Esquerda Unida denuncia o atraso na licitación da Escola de Música Municipal

Solicitan información ao Concello do Grove sobre o estado do servizo xa que, co curso escolar iniciado e as actividades extraescolares e deportivas en marcha, a Escola de Música aínda non coñece adxudicatario. Critican que a situación se repita cada ano.

Esquerda Unida insta ao goberno local a axilizar os trámites, advertindo que o atraso podería acurtar o curso, e que está prexudicando ás familias e ao alumnado á hora de organizar as súa axendas. Lembran que o 1 de xullo o goberno indicou que se ía licitar por 4 anos e que isto implicaría maior tempo de publicidade.

O Grove, 19 de setembro de 2024.– O grupo municipal de Esquerda Unida vén de solicitar información oficial ao Concello do Grove sobre o estado actual da Escola de Música Municipal. A formación de esquerdas critica que, malia que o curso escolar xa comezou, e xa se están iniciando as diferentes actividades extraescolares e deportivas, da Escola de Música non se ten ningún coñecemento pois o servizo aínda non foi licitado, o que, segundo Esquerda Unida, evidencia unha preocupante falta de xestión por parte do goberno local. Esta non é a primeira vez que ocorre algo semellante, mais este ano o atraso é aínda maior, o que provoca preocupación e posibles inconvintes para os usuarios potenciais do servizo.

José Antonio Otero, voceiro de Esquerda Unida, lembra que no pleno do 1 de xullo, o seu grupo formulou unha pregunta sobre a licitación da Escola de Música, á que o goberno respondeu que “estaban traballando para sacala o máis axiña posible, xa que tiñan a intención de licitar o servizo por un período de 4 anos e segundo explicaron, isto implicaba un maior tempo de publicidade”. Non obstante, Esquerda Unida denuncia que, dende aquela resposta, non se tomou ningunha medida concreta. “Se a día de hoxe a licitación non se publicou, entendemos que renunciarán á proposta de facelo por 4 anos, pois se con un ano xa vai implicar atrasos co calendario ordinario, levalo adiante por 4 suporía un atraso aínda maior en canto ao comezo do curso,” subliñou Otero.

Para Esquerda Unida, este novo atraso está a causar preocupación ás familias, que precisan organizar os horarios dos seus fillos en función das actividades extraescolares, e ao resto de usuarios, que poden ter dificultades para o encaixe desta actividade con outras responsabilidades persoais e laborais. "Esta falta de planificación e previsión non só prexudica á organización das familias, senón que podería acurtar o curso escolar, co conseguinte impacto negativo na educación musical do alumnado", advertiu Otero.

Esquerda Unida insta ao goberno municipal a axilizar os trámites de maneira urxente para evitar máis prexuízos aos potenciais usuarios e garantir que as clases poidan comezar o antes posible. “A inacción e a falta de xestión son xa inaceptables, e non podemos permitir que esta situación continúe prexudicando á veciñanza ano tras ano,” concluíu o concelleiro de Esquerda Unida.

EU presenta unha moción para protexer o medio mariño a través dunha campaña co lema “O Mar Comeza Aquí”

 

A proposta, que defenderá Anxo Meis no vindeiro pleno, pretende concienciar á poboación sobre a importancia de evitar a vertedura de residuos nas redes de augas pluviais. A iniciativa inclúe accións como a instalación de sinalización nos sumidoiros, actividades educativas e a colocación de trampas de lixo.

Esquerda Unida pide ademais que o Concello se adhira á Semana Europea da Redución de Residuos que se celebra anualmente nas últimas semana de novembro e que este ano enfócase no desperdicio de alimentos.

O Grove, 16 de setembro de 2024.– O Grupo Municipal de Esquerda Unida levará ao pleno deste mes unha moción coa que busca impulsar unha campaña de concienciación baixo o lema "O Mar Comeza Aquí". A proposta, que será defendida polo concelleiro Anxo Meis, ten como obxectivo principal sensibilizar á cidadanía sobre a importancia de evitar a vertedura de residuos nos sumidoiros, co fin de protexer a saúde do medio mariño e preservar a riqueza natural do municipio.

Meis explicou que "O Grove, co seu importante patrimonio natural e mariño, non pode permitirse ignorar o problema crecente da contaminación nas nosas costas. Pequenos residuos que se tiran ao chan, como cabichas ou plásticos, acaban nos sumidoiros e, finalmente, no mar, onde causan un impacto negativo tanto no ecosistema como nas actividades económicas que dependen del, como a pesca e o turismo."

A moción inclúe diversas accións concretas, entre as que destaca a instalación de sinalización específica en todos os sumidoiros e puntos de desaugue de augas pluviais do concello, advertindo sobre a conexión directa entre as rúas e o mar. Ademais, proponse a organización de actividades educativas en centros escolares e asociacións veciñais, así como a colaboración con entidades locais para maximizar o impacto da campaña.

Outra das medidas incluídas na proposta é a instalación de "trampas de lixo" nos sumidoiros, co fin de reter os residuos antes de que cheguen ao mar, facilitando así a súa recollida polos servizos de limpeza municipais.

Esquerda Unida tamén busca que o Concello se adhira á Semana Europea da Redución de Residuos (EWWR), que se celebra anualmente nas últimas semanas de novembro e que este ano (do 16 ao 26) enfoca o seu labor no desperdicio de alimentos.

Anxo Meis subliñou que "esta campaña non é só unha chamada á acción para a cidadanía, senón tamén unha oportunidade para que O Grove se converta nun referente na loita contra a contaminación mariña. A preservación do noso medio ambiente é unha responsabilidade compartida, e dende Esquerda Unida estamos comprometidos en liderar esta tarefa".

A moción será debatida no pleno municipal de setembro, onde Esquerda Unida espera contar co apoio do resto de grupos políticos e, sobre todo, co compromiso do goberno municipal para executar esta iniciativa de gran relevancia para o futuro do Grove.

[Ver/descargar Moción]

Esquerda Unida presenta a rendición de contas do primeiro ano de mandato

O boletín, que xa está dispoñible na web www.euogrove.es e nos vindeiros días será distribuído na rúa en formato papel, supón un exercicio de compromiso coa transparencia e o traballo realizado polos seus concelleiros.

Nas súas oito páxinas ofrecen un detallado resumo dos diferentes rogos e preguntas expostos nos plenos, das diferentes mocións, dos comunicados de prensa, da axenda dos concelleiros e dos diferentes acordos alcanzados.

O Grove, 15 de setembro de 2024.- O Grupo Municipal de Esquerda Unida saca á rúa a súa rendición de contas correspondente ao primeiro ano de mandato, nun exercicio de transparencia e compromiso coas veciñas e veciños do Grove. Este informe, dispoñible tanto en formato dixital na súa páxina web como en formato papel que se repartirá polas rúas nos vindeiros días, ofrece un detallado resumo das accións e iniciativas levadas a cabo polos concelleiros José Antonio Otero, Susana Millán e Anxo Meis.

Baixo o título "Compromiso e Transparencia: Un ano de labor do Grupo Municipal", Esquerda Unida destaca o traballo realizado en diferentes ámbitos, dende os numerosos rogos e preguntas formulados nos plenos municipais ata as mocións presentadas, e os acordos alcanzados co grupo de goberno que beneficiaron á veciñanza.

O boletín tamén inclúe os diferentes comunicados de prensa enviados polo grupo municipal e a axenda dos concelleiros, que reflicte a súa intensa actividade en reunións con colectivos, encontros co goberno e a súa participación en actos institucionais, unha información que Esquerda Unida considera esencial para achegar á cidadanía unha visión completa do seu labor.

Entre as accións destacadas sublíñanse o acordo do mes de xullo de 2023 que, ademais de ocasionar unha redución no salario do goberno municipal, supuxo un compromiso para varias accións a curto prazo; e o acordo de xullo de 2024 que permitiu destinar unha parte significativa do Remanente de Tesourería do 2023 a melloras para O Grove.

Esquerda Unida reafirma o seu compromiso coa transparencia e a rendición de contas, comprometéndose a seguir traballando con firmeza para mellorar a calidade de vida dos seus veciños e veciñas.

[descargar Rendición de Contas]

EU volve insistir nas súas propostas de seguridade e accesibilidade na Festa do Marisco

 

Entre as demandas presentadas por Susana Millán, no pasado Consello Local de Turismo, destaca o reforzo das medidas de seguridade, a mellora de estacionamentos, a instalación de puntos de venda accesibles e a distribución das actividades culturais a diferentes áreas do Grove para dinamizar a celebración.

A concelleira de Esquerda Unida tamén preguntou polo método utilizado para destinar 100.000 euros do Plan de Sustentabilidade Turística en Destino sen ter contratada a consultora que xestione a totalidade do plan. Lembran que é preciso executar 500.000 euros máis antes de rematar o ano para obter unha prórroga e non perder os 2 millóns de euros.

O Grove, 11 de setembro de 2024 – O pasado xoves celebrouse un Consello Local de Turismo, despois de varios meses de insistencia por parte do Grupo Municipal de Esquerda Unida, para abordar cuestións relacionadas coa inminente Festa do Marisco. A concelleira de Esquerda Unida, Susana Millán, expresou a súa satisfacción pola convocatoria, aínda que sinalou que esta produciuse "pola proximidade da Festa do Marisco e a necesidade do Alcalde de informar das novidades e avances, así como, para procurar propostas para as Centolas de Ouro"

Durante a xuntanza, Millán expuxo varias demandas que Esquerda Unida vén formulando de forma recorrente nos últimos anos, sen que, segundo indica, “o Concello as teña en conta, a pesar de mostrarse favorables a elas”. Entre as principais preocupacións do grupo, destacan as medidas de seguridade, como a solicitude de reforzo de efectivos dos corpos e forzas do estado mediante a colaboración con outros concellos e a administración autonómica. Tamén preguntou se se seguiría pechando o recinto con barreiras que impidan a entrada accidental de vehículos tal e como ven realizando nos últimos anos.

Outra das cuestións abordadas foi a accesibilidade. Esquerda Unida insistiu na necesidade de instalar unha caixa de venda de tickets a nivel do chan para facilitar o acceso das persoas con mobilidade reducida. Millán tamén preguntou pola implantación do sistema de pagamento con pulseira, contemplado no Plan de Sustentabilidade Turística en Destino, que non foi executado na edición anterior da festa.

En canto á organización do tráfico, Esquerda Unida propuxo que os autobuses non estacionen na zona da festa e os seus arredores, permitindo así máis espazo de aparcadoiro  para vehículos particulares. Segundo a concelleira, esta medida aplícase en moitos concellos e cidades, e no Grove poderíase facer uso de espazos como a Toxa ou a Lanzada para o aparcamento de autobuses, permitindo tan só a carga e descarga de viaxeiros nas proximidades do recinto da festa.

Millán tamén instou a levar actuacións musicais e culturais a diferentes puntos do concello para espallar a festa máis aló da Praza do Corgo e dar unha alternativa de ocio ás horas “mortas” da festa, e propuxo que se crease un concurso de escaparates ou envellecemento de fachadas co propósito de implicar ao comercio local e á veciñanza na Festa.

Aínda que non foron expostas nesta xuntanza, a concelleira de Esquerda Unida reitera tamén outras iniciativas xa propostas en anos anteriores, e que tampouco se levaron a cabo. Entre elas, a instalación do coñecido Punto Morado durante a celebración dos concertos da Festa, “un espazo que pode contar coa colaboración da Xunta de Galicia, que estivo instalando puntos lila e “arcoíris” en diferentes festivais do país durante este verán”; e que se promocionasen os espazos turísticos como a Salazón, a Siradella, o parque Xaquín Álvarez Corbacho ou a zona de San Vicente, poñendo en funcionamento o autobús circular que percorreu o concello durante o verán (antigo Grobus).

A concelleira tamén aproveitou a ocasión para preguntar polo estado do Plan de Sustentabilidade Turística en Destino. Esquerda Unida manifestou a súa preocupación polo método utilizado polo goberno municipal para destinar 100.000 euros deste plan ao financiamento dos concertos da Festa do Marisco, sen contar coa consultora necesaria para a execución da totalidade do PSTD. Ademais, Millán destacou a urxencia de executar outros 500.000 euros antes do final do ano para poder beneficiarnos da prórroga e evitar a perda dos 2 millóns dos fondos do plan.

Finalmente, Millán destacou que a súa agrupación foi a única que realizou propostas e se interesou polo desenvolvemento xeral da festa.