mércores, 23 de decembro de 2020

EU denuncia o cobro da taxa do lixo o día antes de noiteboa

Os esquerdistas alertan que o cobro do 2º semestre da taxa do lixo, que sempre se realiza en febreiro do ano seguinte, foi adiantado a este mes de decembro, nunha época na que os gastos familiares son moito maiores e a economía local minguo como consecuencia da crise sanitaria pola Covid-19.

Denuncian que o concello incumpre o calendario fiscal e consideran esta decisión errónea e contraproducente á vez que lembran a súa proposta, rexeitada por Cacabelos, para fraccionar mensualmente os pagos das taxas e impostos municipais.

O Grove, 23 de decembro de 2020.- A menos dunha semana para rematar o ano, e cando parecía que este 2020 non podería traer máis sorpresas, o Concello do Grove abráianos novamente. Esta semana a veciñanza viu como nas súas contas se lles aplicaba a taxa de lixo correspondente ao segundo semestre deste ano, indican dende Esquerda Unida. Un cobro que de sempre se aplicou nos primeiros dous meses do ano vencido, isto significa que este recibo se debería cobrar a mediados de febreiro do 2021, pero o goberno municipal decidiu adiantar a este mes de decembro. Os esquerdistas consideran que se xa o 2020 é un ano no que moitos negocios e familias se atopan afogadas economicamente como consecuencia da crise sanitaria producida pola Covid-19, este adianto do cobro da taxa do lixo supón un afogamento maior para a veciñanza, máxime nun mes no que os gastos son moito maiores debido á festividade do Nadal. Unha decisión do goberno socialista que non comparten e rexeitan dende Esquerda Unida.

A agrupación esquerdista denuncia que con este cobro –por primeira vez a veciñanza ten que asumir tres pagos desta taxa nun mesmo ano, pois en febreiro realizouse o cobro do 2º semestre do 2019, en agosto o cobro do 1º semestre do 2020 e agora o do 2º semestre– o goberno dirixido por Jose Cacabelos sáltase o calendario fiscal aprobado e publicado na web do Concello.

Dende Esquerda Unida non entenden esta decisión, e pedirán explicacións, aínda que asumen cal será a resposta do executivo de Cacabelos, botando balóns fora e exculpándose nunha decisión administrativa, como fai sempre que as decisións repercuten negativamente na veciñanza. Pero para os esquerdistas a realidade é ben distinta e esta decisión atende exclusivamente á pésima xestión do goberno socialista, que en lugar de axudar aos negocios e á veciñanza decide afogalos economicamente para salvagardar os sobrecustos das obras e os seus propios soldos.

Así mesmo, en Esquerda Unida lembran que en numerosas ocasións propuxeron un calendario fiscal máis flexible e fraccionado, co que a veciñanza puidera pagar os seus impostos e taxas municipais en cotas mensuais, trimestrais ou semestrais, o que ofrecería maior control nas contas familiares e liquidez no Concello. Unha proposta que dende o goberno socialista se negaron a aplicar, ao igual que non aplicaron ningunha das medidas económicas e sociais propostas polo Grupo Municipal de Esquerda Unida durante a Alerta Sanitaria derivada da Covid-19.

Por último, os esquerdistas pregúntanse se o concello é consciente do sobrecusto e o dano económico que lle acaba de ocasionar á veciñanza ao cobrarlle, a un día da celebración da noiteboa, un recibo que non contaban con pagar ata mediados de febreiro do 2021.

Gabinete de Prensa

Esquerda Unida O Grove


sábado, 5 de decembro de 2020

EU acada o compromiso da Presidenta da Mancomunidade para dar prioridade ao cambio da tubaxe de auga do Grove

O voceiro de Esquerda Unida, José Antonio Otero, acadou no día de onte o compromiso de Marta Giraldez para que no 2021 a Mancomunidade do Salnés dea prioridade absoluta ao cambio da tubaxe que subministra a auga potable ao Grove. Solicita que Augas de Galicia presente dunha vez por todas o proxecto e financie o 100% da obra. Presentarán unha moción para iso no vindeiro pleno grovense.

A presidenta da Mancomunidade tamén se comprometeu co esquerdista a ver as opcións de devolver ao Grove a Escola de Hostalería e realizar cursos e talleres mancomunados no concello meco.

O Grove, 5 de decembro de 2020.- O pasado xoves, celebrouse o pleno da Mancomunidade do Salnés onde se aprobaron os orzamentos para o 2021. Se ben a opción coa que partía de inicio o representante de Esquerda Unida, José Antonio Otero, era votar en contra dos orzamentos da mancomunidade, logo de ver que novamente as contas da Mancomunidade non contemplaban partida algunha para o cambio da tubaxe que subministra a auga potable para o Concello do Grove, finalmente decantouse pola abstención, logo de arrincar o compromiso da Presidenta, Marta Giraldez, a dar prioridade absoluta a esta obra no vindeiro ano.

Así mesmo, o compromiso acadado polo esquerdista contempla que no momento en que se teña coñecemento do proxecto (que está pendente de entregar por Augas de Galicia) e do custo da obra, a Mancomunidade procurará o financiamento que lle pertenza, no caso de que o ente autonómico finalmente non se faga cargo do 100% da mesma. Un financiamento que podería chegar dos fondos FEDER, de subvencións da Deputación ou a través do orzamento da propia mancomunidade.

Esquerda Unida logra así que se lle dea prioridade a unha obra de gran importancia para O Grove e arremeten ao mesmo tempo contra Augas de Galicia, aos que tachan de incompetentes por non ter presentado aínda un proxecto de execución logo de comprometerse a telo rematado no 2018. Solicitan tamén que sexa o ente dependente da Xunta de Galicia quen financie ao 100% o cambio da tubaxe, “cuestión á que tamén se comprometeron hai uns anos”, indican os esquerdistas.

Para dar forza a esa petición, José Antonio Otero, anuncia que no vindeiro pleno do Concello do Grove, presentarán unha moción solicitando a Augas de Galicia a execución da obra e o seu total financiamento. O voceiro de EU considera que “xa chegou de burlas e de que a Xunta de Galicia menosprece ao noso concello”. “A administración Autonómica ten unha débeda histórica co Grove e esta obra é unha das prioritarias, xa que son preto de 11.000 persoas (máis de 20.000 no verán) as que poden quedar sen abastecemento de auga se se produce unha nova ruptura da tubaxe”, sentencia Otero.

Ademais do compromiso da obra de abastecemento de auga, José Antonio Otero, logrou tamén o compromiso da Presidenta da Mancomunidade do Salnés a valorar as opcións para devolver a O Grove a Escola de Hostalería e a achegar ao concello grovense máis cursos e talleres organizados pola propia mancomunidade.

Sobre a Escola de Hostalería, o esquerdista recorda que esta escola naceu no Grove e estivo vencellada ao concello meco ata que, por decisión da mancomunidade durante a época de Durán, se decidiu trasladar a Sanxenxo. Otero indica que iso foi “unha usurpación en toda regra” e pide que a escola regrese ao seu lugar de orixe. Máxime cando, segundo o esquerdista, a mancomunidade está pagando un aluguer polas instalacións onde se desenrola a Escola e O Grove conta co espazo adaptado e o seu uso é gratuíto.