luns, 19 de outubro de 2015

Esquerda Unida apoia ás Marchas da Dignidade a anima a participar este 24 de outubro na mobilización en Santiago de Compostela

Desde a Asemblea Local do Grove de Esquerda Unida apoiamos a mobilización convocada polas Marchas da Dignidade prevista para o próximo 24 de outubro na Praza do Obradoiro en Santiago de Compostela e facemos un chamamento aos veciños e veciñas do noso concello a participar na mesma.

Somos conscientes da situación dramática que está a vivir a maioría social. A chamada crise económica lonxe de rematar chegou para quedarse, por moito que algúns utilicen certos indicadores económicos para aparentar unha mellora que nada ten que ver coa realidade nen cos sectores populares.

Esta situación de emerxencia social derivada da crise estrutural do Capitalismo, desde hai anos afecta sen distincións a unha maioría social que é agredida por distintas vías: o desemprego, os recortes sociais, os desafuizamentos, as privatizacións ou o desmantelamento dos sectores produtivos tradicionais. Todos estamos sendo golpeados, desde os pensionistas até a xuventude que ten que emigrar, pasando pola clase traballadora, o sector pesqueiro ou o pequeno comercio.

Este sábado 24 de outubro, todas e todos a encher o Obradoiro!!

 

luns, 28 de setembro de 2015

Esquerda Unida realizará unha serie de rogos e preguntas no pleno de setembro


O Grove, 26 de setembro de 2015. Esquerda Unida defenderá no pleno do vindeiro luns a moción contra a Lei 4/2015, de 30 de Marzo, de Protección da Seguridade Cidadá, que fora retirada na sesión do mes de xullo.

Ademais, os edís de Esquerda Unida levarán a pleno unha serie de rogos e preguntas para dar solución e coñecer a situación de diferentes problemas existentes no noso concello. Unhas solicitudes e dúbidas que os veciños trasladaron á agrupación local.

Deste modo, os esquerdistas preguntarán pola situación da finca de Beiramar, que o pasado ano fora alugada polo anterior executivo para aparcadoiro público, si lle foi renovado o contrato e en que condicións, pois a reserva de espazo para uso privado viuse aumentado a case a metade da finca. Así mesmo preguntarán por qué se pechou ao público o acceso ao mesmo dende a rúa Castelao. Juan Lamelas e José Antonio Otero interesaranse polo estado polas obras  de Rosalía, que contemplan a reparación da fachada do centro pero non a do edificio das vivendas dos mestres que entrañan un serio perigo tanto para os cativos que utilizan o patio do colexio como para os veciños que transitan pola rúa Conchases. Por último preguntarán pola actuación no barrio da Gandariña, onde continúan os problemas de cheiros procedentes da canalización da Edar, e si o goberno contempla a reparación dos diferentes parques infantís do concello que se atopan en estado de abandono e deterioro.

Tanto Juan Lamelas como José Antonio Otero realizarán tamén unha serie de peticións. Solicitarán que se repoñan os bancos da explanada do Corgo; que se solucione o problema existente con unha sinal na zona de Campos, perigosa para os viandantes; que se instalen papeleiras en diferentes rúas do concello; que se retiren os vehículos abandonados nas rúas; que se de solución á problemática existente coa recollida selectiva, pois os colectores de plástico atópanse cheos en numerosas ocasións provocando que os veciños teñan que depositar as bolsas na propia rúa; e que se cree un plan de accesibilidade que traballe na eliminación das numerosas barreiras arquitectónicas existentes no noso concello.

A maioría dos rogos e preguntas foron entregados por rexistro esta semana, co propósito de que no pleno do vindeiro luns o goberno local poida dar resposta a todos eles.

Pola mesma vía, a do rexistro municipal, os edís Juan Lameas e Jose Antonio Otero solicitaron o expediente das obras de Terra de Porto - Estrada do Conde, que provocou a denuncia dun particular e supostamente se atopa nun proceso de investigación por parte da Deputación de Pontevedra. Tamén pediron o Plan de acollida de refuxiados de Siria xa que se anuncia na web municipal pero non se pode descargar nin acceder a el de ningún modo. Así mesmo, os edís esquerdistas queren comprobar o expediente de licitación da cafetería da Festa do Marisco e ao listado completo dos máis de 150 veciños e veciñas que se inscribiron para participar como voluntarios da Festa do Marisco, co propósito de fiscalizar tanto o proceso de licitación da cafetería que suscitou polémica ao recaer nunha persoa vinculada ao PSOE e á súa candidatura, así como o de selección de persoal que traballará como voluntario na festa no que debería ser prioritaria a situación socioeconómica e familiar dos demandantes á hora de ser seleccionados.

Asemblea de Esquerda Unida O Grove

sábado, 8 de agosto de 2015

Esquerda Unida solicitou criterios socioeconómicos á hora de seleccionar voluntarios para a Festa do Marisco

Os concelleiros de EU no Pleno. Foto: todogrove.es
No pleno do pasado 3 de agosto, os concelleiros de Esquerda Unida, Juan Lamelas e Jose A. Otero, solicitaron a través do punto de rogos e preguntas que para a selección do persoal que traballará como voluntario na Festa do marisco o goberno local teña en conta unha serie de criterios: que para a inscrición como voluntario se solicite copia da tarxeta do paro e o tempo que leva o solicitante como demandante de emprego, que non se seleccione como voluntario/a a ningunha persoa que se atope activa laboralmente, e que a hora de realizar a selección de persoal se valore a situación laboral, económica e social dos solicitantes, primando aos que leven máis tempo no paro e se atopen nunha situación económica de risco. Ademais, os concelleiros de EU pediron que se camiñe cara un sistema de contratación en vez de voluntarios de cara a vindeiras edicións da Festa do Marisco. 

Unha petición que tivo boa acollida por parte do goberno, que aplicará os criterios socioeconómicos na edición de este ano e valorará de cara ao futuro mudar o sistema de voluntariado por contratacións.

Esta non foi a única petición realizada polos esquerdistas, pois ademais solicitaron que se dese solución e se depurasen responsabilidades co vertido de escombro na rúa Irmáns Otero Goday, que se arranxase o valado do parque infantil de Rons, que se retirase ou aproveitase o panel do Cicri para a promoción turística do Grove, que se limpasen con frecuencia os areais do concello, que se arranxase o acceso á praia da Lavaxeira, que se revisase os problemas de cheiros e ruídos procedentes da canalización da EDAR na zona da Gandariña, que se solucionase o problema de seguridade no Portal Cidadá da web municipal e que se instalase un espello na zona do camiño do lavadoiro de Balea. 

Así mesmo, os concelleiros de EU preguntaron pola situación da recollida selectiva, logo de comprobar como en varias ocasións os colectores se atoparon cheos durante máis dun día, solicitando tamén que se ampliase a recollida durante os meses de verán. Tamén preguntaron si a empresa encargada das obras do gas tiñan previsto asfaltar as rúas e arranxar as beirarrúas por onde realizaron a canalización. Por último, solicitaron información pola falta de policías locais durante as noites do mes de xullo e instaron ao Alcalde a poñer en marcha o servizo durante o mes de agosto.

Todas os rogos e preguntas, que foron introducidos por rexistro antes do pleno, foron respondidos polos concelleiros delegados na sesión ordinaria.

sábado, 25 de xullo de 2015

Esquerda Unida mostra o seu malestar pola ausencia de Policía Local durante a noite e reclaman que se reactive o servizo no mes de agosto.

A agrupación de esquerdas non entende como en pleno verán, O Grove non conte cunha patrulla da Policía Local durante as noites e reclaman que se reactive o servizo de garda, cando menos durante a fin de semana.

foto Todogrove.es
O Grove, 25 de xullo de 2015.- Esquerda Unida faise eco das críticas que neste último mes veñen realizando veciños e visitantes do Grove ante a ausencia de patrulla de garda nocturna da Policía Local, sobre todo na fin de semana, onde a se intensifica a actividade debido á movida nocturna. Precisamente son os locais de copas os que reclaman con máis tesón a presenza policial durante as noites de verán, especialmente nas dos venres e sábados, que é cando hai máis ambiente e as xornadas nocturnas poden ser máis conflitivas.

Os concelleiros esquerdistas, Juan Lamelas e José Antonio Otero, reclámanlle ao Alcalde e á vez responsable de Seguridade Cidadá que reactive o servizo nocturno da Policía Local durante o mes de agosto co fin de ofrecer un servizo básico e esencial nun concello turístico como O Grove, que nestes meses estivais aumenta considerablemente a súa poboación. Así mesmo, co fin de evitar estragos no mobiliario público, como sucedeu nas últimas semanas en rúas como Cándido Acuña Blanco, Luís Seoane, Paseo de Lordelo ou o parque de Terra de Porto, onde árbores, papeleiras e outros mobiliarios urbanos sufriron actos vandálicos.

É por iso que na vindeira semana os concelleiros de Esquerda Unida realizarán esta solicitude de forma oficial a través do rexistro municipal. Ademais, os edís preguntarán polo motivo que levou á non prestación deste servizo durante o mes de xullo, situación que se dá por primeira vez, xa que nos meses de verán sempre existiu patrulla de garda, ao menos, durante a fin de semana.
  

Asemblea de Esquerda Unida O Grove

sábado, 18 de xullo de 2015

Esquerda Unida rexistra vairas iniciativas no concello e solicita unha reunión para abordar o tema dos semáforos

O Grove, 18 de xullo de 2015.- O venres, a agrupación local de Esquerda Unida introduciu a través do rexistro municipal unha serie de rogos nos que instamos ao goberno municipal a dar solución a diferentes problemas detectados e trasladados polos veciños.

Os esquerdistas solicitan a limpeza regular dos diferentes areais grovenses, tanto os de Bandeira Azul como os que non contan co prestixioso distintivo, pois foron moitos os usuarios que mostraron as súas queixas pola sucidade na que se atopan as praia nestas últimas semanas, chegando a acumularse durante días os restos de algas e outros elementos que as mareas depositan en terra.

Xan Lamelas e José A. Otero pídenlle ao executivo local que tamén arranxen o acceso de madeira da praia da Lavaxeira, que conta con un chanzo roto e varios en estado de deterioro, o que provocou algún incidente entre os usuarios ao areal de Porto Meloxo. Tamén o parque infantil de Rons centra as queixas dos concelleiros esquerdistas, que solicitan o arranxo do valado exterior do mesmo ao atoparse roto por varias zonas, o que implica un perigo para os nenos que o frecuentan, maioritariamente os do centro educativo próximo.

O barrio da Gandariña, en Rons, é outro dos puntos conflitivos, pois varios veciños trasladaron as súas queixas aos esquerdistas indicando que nos últimos días se apreciaban ruídos estraños e malos cheiros procedentes da canalización que traslada as augas residuais cara a EDAR.

Esquerda Unida tamén trasladou a súa preocupación co “Portal Cidadá” da web municipal, pois os usuarios que acceden ao mesmo para realizar os seus trámites co Concello atópanse cunha mensaxe na que se advirte de que non é unha páxina segura.

Por último, os concelleiros esquerdistas solicitaron unha xuntanza formal co Alcalde, e á vez responsable da área de Seguridade Cidadá, para abordar o tema dos semáforos radar pois, segundo indican, a única información  da que dispoñen, relativa aos problemas xurdidos estes últimos días e as reunións mantidas coa empresa  responsable, é a que se publicou nos diferentes medios de comunicación.

Asemblea de Esquerda Unida O Grove

Ver documentos:

xoves, 11 de xuño de 2015

Esquerda Unida denuncia o trilerismo político do Partido Popular

Despois de que ao longo do día de onte varios membros do PP do Grove se puxeran en contacto con candidatos de EU para ofrecerlle a alcaldía a Juan Lamelas, os esquerdistas reuníronse de urxencia para ver de parar o que eles consideran unha “operación mafiosa dun cadáver político”.

O Grove, 11 de xuño de 2.015.­ Ao longo da mañá de onte distintos membros do Partido Popular do Grove puxéronse en contacto con membros de Esquerda Unida e BNG coa finalidade de artellar unha maioría na corporación en contra da candidatura de José Cacabelos á alcaldía. A militancia de Esquerda Unida, reunida de urxencia para tratar de frear unha operación da que eles non son máis que vítimas, acordaron non aceptar baixo ningunha circunstancia o apoio do PP, e así llo trasladaron ao PSOE e BNG de xeito inmediato. Para Lamelas “trátase dunha operación mafiosa dun cadáver político” pois considera que “o PP foi defenestrado pola cidadanía das decisións políticas no Grove, e fan un intento á desesperada de crear un escenario ingobernable coa finalidade de amosarse como únicos garantes de estabilidade ante os veciños, pois para eles está antes o partido que o pobo. Pero en EU témolo claro: co PP non imos a ningún lado”.

Desde Esquerda Unida denuncian tamén o que consideran xeitos mafiosos de actuar do Partido Popular. Escurantismo, secretismo, trileiros, recadeiros... son algúns dos cualificativos cos que se refiren nas filas esquerdistas ao acontecido onte. “Nós somos a candidatura da transparencia e da ética, sentímonos insultados polo PP tanto na proposta como nas formas” sentenciaba rotundamente un enfadado Lamelas, para quen os xeitos do PP “afortunadamente foron desterrados da vida política municipal pola cidadanía” e considera que o PP é consciente de que “se atopan na irrelevancia política na actual corporación”.

mércores, 27 de maio de 2015

Grazas polo apoio recibido. Agora, a traballar!

Grazas a todas e todos os que confiáchedes na nosa proposta e na nosa candidatura. Logramos uns excelentes resultados que nos animan a continuar traballando polos intereses dos veciños e veciñas do Grove.

Nestas eleccións demostrouse que non se pode estar catro anos gobernando de costas á veciñanza. Os nosos concelleiros electos, Juan Lamelas Alfonso e José Antonio Otero González, así como o resto da nosa militancia, traballaremos porque as nosas propostas saían adiante nestes vindeiros catro anos.

xoves, 7 de maio de 2015

Toda a información electoral nunha nova dirección web

Esquerda Unida - Son presenta a súa web electoral http://elocais.euogrove.es. Un portal no que as veciñas e veciños do Grove poderán seguir toda a información electoral da agrupación para estes comicios.

Unha web na que os visitantes poderán coñecer os perfís das candidatas e candidatos que forman parte da lista electoral de EU-Son, o traballo realizado polos concelleiros de Esquerda Undia (José A. Taboada na primeira parte do mandato e Juan Lamelas na segunda) nos últimos catro anos, os dez puntos do Código Ético, e as numerosas propostas que EU-Son leva no seu programa de goberno. Unha información que os usuarios poderán descargar en formato PDF.

Ademais, Esquerda Unida - Son dará detallada información dos actos que realizará durante a campaña electoral, así como dos resultados mesa por mesa do vindeiro 24 de maio.

venres, 1 de maio de 2015

Esquerda Unida celebra que a presión cidadá levara ao goberno a recuar no tema do Cicri

Esquerda Unida celebra que o goberno municipal recuara e retirara da orde do día o punto que trataba sobre o Cicri. A presión da cidadanía, claramente contraria a este proxecto, e a recollida de máis de mil sinaturas por parte de Esquerda Unida fixeron que o alcalde de O Grove e o seu goberno tripartito tiveran que dar marcha atrás.
Poderá o señor alcalde dar mil e unha escusa e esgrimir mil e un argumentos sobre o por qué da retirada do orde do día deste asunto. O que Esquerda Unida sabe, e os veciños e veciñas tamén, é que esta foi unha vitoria de todos e todas. A Sra. Aida Filgueira e o Sr. Carlos Otero tomaron a determinación de opoñerse á construción do Cicri debido ao descontento veciñal así como das asociacións culturais.

Para o concelleiro de Esquerda Unida, Juan Lamelas,  “as mentiras e os enganos xa non colan na sociedade, e a realidade é que esta obra, que nos tenta vender o Sr. Miguel Ángel Pérez e Rafael Louzán é simplemente unha cafetería, de preto de un millón de euros, no medio da praza do Corgo. E dicimos que é unha cafetería porque é para o único que foron capaces de conseguir financiamento”. Lamelas indicou que “O que non pode suceder é que cada día que pasa apareza nova información relativa a esta obra, que non conte cos informes favorables e que se ofreza unha valoración de ingresos claramente inflada (20.000 €/ano en entradas, 20.000 €/ano  en axudas, 2.000 €/ano de alugueres e 20.000 € da concesión da cafetería)”. Por último Juan Lamelas denuncia o proceder do Alcalde, que decidiu reunir ás asociacións culturais, a tres días do pleno para buscar o apoio destas, algo que non atopou, vendéndolle que o Cicri contemplaba o auditorio con butacas, pero que isto xa se vería si se facía na segunda ou terceira fase, xa que agora o que construirían sería a Cafetería. Lamelas pregunta “a quen está enganado o Sr. Alcalde, a Portos ou as asociacións e veciños do Grove? Xa que nos tres tomos que completan o proxecto do Cicri, non nomea por ningún lado a palabra auditorio, xa que Portos de Galicia non permite este tipo de actividade no seu solo”.

Na agrupación esquerdista consideran que non é normal que as rúas, estradas, beirarrúas, mobiliario urbano, parques, xardíns, centros educativos,... estean en estado lamentable e que se pretenda destinar os cartos anuais do plan de inversións da deputación nunha construción que non pediu nin demandou ninguén, en solo portuario, na zona onde se realizan as festas do Carme, de San Martiño e do Marisco, o mercado municipal, estragando aínda máis a fachada litoral do noso concello. Non se deron pasos para a construción do Centro de Día e do novo Centro de Saúde, prioridades a día de hoxe para o pobo, pero si se intentou enganar aos veciños con unha obra que suporía hipotecar as arcas municipais.

Ademais, a agrupación esquerdista considera unha tomadura de pelo e unha falta de respecto aos membros da oposición e, sobre todo, aos veciños e veciñas que na mañá do xoves se achegaron ao salón de plenos, que o Alcalde do Grove non quixese dar explicacións sobre os motivos que o levou a tomar a decisión de retirar ese punto da orde do día xa que, segundo as súas palabras, as daría na prensa. Tampouco ofreceu explicación pola hora da convocatoria da sesión plenaria, a pesar de afirmar nun medio de comunicación que sería no pleno onde ofrecería as razóns de tal horario. Unha mostra máis da prepotencia coa que o Sr. Miguel Ángel Pérez manexa o concello e o goberno tripartito, situación que non sorprende a Esquerda Unida, pois xa os ten habituado a este tipo de actitudes nas diferentes sesións plenarias destes catro anos de mandato.

Esquerda Unida considera tamén lamentables as verbas da Sra. Aida Filgueira, que no pleno e posteriormente na prensa mostrou unha falta de respecto cos veciños e veciñas do noso concello ao afirmar que o Centro de Día non é viable economicamente e propoña utilizar os 600.000 €, que o concello ten blindados para esa construción, para realizar un Centro Integral de Atención aos Maiores adecuando a saber que infraestrutura, que non cubriría en ningún momento as necesidades demandadas nun Centro de Día e aínda por riba anunciando que será unha realidade a curto prazo. Non se entende como a persoa que ata o día do pleno apoiaba incondicionalmente a obra do Cicri, de feito asistiu a charla do Sr. Alcalde coas asociación culturais e non abriu a boca, agora diga que o Centro de día non é viable economicamente e teña a desfachatez de erixirse como a salvadora do pobo ao forzar a retirada do punto do Cicri da orde do día.

Dende Esquerda Unida recórdanlle a Sr. Filgueira que seguen agardando polo cumprimento do acordo aprobado no pleno de xullo de 2011 no que se pedía un estudo obxectivo entre os maiores e familias con persoas dependentes que recollese o número de persoas do concello que precisases acudir a un Centro de Día, dependencia das mesmas, horas e días que precisasen ou estarían dispostas a acudir ao Centro de Día e estatus económico e social desas persoas. Tamén lle recordan que en outubro de 2011 a Sra. Filgueira respondeulle ao entón concelleiro de EU, José Antonio Taboada, que “estaba a colaborar para poñer a disposición da Xunta de Galicia os terreos onde se ía a construír esta instalación” en alusións a pregunta formulada sobre a situación na que se atopaba o Centro de Día do Grove.


Para finalizar, a agrupación esquerdista recórdalle ao goberno tripartito que, ao igual que sucedeu en numerosas ocasións nestes catro anos de mandato, no derradeiro pleno ordinario deixaron algunhas cuestións sen responder, como a dirixida ao Sr. Miguel Ángel Pérez na que pedíamos explicacións sobre a que atendía o reparto de libros entre os veciños ou que parecer lle tiña a imaxe que estaba deixando a nivel estatal os semáforos do Grove logo da publicación dunha carta de Fernándo Onega no programa de Onda Cero.

mércores, 29 de abril de 2015

Esquerda Unida entrega por rexistro mil sinaturas contra o Cicri

Juan Lamelas fixo entrega esta mañá, acompañado de varios membros da candidatura, das mil sinaturas que Esquerda Unida leva recollidas contra o Centro de Interpretación da Carpintería de Ribeira e o Plan Especial do Porto do Grove e a Toxa. Ademais, o concelleiro esquerdista solicitou a retirada do punto da orde do día no que se pretende aprobar a obra do Cicri.

Esquerda Unida denuncia que a documentación do expediente que se debatirá no pleno foi completada no día de hoxe (mércores), polo que non consta no informe xurídico nin no económico a valoración completa do expediente. Denuncian ademais, que o que pretende facer o Tripartito é unha cafetería valorada en 900.000 €, que é para o único que teñen cartos.

NOTA DE PRENSA
O Grove, 29 de abril de 2014. No día de hoxe Esquerda Unida presentou no rexistro do Concello as mil e unha (1.001) sinaturas que leva recollidas de momento en contra da construción do Centro de Interpretación da Carpintería de Ribeira na praza do Corgo.

O grupo político representado na corporación por Juan Lamelas presentou as sinaturas solicitando a retirada da orde do día do pleno de mañá do punto no que se debatirá o inicio dos trámites para a construción do CICRI en zona portuaria, ás que se engadirán as sinaturas que se continúen recollendo para a presentación dunha iniciativa cidadá para debatir as necesidades de inversión que ten o concello e as prioridades que se debe marcar o goberno municipal.

Denuncian tamén as formas coas que o goberno tripartito municipal está a realizar os trámites, pois a documentación do expediente que se debatirá no pleno foi aínda completada no día de hoxe, non constando polo tanto no informe xurídico nen no económico a valoración completa do expediente. Sinala Lamelas que "os informes técnicos realizados pola secretaría e intervención municipais son negativos" e dubidan da viabilidade legal do proxecto. "En todo o expediente non aparece a palabra auditorio por ningures, pois saben que Portos de Galicia non cederá os terreos para ese fin ao non ter relación cos usos portuarios definidos no Plan aprobado por eles mesmos".

Esquerda Unida califica a obra como unha desfeita para o Concello, pois segundo eles "o Concello non conta con financiación, nen propia nen en forma de subvención, para custear o total da inversión" e sinalan ademais que O Grove ten outras necesidades prioritarias como un centro de día para o que si existe financiación municipal, un novo centro de saúde ou melloras nos diferentes centros educativos.

"Pretenden construir unha cafetería de 900.000 € en solo portuario e actualmente zona verde con cartos públicos, porque é para o único que teñen cartos".

Segundo os esquerdistas isto é o que será realmente o CICRI, unha cafetería, pois a primeira fase da obra e única que conta con financiación é a cafetería.

Cabe recordar tamén que o tripartito, se se aproba en pleno o proxecto, destinará partidas normalmente destinadas aos diferentes barrios do Grove á construción do CICRI.


Recordan desde Esquerda Unida que continúan coa campaña de recollida de sinaturas.

domingo, 26 de abril de 2015

Esquerda Unida, BNG e PSdG-PSOE tachan de estrataxema idigna a hora do pleno

Os tres partidos da oposición consideran que a hora da celebración do pleno atende a un ocultismo por parte do goberno tripartito que intente, entre outras cousas, aprobar o expediente de contratación do CICRI sen que os veciños poidan mostrar o seu rexeitamento.
Asi mesmo, entenden como indecente que no derradeiro pleno do mandato, o tripartito pretenda hipotecar á futura corporación e as arcas municipais con unha obra de 2,5 millóns de euros, chamada a ser "o pequeno gaiás" de Miguel A. Pérez e Rafael Louzán,  cando o Grove segue sen centro de día e un novo centro de saude.
NOTA DE PRENSA ÍNTEGRA
O Grove, 25 de abril de 2015. Esquerda Unida (EU), Bloque Nacionalista Galego (BNG) e o Partido Socialista Obreiro Español (PSdG-PSOE) denuncian o intento de ocultismo por parte do goberno tripartito e en particular polo alcalde Miguel Ángel Pérez, ao convocar novamente unha sesión plenaria ás nove da mañá. Un pleno onde, entre outros asuntos, se debaterá e previsiblemente se aprobará por parte do goberno do Partido Popular, Partido Galeguista Demócrata e Alternativa Meca a apertura do expediente de contratación para a obra do “Centro de Interpretación, Desenvolvemento e Divulgación da Carpintería de Riberia (Cicri)”.
Os tres partidos que forman parte da oposición consideran que, tras as mobilizacións contra o PXOM e a asistencia masiva nos últimos plenos do concello, este novo horario atende a unha estrataxema indigna por parte do goberno tripartito, que pretende evitar a asistencia da cidadanía ao pleno e que esta mostre o seu rotundo rexeitamento a esta aberración urbanística.
Ademais, EU, BNG e PSdG-PSOE cren indecente que sexa no derradeiro pleno do mandato cando unha obra valorada en máis de dous millóns e medio de euros poida ser aprobada, hipotecando así á nova corporación que sairá nas urnas en pouco menos dun mes. Namentres o centro de día e o centro de saúde seguen sendo unha ilusión no concello, o goberno pretende aprobar unha obra que está chamada a ser “o pequeno Gaiás” de Miguel Ángel Pérez e Rafael Louzán. Unha obra inútil que non demandan os veciños e veciñas e que hipotecará as arcas do concello de O Grove.

Juán Lamelas Alfonso.
Voceiro de EU no concello Grove

Heládio Outeiro Padim
Voceiro do BNG no Grove

José Antonio Cacabelos Rico

Voceiro do PSdG-PSOE no Grove

mércores, 22 de abril de 2015

Esquerda Unida continúa coa campaña de recollida de sinaturas en contra do CICRI

Esquerda Unida intensifica a campaña en contra do CICRI e a reforma portuaria ampliando os establecementos nos que os veciños poden asinar. Tamén se pode descargar o documento dende a web www.euogrove.es ou recoller na copistería Copyman. O venres volverán ao mercado municipal.

Nunha semana, máis de 500 veciños mostraron a súa oposición a unha obra que pretenden vender como auditorio, pero que non deixa de ser unha sala multiusos. Os esquerdistas solicitarán a retirada dos puntos que traten sobre o CICRI da orde do día do último pleno do mandato.



Cando aínda non transcorreu unha semana dende o comezo da campaña de recollida de sinaturas en contra da construción do Centro de Interpretación da Carpintería de Ribeira (CICRI) e do Plan Especial do Porto do Grove e A Toxa, Esquerda Unida xa contabiliza máis de 400 sinaturas na rúa e máis dun centenar no portal Change.org.

A campaña seguirá aberta e a agrupación esquerdista amplía e seguirá ampliando os locais nos que os veciños e veciñas poderán mostrar a súa oposición a unha obra que non soluciona os problemas reais e que non deixa de ser unha sala con cadeiras de plástico, a imaxe da que existe na Casa da Cultura, a pesar de que este goberno o vende a “bombo e platillo” como un Auditorio.

Esquerda Unida anima a todos os veciños a mostrar o seu rexeitamento asinando as follas que poderán atopar nos máis de 30 establecementos da localidade. Ademais, os veciños que así o desexen, poden descargar o documento da páxina web www.euogrove.es ou recoller unha copia na copistería Copyman. Cando a teñan completa poden entregala no local de Esquerda Unida (Rúa Luís Casais, 1. 2º esquerda) os lúns a partir das 19 horas. Por outro lado, os membros da candidatura de Esquerda Unida-Son volverán achegarse o venres ao mercado municipal para recoller sinaturas e explicar a postura da agrupación sobre o CICRI.

Aínda que os puntos da orde do día do derradeiro pleno non están concretados, todo indica que o goberno tripartito levará a esta derradeira sesión do mandato os tramites precisos para deixar encamiñada a construción do CICRI en terreo portuario antes das eleccións. É por iso que Xan Lamelas solicitará a retirada da orde do día de todos os puntos que traten sobre este asunto, deixando o debate para a corporación que resulte electa tras o proceso electoral do vindeiro 24 de maio.


martes, 21 de abril de 2015

EU-Son presenta unha candidatura comprometida e decidida a traballar polo Grove

Esquerda Unida-Son presenta unha candidatura con xente nova, ambiciosa, preparada, comprometida e decidida a traballar en prol dos intereses veciñais.


O Grove, 20-04-2015.- Tras dar a coñecer aos cinco primeiros membros da candidatura hai unhas semanas, Esquerda Unida O Grove presenta a lista completa coa que concorrerán as vindeiras eleccións locais do 24 de maio baixo o nome de ESQUERDA UNIDA-SON.

Neste novo proceso electoral Esquerda Unida apostou por unha candidatura renovada, integrada por nove mulleres e na que a metade dos integrantes son independentes, aínda que ligados dunha ou outra maneira á organización esquerdista. Unha lista que conta con moita xuventude, o 75% da mesma non superar os 40 anos, ambiciosa, ilusionada, preparada, comprometida e decidida a traballar en prol dos veciños e veciñas do Grove. Unha mestura de xuventude e veteranía, con experiencia en diferentes eidos como o turismo, cultura, xuventude, educación, sanidade, deporte, emprego, medio ambiente...

Unha aposta forte por acadar o maior número de apoios para lograr gobernar, no que a premisa non sexan promesas de obras inservibles e innecesarias nestes tempos de crise, apostando por demandas reais dos veciños (centro de día, novo centro de saúde e arranxo dos centros educativos), servizos primordiais e para o que nalgún dos casos o concello xa conta con partida orzamentaria. Poñer fin ao clientelismo e o caciquismo destes catro anos de  goberno tripartito, no que as contratacións a dedo estiveron ao orde do día; rematar co abandono continuo ao que teñen sometido a diferentes barrios e rúa, aos que lles dan solucións só en época electoral; abrir o concello aos veciños e veciñas a través da participación e a transparencia son as pautas primordiais deste grupo que encabeza Juan Lamelas Alfonso. A candidatura foi configurada acorde ao decidido na última asemblea, na que se presentou aos cinco primeiros candidatos, onde se apostaba pola xuventude, reservando os postos de suplencia para os veteranos. Uns postos que encabeza o anterior candidato José Antonio Taboada Magdalena ao que a agrupación lle agradece o compromiso co partido dende sempre.
  
CANDIDATURA ESQUERDA UNIDA-SON

sábado, 4 de abril de 2015

EU denuncia a pre campaña electoral do PP agasallando a veciños co libro “O Grove foron outros tempos”

A desesperación do Partido Popular do Grove e en particular a de Miguel Ángel Pérez por evitar a perda de votantes, tras catro anos de clientelismo e inactividade, que rematou cun desastroso PXOM, parece non ter límites. Logo de colgar carteis anunciando obras sen adxudicación e financiamento, un sen fin de actividades programadas para as semanas previas a campaña electoral e o desembolso de cartos dende a Deputación para parchear rúas, agora o Sr. Pérez dedícase a utilizar a institución e ao persoal municipal para emular os tempos do “Masa” á hora de gañar votos.

Do arroz e aceite aos libros.
Si naquelas épocas, Alfredo Bea Gondar enchía as urnas con votos comprados con aceite e arroz, Miguel Ángel Pérez dedícase a recuperar esa vella arte de facer política enviando libros aos veciños.

Tarxeta personalizada do Sr. Alcalde entregada aos veciños
que recibiron o libro
A agrupación local de Esquerda Unida fai esta denuncia publica tras ter constancia de que diferentes veciños e veciñas do Grove recibiron, nos últimos días, o libro "O Grove foron outros tempos" editado no 2009 por Teófilo Edicións e a Deputación de Pontevedra, acompañado dunha tarxeta personalizada de puño e letra polo Sr. Alcalde, na que expresa a súa confianza por que o libro sexa do agrado do beneficiario. Todo elo entregado en man por un policía municipal que en acto de servizo percorre as vivendas dos veciños para entregar este peculiar “agasallo”. Unha mostra máis do “barriobaixeira” que pode chegar a ser a dereita con tal de non perder o mando.



Aida butterfly
Non só Miguel A. Perez utiliza a institución para o fins electorais. A Sr. Aida Filgueira aprendeu moito nestes catro anos e, nestas semanas, está a despilfarrar as partidas orzamentarias da súa asignación en numerosas actividades, nunca antes vistas. Entre elas unha exposición de bolboretas na que a concellería de Participación Cidadá inverte preto de 3.000 €.

Foto Todogrove.com
Tampouco o Sr. Alfredo Bea se queda corto na súa particular pre campaña electoral. Nos últimos días asistimos a presentación dunha campaña na que agasallará con diferentes materiais aos veciños e veciñas que participen nas actividades deportivas organizadas pola concellería de Deportes. Tamén ollamos como chega a tempo coa creación do parque canino de agility logo de que en abril de 2013 se aprobara unha moción de Esquerda Unida na que se solicitaba a súa creación.

Unha bochornosa carreira electoral na que o tripartito utiliza os fondos públicos co propósito de que o desgaste do PXOM non provoque unha escorrentada de votantes que os deixe sen a rede clientelar fraguada nestes catro anos.


Asemblea de Esquerda Unida O Grove

luns, 30 de marzo de 2015

O tripartito do autobombo


O Grove, 30 de marzo de 2.015.- Nestes últimos días estáse a observar un incremento de actividades por parte do tripartito gobernante no Grove nunca antes coñecido: cursos, inauguracións, regalos, presentacións, carteis de obras sen orzamentar... E así o vén a denunciar a agrupación local de Esquerda Unida, para quen o tripartito "pretende enmendar catro anos de parálise nas que a inversión e dinamización estiveron ausentes nas políticas do PP e compañía". Aínda que para a organización de esquerdas o goberno local non estivo sempre en letargo, pois segundo eles "no tripartito andiveron finos á hora de poñer servizos públicos en mans privadas, baleirar os petos dos veciños con políticas sancionadoras, contratar a amigos e tentar 'pelotazos' como o PXOM, o CICRI ou a explotación do novo ximnasio".
E en referencia a esto último, Esquerda Unida propón unha auditoría municipal no caso de chegar a gobernar despois das eleccións de maio. "Despois dos catro anos de goberno do tripartito o Concello do Grove precisa dunha auditoría das súas contas, pois hai cousas que cheiran moi mal, sobre todo nas áreas de Igualdade e Servizos Sociais e Seguridade e Emerxencias". Este é un dos puntos que forman parte do programa electoral que Esquerda Unida continúa a elaborar e que está aberto a aportacións de colectivos e veciñanza. Sobre este punto, os esquerdistas engaden que "unha auditoría cidadá é precisa, porque debemos saber a quen e a que empresas se estivo beneficiando con diñeiro público e este goberno foi campión en trasladar os cartos de todos a mans privadas".

Unha pousada que ninguén pediu
Dentro de esta campaña de autobombo que denuncian desde EU, está a presentación esta mesma tarde dun libro promocional da Deputación de Pontevedra da Pousada da Lanzada que se realizará na Sala das Cunchas do Concello. "Utilizan recursos públicos para promocionar unha pousada que ninguén pediu, e contra a cal se manifestaron centos de veciñas e veciños do Grove". Así de contundentes se amosan desde o grupo de esquerda, para quen é preciso poñer as mans do PP lonxe dos intereses do Grove "sexa Miguel Pérez ou Rafael Louzán, os intereses dun pobo de clase traballadora como O Grove non pode estar nas mans de personaxes coma estas".

Asemblea local de Esquerda Unida

sábado, 28 de marzo de 2015

A Asemblea de Esquerda Unida ratifica aos cinco primeiros candidatos ás Eleccións Locais de Maio

A Asemblea de Esquerda Unida ratifica aos cinco primeiros candidatos ás Eleccións Locais de Maio

A asemblea local de Esquerda Unida O Grove ven de ratificar o primeiro tramo da candidatura coa que a formación de esquerdas concorrerá ás vindeiras Eleccións Locais do 24 de maio. 

Xan Lamelas encabezará unha candidatura na que tamén estarán José A. Otero, Sonia Gondar, David Gondar e Ana Viso.


 Na tarde noite do venres, os afiliados e simpatizantes de Esquerda Unida estaban chamados a unha asemblea na que a formación esquerdista presentaba aos candidatos e candidatas que formarán o primeiro tramo da lista electoral coa que concorrerán aos vindeiros comicios, o 24 de maio. Unha lista que obtivo o respaldo da totalidade dos asistentes e que contará con actual concelleiro Xan Lamelas Alfonso ao fronte da mesma. Tras Lamelas estarán José Antonio Otero González, Sonia Gondar Gondar, David Gondar Prieto e Ana Isabel Viso Vázquez, que completarán de forma respectiva os cinco primeiros postos da candidatura.

O resto da lista quedará perfilada nas vindeiras semanas, toda vez que rematen de falar cos militantes e simpatizantes así como con veciños e persoas de outras organizacións políticas que nos últimos meses se achegaron co propósito de participar dun proxecto común de esquerdas.

Programa electoral

Por outro lado, Esquerda Unida segue traballando na elaboración do programa electoral e nas vindeiras semanas reunirase cos diferentes colectivos sociais co propósito de trasladarlle as propostas da agrupación e recoller as inquietudes e demandas destes.



Información dos candidatos:

 Juán Lamelas Alfonso 
(O Grove, 33 anos)
Traballador da Hostalería. Coordinador de Esquerda Unida O Grove. Actualmente concelleiro na corporación grovense. Encabezou a candidatura de EU no 2007, sendo concelleiro electo e formando goberno. Ostentou as concellería de Formación e Emprego, Persoal e Xuventude. Vinculado ao Partido Comunista participa en diversas loitas sociais dende que iniciou a súa militancia no movemento estudiantil.


José Antonio Otero González 
(O Grove, 35 anos)
Técnico Electrónica de Consumo, actualmente en paro. Participa en  Esquerda Unida dende o ano 99. Colabora activamente no tecido asociativo da localidade traballando no ámbito xuvenil, cultural, deportivo e educativo. É directivo do Club Baloncesto O Meco e da ANPA Lagoa de Rons.


Sonia Gondar Gondar 
(O Grove, 31 anos)
Socióloga e investigadora. Licenciada en Socioloxía pola Universidade da Coruña. Posteriormente realizou o Curso de Aptitude Pedagóxica (CAP). Ten un Máster en Migracións Internacionais con especialización en Políticas Migratorias e outro Máster en mediación Intercultural. Doutoranda en socioloxía pola UNED. Traballou en diferentes organizacións sociais; Asociación de Empresarios de Hostalería do Grove, Federación Provincial de Comercio, Hostalería, Turismo e Xogo de UGT Coruña, Fundación Ronsel e Rede Europeia Anti-Pobreza do Distrito de Viseu en Portugal.

David Gondar Prieto
 (O Grove, 31 anos)
Traballador da Hostalería dende hai quince anos, ostentando cargos de responsabilidade; metre de hotel ou xefe de restauración. Ligado a movementos sociais e culturais.


Ana Isabel Viso Vázquez 
(Ourense, 60 anos)
Reside no Grove dende o ano 71. Dedicouse ao pequeno comercio durante trinta anos. Actualmente ama de casa e desenvolve a súa afección á pintura dentro da Asociación Artegrove da que é Secretaria. Realizou varias exposicións individuais e colectivas tanto no Concello do Grove como noutras vilas e cidades de Galicia.



mércores, 25 de marzo de 2015

Esquerda Unida califica de "vergoña" o madrugador pleno de mañá

“Un pleno de vergoña” así é como califica Esquerda Unida o pleno que se celebrará o vindeiro xoves pola mañá na Casa do Concello do Grove, e que ten entre os seus puntos de orde do día a aprobación do Plan Especial do Porto do Grove e da Toxa.


O Grove. 24 de marzo de 2015. Esquerda Unida califica de “pleno de vergoña” a vindeira sesión plenaria a realizar no Concello do Grove. Entre as súas críticas ao goberno municipal están o cambio de horario non consensuado (a convocatoria será ás 9 da mañá) e non informado aos grupos na comisión informativa, a negativa do goberno triparito a incluír na orde do día o debate sobre a retirada dos semáforos con radar, o incremento da aportación municipal ás obras eternas do pavillón polideportivo e a inclusión a última hora e por vía de urxencia do Plan Especial do porto do Grove e a Toxa.

Nova odenación do Porto do Grove
Sobre este último punto é sobre o que se centran as maiores críticas, pois segundo a agrupación de esquerdas trátase “dun pelotazo que non vén a resolver ningún dos problemas dos usuarios do porto do Grove e que dá vía libre para edificar a Praza do Corgo e os seus xardíns”. De feito, este é o paso previo que precisa o goberno municipal para poder comezar as obras en zona portuaria (nos actuais xardíns do Corgo) do cacareado centro de Interpretación da Carpintería de Ribeira (CICRI) unha obra que Esquerda Unida califica como “o pequeño Gaiás de Miguel Pérez”.

Estado actual do Porto do Grove
“Nin centro de día, nin novo centro de saúde, colexios que precisan de inversión e choiva dentro da gardería, pero a prioridade do tripartito é unha obra de 2,5 millóns de euros en terreos portuarios (non municipais) e para a cal non se teñen os cartos”, critican contundentemente desde EU. Engaden ademáis que se trata dunha aberración urbanística que acabaría por destruir a xa maltratada fachada marítima do Grove, ademais de supoñer unha hipoteca para as arcas municipais, pois só se conta con 1/3 da financiación necesaria para a obra, “e aínda así pretenden comezala”.

O certo é que o goberno tripartito precisa de algo que vender á cidadanía tras catro anos de goberno nos que as promesas electorias foron incumpridas e un PXOM que lles estoupou na cara. Así o entenden tamén desde EU “achéganse as municipais e queren ter algo que amosar aos poucos potenciais votantes que lles poidan quedar”.

Asemblea local de Esquerda Unida