EU demanda a conversión da antiga Escola Infantil do Monte da Vila nunha Casa da Mocidade

  

Tras o anuncio do traslado do servizo de Vellos Tempos ás Monxas, piden converter o edificio nunha Casa da Mocidade, destinada ao ocio, formación e creatividade da xente nova. Destacan a necesidade de adaptar o espazo para actividades socio-culturais e formativas, involucrando á mocidade na transformación e asegurando que as súas necesidades sexan atendidas.

Lembran que existe un acordo plenario de 2017 e advirten que a esixencia non é simplemente unha petición, senón un requisito para futuras negociacións co goberno local, sinalando a importancia do compromiso activo co futuro da mocidade no concello.

O Grove, 8 de marzo de 2024.- O grupo municipal de Esquerda Unida demanda ao goberno municipal un cambio significativo nos plans para a antiga Escola Infantil do Monte da Vila, logo de que este edificio deixe de acoller o servizo de Vellos Tempos. Tras o anuncio do Alcalde, no último pleno, de que o servizo será trasladado ao “edificio das Monxas” no mes de abril, Esquerda Unida ve unha oportunidade de ouro para converter o edificio vacante nunha Casa da Mocidade.

O voceiro de Esquerda Unida, José Antonio Otero, considera que “é preciso crear un espazo destinado ao ocio da xente nova, á súa formación e creatividade, así como á realización de actividades de índole socio-cultural ou formativo, que repercutan positivamente na integración social da mocidade”. Propoñen así, que a Casa da Mocidade poida integrar a oficina de Información Xuvenil, a través da cal, ademais de ofrecer toda a información e asesoramento, se encargaría da dinamización do espazo.

Dende Esquerda Unida cren que o edificio debería adaptarse minimamente para crear un espazo multifuncional coa posibilidade de crear sala de actividades e xogo, espazo dedicado á informática, sala multimedia, espazo de audiovisuais, sala de consulta, sala de obradoiro… “De todos modos, entendemos que  debe adaptarse sempre buscando o consenso e as necesidades da propia mocidade”, afirma Otero.

Esquerda Unida lembra que existe un acordo plenario de novembro de 2017, tras unha moción do seu propio grupo municipal na que se instaba a destinar este edificio a unha Casa da Mocidade. A moción saíra aprobada por maioría absoluta coa abstención do grupo do PSOE que, ao igual que agora, gobernaba o concello. Finalmente, o executivo local decidiu destinar o edificio a outras actividades, entre elas a do programa Vellos Tempos.

Así, co anuncio de que en breve as persoas participantes deste servizo se desprazarán ao edificio da Monxas, onde convivirán co Punto de Atención á Infancia (PAI) e o servizo de persoas con Alzheimer, Esquerda Unida considera que o edificio da antiga Escola Infantil quedará baleiro e sen practicamente uso. É por iso que Esquerda Unida recupera esta vella demanda que consideran que é máis que necesaria no Grove pois, segundo Otero, “a mocidade local urxe dun lugar onde poder reunirse, realizar actividades, cursos, que conte con información, asesoramento e cos servizos acordes ás súas necesidades”.

A agrupación fai fincapé na importancia de involucrar á mocidade na transformación do edificio, asegurando que as súas voces sexan escoitadas e que os servizos proporcionados se axusten ás súas necesidades reais. “Procuramos non só un espazo físico, senón un compromiso activo do goberno municipal co futuro da mocidade do Grove”, asevera o voceiro de Esquerda Unida.

Por último, Otero advirte que “esta non é unha simple petición, senón unha esixencia do noso grupo municipal”, a cal ten que ser unha realidade, “pois realizala ou non condicionará futuras negociacións co Goberno local”, especialmente nas que precise o voto de Esquerda Unida para sacar adiante cuestións de crucial importancia no Concello, como orzamentos ou proxectos.

EU lamenta a situación que están vivindo os nosos maiores e reclama solucións ao Concello

 

Denuncian o continuo baile de datas incumpridas que se lles está dando ás usuarias e usuarios do programa Vellos Tempos. Considérano unha falta de respecto e de tacto coas familias dependentes.

Os esquerdistas, que xa teñen interpelado en varias ocasións no pleno, piden celeridade en todas as actuacións relacionadas cos asuntos sociais, para ofrecer un servizo de calidade á veciñanza.

O Grove, 5 de marzo de 2021.- A agrupación local de Esquerda Unida mostra a súa preocupación coa problemática que se está dar en torno ao programa de Vellos Tempos e á situación que “están a vivir as e os nosos maiores así como as súas respectivas familias”.

Os esquerdistas lamentan que dende a administración local se estea dilatando continuamente o regreso do programa Vellos Tempos, que dunha forma ou outra alivia a carga que os familiares das persoas dependentes están a sufrir, máxime dende o inicio da pandemia.

Segundo o voceiro do grupo municipal de EU, José Antonio Otero, estes entenden que “retomar este servizo municipal non é nada sinxelo, pois trátase de usuarias e usuarios con alto risco ante a Covid”, pero tamén indican que “vai alá un ano dende o inicio da pandemia e houbo tempo suficiente para programar un regreso seguro neste servizo”. Así mesmo, Otero cree que “o máis grave non é que non se poida poñer en marcha o servizo, iso solucionase explicándoo e, en todo caso, procurando alternativas. O máis grave é que se estivo xogando con estes usuarios, dando continuas datas do inicio do servizo que finalmente non se cumpriron”.

Deste modo, os esquerdistas critican que dende que se levantou o estado de alarma en xuño do 2020, o concelleiro de servizos sociais anuncioulles ás usuarias e usuarios de Vellos Tempos numerosas datas para o comezo do servizo. “Primeiro indicóuselles que comezaría na primeira semana de agosto, logo que se retrasaba ata mediados de mes para finalmente comunicarlles que se iniciaría o primeiro de setembro. Finalmente estas datas non se cumpriron e tras ir dando escusas ás familias, comezaron a dar horas domiciliarias para paliar as queixas. Unha solución que se supoñía provisional pero que xa se está prolongando demasiado no tempo. Neste 2021, a previsión era comezar o día 1 de marzo, pero estamos a día 5 as usuarias e usuarios do servizo Vellos Tempos seguen sen poder facer uso do mesmo”, indica José Antonio Otero.

Dende Esquerda Unida consideran unha falta de respecto e de tacto este baile de datas, que “antes atribuíamos tan só ao Alcalde, pero parece que o resto dos concelleiros e concelleiras do goberno xa se contaxiaron dese mal”, afirma Otero. “Non se dan conta que esta forma de actuar está a provocar malestar entre unhas familias con dependentes, que o único que precisan é un pequeno alivio no seu día a día”, sentenza o voceiro esquerdista.

Así mesmo, Esquerda Unida tamén denuncia o que está a suceder coa antiga Escola Infantil do Monte da Vila, pois logo de estar na axenda do goberno o derrube da mesma para habilitar aparcadoiros, o pleno aprobou que isto non sucedera e se destinara á Casa de Xuventude, a instancias do grupo esquerdista, pero finalmente habilitaron o edificio para acoller unicamente o programa de Vellos Tempos, “saltándose así un novo acordo plenario”, tal e como afirma o voceiro de EU. Otero indica que “non nos opoñemos a este novo uso, de feito xa dixemos que como Casa da Xuventude podería albergar outros usos, entre eles o de Vellos Tempos. O que denunciamos é que saltándose un acordo plenario, o goberno decidira cambiarlle o uso ao edificio e non se contemple habilitalo como Casa da Xuventude, independentemente de que o usen para Vellos Tempos”.

E é que este edificio –a antiga Escola Infantil do Monte da Vila– leva máis dun ano en reformas continuas, e está a ser a “desculpa” do goberno para retrasar o regreso do programa Vellos Tempos. Para Esquerda Unida iso non é desculpa, “pois afirmaron en varias ocasións que usarían o local de Virxe das Mareas”, un local que xa albergaba Vellos Tempos ata o inicio da Pandemia.

Por último, dende a agrupación esquerdista tamén se preguntan que sucede co local social que se ía construír nun solar de Reboredo, que uns veciños doaron ao concello para albergar esta edificación coa condición de que se iniciase a obra antes de rematar o 2018. Segundo Otero, “Xa incumpriron o acordo, pero é que van alá 2 anos e nin se puxo a primeira pedra. Tendo en conta que este edifico era para albergar tamén o programa de Vellos Tempos coa veciñanza da parroquia de San Vicente, queda claro que o toman con moita calma”.

Non é a primeira vez que Esquerda Unida pregunta por todos estes asuntos no pleno, “recibindo excusas e datas que finalmente nunca se cumpren“, indica José Antonio Otero. “É por iso que pedimos celeridade a hora de actuar en todo o relacionados cos asuntos sociais, pois é imprescindible para ofrecer un servizo de calidade a toda a veciñanza”, finaliza o voceiro esquerdista.

Gabinete de Prensa

Esquerda Unida O Grove

EU critica o desaproveitamento da antiga escola infantil do Monte da Vila e a paralización do Plan de Xuventude

Lembra que a creación dunha Casa da Xuventude nesas instalación foi aprobada en pleno en novembro, e insta ao goberno local a acatar os acordos da corporación

Antiga Escola Infantil no Monte da Vila. Foto: Todogrove

O Grove, 28 de agosto de 2018.- O grupo municipal de Esquerda Unida critica a paralización do Plan Integral da Xuventude aprobado no mes de novembro, e insta ao goberno local a acatar os acordos plenarios e a dotar de contido a antiga escola infantil do Monte da Vila. A formación lamenta a inacción do goberno do PSOE a este respecto, e denuncia a falta de contido e a infrautilización dunhas instalación que os grupos acordaron destinar a usos sociais, culturais e deportivos relacionados coa xuventude.

Nove meses despois de que o pleno do Concello do Grove aprobase a proposta de Esquerda Unida para reconverter a antiga escola infantil do Monte da Vila nun espazo de encontro que fomentase a actividade e o ocio xuvenil, tanto a Casa da Xuventude como o Plan Integral participativo proposto para dotar a ese espazo de contido continúan a ser simples palabras sobre o papel.

O grupo municipal de EU lamenta a falta de compromiso e o ninguneo ao que o goberno de Cacabelos somete aos grupos e ás propostas da oposición. E lembra a oportunidade perdida en que o Concello está a incorrer ao non traballar para a posta en marcha da infraestrutura xuvenil aprobada.

A formación non entende que o goberno local prefira desatender os acordos plenarios en lugar de dotar de contido un edificio e unha parcela que ofrecen numerosas posibilidades; e que permitirían poñer en marcha iniciativas de interese para a mocidade grovense.

Así as cousas, a formación que dirixe José Antonio Otero insta ao Concello a acatar o acordo do pleno de novembro e a poñer en marcha as xestións para dar forma ao Plan Integral da Xuventude participativo acordado pola corporación local. Un plan baseado na participación e na autoxestión que inclúa unha campaña de asociacionismo xuvenil e recupere o Consello Local da Xuventude para dar forma a unha programación atractiva, acorde aos intereses das mozas e mozos da vila. 

A formación lamenta que o executivo do PSOE, coa complicidade do PGD, non teña en conta á mocidade no seu plan de traballo. Unha falta de compromiso con este sector da poboación que trasluce ás claras o orzamento anual do Concello, no que o goberno de Cacabelos non incluíu absolutamente ningunha partida destinada a esta fin.