Lamelas e José Antonio Otero, edís de Esquerda Unida, mostran o seu malestar coas formas utilizadas polo Alcalde con respecto ás obras de peonalización que en breve comezarán no tramo da rúa Castelao popularmente coñecido como Catorse, e que implicará o peche ao tráfico da rúa máis emblemática da vila. Os esquerdistas denuncian que xa dende o mes de marzo, cando trataban en xuntanzas o tema do auditorio, Cacabelos tenlles trasladado “que se atopaba en negociacións cunha familia e co párroco local para tratar de alugar ou mesmo mercar uns terreos Entre Hortas co propósito de habilitalos para estacionamentos alternativos ao peche da Catorse”. Por ese motivo os edís non entenden “como é que van a comezar as obras e o Alcalde aínda non ten nada avanzado”. Recordan ademais, que xa en maio de 2016 rexistraron unha solicitude para manter unha xuntanza de voceiros para coñecer os proxectos de peonalizacións, a alternativa coa que contaba o goberno para os aparcadoiros e a nova circulación que se propoñía trala obra. Xuntanza esta que nunca se levou a cabo, segundo indican dende o Grupo Municipal de Esquerda Unida.

Así mesmo, Lamelas e Otero denuncian que o Alcalde volve a faltar a un compromiso co seu Grupo Municipal, “pois teñen un acordo dende o ano pasado polo cal os cartos destinados á obra da Catorse que non se utilizasen en caso de recibir subvención se destinarían a complementar as obras acordadas, e executadas, de Meloxo e A Graña”. Unha cuestión que, segundo indican, foi confirmada polo Alcalde e a concelleira de Obras nunha xuntanza hai un mes, pero que agora “polo que lemos na prensa, parece que eses cartos se van utilizar unicamente para alugar ou mercar eses terreos destinados a aparcadoiros, pero a nós non nos dixeron nada”.

En definitiva, os edís de Esquerda Unida volven afirmar que o Alcalde e o seu grupo de goberno “non teñen un plan de traballo para mellorar o futuro do Grove, senón que actúan segundo as circunstancias do día a día sen dar solución aos problemas reais”. Consideran que esta circunstancia “é cotiá e provoca que ao igual que sucedeu co Auditorio, nesta obra volvan poñer o carro antes dos bois e se vexan na obriga de incumprir acordos cos demais grupos municipais e cos propios veciños”.

Grupo Municipal de Esquerda Unida

martes, 8 de agosto de 2017

EU reclamou no Pleno a limpeza das estradas, rúas e barrios do Grove así como outros asuntos de importancia para os veciños

A apertura dos baños de detrás da Lonxa, o arranxo da balaustrada de cristal da rúa Castelao e a do paseo de Terra de Porto, a reparación dos lombos das estradas da parroquia de San Vicente, o arranxo do paseo da Lanzada, seguridade na Praza de Arriba, o compromiso cos veciños da Pratería, xunto con outros asuntos foron postos enriba da mesa polo Grupo Municipal de EU no último pleno.

Na sesión plenaria do 31 de xullo, o Grupo Municipal de Esquerda Unida mostrou a súa preocupación polo estado en que se atopan diferentes estradas, rúas e barrios da localidade. Así, o concelleiro José A. Otero instou ao goberno a reclamar a Xunta de Galicia a limpeza da estrada de entrada do Grove e 
que une a Lanzada con San Vicente do Mar. Tamén pediu que do mesmo xeito se lle esixise á Deputación de Pontevedra a mesma actuación nas súas estradas pois, en palabras de Otero, “o vial interior de San Vicente mostra un total abandono e a Estrada do Conde da asco”. No mesmo senso esixiu ao Goberno municipal a realizar unha limpeza das rúas e barrios pois "están sucios e con herbas sobresaíndo das baldosas".

O edil esquerdistas tamén solicitou que se mantivesen abertas durante toda a tempada estival e nun horario razoable as casetas dos baños situadas detrás da Lonxa e que son utilizadas tan só durante a Festa do Marisco e a Festa do Carme. Segundo José A. Otero “o servizo de baño público e unha demanda dos veciños e visitantes e non supón un excesivo gasto nin prexuízo para o Concello”

A reparación da balaustrada de cristal que existe na rúa Castelao, á altura do restaurante Pan de Millo, foi outra das reclamacións realizadas polo Grupo Municipal de Esquerda Unida. Unha demanda que xa volve a pleno, pois fai máis de catro meses que está destrozada e xa provocou algún incidente. Os esquerdistas aproveitaron para reclamar tamén a reposición da balaustrada do Paseo de Lordelo, a altura do parque de Terra de Porto, que fora destruída polo lume no San Xoán do 2013.

EU tamén pediu que se arranxase o paseo de madeira da Lanzada, concretamente o que transcorre dende a rotonda central ata a zona de Sanxenxo, pois “os usuarios da praia queixáronsenos de que existen tornillos levantados que poden provocar algún que outro incidente.”

Unha solución para os lombos existentes en dous viais que unen a estrada interior de San Vicente coa da Lanzada, un que vai dende as Baladas ata a estrada da Lanzada e o outro dende a Farmacia ata Balea Marítima, foi outra das peticións do edil esquerdista, recordando ademais que un deles xa fora unha demanda realizada nos orzamentos do 2016.

José A. Otero preguntou si se estaba cumprindo cos compromisos adquiridos cos veciños da rúa Pratería, pois “hai veciños que están moi molestos xa que se retirou a farola pero non se fixo nada do prometido e na rúa seguen outros elementos que estorban”. Así mesmo aproveitou para pescudar si o goberno estaba facendo deixadez de funcións en canto á ordenanza de terrazas.

Outra das preguntas foi en relación á en que estado se atopaba a redacción da Carta de Servizos municipal, aprobada en pleno meses atrás. Otero tamén se preocupou polo paradoiro dos aparatos de ximnasia biosaludable que se retiraron do paseo de Lordelo e aproveitou para instar ao goberno a realizar un repaso das árbores que se atopan ao largo do mesmo, “pois invaden tanto o carril-bici como o dos peóns”.

A modo seguridade, o edil esquerdista instou a concellería correspondente a instalar unha balaustrada ou algún outro elemento para disuadir aos usuarios da Praza de Arriba a cruzar polo lugar onde se retirou o paso de peóns, pois “moitos seguen a cruzan polo mesmo lugar e obrigan aos vehículos a frear cando son estes os que teñen preferencia de paso”.

Otero tamén trasladou a queixa de moitos veciños debido a que algún negocio local baleira o vidro no colector correspondente a altas horas da noite, provocando a perturbación do descanso, cando existe unha ordenanza en vigor que prohibe realizar esa tarefa nese horario.

Por último, o esquerdista dou traslado dunha reclamación dun pai de alumno do colexio de Bizocas que segundo indica nun escrito remitido ao Concello, o centro informou aos titores dos nenos das diferentes paradas do transporte escolar, entre a que se atopa unha co nome de “Caídos” en referencia a que se atopa próxima á Praza da Fonte do Galo –noutrora chamada dos Caídos–, instando dese xeito ao Concello a tomar medidas para que os responsables teñan en consideración a Lei da Memoria Histórica, que provocou o cambio da Praza, para nomear doutro xeito esa parada escolar.

xoves, 8 de xuño de 2017

Esquerda Unida racha as negociacións presentes e futuras co goberno local

O Grupo Municipal de Esquerda Unida rompe toda relación co goberno local presidido por José Cacabelos tralo rexeitamento ao Plan de Actuacións 2017-2019 presentado pola agrupación de esquerdas.

O Alcalde aporta argumentos electoralistas para negarse a asinar o acordo con EU.

O Grove, 6 de xuño de 2016.- A inicios do pasado mes de maio, os concelleiros de Esquerda Unida presentaron ao equipo de goberno apoiado polo PSOE un documento titulado “Plan de actuacións 2017-2019”, no que expuñan unha serie de actuacións que os esquerdistas consideran prioritarias para o municipio. Entre elas atópanse cuestións como a necesidade dunha segunda exposición pública do PXOM, o Centro de Día, abrir negociacións coa Xunta para a construción dun novo centro de saúde na localidade ou a busca de financiamento autonómica e provincial para o proxecto de auditorio presentado polo goberno local entre outras.

Este documento foi a resposta que desde EU deron ao que eles consideran un goberno “á deriva” e absorbido polo día a día, o que se plasma en falta de planifiación e visión de municipio por parte do goberno de Cacabelos. Desde a agrupación de esquerdas sinalan que cada reunión co equipo de goberno é unha avalancha de novas ideas e proxectos, sen que se teñan pechado as anteriores propostas, que en moitas ocasións o propio goberno local abandona a pesar de contar co apoio de levalas adiante.

A gota que colmou o vaso da paciencia dos esquerdistas foi o rexeitamento a semana pasada do documento presentado, a pesares de que “o Alcalde díxonos que podíamos quitar o logo de Esquerda Unida e poñer o do PSOE porque eran cuestións todas que compartían”, para acto seguido rexeitar calquera acordo en base a ese documento, e amosar o rexeitamento do PSOE a realizar unha segunda exposición pública do PXOM, buscar financiamento autonómico e provincial para o proxecto de auditorio, conseguir un comedor escolar para o CEIP Rosalía de Castro ou continuar o paseo marítimo de Lordelo ata a Casa da Terceira Idade na avenida Irmáns Otero Goday e matizar algunhas outras actuacións. “Os argumentos que nos deron foron en todo momento electoralistas” afirma o voceiro de EU Juan Lamelas, “antepoñendo os intereses do seu partido aos dos veciños do Grove”. O Alcalde chegou a afirmar que non van asinar un documento que Esquerda Unida poida utilizar en campaña electoral acusando ao PSOE de non cumprir o acordado, “o que xa vén dando unha idea do nulo compromiso do PSOE co seu programa electoral e os veciños do Grove”.

Así, tras consulta coa militancia, o grupo municipal de EU decidiu romper toda negociación presente e futura co actual goberno do Grove, pois segundo Lamelas “non estamos dispostos a entrar nesta dinámica que nos propón Cacabelos nin a aceptar chantaxes de ningún partido”. “Desde Esquerda Unida imos abrir novas vías para facer cumprir o noso programa, que é o compromiso que temos coa veciñanza e os nosos votantes”.


Ábrese polo tanto un camiño de incerteza para o goberno do PSOE no Grove, ao perder toda posibilidade de negociación con un dos grupos cos que conseguiu sacar adiante os últimos orzamentos municipais, que actualmente atópanse prorrogados.

mércores, 17 de maio de 2017

Manifesto 17 de maio, Esquerda Unida

17 DE MAIO
O DEREITO A VIVIR EN GALEGO

“Amemos as rosas porque é breve e ao tempo porque fuxe e non para, aínda que as veiras das horas, nas esquinas, morran as verdades contra o vento”
Carlos Casares

O neoliberalismo tecnocrático levado a cabo por Núñez Feijóo, con perfecto cálculo dos seus efectos e consecuencias para cos dereitos das persoas, representa unha fría espada de Damocles que ameaza con abaterse, de forma silenciosa, mais igualmente violenta, sobre as posibilidades vitais da lingua galega, en tanto que dereito das galegas e dos galegos a poder vivir en galego en todos os eidos da vida en sociedade.

As advertencias sobre a inaplicación de varios dos preceptos da Carta Europea das Linguas Rexionais e Minoritarias (debéramos dicir minorizadas, pois é un efecto das políticas e estratexias do poder establecido) semellan non ter producido máis efecto ca unha defensa insulsa e pouco valente das políticas levadas a cabo pola Xunta de Galicia desde que nos desgoberna Núñez Feijóo.

Preguntámonos cal é a ambición da dereita neoliberal tecnocrática para co galego? Como poden seguir amparando unha falacia epistémica como a do bilingüismo harmónico, que non é máis ca unha coartada para unha paseniña substitución da lingua dominada e ‘minorizada’ (galego) pola dominante e ‘maiorizada’? Como é que non se ruborizan ante os recentes datos que nos falan do imparable proceso de desgaleguización? Non ten nada que ver con este feito o mal chamado Decreto do Plurilingüísimo que converte a nosa lingua nai nunha lingua estranxeira?

O último informe sobre os usos da lingua galega na mocidade, que foi presentado neste 2017, e que figura pendurado na páxina web do Consello da Cultura Galega, rexistra aspectos moi preocupantes que deberan alarmar ao executivo galego e ao departamento responsable da normalización da lingua galega.

A auto-representación da nosa lingua, mesmo nos grupos que a falan, é negativa, o que acelera e permite a existencia de actitudes e comportamentos prexuizosos cara ao galego, que non se dan con respecto ao castelán. O mesmo acontece no tocante ao mito da imposición, que sempre se dá co galego, nunca co castelán. O informe alerta de actitudes que acentúan a normalización da desigualdade histórica entre a lingua galega e a castelá, pois se o galego é vinculado a imposición, o castelán é elevado ao rango de liberdade. Son estas unhas daniñas percepcións que aniñan no imaxinario e conforman un atranco serio e real para que o galego se volva lingua de uso habitual na comunicación da mocidade.

Estas percepcións, acompañadas por unha reducidísima presenza de medios de comunicación en galego, así como por escasas expresións culturais en galego, fan que, de non producirse impulsos desde a Xunta de Galicia, o futuro da nosa lingua sexa cada vez máis fráxil. O informe mencionado fala do uso predominante do castelán no consumo cultural e mediático. O universo do lecer debe formar parte das estratexias da Xunta de Galicia á hora de deseñar políticas expansivas de uso.

Nos diferentes eidos que forman parte da enquisa levada a cabo polo Informe anterior, ponse de relevo que o castelán se impón en diferentes aspectos do medio académico, é habitual no medio laboral, onde, por momentos, o galego é claramente residual.

Desde Esquerda Unida reclamamos unha decidida actuación para garantir os dereitos lingüísticos de galegos e galegas. Con urxencia. Con rigor. O Plan Xeral de Normalización Lingüística pode ter plena validez. No entanto, sería óptimo unha actualización do mesmo, coa participación dos axentes sociais, para ter en conta a realidade do mapa de recursos e usos da lingua galega.

A lingua galega non é só unha ferramenta da que se demostra ter competencia. Non. De nada serve aseverar que existe competencia oral e escrita se logo non se usa. A lingua vive porque é o medio polo que se anoan e afortalan as relacións interpersoais. Por iso, o galego precisa ser recoñecido como útil para esas relacións interpersoais en todos os eidos da vida en sociedade.

A escola é un axente normalizador esencial, coa condición de que se faga desde o convencemento de que o galego non pode ser tratado coma se fose o inglés. Por iso, cómpre un novo decreto, que conte coa aprobación de toda a comunidade educativa. É urxente tamén que a Xunta ofreza xa unha avaliación das consecuencias do Decreto do Plurilingüismo. O último informe da Mesa pola Normalización Lingüística, A lingua galega na educación infantil de Galiza de 3 a 6 anos. Curso 2016/2017, rexistra situacións inadmisibles coma o feito de que existan máis materiais pedagóxicos e multimedia en lingua inglesa que en galego. Isto imposibilita o desenvolvemento dun ensino 100 por 100 en galego. A Xunta, en tanto que administración pública, debe garantir o acceso aos materiais didácticos e pedagóxicos e a súa diversidade. Non será preciso indicar que o castelán se converte en dominante.

Compostela, 17 de maio de 2017

xoves, 4 de maio de 2017

Esquerda Unida presenta ao goberno un plan de actuacións prioritarias para o concello

O Grove, 3 de maio de 2017.- A agrupación local de Esquerda Unida decidiu presentar ao Alcalde, e ao seu equipo de goberno, un plan de actuacións a realizar no tempo que resta de mandato. Unhas actuacións que os esquerdistas consideran precisas e prioritarias para os veciños do Grove.

Esquerda Unida decidiu dar este paso ante a situación actual do goberno municipal do cal consideran que está a deriva, máxime tras ver como realiza propostas de inversións inconexas e sen planificación de ningún tipo. Os esquerdistas poñen como exemplo a proposta de Auditorio que, segundo indican, se irá aos 5 millóns de euros de inversión municipal, ou a peonalización de rúas do casco urbanos sen plans de tráfico e alternativas de estacionamento. Todo isto namentres traballan con un orzamento prorrogado cando xa van alá cinco meses, conclúen.

Segundo a agrupación de esquerdas, o goberno municipal móstrase absorbido polo día a día, e a impresión que transmite é que gobernan a salto de mata.

Por ese motivo, desde Esquerda Unida, e logo de reunir á súa asemblea, propoñen un plan de actuacións no que se inclúen demandas históricas da veciñanza así como medidas que consideran necesarias para o bo funcionamento municipal e a mellora dos servizos públicos que se ofrecen aos veciños.


Executiva Local de Esquerda Unida
O Grove

venres, 31 de marzo de 2017

Esquerda Unida pide o pintado dos pasos de peóns de Luis Seoane, limpeza nas rúas e outras melloras para os veciños

No  Pleno do pasado luns, o edil do Grupo Municipal de Esquerda Unida, José Antonio Otero, fixo unha serie de solicitudes e preguntas ao Goberno no derradeiro punto da orde do día.

O esquerdista volveu esixir, xa o fixera hai dous meses, que se pintasen os pasos de peóns de toda a rúa Luís Seoane (dende Abanca ata a Fonte dos Cabalos de Confín). Otero recordoulle á concelleira delegada que as condicións climatolóxicas que utilizou como escusa no pleno de xaneiro, non foi impedimento para marcar o paso de peóns do cruce do garda nin a sinalización da nova circulación e aparcadoiros do Monte da Vila.

Así mesmo, o edil de EU solicitou que se fixese unha revisión de todos os pasos de peóns do municipio e se pintasen os que estivesen en mal estado, poñendo como exemplo o da entrada da rúa Rosalía de Castro que, segundo indicou, é inexistente.

Continuando coa seguridade vial, o esquerdista pediu que se sinalizasen de mellor modo os lombos das estradas municipais, pois considera que hai ocasións en que é difícil apreciar a súa existencia ata o momento de ter que superalos. Cuestión que pode ocasionar graves problemas para os usuarios e veciños, aínda sen ter superado a velocidade permitida.

Otero tamén solicitou que se fixese un mantemento máis regular das diferentes rúas en canto a limpeza pois hai varias, e puxo como exemplo Rosalía de Castro, que mostran unha imaxe lamentable.

O edil esquerdista interesouse polo número de sancións que o concello tramitou nos dous últimos anos relacionadas coas deposicións caninas. Otero expresou a súa preocupación pola existencia de rúas nas que o seu tránsito se fai imposible sen ter que sortear os numerosos excrementos existentes. Así mesmo pediu contundencia ante este tipo de comportamentos do donos dos cans.

A situación do Centro de Saúde grovense foi outro dos temas que o edil de Esquerda Unida puxo sobre a mesa neste pleno. José A. Otero preguntoulle ao Concelleiro de Sanidade se estaba actuando para defender a sanidade pública no Grove pois, segundo indica, ten constancia do caos que está a provocar a baixa de varios médicos que non son substituídos, debendo facer fronte outros facultativos a un maior número de pacientes, o que ocasiona un problema a hora de resolver as problemática dos enfermos.

Tamén o Portal Cidadá da páxina web municipal foi eco de denuncia por parte do Grupo Municipal de Esquerda Unida, pois non funciona e nin tan sequera se poden descargar documentos.

Por último, Otero recordoulle ao goberno que segue á espera do Informe sobre os Voluntarios da Festa do Marisco. Un documento que, segundo o edil esquerdista, levan agardando máis de 5 meses e que debe elaborar o servizo municipal correspondente, polo que non aceptan as desculpas de falta de tempo da concelleira delegada, xa que iso lles crearía dubidas sobre a súa legalidade.


Cabe destacar que o goberno anunciou que tomaba nota das solicitudes para procurar realizalas, sen responder a ningunha delas no propio pleno. Tampouco dou resposta á pregunta relacionada coas multas por deposicións dos cans, nin se ían actuar con contundencia no tema. A concelleira de Turismo indicou que en breve se lle trasladaría ao Grupo Municipal de Esquerda Unida o documento sobre os voluntarios da Festa do Marisco. En canto ao problema do Centro de Saúde, o concelleiro de Sanidade anunciou que é coñecedor da problemática, pero non dou resposta sobre a actuación municipal neste aspecto, emprazando aos prexudicados a presentar reclamacións no propio centro.

EU rexeita unha Ordenanza de Ruídos que lle ocasionará gastos aos negocios e ao propio Concello

EU opúxose á Ordenanza de Ruídos xa que ocasionará gastos den ata 50 € mensuais aos negocios e preto de 6.000 € ao propio Concello e non solucionará os problemas de perturbación do descanso dos nosos veciños ao carecer de medios materiais e físicos para facela cumprir.

COMUNICADO DE PRENSA

O Grove, 30 de marzo de 2017.- O pasado luns tivo lugar a sesión plenaria do mes de marzo. Na mesma aprobouse con maioría simple a Ordenanza Municipal de Contaminación Acústica cos votos favorables do PSOE (8) e a abstención do PP (4), mostrando o seu rexeitamento tanto Esquerda Unida (2) como BNG (2).

Dende o Grupo Municipal de Esquerda Unida indican que están comprometidos co dereito ao descanso dos veciños do Grove e consideran que un dos deberes deste concello e rematar cos ruídos e molestias que afectan aos mesmos. Pero, logo de ter resoltas as dúbidas técnicas tras unha reunión –impulsada polo propio grupo municipal– coa empresa redactora da ordenanza Virocem Ruidos e tras analizar ao completo a Ordenanza, os esquerdistas atópanse con varios asuntos que lles levou a rexeitar a súa aprobación.

Segundo o seu voceiro, Juan Lamelas, a Ordenanza non axuda a solucionar problemas puntuais de ruídos, xa que “non é unha cuestión de ordenanza senón de medios para facer cumprir a mesma, uns medios dos que o concello a día de hoxe non dispón”.

O esquerdista indica que “un dos problemas máis graves na perturbación dos descanso dos nosos veciños dáse polo ruído xerado a raíz da aglomeracións de persoas as portas dos locais de copas e non polo dos propios locais”. Unha situación que “non se soluciona coa Ordenanza de ruído, tal e como lles indicaron os técnicos da empresa ao voceiros dos Grupos Municipais, senón de orde público” e, segundo Lamelas, “ao carecer de patrulla nocturna de Policía Local seguirá sen ter solución”. Os esquerdistas tamén detectaron “o incumprimento absoluto da ordenanza que se atopaba en vigor; non existen os mapas de ruído esixidos, non se lle obrigou aos locais a cumprir as normas da ordenanza (unha delas tan simple como a instalación dun cartel avisando das posibles lesións permanentes no oído ante a exposición prolongada aos niveis sonoros do interior do local) e outras máis”.

O voceiro esquerdista denuncia que “para máis inri, este goberno vai privatizar un novo servizo, pois a pesar de non haber cambios moi substanciosos na nova ordenanza, será unha empresa privada, por un prezo de uns 500 € mensuais (preto de 6.000 € anuais), a que fará un seguimento da mesma e vixiará que os negocios do Grove se adapten e instalen un sonógrafos-rexistradores de ruído”. Un aparatos que “todos ou a maioría dos negocios do Grove, non só locais de copais e cafeterías como nos quixeron facer crer na reunión, deben instalar pois o artigo 21.2 da nova Ordenanza indica que <Todas as actividades que produzan perturbación por ruído, nas que os niveis de ruídos sexan producidos por máquinas, fontes musicais ou actividades que xeren ruídos, teñen a obrigación de instalar un sonógrafo-rexistrador segundo as características do Anexo I.B.7>”. Isto, segundo Lamelas “supón que aparte dos locais de copas e cafeterías, tamén os talleres, almacéns, panaderías, tendas de conxelados, restaurantes e calquera pequeno negocio con unha radio, televisión, neveira ou outro aparato xerador de ruído terán a obriga de instalar ese aparato que lles suporá un custo de entre 25 e 50 € mensuais”.

Outra das cuestións que criticou o voceiro do Grupo Municipal de Esquerda Unida é que a Ordenanza non foi informada aos propietarios dos negocios afectados, xa que “tras unha pequena enquisa comprobaron que ningún deles tiña constancia de que se trataba este asunto no pleno e, cando menos, cremos que se tería que ter enviado unha circular co texto para que estes tivesen coñecemento do documento”. Así mesmo, o esquerdista entende que os 15 días de marxe que teñen os negocios para instalar o sonógrafo-rexistrador son “moi escasos, pois en ese tempo e practicamente imposible que as empresas instaladoras poidan adaptar a todos os negocios do municipio”.

Por último, e aínda que non o trasladaron no propio pleno, Lamelas pregúntase se o Concello “vai poñer a funcionar o Servizo de recollida de lixo en horario de mañá ou tarde, pois o Artigo 14.5  indica que <O Concello promoverá que os servizos de limpeza e/ou recollida de lixo actúen preferentemente durante os períodos diúrno e vespertino. En todo caso, e especialmente en horario nocturno, adoptaranse as medidas necesarias para a redución do impacto sonoro, sempre dentro dos valores legais,...>”.

Por eses motivos, o Grupo Municipal de Esquerda Unida decidiu rexeitar a aprobación da Ordenanza e anuncian que alegarán a mesma en canto se abra o prazo pertinente.

Grupo Municipal de Esquerda Unida

domingo, 5 de febreiro de 2017

EU solicita que o concello asesore e axude aos veciños afectados pola clausula solo

O pasado venres, o voceiro do Grupo Municipal de Esquerda Unida, Juan Lamelas, rexistrou unha iniciativa dirixida a Xunta de Goberno Local na que se solicita que o Concello estableza un dispositivo extraordinario de asesoramento á cidadanía para informar aos veciños se as súas hipotecas conteñen cláusulas solo e, si procede, asesoralos nos pasos a seguir para recuperar o diñeiro inxustamente pagado á entidade de aforro co que subscribiron as hipotecas das súas vivendas. Así mesmo, os esquerdistas queren implicar á Deputación Provincial para que colabore cos servizos municipais.

Escrito dirixido á Xunta de Goberno Local do Concello do Grove

O solo hipotecario é unha cláusula que establece un interese mínimo a pagar na nosa hipoteca aínda que o índice ao que estea referenciado o préstamo hipotecario (normalmente Euribor a 12 meses) cotice en valores inferiores ao devandito límite. É, noutras palabras, o interese máis baixo que pagaremos nunca pola nosa hipoteca. A cláusula solo a atoparemos entre as condicións do contrato da hipoteca, aínda que posiblemente non aparecerá baixo este nome.

A cláusula solo impide aos clientes que a cota da súa hipoteca se reduza cando descende o índice de referencia do seu préstamo hipotecario, xa que aplica un interese mínimo a pagar sempre que o Euribor estea por baixo do valor que marque a cláusula. O solo hipotecario non afecta ás hipotecas fixas, xa que o interese neste tipo de préstamos hipotecarios non está referenciado a ningún índice, polo que non varía e as cotas sempre son as mesmas.

É un abuso máis da banca cara aos usuarios, que a nosa organización veu manifestando, e onde nos felicitamos da última decisión do Tribunal Europeo neste sentido, concedendo a retroactividade total nas cláusulas solo.

Desta forma, contradí ao Alto Tribunal español e ao ditame de xullo, que só concedía a devolución retroactiva do cobrado en exceso até a devandita data, e asume as teses defendidas pola Comisión Europea. Neste sentido, estimou que limitar a retroactividade da devolución do cobrado en exceso a maio de 2013, data da primeira sentenza do Tribunal Supremo sobre este asunto, oponse ao dereito comunitario, o que na práctica equivale a recoñecer a retroactividade total desde a firma do préstamo.

Segundo a sentenza, "A declaración xudicial do carácter abusivo dunha cláusula debe ter como consecuencia o restablecemento da situación na que se atoparía o consumidor de non existir dita cláusula. Por conseguinte, a declaración do carácter abusivo das cláusulas solo debe permitir a restitución das vantaxes obtidas indebidamente polo profesional en detrimento do consumidor".

Unha noticia moi esperada polo conxunto de consumidores, onde segundo as asociacións que traballan na defensa dos seus dereitos, coinciden en aconsellar aos usuarios que para recuperar o seu diñeiro, antes de dar o paso de acudir aos tribunais hai que dirixirse ao banco e reclamar as cantidades.

Pero é moi posible que a entidade se negue ou que ofreza  asinar un acordo trampa polo que só devolvería unha parte. Podéndose caer nun erro xeral do "máis vale paxaro en man que cento voando", entrando por tanto noutro abuso por parte de quen teñen máis medios para a negociación.

Por iso, enténdese como moi importante para garantir os dereitos dos consumidores que estes estean desde o primeiro minuto ben asesorados.

Entendemos que os Concellos como administracións máis próximas aos cidadáns non poden mostrarse  neutrais ante este abuso e deben poñerse á beira dos consumidores neste sentido para salvagardar os seus dereitos ante esta sentenza do Tribunal Europeo.

Por todo o exposto,

SOLICITA

1.           Que o Concello estableza un dispositivo extraordinario de asesoramento á cidadanía para informar aos posibles afectados se a súa hipoteca contén cláusulas solo e, se procede, os pasos a seguir para recuperar o diñeiro inxustamente pagado á entidade de aforro coa que subscribiu a hipoteca da súa vivenda.

2.           Que se  inste á Deputación Provincial para que asesore e colabore cos servizos municipais que se cren na provincia.



Prensa:

Lamelas exige asesoramiento municipal sobre cláusulas suelo [ver noticia web]

sábado, 4 de febreiro de 2017

Esquerda Unida ante a situación do voluntariado da Festa do Marisco

O Grove, 3 de febreiro de 2017.- A raíz das informacións publicadas na prensa no día de hoxe (venres), así como da reunión que o goberno mantivo con traballadores da última edición da Festa do Marisco, Esquerda Unida quere comunicar á opinión pública, ao igual que fixo no seno do Consello Local de Turismo, o seu parecer sobre a situación creada trala apertura dun expediente por parte da Inspección de Traballo ao Concello do Grove, así como que se coñezan as iniciativas e advertencias que dende a agrupación de esquerdas viñeron realizando ao longo dos anos cos distintos gobernos municipais.

Segundo explican desde a agrupación que representan no Concello os edís Juan Lamelas e José Antonio Otero, “desde o noso Grupo Municipal levamos anos avisando de que o voluntariado da Festa do Marisco supón unha fraude á Seguridade Social ao ser postos de traballo encubertos, ademais de supoñer un menoscabo aos dereitos dos traballadores” polo que desde Esquerda Unida “propuxemos en numerosas ocasións, aos gobernos dos distintos mandatos, a eliminación da figura do voluntario na Festa do Marisco e a súa substitución por persoal contratado coa súa correspondente alta na Seguridade Social”. Unha petición que sempre caeu en saco roto ata o pasado ano, cando lograron que se reflectise nos Orzamentos Municipais 2016 tralas negociacións mantidas co goberno, e que finalmente o equipo liderado por José A. Cacabelos incumpriu ao alegar dificultades no proceso.

Os esquerdistas explican que “levamos esperando polo informe da selección dos voluntarios desde o 21 de outubro, data na que o solicitamos por primeira vez, e coincide que esta mesma semana volvemos a solicitalo en Pleno e a pesares de que xa tiñan planificada unha reunión cos traballadores non se nos dixo nada ao respecto”. Por este motivo dende Esquerda Unida consideran que “o proceder do goberno municipal neste asunto está deixando moito que desexar”. Así, desde a agrupación están tratando a posibilidade de pedir responsabilidades políticas ao concelleiro de persoal así como á concelleira de turismo e ao Alcalde. “Non só procederon de xeito incorrecto, se non que se encargaron de publicar nos medios de comunicación que ían cometer fraude á Seguridade Social, ao anunciar primeiro que farían contratos por acordo político con EU, e logo anunciar que recuaban e onde ía haber unha relación laboral habería un voluntario”.
A situación xerada causou preocupación en parte do persoal que traballou na Festa, polo que os concelleiros de EU mantiveron estes días xuntanzas con distintos traballadores, os cales lles trasladaron os seus casos particulares. “O Concello, ao ser responsable dunha mala praxe laboral, debe axudar a resolver os prexuízos que se lle puideron causar a algunhas das persoas que accederon a participar na Festa nunhas condicións e que agora atópanse con outras ben distintas”, sentencian dende EU.

Orzamentos 2017

Esta situación non lle virá nada ben ás intencións do Alcalde de negociar os orzamentos municipais para este ano. As contratacións da Festa do Marisco foi un dos puntos que o goberno aceptou incorporar aos orzamentos do ano pasado a proposta de Esquerda Unida, e non só non o cumpriron, se non que parece que podería chegar a converterse nun problema de gran envergadura para o Concello do Grove de non concretarse o acordo entre Concello e Inspección de Traballo. A isto hai que sumarlle a defensa que fai Cacabelos da figura do voluntariado na Festa. Segundo os esquerdistas “que o Alcalde defenda máis que nunca a figura do voluntariado na Festa do Marisco en contra do acordado con Esquerda Unida –e do criterio da Inspección de Traballo– non é unha boa maneira de ir a unha negociación con nós”.

Consello Político Local

Esquerda Unida O Grove