EU advirte que o PXOM non contempla a sentenza gañada a Costas no 2017

Os esquerdistas indican que a pesar de que a sentenza foi firme, as vivendas dos núcleos costeiros dentro dos cen metros seguen fóra de ordenación ou afectadas por ordes de demolición.

Solicitan ao concello que protexa á veciñanza incluíndo as vivendas, en base á sentenza, dentro das normas urbanísticas antes de que o PXOM se someta a aprobación.

O Grove, 13 de xaneiro de 2020. Dende a agrupación local de Esquerda Unida aseguran que o plan urbanístico, que Cacabelos anunciou que sometería a aprobación provisional o vindeiro mes de febreiro, deixa na mesma situación de irregularidade ás vivendas situadas nos núcleos costeiros do Grove.

Os esquerdistas recordan que O Grove conta cunha sentenza favorable dende principios do ano 2017 na que se recoñecen os núcleos costeiros e salvagardan as vivendas que na liña dos 20 e os 100 metros se atopaban fóra de ordenación ou con ordes de demolición. Así mesmo, indican que uns meses despois o propio Cacabelos anunciou na prensa que a sentenza era firme polo TSXG logo de que Costas non presentase recurso en tempo e forma e que só quedaba plasmar esa situación no documento urbanístico. Pero, dende Esquerda Unida aseguran que no documento presentado a finais do 2018 e que se atopa actualmente na web municipal non hai nada referente a esta sentenza e polo que puideron pescudar, tampouco na documentación que o Alcalde pretende expoñer nestas semanas se contempla esta situación, polo que consideran que as vivendas seguirán fóra de ordenación ou con ordes de demolición. 

É por iso que Esquerda Unida solicitou unha xuntanza con Cacabelos para tratar estes asuntos e piden que a sentenza do TSXG contra Costas se reflicta no PXOM antes de que este se someta a aprobación provisional do pleno co fin de protexer os núcleos costeiros consolidados de Rons, Agriños-Gandariña, Virxe das Mareas, Moreiras, Reboredo, A Igrexa-Praia de A Barcala, Carreiro, Espiño-Bizocas-Carreiro, Sobre do Pozo, As Laxes e Insuíña.

Gabinete de Prensa

Esquerda Unida O Grove

Esquerda Unida solicita a documentación actualizada do PXOM

José Antonio Otero indica que o Alcalde comprometeuse en campaña a entregar a documentación corrixida do Plan Xeral á oposición e subila á web.

Dende Esquerda Unida recordan que o publicado na páxina do Concello e en diversos locais públicos non se corresponde coa planimetría real do PXOM.

O Grove, 20 de xuño de 2019.- Esquerda Unida afirma que o pasado 17 de maio, en plena campaña electoral, un medio comarcal publicou unha entrevista realizada ao candidato do PSOE e Alcalde do Grove, José Cacabelos, onde indicaba que neses días se estaban aplicando as correccións de mais de 150 erros detectados polos veciños e veciñas e aseguraba que ía mandar á oposición toda a documentación cos erros xa corrixidos e que nos días vindeiros –á realización da entrevista– se ía subir á web para que se puidese consular por toda a veciñanza.

O voceiro de Esquerda Unida, José Antonio Otero declara que “Non sabemos cantos días corresponden no calendario de Cacabelos a vindeiros, pero xa contando dende a publicación da entrevista (17 de maio) pasou un mes e nin a oposición temos a documentación, nin a veciñanza ten coñecemento de si as súas reclamacións foron atendidas ou non, pois o PXOM que segue colgado na web segue a ser o mesmo que contiña os erros”.

Esta é unha situación á que, segundo Otero, os ten habituado o Sr. Cacabelos, “pois no mandato que rematou foi constante o número de veces que anunciou datas para innumerables asuntos e logo non se cumpriran os tempos ou simplemente non se facían”. “E vendo este novo incumprimento, esta vez tralo anuncio en campaña electoral, entendemos que sufriremos esta situación outros catro anos máis”, subliña o voceiro esquerdista.

Para Esquerda Unida, xa non valen as escusas, pois “si non o tiña listo non debería ter anunciado datas, e si realmente está xa corrixido e listo para amosar, non sabemos a que agarda. Non nos vale a escusa das eleccións, pois salvo que siga de resaca electoral, o goberno non cambiou e non foi preciso unha adaptación como sería habitual si houbese un novo equipo ao mando”.

Por ese motivo, os esquerdistas solicitan que se lle entregue a nova planimetría cos erros xa corrixidos e se publique canto antes na web para que os veciños poidan comprobar que os cambios foron realmente realizados.

Gabinete de Prensa

Esquerda Unida O Grove

Ler entrevista do Diario de Arousa do 17 de maio de 2019.

EU esixe garantías sobre o PXOM e amosa a súa preocupación pola taxa anunciada para as edificacións fóra de ordenación

Pide que o goberno explique de onde xurde e como se calculará ese suposto cobro que o Concello quere aplicar aos que queden en situación de disconformidade co planeamento

Denuncia o deseño á carta das ordenanzas, que o goberno está adaptando ás peticións de arquitectos, aparelladores e, o máis preocupante, construtores 

Insta á veciñanza a introducir por Rexistro queixas e suxestións, pois trátase da única canle na que poden deixar constancia formal das mesmas

O Grove, 1 de decembro de 2018.- O grupo municipal de Esquerda Unida volve denunciar a tramitación chapuceira, dubidosa e sometida a constantes cambios que o goberno local está a realizar en relación co PXOM. A formación considera preocupante que, cando apenas pasou un mes desde que o Concello fixo pública a súa proposta planimétrica, xa hai constancia de numerosos erros relacionados coa aliñación de viais, camiños e rúas. Especial preocupación suscita a taxa anunciada polo alcalde para as edificacións que queden en situación de disconformidade co planeamento. Toda unha sopresa da que nada se tiña dito ata este momento, e sobre a que EU esixe información clara e detallada.

A pesar de que no último pleno foron numerosas as dúbidas e preguntas relacionadas co PXOM que Esquerda Unida puxo sobre a mesa, a sesión rematou sen que o alcalde aportase respostas claras ás mesmas. Unha actitude esquiva que EU contempla con preocupación e que, entende, dá mostra da inaceptable falta de concreción da que aínda adoece o Plan Xeral de Ordenación Municipal proposto polo goberno local. 

Esquerda Unida denuncia os constantes cambios de datas, retrasos e rectificacións, e lembra que a oposición leva meses agardando unha suposta xuntanza para falar das ordenanzas de acompañamento que unha e outra vez o alcalde adía e volve adiar. A formación amosa a súa precupación ante o feito de que esas ordenanzas estean a ser adaptadas ás recomendacións e suxestións de arquitectos, aparelladores e construtores, de xeito totalmente opaco e de costas á cidadanía e aos grupos da corporación.

“Non hai datas, non hai información clara de como se tramitan as dúbidas, as queixas, ou as alegacións da veciñanza”, lamenta o responsable local de EU, que considera que o e-mail ou as xuntanzas individuais no despacho do alcalde en absoluto son a canle adecuada para iso. José Antonio Otero lembra ademais a precaria situación da oficina municipal de urbanismo, e insta á veciñanza a introducir por Rexistro calquera aportación en relación co PXOM; pois trátase da única canle a través da que poden deixar constancia oficial, dada a chapuceira e improvisada tramitación que está a levar adiante o goberno local.

Esquerda Unida lembra que, a pesar da súa obriga legal de facelo e do compromiso explícito do alcalde ao respecto, a día de hoxe as alegacións continúan sen contestar. Algo que incide aínda máis na sensación de desinformación, improvisación e na absoluta falta de garantías en relación a este planeamento urbanístico.

A formación ten constancia de que xa se teñen evidenciado diversos erros en relación á nova proposta planimétrica, sobre a que ao parecer están a realizarse novas modificacións, por exemplo relacionadas co novo vial que está previsto abrir entre As Bouzas e Castelao. Cambios en relación aos cales EU reclama información; ao igual que no que se refire ás propostas de aparelladores, arquitectos e construtores a unhas ordenanzas que o goberno local está a deseñar de xeito opaco e de costas á oposición. 

Así as cousas, Esquerda Unida volve criticar a constante improvisación que ven da man desta pseudoexposición pública, e insta a goberno local a actuar con responsabilidade. Nese senso, reclama que a exposición pública do PXOM modificado se realice de xeito formal, e insta ao Concello a habilitar unha oficina técnica a disposición da veciñanza.

EU insta ao goberno local a contestar as alegacións e a abrir a segunda exposición pública do PXOM

A formación denuncia o baile de datas que o alcalde mantén desde hai xa máis dun ano

“Son os veciños os que teñen que dar o visto bo ao Plan Xeral, e iso só pode ser a través dun proceso no que se permitan as alegacións”, destaca José Antonio Otero

O responsable local dubida das novas estimacións temporais, e tilda de incongruente que o rexedor volva falar de publicar a planimetría cando esta segue sen ser definitiva

O Grove, 20 de setembro de 2018.- O grupo municipal de Esquerda Unida volve denunciar os reiterados anuncios incumpridos do goberno local socialista en relación ao Plan Xeral de Ordenación Municipal. A formación que lidera José Antonio Otero critica o baile de datas no que o alcalde leva inmerso prácticamente dende o inicio do mandato; e reclama que o PSOE cumpra coa legalidade e conteste as alegacións, pendentes de resposta desde o anterior mandato.

Esquerda Unida lamenta o enrocamento do goberno local en relación ao PXOM, e insta ao alcalde a actuar con responsabilidade e someter o documento a unha segunda exposición pública formal. 

A formación lamenta a fuxida cara adiante en que se atopa sumido o alcalde grovense en relación a este asunto. E ínstao a cumprir coa legalidade e co que el mesmo prometeu durante a rolda de xuntanzas coa veciñanza, e a dar resposta escrita ás 4.000 alegacións pendentes de resposta.

A última xuntanza mantida co goberno local para falar do PXOM deixou aos edís de Esquerda Unida cunha sensación de incredulidade e escepticismo. E é que, a estas alturas, as estimacións do alcalde xa soan case a burla. 

José Antonio Otero lembra que, desde xullo de 2017, o rexedor local mudou a suposta data en que o PXOM ía ser levado a pleno ata en catro ocasións. E denuncia a incongruencia que supón que éste volva falar agora de dar a coñecer a planimetría definitiva á veciñanza, cando as ordenanzas precisas para desenvolver o plan aínda están pendentes de elaboración e, segundo o propio alcalde recoñeceu ante a oposición nesa última xuntanza, abertas e negociacións. “O pasado 18 de xullo, cando nos entregaron a documentación, díxosenos que era a definitiva; que o PXOM xa estaba pechado; que en 10 días teriamos unha nova xuntanza para falar das ordenanzas; e que convocaría unha rolda de prensa e subiría a documentación á web e a exporía nos locais veciñais. Agora, 2 meses despois, di que está aberto a negociar as ordenanzas e volve anunciar que en 10 días a planimetría estará colgada nas redes”, explica o responsable local de EU, que lamenta a incongruencia.

En vista da sucesión de acontecementos, Esquerda Unida reclama “seriedade e responsabilidade ao alcalde e ao seu goberno en relación a este asunto, pois leva máis dun ano cun baile de datas que non sabemos se vai parar aquí ou continuará”.

“Non entendemos como se vai subir a documentación á web, tal e como nos anunciou, se esta non está pechada aínda”, indica José Antonio Otero, que insta ao alcalde a facilitar as achegas da veciñanza e a garantir a toma en consideración de todas e cada unha delas. “Seguiremos reclamando a segunda exposición pública, pois son os veciños os que teñen que dar o visto bo ao Plan Xeral, e iso só pode conseguirse a través dun proceso no que se permitan as alegacións, e non con simples escritos sen validez legal, como pretende o goberno”, conclúe o responsable local de EU. 

EU denuncia o baile de datas e os reiterados incumprimentos do goberno local en relación ao PXOM

A pesar do compromiso explícito do alcalde a ese respecto, as alegacións presentadas pola veciñanza continúan sen ser respostadas

A formación tilda a actitude do PSOE de burla á oposición e ao conxunto da cidadanía

O Grove, 23 de agosto de 2018.- O grupo municipal de Esquerda Unida denuncia os reiterados anuncios incumpridos do goberno local socialista en relación ao Plan Xeral de Ordenación Municipal. A formación que lidera José Antonio Otero critica o baile de datas no que o alcalde leva inmerso prácticamente dende o inicio do mandato; e lamenta unha actitude que, a estas alturas, pode considerarse xa como unha burla á oposición e ao conxunto da cidadanía grovense.

O pasado mes de xullo o alcalde convocaba aos grupos da oposición para facilitar a planimetría da que se supuña sería a proposta definitiva de PXOM para O Grove; e emprazaba aos grupos a unha nova xuntanza para falar das ordenanzas necesarias para desenvolver o plan urbanístico nun prazo aproximado de dez días. Foi no mesmo encontro no que o rexedor local anunciou a inmediata publicación dos planos para que a veciñanza puidese consultalos a través de internet, e puxo como horizonte temporal para a aprobación en pleno do documento o mes de setembro.

Sen publicación e coas alegacións por contestar

Con agosto a piques de rematar, Esquerda Unida lamenta que os anuncios comprometidos non teñan sido máis que novas palabras que leva o vento. E é que a realidade é que a día de hoxe a planimetría do PXOM modificada e volta a modificar continúa sendo unha incógnita para a poboación local. 

Así as cousas, para Otero a nova saída á palestra do alcalde non é senón unha “burla” ás e aos grovenses. E é que, tal e como lembra o responsable local de EU, as arredor de catromil alegacións que foron presentadas ao PXOM de 2014 aínda non foron contestadas; a pesar do compromiso verbal explicitado polo propio alcalde a ese respecto, e á obriga legal de facelo.

“O que está facendo e dicindo o rexedor é unha burla á oposición e aos veciños, con continuos anuncios incumpridos e mentiras”, indica Otero, que incide en que “é mentira que o novo PXOM vaia poder alegarse” debido á postura insistentemente reiterada do goberno local, que se opón a unha segunda exposición pública formal.

Nesa liña, EU lamenta o enrocamento do goberno do PSOE; obsesionado con conseguir a aprobación do documento antes das próximas eleccións municipais caia quen caia, e mesmo a costa de vetar o dereito da veciñanza a expresarse e alegar. O responsable da formación critica ademais os intentos do alcalde por botar balóns fóra ao atribuír o atraso e os prazos incumpridos á Lei do Solo de 2016. “Foi el quen se empeñou en poñer constantemente datas enriba da mesa”, indica Otero, que lembra que a oposición “non interferiu en nada” e en todo momento deixou traballar aos técnicos e ao goberno.

O grupo municipal esquerdista apunta ademais as negociacións que o goberno local mantén aínda con veciños da zona das Bouzas, e amosa o seu escepticismo respecto ao feito de que o PXOM vai ser finalmente levado a pleno no mes de outubro.

EU reclama deixar os intereses electoralistas á marxe do PXOM e esixe a segunda exposición pública do documento

A pesar de tela solicitado por rexistro, a formación aínda non puido acceder á documentación do plan urbanístico redeseñado polo goberno de Cacabelos

Cre que non é de recibo que o alcalde pretenda eludir a segunda exposición aprobada por unanimidade en pleno para un proxecto que recibiu 4.000 alegacións

O Grove, 24 de abril de 2018.- O grupo municipal de Esquerda Unida reclama valentía, seriedade e traballo conxunto para conseguir que O Grove conte, dunha vez por todas, cun Plan Xeral de Ordenación Municipal. Despois da xuntanza mantida hai uns días co alcalde, a formación á que representan Juan Lamelas e José Antonio Otero critica o proceder do rexedor; que nos case tres anos que o Concello leva traballando na modificación do planeamento mantivo á marxe aos grupos da oposición; que a estas alturas continúan sen coñecer o contido do PXOM.

“Os grupos da oposición atopámonos nunha situación de total desinformación no que respecta ao PXOM”. E é que as xuntanzas mantidas co goberno local en todo este tempo foron “escasas, carentes de contido e, no mellor dos casos, con información obsoleta”. Así o explica o grupo esquerdista, convencido de que o xeito de actuar do goberno de Cacabelos nun asunto de tal relevancia para o conxunto dos e das grovenses non é de recibo.

“Nunca un alcalde e un goberno municipal tiveron tanta manga ancha para traballar no PXOM”; asegura Esquerda Unida. Que lamenta que, a pesar da “total liberdade” que a oposición lle concedeu ao goberno local, “cando solicitamos por rexistro a información sobre o plan foinos negada”.

“Neste momento poderiamos estar todos remando no mesmo sentido” e colaborando para dotar ao municipio do tan necesario plan urbanístico. Pola contra, o alcalde pretende levar a pleno un documento que a oposición descoñece por completo, pois non tivo acceso á planimetría nin se lle deu a oportunidade de colaborar activamente ou de facer achegas. “Vémonos nunha situación de total desinformación, sen poder ofrecer nada aos veciños”, indican os edís de EU; convencidos de que a aprobación definitiva do documento non pode chegar sen a pertinente segunda exposición pública (que o pleno xa aprobou por unanimidade e que, agora, o alcalde pretende eludir).

Un PXOM novo

“Aínda que este PXOM é a continuación do aprobado inicialmente polo goberno de Miguel Ángel Pérez, polo pouco que coñecemos parece tratarse dun plan totalmente distinto. Polo que, de manterse as pretensións de Cacabelos, atopariámonos ante un PXOM sen exposición pública nin período de alegacións veciñais. Esa é a participación do PSOE”, indica EU. Que, ademais, destaca que en todo este tempo non se puxo a funcionar a Comisión de Urbanismo; “motivo polo cal descoñecemos se o traballo realizado foi, efectivamente, no sentido das alegacións presentadas polos veciños”.

Todo elo, unido “á alta contestación popular que tivo este planeamento e ao elevado número de alegacións presentadas”, fai que a segunda exposición pública formal sexa, ao entender dos esquerdistas, elemento indispensable.

“Desde EU observamos unha nova fuxida cara adiante do goberno de Cacabelos. Vemos dúas vías posibles: ou que o PSOE busque un parvo útil que lle asine un cheque en branco co que poder levar adiante o seu plan sen a aprobación popular; ou ben que pretenda culpar á oposición do fracaso, no caso de non ser capaces de sacar adiante o documento”. “Todos os partidos políticos queremos un PXOM para o noso Concello. Pero a única forma de facelo posible pasa pola aprobación popular; que unicamente pode darse con totais garantías cunha nova exposición pública que nos permita coñecer a opinión do pobo a través das correspondentes alegacións. O resto son estratexias electoralistas que nada teñen que ver con defender os intereses xerais do pobo”, remachan os edís de EU.

 

Área de Comunicación

Esquerda Unida O Grove

Esquerda Unida presenta ao goberno un plan de actuacións prioritarias para o concello

O Grove, 3 de maio de 2017.- A agrupación local de Esquerda Unida decidiu presentar ao Alcalde, e ao seu equipo de goberno, un plan de actuacións a realizar no tempo que resta de mandato. Unhas actuacións que os esquerdistas consideran precisas e prioritarias para os veciños do Grove.

Esquerda Unida decidiu dar este paso ante a situación actual do goberno municipal do cal consideran que está a deriva, máxime tras ver como realiza propostas de inversións inconexas e sen planificación de ningún tipo. Os esquerdistas poñen como exemplo a proposta de Auditorio que, segundo indican, se irá aos 5 millóns de euros de inversión municipal, ou a peonalización de rúas do casco urbanos sen plans de tráfico e alternativas de estacionamento. Todo isto namentres traballan con un orzamento prorrogado cando xa van alá cinco meses, conclúen.

Segundo a agrupación de esquerdas, o goberno municipal móstrase absorbido polo día a día, e a impresión que transmite é que gobernan a salto de mata.

Por ese motivo, desde Esquerda Unida, e logo de reunir á súa asemblea, propoñen un plan de actuacións no que se inclúen demandas históricas da veciñanza así como medidas que consideran necesarias para o bo funcionamento municipal e a mellora dos servizos públicos que se ofrecen aos veciños.

Executiva Local de Esquerda Unida

O Grove

Rogos e Preguntas do pleno do mes de xullo

Na sesión plenaria deste mes, saíron aprobadas todas as propostas da orde do día. Máis a moción que presentou o Grupo Municipal de Esquerda Unida solicitando da Xunta de Galicia a retirada do proxecto de Decreto para a ordenación de apartamentos turísticos, vivendas turísticas e vivendas de uso turístico na Comunidade autónoma de Galicia, foi REXEITADA, pois tan só contou con 4 apoios (2 de EU e 2 do BNG). O PSOE e PGD (9) abstivéronse e o PP (4) opúxose, co que o Alcalde tivo que facer uso do voto de calidade, que sorprendentemente, e ao contrario do que o seu partido fixo no Parlamento galego (onde foron precisamente os socialistas os que levaron unha iniciativa para solicitar o mesmo), votou en contra.

Nos Rogos e preguntas, os concelleiros de Esquerda Unida solicitaron que o Goberno realizase un mantemento continuo do Parque Canino da Toxa, pois mostra un estado de abandono totqal, no que a maleza invade boa parte do espazo. Pediron tamén que se instalase o cartel indicador e o das normas de uso, asunto que non foi atendido a pesar de que a concelleira o prometera no pleno de maio tras un rogo realizado tamén por Esquerda Unida. Así mesmo, instaron ao goberno a realizar a limpeza de maleza nos diferentes solares municipais e espazos públicos –en moitas zonas a maleza está invadindo os beirais e zonas de transito de peóns– xa que se está mostrando unha imaxe lamentable aos turistas que nos visitan estes días.

Os esquedistas solicitaron que se actúase nunha praga de cucarachas, que segundo indicacións dos veciños, prolifera na rúa Castelao, a altura das oficinas de Correos. Que se adecuara o estanque de Beiramar, a altura da cafetería Acuarela, foi outra das peticións realizadas. Os edís esquerdistas preguntaron polo paradoiro da escultura "Baticaso", do galego Ignacio Fernández, que no seu día fora retirada da rúa Pratería.

Outra das peticións que realizaron os edís foi no paseo de Lordelo a Rons, pois no inicio do mesmo –pola parte do Corgo– existe unha árbore que invade todo o ancho do paseo e obriga aos viandantes e ciclo-turistas a agocharse ou no peor dos casos ter que baixar á estrada para continuar o seu camiño, polo que pediron que se actuase para solucionar o problema.

Dende o Grupo Municipal de Esquerda Unida tamén se solicitou que se dotase de seguridade ou de carteis de advertencia o coñecido como Camiño da Serpe –entre a praia da Lavaxeira e Moreiras–. Este camiño, que dende que se instalou a ponte no Esteiro, é moi transitado e conta no seu trazado con zonas escorregadizas e pasos estreitos e perigosos, o que xa provocou o primeiro incidente logo de que un rapaz se precipitase ás rochas a semana pasada cando circulaba na súa bicicleta.

En canto a turismo, os esquerdistas criticaron a falta dun avance da programación da Festa do Marisco en pleno mes de xullo e preguntaron si se estaba a promover o evento gastronómico entre os nosos visitantes. A razón polo que cada ano se modifica a situación das praias caninas foi outra das cuestións que levaron a consulta, xa que está a crear certo descontrol entre os usuarios, máxime cando na web turística do concello non se pode coñecer a súa situación actual ao non funciona o enlace. Precisamente neste asunto, o da web turística, é onde incidiron máis os concelleiros de Esquerda Unida que, a pesar de que se está a crear unha nova web, criticaron a falta de actualización da mesma, pois se segue anunciando que o Grove conta con 6 praias con bandeiras azuis, cando o goberno local renunciou a elas e non existen os distintivos nos areais, o que pode provocar denuncias por publicidade enganosa.

Por último, os esquerdistas preguntaron pola situación na que se atopa o Plan Xeral de Ordenación Municipal (PXOM), pois non volveron ter noticias do mesmo dende a reunión á que foron convocados hai máis de tres meses.

[ver/descargar Rogos e Preguntas no seu contexto orixinal]
[ver/descargar moción retirada decreto vivendas uso turístico]

Esquerda Unida rexistra os rogos e preguntas que non puideron elevar ao pleno

Os edís esquerdistas, que non puideron realizar as peticións no pleno ao rematar antes de tratarse o punto de Rogos e Preguntas, piden por rexistro que se arranxe a fonte natural do barrio de Estonllo, que se atopa nunha situación de total abandono.

A falta de resposta por parte do goberno ás peticións realizadas, a promesa incumprida ao non activar o servizo nocturno da policía local no mes de maio, a situación da liorta coa ADEAC polas Bandeiras Azuis e o estado no que se atopa o Plan Xeral foron outras das cuestións que os esquerdistas realizaron por rexistro.

O Grove, 6 de xuño de 2016.- Logo de que o pleno do pasado mes de maio rematase, chegadas as 00 horas, sen tratarse o derradeiro punto da orde do día correspondente aos Rogos e Preguntas, os edís do Grupo Municipal de Esquerda Unida, Juan Lamelas e Jose A. Otero trasladaron as súas peticións a través do Rexistro municipal o pasado 1 de xuño co propósito de obter resposta as súas demandas.

Así, Esquerda Unida pediu que o goberno municipal realice un arranxo e adecentamento da fonte do barrio de Estonllo. Esta fonte, utilizada por veciños, viandantes e ciclistas entre outros, leva unha longa tempada sen botar auga debido a unha filtración e o seu entorno atópase nunha situación de total abandono onde o cartel indicador é ilexible e a maleza invade o acceso e zona de descanso. Por ese motivo, os edís esquerdistas solicitaron que se actúe nesta zona e se poña en valor esta fonte natural.

Esta non foi a única petición, pois o grupo municipal preguntou si o goberno municipal seguirá sen atender as peticións que realizan por rexistro. Segundo indican os edís esquerdistas, a día de hoxe seguen a espera de que o executivo lles responda á petición dunha reunión para tratar o tema das peanolizacións –solicitude realizada o pasado 4 de maio– así como á solicitude dos proxectos de obra en Terra de Porto, Beiramar e o Edificio de Lordelo, aínda que esta, logo de ser solicitada o pasado 19 de maio xa lles foi remitida o pasado xoves.

Tamén preguntaron sobre a promesa incumprida do Alcalde en relación á posta en marcha do servizo nocturno da Policía Local. Cacabelos anunciou, e a concelleira de Turismo confirmou en varias reunións co sector turístico, que durante o mes de maio O Grove ía contar con patrulla nocturna de Policía Local. Lamelas e Otero indican que no pasado mes non se viu ningún día á Policía Local durante as noites e por ese motivo queren coñecer os motivos polos que non se puxo a funcionar o servizo e si este estará activo, cando menos, durante os meses de verán.

Os edís esquerdistas tamén se interesaron pola situación na que se atopa a liorta coa ADEAC polo tema das Bandeiras Azuis e cal foi o motivo polo que o goberno non convocou aos voceiros dos grupos municipais ou ao Concello Local de Turismo para tratar o tema.

Por último, Juan Lamelas e Jose A. Otero queren saber en que fase se atopa o Plan Xeral de Ordenación Municipal, pois a última información sobre o documento foi a recibida nunha xuntanza realizada hai máis de dous meses.

Grupo Municipal de Esquerda Unida

Extracto das actas das xuntanzas da concellería de Turismo co Sector turístico onde a concelleira indica que a partir do mes de maio se poría en marcha o servizo nocturno da policía local.

 Outras imaxes do estado no que se atopa a fonte de Estonllo: