Esquerda Unida pregunta pola licitación da Escola de Música José Silva Torres e alerta dun posible atraso no inicio do curso

A formación critica que, a un mes do comezo do curso escolar, o servizo segue sen licitar nin publicarse os pregos, xerando incerteza para familias e alumnado. 

O goberno municipal comprometérase a licitar por 4 anos, pero Esquerda Unida teme que se repita a improvisación e irregularidades do pasado ano.

O Grove, 14 de agosto de 2025.- Esquerda Unida vén de rexistrar unha pregunta formal no Concello para coñecer a situación da licitación da Escola de Música José Silva Torres. A poucas semanas de comezar o novo curso, a formación denuncia que non existe licitación publicada no portal de contratación da Xunta, nin se coñecen os pregos, malia que o goberno municipal asegurara que, desta volta, o contrato sería por catro anos. 

O seu voceiro municipal, José Antonio Otero, lembra que no curso pasado tamén se anunciou unha licitación plurianual e, finalmente, “tivo que prorrogarse a contratación cunha fórmula ao límite da legalidade”. “Naquel momento aseguráronnos que a partir de xaneiro deste ano contaríamos coas bases para licitar por 4 anos, dando seguridade ás familias e á empresa que resultase adxudicataria, pero hoxe seguimos sen nada publicado”, engade. 

Otero advirte de que unha licitación por catro anos require máis tempo de publicidade e tramitación. “Se seguen demorando o proceso, non vai dar tempo a comezar o curso en setembro ou outubro, que sería o normal, e isto supón incerteza para familias e alumnado que deben planificar as actividades extraescolares”, afirma. 

Esquerda Unida reclama que o goberno municipal actúe “con seriedade e previsión” e que, de forma urxente, publique os pregos, convoque o concurso e adxudique o servizo para evitar que as clases se vexan afectadas.

EU esixe a recuperación do nome de José Silva Torres para a Escola de Música municipal

Dende o traslado ao Auditorio Municipal, a Escola de Música deixou de empregar o nome oficial outorgado en 2013 en homenaxe a “Pepe Silva”. Esquerda Unida reclama que se restitúa o nome e se repoña a placa conmemorativa no emprazamento actual.

O nome da Escola honra a un grovense cuxa zapataría foi berce de xeracións de músicos locais. A día de hoxe, o goberno local segue sen cumprir o compromiso de restaurar esta denominación histórica.

O Grove, 21 de abril de 2025.- Esquerda Unida vén de reclamar ao goberno municipal que restitúa o nome oficial da Escola de Música Municipal, que dende xuño de 2013 leva o nome de José Silva Torres, “Pepe Silva”, en homenaxe a quen fixo da súa zapataría na Rúa da Praza un espazo de aprendizaxe musical para moitas xeracións de grovenses.

O voceiro de Esquerda Unida, José Antonio Otero, lembrou no pleno do mes de xaneiro que dende que se realizou o traslado da Escola de Música ao Auditorio Municipal, deixouse de empregar a denominación oficial, pasando a referirse a ela simplemente como Escola de Música do Grove. A placa que daba nome á escola no antigo edificio do Monte das Flores segue no mesmo sitio e non foi trasladada ao Auditorio.

“Queremos deixar claro que o nome de José Silva Torres non se lle puxo ao edificio anterior, senón á propia escola, e por tanto debe seguir presente sexa cal sexa o seu emprazamento”, declarou Otero. No mesmo pleno, a concelleira de Educación recoñeceu esta omisión e comprometeuse a resolvela, pero tres meses despois non se ten producido ningún cambio.

Desde Esquerda Unida denuncian que a omisión de utilizar o nome de José Silva Torres cando se fala da escola de música estase producindo en todas as publicacións e actos oficiais do Concello, como se puido comprobar hai dous venres durante a audición que os alumnos da escola ofreceron no propio Auditorio, o que consideran unha falta de respecto á memoria dunha figura fundamental na historia musical do Grove. “É unha cuestión de xustiza e de coherencia co acordo aprobado no seu día. Non se pode borrar do mapa unha homenaxe tan merecida”, concluíu Otero.

A formación esixe que se repare esta situación de maneira inmediata, trasladando a placa ao actual edificio do Auditorio e restituíndo o nome oficial da Escola en todos os soportes institucionais e comunicativos.

Esquerda Unida denuncia o atraso na licitación da Escola de Música Municipal

Solicitan información ao Concello do Grove sobre o estado do servizo xa que, co curso escolar iniciado e as actividades extraescolares e deportivas en marcha, a Escola de Música aínda non coñece adxudicatario. Critican que a situación se repita cada ano.

Esquerda Unida insta ao goberno local a axilizar os trámites, advertindo que o atraso podería acurtar o curso, e que está prexudicando ás familias e ao alumnado á hora de organizar as súa axendas. Lembran que o 1 de xullo o goberno indicou que se ía licitar por 4 anos e que isto implicaría maior tempo de publicidade.

O Grove, 19 de setembro de 2024.– O grupo municipal de Esquerda Unida vén de solicitar información oficial ao Concello do Grove sobre o estado actual da Escola de Música Municipal. A formación de esquerdas critica que, malia que o curso escolar xa comezou, e xa se están iniciando as diferentes actividades extraescolares e deportivas, da Escola de Música non se ten ningún coñecemento pois o servizo aínda non foi licitado, o que, segundo Esquerda Unida, evidencia unha preocupante falta de xestión por parte do goberno local. Esta non é a primeira vez que ocorre algo semellante, mais este ano o atraso é aínda maior, o que provoca preocupación e posibles inconvintes para os usuarios potenciais do servizo.

José Antonio Otero, voceiro de Esquerda Unida, lembra que no pleno do 1 de xullo, o seu grupo formulou unha pregunta sobre a licitación da Escola de Música, á que o goberno respondeu que “estaban traballando para sacala o máis axiña posible, xa que tiñan a intención de licitar o servizo por un período de 4 anos e segundo explicaron, isto implicaba un maior tempo de publicidade”. Non obstante, Esquerda Unida denuncia que, dende aquela resposta, non se tomou ningunha medida concreta. “Se a día de hoxe a licitación non se publicou, entendemos que renunciarán á proposta de facelo por 4 anos, pois se con un ano xa vai implicar atrasos co calendario ordinario, levalo adiante por 4 suporía un atraso aínda maior en canto ao comezo do curso,” subliñou Otero.

Para Esquerda Unida, este novo atraso está a causar preocupación ás familias, que precisan organizar os horarios dos seus fillos en función das actividades extraescolares, e ao resto de usuarios, que poden ter dificultades para o encaixe desta actividade con outras responsabilidades persoais e laborais. "Esta falta de planificación e previsión non só prexudica á organización das familias, senón que podería acurtar o curso escolar, co conseguinte impacto negativo na educación musical do alumnado", advertiu Otero.

Esquerda Unida insta ao goberno municipal a axilizar os trámites de maneira urxente para evitar máis prexuízos aos potenciais usuarios e garantir que as clases poidan comezar o antes posible. “A inacción e a falta de xestión son xa inaceptables, e non podemos permitir que esta situación continúe prexudicando á veciñanza ano tras ano,” concluíu o concelleiro de Esquerda Unida.

EU denuncia presunta manipulación de datos na subida das tarifas na Escola de Música

 

Alegan que o goberno falseou os números no informe para xustificar o aumento das tarifas, que agora parece non ter base sólida tras a revisión das condicións da licitación do servizo. Os gastos de xestión chegaban a 85.752,70 € cando a licitación sae por 70.080,00 €.

Cos novos datos, o servizo pode xerar beneficios, o que consideran ilegal para unha administración pública. Esixen transparencia e revisión dos datos presentados polo goberno municipal para axustar o incremento á nova realidade.

O Grove, 21 de setembro de 2023.- Logo de que a principios de mes Esquerda Unida criticase o incremento da tarifa do prezo público da Escola de Música municipal pedindo explicacións ao goberno tras detectar aspectos dubidosos na memoria xustificativa, volven saír á palestra, esta vez para denunciar que o goberno “falseou” os datos no informe para acreditar unha subida que, segundo indican, carece de sustento logo de revisar o prego de condicións da licitación do servizo, que se publicou a mediados da pasada semana.

Segundo Esquerda Unida, o informe xustificativo presentado polo goberno recollía unha subida da tarifa baseada, entre outros aspectos, nun gasto da xestión que ascendía no presente curso ata os 85.752,70 €. No entanto, tras examinar o prego da licitación, revélase que o orzamento máximo para este gasto é de 70.080,00 €, o que presenta unha diferenza de 15.672,70 €, a cal podería ser maior, xa que as ofertas que se presenten adoitan puxar por debaixo do prezo de saída.

Con estes novos datos que saíron a luz trala publicación da licitación o pasado mércores 13, dende Esquerda Unida cuestionan a validez do informe que avalaba o incremento das tarifas da Escola de Música. No informe contemplábase a previsión dun gasto total do servizo de 88.579,45 € e uns ingresos, coa nova tarifa, de 74.160,00 €, o que supoñía que o servizo continuaría con un déficit de 11.228,64 €. No entanto, tal e como indican os esquerdistas, se a licitación se adxudica co orzamento máximo, o gasto total sería de 73.906,75 €, o que significa que xa non existirá déficit senón un beneficio de 254,25 €, que se pode incrementar se a licitación se adxudica á baixa, unha situación que Esquerda Unida considera ilícito pois os prezos públicos non poden calcularse para obter beneficios por parte da administración.

Outro aspecto que foi obxecto de críticas por parte de Esquerda Unida foron as declaracións do Alcalde saíndo ao paso da anterior nota de prensa do seu grupo. Así, Cacabelos xustificou o incremento no gasto da xestión (a memoria recolle que pasa de 62.507,34 € a 85.752,70 €), alegando o aumento de alumnado e unha maior oferta musical na escola. Pero Esquerda Unida apunta que o prego da adxudicación si contempla o aumento de 100 a 120 alumnos, pero establece as mesmas condicións que o ano anterior no resto dos aspectos, incluído o número de instrumentos ofertados, o que desbota os argumentos do Alcalde.

Cacabelos tamén defendeu o gasto en instrumentos argumentando que eran para a Banda de Música Municipal, unha razón que Esquerda Unida non comparte, xa que considera que os alumnos da Escola de Música non deberían financiar o material dunha banda á que poden non pertencer, pois é independente da propia escola. Así mesmo, naquel momento o Alcalde recoñecía que o servizo estaba sen adxudicar e que, debido a iso, as clases comezarían a mediados de Outubro. Outra cuestión que os esquerdistas non entenden, pois, segundo os pregos, as clases deberían comezar o mesmo día que o pasado curso, tendo a mesma duración. É máis, a licitación no 2022 iniciouse a finais de setembro, formalizándose a adxudicación o 24 de novembro.

Por último, Esquerda Unida pregunta o motivo polo que se abriu a matriculación coa nova tarifa antes de que o servizo estivera licitado e tamén expresa o seu descontento polo feito de que o anterior xestor fora o encargado de comunicar a información da matriculación aos estudantes cando xa rematara o seu contrato.

Esquerda Unida esixe transparencia no proceso e unha revisión exhaustiva dos datos presentados polo Goberno municipal para garantir que o incremento da tarifa na Escola de Música Municipal se realice de maneira adecuada e cumpra coa legalidade vixente.

EU demanda explicacións pola suba dos prezos da Escola de Música Municipal

 

Logo de ter acceso ao expediente, requiren explicacións ao considerar que existen aspectos dubidosos na xustificación dun aumento por clase que vai dende os 10 aos 25 euros. Piden que executen un incremento menor.

Entre outros aspectos, contémplase unha suba do 37% por parte  da empresa que xestiona o servizo sen que no informe se xustifique. Solicitan ademais que aclaren de que forma se presta o servizo logo de ter rematado o contrato da licitación.

Critican que a escola municipal non se atope no rexistro de Escolas de Música e Danza de Galicia, perdendo a oportunidade de acceder ás subvencións da Xunta de Galicia para o seu financiamento.

O Grove, a 1 de setembro de 2023.- A finais de xullo, a xunta de goberno local, en base a unha memoria solicitada pola concelleira de educación, aprobou unha nova tarifa para a Escola de Música, cun aumento que oscila entre os 10 e os 25 euros en función do tipo de clase, e establécese unha matrícula de 15 euros. Unha medida que suscitou críticas entre as usuarias e usuarios do servizo, o que levou a Esquerda Unida a solicitar a devandita memoria co propósito de esclarecer un incremento que o goberno alegou debido ao déficit que presentaba o servizo ante a falta de actualización nos 10 último anos. Pero para o grupo que encabeza José Antonio Otero no informe existen varios puntos que consideran dubidosos, polo que esixen aclaracións. 

Un dos puntos que chamou a atención dos esquerdistas é relativo ao incremento en máis dun 37% que, para este curso, contempla a empresa encargada da xestión do servizo, o que supón un gasto a maiores de 23.000€ en relación ao curso pasado. Un aumento que Esquerda Unida, á vista dos datos ofrecidos na memoria, considera “excesivo e inxustificable, pois non se especifica detalladamente a que atende”. Así mesmo, preguntan de que xeito se está prestando o servizo, pois “a adxudicación era por un curso escolar, sen posibilidade de prórroga, e este rematou o pasado mes de xuño, o que nos fai sospeitar que este servizo estea funcionando de forma irregular, ao igual que sucede co de Axuda no Fogar ou o de Limpeza de Edificios Públicos”, manifesta Otero. 

Por outro lado, dende Esquerda Unida manifestan que a memoria contempla nos apartado de gastos do curso 2022-23 un desembolso de 2.160,05€ pola compra de instrumentos, cando na adxudicación establecía que o xestor do servizo debía ofrecer estes materiais. Un punto que levanta interrogantes na formación de esquerdas, que tampouco entenden como se volve reflectir ese mesmo gasto na previsión do presente curso. 

Outro dos temas para o que piden aclaracións é relativo a un dos puntos da memoria que trata sobre as actuacións realizadas pola Escola de Música e os gastos de desprazamento que tivo que asumir o concello pois, segundo indica Otero “non se indica o número total de actuacións e cales correron a cargo da empresa adxudicataria en base á oferta da licitación e a táboa de gastos tampouco contempla estes conceptos”.

Dende Esquerda Unida esixen ao goberno unha maior transparencia neste asunto. Coa información da que dispoñen, consideran que non hai xustificación abonda para este aumento das tarifas, polo que agardan unha explicación por parte do executivo local. Aínda recoñecendo a necesidade de axustar as taxas despois dunha década sen cambios, critican a magnitude do aumento e entenden o enfado das usuarias e usuarios polo que tamén solicitan ao goberno que execute un incremento menor para este curso e vaia axustando a taxa de forma gradual nos vindeiros exercicios.

Por último, a formación de esquerdas critica que logo de 10 anos de funcionamento da Escola de Música, a día de hoxe esta non estea inscrita no Rexistro de Escolas de Música e Danza de Galicia, ocasionando que non se poida acceder ás axudas, de ata 9.000 € que cada ano ofrece a Xunta de Galicia para o seu financiamento. Xa perdida a deste ano, piden que se faga canto antes ese trámite de inscrición para poder acceder á vindeira convocatoria.

Esquerda Unida pregunta pola situación da Escola de Música no vindeiro curso

Escola de Música Jose Silva Torres. Foto: La Voz de Galicia

O Grupo Municipal de Esquerda Unida denuncia que o contrato de explotación do servizo expirou en novembro do pasado ano e a día de hoxe non se convocou un novo concurso.

José Antonio Otero recorda que o servizo xa funcionou o pasado curso de forma irregular e pregunta se vai seguir así nesta nova tempada escolar.

O Grove, 30 de agosto de 2019.- Os concelleiros do Grupo Municipal de EU, José Antonio Otero e Ana Cristina Domínguez veñen de solicitar por rexistro información sobre a situación na que se atopa a Escola de Musica municipal. E é que segundo os esquerdistas o contrato coa empresa que realizaba os servizos no pasado curso, finalizou en novembro de 2018 sen que o concello o sacase novamente a concurso.

José Antonio Otero recorda que no pleno de febreiro deste ano preguntou en que situación se atopaba a escola de música municipal e se funcionaba de forma ilegal e/ou irregular trala finalización do contrato en novembro do 2018, pois o servizo seguía funcionando coa mesma empresa. Segundo Otero, a concelleira responsable, por aquel entón Pili Galiñanes, dixo nese pleno que a Escola de Música municipal estaba funcionando de forma irregular, pero non ilegal. Indica o voceiro de Esquerda Unida que Galiñanes afirmou que os servizos municipais non foran quen de preparar a tempo os pregos para unha nova licitación polo que optaron por continuar o servizo ata finalizar o curso e que realizarían o novo concurso público para que o servizo estivese funcionando no comezo da nova tempada escolar. "Pero a día de hoxe non existe esa convocatoria nin os pregos de condicións para que calquera empresa interesada poida facerse co servizo" sentencia Otero. Por ese motivo, o Grupo Municipal de Esquerda Unida rexistrou unha serie de preguntas para coñecer se dende o concello “teñen intención de sacar a concurso o servizo ou se o van a adxudicar a dedo". Así mesmo queren saber en que momento comezarán as clases, "porque se deciden sacalo a concurso, que é como ten que ser, entendemos que non daría tempo a comezar a mediados de outubro, coma os outros anos" conclúe Otero.

Pleno febreiro 2019: https://www.youtube.com/watch?v=JUVhTnRpTvk

Pregunta EU, min. 1:45:46

Resposta concelleira, min. 2:42:08

Gabinete de Prensa

Esquerda Unida O Grove