Esquerda Unida propón recuperar os solares abandonados do Grove para usos comunitarios

O grupo municipal leva ao pleno unha moción para poñer en marcha un programa de cesión temporal de parcelas privadas a cambio do seu mantemento. 

 A iniciativa permitiría crear hortas urbanas, zonas verdes ou aparcadoiros provisionais, dando unha saída útil a fincas sen uso e evitando problemas de insalubridade e risco de incendio. 

A proposta aposta pola colaboración voluntaria dos propietarios e por un enfoque social, ambiental e participativo da xestión do solo urbano e rústico.

O Grove, 18 de agosto de 2025.- O grupo municipal de Esquerda Unida vén de presentar unha moción para o seu debate, coa que propón a creación dun Programa Municipal de Cesión Temporal de Solares Privados, que permita ao Concello poñer en uso, de maneira provisional e sen alterar a propiedade, as numerosas fincas que permanecen abandonadas, sen uso ou en mal estado no termo municipal. 

A moción foi rexistrada solicitando a súa inclusión no pleno extraordinario que o goberno municipal ten previsto celebrar o 25 deste mes. No caso de non ser incorporada a esa sesión, a moción debaterase no pleno ordinario fixado para o 29 de setembro. 

A proposta permitiría que os propietarios de solares cedesen temporalmente o uso das súas fincas ao Concello a cambio de que este se encargue do seu mantemento, limpeza e posta en valor, destinándoas a usos de interese público e comunitario, como hortas urbanas, zonas verdes, espazos educativos ou mesmo aparcadoiros disuasorios temporais. 

“Hai moitas parcelas no Grove que levan anos sen coidado, acumulando maleza e lixo, con risco de incendio ou pragas, e xerando malestar entre a veciñanza. Moitas veces detrás desa situación hai persoas maiores, con problemas de saúde ou sen recursos. Non sempre é cuestión de vontade, senón de falta de capacidade”, explicou o voceiro de Esquerda Unida, José Antonio Otero. 

A moción inclúe tamén a elaboración dunha ordenanza municipal específica que regule esta fórmula de cesión voluntaria, e que garanta os dereitos da propiedade ao tempo que permite o uso comunitario do solo en beneficio do ben común. O programa incluiría a posibilidade de implicar a entidades sociais, centros educativos ou colectivos veciñais na xestión dos espazos cedidos. 

Dende Esquerda Unida deixan claro que esta proposta non exime nin aos propietarios de cumprir coa súa obriga legal de manter os seus solares en bo estado, nin ao Concello da súa responsabilidade de facer cumprir a ordenanza municipal vixente. 

“Estamos a propoñer unha ferramenta útil, solidaria e intelixente. Evitamos sancionar a quen non pode cumprir coa súa obriga, ofrecéndolle unha alternativa digna, e ao mesmo tempo recuperamos espazos mortos para a vida comunitaria. Pero iso non significa que se poida mirar para outro lado: o Concello debe seguir vixiando, actuando e esixindo o cumprimento das obrigas legais a quen non colabore”, concluíu Otero. 

Co propósito de facilitar a posta en marcha efectiva desta medida e evitar atrasos innecesarios, Esquerda Unida entregará ao goberno municipal un borrador de ordenanza reguladora e un modelo de convenio tipo, que poidan servir como base de traballo inmediata para desenvolver o programa. 

Dende Esquerda Unida agardan que o goberno e resto dos grupos municipais apoien a iniciativa, que se enmarca nun modelo de vila máis habitable, coidada e centrada na participación cidadá. Insisten en que o programa será voluntario, transparente e respectuoso coa propiedade privada, e que está pensado como unha solución práctica fronte á desatención do espazo privado que impacta negativamente no interese colectivo.

[ver/descargar moción]

EU esixe o pintando de todas as sinalizacións horizontais do Grove e a inclusión do lema “O Mar Comeza Aquí” nas arquetas dos sumidoiros

A formación alerta do perigo que supón a ausencia de pasos de peóns e outras sinalizacións horizontais en moitas das rúas do concello e pide que o pintado non se limite ás recentemente asfaltadas.

Aproveitan para reclamar a aplicación efectiva da campaña “O Mar Comeza Aquí”, aprobada por unanimidade en 2024 a proposta de Esquerda Unida, que pretende concienciar sobre a conexión entre o lixo nas rúas e a contaminación mariña.

O Grove, 17 de xuño de 2025.-Esquerda Unida solicita ao goberno municipal que os traballos de pintado de sinalización horizontal non se limite ás rúas que veñen de ser asfaltadas e se estendan ao resto do concello. A formación alerta de que en moitos puntos do municipio a sinalización é “inapreciable ou inexistente”, especialmente os pasos de peóns, e isto “supón un perigo real tanto para os vehículos como para os viandantes”, explica o seu voceiro José Antonio Otero.

Desde Esquerda Unida lembran que en varios plenos anteriores xa advertiran desta situación, e que dende o goberno municipal se xustificou o atraso no pintado pola execución do plan de asfaltados. Con todo, “tememos que só se vai pintar o novo, e que volverán esquecer o resto das rúas, xusto cando se achega o verán e aumenta a afluencia de visitantes, o que fai aínda máis necesario garantir a seguridade peonil”, insiste Otero.

Ao mesmo tempo, Esquerda Unida propón que se aproveiten estes traballos para incorporar unha acción de sensibilización ambiental de baixo custo e alto valor educativo: o pintado do lema “O mar comeza aquí” nas arquetas dos sumidoiros, especialmente nas zonas máis transitadas.

Esta acción forma parte dunha campaña ambiental presentada por Esquerda Unida e aprobada por unanimidade no pleno de setembro de 2024, co obxectivo de lembrar á cidadanía que os residuos depositados nas rúas, como as cabichas, rematan moitas veces no mar. “Moita xente non é consciente de que o lixo que tiramos ao chan ou aos sumidoiros acaba na nosa ría. Este pintado é unha maneira visual, directa e económica de concienciar”, sinala o concelleiro Anxo Meis, defensor da iniciativa.

A medida xa foi implantada en numerosas cidades europeas e está recoñecida como boa práctica ambiental. Desde Esquerda Unida consideran que esta intervención debería ser o primeiro paso dunha campaña máis ampla, que inclúa tamén sistemas físicos de recollida de residuos nos sumidoiros.

“Se se están a pintar pasos de peóns e marcas viarias, non hai razón para non aplicar tamén esta medida que xa foi aprobada por este mesmo pleno”, engade Meis. A formación lembra que O Grove ten no mar o seu principal recurso económico e ambiental, polo que toda acción que contribúa a preservar o ecosistema mariño debe ser prioritaria.

Por todo isto, Esquerda Unida reclama que o Concello actúe de inmediato para estender o pintado de sinalizacións a todo o termo municipal e que execute xa os compromisos adquiridos coa campaña “O mar comeza aquí”.

EU presenta propostas para executar con un remanente que evidencia un goberno esgotado e incapaz

A formación reclama actuacións realistas, executables neste mesmo exercicio, que melloren a mobilidade, os servizos públicos, a xestión ambiental e o benestar da veciñanza.

As propostas inclúen a adquisición de terreos, reformas en equipamentos públicos, melloras na rede de auga, instalación de zonas de sombra, espazos para animais e novo equipamento municipal.

O Grove, 27 de maio de 2025.- Esquerda Unida vén de trasladar ao goberno unha batería de propostas concretas para seren financiadas con cargo ao remanente de tesourería do exercicio 2024, que ascende a máis de 6 millóns de euros. A formación volve criticar con contundencia que, malia dispor deses 6 millóns de euros de remanente e tamén dun superávit de 2,5 millóns, se siga traballando cuns orzamentos prorrogados dende o 2022.

Dende Esquerda Unida sinalan que “isto evidencia que contar con un orzamento non era nin é cuestión de falta de cartos, senón dunha nefasta xestión. É a mostra dun goberno esgotado e incapaz de executar nin sequera os seus propios orzamentos”. A formación cualifica a situación de preocupante, “chegamos ao punto de que son incapaces ata de mandar pintar un paso de peóns”.

A pesar deste panorama, Esquerda Unida mantén a súa vontade construtiva e achegou ao executivo local, tal e como anunciaran, un conxunto de actuacións pensadas para seren realistas e executables dentro do presente ano, tal e como esixe a normativa. As propostas céntranse na mellora de infraestruturas, servizos públicos e espazos comúns, con impacto directo na calidade de vida da veciñanza.

Entre as actuacións propostas, destaca a compra do terreo de Entrehortas, unha operación comprometida nas negociacións do ano pasado que finalmente non se chegou a pechar. A formación considera esencial esta adquisición para ampliar o aparcadoiro da zona e habilitar un acceso dende Conricado. Así mesmo, Esquerda Unida propón valorar a posibilidade de crear un aparcadoiro a dúas alturas nese espazo e, "no caso de resultar viable, encargar xa a redacción dun proxecto técnico que permita acometer a obra nun futuro próximo".

Outra proposta é a compra dun terreo situado na parte traseira do pavillón do CEIP Conmeniño, co obxectivo de habilitalo como zona de estacionamento. "Tendo en conta que se está abrindo unha porta cara o exterior, esta actuación melloraría o estacionamento e facilitaría o acceso ás actividades deportivas non lectivas sen ter que entrar no recinto escolar", indican.

No ámbito da protección animal, Esquerda Unida pide que se habilite unha aula no edificio do Monte das Flores para a asociación O Jato Meco. O obxectivo é crear un espazo axeitado para a atención dos gatos das colonias, especialmente aqueles aos que se lles aplica o protocolo CES ou que precisan coidados veterinarios. Lembran que "este é un servizo de competencia municipal que actualmente realiza a asociación e son as propias voluntarias as que acollen aos animais nas súas casas, cos conseguintes problemas que lles supón".

A formación tamén propón unha obra de reforma no Punto de Atención á Infancia, para conectar a sala de usos múltiples, onde se traballa cos nenos de maior idade, co cuarto de baño. Actualmente, a separación entre ambas zonas obriga a atravesar un corredor, dificultando o control dos menores por parte do persoal.

En materia de xestión da auga, Esquerda Unida solicita que se avance na execución das recomendacións incluídas na auditoría hidráulica realizada o pasado ano. En concreto, propoñen instalar os caudalímetros que non requiran permisos doutras administracións, iniciando así un proceso que no seu conxunto está valorado en 63.000 euros.

A reposición dos valados e da sinalización no Monte Central Xaquín Álvarez Corbacho, así como a instalación de bancos e mesas na parcela municipal ao carón do Redondo para crear unha área de descanso, son tamén propostas incluídas no documento.

En base a dúas mocións de Esquerda Unida aprobadas por unanimidade no 2024, a formación reclama a creación de zonas de espallamento canino en Confín, Porto Meloxo e San Vicente, e a instalación de zonas de sombra nos parques infantís. Neste último caso, propoñen comezar pola creación de sombra nas áreas de bancos mediante estruturas de madeira con enredadeiras.

Tamén se solicita ampliar o valado entre o campo de fútbol 5 e o parque infantil da zona recreativa de Terra de Porto, para evitar que os balóns impacten nos menores que xogan no parque.

Finalmente, Esquerda Unida propón a compra dun novo guindastre municipal, despois de que hai uns anos se dese de baixa o único vehículo dispoñible, co obxectivo de recuperar un servizo público esencial.

Desde a formación expresan o seu desexo de que todas estas propostas sexan recollidas no documento definitivo que se leve a pleno. “Son actuacións realistas, necesarias e viables. Esperamos que o goberno as teña en conta e comece a traballar nelas”, afirman.

Así mesmo, consideran positivas moitas das propostas formuladas polo propio goberno, “xa que responden a demandas que Esquerda Unida leva anos formulando tanto no pleno como na prensa”.

Esquerda Unida carga contra a falta de xestión do goberno municipal trala liquidación do orzamento 2024

Denuncian que o Concello pecha o 2024 cun superávit de 2,5 millóns de euros e, por segundo ano consecutivo, cun remanente de tesourería que supera os 6 millóns, cando ten os orzamentos prorrogados dende 2022.

Esquerda Unida presentará unha proposta para investir a maior parte do remanente en medidas que beneficien á veciñanza. Pídenlle ao Alcalde que faga presión no seu partido para que a Ministra de Facenda permita o uso do remanente ou, pola contra, prepare un Plan Económico Financeiro.

O Grove, 8 de maio de 2025.-Esquerda Unida denuncia que, por segundo ano consecutivo, o Concello do Grove pecha o exercicio cun remanente de tesourería millonario que, nesta ocasión, a liquidación do 2024 sitúa en 6.312.143,80 €. Ademais, as contas arroxan un superávit de 2.485.900,20 €, mentres mantén os orzamentos prorrogados dende 2022.

O seu voceiro, José Antonio Otero, acusa ao Alcalde de escudarse ano tras ano na imposibilidade de sacar adiante uns orzamentos ao non ser quen de cadrar os números debido ao incremento do gasto anual, facendo fincapé especialmente no incremento de servizos como a Axuda no Fogar ou o Punto de Atención á Infancia. "Unha escusa inxustificable á vista das cifras", afirma Otero, que considera que “a liquidación evidencia que non se trata dun problema de cartos, senón de falta de capacidade, de planificación e de xestión por parte do goberno municipal”.

Para Otero o exemplo está en que “o ano pasado aprobouse un paquete de 2 millóns de euros en investimentos con cargo ao remanente e só se executou a metade, deixando sen facer moitas das actuacións pactadas, incluídas varias das propostas presentadas polo noso grupo”.

Aínda así, o voceiro esquerdista anuncia que, ante un remanente tan elevado, volverán presentar unha proposta ampla de accións e investimentos concretos para executar, que serán trasladadas ao goberno nos vindeiros días. “Sabemos que este ano o Ministerio de Facenda impón máis limitacións ao uso do remanente, pero hai ferramentas para tentar sortear esa situación, polo que queremos que o goberno municipal se poña a traballar canto antes”, indica Otero.

Desde Esquerda Unida sinalan que o seu partido a nivel estatal leva tempo presionando para que o Goberno central emita un decreto que permita, como en 2024, o uso do remanente en beneficio da veciñanza. Por iso piden ao Alcalde que faga o propio e “inste ao seu partido a presionar á súa ministra de Facenda para desbloquear a situación e poña os intereses do Grove por diante dos intereses partidistas”.

Mentres tanto, dende Esquerda Unida agardan que o goberno municipal comece a traballar e estude todas a vías para poder utilizar o remanente. “Queremos que se valoren todas as nosas propostas e se non se emite o decreto, haberá que explorar outras vías, como un posible plan económico-financeiro, se é que se rompe a regra de gasto ou a estabilidade orzamentaria", afirma Otero.

Finalmente, José Antonio Otero insta ao Alcalde a “cumprir coa lei e presentar un novo orzamento”, lembrándolle que “hai marxe para cadrar os números, e xa o demostramos”. “O que non se pode permitir é que un Concello que pecha liquidacións con superávit millonario continúe funcionando con orzamentos caducados e sen executar as accións acordadas”, remata Otero.

EU insta ao goberno municipal a solicitar as axudas para modernizar e dinamizar o mercado municipal

A convocatoria da Consellería de Emprego, Comercio e Emigración permite aos concellos acceder a ata 320.000 € para obras de mellora, rehabilitación ou accións de dinamización e pode cubrir ata o 80% do investimento.

Anxo Meis reclama ao executivo local que solicite estas achegas para modernizar e dinamizar a praza de abastos, evitando así perder unha oportunidade clave para o comercio local.

O Grove, 19 de marzo de 2025 – O grupo municipal de Esquerda Unida pide ao goberno local, e en concreto ao concelleiro de Mercados, que non deixe pasar a oportunidade de acollerse ás axudas que ofrece a Xunta de Galicia para a dinamización e rehabilitación das prazas e mercados municipais. Estas achegas, dotadas cun orzamento de 3,3 millóns de euros, buscan fortalecer a rede de Mercados Excelentes e mellorar as infraestruturas comerciais da comunidade.

O concelleiro de Esquerda Unida, Anxo Meis, indicou que “o mercado municipal é un espazo clave para a economía local e o comercio de proximidade, polo que resulta fundamental aproveitar este tipo de investimentos para modernizalo, facelo máis atractivo e mellorar os servizos tanto para vendedores como para clientes”.

A nova convocatoria da Consellería de Emprego, Comercio e Emigración permite aos concellos acceder a ata 320.000 euros para obras de mellora, rehabilitación ou accións de dinamización. Segundo indica Meis, “a liña de subvencións pode cubrir ata o 80% do investimento, polo que o Concello debe presentar un proxecto ambicioso para modernizar un espazo esencial para o comercio local”. Así mesmo, a liña de axudas inclúe un período de execución bianual, o que, para Esquerda Unida, supón “unha oportunidade única para planificar actuacións de maior calado sen presións de prazos excesivamente curtos”.

Desde Esquerda Unida consideran que a solicitude destas axudas sería un paso decisivo para revitalizar o mercado municipal, fomentando a súa competitividade e fortalecendo a súa función como motor económico e social da vila. “Non podemos quedar atrás mentres outras localidades avanzan na modernización dos seus mercados. O goberno municipal debe actuar con dilixencia e presentar un proxecto sólido antes do prazo límite do 14 de abril”, subliñou Meis que insiste en que “hai financiamento dispoñible, polo que só falta vontade política para non perder esta oportunidade”.

O grupo municipal presentará un escrito solicitando información ao goberno local sobre as súas intencións respecto a esta convocatoria. “Se a resposta é que non teñen previsto solicitar estas axudas, estaremos ante outro exemplo de desinterese pola dinamización económica do noso concello. O noso compromiso está claro: esixiremos que se aproveiten todos os recursos dispoñibles para mellorar o Mercado Municipal”, concluíu Meis.

EU volve insistir nas súas propostas de seguridade e accesibilidade na Festa do Marisco

 

Entre as demandas presentadas por Susana Millán, no pasado Consello Local de Turismo, destaca o reforzo das medidas de seguridade, a mellora de estacionamentos, a instalación de puntos de venda accesibles e a distribución das actividades culturais a diferentes áreas do Grove para dinamizar a celebración.

A concelleira de Esquerda Unida tamén preguntou polo método utilizado para destinar 100.000 euros do Plan de Sustentabilidade Turística en Destino sen ter contratada a consultora que xestione a totalidade do plan. Lembran que é preciso executar 500.000 euros máis antes de rematar o ano para obter unha prórroga e non perder os 2 millóns de euros.

O Grove, 11 de setembro de 2024 – O pasado xoves celebrouse un Consello Local de Turismo, despois de varios meses de insistencia por parte do Grupo Municipal de Esquerda Unida, para abordar cuestións relacionadas coa inminente Festa do Marisco. A concelleira de Esquerda Unida, Susana Millán, expresou a súa satisfacción pola convocatoria, aínda que sinalou que esta produciuse "pola proximidade da Festa do Marisco e a necesidade do Alcalde de informar das novidades e avances, así como, para procurar propostas para as Centolas de Ouro"

Durante a xuntanza, Millán expuxo varias demandas que Esquerda Unida vén formulando de forma recorrente nos últimos anos, sen que, segundo indica, “o Concello as teña en conta, a pesar de mostrarse favorables a elas”. Entre as principais preocupacións do grupo, destacan as medidas de seguridade, como a solicitude de reforzo de efectivos dos corpos e forzas do estado mediante a colaboración con outros concellos e a administración autonómica. Tamén preguntou se se seguiría pechando o recinto con barreiras que impidan a entrada accidental de vehículos tal e como ven realizando nos últimos anos.

Outra das cuestións abordadas foi a accesibilidade. Esquerda Unida insistiu na necesidade de instalar unha caixa de venda de tickets a nivel do chan para facilitar o acceso das persoas con mobilidade reducida. Millán tamén preguntou pola implantación do sistema de pagamento con pulseira, contemplado no Plan de Sustentabilidade Turística en Destino, que non foi executado na edición anterior da festa.

En canto á organización do tráfico, Esquerda Unida propuxo que os autobuses non estacionen na zona da festa e os seus arredores, permitindo así máis espazo de aparcadoiro  para vehículos particulares. Segundo a concelleira, esta medida aplícase en moitos concellos e cidades, e no Grove poderíase facer uso de espazos como a Toxa ou a Lanzada para o aparcamento de autobuses, permitindo tan só a carga e descarga de viaxeiros nas proximidades do recinto da festa.

Millán tamén instou a levar actuacións musicais e culturais a diferentes puntos do concello para espallar a festa máis aló da Praza do Corgo e dar unha alternativa de ocio ás horas “mortas” da festa, e propuxo que se crease un concurso de escaparates ou envellecemento de fachadas co propósito de implicar ao comercio local e á veciñanza na Festa.

Aínda que non foron expostas nesta xuntanza, a concelleira de Esquerda Unida reitera tamén outras iniciativas xa propostas en anos anteriores, e que tampouco se levaron a cabo. Entre elas, a instalación do coñecido Punto Morado durante a celebración dos concertos da Festa, “un espazo que pode contar coa colaboración da Xunta de Galicia, que estivo instalando puntos lila e “arcoíris” en diferentes festivais do país durante este verán”; e que se promocionasen os espazos turísticos como a Salazón, a Siradella, o parque Xaquín Álvarez Corbacho ou a zona de San Vicente, poñendo en funcionamento o autobús circular que percorreu o concello durante o verán (antigo Grobus).

A concelleira tamén aproveitou a ocasión para preguntar polo estado do Plan de Sustentabilidade Turística en Destino. Esquerda Unida manifestou a súa preocupación polo método utilizado polo goberno municipal para destinar 100.000 euros deste plan ao financiamento dos concertos da Festa do Marisco, sen contar coa consultora necesaria para a execución da totalidade do PSTD. Ademais, Millán destacou a urxencia de executar outros 500.000 euros antes do final do ano para poder beneficiarnos da prórroga e evitar a perda dos 2 millóns dos fondos do plan.

Finalmente, Millán destacou que a súa agrupación foi a única que realizou propostas e se interesou polo desenvolvemento xeral da festa.

EU pide enarborar a bandeira LGTBIQA+ o 28X e aplicar medidas contra a discriminación

Esquerda Unida, expresa a súa profunda preocupación pola proximidade do Día do Orgullo LGTBIQA+ e a falta de medidas visibles por parte do Concello do Grove para conmemorar esta importante data.

Piden que este 28 de xullo se coloque a bandeira do arco da vella, insignia da diversidade, nos edificios municipais e se apliquen diferentes medidas a nivel municipal para a promoción dunha sociedade máis xusta, igualitaria e respectuosa.

O Grove, 24 de xuño de 2024.- Esquerda Unida subliña a importancia de traballar activamente polos dereitos e o recoñecemento das disidencias sexuais para construír sociedades antipatriarcais e anticapitalistas. A discriminación por razón de orientación sexual e identidade de xénero afecta á vida das persoas LGTBIQA+, limitando o seu acceso ao emprego, á sanidade, a fogares seguros e a vidas plenas.

Para Esquerda Unida, a protección e igualdade de dereitos para as persoas LGTBI debe ser un valor fundamental, especialmente fronte ao avance da extrema dereita. Para iso, é necesario avanzar nos marcos lexislativos, na educación, a cultura, a saúde mental e os dereitos laborais, convertendo a diversidade e a non discriminación en piares dos estados democráticos e nunha loita contra o fascismo.

Destacan a importancia de buscar puntos de encontro, desenvolver solidariedades e compartir loitas para fortalecer un programa global que derrote ás forzas reaccionarias. Ser LGTBIQA+ afecta as condicións materiais, do mesmo xeito que ser muller, racializada ou ter diversidade funcional, e é crucial visibilizar todas estas opresións como parte do colectivo LGTBIQA+ e da clase traballadora.

Esquerda Unida chama á acción colectiva para visibilizar e combater estas opresións, promovendo unha sociedade máis xusta e igualitaria. Piden ao concello que enarbore a bandeira LGTBIQA+ nos edificios municipais, o vindeiro 28 de xullo.

Así mesmo, instan ao goberno municipal a aplicar medidas contra toda discriminación por orientación sexual, identidade de xénero e diversidade familiar, co fin de erradicar a LGTBIfobia no ámbito familiar, escolar, laboral, social e/ou político; Crear unha Oficina Municipal de Dereitos LGTBIQA+, dotada dos recursos necesarios para fomentar a convivencia en igualdade, a loita contra a LGTBIQA+fobia e o asesoramento necesario en materia de loita contra os delitos de odio por razón de orientación sexual e identidade ou expresión de xénero; Realizar campañas que visibilicen a diversidade de orientacións e identidades de xénero e poñer en marcha accións e programas específicos para as infancias e adolescencias LGTBIQA+ que garantan un desenvolvemento libre e feliz das súas identidades; Dotar ás bibliotecas públicas con fondos bibliográficos relacionados coa homosexualidade, bisexualidade, transexualidade e intersexualidade dende actitudes de respecto e non discriminación, con enfoque de diversidade e Dereitos Humanos e desenvolver programas de formación para o persoal da Administración Pública Local e a Policía Local, para previr e detectar casos de delitos por razón de orientación sexual, identidade e expresión de xénero.

Dende Esquerda Unida reiteran a súa disposición para colaborar co Concello do Grove na implementación destas medidas e para traballar xuntos na promoción dunha sociedade máis xusta, igualitaria e respectuosa coa diversidade.

Esquerda Unida critica o elevado Remanente de Tesouraría e proporá a súa utilización en diferentes melloras

Denuncian a nefasta xestión económica do goberno local ao revelar un remanente de 6 millóns, que supón a metade do orzamento municipal. Critican ese excedente namentres as infraestruturas e as necesidades do concello seguen sen atenderse.

Subliñan a necesidade de reorientar estes fondos para cubrir carencias. Comprométense a traballar para que ese diñeiro se invista en proxectos que impacten directamente na calidade de vida da veciñanza.

O Grove, 7 de maio de 2024.- Logo de coñecer o informe de liquidación do exercicio 2023, que arroxa un Remanente de Tesourería de preto de 6.000.000 € nun contexto onde o orzamento municipal é duns 12 millóns €, Esquerda Unida critica duramente a xestión económica do goberno do PSOE e considera lamentable que nun Concello “onde hai carencias evidentes en servizos básicos e necesidades sociais, nos atopemos con tal excedente financeiro”, denuncia o seu voceiro José Antonio Otero, que considera inadmisible que, “mentres as infraestruturas do noso concello e as necesidades dos veciños seguen sen atenderse, o goberno municipal acumule un remanente de tesourería que representa o 50% do orzamento”. 

Para Otero, esta situación pon de manifesto “unha clara falta de planificación de Cacabelos e o seu equipo, que no pasado exercicio deixou sen executar obras, non cubriu prazas ou non soubo investir os ingresos extra” e insta ao executivo local a reconsiderar as súas prioridades e realizar unha xestión eficaz dos recursos públicos. 

Ante esta situación, Esquerda Unida presentará unha serie de propostas para que estes fondos se invistan en melloras de infraestruturas e diferentes actuacións que beneficien directamente á cidadanía. “Non podemos permitir que eses cartos se perdan por falta de planificación e xestión. É hora de poñer en marcha proxectos que realmente cambien a vida das persoas”, engadiu Otero.

Así, o grupo municipal comprométese a traballar arreo para que a totalidade ou a maior parte dese remanente se destine a proxectos vitais como ao arranxo e renovación de edificios e espazos públicos, a mellora da mobilidade urbana e o impulso de iniciativas sociais que fomenten a inclusión e o benestar social.

Con estas medidas, Esquerda Unida busca non só criticar a xestión actual, senón ofrecer alternativas viables e responsables que melloren a calidade de vida da veciñanza do Grove. “Faremos propostas coherentes e construtivas para garantir que este diñeiro se invista de maneira eficaz e axeitada nas áreas onde máis se necesiten”, asevera Otero.

Do mesmo modo, aseguran que estarán vixiantes e seguirán fiscalizando a xestión municipal “para que non se volva producir unha situación na que se acade un remanente excesivo por unha nefasta xestión dos recursos que, en definitiva, repercute nunha peor calidade dos espazos públicos e dos servizos á veciñanza”

EU demanda a conversión da antiga Escola Infantil do Monte da Vila nunha Casa da Mocidade

  

Tras o anuncio do traslado do servizo de Vellos Tempos ás Monxas, piden converter o edificio nunha Casa da Mocidade, destinada ao ocio, formación e creatividade da xente nova. Destacan a necesidade de adaptar o espazo para actividades socio-culturais e formativas, involucrando á mocidade na transformación e asegurando que as súas necesidades sexan atendidas.

Lembran que existe un acordo plenario de 2017 e advirten que a esixencia non é simplemente unha petición, senón un requisito para futuras negociacións co goberno local, sinalando a importancia do compromiso activo co futuro da mocidade no concello.

O Grove, 8 de marzo de 2024.- O grupo municipal de Esquerda Unida demanda ao goberno municipal un cambio significativo nos plans para a antiga Escola Infantil do Monte da Vila, logo de que este edificio deixe de acoller o servizo de Vellos Tempos. Tras o anuncio do Alcalde, no último pleno, de que o servizo será trasladado ao “edificio das Monxas” no mes de abril, Esquerda Unida ve unha oportunidade de ouro para converter o edificio vacante nunha Casa da Mocidade.

O voceiro de Esquerda Unida, José Antonio Otero, considera que “é preciso crear un espazo destinado ao ocio da xente nova, á súa formación e creatividade, así como á realización de actividades de índole socio-cultural ou formativo, que repercutan positivamente na integración social da mocidade”. Propoñen así, que a Casa da Mocidade poida integrar a oficina de Información Xuvenil, a través da cal, ademais de ofrecer toda a información e asesoramento, se encargaría da dinamización do espazo.

Dende Esquerda Unida cren que o edificio debería adaptarse minimamente para crear un espazo multifuncional coa posibilidade de crear sala de actividades e xogo, espazo dedicado á informática, sala multimedia, espazo de audiovisuais, sala de consulta, sala de obradoiro… “De todos modos, entendemos que  debe adaptarse sempre buscando o consenso e as necesidades da propia mocidade”, afirma Otero.

Esquerda Unida lembra que existe un acordo plenario de novembro de 2017, tras unha moción do seu propio grupo municipal na que se instaba a destinar este edificio a unha Casa da Mocidade. A moción saíra aprobada por maioría absoluta coa abstención do grupo do PSOE que, ao igual que agora, gobernaba o concello. Finalmente, o executivo local decidiu destinar o edificio a outras actividades, entre elas a do programa Vellos Tempos.

Así, co anuncio de que en breve as persoas participantes deste servizo se desprazarán ao edificio da Monxas, onde convivirán co Punto de Atención á Infancia (PAI) e o servizo de persoas con Alzheimer, Esquerda Unida considera que o edificio da antiga Escola Infantil quedará baleiro e sen practicamente uso. É por iso que Esquerda Unida recupera esta vella demanda que consideran que é máis que necesaria no Grove pois, segundo Otero, “a mocidade local urxe dun lugar onde poder reunirse, realizar actividades, cursos, que conte con información, asesoramento e cos servizos acordes ás súas necesidades”.

A agrupación fai fincapé na importancia de involucrar á mocidade na transformación do edificio, asegurando que as súas voces sexan escoitadas e que os servizos proporcionados se axusten ás súas necesidades reais. “Procuramos non só un espazo físico, senón un compromiso activo do goberno municipal co futuro da mocidade do Grove”, asevera o voceiro de Esquerda Unida.

Por último, Otero advirte que “esta non é unha simple petición, senón unha esixencia do noso grupo municipal”, a cal ten que ser unha realidade, “pois realizala ou non condicionará futuras negociacións co Goberno local”, especialmente nas que precise o voto de Esquerda Unida para sacar adiante cuestións de crucial importancia no Concello, como orzamentos ou proxectos.

EU insta ao Concello do Grove a aproveitar as axudas para o Embelecemento Turístico do Litoral

 

Cun investimento global que supera os 2,7 millóns de euros, a concelleira de Esquerda Unida, Susana Millán, realiza propostas concretas en cada unha das tres liñas subvencionables; Transición Verde Ecolóxica, Transición Dixital e Transición Accesible e Inclusiva.

Esquerda Unida busca mellorar infraestruturas e promover a sustentabilidade para fortalecer o turismo local no Grove e pide que convoque o Consello Local de Turismo para valorar as propostas e crear os correspondentes proxectos antes de que remate o prazo o vindeiro 5 de marzo.

O Grove, 22 de febreiro de 2024 - O grupo municipal de Esquerda Unida, insta ao Goberno local a aproveitar as oportunidades proporcionadas pola segunda convocatoria de axudas da Xunta de Galicia para o embelecemento turístico do litoral, cun investimento global de máis de 2,7 millóns de euros.

A Xunta de Galicia, a través do Diario Oficial de Galicia, publicou a convocatoria destas subvencións que se poden solicitar ata o 5 de marzo. Así, Esquerda Unida, a través da súa concelleira, Susana Millán, presenta unha serie de propostas concretas para cada unha das liñas subvencionables.

Na Liña 1, correspondente á Transición Verde e Ecolóxica, Esquerda Unida considera que se pode utilizar para mellorar e musealizar o Museo de Salga, potenciar as rutas “Xacobea Mar de Arousa” e a do “Padre Sarmiento”, recuperar e poñer en valor a ruta do litoral “As Xentes e o Mar” e mellorar os elementos e sinaléticas da zona de especial protección de aves do litoral grovense.

En canto á Transición Dixital (liña 2) Susana Millán entende que o concello pode aproveitala para crear códigos QR, guías turísticas interactivas e folletos dixitais, así como deseñar aplicacións para promover o destino e eventos, tales como a Festa do Marisco.

Por último, na liña 3, que inclúe a Transición Accesible e Inclusiva, dende Esquerda Unida propoñen mellorar a accesibilidade a espazos do litoral, como praias, paseos e miradoiros e adaptar a sinalética turística para que poida chegar ás persoas invidentes.

Millán exhorta ao Goberno local a valorar as propostas e, en todo caso, a convocar o Consello Local de Turismo pa consensuar e preparar proxectos sólidos para acollerse estas axudas antes de que finalice o prazo. Destacan a relevancia de investir nestas áreas para fomentar o turismo local e contribuír ao desenvolvemento sustentable do concello.

EU pide que se convoque o Consello Local de Turismo para traballar de cara a Festa do Marisco

 

Queren coñecer como se están desenvolvendo os preparativos da sesaxésima edición e apurar a publicación das diferentes licitacións: carpas de degustación, cafetería, posto de colareiras, merchandising ou artesanía, así como os diferentes produtos.

Propoñen unha serie de medidas en diversos ámbitos, dende accesibilidade e seguridade ata actividade cultural, co obxectivo de facer da Festa do Marisco unha experiencia memorable e inclusiva para todos os asistentes.

O Grove, 30 de agosto de 2023.- O grupo municipal de Esquerda Unida solicita a convocatoria do Consello Local de Turismo co propósito de coñecer en que estado están os preparativos de cara á Festa do Marisco que se celebra dentro dun mes e que este ano chega á súa 60 edición. 

Logo de ver a semana pasada que dende o Concello xa están á procura de empregados para o evento, a concelleira da agrupación de esquerdas, Susana Millán, indica que hai máis aspectos que se deben poñer en marcha canto antes, como as diferentes licitacións: as carpas que acollen aos comensais, a cafetería, o posto das colareiras, o de merchandising, o de artesanía, o viño ou algúns dos produtos que se serven durante a festa. Millán lembra que "sempre se chega xusto coas licitacións e o ano pasado existiron problemas para lograr o abastecemento de algún dos produtos, coma o viño", polo que pide a Cacabelos, como responsable de Turismo, que reúna canto antes o Consello Local "co propósito de coñecer o estado no que se atopan as diferentes licitacións e se traballe conxuntamente dende xa nos preparativos da festa para evitar problemas de última hora”.

Para Esquerda Unida, a Festa do Marisco deste ano ten que significar un gran cambio respecto ao evento do pasado ano, no que a imaxe mostrada non foi a mellor. "Tendo en conta que este ano se cumpren seis décadas, cremos preciso facer un esforzo maior e colaborar entre tod@s na procura dun evento acorde a esta circunstancia", asevera Susana Millán que quere que se inclúan as propostas que levan realizado nas tres últimas edicións, relativas á accesibilidade, seguridade e actividades, pero tamén novas suxerencias relativas á mellora do evento en canto a infraestruturas e novas actividades paralelas. Así mesmo, piden que este ano se introduza o sistema de pago con pulseira, xa que está contemplado na subvención do Plan de Sustentabilidade Turística en Destino (PSTD) con orzamento para o actual exercicio. “Este sistema funciona en numerosos eventos gastronómicos e musicais e, ademais de axilizar o método de pago e recollida de produtos, reduciría considerablemente as numerosas colas na caixas”, explica a concelleira.

Tendo en conta que este ano se celebra o 60 aniversario da Festa do Marisco, Esquerda Unida pide que o evento estea a altura, por iso propoñen un maior contido de actividades paralelas ao evento, da que se poida aproveitar tanto visitantes como a veciñanza, nas horas de tarde nas que están pechadas as carpas de degustación. A potenciación de espazos coma o Museo da Salga con visitas guiadas é outra das alternativas propostas polos esquerdistas, que tamén instan ao goberno a instalar unha carpa institucional na que se poidan expoñer os carteis das 60 edicións da Festa e realizar charlas e proxectar vídeos dos diferentes momentos das seis décadas do evento gastronómico máis importante de Galicia. 

En canto ás propostas que levan realizando nos últimos anos, as encamiñadas a mellorar os aspectos de accesibilidade pasan pola instalación dunha caixa a nivel do chan para facilitar a retirada de tickets ás persoas en cadeira de rodas ou con mobilidade reducida. Tamén dispoñer de persoal de asistencia para retirar os pratos a estas persoas en caso de solicitalo, pois entenden que “o recinto é totalmente inaccesible, tanto para a retirada de tickets, como a zona onde se serve a comida, o que dificulta que as persoas en cadeira de rodas poidan desfrutar da festa nas mesmas condicións que o resto”. A instalación de mesas adaptadas, o acercamento das cadeiras para as persoas que o soliciten, ou achegar ao recinto os baños adaptados, son outras das medidas relativas de accesibilidade. Ao igual que en anos anteriores, dende Esquerda Unida tamén solicitan a recuperación da carta de produtos en formato braille e que na zona de lactación se incorpore un cambiador e un microondas.

Xa no relativo á seguridade, insisten na importancia de solicitar apoio a outros concellos para aumentar as forzas públicas, Policía Local e Garda Civil, durante a Festa, “ao igual que fan concellos como Cambados, Vilagarcía ou Vigo durante as súas festas grandes”, lembra Susana Millán que non quere esquecer tamén necesidade da instalación do Punto Morado, cando menos, durante os eventos musicais. “Na pasada edición tan só se puxo en dous concertos, pero consideramos esencial que estea o maior número de días posible”. Así mesmo, volverán instar ao goberno para que evite que os autobuses permanezan na zona portuaria e sexan derivados ao aparcamento da Lanzada, “co propósito de garantir un maior número de prazas de estacionamento para turismos”, indica a esquerdista que lembra que “na maioría das cidades e vilas os autobuses xa teñen prohibido estacionar dentro do casco urbano e tan só fan o servizo de descarga e carga de pasaxeiros. Por que aquí enchemos o Corgo con autobuses?”.

Descentralizar as actividades culturais e de ocio, levando estas a outras zonas e barrios do concello e que se potencien outros espazos da vila como San Vicente, A Siradella, Moreiras ou o Monte Central da Toxa aproveitando o funcionamento do Grobus, son propostas que tamén fixeron na pasada edición e que agardan que nesta ocasión, aproveitando a celebración do 60 aniversario, si se poidan realizar.

Dende Esquerda Unida agardan que o Alcalde co voque canto antes o Consello Local de Turismo para traballar dende xa na preparación da Festa e se poidan introducir todas estas medidas que propoñen, así como as que poidan xurdir do resto das agrupacións que forman parte do órgano consultivo.