HORIZONTE REPÚBLICA

Manifesto de Esquerda Unida polo 14 de abril 

Hoxe 14 de abril é un día importante para todos e todas as demócratas do noso país. Hoxe é a data na que conmemoramos o 91 aniversario da proclamación da Segunda República, un fito que supuxo un avance histórico da democracia, os dereitos sociais e a liberdade. Lembremos que hoxe contamos cunha democracia –ameazada por forzas similares ás de outrora– grazas á loita de quen sacrificou o seu tempo e ás veces a súa vida por un sistema democrático, e grazas a quen hoxe en día seguen loitando pola xustiza, a liberdade e unha democracia plena, fronte a un réxime monárquico incapaz de responder as necesidades da clase traballadora e os sectores populares. 

A nosa historia demóstranos que as conquistas sociais lógranse mediante a unidade popular e a loita, por iso seguimos esixindo un sistema que antepoña os dereitos dos sectores populares por encima dos intereses das oligarquías. 

Nesta dirección, a República ten que ir máis aló do debate sobre a xefatura do Estado ou a crítica a unha institución anacrónica e corrupta como é a monarquía, que se opón á modernización do país e é unha das causas da crise política actual. De igual maneira, entendemos que o proxecto republicano non pode basearse só –nin principalmente– na nostalxia ou no recordo, xa que necesariamente ten que ser un proxecto de futuro que dea resposta aos problemas e aos anhelos da cidadanía e no que caibamos todos e todas. 

A clase traballadores e os sectores populares do noso país necesitamos condicións de vida dignas que nos permitan vivir en condicións de igualdade e liberdade plenas. Un traballo digno, acceso á vivenda, sanidade ou educación públicas e de calidade son algúns dos exemplos recolleitos na actual constitución pero que quedaron en papel mollado. Por tanto, un día como hoxe volvemos reafirmar a nosa aposta por un proceso constituínte que –en última instancia– acabe adaptando a constitución vixente aos retos e as necesidades actuais do noso pobo. 

Por iso, a República é sinónimo de rexeneración democrática, xustiza social e defensa do público; un proxecto integral e renovador capaz de dar resposta ao conxunto de particularidades do Estado, isto é, á  plurinacionalidad e ao mundo rural e abandonado. Un proxecto capaz de recoller as necesidades, problemas e anhelos da cidadanía e unifíqueos nun proxecto que en última instancia servirá para que todos e todas vivamos mellor partindo da nosa  cotidianeidad. É dicir, o republicanismo é unha maneira alternativa e integral de entender a política, a economía e a sociedade. 

Continuamos loitando de acordo coa nosa tradición democrática e  emancipatoria, porque somos ese fío vermello da historia que se  entretexe co fío morado feminista e o verde ecoloxista para seguir construíndo un novo país plural, federal e solidario, cun novo modelo económico e social mediante a democratización da económica. 

Dende Esquerda Unida reafirmamos a nosa aposta por un proceso constituínte que desemboque nunha República democrática, federal e solidaria nesta data tan sinalada para a historia democrática do noso país. De maneira coherente, reafirmamos a nosa aposta pola construción cotiá dun horizonte republicano que dea esperanza á clase traballadora e os sectores populares nun momento de crise e incertezas. 

14 DE ABRIL - Horizonte República. 90 aniversario

 
 

O día de hoxe, 14 de abril de 2021, é unha data importante para a cidadanía demócrata do noso país. Cúmprense 90 anos da proclamación da Segunda República, un proceso histórico que constituíu un avance incalculable en termos de democracia e xustiza social. O noso país segue tendo materias pendentes que non esquecemos, como o pleno recoñecemento de quen loitou pola liberdade e a democracia fronte ao fascismo, pero hoxe a República é sinónimo de futuro e esperanza. Futuro ante a decadencia dun réxime incapaz de satisfacer as súas propias expectativas e esperanza fronte ao odio de quen quere levarnos ao pasado e o medo aos avances de quen se conforma coa situación actual.

É o momento de traballar por un país republicano que poña a vida das familias traballadoras no centro. Para iso, é necesario construír un horizonte compartido entre todos e todas, debuxando un novo imaxinario transformador que se comprometa cos actuais retos sociais, culturais, políticos e institucionais. Falar de República é falar dun país ecoloxista, feminista e plural que fai da xustiza social a súa bandeira. Falar de República é falar de dereitos sociais e de condicións de vida dignas para a clase traballadora e os sectores populares. Falar de República é falar de xustiza, democracia e liberdade.

Loitamos por un país ecoloxista que aposte por un modelo económico responsable co medio ambiente e o planeta, un país feminista que acabe coa secuela do machismo e garanta igualdade na diversidade, e un país plural que vexa na súa complexidade cultural e nacional unha riqueza que debe ser coidada. Loitamos por un país con xustiza social no que os dereitos dos traballadores e as traballadoras estean por encima dos intereses das oligarquías afeitas a mandar sen presentarse ás eleccións.

O noso proxecto de país e modelo de Estado deben ser construídos de maneira participativa, pois a República é un proxecto popular de maiorías que conecta coas preocupacións cotiás da cidadanía. A monarquía carece de lexitimidade non só de orixe, senón pola súa corrupción e o seu papel estrutural como ligazón entre os poderes económicos e os poderes políticos e mediáticos. Monarquía é sinónimo de pasado e decadencia. Con todo, a República é un proxecto integral e renovador de país que abarca o conxunto de problemas, inxustizas e anhelos da cidadanía, máis aló do ámbito institucional. Desde estas coordenadas facemos un chamamento ao conxunto da cidadanía demócrata e progresista para que se sume á construción colectiva do republicanismo.

Desde Esquerda Unida reafirmamos, nunha data tan importante para a tradición democrática e  emancipatoria no noso país como a de hoxe, a nosa firme aposta por seguir construíndo, xuntos e xuntas, un país máis xusto, máis democrático e máis fraterno.

Por seguir construíndo, xuntos e xuntas, Horizonte República.

 

A NECESARIA CONSTRUCIÓN DA TERCEIRA REPÚBLICA DÍA A DÍA [MANIFESTO]

Berrámolo ben alto: o marco político actual do estado español só pode rexenerarse coa construción da III República.

E cremos firmemente que para propicialo precisamos previamente dun proceso amplo de consensos no que ten que actuar toda a esquerda política organizada sobre os parámetros de federalismo, socialismo, solidariedade e recoñecemento do lexítimo dereito a decidir dos pobos, sen ambaxes.

Porque o marco actual que queremos tronzar é consecuencia dunha deriva actitudinal e discursiva que favorece a esta monarquía caduca e corrupta, dun modelo territorial pechado en falso, da herdanza dun capitalismo monopolista de estado e oligárquico que obviamente dificulta eses necesarios traballos que require a construción da Terceira República.

Sen eses traballos, sen eses alicerces, nada será posible. A República ten que construírse todos os días a través de accións políticas concretas. E debe facerse desde a esquerda. A loita pola chegada da Terceira República debe ser un dos alicerces ideolóxicos fundamentais do traballo político cotián. Se renunciamos a este campo ideolóxico de batalla, todo será máis difícil. E será un proceso longo e complexo, no que debe figurar de forma clara e concreta un programa político, explicitando as formas e os tempos do novo proceso constituínte. Porque a República é algo máis que a elección do xefe do Estado.

Cómpre actuar para desfacer as mentiras e renuncias que impuxeron os pactos de silencio, de esquecemento da idealizada transición. Cómpre actuar para convencer de que debemos derrgar a Lei de Amnistía, unha lei que sitúa en rango de igualdade aos verdugos e ás vítimas. Algo impensable nunha verdadeira democracia. Unha lei que permite a impunidade e ampara o  negacionismo do xenocidio franquista. Cómpre actuar para devolver a dignidade aos milleiros de persoas que aínda hoxe reclaman e reivindican que rachemos e denunciemos esa política de silencio e esquecemento. Non se debería ter aceptado que a suposta e falaz reconciliación se realizase sen xustiza e reparación para as vítimas de 40 anos de Ditadura. Sen que os vitimarios asumisen as súas responsabilidades.

Cómpre actuar para persuadir coa forza dos argumentos e da pedagoxía a toda esa masa da sociedade resignada que defende o pasado franquista, sen cuestionarse o tipo de Democracia que herdamos, de que así non se pode crear futuro. Temos que facerlles ver que os perpetradores, os verdugos e os executores que se apoderaron, de forma egoísta, clientelar e antidemocrática, das institucións básicas para o exercicio dunha Boa Democracia. Non só o fixeron obrigándonos a vivir baixo unha Monarquía, senón que adoraron ao becerro do diñeiro e do mercado capitalista e foron eles os que nos mergullaron na crise-estafa.

Por iso, vivimos nunha democracia feble, degradada, atada polo conservadurismo e o clericalismo. Por iso, aínda hoxe, asistimos a expresivas demostracións de posta en valor do pasado franquista, un pasado ilexítimo e que debera ser ilegalizado, con todas as consecuencias. Cómpre actuar recoñecendo os erros do noso pasado republicano para superalos cos acertos que tivemos e proxectarnos no horizonte mediante un presente republicano.

Cómpre recuperarmos os discursos e palabras emancipadoras. A República é unha Utopía. Temos unha tradición antifascista e unha cultura democrática no noso bagaxe e que foron quen de resistir e animar a loita pola liberdade e a defensa dos dereitos da clase traballadora.

A nosa Utopía chámase Terceira República. Esquerda Unida aposta incuestionablemente por construír unha base social ampla, hexemónica, que sosteña unha mudanza radical nas institucións públicas para termos unha democracia plena, onde a toma de decisións e a participación sexan reais. Unha República que remate coa alienación e a explotación que impón o capitalismo.

Unha República limpa e democrática, asentada na igualdade entre todas as persoas e pobos e que abranga nun mesmo obxectivo común de convivencia as demandas feministas, as reclamacións da clase traballadora, a defensa do medioambiente e a terra, a defensa do dereito a decidilo todo, a xeneración de novos consensos políticos e de configuración do estado e as reivindicacións de liberdade civil.

14 de abril de 2018

LEMBRANZA REIVINDICATIVA DA NOSA MELLOR HISTORIA

 

Manifesto republicano de Esquerda Unida.

Lembramos para reivindicar, no 85 aniversario da proclamación da República, a tantas persoas que entregaron o seu traballo para erguer a esperanza compartida de construír un novo país. Non queremos esquecer o exemplo de dignidade democrática que as urnas da primavera republicana de 1931 expresaron ao derrotar a un réxime apodrecido entre a miseria e explotación á que sometía ás clases traballadoras e a corrupción estrutural na que vivían as elites daquela I Restauración Borbónica.

A República constituíu, entón, a resposta das clases traballadoras e populares para disputar ás clases dominantes, a dirección política do Estado, a construción material de condicións de vida dignas para a maioría social traballadora, e en resumo a ferramenta para acadar a hexemonía de valores, a panca básica para a transformación social. 

 

A proclamación da República fora posible polos azos unitarios construídos e que callaron na acción política e electoral conxunta republicana e socialista. A mellora das condicións laborais, os avances na loita pola igualdade que simbolizou o sufraxio universal, os milleiros de novas escolas unificadas, o proceso social polo que o noso pobo gañou dignidade ao derrotar ao caciquismo e plebiscitar o autogoberno… son algúns dos fitos dunha República que na Fronte Popular sinalou o camiño do porvir. Dese alento transformador somos coherdeiros e corresponsables todas e todos os que acreditamos na apertura dun proceso constituínte cando o réxime da II Restauración Borbónica provoca condicións de vida insoportables para tantas e tantos de nós.