EU critica a falta de investimento para O Grove nos orzamentos da Xunta de Galicia

 

Alegan que o Grove foi excluído de investimentos importantes. Segundo Esquerda Unida, a Xunta de Galicia non contemplou partidas orzamentarias para áreas clave como o Colexio de Rosalía de Castro, a Rúa Luís A. Mestre, a tubaxe da subministración  de auga potable, o dique de abrigo do porto de Porto Meloxo, o Centro de Saúde ou a Escola Infantil de Rons.

Instan ao goberno municipal a reclamar estas melloras e ao PP do Grove a demandar investimentos para O Grove. Preguntan aos populares pola promesa electoral sobre a construción dun pavillón no instituto Monte da Vila, xa que tampouco se contempla nos orzamentos autonómicos.

O Grove, 26 de outubro de 2023.- Esquerda Unida, a través do seu voceiro José Antonio Otero González, criticou duramente os orzamentos da Xunta de Galicia para o 2024. Segundo a formación, a Xunta “ningunea” ao Grove un ano máis, deixándoo fóra de calquera investimento importante.

A formación política sinalou que non se contempla ningunha partida orzamentaria para varias demandas históricas e necesidades do concello. Entre elas destacan:

O Colexio de Rosalía de Castro: O centro de ensino precisa dunha reforma ante a falta de espazos para o desenvolvemento adecuado da súa actividade. Segundo Esquerda Unida, a Xunta comprometeuse en febreiro do 2023 para a redacción dun proxecto que dotaría ao centro de novas aulas, un pavillón, comedor escolar e local para a ANPA, utilizando para iso, o propio centro e o vello edificio de vivenda dos mestres.

Rúa Luis A. Mestre: Unha das arterias principais do Grove que precisa dunha actuación urxente. Tal e como indican os esquerdistas “a rúa atópase nun estado deplorable e de abandono dende hai anos, con numerosas fochas e gretas que a converten en perigosa para o tránsito de vehículos”.

Tubaxe da subministración de auga potable ao Grove: A tubaxe está soterrada baixo o mar no seu tramo da Lanzada, á entrada do Concello do Grove. O desgaste e deterioro da mesma está a provocar numerosas roturas que pon en perigo a subministración de auga á veciñanza, sobre todo na época estival, cando a poboación se triplica e o gasto de auga aumenta. Para Esquerda Unida, “a substitución da tubaxe e o cambio de trazado da mesma, levándoa por terra, é de vital importancia, xa que calquera reparación na mesma está supeditada ao estado das mareas, evitando unha rápida intervención e poñendo en perigo oa subministración  á veciñanza”.

Dique de abrigo do porto de Porto Meloxo: Unha demanda do sector bateeiro da zona dende hai numerosos anos. Conta cun proxecto de execución bloqueado por diferenzas coa Confraría de Pescadores e que a Xunta non dá resolto.

Centro de Saúde: Para Esquerda Unida, a construción dun novo centro de saúde parece que vai para longo, debido á falta de terreos sen ter aprobado o PXOM, polo que entenden precisa unha actuación no actual centro, xa que conta con numerosas carencias.

Escola Infantil de Rons: A demanda de prazas neste centro educativo de 0 a 3 anos é patente nos últimos anos e, para a formación de esquerdas, a solución pasa por unha ampliación da mesma. Certo é, tal e como indican dende Esquerda Unida, que esta obra estaría supeditada á desafectación dos terreos de Rons e que “depende do goberno local que se desbloquee o expediente para que pasen a mans municipais”.

Así, José Antonio Otero considera que, un ano máis, a Xunta segue obviando as necesidades do Grove e da súa veciñanza. Por iso, insta ao goberno municipal a facer forza para reclamar estas melloras. Do mesmo modo, Otero pide ao Partido Popular do Grove que arrime o ombreiro e reclamen aos seus que o Orzamento da Xunta sexa xusto co Grove.

Finalmente, o voceiro de Esquerda Unida pregunta aos populares do Grove sobre a promesa electoral da construción dun pavillón no instituto Monte da Vila, “xa que tampouco se contempla nos orzamentos autonómicos”. Lembra que o Sr. Leiva, candidato naquel entón, afirmaba que contaba co visto e prace da Xunta, polo que Otero quere pensar que “ese compromiso era coa veciñanza do Grove e non co Partido Popular local, pois demostraría unha vez máis que o PP utiliza as administracións de forma partidista e só atende as demandas dos concellos onde gobernan”.

A ampliación da Escola Infantil de Rons non será posible pola desidia de Cacabelos

Costas non permitirá ningunha obra de ampliación nos seus dominios e a única opción pasa por finalizar a desafectación dos terreos onde se atopa a Galiña Azul. O expediente, iniciado no 2012, está paralizado dende o 2015 por incidencias cun particular e unha empresa privada.

Esquerda Unida acusa ao Alcalde de irresponsable por non facer nada dende entón para desbloquear o expediente. Entenden que a posible ampliación da Escola Infantil irá para longo.

O Grove, 16 de xaneiro de 2023.- A mediados de decembro, o voceiro de Esquerda Unida, José Antonio Otero, mantivo unha xuntanza co servizo provincial de Costas co propósito de coñecer a situación na que se atopaba a desafectación dos terreos de Rons e se o órgano dependente do Ministerio de Transición Ecolóxica poría algún impedimento a unha posible obra de ampliación da Escola Infantil, para así poder instar á Xunta de Galicia a iniciar os trámites e dar solución á falta de prazas na Galiña Azul grovense.

A ampliación da Escola Infantil de Rons non será posible a curto prazo. Así se  desprende da xuntanza que Esquerda Unida mantivo en Pontevedra pois, segundo lles indicaron, Costas non permitirá ningunha obra dese calado dentro do seu dominio e a única vía pasa por finalizar os trámites de desafectación dos terreos iniciados no 2012.

Unha cuestión que dende a formación esquerdista non prevén que sexa a curto prazo xa que “Costas declarou no 2015 innecesarios os 5.548 m2 que se solicitaron desafectar, paso imprescindible para que os terreos pasen a titularidade municipal, pero é Patrimonio do Estado quen ten paralizado o expediente dende esa época namentres non se solucionen tres incidencias; un terreo apropiado por un particular, outro ocupado por un transformador de Fenosa e que a zona ocupada polo parque infantil non está catastrada” indica José Antonio Otero.

O voceiro esquerdista entende que é normal que o estado teña paralizado o expediente por estes motivos pois “non pode derivar un patrimonio público a propiedades privadas” e acusa ao Alcalde de irresponsable ante unha situación na que tivo tempo suficiente para procurar unha solución. “Non entendemos que a día de hoxe, máis de 7 anos despois de que Costas declarase innecesarios os terreos e se alertase das incidencias, o Alcalde non dera os pasos necesarios para solucionalos”, manifesta Otero.

Dende Esquerda Unida son coñecedores de que o Alcalde, “ante a continua presión das diferentes familias grovenses que quedaron sen praza na Galiña Azul, está agora tratando de dar solución a esta situación e que xa se dirixiu tamén ao servizo provincial de Costas pero entendemos que chega tarde e que desbloquear o expediente será un proceso longo”, indica Otero, quen lle pide a Cacabelos que “non engane á veciñanza dicindo que no vindeiro curso escolar non admite outra solución á falta de prazas que a ampliación da Escola Infantil de Rons, pois sabe de sobra que iso non é posible pola súa desidia”.

 

MOCIÓN: EU insta á Xunta a reformar a Escola Infantil de Rons para dar cabida a máis familias

  

Esquerda Unida presenta ao pleno de xuño unha moción para solicitar ao Consorcio Galego de Servizos de Igualdade e Benestar que dea unha solución ás familias que quedan fora da Escola Infantil de Rons.

Os esquerdistas piden que se procure dar cabida ao maior número de cativos para o vindeiro curso escolar na Galiña Azul e que se traballe na ampliación do centro educativo de Rons co propósito de aumentar as aulas e lograr que a lista de agarda se vexa reducida de forma considerable.

Recordan que este ano a demanda de prazas aumentou na Escola Infantil de Rons logo de que o centro concertado das "monxas" pechase as súas portas. Hai unha trintena de familias en lista de agarda. Esquerda Unida indica que no Grove non existe alternativa, e fora do municipio as prazas ofertadas son insuficientes para dar cobertura á demanda existente.

Moción completa:

MOCIÓN PARA A AMPLIACIÓN DAS PRAZAS DA ESCOLA INFANTIL “A GALIÑA AZUL” EN RONS

EXPOSICIÓN DE MOTIVOS

Segundo os últimos datos publicados polo Instituto Galego de Estatística, a 28 de xaneiro de 2021, O Grove conta con 240 nenas e nenos con idades comprendidas entre os 0 e 3 anos. O Concello con Grove dispón dunha Escola Infantil pública “Galiña Azul”, dependente do Consorcio Galego de Servizos de Igualdade e Benestar da Xunta de Galicia, que oferta un total de 74 prazas (71 normais + 3 de emerxencia), o que supón unha cobertura dun 30,83%. 

Coa apertura da reserva de matrícula evidenciouse que as 71 prazas ofertadas (3 quedan en reserva para emerxencia) son insuficientes. Nese primeiro proceso foron un total de 103 reservas, das cales, ata 32 familias quedarán sen poder matricular ás súas fillas e fillos no centro educativo de Rons, coa conseguinte problemática.  

Nos anos anteriores, a existencia do centro concertado de "Nuestra Señora del Carmen", que tamén ofertaba prazas para esta franxa de idade, ocasionaba que a lista de agarda fose moito menor. O peche deste centro está a provocar que a oferta pública se reduza tan só á Galiña Azul.

Na franxa de idade de 0-1 anos son 4 os que quedaron en agarda, 12 na de 1-2 anos e 16 na de 2-3 anos. Un número importante de nenas e nenos do noso concello que terán que procurar unha alternativa. Isto sen ter en conta o número de familias que fóra do prazo establecido para a reserva de prazas, e sen saber do mesmo, solicitaron información no centro educativo, o que indica que a lista de agarda puido ser aínda maior. 

Moitas destas familias rematan por acollerse ao Bono Concilia; unha axuda económica directa ás familias para colaborar no pago dunha praza nunha escola infantil privada, no caso de que non acaden sitio na pública. Unha opción que automaticamente te elimina da lista de agarda e que non che garante a matriculación da cativa ou cativo.

A maiores da Galiña Azul, no Grove non existe alternativa educativa para a franxa de 0-3 anos, polo que as opcións se remontan aos concellos limítrofes, onde si existen alternativas, pero as prazas están a ser limitadas e moi cotizadas, o que provoca que a única opción que lles queda ás familias é a de ter que deixar aos seus fillos e fillas na casa (as que poden) ata a súa matriculación no 4º ciclo de Educación Infantil, que se imparte nos CEIPs, o que  reduce e incluso impide a conciliación familiar e desencadea que en moitos casos os pais ou, sobre todo, as nais teñan que renunciar a un posto de traballo.

Unha situación que, lonxe de ser puntual deste ano, é evidente que se repetirá cada curso educativo, polo que é preciso darlle solución. Dende Esquerda Unida entendemos que existen opcións, e unha pasa pola ampliación do edificio situado en Rons co propósito de dotalos de máis aulas que cubran as necesidades de matriculación das familias grovenses; a outra pasaría pola construción dun novo edificio que, ou fose complementario ao actual ou suplira a este.

Para unha ou outra opción precisase a implicación do Concello do Grove, pero sobre todo, da Xunta de Galicia e o Consorcio Galego de Servizos de Igualdade e Benestar.

Por todo o anteriormente exposto, é polo que o Grupo Municipal de Esquerda Unida somete á consideración do pleno a aprobación da seguinte

PROPOSTA DE ACORDO

Instar ao goberno municipal a:

1. Solicitar ao Consorcio Galego de Igualdade e Benestar que estude e procure todas as opcións que impliquen a matriculación do maior número de nenas e nenos, que se atopan en lista de agarda, para o curso 2021-22.
   
2. Solicitar á Xunta de Galicia e ó Consorcio Galego de Servizos de Igualdade e Benestar que, na maior brevidade posible, se inicien os trámites para proceder á ampliación do edificio que alberga a Escola Infantil da Galiña Azul en Rons, co propósito de dotala de máis aulas, ou no seu lugar, á construción dun novo edificio que sexa complementario ou substituto do actual.