Esquerda Unida achega as súas propostas para o Plan de Mobilidade

 

[descargar documento coas propostas de EU]

Os esquerdistas presentaron un extenso documento no que propoñen a apertura dunha estrada entre a Xoán XXIII e o Monte da Vila, a humanización da rúa Corgo, o traslado da parada de taxis á Avenida Beiramar, a instalación de puntos de carga para vehículos eléctricos, a posta en marcha dun mapa metrominuto ou a creación dun parque infantil de tráfico.

A dotación de aparcamentos a través de convenios cos veciños con solares sen urbanizar ou a dotación de accesibilidade de numerosos pasos de peóns do casco urbano foron outras das demandas incluídas no documento trasladado ao concello.

O Grove, 26 de setembro de 2019.  Hai dúas semanas, os grupos municipais reuníronse para valorar o documento que o goberno ten elaborado sobre o Plan de Mobilidade Urbana Sostible (PMUS). Un documento formado por 42 propostas de actuación, divididas en 20 obxectivos e 9 liñas estratéxicas –varias xa executadas– que dende Esquerda Unida valoran como escasas ademais de consideralas “unha simple declaración de intencións, xa que non se contemplan prioridades, tempos de execución, nin contan con previsión orzamentaria”. 

Segundo o seu voceiro, José Antonio Otero, “resulta incomprensible que o documento volva falar da creación dunha mesa de mobilidade na que se atopen os grupos municipais, técnicos de mobilidade e actores sociais relacionados coa mobilidade, pois xa se contemplaba no documento inicial e reclamamos a súa posta en marcha en repetidas ocasións durante anterior mandato. “A día de hoxe non se puxo en funcionamento nin vemos intención de facelo”, sentencia Otero. A pesar diso, o esquerdistas considera que, “agora cando menos contamos cunha base na que traballar e por iso achegamos ao goberno un documento cunha serie de propostas para complementar o PMUS”.

Entre as propostas realizadas, os esquerdistas consideran prioritaria a apertura dunha estrada que una o Monte da Vila coa rúa Xoán XXIII, “xa que suporía unha fluidez e mellor acceso á sobresaturada zona do Monte da Vila” onde, tal e como indican, se atopan tres infraestruturas deportivas, dúas culturais (logo da futura construción do Auditorio), unha social, unha sanitaria e unha educativa. “Esta estrada si é prioritaria e non a que pretende executar o goberno nas Bouzas, ademais, atópase contemplada nas Normas Subsidiarias e no PXOM polo que se pode iniciar a súa apertura” conclúe José Antonio Otero.

Outra das cuestións que abordan é a necesidade de humanizar a rúa que transcorre por detrás da Casa do Concello e que desemboca ao carón do Xulgado de Paz, “unha rúa que no seu tramo medio conta con pouca accesibilidade e no tramo final está nun estado lamentable e perigoso para os peóns” indica José Antonio Otero. O traslado da parada de taxis á zona do Corgo, “tal e como leva reclamando o colectivo dende hai anos” é outra das medidas que os esquerdistas entenden hai que acometer, amais de sinalar que esa medida “permitiría usar a actual parada como zona carga e descarga co propósito de reducir o tránsito de vehículos de transporte pola Catorse”. Así mesmo dende Esquerda Unida tamén solicitan se faga efectiva a posta en funcionamento dun punto de carga para vehículos eléctricos na Avenida Beiramar, “tal e como se contemplaba no proxecto de desdobre desa estrada”. Tamén fan referencia á necesidade de crear un mapa a semellanza do Metrominuto que impulsou a cidade de Pontevedra e que xa foi copiada por numerosos concellos e cidades de todo o estado, co propósito de fomentar os desprazamentos sen vehículos; ou á creación dun parque infantil de tráfico, que permitiría contar cun espazo seguro onde se poidan impartir clases de seguridade viaria e os rapaces gocen dunha zona libre de tráfico onde moverse con vehículos non motorizados con seguridade á par que aprenden as normas de circulación.

No documento trasladado ao concello, Esquerda Unida aproveitou para expoñer a necesidade de aumentar os aparcamento dentro do casco urbano e para iso ofrece, de forma gráfica, “as numerosas posibilidades que existen con bolsas de terreos sen urbanizar que, previa negociación cos propietarios, se poden destinar para cear zonas de aparcamento que contrarresten as prazas eliminadas tralas peonalizacións”. Por último, os esquerdistas demandan unha actuación de melloras de accesibilidade na zona urbana e para iso presentan un arquivo fotográfico de “un gran número de pasos de peóns que non contan coas ramplas correspondentes para que as persoas con mobilidade reducida poidan acceder sen impedimentos”.

O voceiro de Esquerda Unida remata indicando que a “maioría destas cuestións xa foron expostas na xuntanza que tivemos os voceiros, e o que facemos agora é plasmalo nun documento para que non existan escusas, se valoren as propostas de forma conxunta e se actúe”.  

Gabinete de Prensa

Esquerda Unida O Grove

[descargar documento coas propostas de EU] 

EU reclama solucións ao caos circulatorio derivado do peche dun carril en Alexandre Bóveda

Denuncia o colapso que a medida ten xerado en rúas próximas como a Avenida de Portugal, e insta ao goberno local a avanzar na elaboración do Plan de Mobilidade

Reclamouno no pleno, onde tamén solicitou un maior celo do control aos propietarios que non recollen as deposicións dos seus animais en rúas e camiños

O Grove, 25 de setembro de 2018.- O grupo municipal de Esquerda Unida insta ao goberno local a convocar coa máxima urxencia unha xuntanza de traballo que permita avanzar na elaboración do Plan de Mobilidade local e aporte solucións aos problemas xerados polos últimos cambios relacionados coa ordenación do tráfico no casco urbano. A formación lamenta o caos circulatorio que o peche dun carril en Alexandre Bóveda ten xerado en rúas próximas como a Avenida de Portugal, e denuncia a falta de planificación nesta materia. Unha deficiente xestión que evidencia tamén o inaceptable atraso que acumula a posta en funcionamento dos novos sistemas de control do tráfico en rúas peonís como a Catorse, onde case un ano despois da obra de humanización os pivotes móbiles continúan sen funcionar. Foi un dos temas que os concelleiros de EU levaron ao pleno deste mes de setembro. Unha sesión na que os edís esquerdistas debullaron ademais a longa lista de deberes pendentes que, a pesar dos reiterados rogos realizados pola formación ao longo de sucesivos meses, o Concello continúa sen atender. 

Esquerda Unida urxe solucións, análise e traballo que permitan mellorar o mapa do tráfico da localidade, e lamenta que as palabras e compromisos do goberno local as leve o vento. E é que resulta inaceptable que, cando está a piques de cumprirse un ano da peonalización da Catorse, as tarxetas para residentes e usuarios anunciadas continúen sen estar en uso, e o pivote móbil permanentemente apagado.

Esquerda Unida lamenta a resistencia do goberno local do PSOE a ter en conta as aportacións e ideas que lle chegan dende as filas da oposición. Unha reticencia ao diálogo que perxudica, en última instancia, á cidadanía. E que se traduce nun inxente número de pequenos problemas do día a día pendentes de resolver que se prolongan no tempo. 

Sen solucionar está o problema de iluminación no entorno de Rosalía de Castro que a veciñanza ten feito chegar aos concelleiros de EU, e que éstes trasladaron ao conxunto do pleno xa en xaneiro. Do mesmo xeito que continúa pendente a instalación de bolardos que impidan o estacionamento e favorezan a visibilidade no cruce da Fontegrande coa rúa da Igrexa, solicitados en febreiro. 

A formación tamén aproveitou o pleno deste luns para volver lembrarlle ao grupo de goberno a necesidade dun paso de peón na saída de Entrehortas, entre a farmacia e a parada de taxis, que xa fora solicitado en maio. Así como o déficit de papeleiras en diferentes rúas grovenses, como Lepanto, Con do Gato ou Raposeira (neste caso, solicitado en marzo).

A formación incide ademais na mala imaxe e na falta de seguridade que provoca o estado da área de xogos infantís da Siradella. Un deterioro que Esquerda Unida xa ten denunciado en pleno en máis dunha ocasión, e en relación ao cal os concelleiros do grupo municipal de EU volveron solicitar ao Concello que se dirixa á Comunidade de Montes de San Martiño para pedir a retirada dos restos das randeeiras existentes antes de que éstas ocasionen algún accidente.

Esquerda Unida tamén aproveitou o pleno deste luns para volver reclamar ao Concello que solicite á Xunta a reposición da deteriorada sinalización viaria da estrada do istmo. E a Emgrobes a retirada da caseta informativa da Lanzada, pois son moitos os visitantes que paran alí pensando que está en funcionamento.

A formación lamenta ademais a resistencia do goberno local a facilitar información á oposición sobre distintos proxectos en marcha aínda a pesar de tela solicitado por rexistro. 

EU critica que se acometa a humanización de Alexandre Bóveda sen contar antes cun plan de mobilidade para o conxunto do casco urbano

Alerta do colapso que pode producirse nas rúas da contorna ao derivar cara a elas o fluxo de tráfico

Denuncia a falta de credibilidade do goberno local; que despois de meses falando da elaboración por parte da Policía Local dun mapa de circulación anuncia o encargo dunhas novas directrices de ordenación do tráfico á Universidade de Vigo

O Grove, 14 de xuño de 2018.- O grupo municipal de Esquerda Unida lamenta que, unha vez máis, o goberno local poña o carro antes que os bois. A pesar de tratarse dunha medida que indubidablemente terá un impacto significativo sobre o mapa do tráfico do conxunto do casco urbano, a humanización da rúa Alexandre Bóveda ten comezado sen que o Concello dispoña antes do necesario Plan de Mobilidade. Unha falta de planificación que podería derivar no colapso da rede de viais adxacentes; na súa maior parte estreitos; e polos que transcorren tamén, cabe lembrar, os Camiños Escolares Seguros que conducen ao CEIP Rosalía de Castro.

Antes de peonalizar rúas ou modificar sentidos de circulación parece lóxico pensar nas implicacións que esas medidas terán dende un punto de vista global. Pero non semella do mesmo parecer o goberno local do PSOE, que nun novo alarde de improvisación pon en marcha a humanización de Alexandre Bóveda sen contar previamente cunhas directrices que garantan un ordenamento axeitado do tráfico no conxunto do municipio.

Xa no pasado pleno o voceiro de EU, Juan Lamelas, advertiu ao alcalde da urxente necesidade de que O Grove dispoña dun Plan de Mobilidade Urbana; máis aínda, habida conta das importantes modificacións que xa se teñen introducido e das que, segundo os anuncios do consistorio, están por vir.

Moi lonxe de criticar as peonalizacións e outras actuacións de humanización dos espazos públicos, Esquerda Unida reclama reflexión e traballo previo, e apunta o temerario de realizar cambios tan significativos como cambios de sentido sen ponderar previamente as consecuencias. Nesa liña, EU lembra que o Concello aínda non convocou as comisión de traballo e seguemento do Plan de Mobilidade. Para máis inri, a pesar de que o alcalde anunciara en repetidas ocasións que a Policía Local era quen estaba a encargarse da análise e redeseño do mapa do tráfico grovense, o rexedor sorprende agora anunciando o encargo dunha nova diagnose á Universidade de Vigo. E faino exactamente ao mesmo tempo que comezan as obras para extender a humanización da Catorse ata os Conchases. Unha vez máis, política de feitos consumados e a salto de mata.

Os cambios en Alexandre Bóveda moi probablemente implicarán un aumento da densidade do tráfico en rúas como Sol, Raposeira, Hortos ou Rejo; así como no cruce da Avenida de Portugal coas da Igrexa e Rosalía de Castro. Unha operación que, efectuada sen a necesaria análise previa, podería resultar totalmente contraproducente. Ademais de perigosa, habida conta da proximidade do colexio de primaria Rosalía de Castro, e dos Camiños Escolares Seguros.

Prensa:

EU lamenta las peatonalizaciones sin disponer de un plan de movilidad [noticia web]

Advierten de los perjuicios para los "Camiños Escolares" y calles como Sol, Raposeira y Hortos [noticia web]

EU critica que se humanice Alexandre Bóveda sin un plan de movilidad del casco urbano [noticia web]

O Grove inicia la humanización de la calle Alexandre Bóveda. EU alerta del colapso de tráfico que causará en viales cercanos [noticia web]

 

EU critica o enorme atraso da posta en funcionamento das medidas de control do tráfico nas rúas peonís

Seis meses despois da peonalización da Catorse, o pivote que regula o acceso de vehículos aínda non foi posto en funcionamento

O grupo municipal solicita que se convoque a comisión do Plan de Mobilidade Urbana Sostible e que se propicie a participación de cidadanía e colectivos

Lembra que o alcalde anunciara sistemas similares con tarxetas de acceso para os residentes doutras zonas, como Peralto, O Montiño ou A Tafona

O Grove, 26 de maio de 2018.- O grupo municipal de Esquerda Unida quere denunciar o feito de que, unha vez máis, o goberno local se teña perdido nas súas propias previsións. Anuncios ao vento e globos sonda semellan tónica habitual nun Concello que, en demasiadas ocasións, se amosa máis preocupado por acaparar fotos e titulares que polo servizo real que presta á cidadanía. A denuncia da formación á que representan Juan Lamelas e José Antonio Otero ven motivada, desta volta, polo flagrante atraso que acumula a posta en servizo do pivote instalado para controlar o acceso de vehículos á rúa Castelao. Un vial que se pechou ao tráfico hai xa seis meses. E onde, ata o momento, ese mecanismo de control continúa sen poñerse en marcha. Pero as necesidades do Grove en materia de mobilidade non rematan aquí, polo que EU solicita a convocatoria da Comisión do Plan de Mobilidade Urbana Sostible e a súa apertura a colectivos e representantes das distintas entidades sociais.  

O mes pasado coñecíase o dato de que a Policía Local tramita medio cento de multas a condutores por circular indebidamente polo treito da rúa Castelao máis coñecido como a Catorse. Unha conduta irresponsable que, sen embargo, non tería cabida se o goberno local tivese cumprido en tempo cos seus propios anuncios.

Pasado medio ano dende o remate da obra de peonalización dese vial, o nomeado pivote permanece baixado e aínda non foi estreado. E das tarxetas de acceso que ían repartirse a residentes, usuarios de garaxes e responsables de establecementos comerciais nada se sabe tampouco.

Pero non é este un problema que afecte unicamente a esta rúa. E é que en decembro entrou en vigor a Ordenanza de Tráfico deseñada, precisamente, co obxectivo de regular o acceso aos distintos entornos de prioridade peonil do casco urbano. Un texto que fai referencia a Pratería, Peralto, O Corgo, Outeiriño, Alcalde Xacobe Barral, Santo Antonio, Matadoiro, Concepción Areal, e As Bouzas, ademais de á xa nomeada Castelao; e que o goberno local anunciou como o instrumento necesario para mellorar a convivencia entre viandantes e vehículos.

Lamentablemente, ás portas do verán as anunciadas tarxetas para usuarios e residentes seguen sendo unha quimera; na Catorse, co correspondente pivote inutilizado xa no seu lugar; e tamén nos demais barrios para os que o alcalde anunciou ese mesmo tipo de sistemas. Barrios, cabe destacar, nos que a circulación indebida constitúe un problema dende hai tempo; pois basta un pequeno paseo por Peralto ou pola rúa do Hospital para comprobar a cantidade de coches que empregan estas áreas, teoricamente peonís, para estacionar e circular.

Esquerda Unida lamenta que; a pesar dos pasos directamente relacionados co deseño do mapa de mobilidade do municipio que o Concello xa está a dar; ata o de agora non se teña convocado a comisión sobre un asunto de tal relevancia. Cabe sinalar que no pleno deste mes debaterase un anexo ao Plan de Mobilidade que contempla a obra, “anunciada e xa contratada”, da rúa Alexandre Bóveda.

En relación con iso, EU critica tamén a improvisación do goberno do PSOE; que escasos meses despois de que se aprobara en pleno a solicitude de subvención para a obra de Beiramar cambia de plans e propón destinar eses cartos ao proxecto de Alexandre Bóveda. Uns feitos que “ratifican, unha vez máis, o exposto desde EU: que temos un goberno municipal que actúa sen planificación e a salto de mata”.

Os esquerdistas lembran que a convocatoria da comisión de Mobilidade está contemplada na propia redacción do Plan; que establece unha primeira fase de toma de decisións participativa, na que se teñan en conta as aportacións dos distintos actores sociais. “Neste senso, o Concello está a incumprir o aprobado, demostrando que para o PSOE as palabras participación e transparencia non son máis que elementos propagandísticos, pois os feitos demostran que a súa acción de goberno se basea no despotismo e na improvisación, impedindo toda posibilidade de debate sobre as cuestións de relevancia para o futuro do municipio”.

Área de Comunicación

Esquerda Unida O Grove