luns, 30 de abril de 2018

1 DE MAIO. VIDA E CURRO DIGNO




O 2018 ten ensinado ao conxunto da clase traballadora e á esquerda política e social que os ciclos electorais teñen que ter analogamente procesos de mobilización e tensión social ante os conflitos reais que afectan á nosa clase. Seguramente se os procesos electorais das eleccións xerais e autonómicas se enmarcasen neste 2018 cun escenario de mobilización ampla e sostida como o protagonizado polo movemento feminista, o colectivo de traballadoras e traballadores da xustiza, os e as pensionistas, as plataformas en defensa da sanidade pública e as mobilizacións masivas contra a reforma da Lei de Saúde, etc… o escenario electoral sería sensiblemente distinto e o proceso de desgaste (con recarga vía opción Ciudadanos) do bipartidismo sería outro. Cómpre entón non esquecer esta premisa para o futuro máis próximo que é as eleccións municipais e europeas onde nos xogamos moito.

As contradicións do sistema capitalista afóndanse pero analogamente o rearme ideolóxico e organizativo da esquerda ten un desenvolvemento máis lento. Certo é que temos conseguido convencer a amplos sectores da sociedade galega que a unidade popular, non exenta de dificultades e tensións, é o único camiño para que o sistema trema. Ninguén en Galicia causou tanto medo como a recuperación para o común das alcaldías e espazos municipais, contra as que os medios de comunicación, poderes económicos que parasitan os servizos públicos municipais, dereita ultramontana e demais sectores do inmobilismo téñense conxurado. Neste 2018 o noso esforzo ten que ser para afondar neste municipalismo unitario, novidoso e que é a expresión máis completa do país e sociedade que temos por gañar.

Un 2018 cheo de mobilizacións esperanzadoras, dende a ampla dignidade dos pensionistas e xubiladas fartas das demolicións controladas do sistema público de pensións, ate a difícil loita sindical do colectivo de traballadoras e traballadores da xustiza, pasando polo abrumador grito das mulleres do noso país o pasado 8 de marzo e o pasado 26 de abril ante unha sociedade e xustiza machista e desvergonzada; un novo ciclo de loitas aberto, plural e multipolar obriga ás organizacións da esquerda a tomar nota e encarar o tempo político coas mesmas premisas de loita na rúa e nas institucións de maneira coordinada e secuenciada.

Este primeiro de maio ten que ter punto de partida dunha correspondencia entre a esquerda política e social e o clamor popular na rúa, da mobilización e a corresponsabilidade nos centros de traballo, nas escolas e nos parlamentos e concellos con ese mandato cidadá de cambio e unidade.

domingo, 29 de abril de 2018

EU chama a participar nas mobilizacións do 1ª de maio para reclamar a recuperación de emprego de calidade



A pesar de que a economía galega leva catro anos medrando, a pobreza tense cronificado e a inmensa maioría dos contratos son temporais

O emprego medra, pero a costa dunha crecente precarización das condicións dos traballadores e, aínda máis, das traballadoras

O Grove, 28 de abril de 2018.- As agrupacións locais de Esquerda Unida en Vilagarcía e O Grove fan un chamamento para que a cidadanía acuda de forma masiva ás mobilizacións convocadas para o próximo Día Internacional do Traballo. A formación advirte da crecente precariedade que se ten apoderado do mercado laboral. E é que, a pesar de que as cifras do paro aparentan unha recuperación do mercado de traballo, cun número cada vez menor de desempregados; a realidade é que ese descenso da cifra de parados se produce a costa dun empeoramento das condicións laborais.

Ás 12 do mediodía do vindeiro martes, 1º de maio, arrincará da Praza de Ravella, en Vilagarcía, a manifestación convocada polos sindicatos CCOO e UGT. Mellor emprego, maiores salarios, pensións dignas e máis igualdade. Esas serán as reivindicacións que presidirán unha marcha que, tal e como destaca Esquerda Unida, resulta absolutamente necesaria neste momento.

Como adoita acontecer nestas datas pre-estivais, o último informe do paro publicado pola Consellaría de Traballo da Xunta de Galicia revela un descenso do número de desempregados. Porén, as cifras son enganosas, pois a realidade é que dos 75.688 contratos rexistrados no mes de marzo no conxunto da Comunidade, unicamente 8.021 foron indefinidos, fronte a 66.463 temporais, 634 de prácticas ou formación, e 569 doutras tipoloxías.

Nos últimos anos tense producido, ademais, unha crecente feminización do desemprego. Dos 9.298 desempregados rexistrados na comarca do Salnés en marzo, 5.092 son mulleres, fronte a 4.206 homes.

A pesar de que aos gobernos do Partido Popular se lles encha a boca falando da recuperación económica rexistrada nos últimos anos (a economía galega medrou un 3,1% no 2017, e agárdase que o faga un 2,5% neste 2018), a pobreza tense cronificado, e acada niveis moi superiores aos existentes antes da crise. 67.500 fogares galegos teñen a todos os seus membros activos en paro, e 34.700 carecen por completo de ingresos. Ademais, o 28,8% dos menores de 18 anos en Galicia está en risco de pobreza e exclusión. O 24,5% viven en fogares cunha renda por debaixo do 60% da media nacional; e o 26,5% das unidades familiares con cativos non dispoñen de solvencia para afrontar gastos imprevistos. En conclusión, o

emprego medra, pero a custa dunha crecente precariedade e do aumento do   número de persoas en risco de pobreza.

Esquerda Unida entende que, nun momento de recuperación económica como o actual, é de xustiza que esa tendencia positiva alcance tamén á clase traballadora.

Por elo, a formación avoga por conseguir que a negociación colectiva reflicta unha mellora substancial dos salarios en xeral, e dos máis baixos en particular. Con cláusulas de garantía que protexan o poder adquisitivo fronte a un aumento excesivo dos prezos dos produtos de consumo como o que está a producirse na actualidade.

En consonancia co que tamén reclaman os sindicatos, EU esixe ademais un aumento dos compromisos empresariais en relación coa estabilidade e a calidade do emprego; a redución das desigualdades; a protección da saúde; e o investimento produtivo.

Área de Comunicación
Esquerda Unida Vilagarcía e O Grove

mércores, 25 de abril de 2018

EU reclama deixar os intereses electoralistas á marxe do PXOM e esixe a segunda exposición pública do documento


A pesar de tela solicitado por rexistro, a formación aínda non puido acceder á documentación do plan urbanístico redeseñado polo goberno de Cacabelos

Cre que non é de recibo que o alcalde pretenda eludir a segunda exposición aprobada por unanimidade en pleno para un proxecto que recibiu 4.000 alegacións

O Grove, 24 de abril de 2018.- O grupo municipal de Esquerda Unida reclama valentía, seriedade e traballo conxunto para conseguir que O Grove conte, dunha vez por todas, cun Plan Xeral de Ordenación Municipal. Despois da xuntanza mantida hai uns días co alcalde, a formación á que representan Juan Lamelas e José Antonio Otero critica o proceder do rexedor; que nos case tres anos que o Concello leva traballando na modificación do planeamento mantivo á marxe aos grupos da oposición; que a estas alturas continúan sen coñecer o contido do PXOM.

“Os grupos da oposición atopámonos nunha situación de total desinformación no que respecta ao PXOM”. E é que as xuntanzas mantidas co goberno local en todo este tempo foron “escasas, carentes de contido e, no mellor dos casos, con información obsoleta”. Así o explica o grupo esquerdista, convencido de que o xeito de actuar do goberno de Cacabelos nun asunto de tal relevancia para o conxunto dos e das grovenses non é de recibo.

“Nunca un alcalde e un goberno municipal tiveron tanta manga ancha para traballar no PXOM”; asegura Esquerda Unida. Que lamenta que, a pesar da “total liberdade” que a oposición lle concedeu ao goberno local, “cando solicitamos por rexistro a información sobre o plan foinos negada”.

“Neste momento poderiamos estar todos remando no mesmo sentido” e colaborando para dotar ao municipio do tan necesario plan urbanístico. Pola contra, o alcalde pretende levar a pleno un documento que a oposición descoñece por completo, pois non tivo acceso á planimetría nin se lle deu a oportunidade de colaborar activamente ou de facer achegas. “Vémonos nunha situación de total desinformación, sen poder ofrecer nada aos veciños”, indican os edís de EU; convencidos de que a aprobación definitiva do documento non pode chegar sen a pertinente segunda exposición pública (que o pleno xa aprobou por unanimidade e que, agora, o alcalde pretende eludir).

Un PXOM novo
“Aínda que este PXOM é a continuación do aprobado inicialmente polo goberno de Miguel Ángel Pérez, polo pouco que coñecemos parece tratarse dun plan totalmente distinto. Polo que, de manterse as pretensións de Cacabelos, atopariámonos ante un PXOM sen exposición pública nin período de alegacións veciñais. Esa é a participación do PSOE”, indica EU. Que, ademais, destaca que en todo este tempo non se puxo a funcionar a Comisión de Urbanismo; “motivo polo cal descoñecemos se o traballo realizado foi, efectivamente, no sentido das alegacións presentadas polos veciños”.

Todo elo, unido “á alta contestación popular que tivo este planeamento e ao elevado número de alegacións presentadas”, fai que a segunda exposición pública formal sexa, ao entender dos esquerdistas, elemento indispensable.

“Desde EU observamos unha nova fuxida cara adiante do goberno de Cacabelos. Vemos dúas vías posibles: ou que o PSOE busque un parvo útil que lle asine un cheque en branco co que poder levar adiante o seu plan sen a aprobación popular; ou ben que pretenda culpar á oposición do fracaso, no caso de non ser capaces de sacar adiante o documento”. “Todos os partidos políticos queremos un PXOM para o noso Concello. Pero a única forma de facelo posible pasa pola aprobación popular; que unicamente pode darse con totais garantías cunha nova exposición pública que nos permita coñecer a opinión do pobo a través das correspondentes alegacións. O resto son estratexias electoralistas que nada teñen que ver con defender os intereses xerais do pobo”, remachan os edís de EU.

 

Área de Comunicación
Esquerda Unida O Grove

xoves, 19 de abril de 2018

EU critica o subrecusto que a mala planificación de Cacabelos causará ao proxecto do auditorio


O grupo municipal comparte a necesidade dunha infraestrutura que demandan colectivos e veciños, pero denuncia a mala praxe do grupo de goberno

Destaca o atraso que xa acumula o proxecto, e que podería poñer en risco o financiamento da obra

O Grove, 17 de abril de 2018.- O grupo municipal de Esquerda Unida ve con preocupación a xestión que o goberno local socialista está a realizar en relación ao auditorio proxectado para o Monte da Vila. Logo da xuntanza mantida co alcalde e cos demais grupos da corporación para abordar este asunto; os edís esquerdistas teñen constatado o sobrecusto de 140.000 euros que a obra acumula xa antes de ter comezado sequera. Un incremento orzamentario provocado pola mala planificación e as présas do executivo de Cacabelos; que hai máis dun ano presentou un proxecto para unha parcela de titularidade e delimitación incertas.

Neste momento “confírmase a falsidade de todos os argumentos esgrimidos polo alcalde” cando, hai máis dun ano, propuña a formalización dun crédito de 4,5 millóns de euros para o auditorio. “Chantaxe” é a palabra que empregan os esquerdistas para referirse ao proceder do rexedor; que quixo poñer á oposición entre a espada e a parede para forzar a aprobación dunha operación de crédito que “nen era necesario realizar antes de ter solicitada a subvención da Deputación, nen se axustaba a unha previsión de gasto real”.

“Tal como denunciamos no seu día, o Concello iniciou un proxecto sobre unha parcela que non estaba clara. Algo que ven de ocasionar cambios significativos no proxecto, aumento dos custes e retraso na tramitación”, indica o edil Juan Lamelas.
A máis importante desas mudanzas sería o feito de ter pasado dun auditorio de 700 prazas a un de 464. “Pasamos de ter auditorio, almacéns e escola de música nun mesmo andar a telos repartidos en dous diferentes”, explican dende EU.

Máis aló da dilación temporal que estas modificacións teñen ocasionado, Esquerda Unida destaca o incremento do gasto. E é que aos 4,5 millóns nos que inicialmente se valorara a obra téñense sumado case 20.000 máis pola modificación do proxecto (imprescindible para axustalo á orografía e aos límiteis reais da parcela). E outros 120.000 en concepto de dirección de obra e seguridade. “Se desde o principio se fixeran as cousas ben, non tería sido necesario recalcular toda a estrutura para adaptala á realidade da parcela”, lembran dende o grupo municipal de EU.

A formación á que representan Juan Lamelas e José Antonio Otero tamén ve con procupación o retraso que acumula a tramitación do proxecto. “Máis dun ano despois de iniciado o proceso, aínda está sen aprobar o proxecto de execución, e tampouco se ten iniciado a adxudicación da obra”, explican. E non se trata unicamente dunha cuestión formal; xa que, tal e como destacan os edís esquerdistas, os prazos marcados pola Deputación bótanse enriba. “Dende EU vemos con preocupación que o Concello teña que acabar devolvendo o millón e medio de euros pola terquedade do alcalde en relación a este asunto. Os prazos están moi apurados, tendo en conta que o 30 de xuño de 2019 a obra debería estar  acabada”, destacan.

Esquerda Unida denuncia ademais o “financiamento irregular” que o goberno local ten acadado “coa escusa do auditorio”. “O goberno municipal conta con máis dun millón de euros de libre disposición a crédito (que pagamos todos os veciños) co beneplácito de Félix Lamas e o Partido Galeguista Demócrata”, asevera a formación.

“No pleno no que se cambiou de destino 1,5 millóns de euros do crédito para o auditorio para libre disposición do alcalde, Esquerda Unida denunciou que o goberno acababa de deixar sen financiamento ao auditorio. Concretamente faltaban 418.000 euros. Algo que o goberno local confirma agora, ao destinar esa mesma cantidade do Plan Concellos” á construción desta infraestrutura cultural.


Área de Comunicación

sábado, 14 de abril de 2018

EU chama a participar nas mobilizacións a favor das pensións



O grupo municipal rexistra unha moción para pedir á corporación que apoie a campaña reivindicativa emprendida polos sindicatos Comisións Obreiras e UGT

O Grove, 12 de abril de 2018.- O grupo municipal de Esquerda Unida quere que cidadanía e corporación se impliquen nas reivindicacións polo mantemento dun sistema público de pensións. A formación á que representan Juan Lamelas e José Antonio Otero fai un chamamento á participación na concentración convocada para o vindeiro domingo, 15 de abril, ás 12 do mediodía, na Praza do Concello. E pide aos demás partidos políticos, vía moción, que apoien a campaña iniciada polos sindicatos Comisións Obreiras e UGT.

De forma sutil pero constante repítense argumentos que presentan unha, supostamente, inevitable inviabilidade do sistema de pensións. Arguméntase un fenómeno coñecido e previsible como o aumento das persoas de idade avanzada, xunto con outros que se presentan como incuestionables pero que non necesariamente o son: a menor entrada de poboación estranxeira, a baixa natalidade ou a existencia dun mercado de traballo que ofrece empregos escasos e pouco remunerados.

Os poderes públicos deben apostar por garantir desde o sistema público pensións suficientes como ferramenta fundamental para manter e reforzar a cohesión social. Así o destaca o texto presentado polo vocero do grupo municipal de EU, Juan Lamelas. Que incide en que ”as cotizacións á seguridade social non son, como se repite para tentar deostalas, un imposto que pagan os empresarios. Senón salario das traballadoras e traballadores que se entrega ao Estado para financiar as prestacións actuais e definir os dereitos á pensión futura dos actuais cotizantes”.

“O problema non está no sistema, cuxas necesidades futuras son coñecidas e previsibles. Está, entre outras causas, na vontade de reducir o seu nivel de cobertura”, destaca a formación esquerdista. Que aposta por favorecer a cohesión social; así como por favorecer a posta en marcha de “medidas efectivas de redistribución da riqueza, que garantan pensións suficientes”.

EU entende que “a fórmula actual de revalorización, que se limita a garantir un incremento, ás claras insuficiente, do 0,25  % anual”debe ser revisada en aras de garantir o poder adquisitivo dos pensionistas. E pide o apoio da corporación para trasladar ao executivo central, aos grupos parlamentarios e aos interlocutores sociais, a necesidade de recuperar os mecanismos de goberno participado do sistema público de pensións a través do diálogo social e no marco configurado no Pacto de Toledo.

Área de Comunicación
Esquerda Unida O Grove