Esquerda Unida denuncia a inacción do goberno cos fondos europeos

 

O grupo municipal Esquerda Unida advirte que, tras un ano dende a autorización para a execución dos 2.000.000 de euros do PSTD A Gastromeca, o Concello do Grove aínda non investiu nada debido á falta de contratación dunha consultora. Esta demora ameaza a execución do proxecto e podería obrigar ao Concello a devolver os fondos, xunto cos intereses, afectando negativamente á economía local.

Piden a convocatoria do Consello Local de Turismo para que o Alcalde explique os motivos do atraso na contratación da consultora e o impacto desta demora no PSTD. O grupo reafirma o seu compromiso coa transparencia e responsabilidade na xestión dos recursos públicos, vixiando a evolución deste tema para asegurar o uso eficaz dos fondos europeos.

O Grove, 14 de xuño de 2024 – O grupo municipal de Esquerda Unida denuncia que este mes cúmprese un ano dende que a Xunta de Galicia autorizou ao Concello do Grove a execución dos 2.000.000 de euros do plan de Recuperación, Transformación e Resilencia a través do Plan de Sustentabilidade Turística en Destino (PSTD) denominado A Gastromeca e que “lamentablemente, a día de hoxe, aínda non se investiu nin un só euro deses fondos europeos”

Dende Esquerda Unida indican que o Plan A Gastromeca, destinado a impulsar o turismo sostible e a dinamización económica do Grove, está estancado debido a que non se realizou a contratación da consultora encargada de desenvolver o proxecto. Esta parálise non só representa unha perda de tempo valioso, senón que tamén ameaza a execución completa das actuacións previstas antes do 31 de decembro de 2025, xa que, de non cumprirse os prazos, o Concello arríscase a ter que devolver os fondos á Unión Europea, “co correspondente pago de intereses, que sairán dos petos dos veciños e veciñas do Grove”.

Susana Millán, concelleira de Esquerda Unida, manifestou a súa preocupación, “temos un proxecto que inicialmente contemplaba a execución en dous anos e medio e que agora terá que desenvolverse en pouco máis dun ano, cos conseguintes problemas e riscos. Non podemos permitir que este financiamento crucial se perda pola incompetencia do goberno e a falta de planificación. É fundamental que se tomen medidas inmediatas para evitar que esta situación nos leve a un escenario que afectaría ás arcas municipais." 

Esquerda Unida insta ao goberno municipal a actuar con urxencia para desbloquear a situación e asegurar que os fondos Next Generation sexan empregados adecuadamente para o desenvolvemento do noso concello. “É imprescindible que se inicie o proceso de licitación da consultora canto antes, garantindo así a implementación efectiva da totalidade do Plan A Gastromeca e evitar repercusións económicas negativas para a veciñanza”, asevera Millán.

Dende Esquerda Unida piden ao Alcalde, quen á súa vez é o concelleiro responsable de Turismo, a convocatoria do Consello Local de Turismo para que dea conta dos motivos do retraso da contratación da consultora e como afectará a demora ao desenvolvemento do PSTD.

Deste modo, o grupo municipal volve mostrar o seu compromiso en defender os intereses dos veciños e veciñas do Grove, esixindo transparencia e responsabilidade na xestión dos recursos públicos e aseguran que seguirán vixiando atentamente a evolución deste tema e non dubidarán en tomar as accións necesarias para asegurar que os fondos europeos sexan utilizados de maneira eficaz e beneficiosa para a nosa localidade.

Esquerda Unida denuncia a inacción do goberno local en materia de turismo

A formación política reclama a convocatoria do Consello Local de Turismo, a definición das bases para as Centolas de Ouro, a publicación das bases para o cartel da Festa do Marisco 2024 e a constitución da mesa para o seguimento da aplicación do PSTD.

Esquerda Unida continúa agardando que o goberno local cumpra coas súas promesas e compromisos en materia de turismo, un sector estratéxico para o desenvolvemento económico e social do Grove. Así o manifestou a concelleira esquerdista, Susana Millán, nun comunicado de prensa.

O Grove, 20 de decembro de 2023.- Esquerda Unida expresou a súa preocupación pola falta de avances na área de turismo e as promesas incumpridas por parte do actual goberno local, encabezado por José Antonio Cacabelos que, ademais de Alcalde, é o concelleiro delegado da área de Turismo.

Segundo a concelleira de Esquerda Unida, Susana Millán, dende que o pasado mes de xullo Cacabelos tomara posesión de Alcalde e asumira as funcións da área de turismo, os membros do Consello Local continúan agardando a que se convoque a xuntanza de constitución do órgano sectorial, que debería ser o espazo de participación e consenso entre os axentes implicados no turismo. “Non entendemos por que o Alcalde non convoca o CLT, cando é unha ferramenta fundamental para planificar, coordinar e avaliar as políticas de turismo no Grove. Non se pode xestionar o turismo de costas á cidadanía, aos profesionais e ás entidades que traballan neste ámbito”, declarou Millán.

A esquerdista tamén criticou a falta de interese do goberno local por crear as bases para as Centolas de Ouro, o máximo distintivo que se outorga durante a Festa do Marisco. Segundo Millán, o Alcalde comprometeuse a reunir en novembro o CLT para redactar unhas bases que definiran os méritos para ser nominado ás Centolas de Ouro, pero a día de hoxe segue sen ser convocado. “É unha falta de respecto e de seriedade por parte do Alcalde, que non cumpre coa súa palabra nin coas súas obrigas. Levamos anos falando da necesidade de crear esas bases, e desta volta asegurou e perxurou que en novembro comezaríamos a súa redacción”, afirmou Millán.

A carencia de interese do goberno local na Festa do Marisco tamén foi resaltada por Millán, mencionando a ausencia, por primeira vez, do cartel anunciador da edición 2024 durante o evento deste ano e denunciando que a día de hoxe sigan sen publicarse as bases para o concurso dese cartel, que é crucial para a promoción da Festa, un dos eventos gastronómicos máis importantes da comunidade. “É unha mostra máis da falta de planificación e de promoción do turismo por parte do goberno local, que non é capaz de aproveitar o potencial da Festa do Marisco como un reclamo turístico de primeira orde”, concluíu Millán.

Outra das cuestións que preocupa a Esquerda Unidaé a falta de información sobre o Plan de Sustentabilidade Turística en Destino (PSTD), un proxecto financiado polo Ministerio de Industria, Comercio e Turismo a cargo dos fondos do Plan Recuperación da Unión Europea, no que O Grove conta cun orzamento de 2.000.000 euros para mellorar a competitividade e a sustentabilidade do destino turístico. Millán denunciou que o Alcalde non creou a mesa de seguimento da execución do plan, tal e como se comprometera con Esquerda Unida, polo que descoñecen se xa se contratou a consultora que se precisaba para traballar neles, e cales son as consecuencias de non ter executado a parte correspondente ao 2023. “Temos moitas dúbidas sobre este proxecto, que debería ser unha oportunidade para impulsar un modelo de turismo máis sostible, innovador e inclusivo, pero que tememos que se converta nun fracaso por culpa da mala xestión do goberno local”, advertiu Millán.

EU desconfía da capacidade do goberno local para desenvolver o Plan de Sustentabilidade Turística

Os esquerdistas consideran unha boa nova que O Grove se vexa beneficiada con 2 millóns de euros dos fondos Next Generation polo Plan de Sustentabilidade Turística en Destino (PSTD) “Gastromeca” pero dubidan de que o goberno socialista teña capacidade para levalo a cabo.

Critican a falta de interese polo turismo por parte do Alcalde e o seu executivo e lembran que levan case 8 anos sen cumprir coas promesas realizadas ao sector; a nova páxina web, o plan estratéxico, a contratación da figura de Técnico de Turismo,...

O Grove, 21 de decembro de 2022. - A pasada semana, a Conferencia Sectorial de Turismo aprobaba en pleno o Plan Territorial de Sustentabilidade Turística en Destino Enogastronómico impulsado pola Xunta de Galicia ao amparo dos fondos Next Generation. O Grove viuse beneficiado con 2.000.000 € para poñer en marcha o seu PSTD "Gastromeca". 

Dende Esquerda Unida reciben con boa acollida esta nova e agardan que supoña un avance importante en materia turística para O Grove, pero poñen en dúbida "a capacidade do goberno socialista para realizar un traballo que realmente mellore a imaxe turística do Grove e remate co abandono ao que someteu ao sector nos últimos anos". 

A representante da agrupación de esquerdas no Consello Local de Turismo, Susana Millán, considera que "o sector turístico leva case 8 anos esperando por promesas que xa podemos chamar históricas: nova web de turismo, plan estratéxico, dotar de persoal a un departamento cuxo organigrama está formado unicamente pola figura do alcalde,... ". Segundo indican, levan anos denunciado a falta de mantemento dos paseos, miradoiros, a perda paneis informativos en lugares de interese como o Monte Central ou a desaparición de parte da colección "As Xentes e o Mar". 

Para Millán, "a falta de interese polo turismo deste goberno non é algo que nós inventamos, eran os propios visitantes e veciños os que recoñecían este verán a falta de limpeza queixándose dos cheiros en moitas rúas do casco urbano. Tamén nas praias os usuarios e visitantes reclamaban a limpeza e mantemento dos accesos, postos de socorro e aseos". A esquerdista considera que o Paseo de Madeira de Pedras Negras é quizais o caso máis alarmante: "bancos desfeitos, madeiras rotas e soltas, ... o que fora noutro tempo visita obrigatoria para calquera que viñese ao Grove resulta ser un dos casos máis significativos do que lle importa a este goberno o turismo e a imaxe do nosa vila". . 

Esquerda Unida basea a súa desconfianza no goberno local e na figura do Alcalde "no que nos ten demostrado nos últimos case 4 anos de mandato con maioría absoluta. Do que non foi quen tan sequera de continuar o traballo que eles mesmos iniciaran en materia turística no seu anterior mandato. Un goberno que non traballou en ningunha das cousas que prometeu nos 4 anos anteriores, como o distintivo de excelencia no que dicían traballar e co que seguimos recibindo aos nosos visitantes na entrada do Grove". 

Susana Millán considera que non poden apostar por un plan "que tanto Esquerda Unida como o Consello Local de Turismo descoñecemos porque nunca se levou á mesa e nunca se nos permitiu participar ou aportar nada" e lembra que foron numerosas as ocasións nas que os membros do CLT e sobre todo de Esquerda Unida se manifestaron interesados en crear unha mesa de traballo" para impulsar accións que permitisen superar canto antes a crise que afectou ao sector turístico coa chegada da pandemia". 

Os esquerdistas indican que o único que coñecen do PSTD son as declaracións que realizou o Alcalde na prensa a pasada semana, "accións dedicadas á mellora de accesos ás praias, acondicionamento das zonas urbanas e potenciación da aldea Grobit. Accións que nada teñen que ver co turismo enogastronómico", remarca Susana Millán. Dende o punto de vista de Esquerda Unida, que agardan lle envíen o PSTD completo, "son labores de mantemento básico que calquera concello realiza e debería realizar periodicamente sen depender dos fondos Next Generation".