Esquerda Unida critica a inacción do goberno ao non poñer en funcionamento a app “Meu Concello”

A ferramenta tecnolóxica permitiría unha mellor xestión de incidencias e unha comunicación máis eficaz coa cidadanía, pero segue sen estar operativa dende que a Deputación a lanzou hai case un ano.

Outros concellos da provincia xa a empregan con éxito, mentres que no Grove segue sen ofrecerse este servizo gratuíto proporcionado pola Deputación de Pontevedra. Esquerda Unida pide que se active xa.

O Grove, 14 de maio de 2025.- Esquerda Unida vén de denunciar a falta de vontade do goberno municipal para poñer en marcha a aplicación "Meu Concello", unha ferramenta dixital proporcionada pola Deputación de Pontevedra para xestionar incidencias, alertas e comunicacións coa veciñanza a través do móbil.

Segundo sinala o seu concelleiro, Anxo Meis, o Concello do Grove conta con esta ferramenta dende xuño de 2024, pero segue sen estar operativa. “En setembro dese mesmo ano, preguntamos en pleno cando se ía activar, e a resposta foi que estaban estudando como xestionala por falta de persoal. En marzo deste ano, ao volver preguntar, indicóusenos que procurarían poñela en funcionamento. Con todo, a día de hoxe nada mudou”, afirma Meis.

Para Esquerda Unida, esta ferramenta é "importante e imprescindible" para modernizar a administración local e mellorar a resposta ás necesidades cidadás. Tal e como indica Meis, “a app permite que a veciñanza poida comunicar incidencias como losetas levantadas, papeleiras cheas, farois sen luz, problemas de limpeza, bancos rotos,... e ofrece ademais un seguimento da resolución da incidencia, o que axiliza a resposta municipal e mellora a percepción do servizo”.

A aplicación conta ademais cun apartado para noticias, bandos e avisos, tales como de cortes de auga ou de tráfico, e mesmo un mapa con puntos de interese local, o que para Meis supón “a posibilidade de ter unha comunicación directa e inmediata con todas as persoas usuarias, e especialmente útil en situacións de urxencia ou de información sobre servizos municipais”.

Concellos como Sanxenxo, Cambados, Soutomaior, Bueu, Tomiño, Vilaboa, Mos ou Covelo xa activaron esta ferramenta e resolven mediante a mesma numerosas incidencias cada semana. Mentres tanto, no Grove continúa sen ofrecerse este servizo, a pesar da súa utilidade e de ser totalmente gratuíto para o Concello. “Quizais o problema sexa que, tal como está a vila, poñer a funcionar a app suporía unha saturación de incidencias e obrigaría ao goberno local a asumir a realidade na que se atopa o municipio", afirma Meis.

Esquerda Unida insta ao goberno municipal a activar de inmediato esta ferramenta dixital, aproveitar o seu potencial e atender todas as comunicacións cidadás que se reciban por esta vía, sen deixar de empregar as canles tradicionais de contacto co Concello.

EU pide que o concello se acolla ás axudas do Estado para o control das colonias felinas

Lembran que coa nova lei de Protección dos Dereitos e Benestar Animal, os concellos están obrigados ao control das colonias e á aplicación do protocolo CER. O prazo para as solicitudes pecha o vindeiro 24 de xullo.

Agardan que non perdan esta oportunidade como sucedeu coa subvención para instalacións deportivas, advertida no seu momento polos esquerdistas, e a da contratación de socorristas.

O Grove, 27 de xuño de 2023.- A Subsecretaría de Dereitos Sociais e Axenda 2030, ven de abrir o prazo para a solicitude de subvencións a entidades locales, destinadas a mellorar e impulsar o control poboacional decolonias felinas, concedéndose axudas a proxectos dirixidos á implantación do método CER (Captura, Estirilización e Retorno), desparasitación ou vacinación, mellora das condicións de vida e alimentación das colonias ou para a formación de persoal municipal ou concienciación da poboación no respeto ás colonias felinas. 

O prazo para a presentación de proxectos finaliza o vindeiro 24 de xullo e dende Esquerda Unida piden que o Concello do Grove se presente a esta convocatoria, pois lembran que existe unha responsabilidade municipal no control das colonias felinas en base á nova lei de Protección dos Dereitos e Benestar Animal. 

Un control que agora está realizando a asociación local O Jato Meco, tendo que asumir prácticamente a totalidade dos gastos, pois a implicación municipal é mínima ou practicamente nula. Por ese motivo consideran que "cunha colaboración entre o concello e a asociación é posible presentar un proxecto para optar, incluso, ás catro liñas subvencionables, a maioría de ata o 100%". Ademais, indican, "o goberno local recibiu hai uns días unha guía elaborada pola Deputación de Pontevedra na que se informa e asesora do proceso de control das colonias e a aplicación dos protocolos CER" .

Dende Esquerda Unida agardan que desta volta non deixen escapar esta oportunidade ao igual que sucedeu coa liña de axudas para a reforma e mantemento de instalacións deportivas e material deportivo inventariable ou a relativa á contratación de socorristas. Lembran que no mes de abril pediran ao concello que se acollera á subvención para arranxo deinstalacións deportivas co propósito de dar solución ás deficiencias existentes na maioría delas pero, polo visto esta semana, "xa non é que non se concedera, é que nin tiveron a decencia de presentarse, ao igual que sucedeu coa liña aberta para contratación de socorristas" denuncian os esquerdistas.

EU insta ao concelleiro de Deportes a facer uso das subvencións da Xunta de Galicia para arranxar as instalacións deportivas municipais

 

O Grove, 19 de abril de 2023.- A finais do pasado mes, a Xunta de Galicia publicou as bases dunha liña de axudas destinadas á construción, reforma, adecuación ou mellora de instalacións deportivas de titularidade municipal, así como para a adquisición de material deportivo inventariable.

A convocatoria está aberta ata o 27 de abril e dende Esquerda Unida piden ao goberno local e, concretamente, ao concelleiro de Deportes, que non deixe pasar esta oportunidade pois, entenden, “sobra onde investilos, xa que todas as instalacións deportivas municipais precisan reformas, adecuacións e melloras”, indica o voceiro esquerdista, José Antonio Otero, que empraza ao executivo a “falar cos clubs deportivos ou pasarse polas instalacións deportivas e de seguro que saca un bo listado de propostas para presentar á subvención”.

Así, dende Esquerda Unida remarcan que, logo de ter mantido xuntanzas con varios dos clubs deportivos, comprobaron que todas as instalacións teñen deficiencias, comezando polo sistema de iluminación de todas elas, pois segue sen actualizarse a LED, o que provoca un consumo enorme, ademais dos insoportable ruído que emanan moitos dos focos e as incomodidades de ter que agardar preto de media hora para ter unha boa iluminación cada vez que se acenden ou sofren un apagón. A humidade e filtración de auga é outra das deficiencias que teñen a maioría das instalacións, segundo indican os esquerdistas, e poñen como exemplo o pavillón náutico e, sobre todo, o pavillón do colexio Conmeniño, que é impracticable na maioría dos días de choiva. Tamén ven deficiencia nos marcadores electrónicos pois, agás no pavillón novo, son inexistentes ou inutilizables no resto das instalacións deportivas municipais que o precisan. Por último, consideran que, en todas as instalacións deportivas, "existen pequenas e medianas reparacións ou necesidades que os propios clubs usuarios teñen posto en coñecemento da nosa organización e sabemos que dende hai tempo tamén no do concelleiro e, aínda seguen sen ser atendidas".

Os esquerdistas entenden que todas as deficiencias e necesidades das instalacións deportivas municipais, ou a gran maioría delas, poden ter solución a través da subvención que a Xunta de Galicia ten aberta durante este mes. Por ese motivo insisten en solicitar ao concelleiro de Deportes que non desperdicie a oportunidade e presente un proxecto para facerse con algún financiamento autonómico.

Esquerda Unida pide celeridade para rematar a obra de adaptación do Club de Remo Mecos

 

Membros da agrupación de esquerdas visitaron as instalacións do club e constataron as numerosas deficiencias dun proxecto que estaba chamado a ser pioneiro en Galicia. A obra, que comezou hai dous anos e medio, leva parada preto dun ano.

Dende Esquerda Unida tachan a obra de “auténtica chapuza e aberración”, piden celeridade para que se retomen os traballos e que se depuren responsabilidades polos atrasos acumulados e pola situación que están a vivir os membros do club, sobre todo os numerosos nenos e nenas que cada día adestran e fan actividades nas instalacións.

O Grove, 19 de marzo de 2022.- Unha comitiva da agrupación local de Esquerda Unida, encabezada polo voceiro do grupo municipal, José Antonio Otero, visitaron esta semana as obras de adaptación do Club de Remo Mecos, que comezaron en decembro do 2019 e que, a día de hoxe, levan máis dun ano estancadas, cando as mesmas estaban proxectadas para executar en seis meses. Os esquerdistas, que teñen preguntado polos atrasos na execución da obra en diferentes plenos, puideron constatar in situ a “chapuza” na que se convertiu un proxecto que estaba chamado a ser pioneiro en toda Galicia.

Paredes en ladrillo, habitáculos e baños sen rematar, filtracións de auga por ventás e teitos, a porta de acceso sen instalar e tapiada, vigas oxidadas por falta de tratamento, fendas na edificación antiga provocadas polas obras, materiais de obra ciscados no exterior, e un longo etcétera foi o que se atoparon os membros de Esquerda Unida na súa visita ás instalacións do Club de Remo Mecos. Un escenario que puido ser moito máis dantesco pois, tal e como lles relataron durante o percorrido, o escombro e restos de obra foi retirado polos propios directivos do club, que tamén realizaron a instalación da iluminación e o derrube de algunha que outra parede para poder levar a cabo a actividade deportiva da maneira máis segura posible.

José Antonio Otero califica todo o que rodea á obra como  “unha auténtica chapuza e unha aberración” e, tanto el como o resto dos membros de Esquerda Unida mostraron a súa sorpresa ao enterarse que os propios directivos e membros do club tiveran que facer de albaneis e electricistas para poder utilizar as instalacións decentemente ante a desaparición da empresa adxudicataria da obra que, segundo lles indicaron, non pisa o local dende hai un ano. 

Para Esquerda Unida, “alguén ten que ser responsable de que unha obra que estaba programada para executar en seis meses, leve preto dous anos e medio, estea como está e non se lle vexan indicios de finalizarse a curto prazo e pediremos esas responsabilidades”, manifesta o seu voceiro que cree que “non se pode permitir que as numerosas persoas que forman parte das direrentes seccións do club, sobre todo as máis cativas, teñan que adestrar ou realizar actividades en estas condicións”. Otero recorda que nas diferentes ocasións que teñen preguntado polos atrasos nas obras -a última no pleno do mes de febreiro-, dende o goberno indicábanlles que "neses días terían reunión coa dirección da obra e que esta continuaría a súa execución, cando a realidade é ben distinta”, polo que pide ao executivo local que “deixe de mentir e faga o que teña que facer para que a obra se finalice nas mellores condicións e na maior brevidade posible”. 

 Ver fotos

👇👇👇

EU denuncia que o Alcalde non lles facilita documentación relacionada co Auditorio

O grupo municipal esquerdista segue agardando pola documentación dende o pasado 3 de novembro. Denuncian que non é a primeira vez que lles impiden ou retrasan o acceso a documentos municipais o que lles fai “sospeitar que pode ocultar algo”.

Lémbranlle ao Alcalde que incumpre có dereito dos concelleiros ao acceso á documentación municipal precisa para o desenvolvemento das súas funcións e ameazan con acudir á Valedora do Pobo se segue sen facilitarlla.

O Grove, 23 de decembro de 2021.-  A agrupación local de Esquerda Unida acusa ao goberno socialista de falta de transparencia co seu grupo municipal e de impedir o labor de fiscalización dos seus concelleiros ao negarlle o acceso a documentación municipal.

Os esquerdistas manifestan que hai máis de mes e medio, o seu grupo municipal requiriu por rexistro unha documentación relacionada co Auditorio e que, a día de hoxe, esta non lles foi remitida nin se lles dou acceso á mesma. Así, dende Esquerda Unida, ao ver que seguían sen recibir resposta dende o 3 de novembro, o pasado día 15 fixeron unha nova solicitude, “agardando que desta vez nos fose remitida a devandita documentación, pero seguimos na mesma” expón o voceiro de Esquerda Unida, José Antonio Otero.

Para Otero, “esta é unha nova mostra das actitudes de Cacabelos e da falta de transparencia do seu goberno, impedindo o labor de fiscalización dos concelleiros da oposición”.  “O Alcalde ten constancia desta solicitude dende o mesmo día 3 de novembro, e a pesar de que temos dereito á mesma, non dá a orde aos funcionarios para que nola trasladen” indica o voceiro esquerdista.

Segundo Otero, “esta non é a primeira vez que nos sucede, pois xa son numerosas as ocasións nas que solicitamos documentación e non a envían, non recibimos resposta ou retrasan o acceso á mesma co propósito de impedir facer o noso traballo”. O voceiro esquerdista tacha de “dubidosa” a actuación do Alcalde e teme que sexa indicio de algunha irregularidade “obrando desa maneira; retrasando ou impedindo o acceso a documentos sobre asuntos de actualidade municipais, cando menos, fainos sospeitar que oculta algo e que non lle interesa que poidamos investigalo”, sentenza Otero que entende que, “se non quere que fagamos conxecturas erróneas, que nos permita sen retrasos o acceso aos documentos que solicitemos”.

Dende Esquerda Unida lémbranlle ao Alcalde que os concelleiros e concelleiras da corporación teñen dereito ao acceso á documentación municipal que resulte precisa para o desenvolvemento da súa función e que, a mesma, de non existir resolución negativa motivada, considérase concedida por silencio administrativo aos cinco días, tal e como indica o artigo 14 do Regulamento de Organización, Funcionamento e Réxime Xurídico das Entidades Locais.

Así, os esquerdistas instan a Cacabelos a que poña xa a disposición do seu grupo municipal a documentación requirida, pois entenden cumpridos os prazos establecidos sen que se motivara unha resolución negativa. Otero non descarta “acudir á Valedora do Pobo se seguen retrasando ou impedindo o acceso á documentación municipal”.

Gabinete de Prensa

Esquerda Unida O Grove

Esquerda Unida denuncia cobros irregulares no recibo do lixo

A veciñanza está recibindo requirimentos para facer fronte ao pago da taxa do lixo dos últimos cinco anos, por vivendas inhabitadas ou inhabitables. Unha empresa externa xestiona estes cobros.

Esquerda Unida non entende que se queira cobrar a taxa por este tipo de inmobles, e menos, polos últimos cinco anos, xa que nese tempo non se emitiron recibos. Piden ao goberno que poñan a disposición da veciñanza os medios precisos para solucionar esta situación.

O Grove, 21 de decembro de 2021.- A agrupación local de Esquerda Unida denuncia que o Concello do Grove, a través dunha xestión externa, está enviando requirimentos á veciñanza para facer fronte ao pago do recibo do lixo dos últimos cinco anos, por vivendas inhabitadas ou inhabitables.

Segundo o voceiro de Esquerda Unida, José Antonio Otero, no último mes foron varias as veciñas e veciños “que sufriron este atropelo e cando se achegan ás dependencias municipais na procura de información, a única resposta que se atopan é que está xestionado por unha empresa externa e que teñen que dirixirse a ela”. “O concello é o responsable da taxa e, como tal, ten que resolver as dúbidas e xestionar a solución á veciñanza” sentenza Otero.

O esquerdista indica que esta circunstancia está a provocar malestar entre as veciñas e veciños “pois o cobro deses recibos son por vivendas que, ou nunca estiveron habitadas ou non son habitables ao atoparse sen divisións ou en estado ruinoso”, e nalgúns casos supón gastos engadidos xa que “moitas destas persoas, teñen agora que certificar que esa vivenda é inhabitable ou que nunca foi habitada, segundo o caso, o que lles implica contratar o servizo de persoal cualificado”.

Así mesmo dende Esquerda Unida non entenden que se lles aplique o cobro polos últimos cinco anos, ”cando durante ese tempo a veciñanza afectada non recibiu ningún requirimento e non existe recibo algún deses anos”.

Otero considera que “isto non é máis que a consecuencia da mala xestión do goberno municipal ao externalizar un servizo de cobro da taxa pois, a empresa, ao obter os beneficios do recadado, procurará emitir o maior número de recibos sen atender á realidade das vivendas e propiedades da veciñanza”. Por ese motivo, dende Esquerda Unida piden ao concello que poña a disposición da veciñanza o persoal e os medios precisos para solucionar esta situación.

Gabinete de Prensa

Esquerda Unida O Grove

EU considera unha burla a subida salarial do Concelleiro de Deportes

O goberno aprobará unha dedicación do 50% para o Concelleiro de Deportes con unha retribución de 17.000 € brutos anuais.

Os esquerdistas non entenden que, tralas numerosas críticas á súa labor ao fronte da concellería de Deportes, o Alcalde o compense cunha subida salarial.

O Grove, 25 de novembro de 2021.- O vindeiro luns, o pleno do Concello do Grove aprobará previsiblemente –dada a maioría absoluta do goberno– o aumento da dedicación exclusiva do Concelleiro de Deportes e con iso unha suba na súa asignación salarial. Será un aumento da súa dedicación parcial, pasando dun 25% da xornada a un 50%, obtendo un aumento na súa retribución anual bruta de 7.000 € (17.021,06€) repartidos en 14 pagas. Esta circunstancia é tachada polo grupo municipal de Esquerda Unida como unha burla, pois entenden que “cando máis acrecentan as críticas cara o concelleiro por parte dos clubs deportivos, debido ao desleixo mostrado cara o deporte local, o Alcalde prémiao cunha subida salarial”.

Cabe recordar que a principios de mes, os clubs pertencentes a Asociación do Deporte Meco (ADM) lanzaron un comunicado no que afirmaban sentirse “ninguneados” polo goberno municipal. No mesmo, mostraban o seu malestar co Alcalde e o Concelleiro de Deportes logo de ver como se mantiña, por segundo ano consecutivo, a redución na contía para as subvencións deportivas tras afirmar que este ano se recuperarían os 96.000 €. Tamén criticaban a tardanza na saída das bases para esas subvencións, pois prometéraselle publicalas no primeiro trimestre e saíron no cuarto, e tachaban de menosprezo o feito de non atender as peticións de reunións, namentres os chamaban para organizar eventos como o campamento deportivo de verán. Esta situación foi tamén denunciada por Esquerda Unida que, tras intervir no pleno e reunirse coa ADM, a pasada semana enviaba á prensa un comunicado tachando de desdén o trato do goberno municipal ao deporte local.

Esta non é a única crítica que dende os esquerdistas se ten lanzado cara o Concelleiro de Deportes, pois tal e como recorda o seu voceiro, José Antonio Otero, “no anterior mandato e neste, son numerosas as ocasións nas que temos denunciado as accións e actuacións do concelleiro”. Otero recorda que “xa temos denunciado o cobro ilegal polo uso das Pistas de Pádel e as burlas e enfrontamentos co club, pedido en innumerables ocasións a convocatoria do Consello Local do Deporte para a renovación dos cargos, denunciado o abandono de instalacións deportivas ou retraso nas obras do Club de Remo Mecos”. Unhas críticas que exceden o político, como mostran as denuncias feitas polos propios clubs, o de Pádel no seu momento e os da ADM nesta última ocasión, polo que os esquerdistas non entenden que no lugar de terlle retirado as competencias ao concelleiro delegado, o Alcalde o compense con un aumento das súas retribucións.

Gabinete de Prensa

Esquerda Unida O Grove

EU tacha de desdén o trato do goberno municipal ao deporte local

 

Os esquerdistas seguen agardando polas repostas ás preguntas realizadas no último pleno. Entenden que a renuncia da técnica de Deportes provoca unha parálise no departamento que vai afectar ao reparto das subvencións.

Logo de reunirse coa ADM, Esquerda Unida considera que o Concelleiro de Deportes menospreza aos clubs deportivos, mentiulles no orzamento e provócalles dificultades económicas ao publicar as bases das subvencións no último trimestre, polo que piden un “cambio de actitude cara o deporte local ou que presente a súa dimisión”

O Grove, 20 de novembro de 2021.- A agrupación local de Esquerda Unida considera que o goberno municipal actúa cos clubs deportivos con un total menosprezo, indiferenza e desconsideración, e que o Concelleiro de Deportes mostra unha falta de interese e desidia co deporte local.

A principios deste mes de novembro, a Asociación do Deporte Meco (ADM) denunciaba publicamente o seu malestar polo incumprimento dos acordos cos clubs deportivos, polo recorte nas subvencións deportivas e pola falta de diálogo e compromiso do executivo.

O grupo municipal de Esquerda Unida, que xa ten interpelado en numerosas ocasións sobre asuntos relacionados do deporte, fíxose eco das críticas da ADM e, a través do seu voceiro, José Antonio Otero, no pleno do pasado día 2, criticaron novamente a redución das subvencións deportivas –xa o fixeran no debate dos orzamentos– e preguntaron o motivo polo que se publicaron as bases, por segundo ano consecutivo, no derradeiro trimestre do ano, cando o habitual era facelo no primeiro ou segundo. Para Otero este retraso na publicación leva ás directivas a “ter que apurar o seu traballo, ante o axustado dos tempos, pero sobre todo, provoca que os clubs non conten con efectivo, cando máis o precisan, máxime logo dunha pandemia na que os ingresos publicitarios se viron reducidos drasticamente”.

Así mesmo, o voceiro esquerdista interesouse polas consecuencias que causaría a renuncia da Técnica de Deportes e preguntou se se estaba traballando para cubrir o máis axiña posible a praza, pois entende que “é preciso contar con persoal para traballar no día a día do deporte local, pero sobre todo para resolver os trámites das subvencións”.

Os esquerdistas recordan que o Concelleiro de Deportes non dou resposta a ningunha das cuestións e afirmou que daría debida conta das mesmas a través do correo electrónico. Máis de 15 días despois, Otero indica que “non recibimos tal correo, nin sequera unha chamada para darnos as explicacións oportunas, o que demostra unha falta de respecto absoluto cara os membros da oposición e a indiferenza que lle causa ao concelleiro as nosas preocupacións, que non deixan de ser as dos propios clubs”.

Otero afirma que “esa falta de respecto e indiferenza que ten con nós, tamén a ten cos clubs deportivos”, pois así llo trasladaron as directivas das entidades pertencentes a ADM, cos que Esquerda Unida se reuniu unha semana despois do pleno. Nesa xuntanza, trasladaron aos esquerdistas as problemáticas coas que se atopan ao retrasarse tanto o reparto das subvencións pois, segundo lles relataron, chegan moi tarde, cos tempos moi xustos e con novas modificacións que afectan considerablemente ás xustificacións.

Segundo Otero, “os  clubs criticaron as actitudes e desconsideración do Concelleiro de Deportes xa que, ademais de non cumprir co compromiso de recuperar a partida orzamentaria reducida no 2020, mostrou unha falta de diálogo e negociación para tratar as bases das subvencións”, pero o máis grave para o esquerdista, e que ”polo que nos din, tampouco atende á petición de xuntanzas que a ADM ten formulado en varias ocasións”. Unha actitude que sorprende aos esquerdistas pois “agardabamos obter dos clubs as respostas que non tivemos no pleno, e resultou que eles buscaban esas respostas en nós, agardando que nos tivera respondido por e-mail como prometera”, sentenza Otero.

Tamén houbo críticas polo estado en que se atopan moitas das instalacións deportivas do municipio, “polo visto as canastras do pavillón de Conmeniño non se poden utilizar e na cantina do Campo de fútbol de Lampáns entra auga” indica Otero, que tamén denuncia o retraso da obra de adaptación do club de Remo Mecos, “que tiña que estar rematada hai máis dun ano e que está a ocasionar problemas aos directivos e deportistas do club”.

Deste modo, Esquerda Unida quere denunciar este desdén aos clubs e esixe ao Concelleiro de Deportes “respostas e un cambio de actitude cara o deporte local e se non está capacitado para facer ben o seu traballo que presente a súa dimisión”.

Gabinete de Prensa

Esquerda Unida O Grove