Esquerda Unida solicita toda a documentación do Plan de Sustentabilidade Turística e reclama explicacións sobre a execución dos fondos europeos

Piden acceso ao expediente completo do proxecto "A Gastromeca", tras rematar o prazo de execución, para comprobar se o Concello executou e xustificou correctamente os 2 millóns de euros dos fondos Next Generation. Advirten de que actuacións como a obra da Praza do Corgo ou a Ruta do Burro Fariñeiro suscitan dúbidas sobre o seu remate dentro do prazo previsto. 

 Lembran que levan todo o mandato realizando un seguimento da execución do plan, advertindo dos atrasos e do risco de perder parte dos fondos europeos por incumprimento dos prazos. Reclaman a convocatoria do Consello Local de Turismo para que o goberno dea explicacións.

O Grove, 2 de xullo de 2025.- O grupo municipal de Esquerda Unida vén de presentar por rexistro unha solicitude de acceso ao expediente completo do Plan de Sustentabilidade Turística en Destino (PSTD) "A Gastromeca", unha vez rematado o prazo de execución establecido na addenda ao convenio subscrito entre a Axencia de Turismo de Galicia e o Concello do Grove en maio do 2025. 

A formación considera que, finalizado o período previsto para executar o proxecto, é o momento de facer un balance rigoroso sobre a utilización dos fondos europeos Next Generation e comprobar se o Concello executou e xustificou correctamente os dous millóns de euros concedidos para este plan. 

Dende a concesión destes fondos europeos, Esquerda Unida realizou un seguimento continuado da súa execución, interesándose en numerosas ocasións polo desenvolvemento das diferentes actuacións, preguntando polos atrasos acumulados e advertindo reiteradamente do risco de que o Concello non fose quen de executar e xustificar integramente o investimento dentro dos prazos establecidos. 

A solicitude presentada polo grupo municipal reclama a relación detallada de todas as actuacións executadas, indicando para cada unha delas o investimento inicialmente previsto e o finalmente realizado, a empresa adxudicataria, as datas de inicio e remate e o seu estado definitivo de execución. 

Así mesmo, solicitan copia das certificacións finais das obras, das actas de recepción, das certificacións emitidas pola dirección facultativa ou polos responsables dos contratos, así como das facturas e pagamentos realizados con cargo ao plan. 

Do mesmo xeito, pide acceso á documentación remitida polo Concello á Axencia de Turismo de Galicia para a xustificación técnica e económica do PSTD, ao expediente de peche do programa e á resolución ou comunicación oficial sobre o resultado desa xustificación, incluíndo, no seu caso, posibles requirimentos, minoracións da subvención ou expedientes de reintegro. 

Segundo explica o seu voceiro, José Antonio Otero, esta solicitude cobra especial importancia porque o prazo de execución rematou o pasado 30 de xuño e existen actuacións que suscitan dúbidas sobre a súa finalización efectiva. 

Entre elas, a formación cita a obra da Praza do Corgo, unha das últimas actuacións iniciadas con cargo ao plan e que, segundo puideron comprobar, continúa sen estar completamente rematada. Así mesmo, tamén expresan dúbidas sobre a finalización da actuación correspondente á Ruta do Burro Fariñeiro, ao non constarlles que todos os traballos previstos estean completamente executados. 

A estas actuacións súmanse outras incluídas na última relación de investimentos facilitada polo propio Concello, respecto das que tampouco lles consta a súa execución definitiva nin, no seu caso, as modificacións ou a súa substitución por outras actuacións. Precisamente por iso solicitan acceso ao expediente completo, co obxectivo de coñecer cal foi finalmente o grao de execución do Plan e como foi xustificado perante a Axencia de Turismo de Galicia. 

"Levamos todo o mandato facendo un seguimento deste proxecto porque sempre tivemos claro que estaba en xogo unha oportunidade histórica para O Grove. Durante estes anos advertimos dos atrasos e da necesidade de acelerar a execución das actuacións para non poñer en risco os fondos europeos. Agora que o prazo rematou e en vista de que existen actuacións que aparentemente non están rematadas, é lóxico preguntarse como se vai xustificar o investimento. E por iso solicitamos toda a documentación. Non queremos especular, queremos coñecer con rigor se todas as actuacións foron executadas, certificadas e aceptadas conforme ás esixencias dos fondos europeos", afirma Otero. 

Dende Esquerda Unida lembran que os fondos Next Generation non rematan coa execución material das obras, senón que requiren unha completa xustificación técnica, administrativa e económica. "Os fondos europeos non se avalían polas fotografías nin polas notas de prensa. Avalíanse mediante certificacións, informes técnicos e unha correcta xustificación económica. Iso é o que queremos comprobar", subliña o voceiro. 

Ademais da documentación, Esquerda Unida solicita ao goberno municipal a convocatoria do Consello Local de Turismo, co obxectivo de presentar un balance público da execución do Plan de Sustentabilidade Turística, informar do grao de cumprimento dos obxectivos previstos e explicar o resultado final da xustificación dos fondos europeos perante os representantes do sector turístico e a veciñanza. 

Para a formación, un proxecto que mobilizou dous millóns de euros de financiamento europeo debe concluír cun exercicio de transparencia e rendición de contas. "Estamos a falar dun dos maiores investimentos públicos recibidos polo Concello do Grove nas últimas décadas. A veciñanza ten dereito a saber canto se executou, como se executou, se todas as actuacións foron aceptadas polos organismos competentes e se existe algún risco de perda ou devolución de fondos. Esa información debe facerse pública", conclúe Otero. 

Esquerda Unida insiste en que a correcta xestión dos fondos europeos non remata coa inauguración das actuacións, senón coa súa completa execución, certificación e xustificación administrativa. Por iso agardan que o goberno facilite, na maior brevidade posible, toda a documentación solicitada e convoque o Consello Local de Turismo para presentar un balance público dun proxecto que supuxo un dos maiores investimentos recibidos polo municipio e sobre o que consideran imprescindible ofrecer a máxima transparencia.

EU volve preguntar pola obra da rúa Hortos e denuncia a desorganización do goberno na execución das obras municipais

Lembran que a actuación en Hortos, comprometida coa súa formación cun orzamento de 280.000, foi licitada por segunda vez no 2025 e continúa sen iniciarse, malia que o goberno asegurou reiteradamente que o atraso se debía ás condicións meteorolóxicas, unha desculpa que xa non consideran válida. 

Consideran que esta situación, xunto cos atrasos na obra de humanización da rúa Lepanto, como na das rúas do Peso, Regato, Fontiña, Horta do Río e Camiño Con do Gato, evidencian un modelo de xestión baseado na improvisación, sen planificación nin control da execución. Denuncian a permisividade do goberno con Marconsa, empresa adxudicataria de todas estas obras.

O Grove, 29 de xuño de 2026.- O grupo municipal de Esquerda Unida volve preguntar ao goberno local pola situación das obras de remodelación da rúa dos Hortos, unha actuación comprometida coa súa formación e que continúa sen iniciarse malia ter sido licitada ata en dúas ocasións. 

A formación lembra que a remodelación de Hortos, unha actuación incorporada aos investimentos municipais tras o acordo acadado por Esquerda Unida nas negociacións co remanente de 2023, foi licitada inicialmente cun investimento de 100.000 euros, e que posteriormente tivo que volver saír a licitación en 2025, ampliando o seu importe en 180.000 euros. Porén, a día de hoxe, a obra segue sen comezar. 

Segundo explica Esquerda Unida, nas diferentes ocasións nas que a formación se interesou por esta actuación, o goberno municipal atribuíu o atraso ás condicións meteorolóxicas do inverno. Unha explicación que consideran xa difícil de soster. 

"Levamos tempo escoitando que a obra non se puido executar debido ás condicións meteorolóxicas, pero a realidade é que levamos máis de dous meses de bo tempo e a situación segue exactamente igual. O único que medra na rúa dos Hortos é a maleza arredor das tubaxes depositadas na zona", afirma o voceiro municipal de Esquerda Unida, José Antonio Otero. 

Para a formación, a situación da rúa dos Hortos non é un feito illado, senón o reflexo dunha maneira de xestionar os investimentos municipais caracterizada pola improvisación e a ausencia de planificación. 

Neste sentido, lembran que a humanización das rúas Peso, Regato, Fontiña, Horta do Río e Camiño Con do Gato foi presentada a mediados de marzo cun prazo de execución de tres meses e dividida en tres fases. Con todo, a principios de abril comezou a actuación na rúa do Peso, a cal a día de hoxe continúa sen rematar, mentres que o resto das actuacións seguen sen iniciarse. 

A esta situación súmase tamén a humanización da rúa Batalla de Lepanto, iniciada a principios de febreiro e que continúa sen rematar malia superar amplamente o prazo previsto. 

Dende Esquerda Unida consideran que estes atrasos xa non poden explicarse unicamente pola meteoroloxía. "Cando varias obras distintas presentan os mesmos problemas, o que falla non é unha actuación concreta, senón a planificación do goberno", sinala Otero. 

A formación lembra ademais que tanto a obra da rúa dos Hortos como as actuacións nas outras rúas mencionadas foron adxudicadas á mesma empresa construtora, Marconsa, que tamén se encarga da execución da obra do entorno de Bizocas, financiada pola Deputación de Pontevedra e sometida a uns prazos de execución moi estritos. 

Segundo explican, durante estes meses foi habitual comprobar como nas obras do centro urbano, moitos días apenas traballaban dous ou tres operarios, mentres na actuación de Bizocas, condicionada polos prazos, o número de traballadores chegaba a superar a quincena. Un contraste que, ao xuízo de Esquerda Unida, evidencia que a distribución dos medios responde ás prioridades marcadas polos prazos das subvencións e non ás necesidades da veciñanza. 

Para Esquerda Unida, corresponde á Concellería de Obras organizar correctamente a execución dos investimentos e supervisar que as empresas adxudicatarias cumpran cos medios e cos prazos comprometidos. 

"Resulta difícil entender que unha mesma empresa acumule atrasos en varias das principais obras municipais sen que o goberno dea explicacións nin adopte medidas. Esa falta de esixencia acaba trasladando á veciñanza unha preocupante sensación de permisividade e do que moitos veciños xa perciben unha auténtica complicidade coa empresa adxudicataria, mentres soportan durante meses as consecuencias das obras", denuncia o voceiro. 

Para Esquerda Unida, o executivo local pretende agora recuperar en poucos meses o tempo perdido durante anos de falta de mantemento, limpeza e investimentos reais. Esta acumulación de obras, sen unha planificación adecuada nin unha supervisión efectiva dos contratos, está a provocar incumprimentos dos prazos, importantes molestias para a veciñanza e unha utilización pouco eficiente dos recursos públicos. “O que estamos vendo é unha sucesión de anuncios, escusas e atrasos que demostran unha preocupante incapacidade para xestionar os investimentos municipais”, conclúe José Antonio Otero.

Esquerda Unida denuncia o “absurdo” de arranxar baldosas en rúas que van ser abertas en poucas semanas

A formación critica a “improvisación e falta total de planificación” do goberno local no uso dos cartos públicos. 

Lembran tamén o caso do Corgo, onde se prevé retirar elementos instalados hai apenas uns anos dentro dunha actuación presentada como “refuxio climático”.

O Grove, 14 de maio de 2026.-Esquerda Unida denunciou hoxe a “pésima planificación” do goberno municipal tras comprobar que o Concello está a destinar recursos públicos á reparación de baldosas en rúas nas que xa existen actuacións integrais previstas a curto prazo. 

A formación lembra que o pasado mes de marzo o alcalde anunciaba a posta en marcha dun contrato de arredor de 48.000 euros destinado ao mantemento e conservación de espazos públicos, asegurando que o obxectivo era deixar o municipio “en perfectas condicións” de cara á tempada estival. 

Desde Esquerda Unida sinalan que sempre defenderon a necesidade dun plan de mantemento para o municipio, lembrando que “levamos anos denunciando o deterioro das rúas e reclamando actuacións continuadas e planificadas”. Porén, consideran que o problema aparece “cando se executan reparacións sen ningún tipo de coordinación coas obras xa previstas”. 

Como exemplo, a formación pon o caso da rúa do camiño do Con do Gato, onde esta mesma semana se estiveron arranxando baldosas a pesar de que en poucas semanas a vía será aberta por completo para executar substitución de tubaxes e posterior formigonado. 

Lembran que algo semellante produciuse recentemente diante da Casa do Concello, onde tamén se realizaron reparacións de baldosas cando se vai executar unha actuación de maior envergadura. 

“O máis grave é que nin sequera podemos falar de falta de coordinación entre departamentos distintos, porque ambas actuacións dependen da mesma concellería. É dicir, quen ordena arranxar esas baldosas sabe perfectamente que esas rúas van ser abertas ao pouco tempo”, critican. 

Para a formación, esta maneira de actuar “non responde a un modelo serio de mantemento, senón á improvisación permanente e ao malgasto de cartos públicos”. 

Esquerda Unida advirte ademais de que esta situación “non é un feito illado”, lembrando tamén o que sucederá coa obra do Corgo, presentada como un refuxio climático. A actuación contempla o desprazamento e nova instalación dunha iluminación colocada hai apenas ano e medio cun custo próximo aos 100.000 euros, así como a eliminación das “paulonias” plantadas hai só seis anos co mesmo obxectivo climático que agora se pretende xustificar coa nova actuación. Unhas cuestións xa foron expostas polo grupo municipal no pasado pleno. 

“Ao final, as consecuencias destas malas decisións non as pagan quen as toma, senón toda a veciñanza do Grove”, conclúen.

Esquerda Unida denuncia que a mala tramitación municipal bloquea a reforma da subida a Meloxo

A Deputación de Pontevedra confirma que o Concello non completou as cesións de terreos necesarias e que o proxecto segue en revisión técnica. 

O voceiro municipal de Esquerda Unida acusa ao goberno local de falta de rigor, opacidade e de xerar falsas expectativas nunha obra clave para o abastecemento de Meloxo e a seguridade viaria.

O Grove, 8 de xaneiro de 2026.- O grupo municipal de Esquerda Unida fixo pública a resposta emitida a semana pasada pola Deputación de Pontevedra á solicitude de información presentada no mes de outubro polo seu voceiro, José Antonio Otero. O documento achega información detallada sobre o estado real da obra da Rampla de Meloxo e deixa en evidencia que o goberno municipal non cumpriu de maneira completa coa súa parte na tramitación do proxecto. 

Segundo recolle a resolución do Servizo de Infraestruturas e Vías Provinciais, o Concello do Grove non completou correctamente as cesións dos terreos necesarios para poder executar a actuación. En concreto, o Concello achegou 26 das 32 actas de cesión asinadas, pero non presentou documentos esenciais como as fichas de cesión cos planos asinados polos propietarios nin o certificado formal de posta a disposición dos terreos ante fedatario público, un requisito expresamente esixido pola Deputación para considerar os terreos plenamente dispoñibles. 

Unha situación que, segundo Otero, contradí frontalmente a información trasladada polo goberno municipal en diferentes sesións plenarias. “Queda claro que mentían cando aseguraban ter realizado todo o traballo que lles correspondía e que o atraso dependía exclusivamente da Deputación. Iso non é certo, porque a documentación entregada está incompleta e mentres non se remate correctamente o expediente a obra non pode avanzar”, sinalou o voceiro de EU. 

Ademais, existen seis parcelas nas que non houbo cesión voluntaria. A Deputación propuxo modificar o proxecto para evitar a ocupación de tres delas, aínda que segue sendo necesaria a afección doutras tres, o que obriga a modificar planos, incorporar un anexo de expropiacións e cambiar as medicións e o orzamento do proxecto. Estas expropiacións serán tramitadas pola Deputación, pero asumidas economicamente polo Concello do Grove, tal e como lle confirmou o propio alcalde ao ente provincial nun correo electrónico remitido o 13 de decembro de 2025. Un feito que, segundo Otero, “demostra que o problema está lonxe de estar resolto á vista da data dese último correo”. 

O voceiro municipal lembra tamén que, cando Esquerda Unida solicitou información á Deputación de Pontevedra, fixo o propio ao Concello do Grove, pedindo copia da documentación remitida ao ente provincial xunto co correspondente certificado de saída. “A día de hoxe esa solicitude segue sen resposta, o que volve poñer en cuestión a transparencia do goberno municipal”, denunciou. 

Por todo isto, o grupo municipal de Esquerda Unida esixe ao goberno do Grove que dea explicacións públicas á veciñanza, asuma responsabilidades polos atrasos acumulados e complete de inmediato toda a tramitación pendente para que a obra da Rampla de Meloxo poida executarse canto antes. Advirten de que, mesmo no caso de completarse a fase de expropiacións, mentres non se entreguen os planos asinados e o certificado oficial de posta a disposición dos terreos ante fedatario público, o expediente continuará bloqueado. 

Dende EU alertan ademais de que a situación actual da Rampla de Meloxo é xa insostible para a veciñanza, ao provocar problemas recorrentes no día a día, como roturas cada vez máis frecuentes na tubaxe de subministro de auga, que derivan en episodios de desabastecemento con cortes que se prolongan durante varias horas cada vez que se produce unha avaría. Así mesmo, estas roturas e as posteriores reparacións están a xerar situacións de inseguridade viaria, xa que os valados das obras adoitan prolongarse no tempo, afectando á circulación e á seguridade dos vehículos nunha rúa pola que transita habitualmente transporte pesado.

EU critica a falta de diálogo e precipitación no proxecto de reforma da rúa Luís A. Mestre

O grupo municipal lamenta que o goberno local actuase “coma se tivese maioría absoluta”, sen consensuar o proxecto coa oposición. Denuncian que se presenta un proxecto en función dunha axuda, non da realidade da vía. 

EU advirte de riscos para a seguridade viaria e para o tráfico pesado ao instaurarse plataforma única e reducir o ancho da estrada. Ademais, prevese eliminar máis de trinta prazas de estacionamento sen ofrecer alternativas.

O Grove, 7 de novembro de 2025.- O grupo municipal de Esquerda Unida do Grove explicou os motivos polos que decidiu non apoiar o proxecto de reforma da rúa Luís A. Mestre, aprobado no pleno municipal do pasado luns, día 3, e que se levará a cabo mediante un convenio coa Xunta de Galicia, que achegará entre o 70 e o 80 % do custo total, arredor de 2,6 millóns de euros. A aprobación do proxecto no pasado pleno tan só supoñía optar á financiación que lle corresponde ao concello a través da subvención do Plan Extra da Deputación de Pontevedra. 

O voceiro de Esquerda Unida, José Antonio Otero, cualificou o proxecto de “precipitado, pouco dialogado e alleo ás necesidades reais da rúa”, lamentando que o alcalde e o seu equipo actuasen “coma se aínda tivesen maioría absoluta”. 

“O proxecto presentouse con présa e sen consenso, cando o PSOE non ten maioría e necesitaba o apoio dalgún grupo da oposición. Volvemos á vella práctica de presentar propostas pechadas e sinalar á oposición como culpable se non as apoia”, denunciou Otero que resaltou que “este proxecto está enfocado en acadar a subvención do Plan Extra, non nas necesidades reais da rúa”. 

A formación sinala que o marxe de análise foi moi curto, mais aínda así detectaron cuestións graves que poden afectar á seguridade viaria e peonil. “Proponse facer plataforma única e reducir o ancho da estrada de sete a seis ou mesmo a cinco metros e medio o que supón un risco evidente”, advertiu Otero. “Por unha parte desa vía circulan autobuses e camións de gran tonelaxe; se agora teñen dificultades para cruzarse, coa plataforma única podería chegar a ser imposible, obrigando á invasión da beirarrúa e poñendo en perigo aos peóns”. 

EU defende que, polo menos no tramo entre Borreiros e o cruce coa Avenida de Portugal, se manteña o ancho actual da calzada, mellorando a accesibilidade das beirarrúas e os pasos de peóns, e que a plataforma única se limite ao segundo tramo, entre o cruce da Avenida de Portugal e a rúa da Praza. 

Outro aspecto que critican é a supresión de 35 prazas de aparcamento sen alternativa algunha. “Non é razoable eliminar máis da metade das prazas nunha rúa onde as preto de 80 existentes están ocupadas case todo o día. O Concello debería habilitar espazos de estacionamento en solares baleiros ou en desuso, como xa propuxemos noutras ocasións”, engadiu Otero. 

Dende Esquerda Unida teñen claro que o proxecto responde máis á oportunidade dunha subvención que a unha planificación seria da mobilidade local. “Non se pode aprobar un proxecto a cegas só por non perder unha axuda. O plan fíxose para encaixar nunha convocatoria e non para resolver os problemas reais da estrada”, insistiu Otero. 

A formación tamén expresou a súa sorpresa pola postura do PP e do BNG, que “compartiron e fixeron súas moitas das nosas denuncias durante o pleno, pero logo optaron por absterse e permitir a aprobación do proxecto”.

 “Permitiron que o alcalde saíse coa súa. Agora dise que nos reuniremos cos técnicos, pero esa reunión temémonos que será meramente informativa, porque cuestións como a plataforma única no primeiro tramo ou a redución do ancho dos carrís son condicións impostas polas bases da subvención da Deputación e dificilmente se poderán modificar”, explicou Otero. 

Pese a todo, Esquerda Unida adianta que levará as súas propostas á xuntanza cos técnicos municipais, coa intención de axustar o proxecto á realidade da estrada e garantir a seguridade dos viandantes e vehículos, e forzarán para que se modifique o proxecto “aínda que iso supoña renunciar á subvención”. 

“Preferimos perder unha axuda e ter que pedir un préstamo antes que hipotecar o futuro dunha das arterias principais do Grove cun proxecto mal deseñado. As boas decisións non se toman con présa nin con chantaxes, senón con diálogo e responsabilidade”, insistiu o voceiro de EU.

Lembran que ”a precipitación a hora de deseñar un proxecto para acadar unha subvención, sen contemplar os pros e os contras, provocou que a rúa Alexandre Bóveda tivese que suprimir un dos carrís de circulación, ocasionando numerosos problemas que a día de hoxe non foron resoltos. Non queremos que, novamente, se hipoteque o futuro dunha rúa polo simple feito de lograr o seu financiamento”.

Esquerda Unida pide claridade e transparencia sobre obra da subida a Meloxo e esixe celeridade

Cuestionan as explicacións do goberno local, que asegura ter remitido toda a documentación á Deputación e estar pendentes de asinar o convenio. Reclaman tanto ao Concello como á institución provincial información verificable sobre o estado do proxecto e os prazos de execución da obra.

Lembran que levan dende 2020 reclamando a substitución da tubaxe e alertan das continuas roturas, tres nos últimos cinco días, a última no día de onte, o que está ocasionando problemas de abastecemento á veciñanza.

O Grove, 15 de outubro de 2025.- Esquerda Unida vén de pedir explicacións ao goberno municipal e á Deputación de Pontevedra ante a falta de avances na substitución da rede de abastecemento e reforma estrada de subida a Meloxo, un proxecto anunciado no ano 2023 e que segue sen executarse. O grupo municipal reclama claridade, transparencia e depuración de responsabilidades e esixen celeridade na execución da obra. Do mesmo xeito, alerta que as roturas da tubaxe son continuas e a veciñanza está a sufrir os cortes no subministro de auga, a última rotura produciuse no día de onte, que se suma ás outras dúas que tiveron lugar na última semana.

O voceiro de Esquerda Unida, José Antonio Otero, lembra que no pleno do 2 de xuño, tras preguntar polo estado do proxecto, a concelleira de Obras, Ángeles Domínguez, asegurou que “toda a documentación xa estaba en mans da Deputación”, que “o Concello cumprira o seu traballo” e que só había catro propietarios que non aceptaran a cesión dos terreos. Afirmou ademais que era a Deputación quen debía fixar os prazos e decidir se expropiaba ou modificaba o proxecto. Así mesmo, no día de onte, o Alcalde afirmaba estar en contacto co ente provincial para a sinatura dun convenio, pero a realidade é que a obra segue a demorarse.

“Queremos saber se esa información é certa ou non. Por iso solicitamos formalmente á Deputación que nos confirme se o Concello lle trasladou realmente toda a documentación, cal é o estado do expediente e cales son os pasos previstos para que a obra sexa unha realidade. Tamén pedimos ao propio Concello que nos achegue as minutas ou xustificantes de envío da documentación para demostrar que fixeron o que din”, explicou Otero.

Otero advertiu de que “non sería a primeira vez que se maquilla unha realidade para aparentar xestión”, lembrando que en febreiro deste ano o alcalde, asegurara publicamente que xa se contaba co 90 % das cesións asinadas e que o resto se completaría “nun prazo de dez ou quince días”, co fin de enviar o expediente á Deputación a principios de marzo. “Estamos en outubro e seguimos sen obra, sen licitación e sen explicacións convincentes”, engadiu.

Esquerda Unida leva reclamando dende 2020, cando se produciron as primeiras roturas, a substitución da tubaxe de abastecemento “xa que tiñamos claro que o paso de vehículos pesados e o estado da rede ía provocar que se repetisen con frecuencia as roturas co conseguinte prexuízo para a veciñanza, que a fin de contas é quen sofre cortes de auga que se prolongan durante longas horas, tal e como sucedeu no día de onte e ata en dúas ocasións máis nesta última semana, o que constata que non é un problema novo, senón un problema ignorado”, asevera Otero que considera que “a pesar de levar cinco anos advertindo da gravidade, o que vemos é inacción e opacidade”.

A formación advirte de que a falta de execución está a provocar malestar entre a veciñanza e gastos innecesarios para o concello en cada rotura. “Se o proxecto leva dous anos atascado entre administracións, alguén debe dar explicacións e asumir responsabilidades. O que non pode ser é que a veciñanza siga sufrindo mentres o Concello e a Deputación botan balóns fóra”, concluíu o voceiro.

EU denuncia que a incapacidade do goberno municipal provoca a perda de 1 millón de euros en investimentos

O grupo municipal acusa ao executivo local de irresponsabilidade ao non lograr executar actuacións importantes que estaban financiadas co remanente de tesourería e que supoñen a perda dun millón de euros.

Os concelleiros de EU critican duramente a xestión do goberno, que supón non só a perda de máis do 41% do remanente, senón tamén o incumprimento na execución das propostas acordadas co seu grupo.

O Grove, 30 de decembro de 2024. Esquerda Unida lamenta que o ano 2024 remate cun millón de euros en investimentos non executados procedentes do remanente de tesourería, debido, segundo denuncian, "á nula capacidade de xestión do goberno municipal do PSOE”.

Segundo explicou o seu voceiro, José Antonio Otero, “en xullo aprobáronse 2,4 millóns de euros do remanente de tesourería, para máis de 50 actuacións, entre as que se incluían propostas realizadas polo noso grupo municipal e pactadas co goberno local. Chegados a finais de ano, non só non se executaron moitas destas actuacións, senón que tras unha xuntanza co alcalde, confirmamos que ata un millón de euros se perderán definitivamente por non terse completado os proxectos a tempo”.

Entre as propostas impulsadas por Esquerda Unida e que non se levaron a cabo neste 2024 destacan actuacións como a mellora da rúa Rioxa no Sineiro, cun investimento previsto de 100.000 euros; a compra dun terreo en Entrehortas por valor de 220.000 euros, destinada a ampliar o aparcadoiro; ou o proxecto para o aparcadoiro da praia das Pipas, cun orzamento de 6.000 euros. Tamén salientan que, no caso da rúa Hortos, perderanse 30.000 euros dun total de 100.000, xa que aínda que se realizaron os acopios de materiais, as obras non comezarán ata o 2025.

“A irresponsabilidade deste goberno é flagrante”, destacou a concelleira Susana Millán. “Estas actuacións estaban financiadas con remanente de tesourería, polo que os cartos que non se executen este ano non quedarán prorrogados nin se sumarán ao remanente de 2025. Estamos ante unha perda real e directa para O Grove, e a veciñanza será a principal prexudicada”.

Segundo Esquerda Unida, ademais das súas propostas, hai actuacións que quedarán sen executar e perderán o seu financiamento, como  a obra de Bizocas (200.000 €), a instalación de novas comportas no pozo de tratamento de augas do Corgo (100.700 €), a compra dun terreo ao lado das monxas (70.000 €) e outro nas Touzas (15.000 €), a instalación dun telón no Auditorio (20.000 €) e dun marcador no pavillón vello (15.200 €) ou as obras de mellora na Casa da 3ª Idade (18.000 €). Tamén outras actuacións quedarán incompletas e perderán parte do financiamento, como o plan de asfaltados (160.000 €) ou a humanización de Entrehortas (58.000 €).

Otero engadiu que esta situación tamén representa un "incumprimento flagrante" do acordo alcanzado co goberno municipal. “Votamos a favor da proposta xeral de investimentos porque incluía actuacións promovidas por Esquerda Unida. Agora vemos que ese compromiso foi papel mollado. É un engano a nós como grupo municipal e á propia veciñanza”.

Por este motivo, Esquerda Unida anunciou que convocará unha asemblea local en xaneiro para analizar a situación e definir as decisións políticas a tomar. Segundo indicou Anxo Meis, “esta grave falta de xestión reforza a nosa proposta de reducir drasticamente as asignacións económicas dos concelleiros liberados no goberno municipal, algo que xa levamos ás negociacións dos orzamentos neste 2024 e que supuxo a rotura das mesmas”

"Quen non é capaz de xestionar, tampouco debería cobrar retribucións tan elevadas. Non podemos permitir que esta falta de compromiso e de responsabilidade siga custándolle cartos á veciñanza” concluíu Otero.

EU demanda explicacións pola paralización das obras de retranqueo do muro en Entrehortas

 

O grupo municipal de Esquerda Unida pregunta polos motivos que levaron á paralización das obras no retranqueo do muro da saída do aparcadoiro de Entrehortas, que comezaron hai dous meses e levan, alomenos, quince días detidas.

Ademais de esixir transparencia sobre a situación, solicitan medidas inmediatas para minimizar as molestias que están a sufrir os usuarios e a veciñanza.

O Grove, 25 de novembro de 2024. O grupo municipal de Esquerda Unida quere coñecer os motivos reais polos que as obras de retranqueo do muro da saída do aparcadoiro de Entrehortas están paralizadas dende hai quince días. Segundo indican, os traballos comezaron hai dous meses e, dende entón, os usuarios víronse obrigados a utilizar un único acceso de entrada e saída, regulado mediante semáforos, unha solución que consideran comprensible durante o transcurso das obras, pero que carece de sentido agora que estas están detidas.

Desde a formación especulan coa posibilidade de que a paralización poida deberse á falta de permisos de Patrimonio, algo que consideran "incomprensible", dado que o inicio das obras debera estar condicionado á existencia de toda a documentación necesaria. Se isto non fose así, Esquerda Unida considera que estaríamos ante un exemplo de "falta de responsabilidade" por parte do goberno municipal encabezado polo PSOE.

Por este motivo, o grupo presentou unha pregunta por rexistro solicitando aclaracións sobre a situación real das obras e sobre o tempo que se prevé para retomalas. Así mesmo, instan ao goberno local a que, mentres a paralización continúe, se proceda á retirada dos valados e se permita o uso normalizado do acceso ao aparcadoiro para evitar os prexuízos que está a sufrir a veciñanza.

"Non é razoable que os usuarios teñan que esperar ata quince minutos para acceder ou saír do aparcadoiro cando as obras están completamente detidas", sinalaron desde Esquerda Unida, reiterando a urxencia de tomar medidas que garantan a comodidade e seguridade dos veciños e veciñas afectadas.

EU denuncia que a Xunta ignora as necesidades do Grove nos orzamentos de 2025

O grupo municipal de Esquerda Unida critica a ausencia de investimentos clave para O Grove nos orzamentos galegos do 2025, destacando a falta de fondos para as obras do CEIP Rosalía de Castro e o CEIP Conmeniño, prometidas en vésperas das últimas eleccións autonómicas.

O portavoz de Esquerda Unida, José Antonio Otero, denuncia que a Xunta exclúe demandas históricas do municipio, como o dique de abrigo do porto de Porto Meloxo e melloras de infraestruturas viarias, de abastecemento e educativas.

O Grove, 4 de novembro de 2024 - O grupo municipal de Esquerda Unida criticou duramente a falta de compromiso da Xunta de Galicia co municipio do Grove ao non incluír partidas significativas nos orzamentos para o 2025. Segundo denuncia o seu voceiro, José Antonio Otero, “estes orzamentos son un exemplo máis do desleixo da Xunta cara ás necesidades reais do noso concello, mentres que anuncian obras en vésperas electorais para despois esquecelas completamente”.

Para o vindeiro ano, a Xunta só asignou 25.000 euros ao Grove, unicamente destinados a unha pequena remodelación do porto. Esta partida é “ridícula” se se consideran as múltiples demandas que leva anos reclamando a veciñanza, como o dique de abrigo no porto de Porto Meloxo, o desdobre da vía rápida, o asfaltado da rúa Luís A. Mestre ou a renovación da tubaxe de abastecemento de auga da Lanzada.

Non obstante, Esquerda Unida destaca como especialmente grave a falta de fondos para a ampliación do CEIP Rosalía de Castro e a reforma integral do CEIP Conmeniño logo do compromiso adquirido en xaneiro, apenas vinte días antes das eleccións autonómicas. A Consellería de Educación anunciara entón un investimento de 2,6 millóns de euros para mellorar o CEIP Rosalía de Castro, incluíndo a construción dun novo edificio, tras derrubar as antigas “casas dos mestres”, para dotalo de comedor, ximnasio e novas aulas. No caso do CEIP Conmeniño, a consellería informara da redacción dun proxecto de rehabilitación integral cun orzamento de 450.000 euros, destinado a mellorar a eficiencia enerxética, renovar a envoltura exterior, substituír cubertas e illamento térmico, ademais de instalar unha caldeira de biomasa.

Daquela, o pleno da corporación municipal xa expresara o seu apoio unánime ás melloras do CEIP Rosalía de Castro, demandadas pola ANPA, destacando a urxente necesidade dun comedor digno, dado que actualmente o servizo se presta nun módulo prefabricado que non cobre a demanda, e a dotación de novas aulas. Por ese motivo, a promesa da Xunta para as reformas dos dous centros fora ben recibida no seu momento, aínda que Esquerda Unida cuestionou a súa sinceridade debido á proximidade das eleccións.

Porén, desde aquelas datas, apenas se realizaron movementos visibles, máis alá dunha cata no patio do Rosalía de Castro durante o período electoral, e nada se soubo dos máis de 3 millóns de euros previstos para os dous centros educativos, nin neste 2024 nin para o vindeiro ano, a vista borrador do orzamento para o 2025. Segundo Otero, “a ausencia de calquera partida nos orzamentos para 2025 demostra que non houbo nunca un compromiso real coa comunidade educativa do Grove. É evidente que foi unha promesa preelectoral, sen intención de execución”.

Esquerda Unida demanda que a Xunta rectifique e inclúa os investimentos necesarios para cumprir coas necesidades educativas e infraestruturais do Grove, lembrando que “o noso municipio non merece ser esquecido de maneira sistemática e ser utilizado só con fins electorais”.

Esquerda Unida esixe celeridade na substitución da tubaxe de auga da estrada de Meloxo

 

A formación política preocúpase pola falta de avances dende o anuncio do anteproxecto en marzo do ano pasado, apuntando á necesidade de substituír canto antes a tubaxe ante as constantes roturas que provoca o desabastecemento de auga á veciñanza de Meloxo.

Esquerda Unida solicita información ao ente provincial e ao goberno municipal para esclarecer quen está demorando a execución da obra.  

O Grove, 24 de febreiro de 2024.- Esquerda Unida manifestou a súa preocupación pola demora nas obras de mellora da estrada de Meloxo, unha actuación vital para a veciñanza que leva sufrindo problemas de subministro de auga dende hai tres anos debido a frecuentes roturas na tubaxe. A última incidencia rexistrouse hai apenas unha semanas e, trala reparación, a zona atópase valada, o que supón un enorme risco para os condutores, máxime cando é utilizada por numeroso tráfico pesado. 

Segundo o voceiro de Esquerda Unida, José Antonio Otero, dende o primeiro incidente, en xaneiro do 2021, o seu grupo municipal ten insistido en innumerables ocasións na necesidade de substituír a tubaxe para previr futuras avarías. Otero indica que en marzo do 2023, o goberno local anunciou un anteproxecto para, ademais da substitución completa da tubaxe de subministro de auga, realizar unha actuación integral que incluía a ampliación da beirarrúa, a creación dunha cuneta transitable, a renovación do firme e luminaria. Como propietaria da estrada, a obra ía ser executada pola Deputación de Pontevedra que en xuño do pasado ano anunciou a licitación do proxecto. Non obstante, a realización destas obras requiría a cesión de terreos por parte dos propietarios das fincas afectadas e este traballo correspondíalle ao goberno municipal, lembra Otero.

Co cambio de goberno na Deputación, agora en mans do PP, Esquerda Unida preocúpase pola falta de información sobre a obra. Á incerteza sobre o peche das cesións de terreos, súmase a ausencia de información clara en relación á disposición do actual goberno provincial a realizar a obra, o que preocupa aínda máis á formación política, que non ven avances case un ano despois de ter anunciado  obra.  

Así, Esquerda Unida quere saber a que é debido o retraso, e por iso xa realizou a consulta pertinente á Deputación de Pontevedra a través do rexistro. “Queremos saber se o retraso na execución da obra é debido a un rexeite do ente provincial a investir nesta estrada, ou é por culpa do goberno municipal, xa que a día de hoxe temos constancia de que non se puxeran en contacto cos propietarios para pechar as cesións dos terreos, logo de comprometerse a realizar ese traballo”, asevera Otero.

O voceiro esquerdista indica que “a situación resulta frustrante, sobre todo para as veciñas e veciños de Meloxo, que continúan a experimentar roturas na tubaxe e, en consecuencia, cortes no subministro de auga, nalgúns casos durante horas e, en ocasións, ata un día completo”.

É por iso que, á espera de resposta por parte da Deputación, Esquerda Unida urxe ao goberno municipal a esclarecer a situación, e se é preciso pechar canto as cesións dos terreos, co fin de resolver un problema que xa se prolonga por demasiado tempo. Así mesmo, solicitan que namentres siga valada a zona afectada, se mellore o balizamento para evitar o risco para o tráfico rodado, sobre todo pola noite.

EU insta a crear unha fronte común para demandar á Xunta as melloras necesarias para o CEIP Rosalía de Castro

Apoian a demanda da ANPA Conchases para lograr as melloras urxentes do centro escolar, incluíndo novas aulas, pavillón e comedor escolar. Critican a inacción da Xunta de Galicia e solicitan colaboración entre os partidos políticos da corporación e comunidade educativa para resolver as deficiencias.

Critican tamén ao executivo local pola falta de actuación nas deficiencias reclamadas pola ANPA dende o verán e pídenlle á Concelleira de Educación que cumpra coas súas obrigas e dea solucións á demanda de limpeza e mantemento do centro, ao arranxo do parque infantil e á problemática derivada do cambio do sentido das rúas.

4 de decembro de 2023.- Os concelleiros de Esquerda Unida, José Antonio Otero, Susana Millán e Anxo Meis, reuníronse a pasada semana con representantes da ANPA Conchases. Neste encontro, abordáronse diversas preocupacións relacionadas coas condicións do CEIP Rosalía de Castro e as accións necesarias para a súa mellora.

Tras analizar a situación, Esquerda Unida considera necesaria a formación dunha fronte común entre os partidos políticos da corporación e a comunidade educativa co obxectivo de reivindicar e reclamar ante a Consellería de Educación e a Xunta de Galicia as melloras esenciais que o CEIP Rosalía de Castro necesita con urxencia e que leva anos demandando.

As melloras pasan pola habilitación de novas aulas para facer fronte ao aumento de matrículas, á diversidade do alumnado e ás necesidades pedagóxicas; a construción dun novo pavillón que cumpra cos estándares adecuados; a implementación dun comedor escolar que satisfaga a crecente demanda, xa que desde 2019 se está cubrindo o servizo nun módulo prefabricado que era provisional e que queda escaso e inadecuado; e a habilitación dun espazo axeitado para que a ANPA leve a cabo as súas actividades extraescolares, xa que o que tiñan está totalmente inutilizable debido ás filtracións de auga.

A asociación de nais e pais informou aos concelleiros sobre o compromiso verbal que a Consellería de Educación adquiriu a comezos de ano coa dirección do centro. Este incluía a realización dun proxecto que abordaba as melloras necesarias para cubrir todas as demandas, realizando obras tanto no propio centro como no edificio contiguo utilizado antigamente para as vivendas dos mestres, actualmente en estado de abandono. Pero ata a data, nin a dirección do centro, nin a asociación de nais e pais ten constancia da existencia dese proxecto.

Os concelleiros de Esquerda Unida expresaron o seu total respaldo e compromiso coa ANPA para traballar en conxunto na consecución das melloras demandadas. No entanto, sinalaron a falta de intención por parte da Xunta de Galicia para levar a cabo calquera actuación a curto prazo no CEIP Rosalía de Castro, xa que á carencia dun proxecto de reforma súmase a ausencia de partida algunha nos orzamentos autonómicos para o próximo ano, nin para o proxecto nin para a execución da obra. É por iso que fan fincapé na necesidade de crear unha fronte común que traballe, ao marxe das discrepancias políticas, para lograr as melloras que necesita o centro educativo.

Doutra banda, os concelleiros tamén constataron o malestar da ANPA co executivo local debido á falta de actuación da Concelleira de Educación en diversas solicitudes realizadas antes do inicio do curso escolar. Estas inclúen problemas de limpeza e mantemento do centro, a adecuación do parque infantil e solucións ás complicacións xurdidas polo cambio de sentido das rúas, que afecta á situación dos contedores de lixo e ao acceso dos autobuses durante as saídas escolares.

Esquerda Unida critica o nulo compromiso do goberno local coas demandas da comunidade educativa e pide á Concelleira de Educación que cumpra coas súas responsabilidades e solucione as deficiencias e problemas que presenta o CEIP Rosalía de Castro. Do mesmo xeito, emprázana a manter un diálogo máis constante e fluído tanto coas ANPAS como coas direccións dos colexios co propósito de manter os centros escolares en óptimas condicións, xa que o mantemento dos mesmos corresponde á administración local.

EU denuncia o caos producido polas obras de Alexandre Bóveda e o paseo de Lordelo

 

Consideran un grave erro ter iniciado as dúas actuacións ao mesmo tempo e alertan que non hai indicacións suficientes sobre a circulación e que se produciron cambios respecto ao anunciado e ao mapa elaborado pola Policía Local, provocando caos e desorientación entre a veciñanza. Tachan ao Alcalde de mentireiro por incumprir o anunciado.

Pedirán información sobre as dúas plataformas que se instalarán en sendas curvas do paseo de Lordelo para que circulen autobuses ao entender que será un perigo para os usuarios do carril-bici. Queren coñecer se existe un informe que avale tal circunstancia.

O Grove, 5 de setembro 2022. Hai pouco máis dunha semana, o Alcalde anunciaba o comezo, de forma conxunta, das obras da 3° fase da humanización da rúa Alexandre Bóveda e o asfaltado do paseo de Lordelo, cuestión que dende Esquerda Unida consideran un grave erro pois significa ter pechadas dúas arterias cunha importante circulación de tráfico, así como complicacións para un gran número de veciñas e veciños que teñen as súas residencias nas zonas afectadas. Do mesmo modo, os esquerdistas entenden que esta actuación supón o primeiro engano do Alcalde á veciñanza, pois meses antes afirmou que estas actuacións se desenvolverían por separado. 

Coas obras xa iniciadas, dende Esquerda Unida denuncian que non se está a cumprir o anunciado polo Alcalde e que o mapa que elaborou a Policía Local non ten nada que ver coa situación de circulación actual, "o que está a provocar un caos circulatorio e unha gran desorientación na veciñanza da zona e no resto dos condutores, sobre todo nos que nestes días seguen de vacacións no noso concello", aseveran. 

Falan os esquerdistas da zona de Lordelo que nun principio tíñase anunciado o asfaltado ata o edificio que alberga o SPAD, permitindo a circulación dende esa zona ata a avenida Irmáns Otero Goday, mantendo a rúa do serradoiro co sentido de circulación de sempre. A realidade que se atopan os veciños é que o asfaltado se prolongou a todo o paseo, atopándose cortada a circulación e vendo como a rúa do serradoiro cambiou o seu sentido de circulación sendo agora dende a Aguieira cara a avenida Irmáns Otero Goday. O mesmo sucedeu en Alexandre Bóveda, pois o Alcalde anunciou que o sentido permitido no comezo das obras sería de Terra de Porto cara Rosalía e resulta que é xustamente ao contrario. 

A falta dunha información clara nas diferentes rúas que tornaron o seu sentido, nas que se eliminou o acceso ou se restrinxiu un dos carrís é outro dos motivos criticados por Esquerda Unida que, segundo indican, está a provocar numerosas incidencias. Para os esquerdistas, "o ideal sería ter uns paneis informativos indicando a situación actual da rúa e informando das alternativas para evitar problemas e malestar". 

Así, dende Esquerda Unida tamén indican que, unha semana despois de comezar as obras, nas rúas que cambiaron de sentido seguen aparcados vehículos na dirección anterior, o que crea desorientación entre os usuarios e pode provocar accidentes cando queiran retiralos. 

Toda esta situación, din os esquerdistas, ten culpables "e non son outros que o Alcalde e o seu equipo de goberno, que incumpren co que anuncian e non son quen de facer as actuacións contando co resto dos grupos políticos e sobre todo coa colaboración da cidadanía". Por ese motivo, piden ao executivo "que se poñan as pilas e, xa que as obras aínda van durar un tempo, que fagan o que faga falla para minimizar o caos e a desorientación da veciñanza e que para futuras actuacións non se chegue a esta situación".

Por outra banda, dende Esquerda Unida tamén pedirán información sobre as zonas elevadas que se van a instalar en dous tramos curvos do paseo de Lordelo co propósito de que transiten autobuses, máxime cando non se contemplan no proxecto que saíu a licitación. Para os esquerdistas esta circunstancia supón un gran perigo para os usuarios do carril-bici, pois ao poñer ao mesmo nivel a estrada nesas zonas, os autobuses terán que invadir, sen apenas visibilidade, o carril de circulación destinado ás bicicletas e patinetes. “Queremos saber en base a que informes ou recomendacións se decidiu facer esta modificación do proxecto e quen será o responsable cando suceda unha desgraza nesa zona”, indican dende a agrupación de esquerdas.