EU critica a falta de investimento para O Grove nos orzamentos da Xunta de Galicia

 

Alegan que o Grove foi excluído de investimentos importantes. Segundo Esquerda Unida, a Xunta de Galicia non contemplou partidas orzamentarias para áreas clave como o Colexio de Rosalía de Castro, a Rúa Luís A. Mestre, a tubaxe da subministración  de auga potable, o dique de abrigo do porto de Porto Meloxo, o Centro de Saúde ou a Escola Infantil de Rons.

Instan ao goberno municipal a reclamar estas melloras e ao PP do Grove a demandar investimentos para O Grove. Preguntan aos populares pola promesa electoral sobre a construción dun pavillón no instituto Monte da Vila, xa que tampouco se contempla nos orzamentos autonómicos.

O Grove, 26 de outubro de 2023.- Esquerda Unida, a través do seu voceiro José Antonio Otero González, criticou duramente os orzamentos da Xunta de Galicia para o 2024. Segundo a formación, a Xunta “ningunea” ao Grove un ano máis, deixándoo fóra de calquera investimento importante.

A formación política sinalou que non se contempla ningunha partida orzamentaria para varias demandas históricas e necesidades do concello. Entre elas destacan:

O Colexio de Rosalía de Castro: O centro de ensino precisa dunha reforma ante a falta de espazos para o desenvolvemento adecuado da súa actividade. Segundo Esquerda Unida, a Xunta comprometeuse en febreiro do 2023 para a redacción dun proxecto que dotaría ao centro de novas aulas, un pavillón, comedor escolar e local para a ANPA, utilizando para iso, o propio centro e o vello edificio de vivenda dos mestres.

Rúa Luis A. Mestre: Unha das arterias principais do Grove que precisa dunha actuación urxente. Tal e como indican os esquerdistas “a rúa atópase nun estado deplorable e de abandono dende hai anos, con numerosas fochas e gretas que a converten en perigosa para o tránsito de vehículos”.

Tubaxe da subministración de auga potable ao Grove: A tubaxe está soterrada baixo o mar no seu tramo da Lanzada, á entrada do Concello do Grove. O desgaste e deterioro da mesma está a provocar numerosas roturas que pon en perigo a subministración de auga á veciñanza, sobre todo na época estival, cando a poboación se triplica e o gasto de auga aumenta. Para Esquerda Unida, “a substitución da tubaxe e o cambio de trazado da mesma, levándoa por terra, é de vital importancia, xa que calquera reparación na mesma está supeditada ao estado das mareas, evitando unha rápida intervención e poñendo en perigo oa subministración  á veciñanza”.

Dique de abrigo do porto de Porto Meloxo: Unha demanda do sector bateeiro da zona dende hai numerosos anos. Conta cun proxecto de execución bloqueado por diferenzas coa Confraría de Pescadores e que a Xunta non dá resolto.

Centro de Saúde: Para Esquerda Unida, a construción dun novo centro de saúde parece que vai para longo, debido á falta de terreos sen ter aprobado o PXOM, polo que entenden precisa unha actuación no actual centro, xa que conta con numerosas carencias.

Escola Infantil de Rons: A demanda de prazas neste centro educativo de 0 a 3 anos é patente nos últimos anos e, para a formación de esquerdas, a solución pasa por unha ampliación da mesma. Certo é, tal e como indican dende Esquerda Unida, que esta obra estaría supeditada á desafectación dos terreos de Rons e que “depende do goberno local que se desbloquee o expediente para que pasen a mans municipais”.

Así, José Antonio Otero considera que, un ano máis, a Xunta segue obviando as necesidades do Grove e da súa veciñanza. Por iso, insta ao goberno municipal a facer forza para reclamar estas melloras. Do mesmo modo, Otero pide ao Partido Popular do Grove que arrime o ombreiro e reclamen aos seus que o Orzamento da Xunta sexa xusto co Grove.

Finalmente, o voceiro de Esquerda Unida pregunta aos populares do Grove sobre a promesa electoral da construción dun pavillón no instituto Monte da Vila, “xa que tampouco se contempla nos orzamentos autonómicos”. Lembra que o Sr. Leiva, candidato naquel entón, afirmaba que contaba co visto e prace da Xunta, polo que Otero quere pensar que “ese compromiso era coa veciñanza do Grove e non co Partido Popular local, pois demostraría unha vez máis que o PP utiliza as administracións de forma partidista e só atende as demandas dos concellos onde gobernan”.

EU denuncia a situación do Centro de Saúde do Grove e súmase ás protestas

Dende Esquerda Unida sumámonos á concentración que o BNG convocou para o vindeiro luns ás 12 do mediodía á porta do Centro de Saúde en protesta pola situación que se está a vivir coa nosa atención primaria.

Nos últimos meses estamos vivindo unha grave precariedade en canto a servicios de atención no noso Centro de Saúde. A falta continua de facultativos tanto no servizo de atención primaria como do PAC está a provocar longas demoras á hora de acadar unha cita, a anulación das xa concertadas, a derivación da atención a outros centros da contorna ou ao Hospital Provincial e, o que é peor, a necesidade de acudir a centros privados para lograr solucións.

Esta situación agravouse nestes últimos días, no que o Centro de Saúde do Grove pasou a contar con un único facultativo que só atendía urxencias. De continuar esta condición, a gravidade verase acentuada debido ao aumento poboacional derivado do comezo da época estival.

Lamentamos as verbas do xerente da EOXI do pasado martes, que en lugar de procurar solucións limitouse a indicar que non se cubrirán as vacacións dos facultativos e que a atención estaría garantida, cuestión que como se demostra no Centro de Saúde do Grove é totalmente mentira. Dende Esquerda Unida solicitamos a dimisión do xerente e do seu equipo ao fronte da área sanitaria Pontevedra-Salnés, pois quedou demostrado que no lugar de resolver os problemas que se veñen sucedendo, estes estanse a agravar cada vez máis.

É preciso saír á rúa para parar as políticas que están a acabar coa atención primaria en particular, e coa sanidade pública en xeral. Desde Esquerda Unida seguimos apostando por unha resposta conxunta de toda a corporación municipal e a poboación en xeral ante esta situación de deterioro do servizo no noso centro de saúde.

Neste senso, apreciamos  unha falta de interese por parte do goberno municipal á hora de procurar estas accións conxuntas. É por iso polo que xa solicitamos unha xuntanza de voceiros, na que proporemos a petición formal da corporación municipal para solicitar a dimisión da dirección da EOXI de Pontevedra/Salnés e do Conselleiro de Sanidade. 

Así mesmo facemos un chamamento á participación de toda a veciñanza na concentración do vindeiro luns ás 12 do medio día diante do Centro de Saúde do Monte da Vila.

EU solicita unha xuntanza de voceiros para procurar accións conxuntas sobre a situación do Centro de Saúde

Unha das concentracións ás portas do Centro de Saúde no 2019
Foto: Faro de Vigo

Para a agrupación esquerdista a situación que se está a vivir no Centro de Saúde do Grove é totalmente insostible e alaban a labor do persoal sanitario que, cos escasos recursos que teñen, procuran dar cobertura a unha poboación que nestes meses se triplicou.

Consideran que é preciso crear unha fronte común entre todos os partidos políticos e a veciñanza para emprender accións de rexeite a este ataque da Xunta á sanidade pública do noso concello.

O Grove, 17 de agosto de 2020.- A agrupación local de Esquerda Unida ven de presentar por rexistro unha solicitude de xuntanza de voceiros dos diferentes grupos políticos para tratar a situación do Centro de Saúde do Grove.

O voceiro esquerdista, José Antonio Otero, tacha de “intolerable e moi grave” a situación que se está a vivir estas semanas no Centro de Saúde, “onde cunha pandemia aínda por superar e nun dos meses no que a poboación se triplica pola afluencia turística, a atención sanitaria no noso concello se vexa minguada ata puntos insostibles”. Para Otero, “non é de recibo que nesta situación o Centro de Saúde conte nesta datas con tan só un facultativo para toda a poboación do Grove e a que nos visita” e considera que “isto atende a estratexia de desmantelamento da sanidade pública que a Xunta de Galicia leva artellando dende hai moito tempo”. Así mesmo, Otero agradece o esforzo que están a realizar as traballadoras e traballadores do Centro de Saúde meco, pois “nunha circunstancia como a que se está a vivir co Covid-19, coa necesidade de cubrir o dobre de cotas e traballar máis horas, estalles a provocar unha carga e un estrés en moitos casos inaguantable”. 

É por iso que, logo de ver declaracións do goberno local e de outros grupos municipais con diferentes propostas de actuación, dende Esquerda Unida piden unidade de acción entre todos os partidos políticos e a veciñanza “para demostrarlle á Xunta de Galicia que no Grove non estamos dispostos a que se xogue coa nosa saúde”, sentenza Otero que agarda que nestes momentos “se de deixen de lado as cores políticas e se traballe conxuntamente para as veciñas e veciños do noso concello”

Gabinete de Prensa

Esquerda Unida O Grove

Galicia en Común comprométese a saldar a débeda da Xunta co Grove

A candidatura de Galicia En Común visitou onte O Grove para manter un encontro coas militancias e coñecer as necesidades do noso concello.

É coñecida a débeda histórica que a Xunta de Galicia ten co Grove e a necesidade de que o ente autonómico afronte dunha vez por todas inversións que den solucións ás necesidades da nosa vila.

Así, a cabeza de lista por Pontevedra, Eva Solla acompañada de Iria Figueroa e Marcos Cal, segunda e terceiro respectivamente pola mesma provincia, asumiron o compromiso de traballar para que O Grove conte dunha vez por todas co necesario novo Centro de Saúde; para que se afronte a ampliación do dique de abrigo de Porto Meloxo, respectando sempre os bancos marisqueiros próximos; para que se substitúa a tubaxe de subministro de auga potable, que agora mesmo provoca numerosas rupturas no tramo da Lanzada; para que a vía rápida conte con catro carrís entre Sanxenxo e O Grove; e para que os terreos do Corgo pasen a titularidade municipal.

Sabemos que traballarán para saldar esta débeda co Grove, pero para elo é preciso un cambio na Xunta de Galicia e iso só pasa por un goberno progresista con Galicia En Común á cabeza.

EU trasladou a través do Grupo Común da Esquerda as súas emendas ao Orzamento da Xunta

Os esquerdistas lamentan que a Xunta de Galicia rexeite as propostas para o noso concello. Reclamaban a administración autonómica que incluíra no Orzamento 2020 tres millóns de euros de inversión directa no concello e 13,5 millóns de inversión indirecta.

Reclamaban orzamento para un novo Centro de Saúde, para a ampliación do dique de abrigo do porto de Porto Meloxo, para o desdobre da Vía Rápida VG-4.1 e para a renovación da tubaxe que subministra a auga potable ao Grove.

O Grove, 22 de novembro de 2019.  A agrupación local de Esquerda Unida dou traslado a través do grupo parlamentario Grupo Común da Esquerda as emendas ao Orzamento da Xunta de Galicia para o 2020 referentes ao Grove.

En total foron catro ás peticións realizadas polos esquerdistas, das cales dúas eran de inversión directa no propio concello e as outras dúas, a pesar de non ser no entorno grovense, si repercutían de forma indirecta na localidade.

A agrupación que lidera José Antonio Otero quería “que a Xunta de Galicia dera un paso adiante e se comprometa dunha vez por todas co noso concello, pois levamos anos sen contar con inversións importantes”. E por iso que decidiron canalizar as súas peticións a través dos seus representantes no Parlamento de Galicia.

A primeira das peticións ía directamente á Consellería de Sanidade á cal lle pedían que contemplase entre 1,5 e 2 millóns de euros, nas súas partidas, para o proxecto e construción dun novo Centro de Saúde, unha das maiores demandas do Grove que volveu reivindicarse con forza nas últimas protestas celebradas diante do actual Centro de Saúde durante o mes de abril. Os esquerdistas son conscientes que un dos problemas que se atoparían á hora de presentar esta solicitude é a da falta dun terreo para albergar esta construción, pero entendían que si prosperaba, sería o concello o que se vira no compromiso de poñer este a disposición do ente autonómico, e para elo o goberno municipal tería por diante un ano. “Deste xeito, a construción retrasarase, pois teremos que agardar como mínimo ata os orzamentos da Xunta do 2021” indica José Antonio Otero.

A ampliación do dique de abrigo do porto de Porto Meloxo é outra das peticións de inversión directa que Esquerda Unida reclamaba á Xunta. Desta volta a Portos de Galicia, pois entenden que son os encargados de poñer en marcha dita obra. En referencia a isto, José Antonio Otero “considera unha burla que os orzamentos en vigor reflictan preto de 1,2 millóns de euros para investir en Porto Meloxo en tres anos, contemplando 50.000 para a primeira fase –2019– dos cales non se gastou un só euro e no Orzamento 2020 se eliminase toda a partida e tan só se propuxeran 30.000 €”. Os esquerdistas recordan que o proxecto leva paralizado varios anos por mor dunha emenda da Confraría de Pescadores grovense ao ver perigar os bancos marisqueiros máis próximos ao eliminarse as correntes da zona. Neste senso, José Antonio Otero recorda que “aprobamos recentemente unha moción na que solicitabamos desatascar esta situación procurando que Portos estudase unha medida para que o dique de abrigo permitise o paso de correntes que non afectase aos bancos marisqueiros”. E por iso que Esquerda Unida quería que se contemplaran eses preto de 1,2 millóns de euros no Orzamento 2020.

Xa nas inversións indirectas, pois a pesar de non realizarse directamente no concello –son obras fora do municipio– supoñen unha repercusión positiva no Grove, os esquerdistas pedían como primeira medida que se realizase o desdobre da Vía Rápida do Salnés (VG-4.1), no tramo que vai dende a Lanzada ata o enlace coa Autovía en Sanxenxo. Unha demanda que se ven realizando dende que no 2006 comezaran as obras de desdobre do tramo entre Curro (Barro) e Sanxenxo e que aflora cada ano durante a época estival cando se producen diariamente atascos quilométricos.

Esquerda Unida solicitaba que se contemplasen como mínimo os 12 millóns de euros que no 2010 prevía a Consellería de Medio Ambiente, Territorio e Infraestruturas e que se procurase unha solución para non prexudicar medioambientalmente a zona.

Por último os esquerdistas enfocaron a súa cuarta petición directamente sobre Augas de Galicia, pois consideran que teñen que acometer “dunha vez por todas” a substitución da tubaxe que subministra a auga potable ao concello grovense. Segundo Esquerda Unida, O Grove recibe a auga da planta instalada en Vilanova de Arousa a través dunha tubaxe, instalada a finais dos 80, que tras chegar a Vilalonga (Sanxenxo) sotérrase baixo o mar ata o municipio grovense. José Antonio Otero recorda que “En xullo do 2018, Augas de Galicia recoñecía o mal estado da tubaxe e as consecuencias nefastas que suporía para o noso concello unha rotura da mesma, e por iso comprometíase a rematar un proxecto de substitución a finais de 2018 e comezar as obras durante este ano, para elo ían contemplar no orzamento 2019 unha partida de 1,5 millóns de euros”, pero a día de hoxe “non se coñece o proxecto nin tampouco se incluíron eses cartos no orzamento do 2019 e tampouco no proxecto do 2020”, sentencia Otero.

O voceiro esquerdistas indica que a situación non pode agardar máis, “pois no presente ano a tubaxe xa rachou por dúas ocasións no tramo da Lanzada e solucionouse relativamente axiña porque sucedeu nunha zona na que as condicións permitiron que os operarios realizasen o traballo con rapidez.

Aínda que sen moitas esperanzas, Esquerda Unida agardaban que a Xunta de Galicia recapacitase e que antes de pechar os Orzamentos do 2020 contemplasen estas catro demandas, “pois son importantes para O Grove e a súa veciñanza”. Recordan que “estamos as portas dun proceso electoral autonómico e as veciñas e veciños do Grove son plenamente conscientes do abandono ao que estivo sometido o noso concello por parte da administración que dirixe Feijoo”.

Gabinete de Prensa

Esquerda Unida O Grove

Foto denuncia EU - Estado do acceso ao centro de saúde

🚧A veciñanza trasládanos a súa preocupación polo estado do acceso ao centro de saúde.

🏥Subir andando ao centro de saúde sempre foi unha proba de fondo. Pero dende hai unhas semanas converteuse tamén nunha carreira de obstáculos, dificultando a subida aos máis maiores e ás persoas con dificultades para camiñar.

Esquerda Unida presenta ao goberno un plan de actuacións prioritarias para o concello

O Grove, 3 de maio de 2017.- A agrupación local de Esquerda Unida decidiu presentar ao Alcalde, e ao seu equipo de goberno, un plan de actuacións a realizar no tempo que resta de mandato. Unhas actuacións que os esquerdistas consideran precisas e prioritarias para os veciños do Grove.

Esquerda Unida decidiu dar este paso ante a situación actual do goberno municipal do cal consideran que está a deriva, máxime tras ver como realiza propostas de inversións inconexas e sen planificación de ningún tipo. Os esquerdistas poñen como exemplo a proposta de Auditorio que, segundo indican, se irá aos 5 millóns de euros de inversión municipal, ou a peonalización de rúas do casco urbanos sen plans de tráfico e alternativas de estacionamento. Todo isto namentres traballan con un orzamento prorrogado cando xa van alá cinco meses, conclúen.

Segundo a agrupación de esquerdas, o goberno municipal móstrase absorbido polo día a día, e a impresión que transmite é que gobernan a salto de mata.

Por ese motivo, desde Esquerda Unida, e logo de reunir á súa asemblea, propoñen un plan de actuacións no que se inclúen demandas históricas da veciñanza así como medidas que consideran necesarias para o bo funcionamento municipal e a mellora dos servizos públicos que se ofrecen aos veciños.

Executiva Local de Esquerda Unida

O Grove