domingo, 2 de decembro de 2018

EU esixe garantías sobre o PXOM e amosa a súa preocupación pola taxa anunciada para as edificacións fóra de ordenación

Pide que o goberno explique de onde xurde e como se calculará ese suposto cobro que o Concello quere aplicar aos que queden en situación de disconformidade co planeamento

Denuncia o deseño á carta das ordenanzas, que o goberno está adaptando ás peticións de arquitectos, aparelladores e, o máis preocupante, construtores 

Insta á veciñanza a introducir por Rexistro queixas e suxestións, pois trátase da única canle na que poden deixar constancia formal das mesmas

O Grove, 1 de decembro de 2018.- O grupo municipal de Esquerda Unida volve denunciar a tramitación chapuceira, dubidosa e sometida a constantes cambios que o goberno local está a realizar en relación co PXOM. A formación considera preocupante que, cando apenas pasou un mes desde que o Concello fixo pública a súa proposta planimétrica, xa hai constancia de numerosos erros relacionados coa aliñación de viais, camiños e rúas. Especial preocupación suscita a taxa anunciada polo alcalde para as edificacións que queden en situación de disconformidade co planeamento. Toda unha sopresa da que nada se tiña dito ata este momento, e sobre a que EU esixe información clara e detallada.

A pesar de que no último pleno foron numerosas as dúbidas e preguntas relacionadas co PXOM que Esquerda Unida puxo sobre a mesa, a sesión rematou sen que o alcalde aportase respostas claras ás mesmas. Unha actitude esquiva que EU contempla con preocupación e que, entende, dá mostra da inaceptable falta de concreción da que aínda adoece o Plan Xeral de Ordenación Municipal proposto polo goberno local. 

Esquerda Unida denuncia os constantes cambios de datas, retrasos e rectificacións, e lembra que a oposición leva meses agardando unha suposta xuntanza para falar das ordenanzas de acompañamento que unha e outra vez o alcalde adía e volve adiar. A formación amosa a súa precupación ante o feito de que esas ordenanzas estean a ser adaptadas ás recomendacións e suxestións de arquitectos, aparelladores e construtores, de xeito totalmente opaco e de costas á cidadanía e aos grupos da corporación.

“Non hai datas, non hai información clara de como se tramitan as dúbidas, as queixas, ou as alegacións da veciñanza”, lamenta o responsable local de EU, que considera que o e-mail ou as xuntanzas individuais no despacho do alcalde en absoluto son a canle adecuada para iso. José Antonio Otero lembra ademais a precaria situación da oficina municipal de urbanismo, e insta á veciñanza a introducir por Rexistro calquera aportación en relación co PXOM; pois trátase da única canle a través da que poden deixar constancia oficial, dada a chapuceira e improvisada tramitación que está a levar adiante o goberno local.


Esquerda Unida lembra que, a pesar da súa obriga legal de facelo e do compromiso explícito do alcalde ao respecto, a día de hoxe as alegacións continúan sen contestar. Algo que incide aínda máis na sensación de desinformación, improvisación e na absoluta falta de garantías en relación a este planeamento urbanístico.

A formación ten constancia de que xa se teñen evidenciado diversos erros en relación á nova proposta planimétrica, sobre a que ao parecer están a realizarse novas modificacións, por exemplo relacionadas co novo vial que está previsto abrir entre As Bouzas e Castelao. Cambios en relación aos cales EU reclama información; ao igual que no que se refire ás propostas de aparelladores, arquitectos e construtores a unhas ordenanzas que o goberno local está a deseñar de xeito opaco e de costas á oposición. 

Así as cousas, Esquerda Unida volve criticar a constante improvisación que ven da man desta pseudoexposición pública, e insta a goberno local a actuar con responsabilidade. Nese senso, reclama que a exposición pública do PXOM modificado se realice de xeito formal, e insta ao Concello a habilitar unha oficina técnica a disposición da veciñanza.

sábado, 1 de decembro de 2018

Esquerda Unida, Podemos e Anova inician os contactos para a conformación dunha candidatura conxunta para as próximas eleccións municipais

As tres formacións teñen posto en marcha os traballos para dar forma a unha lista unitaria 

Confían en chegar aos comicios de maio cunha proposta única que aglutine sensibilidades e dea maior fortaleza aos posicionamentos da esquerda grovense

O Grove, 30 de novembro de 2018.- Esquerda Unida, Podemos e Anova teñen posto en marcha os contactos co obxectivo de dar forma a unha candidatura de unidade para as próximas eleccións municipais. Tras a primeira xuntanza mantida, as tres formacións confían en seguir avanzando na consecución dunha proposta unitaria que aglutine sensibilidades; e que lles permita chegar aos comicios de maio cunha lista de consenso e unha proposta programática capaz de aglutinar sensibilidades e outorgar maior fortaleza aos posicionamentos da esquerda do Grove.

Responsables e militantes de Esquerda Unida, Podemos e Anova no Grove reuníronse nos últimos días, coa ollada posta na conformación dunha candidatura de consenso para as vindeiras eleccións municipais de 2019. Tratouse dun primeiro encontro pensado para levar a cabo un intercambio inicial de opinións e posicionamentos; e que sen dúbida evidenciou a existencia de numerosos aspectos e obxectivos común entre as tres formacións.

Iníciase así unha senda de traballo conxunto que continuará nos vindeiros meses, durante os que Esquerda Unida, Podemos e Anova confían en seguir avanzando na conformación dunha proposta programática á altura das necesidades e demandas das e dos grovenses, coa ollada posta na consecución dun verdadeiro goberno de esquerdas para o municipio. 

sábado, 24 de novembro de 2018

25NOV. Nin Violencia Machista, Nin Xustiza Patriarcal


Dende Esquerda Unida sumámonos ao grito de “Nin Unha Menos” este 25 de novembro do 2018. Non consentimos nin unha asasinada máis, nin unha violada, acosada, discriminada, invisibilizada ou marxinada por etnia, procedencia, idade, diversidade funcional, sexual ou identidade de xénero. Esiximos que as institucións asuman a súa responsabilidade na loita contra a Violencia de Xénero. Unhas institucións que actuaron cunha visión parcial, cunha lexislación sen aplicación efectiva, con diferenzas territoriais e sen os orzamentos, nin o persoal necesario para cumprir as súas obrigas, eludindo á súa responsabilidade de protexer ás vítimas e combater a normalización das violencias.

2018 é, de novo, un ano pragado de novas machistas indignantes como a sentenza ditada contra  Juana Rivas ou, a do caso de La Manada, o alarmante aumento de casos de violación grupal, a descarada e reiterada desidia, cando non aberta hostilidade do poder xudicial, con casos tan vergoñentos como do titular do xulgado de Violencia sobre a Muller número 7 de Madrid —Francisco Javier Martínez Derqui—insultando a unha vítima de violencia de xénero. Fronte a iso, un Pacto de Estado insuficiente e sen aplicación real, e un Informe Sombra ao  GREVIO (Grupo de Expertas na loita contra a violencia contra a muller do Consello de Europa) que suspende rotundamente ao Estado español e a Xunta de Galicia na loita contra a violencia machista.

Afortunadamente, este 2018 tamén vivimos unha contundente resposta social do movemento feminista organizado e plural, subversivo, anticapitalista,  antirracista, ecoloxista e  internacionalista, que mobiliza a millóns de mulleres e que está a redefinir o sentido común da nosa sociedade. Debemos ter presente a enorme importancia do feminismo nun momento no que temos que dar unha dura batalla contra o neoliberalismo, o autoritarismo, a intolerancia e o fascismo, que avanzan internacionalmente. Loitemos dende o feminismo todas xuntas para unha sociedade xusta, libre de violencias e radicalmente democrática.

Por todo iso, dende Esquerda Unida esiximos de xeito urxente:

- O cumprimento da LEI 11/2007, do 27 de xullo, galega para a prevención e o tratamento integral da violencia de xénero. Que se inclúa na presente lei como formas de violencia de xénero, os  ventres de alugueiro e a prostitución. Desenvolver políticas encamiñadas á abolición da prostitución, cun incremento de recursos destinados ao desmantelamento das redes e a “industria” da prostitución, a penalización do proxenetismo, campañas de información e  sensibilización nas que se considere aos homes clientes prostituidores como corresponsables,  o desenvolvemento de medidas específicas de integración e inserción laboral para as mulleres prostituídas se así o deciden, e o rexeitamento de medidas simplemente prohibicionistas dirixidas á persecución  e criminalización das vítimas, as mulleres prostituídas. 

-Que aumente o orzamento destinado a políticas de igualdade. Nos últimos tres anos, a Xunta de Galicia só fixo un ruín incremento dos presupostos para igualdade, que só representa o 0,17% do orzamento aprobado polo goberno do PP para o 2019 (17 millóns fronte a un total de 9.850 millóns de €). Limitándose só o 0,14% do orzamento para a protección e apoio ás vítimas de violencia de xénero, un 0,018% para a promoción do emprego da muller e un mísero 0,016% a apoio de Conciliación e Corresponsabilidade.

-Que se poña en marcha o Pacto de Estado contra a Violencia de Xénero. É inadmisible que despois dun ano de traballo na  subcomisión do Congreso teñamos un pacto insuficiente, sen calendario nin orzamentos decentes; que só a través do decreto 9/2018 do goberno do PSOE puxéronse en marcha 7 das 213 medidas, onde o orzamento desbloqueado para a xestión local non teña un indicativo de que obxectivos ten nin como debe ser a súa implantación.

-Que as campañas promovidas dende as distintas administracións para a violencia de xénero teñan unha perspectiva feminista. Non consentimos máis campañas orientadas a culpabilización das mulleres, o que teñamos que estar vixiantes ante actitudes e accións violentas machistas ou cosificadas como monumentos que “Hai que protexer”, como a campaña da Xunta do 25 N do pasado ano. Eliminar a publicidade sexista que discrimina e atenta contra a dignidade das mulleres en soportes publicitarios, publicacións ou transportes públicos, así como, non permitir contratos públicos con medios de comunicación nos que manteñan publicidade  relacionada coa prostitución ou pornografía, que deshumaniza e converte as mulleres en mercadorías facilitando a proliferación de mafias e proxenetismo.

-Que se ensine educación afectivo-sexual e contra a discriminación e violencia de xénero. Este ensino ten que vir dende a óptica feminista, dende a diversidade sexual e identidade de xénero en todas as fases educativas.

-Que se desenvolvan plans de formación e sensibilización contra a violencia de xénero de obrigado cumprimento ao persoal ao servicio das administracións. Especialmente no ámbito social, sanitario, educativo, xurídico e ás forzas e violencia machista se erradicará dun xeito transversal, abordando todos os niveis e a todas as escalas, para que dunha vez por todas poidamos recoñecernos nunha sociedade xusta e radicalmente igualitaria. 

-Demandamos unha xestión pública directa da rede de servicios de violencia de xénero, como paso fundamental para garantir a mellora da calidade asistencial e das condicións laborais do persoal que atende ás vítimas rexeitando a constante externalización destes servizos. 

Por todo o anterior, dende Esquerda Unida esiximos unha estratexia estrutural que loite en todos os ámbitos, con recursos económicos, humanos, técnicos e materiais suficientes para que os obxectivos non queden na sinatura de documentos institucionais, mentres temos unha realidade inadmisible de violencias e desprotección para as mulleres.

Dende a nosa organización apoiamos as mobilizacións organizadas en Galicia este 25 de novembro para reivindicar unha sociedade libre de violencia de xénero.

ÁREA DA MULLER DE ESQUERDA UNIDA

EU denuncia os cortes de auga efectuados polo Concello a distintos domicilios sen previo aviso

Considera intolerable que o consistorio non informase aos afectados, deixando a numerosos veciños sen auga durante a pasada fin de semana

Pedirá explicacións ao respecto no vindeiro pleno, pois entende que o goberno local debe actuar con maior respecto cara á veciñanza e asumir os posibles prexuízos causados

O Grove, 23 de novembro de 2018.- O grupo municipal de Esquerda Unida denuncia os cortes de auga que o Concello ten realizado nos últimos días a distintos domicilios sen emitir ningún tipo de aviso previo; deixando a numerosos veciños sen auga por sorpresa, e mesmo en plena fin de semana. 

Esquerda Unida ve necesario que o goberno local dea explicacións sobre un proceder que a formación considera grave e intolerable. E é que se trata de cortes individualizados efectuados en domicilios concretos e producidos sen xustificación aparente, xa que afectaron a veciñas e veciños con todos os pagos dos recibos da auga ao día. 

Segundo a información á que, a falta de explicacións oficiais, puido ter acceso EU, os cortes poden ter relación con problemas nos contadores da auga.  En calquera caso,  a formación entende que o Concello debe actuar con maior respecto nun futuro; dando parte á veciñanza antes de proceder a unha medida tan drástica sen ter remitido ningún tipo de notificación previa.

Esquerda Unida lamenta a falta de consideración amosada polo goberno do PSOE, ao que insta a dar explicacións detalladas e a asumir o os prexuízos que estes cortes poidan ter provocado; así como o custe das posibles avarías de electrodomésticos. 

xoves, 15 de novembro de 2018

EU denuncia a falta de procedemento en relación á tramitación do PXOM e insta a habilitar unha oficina técnica para atender con eficacia as dúbidas da veciñanza


Critica que sexa o alcalde o que está a atender á cidadanía; un proceder caciquil e absolutamente inaxeitado para solucionar os posibles problemas técnicos

Destaca os incumprimentos do goberno local, que non respostou ás alegacións a pesar da súa obriga, e do compromiso explícito de facelo

Apunta a incerteza existente, pois a documentación feita pública atópase incompleta, e tampouco se coñecen os prazos de “exposición” nin existe unha canle axeitada para que os afectados reclamen posibles erros ou amosen a súa disconformidade

O Grove, 14 de novembro de 2018.- O grupo municipal de Esquerda Unida denuncia a falta de procedemento do goberno local en relación coa tramitación do PXOM. Un planeamento que o Concello ten publicado incompleto e sen ter contestado antes ás alegacións presentadas. E respecto ao cal existe unha incerteza absoluta, pois a día de hoxe descoñécense os prazos previstos para a pseudoexposición pública iniciada, así como tampouco existe unha vía axeitada para que a veciñanza poida tramitar posibles erros ou amosar a súa disconformidade con determinados aspectos da proposta.

Esquerda Unida lamenta o procedemento chapuceiro e as maneiras caciquís que o goberno local está a empregar na tramitación do PXOM. E é que a documentación que o goberno local ten subido á web atópase incompleta, xa que faltan as ordenanzas que deben acompañar á proposta planimétrica. Unha carencia que xera unha absoluta incerteza respecto á aplicación práctica do planeamento; e que, ademais, “deixa aos grupos da oposición sen marxe de maniobra no asesoramento ou axuda aos veciños, pois a día de hoxe non sabemos se as ordenanzas que se nos trasladaron hai uns meses co propósito de incluír posibles modificacións son vinculantes ou non”, tal e como destaca o responsable local da formación, José Antonio Otero. 

Esquerda Unida ve absolutamente necesario que o Concello poña a disposición da veciñanza asesoramento técnico axeitado e capaz de solventar con eficacia as dúbidas que os afectados poidan ter respecto á proposta presentada. “Non pode ser que sexa o alcalde o que atende á veciñanza, algo propio dunha administración caciquil. Cuestión esta que pon en entredito a transparencia do procedemento, pois non é o alcalde o que ten que resolver estes asuntos, senón os técnicos”, tal e como destacan os edís José Antonio Otero e Xan Lamelas.  Nesa liña, a formación reclama a posta en marcha dunha oficina técnica á que a cidadanía poida acudir e que aporte garantías respecto do necesario asesoramento. 

A formación destaca a deficiente atención que o gobenro local está a prestar á veciñanza. Algo que evidencia tamén o feito de que a planimetría se expoña fraccionada: unha parte en San Vicente, e outra no Concello, obrigando aos veciños que poidan ter propiedades en ambas parroquias a trasladarse dun a outro emprazamento para poder ver os planos correspondentes.

Para Esquerda Unida resulta igualmente inaceptable que o goberno local teña pasado por alto a súa obriga legal de contestar ás alegacións que se presentaron á primeira proposta de PXOM. Para máis inri aínda, incumprindo tamén a súa promesa explícita de facelo. 

En vista de todo elo, a formación volve insistir na necesidade de que se realice unha segunda exposión pública formal; “o único método legal e realmente efectivo para resolver as posibles reclamacións dos veciños. Neste momento non hai información clara nin garantía algunha sobre o xeito en que a cidadanía pode reclamar ante posibles erros no planeamento ou amosar a súa disconformidade coa situación na que quedan actualmente. Nas poucas semanas que o PXOM leva subido á web xa temos queixas de moitos propietarios que se ven prexudicados en comparación co plan de 2014; sobre todo en relación ás normas subsidiarias, perdendo edificabilidade e mesmo quedando fora de ordenacion (ou o que agora se chama disconforme co planeamento), cando no seu día construíron en base a unhas normas vixentes e de forma legal”. 

luns, 29 de outubro de 2018

EU propón un plan de medidas pola igualdade que acompañe a declaración de O Grove como Municipio Libre de Violencias Machistas


A formación leva ao pleno unha moción que aspira a ampliar os medios, recursos e iniciativas contra as violencias machistas no eido municipal e escolar

Solicita que se controlen posibles contidos sexistas na publicidade e na programación municipal de actividades sociais, culturais, lúdicas, deportivas ou festivas

Anima ao Concello a implicarse de xeito activo impulsando políticas encamiñadas á abolición da prostitución; e pide que únicamente os colectivos deportivos que non realicen descriminación por razón de sexo entre os seus membros poidan acceder a financiamento municipal

O Grove, 28 de outubro de 2018.- O grupo municipal de Esquerda Unida anima ao Concello do Grove a implicarse de xeito máis activo coa loita a favor da igualdade e contra as violencias machistas. Ese é o sentido da moción que a formación á que representan Jose Antonio Otero e Xan Lamelas levarán ao pleno deste luns. Un texto a través do cal solicitarán o apoio dos grupos da corporación para que O Grove sexa declarado Municipio libre de Violencias Machistas. Un nomeamento que, moi lonxe de ser unha simple declaración de intencións, EU quere acompañar de medidas activias que impliquen ao movemento feminista e que doten ao consistorio dun papel máis activo nesta causa. 

Moción contra a decision do Tribunal Supremo sobre o imposto das hipotecas
A formación tamén defenderá no mesmo pleno outra moción para que a corporación rexeite “a inaudita e vergoñenta decision do Tribunal Supremo de deixar sen efecto a súa sentenza” relativa ao imposto das hipotecas. O texto insta ademais ao Concello a habilitar mecanismos de orientación para a veciñanza que desexe esixir a devolución das cantidades indebidamente cobradas polas entidades bancarias en relación a este asunto. Ademais de animar ao goberno central a que impulse a creación dun polo de banca pública, paralizando a venda de Bankia e dirixindo a xestión dos aforros depositados nesta banca pública á atención das necesidades sociais, o desenvolvemento duns servizos públicos de calidde e suficientes e a erradicación do desemprego. 

Esquerda Unida quere aproveitar a proximidade do 25 de novembro, Día Internacional contra a Violencia de Xénero, para poñer en marcha un paquete de medidas que convirtan ao Concello do Grove nun verdadeiro axente activo na loita contra as violencias machistas. A formación entende que o traballo de prevención, educación e sensibilización da sociedade debe ser o punto de partida no camiño cara á igualdade real, e destaca o papel que as institucións deben xogar no mesmo. 

“Esiximos que este 25 de novembro sexa o comezo real das políticas dos feitos, e non só das palabras, contra as violencias machistas”, indica a formación. Por iso, EU pon sobre a mesa unha batería de iniciativas para que O Grove impulse unha verdadeira política activa pola igualdade. 

A formación ve necesario que o Concello traballe da man do movemento feminista para coordinar e impulsar un Plan pola Igualdade e contra a Violencia de Xénero que inclúa a creación de protocolos de actuación contra as violencias machistas dentro do propio Concello; e que amplíe os recursos humanos, técnicos e materiais destinados ao desenvolvemento de políticas de igualdade integrais e participativas. 

As propostas de EU inclúen tamén un incremento dos recursos destinados á abolición da prostitución e a loita contra o proxenetismo, a través, por exemplo, de campañas de información e sensibilización ou de medidas destinadas á integración e inserción laboral das mulleres prostituídas. Ademais, a moción anima ao Concello a eliminar a publicidade con contidos sexistas dos espazos públicos; e a velar porque que na programación municipal de actividades sociais, culturais, lúdicas, deportivas e festivas de toda índole non se inclúan contidos sexistas que atenten contra a dignidade das mulleres de ningún xeito. 

Esquerda Unida tamén propón que o Concello se implique no desenvolvemento de actividades que fomenten a igualdade dende a infancia no ámbito escolar. E solicita que unicamente os colectivos deportivos que non discriminen por razón de sexo nos seus premios ou recoñecementos poidan acceder a financiamento municipal. 

domingo, 28 de outubro de 2018

EU denuncia o caos do tráfico e insta a apurar os traballos do Plan de Mobilidade



Considera inaceptable a situación no entorno do colexio Rosalía de Castro e no recén humanizado tramo de Alexandre Bóveda, onde autobuses e camións se ven obrigados a circular en dirección prohibida case a diario

Lamenta que o goberno local impulse proxectos de humanización e cambios illados sen contar antes cunha proposta xeral realista e fundamentada nas características e necesidades da rede viaria do casco urbano

Denuncia a ineficiente xestión municipal neste senso, e insta ao alcalde a traballar con seriedade e rigor para que o Plan de Mobilidade poida plasmarse no PXOM

O Grove, 27 de outubro de 2018.- O grupo municipal de Esquerda Unida volve instar ao goberno local a convocar coa máxima urxencia unha xuntanza de traballo que permita avanzar na elaboración do Plan de Mobilidade e aporte solucións aos problemas xerados polos últimos cambios relacionados coa ordenación do tráfico no casco urbano. A formación denuncia o caos circulatorio que o peche dun carril en Alexandre Bóveda ten xerado en rúas próximas; e os problemas que autobuses e camións padecen case a diario a consecuencia dos mesmos; e que provocan que estes circulen por dirección prohibida día si e día tamén.

Esquerda Unida entende que non é de recibo que o Concello empregue recursos en actuacións de humanización illadas, cando O Grove carece aínda dun Plan de Mobilidade que contemple e recolla as necesidades do conxunto do casco urbano en materia de tráfico. As consecuencias de non facelo así xa está a padecelas a veciñanza practicamente a diario, pois os vehículos de maiores dimensións teñen serias dificultades para efectuar os xiros aos que obrigan os novos sentidos de circulación. E é habitual que os autobuses escolares ou os camións que veñen dende Terra de Porto por Alexandre Bóveda se vexan obrigados a circular en dirección prohibida polo último treito desa rúa, agora de sentido único. O motivo: non dispoñen de espazo suficiente para efectuar o xiro cara a Rosalía de Castro.

Para o responsable local da formación resulta chocante que o goberno local anuncie un PXOM rematado cando aínda non está claro o Plan de Mobilidade que se vai executar; e que debería terse impulsado con anterioridade para poder ser incluído no plan xeral urbanístico. 

José Antonio Otero faise eco do tremendo caos circulatorio que tamén denuncian as e os grovenses, e apela ao sentido da responsabilidade do alcalde para convocar unha xuntanza de traballo e impulsar canto antes o Plan de Mobilidade e buscar solucións acordes á realidade do mapa grovense.

Inseguridade para os escolares
Os problemas e embotellamentos repítense nas rúas Alexandre Bóveda, Rosalía de Castro, Avedida de Portugal, Luís Antonio Mestre e Rúa da Igrexa. Ademais, os cambios introducidos nos últimos meses teñen derivado un maior fluxo de tráfico cara a outras rúas da contorna máis estreitas, como a do Sol, Raposeira ou Montiño, así como no Sineiro ou en Entrehortas. Rúas que non ofrecen condicións para unha mobilidade segura, pois non contan con beirarrúas ou zonas de tránsito delimitadas para os peóns.

Esquerda Unida destaca a perigosidade que a situación implica para a comunidade escolar. Tanto polo colapso que padece Rosalía de Castro coincidindo cos horarios de entrada e saída do colexio. Como por ese maior tráfico de vehículos que se ten trasladado cara a ruelas da contorna polas que, en moitos casos, transcorren os Camiños Escolares Seguros.

Reclama un incremento da vixilancia nos Camiños Escolares Seguros
Esquerda Unida destaca que, a pesar da presentación a bombo e platillo dos Camiños Escolares Seguros que o goberno local realizou no seu día, estes non están a funcionar como tal na realidade. Nese senso, o responsable local da formación denuncia que a medida se teña reducido á colocación dunha serie de carteis indicadores; pero a realidade é que no día a día non está a facilitarse unha vixilancia das rutas nin existen medidas de seguridade para os cativos nos cruces ou pasos de peóns. 

domingo, 21 de outubro de 2018

EU denuncia atrasos de máis dun ano no pago a asociacións culturais que actuaron na Festa do Marisco

A fomación denuncia os impagos e insta ao Concello a saldar as débedas de inmediato

Lamenta o desleixo do goberno local e o abuso cara aos colectivos locais no que ten incorrido o grupo do PSOE

O Grove, 20 de outubro de 2018.- O grupo municipal de Esquerda Unida insta ao goberno local a asumir coa máxima celeridade a débeda que mantén dende hai xa máis dun ano con distintas asociación culturais que actuaron na edición de 2017 da Festa do Marisco. A formación considera inaceptable que, cando xa teñen concluido os festexos deste ano, o executivo de Cacabelos aínda non teña afrontado os pagos correspondentes ao exercicio anterior. Unha actitude que evidencia unha inaceptable falta de consideración do Concello cara aos colectivos locais que colaboran na programación do Marisco.

Cando a Festa do Marisco deste ano xa ten sido clausurada, son varios os colectivos que aínda non cobraron polas actuacións realizadas na celebración de 2017. E, a pesar de que o asunto xa foi denunciado en pleno polo grupo de Esquerda Unida, o goberno socialista continúa, nunha inaceptable mostra de desleixo e falta de consideración, sen facerse cargo deses pagos. 

EU quere denunciar públicamente uns impagos que non afectan únicamente aos colectivos culturais. E é que, tal e como explica o responsable local da formación, o grupo municipal esquerdista ten “constancia de que outros servizos da edición pasada foron abonados nas semanas previas ao comezo desta festa”.

Para Esquerda Unida resulta intolerable o ninguneo ao que o goberno local está a someter aos colectivos locais que, ano tras ano, poñen o seu esforzo ao servizo do Grove e colaboran para que a Festa do Marisco poida contar cunha programación cultural o máis ampla posible. “Segundo sabemos, a un dos colectivos afectados díxoselle en agosto que a factura tiña que ir a pleno, pero en setembro non foi e para outubro, polo que temos entendido, tampouco irá”, explica José Antonio Otero, que solicita que “se axilice ao máximo o trámite para que a nomeada factura poida entrar na orde do día da sesión plenaria deste mes e así os afectados poidan cobrar polo traballo realizado o máis axiña posible”.

Para Esquerda Unida non resulta aceptable que a administración local incorra neste tipo de prácticas, desatendendo as súas obrigas de pago e prestando unha consideración nula ás necesidades duns colectivos que sempre se caracterizaron polo seu afán de colaboración. 

Así as cousas, a formación apela á responsabilidade do goberno local para que algo así non volva repetirse. E, ademais de instar ao grupo que lidera Jose Cacabelos a saldar coa máxima celeridade as débedas atrasadas, esixe que os servizos correspondentes á edición deste ano sexan abonados polo Concello en tempo e forma. 

domingo, 30 de setembro de 2018

EU amosa a súa preocupación polo atraso na licitación e posta en marcha da obra do Auditorio-Escola de Música

A formación alerta do grave problema que o feito de non cumprir cos prazos estipulados pode ocasionar ás arcas municipais

Denuncia as “chantaxes” empregadas no seu día polo alcalde para aprobar un crédito que, finalmente, o goberno local está empregando noutras actuacións diferentes


O Grove, 29 de setembro de 2018.- O grupo municipal de Esquerda Unida insta ao goberno local a actuar coa máxima dilixencia e responsabilidade para evitar que O Grove teña que devolver o millón e medio de euros concedido pola Deputación de Pontevedra para a construcción do Auditorio-Escola de Música. A formación ve con preocupación o importante e cada vez maior atraso que acumula a posta en marcha dunha obra que deberá estar rematada antes do 30 de xuño se o Concello non quere verse na obriga de reembolsar a aportación económica do goberno provincial.

A pesar das présas, presións e chantaxes empregadas polo alcalde cando, hai xa máis dun ano, instaba á oposición a respaldar un crédito de 4,5 millóns de euros para a construcción do auditorio, os meses pasan e no Monte da Vila todo segue igual. Unha parálise que Esquerda Unida observa cada vez con maior preocupación, pois o feito de non rematar a tempo esta obra podería supoñer un gravísimo problema para as contas do Concello do Grove.

A mesa de contratación reuniuse o 27 de xullo para proceder á apertura dos sobres A e B. Sen embargo, os meses pasan, o remate do ano vaise achegando e o proceso de licitación atópase paralizado dende aquel momento.

A obra do auditorio-escola de música conta cun prazo de execución estipulado de 8 meses, polo que o feito de “non tela licitada nestas datas ocasiona que os prazos para a execución da obra sexan cada vez máis xustos. Tendo en conta que se pide tela rematada antes do 30/06/2019 para tela xustificada antes do 30/09/2019 estamos a 9 meses da primeira data e a 12 da segunda, cando queda aínda por licitar a obra, así como o período de reclamacións, a sinatura do contrato e o comezo dos traballos; algo que pode demorarse ata un mes dende que se coñeza a empresa que gaña a licitación”, explica o responsable local de Esquerda Unida.

Así as cousas, a preocupación nas filas da formación local vai en aumento. E é que, tal e como indica José Antonio Otero, se O Grove non cumpre cos prazos establecidos o Concello veríase na obriga de solicitar un novo crédito para poder devolver o millón e medio de euros da subvención da Deputación. 

Esquerda Unida lamenta que o tempo veña darlle a razón e corrobore a mala xestión que o goberno de Jose Cacabelos ten realizado en relación a este asunto. Un proxecto estrela que o rexedor local quixo sacar adiante anunciándoo a bombo e platillo e con demasiada presa; sen ter en conta nin tan sequera a realidade da parcela en cuestión. E é que, cabe lembrar que o proxecto acumula xa antes de comezar un importante sobrecusto, consecuencia dos cambios que foi preciso efectuar nel para adaptar á realidade do terreo un deseño que o rexedor local presentou publicamente antes de ter definidos os límites da parcela municipal na que se realizará a obra.

Esquerda Unida insta ao goberno local a actuar coa máxima responsabilidade para que ese sobrecuste non se incremente aínda máis e para que o proxecto poida materializarse e non se convirta nun estrepitoso fracaso. E é que, tal e como lembra o voceiro de EU, unha vez que a Deputación anunciou a concesión de 1,5 millóns de euros para a construción do auditorio, o alcalde decidiu cambiar o destino da mesma cantidade do crédito de 4,5 aprobado a mediados do 2016 co apoio do PGD. Así as cousas e chegados a este momento, se o Concello non puidera cumprir cos prazos de execución estipulados O Grove atoparíase sen auditorio e con dous créditos. O de 4,5 millóns que o alcalde propuxo no seu día como a única solución para que a localidade puidese contar cun auditorio (e que lle ten dado carta branca para sacar adiante distintos proxectos sen necesidade de contar coa oposición); e o de 1,5 millóns que se vería na obriga de solicitar a maiores para devolver os fondos da Deputación.

“Todo isto volve amosar que estabamos no certo cando no seu día denunciábamos a mala xestión do goberno neste asunto”, indica Otero, que lamenta as “chantaxes e presións públicas empregadas por Cacabelos para forzar á oposición a aprobar un crédito que finalmente está utilizando para outros asuntos de modo absolutamente electoralista”. 

mércores, 26 de setembro de 2018

EU reclama solucións ao caos circulatorio derivado do peche dun carril en Alexandre Bóveda

Denuncia o colapso que a medida ten xerado en rúas próximas como a Avenida de Portugal, e insta ao goberno local a avanzar na elaboración do Plan de Mobilidade

Reclamouno no pleno, onde tamén solicitou un maior celo do control aos propietarios que non recollen as deposicións dos seus animais en rúas e camiños



O Grove, 25 de setembro de 2018.- O grupo municipal de Esquerda Unida insta ao goberno local a convocar coa máxima urxencia unha xuntanza de traballo que permita avanzar na elaboración do Plan de Mobilidade local e aporte solucións aos problemas xerados polos últimos cambios relacionados coa ordenación do tráfico no casco urbano. A formación lamenta o caos circulatorio que o peche dun carril en Alexandre Bóveda ten xerado en rúas próximas como a Avenida de Portugal, e denuncia a falta de planificación nesta materia. Unha deficiente xestión que evidencia tamén o inaceptable atraso que acumula a posta en funcionamento dos novos sistemas de control do tráfico en rúas peonís como a Catorse, onde case un ano despois da obra de humanización os pivotes móbiles continúan sen funcionar. Foi un dos temas que os concelleiros de EU levaron ao pleno deste mes de setembro. Unha sesión na que os edís esquerdistas debullaron ademais a longa lista de deberes pendentes que, a pesar dos reiterados rogos realizados pola formación ao longo de sucesivos meses, o Concello continúa sen atender. 

Esquerda Unida urxe solucións, análise e traballo que permitan mellorar o mapa do tráfico da localidade, e lamenta que as palabras e compromisos do goberno local as leve o vento. E é que resulta inaceptable que, cando está a piques de cumprirse un ano da peonalización da Catorse, as tarxetas para residentes e usuarios anunciadas continúen sen estar en uso, e o pivote móbil permanentemente apagado.

Esquerda Unida lamenta a resistencia do goberno local do PSOE a ter en conta as aportacións e ideas que lle chegan dende as filas da oposición. Unha reticencia ao diálogo que perxudica, en última instancia, á cidadanía. E que se traduce nun inxente número de pequenos problemas do día a día pendentes de resolver que se prolongan no tempo. 

Sen solucionar está o problema de iluminación no entorno de Rosalía de Castro que a veciñanza ten feito chegar aos concelleiros de EU, e que éstes trasladaron ao conxunto do pleno xa en xaneiro. Do mesmo xeito que continúa pendente a instalación de bolardos que impidan o estacionamento e favorezan a visibilidade no cruce da Fontegrande coa rúa da Igrexa, solicitados en febreiro. 

A formación tamén aproveitou o pleno deste luns para volver lembrarlle ao grupo de goberno a necesidade dun paso de peón na saída de Entrehortas, entre a farmacia e a parada de taxis, que xa fora solicitado en maio. Así como o déficit de papeleiras en diferentes rúas grovenses, como Lepanto, Con do Gato ou Raposeira (neste caso, solicitado en marzo).

A formación incide ademais na mala imaxe e na falta de seguridade que provoca o estado da área de xogos infantís da Siradella. Un deterioro que Esquerda Unida xa ten denunciado en pleno en máis dunha ocasión, e en relación ao cal os concelleiros do grupo municipal de EU volveron solicitar ao Concello que se dirixa á Comunidade de Montes de San Martiño para pedir a retirada dos restos das randeeiras existentes antes de que éstas ocasionen algún accidente.

Esquerda Unida tamén aproveitou o pleno deste luns para volver reclamar ao Concello que solicite á Xunta a reposición da deteriorada sinalización viaria da estrada do istmo. E a Emgrobes a retirada da caseta informativa da Lanzada, pois son moitos os visitantes que paran alí pensando que está en funcionamento.

A formación lamenta ademais a resistencia do goberno local a facilitar información á oposición sobre distintos proxectos en marcha aínda a pesar de tela solicitado por rexistro.