mércores, 25 de marzo de 2020

Propostas locais do Grupo Municipal de EU en relación coa Alerta Sanitaria



O Grupo municipal de Esquerda Unida formado por, José Antonio Otero González e Ana Cristina Domínguez Domínguez, formularon este mércores por rexistro, unha serie de propostas ao goberno municipal relacionadas coa situación local derivada da Alerta Sanitaria decretada polo Presidente do Goberno debido á pandemia do Coronavirus Covid-19. 
Así mesmo, pediron que se tomen en consideración as propostas e convoquen os órganos correspondentes o máis axiña posible para a aplicación das mesmas
PROPOSTAS:
MEDIDAS DE PROTECCIÓN E ESTÍMULO ECONÓMICO
-          Que se realicen os trámites precisos para a aplicar aprazamentos, prorrateos, bonificación ou exencións no imposto do IBI e outras taxas municipais ás persoas desempregadas e en situación de emerxencia para o exercicio 2020.
-          Bonificación no imposto do IBI do exercicio 2020 para os propietarios que decidiron suspender o aluguer ás empresas/autónomos durante o peche decretado pola Alerta Sanitaria. Bonificación entre o 20% e o 50% (dependendo do tempo que dure a alerta) ou o proporcional aos meses que este deixou de cobrar polo aluguer.
-          Bonificación na taxa de lixo do exercicio 2020 a todos os negocios que tiveron que pechar as portas polo decreto de Alerta Sanitaria. Bonificación entre o 20% e o 50% (dependendo do tempo que dure a alerta) ou o proporcional aos meses que tiveron que permanecer pechados.
-          Bonificación do 100% da taxa de licenza de apertura/actividade aos negocios que abriron este ano 2020. Devolución dos pagos xa realizados. No mellor dos casos os negocios que se deron de alta no presente ano non chegaron a estar abertos máis de 2 meses e medio antes do decreto de Alerta Sanitaria.
-          Suspensión do cobramento de todas as taxas municipais estipuladas para o período no que está decretada a Alerta Sanitaria e prorrateo das mesmas ao remate do citado período para facilitar o pago das mesmas.
-          Bonificación do 100% da taxa do mercado municipal polas semanas que non estivo activo debido á Alerta Sanitaria decretada.
-          Bonificación do 100% da taxa da praza de abastos, correspondente ao tempo de Alerta Sanitaria, para os postos que permaneceron pechados e bonificación do 50% aos que continuaron abertos.
-          Solicitar a Portos de Galicia a suspensión do pago da taxa pola utilización do solo portuario correspondente ao período de Alerta Sanitaria.
MEDIDAS SERVIZOS SOCIAIS
-          Servizo de comida para menores en situación de emerxencia social. Procurar a través da Xunta de Galicia ou directamente coa empresa local que realiza o cátering do comedor de Rosalía de Castro, para realizar o servizo a domicilio para os/as cativos/as en situación de risco e que viron suspendido o servizo co peche dos centros escolares.
MEDIDAS EMPREGO MUNICIPAL
-          Que non se despida ningún empregado/a municipal durante a Alerta Sanitaria.
-          Que no se realice ningún ERTE entre a plantilla municipal durante a Alerta Sanitaria, nin permitir ERTEs nos servizos externalizados (Atención no Fogar, Limpeza de Edificios Públicos,...)
-          Co propósito de contar co maior número de efectivos namentres dure a Alerta Sanitaria e acadar unha maior cobertura e vixilancia para evitar que a veciñanza se salte o confinamento e/ou estar dispoñibles para calquera tarefa precisa nestes días:
o   Se proceda de maneira urxente á solicitude dun maior número de axentes da Policía Local para o noso concello.
o   Se proceda de maneira urxente á contratación e incorporación inmediata dos/as auxiliares de Policía Local que habitualmente se realiza chegado o verán.
O Grove, a 25 de marzo de 2020.

sábado, 7 de marzo de 2020

Feminismo en Loita - Manifesto 8M


FEMINISMO EN LOITA



Cúmprense 110 anos da proposta de saír á rúa o 8 de marzo para conmemorar o día internacional da muller.

Despois de tanto tempo, o legado de feministas socialistas como Clara Zetkin lémbranos que o feminismo debe continuar en loita. Cada ano, as mulleres de todo o mundo saímos ás rúas o 8M para esixir unha alternativa a este sistema que pon en perigo as nosas vidas e o noso planeta. É moi importante que xa en 1910 as nosas compañeiras entenderon que só estando xuntas e loitando por resolver os problemas das mulleres do mundo podemos conseguir transformalo. Cada 8 de marzo seguimos fortes e xuntas enchendo as rúas, reflexo dese feminismo en loita constante que vai facéndonos avanzar como sociedade, soñando revolucións e construíndo resistencias.

Desde Chile ata a India, desde Palestina a Filipinas, as mulleres loitamos por un mundo sen violencias machistas, contra a división sexual do traballo e a mercantilización dos nosos corpos, polos dereitos reprodutivos e a liberdade das orientacións sexuais e identidades de xénero. O feminismo igual que o internacionalismo, cuxa pedra angular é a solidariedade, o respecto e a xustiza social, só pode valer se é para todas e en todas partes. Esa potencia subversiva fainos estar no punto de mira de quen se beneficia da nosa explotación, que están organizados nunha ofensiva patriarcal que tamén está a ser global.

O auxe do autoritarismo e a extrema dereita mostra o ataque dos poderes económicos aos nosos dereitos, mentres baleira de contido as democracias, que xa non se esforzan en manter un verniz de servizos públicos e sociais para convencernos do progreso.

Convértenos en obxectos cos que se comercia neste mercado global xerador de grandes beneficios baseados nunha salvaxe explotación das persoas. Desde Esquerda Unida dicimos BASTA á mercantilización dos nosos corpos e das nosas vidas.

As mulleres non imos permitir que este mundo se precarice a costa das máis vulnerables, nin que o odio, o racismo, o machismo, a xenofobia e a LGTBIfobia sexan a resposta de quen está dirixindo o planeta cara á guerra, a desigualdade e o colapso. Defendemos o acceso aos recursos necesarios para cubrir as nosas necesidades en condicións de igualdade e de sustentabilidade ambiental. Vidas dignas para todas as persoas en todas as partes do mundo!

En Esquerda Unida sabemos que non se pode transformar o mundo se non poñemos no centro das loitas a quen está no centro da explotación capitalista, patriarcal e imperialista. A centralidade do mundo só pode cambiarse desde ese “todas xuntas” e desde o entendemento de que os nosos retos como feministas son os mesmos que temos como sociedade. Por iso desde EU defendemos un feminismo antimilitarista, pola paz e a dignidade dos pobos e entendemos que debemos loitar coas compañeiras e compañeiros que loitan pola vivenda, as pensións, as políticas sociais, os servizos públicos, o dereito á terra e a auga, os dereitos de quen migran e polo traballo digno.

Este sistema económico necesita uns traballos de coidados aos que afoga, invisibiliza e fai recaer en nós. En Esquerda Unida reivindicamos a universalización dos traballos de coidados desde a corresponsabilidade cos homes e o Estado e desde a interdependencia e a ecodependencia.

Desde Esquerda Unida témolo claro, o feminismo a demais da loita das mulleres, é un prisma que amplifica as nosas loitas, interpelando directamente ás realidades materiais de quen máis sofren e creando alianzas e estratexias para cambiar as desigualdades que vivimos día a día a clase traballadora.

Este 8 de marzo volvemos saír ás rúas porque todas esas loitas son as nosas e o inimigo é o mesmo que hai 110 anos, cando en Copenhague un grupo de mulleres revolucionarias decidiron que debían saír todas xuntas a cambiar o mundo.

Porque o mundo é noso e imos mudalo.

FEMINISMO EN LOITA

venres, 31 de xaneiro de 2020

Foto Denuncia EU - Estado do camiño na Xesteiriña


⚠️A veciñanza da Rúa Xesteiriña trasládanos a súa preocupación polo estado da calzada. O tránsito de vehículos pesados🚛 e a falta de mantemento do pavimento supón un risco para as persoas🚸 e os vehículos que transitan pola zona.







luns, 20 de xaneiro de 2020

Foto Denuncia EU - Barreira arquitectónica na Avda. Portugal


♿️Para que as beirarrúas sexan accesibles a tódalas persoas deben ser eliminadas as barreiras arquitectónicas.

📢A veciñanza da Avenida de Portugal leva tempo solicitando unha solución para unha das marxes da rúa, xa que a altura do bordo dificulta o paso das persoas con problemas de movilidade ou de maior idade.

🚸 Solicitan eliminar o bordo e substituílo por unha rampa, como xa se fixo na outra marxe da rúa.





venres, 17 de xaneiro de 2020

Xan Xove visita O Grove e presenta unha iniciativa para que se afronte a obra de abrigo do Porto de Meloxo



O pasado xoves, o deputado do Grupo En Común da Esquerda, Xan Xove, visitou O Grove para reuniuse cos concelleiros de Esquerda Unida, José Antonio Otero e Ana Cristina Domínguez; e o presidente de Amegrove, Francisco Padín, e coñecer de primeira man a situación do porto de Porto Meloxo e así presentar na Comisión 8ª de Pesca e Marisqueo, celebrada na mañá do venres, unha iniciativa para que a Xunta de Galicia, a través de Portos, afronte dunha vez por todas a obra de ampliación do dique de abrigo.

Tanto os concelleiros de Esquerda Unida, como o presidente da cooperativa Amegrove recordaron a situación de parálise na que se atopa o proxecto, iniciado arredor do 2008, e na gran necesidade de levala a cabo para dar abrigo e seguridade ao centenar de embarcacións bateeiras existentes no concello meco, moitas delas agora desprazadas ao porto do Grove pola falta de abrigo no de Porto Meloxo. Unha obra que ao mesmo tempo permitiría a reordenación do porto pesqueiro situado no Corgo. Así mesmo, Otero e Padín fixeron fincapé en que esta obra ten que garantir que non afectará aos bancos marisqueiros da zona, tal e como ven reclamando a Confraría.

A iniciativa foi presentada o venres 17 na comisión 8ª de Pesca e Marisqueo da Xunta de Galicia por parte do grupo parlamentario Grupo Común da Esquerda obtendo o apoio unánime dos representantes do PSOE, BNG, Grupo Mixto e o mesmo PP. [ver vídeo]

Cabe recordar que dende Esquerda Unida O Grove, a través do grupo parlamentario Grupo Común de Esquerda presentou unha emenda aos orzamentos para o 2020 da Xunta de Galicia relativa a esta obra pero foi rexeitada polo goberno autonómico. [ver emendas presentadas por EU]

Máis info:
Parlamento de Galicia: Comisión 8ª de Pesca e Marisqueo







martes, 14 de xaneiro de 2020

EU advirte que o PXOM non contempla a sentenza gañada a Costas no 2017



Os esquerdistas indican que a pesar de que a sentenza foi firme, as vivendas dos núcleos costeiros dentro dos cen metros seguen fóra de ordenación ou afectadas por ordes de demolición.

Solicitan ao concello que protexa á veciñanza incluíndo as vivendas, en base á sentenza, dentro das normas urbanísticas antes de que o PXOM se someta a aprobación.

O Grove, 13 de xaneiro de 2020. Dende a agrupación local de Esquerda Unida aseguran que o plan urbanístico, que Cacabelos anunciou que sometería a aprobación provisional o vindeiro mes de febreiro, deixa na mesma situación de irregularidade ás vivendas situadas nos núcleos costeiros do Grove.

Os esquerdistas recordan que O Grove conta cunha sentenza favorable dende principios do ano 2017 na que se recoñecen os núcleos costeiros e salvagardan as vivendas que na liña dos 20 e os 100 metros se atopaban fóra de ordenación ou con ordes de demolición. Así mesmo, indican que uns meses despois o propio Cacabelos anunciou na prensa que a sentenza era firme polo TSXG logo de que Costas non presentase recurso en tempo e forma e que só quedaba plasmar esa situación no documento urbanístico. Pero, dende Esquerda Unida aseguran que no documento presentado a finais do 2018 e que se atopa actualmente na web municipal non hai nada referente a esta sentenza e polo que puideron pescudar, tampouco na documentación que o Alcalde pretende expoñer nestas semanas se contempla esta situación, polo que consideran que as vivendas seguirán fóra de ordenación ou con ordes de demolición. 

É por iso que Esquerda Unida solicitou unha xuntanza con Cacabelos para tratar estes asuntos e piden que a sentenza do TSXG contra Costas se reflicta no PXOM antes de que este se someta a aprobación provisional do pleno co fin de protexer os núcleos costeiros consolidados de Rons, Agriños-Gandariña, Virxe das Mareas, Moreiras, Reboredo, A Igrexa-Praia de A Barcala, Carreiro, Espiño-Bizocas-Carreiro, Sobre do Pozo, As Laxes e Insuíña.

Gabinete de Prensa
Esquerda Unida O Grove


venres, 10 de xaneiro de 2020

Foto Denuncia EU - Estado do terreo centro social Reboredo


⚠️A veciñanza de Reboredo trasládanos a súa preocupación polo estado no que se atopa o terreo municipal no que está previsto construír un centro social para os maiores.

📰O alcalde declaraba na prensa que a primeira fase do proxecto podería contemplarse nos primeiros meses de 2019. Xa comezou o 2020, sen noticias daquela primeira fase, pero cos terreos lindeiros sufrindo as consecuencias do abandono do lugar.








venres, 20 de decembro de 2019

Foto denuncia EU - Solución a inundacións no Camiño Rasoeiro


📣aA A veciñanza da Rúa Gandariña reclama unha mellora no pavimento da zona.`

🚧Este camiño conduce a varias empresas da zona e polo tanto é unha vía moi transitada que necesita unha mellora urxente.






venres, 13 de decembro de 2019

EU tacha de incompetente ao goberno por non informar á veciñanza dos cortes de auga



Os esquerdistas consideran impropio que ante uns cortes de auga programados non se informe á veciñanza para que se poida organizar.

Advirten que esta actuación converte ao concello en responsable subsidiario ante calquera dano nos electrodomésticos ou prexuízos aos negocios.

O Grove, 12 de decembro de 2019. Esquerda Unida mostra o seu malestar coa xestión que o goberno municipal está a realizar nas obras da rúa Alexandre Bóveda e os cortes no subministro de auga potable desta semana.

Os esquerdistas entenden os inconvenientes e problemáticas que se suceden como consecuencia das obras, pero consideran que a falta de información e sobre aviso polos cortes que esta semana deixou por sorpresa en tres ocasións a numerosas vivendas sen servizo de auga durante longas horas do día "son a mostra da incompetencia do grupo de goberno". O voceiro de Esquerda Unida, José Antonio Otero, non concibe que "ante uns cortes programados, pois déronse durante tres días seguidos nas mesmas horas, non foran postos en coñecemento da veciñanza, para que esta se puidese organizar nos seus fogares e negocios".

Otero advirte que esta incompetencia pode ocasionar graves prexuízos á veciñanza e supor un desembolso económico para o concello, pois entende que o ente municipal “será responsable subsidiario ante posibles danos nos electrodomésticos, caldeiras, termos... ou ante os prexuízos ocasionados aos negocios por non por en sobre aviso destes cortes de auga”.

"Antes das eleccións o Alcalde informaba nas redes sociais practicamente ao minuto de calquera corte de auga, fose programado ou ocasionado por unha avaría, agora coa maioría absoluta amarrada non dan chío", indica Otero que ironiza coas situacións que se teñen dado no anterior mandato. "Teñen posto a megafonía a percorrer o pobo para anunciar os plenos para que acudise a veciñanza co propósito de presionar á oposición, pero para avisar a estas veciñas e veciños dos cortes de auga non o consideran preciso".

É por isto que os esquerdistas pide máis rigor e seriedade ao goberno e que, calquera situación que poida crear prexuízo á veciñanza e negocios locais, sexa advertida utilizando todos os medios posibles para evitar o maior dano posible.

Gabinete de Prensa
Esquerda Unida O Grove


xoves, 12 de decembro de 2019

Foto denuncia EU - Solución a inundacións na rúa Cortiñas


☝️A veciñanza da Rúa das Cortiñas trasládanos o seu malestar pola falta de arquetas para a recollida de pluviais🌧.


⚠️En días de choiva, coma o de hoxe, a auga corre pola rúa e acumúlase dificultando o paso das persoas e impedindo aos residentes entrar nas súas vivendas. Unha situación que a veciñanza xa puxo en coñecemento do concello, pero que continúa sen solucións.









xoves, 5 de decembro de 2019

EU trasladou a través do Grupo Común da Esquerda as súas emendas ao Orzamento da Xunta



Os esquerdistas lamentan que a Xunta de Galicia rexeite as propostas para o noso concello. Reclamaban a administración autonómica que incluíra no Orzamento 2020 tres millóns de euros de inversión directa no concello e 13,5 millóns de inversión indirecta.

Reclamaban orzamento para un novo Centro de Saúde, para a ampliación do dique de abrigo do porto de Porto Meloxo, para o desdobre da Vía Rápida VG-4.1 e para a renovación da tubaxe que subministra a auga potable ao Grove.

O Grove, 22 de novembro de 2019.  A agrupación local de Esquerda Unida dou traslado a través do grupo parlamentario Grupo Común da Esquerda as emendas ao Orzamento da Xunta de Galicia para o 2020 referentes ao Grove.

En total foron catro ás peticións realizadas polos esquerdistas, das cales dúas eran de inversión directa no propio concello e as outras dúas, a pesar de non ser no entorno grovense, si repercutían de forma indirecta na localidade.

A agrupación que lidera José Antonio Otero quería “que a Xunta de Galicia dera un paso adiante e se comprometa dunha vez por todas co noso concello, pois levamos anos sen contar con inversións importantes”. E por iso que decidiron canalizar as súas peticións a través dos seus representantes no Parlamento de Galicia.

A primeira das peticións ía directamente á Consellería de Sanidade á cal lle pedían que contemplase entre 1,5 e 2 millóns de euros, nas súas partidas, para o proxecto e construción dun novo Centro de Saúde, unha das maiores demandas do Grove que volveu reivindicarse con forza nas últimas protestas celebradas diante do actual Centro de Saúde durante o mes de abril. Os esquerdistas son conscientes que un dos problemas que se atoparían á hora de presentar esta solicitude é a da falta dun terreo para albergar esta construción, pero entendían que si prosperaba, sería o concello o que se vira no compromiso de poñer este a disposición do ente autonómico, e para elo o goberno municipal tería por diante un ano. “Deste xeito, a construción retrasarase, pois teremos que agardar como mínimo ata os orzamentos da Xunta do 2021” indica José Antonio Otero.

A ampliación do dique de abrigo do porto de Porto Meloxo é outra das peticións de inversión directa que Esquerda Unida reclamaba á Xunta. Desta volta a Portos de Galicia, pois entenden que son os encargados de poñer en marcha dita obra. En referencia a isto, José Antonio Otero “considera unha burla que os orzamentos en vigor reflictan preto de 1,2 millóns de euros para investir en Porto Meloxo en tres anos, contemplando 50.000 para a primeira fase –2019– dos cales non se gastou un só euro e no Orzamento 2020 se eliminase toda a partida e tan só se propuxeran 30.000 €”. Os esquerdistas recordan que o proxecto leva paralizado varios anos por mor dunha emenda da Confraría de Pescadores grovense ao ver perigar os bancos marisqueiros máis próximos ao eliminarse as correntes da zona. Neste senso, José Antonio Otero recorda que “aprobamos recentemente unha moción na que solicitabamos desatascar esta situación procurando que Portos estudase unha medida para que o dique de abrigo permitise o paso de correntes que non afectase aos bancos marisqueiros”. E por iso que Esquerda Unida quería que se contemplaran eses preto de 1,2 millóns de euros no Orzamento 2020.

Xa nas inversións indirectas, pois a pesar de non realizarse directamente no concello –son obras fora do municipio– supoñen unha repercusión positiva no Grove, os esquerdistas pedían como primeira medida que se realizase o desdobre da Vía Rápida do Salnés (VG-4.1), no tramo que vai dende a Lanzada ata o enlace coa Autovía en Sanxenxo. Unha demanda que se ven realizando dende que no 2006 comezaran as obras de desdobre do tramo entre Curro (Barro) e Sanxenxo e que aflora cada ano durante a época estival cando se producen diariamente atascos quilométricos.

Esquerda Unida solicitaba que se contemplasen como mínimo os 12 millóns de euros que no 2010 prevía a Consellería de Medio Ambiente, Territorio e Infraestruturas e que se procurase unha solución para non prexudicar medioambientalmente a zona.

Por último os esquerdistas enfocaron a súa cuarta petición directamente sobre Augas de Galicia, pois consideran que teñen que acometer “dunha vez por todas” a substitución da tubaxe que subministra a auga potable ao concello grovense. Segundo Esquerda Unida, O Grove recibe a auga da planta instalada en Vilanova de Arousa a través dunha tubaxe, instalada a finais dos 80, que tras chegar a Vilalonga (Sanxenxo) sotérrase baixo o mar ata o municipio grovense. José Antonio Otero recorda que “En xullo do 2018, Augas de Galicia recoñecía o mal estado da tubaxe e as consecuencias nefastas que suporía para o noso concello unha rotura da mesma, e por iso comprometíase a rematar un proxecto de substitución a finais de 2018 e comezar as obras durante este ano, para elo ían contemplar no orzamento 2019 unha partida de 1,5 millóns de euros”, pero a día de hoxe “non se coñece o proxecto nin tampouco se incluíron eses cartos no orzamento do 2019 e tampouco no proxecto do 2020”, sentencia Otero.

O voceiro esquerdistas indica que a situación non pode agardar máis, “pois no presente ano a tubaxe xa rachou por dúas ocasións no tramo da Lanzada e solucionouse relativamente axiña porque sucedeu nunha zona na que as condicións permitiron que os operarios realizasen o traballo con rapidez.

Aínda que sen moitas esperanzas, Esquerda Unida agardaban que a Xunta de Galicia recapacitase e que antes de pechar os Orzamentos do 2020 contemplasen estas catro demandas, “pois son importantes para O Grove e a súa veciñanza”. Recordan que “estamos as portas dun proceso electoral autonómico e as veciñas e veciños do Grove son plenamente conscientes do abandono ao que estivo sometido o noso concello por parte da administración que dirixe Feijoo”.

Gabinete de Prensa
Esquerda Unida O Grove

venres, 29 de novembro de 2019

Foto denuncia EU - Solución a inundacións no Camiño Rasoeiro

  
☔️Coas choivas das útlimas semanas algúns dos camiños do casco urbano atópanse totalmente anegados.



🚣‍♀️Os veciños do Camiño Rasoeiro e da Tafona tamén quixeron amosarnos a situación de abandono dun camiño moi coñecido e transitado tanto pola veciñanza como polo alumnado do CEIP Rosalía de Castro.



🗂Dende Esquerda Unida O Grove, aproveitamos o pleno desta semana para trasladarlle ao goberno en forma de rogo a urxencia de actuar neste lugar e rematar coa lamentable situación na que se atopa.






xoves, 28 de novembro de 2019

O PLENO APOIA A DEFENSA DA EDUCACIÓN PÚBLICA COMO GARANTE DO DEREITO UNIVERSAL Á EDUCACIÓN EN CONDICIÓNS DE IGUALDADE


O Pleno do Concello do Grove aprobou por maioría a moción presentada polo Grupo Municipal de Esquerda Unida en defensa da Educación Pública como garante do dereito universal á educación en condicións de igualdade.

A moción, defendida polo noso voceiro, José Antonio Otero, contou con 14 votos favorables (EU-PSOE-BNG) e 3 abstencións (PP)  seguinte proposta de acordos:


Instar ao Goberno de España e á Xunta de Galicia aos seguintes puntos:

  1. Que se garantan prazas públicas suficientes nos novos desenrolos urbanísticos, mediante a cesión de solo público para a creación e apertura de centros escolares de titularidade e xestión pública
  1. Que se revise a normativa sobre concertos educativos de modo que, namentres subsistan, estes teñan carácter estritamente subsidiario
  1. Que, nos procesos de renovación de concertos vixentes, se supriman todos aqueles que non se xustifiquen por existir prazas públicas vacantes. Estableceranse os mecanismos normativos e protocolos administrativos para que non se produza o peche de liñas de escolas públicas naquelas zonas onde simultaneamente se manteñan concertos coa ensinanza privada
  1. Que adopten as medidas oportunas para lograr unha rede única de centros públicos educativos, a través da supresión progresiva dos concertos educativos ata a súa completa desaparición, mediante a integración voluntaria e negociada dos centros privado-concertados que ocupan solo público
  1. Que, namentres se suprimen os concertos, para que en ningún caso se poida destinar solo municipal para centros escolares privados de ningún tipo. O solo público só para o ensino público
  1. Que se elimine automaticamente o concerto educativo a todos os centros que segreguen por sexo, establecendo normativas específicas para que ningún tribunal poida amparar a segregación e a desigualdade.
  1. Que se asegure como prioridade a existencia dun ensino público con recursos e de calidade en todos os ciclos e que cubra todas as necesidades dende os 0 anos.
  1. Que haxa procesos de escolarización transparentes, democráticos e que conten coa participación dos axentes sociais. Estableceranse mecanismos normativos e sistemas de inspección educativa que os apliquen dende as Direccións Provinciais, a través de comisións de escolarización centralizadas (por municipios ou distritos escolares), que organicen unha adecuada i equitativa escolarización, prestando especial atención á escolarización do alumnado con necesidades educativas específicas e de comprensión educativa, tanto nos centros públicos coma nos privados concertados, mentres existan.
  1. A eliminación do distrito único naquelas poboacións onde exista, pois aumenta as desigualdades nos sistemas educativos ó aglutinar en centros á poboación por status socioeconómico ou por criterios ideolóxicos afíns ó ideario do centro, impedindo o exercicio, en condicións de igualdade, do dereito á educación.
  1. Que, namentres se suprimen os concertos, se estableza a obrigatoriedade de solicitar en primeira opción de matriculación polo menos un centro público educativo para as familias que desexen que os seus fillos ou fillas estuden nun centro da rede sostida con financiamento público.
EXPOSICIÓN DE MOTIVOS

A Constitución española, no seu artigo 27, declara o dereito universal á educación, así como o carácter obrigatorio e gratuíto da ensinanza básica (27.4), establecendo, no seu punto 5, que “os poderes públicos garanten o dereito de todas á educación, mediante unha programación xeral da ensinanza, coa participación efectiva de todos os sectores afectados e a creación de centros docentes”.

Así pois, de acordo co mandato institucional, corresponde ós poderes públicos a obriga de garantir o dereito universal á educación non só mediante á correspondente planificación da ensinanza, coa participación da comunidade educativa, se non tamén a de crear centros docentes públicos que permitan facer efectivo o mencionado dereito.

Recóllese tamén no artigo 27.1 da CE a “liberdade de ensinanza”, recoñecendo ás persoas físicas e xurídicas “a liberdade de creación de centros docentes, dentro do respecto ós principios constitucionais” (27.6). Queda así exposta a posibilidade de creación de centros privados, con arranxo a unha normativa estatal, para o recoñecemento e homologación das súas actuacións.  Pero de ningún modo se contempla na nosa Constitución, nin no dereito comparado, a obriga de financiar con fondos públicos a creación ou funcionamento de centros escolares privados, nin moito menos o pretendido “dereito a escoller centro” por parte das familias.

Como se dixo anteriormente, o texto constitucional establece que a ensinanza básica é obrigatoria e gratuíta, pero non indica que o Estado estea obrigado a outorgar a gratuidade á educación en centros privados polo simple feito de que as familias elixan un centro distinto do creado polos poderes públicos. Así o deixou asentado o Tribunal Constitucional na sentenza 86/1985, do 10 de xullo, ditada pola súa Sala Segunda: “...sendo de todo claro que o dereito á educación – á educación gratuíta na ensinanza básica- non comprende o dereito á gratuidade educativa en calquera centro privado, porque os recursos públicos non acudirán incondicionalmente, alá a onde vaian as preferencias individuais”. Queda claro pois que, para o Tribunal Constitucional, a liberdade educativa non implica en absoluto que os centros privados deban ser financiados con fondos públicos nin que o pretendido dereito a escoller centro sexa algo máis que unha mera preferencia particular.

A Educación Pública, de titularidade e xestión pública, é, e debe ser, polo tanto, garante da equidade e a cohesión social, en tanto que asegurará o exercicio do dereito universal á educación en condicións de igualdade e democracia, “sen discriminación algunha por razón de nacemento, raza, sexo, relixión, opinión ou calquera outra condición ou circunstancia persoal ou social” (artigo 14 da CE)

A “liberdade de elección de centro” reclamada por determinados sectores sociais é de facto “preferencia de selección”, como mostran reiteradamente as investigacións máis recentes. Preferencia de aqueles centros que queren ter unha clientela “escollida” e que serven ás clases máis acomodadas para afastarse de alumnado inmigrante, con maiores necesidades ou de clases máis baixas, á vez que con esa selección o centro asegúrase estar en mellores postos nos rankings de centros, para seguir sendo demandado pola futura clientela “selecta”. Preferencia de selección tamén daquelas familias que non queren ver mesturados ós seus fillos e fillas cos que non son da súa mesma clase social. Buscan dese modo “contactos” sociais e compañeiras/os de aula que poidan influír en mellores resultados educativos e no futuro socio laboral dos seus fillos e fillas. O resultado é a segregación escolar.

A obriga social dos poderes públicos debe ser garantir o dereito á mellor educación posible en todos e cada un dos centros públicos, favorecendo a escolarización máis preto ó domicilio familiar do alumnado. Por elo e para elo todos os municipios e barrios deben contar con prazas públicas suficientes en centros dotados con todos os recursos necesarios para posibilitar que así sexa. Isto non só é máis xusto e equitativo, se non que preserva ante todo a función social da educación, e iso só se pode garantir con unha rede pública educativa única, que non derive recursos públicos a financiar opcións privadas.

A existencia dunha ampla rede de colexios concertados, auspiciada e impulsada por sucesivos gobernos do PSOE e do PP ó longo das tres últimas décadas, xerou unha dobre rede de centros educativos financiados con fondos públicos que, ademais de contribuír de maneira crecente á segregación escolar, dou pé a unha confusión interesada: preténdese confundir o dereito a crear centros privados co das familias a recibir axuda pública para escollelos, o que, de ningún modo, como xa se dixo, está na nosa Constitución nin no dereito comparado.

Hai que dicir ó respecto que España constitúe unha anomalía dentro do panorama europeo, dada a alta proporción de centros que, sendo de titularidade privada, reciben financiamento público a través de importantes subvencións (segundo datos do Consello Escolar do Estado, a escola concertada recibe anualmente máis de 6.300 millóns de euros). Somos o terceiro país de Europa neste tipo de centros, só por detrás de Bélxica e Malta. En todos os demais países, segundo datos da OCDE, a educación é fundamentalmente pública (89,2% en educación primaria e un 83% en secundaria na UE-28, fronte a un 67,3% en España).


A elo engádese que a educación concertada segrega: A dobre rede de centros converteuse nestes anos en garantía de desigualdade. O 82% do alumnado inmigrante, de minorías e con maiores necesidades educativas está escolarizado na escola pública, mentres que só o 18% é admitido en centros concertados, a pesares de recibir financiamento público. Con elo atopámonos ante un círculo vicioso de segregación social que de continuar, aboca a unha importante diminución da equidade e a cohesión social a través desta dobre rede educativa.

En definitiva, o sistema (que non dereito) de “elección de centro” basease na lóxica individualista da “ética do máis forte” e non na lóxica igualitaria da pluralidade e a convivencia. Así entendida, a liberdade de elección é un privilexio e non un dereito, ademais dunha estratexia para situar a educación dentro do proceso de privatización do mercado. Aínda sendo comprensible que as familias poidan ter preferencias á hora de escolarizar ós seus fillos e fillas, non se pode equiparar a manifestación dunha preferencia con un dereito fundamental, nin as preferencias particulares poden prevalecer sobre a planificación educativa ou unha escolarización equitativa. Se a educación é un ben público non pode tratarse como un negocio privado. O estado debe velar polo ben común e non fomentar un mercado educativo con rankings de colexios, onde as familias compitan para conseguir a mellor oferta, como se dun gran supermercado se tratase.