venres, 22 de febreiro de 2013

A política do esperpento instalouse definitivamente no Concello


A política do esperpento instalouse definitivamente no Concello do Grove. Desde Esquerda Unida observamos atónitos a última ocorrencia do PGD do señor Alfredo Bea: pedir a demisión da totalidade dos concelleiros da oposición, incluída a do noso concelleiro Juan Lamelas, que tan só leva 21 días no cargo.
O señor Bea sempre foi un concelleiro polémico, pero desde o seu pacto co PP e AMeca o seu despotismo e intransixencia aumentaron até niveis inadmisíbeis para o pobo do Grove. Para Bea e o seu partido 'demócrata' a cidadanía só teñen dereito a falar unha vez cada catro anos, nen tan sequera no Entroido, e mentras tanto el pode facer e desfacer ao seu antollo. A crítica está prohibida, como prohibido está beber na rúa, utilizar o Pavillón de Deportes Náuticos, xogar á pelota, tender a roupa a secar... pero ante todo está prohibido criticar o seu labor como concelleiro. Todo para o pobo pero sen o pobo é o seu lema.
É curioso que se nos pida a demisión por deixadez de funcións precisamente por criticar a xestión do señor Bea á fronte da concellería de seguridade cidadá. Non é preciso que o señor Bea nos entregue "datos contrastados e papeis" interesados para observar que algo non marcha ben. Tal vez sexa o señor Bea, quen nunca exerceu de oposición ao goberno (estarei nun goberno ou noutro, pero no goberno), a persoa adecuada para explicarnos como debemos desenvolver o noso labor. A tal efecto, desde Esquerda Unida barallamos presentar por vía de urxencia no seguinte pleno municipal unha moción para que se encargue á Concellería de Seguridade Cidadá a redacción dunha ordenanza que regule o labor da oposición no Concello do Grove para que a partires de agora non se molesten o señor Bea nen o señor Pérez cada vez que tentemos facer o noso traballo e así poder continuar con esta política de esperpento e despotismo.