Feminismo en Loita - Manifesto 8M

FEMINISMO EN LOITA

Cúmprense 110 anos da proposta de saír á rúa o 8 de marzo para conmemorar o día internacional da muller.

Despois de tanto tempo, o legado de feministas socialistas como Clara Zetkin lémbranos que o feminismo debe continuar en loita. Cada ano, as mulleres de todo o mundo saímos ás rúas o 8M para esixir unha alternativa a este sistema que pon en perigo as nosas vidas e o noso planeta. É moi importante que xa en 1910 as nosas compañeiras entenderon que só estando xuntas e loitando por resolver os problemas das mulleres do mundo podemos conseguir transformalo. Cada 8 de marzo seguimos fortes e xuntas enchendo as rúas, reflexo dese feminismo en loita constante que vai facéndonos avanzar como sociedade, soñando revolucións e construíndo resistencias.

Desde Chile ata a India, desde Palestina a Filipinas, as mulleres loitamos por un mundo sen violencias machistas, contra a división sexual do traballo e a mercantilización dos nosos corpos, polos dereitos reprodutivos e a liberdade das orientacións sexuais e identidades de xénero. O feminismo igual que o internacionalismo, cuxa pedra angular é a solidariedade, o respecto e a xustiza social, só pode valer se é para todas e en todas partes. Esa potencia subversiva fainos estar no punto de mira de quen se beneficia da nosa explotación, que están organizados nunha ofensiva patriarcal que tamén está a ser global.

O auxe do autoritarismo e a extrema dereita mostra o ataque dos poderes económicos aos nosos dereitos, mentres baleira de contido as democracias, que xa non se esforzan en manter un verniz de servizos públicos e sociais para convencernos do progreso.

Convértenos en obxectos cos que se comercia neste mercado global xerador de grandes beneficios baseados nunha salvaxe explotación das persoas. Desde Esquerda Unida dicimos BASTA á mercantilización dos nosos corpos e das nosas vidas.

As mulleres non imos permitir que este mundo se precarice a costa das máis vulnerables, nin que o odio, o racismo, o machismo, a xenofobia e a LGTBIfobia sexan a resposta de quen está dirixindo o planeta cara á guerra, a desigualdade e o colapso. Defendemos o acceso aos recursos necesarios para cubrir as nosas necesidades en condicións de igualdade e de sustentabilidade ambiental. Vidas dignas para todas as persoas en todas as partes do mundo!

En Esquerda Unida sabemos que non se pode transformar o mundo se non poñemos no centro das loitas a quen está no centro da explotación capitalista, patriarcal e imperialista. A centralidade do mundo só pode cambiarse desde ese “todas xuntas” e desde o entendemento de que os nosos retos como feministas son os mesmos que temos como sociedade. Por iso desde EU defendemos un feminismo antimilitarista, pola paz e a dignidade dos pobos e entendemos que debemos loitar coas compañeiras e compañeiros que loitan pola vivenda, as pensións, as políticas sociais, os servizos públicos, o dereito á terra e a auga, os dereitos de quen migran e polo traballo digno.

Este sistema económico necesita uns traballos de coidados aos que afoga, invisibiliza e fai recaer en nós. En Esquerda Unida reivindicamos a universalización dos traballos de coidados desde a corresponsabilidade cos homes e o Estado e desde a interdependencia e a ecodependencia.

Desde Esquerda Unida témolo claro, o feminismo a demais da loita das mulleres, é un prisma que amplifica as nosas loitas, interpelando directamente ás realidades materiais de quen máis sofren e creando alianzas e estratexias para cambiar as desigualdades que vivimos día a día a clase traballadora.

Este 8 de marzo volvemos saír ás rúas porque todas esas loitas son as nosas e o inimigo é o mesmo que hai 110 anos, cando en Copenhague un grupo de mulleres revolucionarias decidiron que debían saír todas xuntas a cambiar o mundo.

Porque o mundo é noso e imos mudalo.

FEMINISMO EN LOITA

Esquerda Unida mostra a súa preocupación pola falta de compromiso do goberno municipal coa problemática da violencia machista

Os esquerdistas critican que non se reunira aínda o Consello Local de Igualdade e que no noso concello non se convocase ningunha concentración de rexeite ao asasinato machista de Vilalba (Lugo).

Tamén se mostras críticos ante o anuncio da posta en marcha dun punto morado con persoal cualificado durante as festas do Carme cando “a realidade é que se reduciu a unha mesa informativa con monitores que non recibiron ningún tipo de formación en igualdade”.

O Grove, 27 de xullo de 2019.- Os acontecementos do último mes en relación a violencia machista deixa con seria preocupación ao colectivo local de Esquerda Unida, que critica que dende a conformación do “goberno continuísta do PSOE aínda non se teña convocado ningún consello Local da Igualdade, máxime cando houbo dúas convocatorias estatais de concentracións de rexeite ante actos de violencia machista e a organización dun punto morado durante as Festas do Carme”.

Os esquerdistas indican que “o pasado 8 de xullo convocouse unha concentración en todos os concellos de España como mostra de apoio á vítima da Jauría (a manada de Manresa). Namentres a maioría dos concellos a realizaban ás oito ou nove da tarde, no Grove convocábase para as seis, avisando con menos de seis horas de antelación, unicamente a través das redes sociais e sen informar ás representantes do Consello Local da Igualdade, conseguindo que a afluencia de participantes fose a máis escasa ata o momento”.

“Esta semana, asistimos a un novo caso de asasinato machista, esta vez en Vilalba (Lugo), e tamén se realizaron convocatorias de concentración de rexeite na maioría dos pobos de Galiza, pero no Grove non se fixo nada, polo que nos parece preocupante” sentencian dende Esquerda Unida que tamén consideran que “cando menos no anterior mandato, existía un maior compromiso e contábase con todos os colectivos implicados no CLI”.

Esquerda Unida tamén tacha de “ineptitude e falta de respecto” a actitude do goberno no referente aos puntos morados, pois consideran que se “burlaron” do seu grupo municipal e das veciñas do Grove, ao anunciar un punto morado con persoal cualificado, a raíz da súa solicitude, cando logo “o que realmente puxeron foi unha simple mesa con monitores repartindo folletos e sen ningún tipo de coñecemento dos protocolos a seguir ante un caso de violencia machista”.

Namentres en concellos como Cambados, onde por segundo ano se instalará un punto morado durante a Festa do Albariño, é primordial realizar un curso de 4 horas sobre igualdade para participar como voluntaria no punto morado, Esquerda Unida indica que no Grove “enviouse a monitores do campamento de verán sen ningún tipo de preparación relacionada coa violencia machista e o peor de todo é que anunciaron, tanto dende o concello como da deputación, que o punto grovense contaría con persoal cualificado tal e como se establece”. “A realidade é que non houbo tal persoal” indican os esquerdistas que á vez preguntan “Que pasaría se se dese un caso de violencia machista durante as Festas do Carme e a persoa acudise a esta mesa pensando que podería ser atendida?”.

Esquerda Unida recorda que a propia subdelegada do goberno en Pontevedra, Maica Larriba, instaba o ano pasado a todos os concellos á instalación de puntos morados en todas as festas e eventos con afluencia e a propia Deputación de Pontevedra establece que estes puntos deben contar como mínimo con Técnicos/as de Igualdade amais de persoal con un mínimo de preparación.

Para a agrupación esquerdista “isto demostra que o goberno local, e a concellería de igualdade en concreto, actuaron a salto de mata, e instalaron unha mesa informativa dicindo que era un punto morado regulado para cumprir co expediente logo de que o noso grupo municipal instase á súa posta en marcha tal e como manda a moción aprobada en maio do 2018”.

Por ese motivo, o grupo esquerdista pide responsabilidade ao concello e á concellería de igualdade e que cumpran co seu traballo para loitar contra a lacra do machismo, que o fagan contando coas persoas que forman parte do Consello Local da Igualdade, do Centro de Información á Muller e cos grupos municipais, “pois só entre todas lograremos avanzar”.

Gabinete de Prensa

Esquerda Unida O Grove

EU critica o desleixo do Concello no que a seguridade se refire, e denuncia que continúe sen poñerse en marcha a patrulla nocturna

Foto: Todogrove.es

Lamenta que, a pesar do aprobado en pleno, a Festa do Carme non contase con ningún tipo de protocolo ou punto de control das violencias machistas

O Grove, 20 de xullo de 2018.- Un ano máis, O Grove continúa sen contar con patrulla policial nocturna. A pesar de que o déficit de axentes no corpo municipal é un problema que afecta a O Grove dende hai anos; e que o goberno local ten recoñecido en numerosas ocasións; o grupo municipal de Esquerda Unida lamenta o absoluto desleixo do executivo do PSOE a este respecto. Unha despreocupación que, en vista das repetidas reclamacións (tanto por parte dos grupos da oposición como da veciñanza) ben pode calificarse, cando queda xa menos dun ano para as vindeiras eleccións municipais, como unha absoluta deixadez de funcións do responsable municipal de Seguridade. Desleixo que tamén evidencia a falta de iniciativa no que a control das violencias machistas se refire. E é que, a pesar de que o pleno aprobou por unanimidade unha moción que, entre outras medidas, contemplaba a creación de espazos seguros e puntos de atención ás mulleres en celebracións multitudinarias, este non foi posto en marcha nas últimas Festas do Carme. Festexos que, por outra banda, careceron por completo do protocolo de seguridade que terían requirido debido á elevada concentración de persoas.

Un verán máis, O Grove vese na obriga de adaptarse ao déficit de seguridade con que o municipio ven convivindo dende hai anos. Nin as intensas vagas de roubos rexistradas en meses pasados nin as repetidas reclamacións de veciños e formacións políticas ao respecto teñen callado na Concellería de Seguridade que dirixe José Cacabelos. Quen, a pesar dos reiterados compromisos verbais que, un ano tras outro, vai poñendo sobre a mesa, continúa sen tomar cartas no asunto e sen poñer en marcha a contratación de novos axentes que permitan a O Grove contar cun corpo de Policía Local dimensionado de xeito acorde ás súas necesidades.

Se o insuficiente número de axentes da Policía Local resulta preocupante durante o inverno, os problemas acentúanse co incremento poboacional e co conseguinte aumento do tráfico e dos eventos e aglomeracións propios da época estival. Situación que se agrava aínda máis durante a noite, cando O Grove queda absolutamente desprotexido.

Nas últimas fins de semana a movida noctura xa rexistrou algúns altercados, que ben poderían previrse coa presenza disuasoria dunha patrulla policial. Ademais, hai escasos días a prensa facíase eco dun estudo que sitúa a O Grove entre os municipios galegos cun maior risco e frecuencia de roubos en domicilios. Situación que, por outra banda, evidencian por si mesmos os numerosos asaltos que a poboación local padeceu en veráns anteriores.

Máis aló do xeral, o responsable local de EU mira cara a outros municipios da contorna para lamentar que, mentres outros Concellos avanzan e van mellorando a seguridade das mulleres e o control específico das violencias machistas en festas, celebracións e outros eventos multitudinarios, unha vez máis o goberno local do Grove esquece por completo o aprobado en pleno. Nese senso, José Antonio Otero sinala o exemplo de Cambados, que na Festa do Albariño porá en marcha un Punto Morado para  atender ás posibles vítimas deste tipo de agresións.

Gabinete de Comunicación

Esquerda Unida O Grove

O Pleno aproba por unanimidade a moción de EU para lograr unha vila segura para as mulleres

O pleno da corporación apoiou, este xoves, de maneira unánime a moción do Grupo Municipal de Esquerda Unida encamiñada a lograr unha vila segura para as mulleres, segura para todas as persoas. 

Comunicado Prensa da proposta de moción

EU propón medidas para facer do Grove un espazo seguro para as mulleres e libre de violencias machistas 

Ve necesario elaborar un mapa de puntos negros que, por ubicación ou falta de iluminación, poden resultar especialmente ameazantes para as mulleres  soas

Aposta por crear espazos seguros nas festas; e por dar formación específica en materia de igualdade ao persoal de Emerxencias e da Policía Local 

O Grove, 3 de maio de 2018.- O grupo municipal de Esquerda Unida quere que o municipio do Grove no seu conxunto se converta nun espazo seguro e libre de violencias machistas. Por ese motivo, a formación á que representan Juan Lamelas e José Antonio Otero ten dado forma a unha moción a través da que EU instará á corporación a impulsar medidas, en colaboración co CIM e co Consello Local de Igualdade, que o fagan posible.  Sobre a mesa está a eliminación dos puntos negros que poidan ser considerados especialmente perigosos ou ameazantes para as mulleres que transitan soas; a formación específica en igualdade para que Policía Local e Servizo Municipal de Emerxencias dispoñan das ferramentas para actuar axeitadamente ante un episodio de violencia de xénero; e a creación de espazos seguros non mixtos nas festas e celebracións máis multitudinarias.

Nos últimos anos tense elaborado colectivamente un mapa de agresións sexuais en Galicia. Un traballo pensado para identificar e localizar de xeito claro as zonas que poden resultar máis perigosas para as mulleres; e que Esquerda Unida quere empregar como referente para dar forma a unha ferramenta similar no ámbito municipal.

“No Grove existen algúns puntos negros onde a falta de luz, as características da vía ou mesmo a configuración natural da zona provocan que as veciñas non transiten tranquilas, e que o resto da cidadanía evite pasar por elas a determinadas horas”. Así o explican os edís esquerdistas, que ven fundamental que o Concello vaia da man de colectivos culturais, xuvenís e deportivos; así como da comunidade educativa; para realizar este traballo. Ademais, EU reclama que o Concello habilite as partidas orzamentarias necesarias para atallar as problemáticas específicas que incrementen a sensación de inseguridade, como a mala iluminación. E tamén que se inste ás administración competentes a facer o propio nos entornos que sexan identificados como especialmente hostís, e que non sexan de titularidade municipal.

“Debemos construír unha vila accesible e sen barreiras, amable e priorizando os espazos para o encontro”. Así o explica EU, que cre que isto non pode ser posible sen “incorporar a perspectiva das mulleres”. Nese senso, a formación ve fundamental que nas festas locais e grandes espectáculos (“momentos que poden resultar especialmente conflitivos debido á elevada concentración de xente e ao consumo de alcol”) existan espazos seguros debidamente sinalizados, dotados de protocolos de atención especializados e de persoal debidamente formado que asista ás mulleres e rapazas novas que poidan atoparse nunha situación de vulnerabilidade.

EU destaca ademais o feito de que “para asegurar a integridade das mulleres e ofrecerlles unha atención axeitada en cada situación de violencia, debemos contar cunhas forzas de seguridade que teñan unha axeitada formación en igualdade”. Por ese motivo, reclaman a posta en marcha dun Plan de Formación en Igualdade para Policía Local e Servizo Municipal de Emerxencias. 

Área de Comunicación
Esquerda Unida O Grove 

[descargar moción]

MANIFESTO 8 DE MARZO

MANIFESTO 8 MARZO

Para transformar o mundo: FEMINISMO

Este ano 2018 comezou especialmente cruento para as mulleres. Os representantes do Estado quitáronse a careta política e mostraron, sen disimulo, o que opinan sobre a desigualdade que as mulleres soportamos. Quitarlle importancia á fenda salarial non é unha anécdota máis do poder, é a representación simbólica do que as mulleres significamos para o capitalismo. É a estratexia que o patriarcado segue para desprestixiar e, se pode, cernar todas as nosas reivindicacións.

O capitalismo e o fascismo están a gañar terreo en numerosas partes do mundo. A crise foi o pretexto para arrebatar os débiles dereitos que nos amparaban. O patriarcado, o seu máximo aliado, foi paralelamente gañando o espazo conquistado e, as mulleres, hoxe, estamos nunha situación realmente de perigo.

A fenda salarial, a precariedade laboral, a infrarrepresentación, a responsabilidade dos coidados, a falta de autonomía e de dereitos propios están a calar na sociedade sen que a consciencia colectiva se alerte do que está a ocorrer.

Ningún Goberno mantén unha posición firme contra a violencia cara ás mulleres. O discurso lacrimóxeno non debe enganarnos, necesitamos políticas reais e compromiso orzamentario contra a violencia cara ás mulleres, con decisións políticas tanxibles. Necesitamos orzamentos e pactos transversais que encaren a globalidade das discriminacións e desigualdades que neste momento sostén ao patriarcado, para erradicalas das nosas vidas.

Tampouco debemos conformarnos con alegacións oportunistas que nos confundan porque as mulleres non necesitamos paliativos. Necesitamos unha política feminista para transformar o mundo. Necesitamos a perspectiva de xénero en todas as decisións e desde todos os ámbitos. Queremos ser donas das nosas vidas no presente e no futuro. As mulleres demandamos gobernos comprometidos coa causa das mulleres para posuír os espazos e a riqueza, e compartila con todos os seres humanos en igualdade e xustiza.

Este ano o movemento feminista fai un chamamento á folga, que desde EU apoiamos porque hai que tomar partido sen fisuras ante o que xa está a ocorrer e en prevención do que pretenden.

Apoiamos a folga no traballo, nos fogares, nos coidados, no consumo, no ámbito estudantíl,… Temos que explicar que a discriminación laboral é moito máis que a discriminación directa; temos que trasladar o valor social que teñen os coidados; temos que visibilizar que no consumo únense as peores caras do capitalismo e patriarcado, para usarnos como obxectos e explotarnos descaradamente; temos que apostar pola educación como principal ferramenta para acabar co machismo.

Instamos a que a loita continúe sen tregua, porque como xa manifestamos no comunicado de apoio á folga feminista, SOBRAN AS RAZÓNS, porque temos que soportar: 

Unha persistente división sexual do traballo, que xera unha profunda desigualdade social e laboral, con síntomas tan visibles como unha fenda salarial do 29% en Galicia, sen esquecer o sostemento de maiores niveis de desemprego e precariedade. En todo o mundo, as mulleres gañan entre o 60 e o 75 por cento do salario dos homes en traballos de igual valor.

Perpetuación do papel das mulleres como sustentadoras da vida e dos coidados, soportando en moitos casos dobres xornadas pola falta de corresponsabilidade dos homes e do Estado.

Unha violencia sistemática e continuada contra as mulleres, con múltiples manifestacións, que sostén ao patriarcado amparado por un sistema político capitalista e neoliberal que pretende a regresión dos dereitos conquistados, e que nos golpea con: os asasinatos machistas, as agresións sexuais e as violacións, aluguer dos ventres/úteros de mulleres, a explotación sexual e a prostitución; a violencia patrimonial e a custodia compartida imposta,...

A invisibilización, a falta de representación en espazos sociais, políticos, culturais, e a asimetría na repartición do poder.

Unha práctica da interrupción voluntaria do embarazo que segue penalizada parcialmente e non está garantida para todas as mulleres no Estado español.

Desde EU apoiamos a Folga Feminista e as manifestacións que o movemento feminista convocou para este 8 de marzo; porque queremos PARAR O MUNDO, PARA PODER TRANSFORMALO, cambiando os seus modelos patriarcales por modelos de igualdade, xustiza, paridade, diversidade e democracia.

É por iso, que facemos un chamamento á participación activa nestas convocatorias, desde o convencemento de que só cunha transformación feminista da nosa sociedade poderemos facer realidade a reivindicación de QUE OUTRO MUNDO É POSIBLE.

Área de Muller de Esquerda Unida

25N - Fronte á violencia patriarcal: igualdade radical

25 de Novembro de 2017
Día Internacional contra a Violencia Machista 
  

Fronte á violencia patriarcal: igualdade radical  

A violencia machista é unha vulneración dos dereitos humanos das mulleres, que afecta á sociedade en todas as súas estruturas. O número de vítimas asasinadas en Galicia va construíndo un relato vergoñento: dende 2010 as cifras de feminicidio elévanse a 54. Mentres contamos mulleres asasinadas, comprobamos con asombro que algunhas institucións lanzan campañas que, lonxe de pular pola igualdade, reflicten e repiten conductas patriarcais nas que se impón a desigualdade. 

Ano tras ano lembramos que os datos falan por si mesmos e sitúan as declaracións institucionais e as leis aprobadas en constatacións do desinterese continuo por parte da administración en dotar de medios estes acordos para facer efectivo o seu cumprimento. 

A violencia machista perpetrada nos asasinatos de mulleres é a expresión violenta máis visible, pero existen múltiples violencias non tan evidentes que de seguro responden a unha insoportable cultura patriarcal. A educación en igualdade é un dos piares imprescindibles para traballar cara a erradicación desta lacra

Non podemos consentir que existan escravas traficadas para consumo sexual dos homes. A prostitución é unha forma lexitimadora da violencia machista onde se aluga o uso do corpo de mulleres e nenas, lexitimando con iso á consideración da muller como un ser inferior susceptible de ser usado e comprado. As agresións sexuais non só aumentan senón que, nalgúns casos, pasaron de ser actos criminais individuais a formas grupais cada vez máis presentes nas nosas festas e noutros acontecementos masivos. Exemplo disto é o que está a acontecer estes días co xuízo das presuntas violacións dos “sanfermins”, e a exposición mediática na que á vítima se presenta como responsable da agresión na que se cuestioana a súa conduta só por ser muller.

A notoria expansión que está adquirindo a demanda de aluguer dos ventres de mulleres, non só ten un significado ostentoso de diferenza de clase e xenófobo, senón tamén de que o patriarcado, cada vez con menos escrúpulos, pretende comerciar legalmente cos nosos corpos, valéndose da necesidade e amparándose na desigualdade.

Tentar lexislar a custodia compartida imposta sen acordo das partes e obviando a situación de vulnerabilidade e violencia á que poden estar sometidas as mulleres e os menores é unha irresponsabilidade.

A fenda salarial existente entre mulleres e homes en traballos de igual valor é a fórmula que o Estado opresor ten para manifestar que seguimos sendo cidadás de segunda clase, condicionando a nosa autonomía económica para manternos subordinadas. 

Precisamos políticas transversais, contundencia e decisión política para aumentar os recursos económicos e humanos destinados ao desenvolvemento de políticas de igualdade activas, integrais e participativas.

[descargar manifesto]

8 DE MARZO. POLÍTICAS PARA FACER QUE A IGUALDADE REAL ENTRE MULLERES E HOMES DEIXE DE SER UNHA UTOPÍA

As mulleres vivimos, con máis crueza, as consecuencias dun sistema inxusto, asentado ideolóxicamente na dominación do home sobre a muller. Baixo a retórica do políticamente correcto, se manteñen políticas que perpetúan  parámetros patriarcais e machistas. É por iso que as mulleres continuamos  infrarrepresentadas nos espazos de toma de decisións, e a nosa presenza ten máis que ver con estatísticas que coa participación igualitaria.

A violencia machista, os feminicidios e infanticidios van en aumento. A prostitución, a trata de mulleres e nenas con fins de explotación sexual, formas extremas de violencia de xénero, son un exemplo do sometemento e abusos que padecemos as mulleres, avalado por un sistema baseado na desigualdade.

A violencia institucional  exercida contra as mulleres, a través dos recortes orzamentarios, a diminución das xa escasas políticas de prevención, xunto coa imaxe discriminatoria e cosificada que se segue a ofrecer das mulleres, fortalecen a desigualdade e a violencia, que son elementos inseparables.

A extrema precariedade laboral á que estamos sometidas vese reflectida na fenda salarial entre mulleres e homes, que vai en aumento e que afecta de xeito máis grave ás mulleres de máis de 45 anos.

A desigualdade e, de xeito clave, a desigualdade de xénero, é un dos piares básicos que sosteñen o sistema capitalista. As normas segregadoras e sexistas, tanto a nivel estatal como autonómico, son exemplo desta desigualdade: a reforma laboral, a lei de educación, a lei de familia do goberno galego, os recortes en sanidade e na atención á dependencia, a precarización e  provisionalidade no emprego, a privatización do público, son medidas que producen un impacto de xénero que provoca o incremento da feminización da pobreza e intensifica os valores represores contra o empoderamento das mulleres.

Por todo isto, dende Esquerda Unida esiximos medidas efectivas e radicais en prol dunha igualdade real, como único camiño cara a esperanza dunha transformación social que garanta a igualdade efectiva entre todas as persoas.

O TRABALLO DIGNO PARA AS MULLERES É IGUALDADE!

Comunicado do Partido Comunista de Galicia ante o Día Mundial da Muller Traballadora.

Desde o PCG este 8 de marzo chamamos á mobilización porque entendemos que non pode haber paz social sen unha saída social da crise e non pode haber saída social da crise sen o recoñecemento dos dereitos das mulleres. Por iso é imprescindible o empoderamento e a incorporación das mulleres de forma activa para construír a alternativa anticapitalista e antipatriarcal que necesitamos.

Sen a incorporación das mulleres non será posible avanzar cara á ruptura democrática por un novo modelo de sociedade que se constrúa sobre os cimentos da igualdade, nun novo escenario de relacións de poder entre homes e mulleres.

Entendemos que un proceso revolucionario e de cambio non poderá darse sen contar co 51% do pobo. Por iso é fundamental a paridade nos espazos de decisión, porque sen as mulleres neste proceso e sen o feminismo non será.

Desde o PCG insistimos en que a paridade debe contemplarse como unha liña vermella intransferible para toda a esquerda transformadora en tanto que a súa ausencia non pode nin debe xustificarse tras unha orde de prioridades.

A emancipación e a liberdade das mulleres están en xogo cos gobernos do bipartidismo monárquico, antes o PSOE e agora o PP que obedecen ás políticas da Troika, rebaixándonos os salarios e as condicións de traballo coas sucesivas reformas laborais, ocasionando o incremento progresivo da desigualdade salarial entre mulleres e homes.

Hoxe as mulleres traballadoras vivimos situacións de extrema precariedade laboral. A maioría conformamos o último elo da cadea, sufrindo a sobreexplotación en condicións infrahumanas e cada vez máis desprotexidas dos abusos empresariais.

A taxa de ocupación das mulleres no estado español é do 50,3%, 9 puntos por baixo da dos homes. Co engadido de que o 25,3% das mulleres é a tempo parcial, mentres que o dos homes representa o 7,8% (Eurostat). É unha forma máis de discriminación indirecta.

A media do salario das mulleres, supón no sector privado o 19,3% menos que o salario dos homes e no sector público o 10,1% (Eurostat).

Simultaneamente a ocupación feminina corresponde ao 68% da poboación asalariada con ingresos inferiores ao Salario Mínimo Interprofesional.

Non é casual tampouco que os sectores de actividade con salarios máis baixos e con maior brecha salarial son xeralmente sectores feminizados.

No estado español aínda existen convenios colectivos que continúan discriminando ás mulleres, polo escaso control de complementos retributivos que axudan a aumentar a brecha salarial e porque aínda se admiten categorías en feminino.

Por todo iso, porque as mulleres queremos un traballo digno, imos responder o 8 de marzo nas rúas para esixir os nosos dereitos, porque queremos que a traballo de igual valor, igual remuneración. Porque queremos a repartición do traballo. Porque queremos máis emprego público de calidade, en sanidade, educación e dependencia. Porque queremos igualar os permisos de maternidade e paternidade. Porque queremos acabar coa economía mergullada. Porque a falta de traballo digno é un xugo que escraviza ás mulleres, que as fai máis vulnerables ante a violencia machista e, na súa forma máis extrema, a prostitución. Porque queremos ser libres e vivir en igualdade.

Por todo iso esiximos leis que garantan a creación de emprego garantido e digno para as mulleres.

O Consello Local da Igualdade adhírese á Moción de EU contra a reforma da Lei do Aborto

Reunido o Consello Local de Igualdade do Concello do Grove en sesión
extraordinaria o mércores 19 de Febreiro, adoptou o seguinte acordo:

Respaldar e adherirse á Moción que solicita A RETIRADA DO ANTEPROXECTO DE LEI DE PROTECCIÓN DOS DEREITOS DO CONCIBIDO E DA MULLER EMBARAZADA proposta polo PP , que foi presentada por Esquerda Unida e aprobada pola maioria da Corporación do Concello do Grove na Sesión Plenaria Ordinaria do pasado mes de xaneiro.

O Consello Local da Igualdade do Concello do Grove OPONSE FRONTALMENTE a este Anteproxecto  que supón unha grave ameaza á libertade das mulleres pois elimina o dereito das mulleres a decidir sobre o seu embarazo.

Entendemos que este retroceso social de décadas, NON VAI A DISMINUIR O
NÚMERO DE ABORTOS, QUE TAMPOUCO SE VIRON INCREMENTADOS COA LEI DO 2010, só vai provocar que as mulleres que carezan de recursos teñan que abortar máis tarde e por tanto con máis riscos e en peores condicións, polo que estamos diante dunha discriminación por razón de sexo e de condición social que rexeitamos enérxicamente.

Consideramos que a prevención dos embarazos non desexados, cunha boa
formación afectivo-sexual da poboación, especialmente entre os máis xóvenes xa dende a escola, é o mellor proxecto para disminuir o número de abortos.

25 N. Contra a violencia de xénero

A crise económica, provocada polo sistema capitalista, está xerando unha clase social cada vez máis empobrecida e sometida aos vaivéns dos mercados financeiros.

O ano 2011 está finalizando co aumento das desigualdades sociais. Estas diferencias económicas e desigualdades acentúanse moitísimo máis nas mulleres, xa que son estas as que están sufrindo directamente un duro golpe contra as conquistas aparentemente consolidadas.