EU insta ao goberno a poñer en marcha canto antes os diferentes consellos sectoriais

Lembran que a convocatoria dos Consellos Locais de Turismo, Deportes, Igualdade e Cultura e Patrimonio está dentro dun dos acordos asinados para o pleno de órganos e que, cando menos, estes teñen que reunirse para renovar os membros tralo inicio do novo mandato.

Indican que aínda que o prazo remata a finais de outubro, queren que se acelere a convocatoria do CLT, para tratar a inminente Festa do Marisco, e do CLD, para coñecer o estado das bases das subvencións deportivas.

O Grove, 15 de setembro de 2023.- O grupo municipal de Esquerda Unida emitiu hoxe un comunicado no que pide ao goberno municipal que  non demore a convocatoria dos diferentes consellos sectoriais pois, ademais de ser o normal tralo arranque do novo “curso político”, é un compromiso dentro dos acordos que o grupo de esquerdas asinou co PSOE antes do pleno de órganos.

Os consellos sectoriais en cuestión, nomeadamente o Consello Local de Turismo, o Consello Local de Deportes, o Consello Local de Igualdade e o Consello Local de Cultura e Patrimonio, deben realizar, polo menos, a súa primeira reunión para a renovación dos seus membros, tal e como establece o inicio do novo mandato, e comezar así o traballo que encomende cada un deles.

A pesar de que o acordo marcaba como data límite o 31 de outubro, Esquerda Unida expresou a súa preocupación debido a un retraso perceptible na convocatoria destas reunións, das que os esquerdistas fan fincapé nas relativas a turismo e a deportes.

Sobre a de turismo, lembran que o pasado 30 de agosto, o seu grupo solicitou un encontro do Consello Local de Turismo co propósito de obter información sobre os avances relacionados coa Festa do Marisco que comeza o vindeiro 5 de outubro. E seguen incidindo na mesma pois, aínda que neste tempo xa se puxeron en marcha algunhas licitacións, consideran que hai varios aspectos que tratar. Esquerda Unida tamén expresou o seu interese en coñecer se se implementarán algunhas das súas propostas relacionadas coa accesibilidade e a seguridade nesta celebración, pero sobre todo, o que queren é que todos os membros do CLT poidan participar na organización do evento gastronómico máis importante de Galicia.

En relación co Consello Local de Deportes, Esquerda Unida subliñou a importancia de poñelo en marcha o antes posible para avaliar diversos aspectos no ámbito deportivo, pero principalmente para coñecer no punto en que se atopan as bases para a concesión de subvencións aos clubs, que a día de hoxe seguen sen ser publicadas, ocasionando problemas para os clubs deportivos do Grove, tal e como denunciaron o pasado 6 de setembro.

Deste xeito, Esquerda Unida insta ao goberno municipal a non demorar o cumprimento do acordo asinado e a convocar estas reunións sectoriais de forma inmediata para garantir unha xestión efectiva e transparente dos asuntos relacionados co turismo, o deporte, a igualdade e a cultura no Concello do Grove.

EU insta ao Concello a traballar de forma conxunta para manter o BIC da Torre de Escuredo

Os esquerdistas solicitan unha xuntanza urxente da Mesa de Cultura e Patrimonio para abordar a decisión da Xunta de Galicia de eliminar a Torre de Escuredo do rexistro de Bens de Interese Cultural de Galicia e procurar accións para que non desapareza o único BIC do Grove.

O voceiro esquerdista denuncia tamén a inacción municipal nestes anos e volve preguntar pola documentación relativa á Torre reclamada dende xaneiro.

O Grove, 8 de xuño de 2021.- O Grove ergueuse no día de onte coa publicación do número 106 do Diario Oficial de Galicia, onde na súa páxina 28.127 anunciaba que a Dirección Xeral do Patrimonio Cultural, dependente da Consellería de Cultura, Educación e Universidade, na súa resolución do 25 de maio, excluía do Rexistro de Bens de Interese Cultural de Galicia (BIC) á denominada Torre de Escuredo. 

Dende Esquerda Unida cualifican esta decisión como “unha estocada ao patrimonio do noso concello” e considera que “hai que actuar dunha vez por todas”. O seu voceiro, José Antonio Otero, entende que “é o momento de xuntarnos e poñer o asunto da Torre de Escuredo enriba da mesa, co propósito de traballar de forma conxunta na procura de accións e/ou solucións a esta decisión de Patrimonio”. Por ese motivo, os esquerdistas pediron onte por rexistro a convocatoria urxente da Mesa da Cultura e Patrimonio –aprobada en pleno no mes de febreiro e que tivo unha escasa xuntanza de toma de contacto– ou no seu defecto, unha xuntanza de voceiros dos grupos municipais. 

“Temos un mes para presentar alegacións a esta decisión e hai que comezar canto antes a traballar nelas”, indica Otero, que á vez dubida que o Alcalde estea disposto a traballar de forma conxunta para solucionar este asunto. “Tennos acostumados a non querer contar co resto dos grupos para abordar os asuntos municipais e  tememos que neste caso pasará o mesmo”, sentenza Otero. 

Se ben esta decisión de Patrimonio deriva dunha reclamación interesada realizada polos propietarios da Torre, para o voceiro esquerdista “a parsimonia do goberno municipal non axudou a evitar este desenlace”. José Antonio Otero lembra que en novembro de 2017 aprobouse en pleno por unanimidade a creación dunha comisión para realizar un seguimento da situación da Torre de Escuredo e tomar medidas ante o deterioro da edificación, entre elas a de considerar o inicio dun procedemento de expropiación. Así mesmo, nun pleno de marzo de 2019 tamén se aprobou a realización un informe xurídico, outro dun arquitecto especialista e unha taxación independente do BIC, á vez que se abría a posibilidade de acudir á Fiscalía para depurar responsabilidades ante o deterioro do inmoble e a inacción da Xunta. “Ningunha destas cuestións foi executada polo goberno municipal nestes anos” dando continuas desculpas cando algún voceiro preguntabamos nos plenos”, indica Otero. 

O esquerdista denuncia tamén que dende o Concello seguen sen facilitarlle a documentación relativa aos expedientes que figuran nas dependencias municipais sobre a Torre de Escuredo, a pesar de tela solicitado por rexistro no mes de xaneiro. “Non sabemos se é intencionado ou non, ou se a decisión de Patrimonio sobre a Torre de Escuredo está relacionada, pero cando menos da que sospeitar”, sentenza Otero.

Así e todo, dende Esquerda Unida cren que aínda é posible salvar a Torre de Escuredo e que esta continúe no rexistro de Bens de Interese Cultural de Galicia, e para iso insisten en poñerse a traballar de forma conxunta para que a Xunta recúe na súa decisión.

Gabinete de Prensa

Esquerda Unida O Grove

Esquerda Unida denuncia a falta de mantemento e conservación do patrimonio municipal

Os esquerdistas consideran a desaparición do mastro da goleta “Nieves” unha mostra do abandono, por parte do Concello, do patrimonio municipal.

Recordan que hai máis elementos patrimoniais que corren o mesmo risco e piden que se actúe no seu arranxo e/ou amaño.

O Grove, 15 de marzo de 2021.- Se hai máis dun ano foi o barco “Platuxa” o que, debido ao deterioro e á falta de mantemento, tivo que ser retirado de Punta Moreiras para rematar no esquecemento, a semana pasada tocoulle ao mastro da goleta “Nieves”, que desaparece tamén do entorno etnográfico de Moreiras logo de derrubarse, do mesmo modo que o “Platuxa”, debido ao deterioro provocado pola falta de mantemento, unha circunstancia que dende Esquerda Unida tachan de “grave e vergoñenta”.

Para o voceiro de Esquerda Unida, José Antonio Otero, “isto é unha nova mostra do abandono, por parte da Administración local, do noso patrimonio municipal”. “Estamos asistindo a un continuo deterioro dos elementos culturais da nosa vila, á súa falta de mantemento e conservación, e como consecuencia á súa desaparición”, sentencia Otero.

O esquerdista, recorda que isto non só sucede en Moreiras, pois son continuas as reclamacións que ten feito a súa formación en canto á conservación, mantemento e divulgación de moitos elementos culturais e patrimoniais do concello, “que no momento dinnos que actuarán, pero a realidade é que pasan os meses e continúan abandonados”, indica Otero, que pon como exemplo, ademais do sucedido en Moreiras, as diferentes fontes e lavadoiros do concello.

Recordan como logo de denunciar hai varios meses a situación da fonte do Naval e o lavadoiro de Paus en San Vicente ou o da fonte de Estonllo, estas continúan en estado lamentable, sen que exista ningunha previsión de arranxo ou amaño, coa única premisa de que “rematarán, ao igual que o “Platuxa” ou o mastro do “Nieves”, desaparecendo para perdurar, se cabe, tan só no recordo das veciñas e veciños da zona”, indica Otero.

Por ese motivo, Esquerda Unida propuxo hai un mes a constitución da Mesa da Cultura e o Patrimonio, “para, entre outras cousas, procurar a protección de todos os elementos da nosa cultura etnográfica, marítima, arquitectónica...” e por ese motivo seguirán insistindo na creación da mesma, ao tempo que reclama ao Concello “que non figure como mero espectador ao deterioro do noso patrimonio e que actúe, pois nestes casos é a súa competencia”, finaliza o voceiro esquerdista.

Gabinete de Prensa

Esquerda Unida O Grove

Imaxes actuais da fonte de Paus (San Vicente)

Imaxes actuais do lavadoiro de Paus (San Vicente)

Imaxes actuais da fonte de Estonllo

EU pide a constitución dunha Mesa Local pola Cultura e o Patrimonio

O Grupo Municipal de Esquerda Unida solicitará no pleno do mes de xaneiro a constitución dunha mesa local pola Cultura e o Patrimonio na que participen os partidos políticos, técnicos, asociacións culturais e demais axentes relacionados co mundo da cultura e o patrimonio.

A meta desta mesa é traballar de forma conxunta para recuperar, salvagardar, promover e divulgar o patrimonio cultural, etnográfico, arquitectónico,... do noso concello. Un foro de debate e deliberación do que saia unha folla de ruta no traballo a curto e longo prazo.

Nestes meses están xurdindo diferentes iniciativas colectivas e individuais relacionadas co noso patrimonio arquitectónico e arqueolóxico e dende Esquerda Unida consideramos que a única maneira de abordar estes e outros asuntos relacionados coa cultura e o patrimonio local pasa por facelo de maneira conxunta, cun traballo organizado e unha meta común, e iso pasa por unha mesa de traballo.

MOCIÓN INTEGRA

MOCIÓN PARA A CONSTITUCIÓN DA MESA LOCAL POLA CULTURA E O PATRIMONIO NO CONCELLO DO GROVE

EXPOSICIÓN DE MOTIVOS

O Grove sempre foi unha vila cunha gran inquedanza arredor da cultura e que dende sempre se empapou do bo saber, tanto de propios como de alleos, que dunha maneira ou outra deixaron ou están deixando o seu selo de identidade nesta vila, xa sexa con textos, pinturas, músicas ou a nivel arquitectónico e patrimonial coma poden ser xacementos arqueolóxicos, casas terreas mariñeiras, casas modernistas ou castelos que vemos que co paso do tempo estamos deixando morrer, perdendo así a nosa identidade propia.

Pero dende Esquerda Unida consideramos que non está todo perdido e que temos moito que gañar sumando esforzos na dirección correcta e seguir traballando para deixarlle ós nosos fillos e netos un Grove mellor.

Para iso, entendemos que o mellor modo é que políticos, técnicos e a sociedade se senten nun foro de debate e deliberación co propósito de recuperar, salvagardar, promover e divulgar o patrimonio cultural, etnográfico, arquitectónico,...

Por todo o anteriormente exposto, é polo que o Grupo Municipal de Esquerda Unida somete á consideración do pleno a aprobación da seguinte

PROPOSTA DE ACORDO

Instar ao goberno municipal a que no prazo de 1 mes se constitúa a Mesa Local pola Cultura e o Patrimonio, integrada por técnicos/as municipais, membros da corporación, colectivos culturais e sociais e demais axentes culturais e patrimoniais que teñan como meta a defensa, divulgación, recuperación e protección da cultura e o patrimonio do noso concello

Foto denuncia EU - Estado do Lavadoiro dos Paus

O Lavadoiro dos Paus en San Vicente é outros dos elementos patrimoniais do noso concello que corre o risco de desaparecer.

De seguir así, o camiño desaparecerá entre a maleza e a cuberta do lavadoiro rematará no chan.

O pobre leva máis de dous anos agardando a súa reparación despois de perder un dos piares laterais.

Foto denuncia EU - Estado da Fonte do Naval

"Adiós ríos, adiós fontes..." igual que Rosalía, sentimos moita tristura vendo como se vai perdendo o patrimonio etnográfico da nosa vila.

A Fonte do Naval en San Vicente corre o risco de desaparecer polo estado de abandono e esquecemento no que se atopa.

Pedimos ao concello que protexa e coide o noso patrimonio, porque forma parte da nosa cultura e da nosa historia.