Esquerda Unida solicita toda a documentación do Plan de Sustentabilidade Turística e reclama explicacións sobre a execución dos fondos europeos

Piden acceso ao expediente completo do proxecto "A Gastromeca", tras rematar o prazo de execución, para comprobar se o Concello executou e xustificou correctamente os 2 millóns de euros dos fondos Next Generation. Advirten de que actuacións como a obra da Praza do Corgo ou a Ruta do Burro Fariñeiro suscitan dúbidas sobre o seu remate dentro do prazo previsto. 

 Lembran que levan todo o mandato realizando un seguimento da execución do plan, advertindo dos atrasos e do risco de perder parte dos fondos europeos por incumprimento dos prazos. Reclaman a convocatoria do Consello Local de Turismo para que o goberno dea explicacións.

O Grove, 2 de xullo de 2025.- O grupo municipal de Esquerda Unida vén de presentar por rexistro unha solicitude de acceso ao expediente completo do Plan de Sustentabilidade Turística en Destino (PSTD) "A Gastromeca", unha vez rematado o prazo de execución establecido na addenda ao convenio subscrito entre a Axencia de Turismo de Galicia e o Concello do Grove en maio do 2025. 

A formación considera que, finalizado o período previsto para executar o proxecto, é o momento de facer un balance rigoroso sobre a utilización dos fondos europeos Next Generation e comprobar se o Concello executou e xustificou correctamente os dous millóns de euros concedidos para este plan. 

Dende a concesión destes fondos europeos, Esquerda Unida realizou un seguimento continuado da súa execución, interesándose en numerosas ocasións polo desenvolvemento das diferentes actuacións, preguntando polos atrasos acumulados e advertindo reiteradamente do risco de que o Concello non fose quen de executar e xustificar integramente o investimento dentro dos prazos establecidos. 

A solicitude presentada polo grupo municipal reclama a relación detallada de todas as actuacións executadas, indicando para cada unha delas o investimento inicialmente previsto e o finalmente realizado, a empresa adxudicataria, as datas de inicio e remate e o seu estado definitivo de execución. 

Así mesmo, solicitan copia das certificacións finais das obras, das actas de recepción, das certificacións emitidas pola dirección facultativa ou polos responsables dos contratos, así como das facturas e pagamentos realizados con cargo ao plan. 

Do mesmo xeito, pide acceso á documentación remitida polo Concello á Axencia de Turismo de Galicia para a xustificación técnica e económica do PSTD, ao expediente de peche do programa e á resolución ou comunicación oficial sobre o resultado desa xustificación, incluíndo, no seu caso, posibles requirimentos, minoracións da subvención ou expedientes de reintegro. 

Segundo explica o seu voceiro, José Antonio Otero, esta solicitude cobra especial importancia porque o prazo de execución rematou o pasado 30 de xuño e existen actuacións que suscitan dúbidas sobre a súa finalización efectiva. 

Entre elas, a formación cita a obra da Praza do Corgo, unha das últimas actuacións iniciadas con cargo ao plan e que, segundo puideron comprobar, continúa sen estar completamente rematada. Así mesmo, tamén expresan dúbidas sobre a finalización da actuación correspondente á Ruta do Burro Fariñeiro, ao non constarlles que todos os traballos previstos estean completamente executados. 

A estas actuacións súmanse outras incluídas na última relación de investimentos facilitada polo propio Concello, respecto das que tampouco lles consta a súa execución definitiva nin, no seu caso, as modificacións ou a súa substitución por outras actuacións. Precisamente por iso solicitan acceso ao expediente completo, co obxectivo de coñecer cal foi finalmente o grao de execución do Plan e como foi xustificado perante a Axencia de Turismo de Galicia. 

"Levamos todo o mandato facendo un seguimento deste proxecto porque sempre tivemos claro que estaba en xogo unha oportunidade histórica para O Grove. Durante estes anos advertimos dos atrasos e da necesidade de acelerar a execución das actuacións para non poñer en risco os fondos europeos. Agora que o prazo rematou e en vista de que existen actuacións que aparentemente non están rematadas, é lóxico preguntarse como se vai xustificar o investimento. E por iso solicitamos toda a documentación. Non queremos especular, queremos coñecer con rigor se todas as actuacións foron executadas, certificadas e aceptadas conforme ás esixencias dos fondos europeos", afirma Otero. 

Dende Esquerda Unida lembran que os fondos Next Generation non rematan coa execución material das obras, senón que requiren unha completa xustificación técnica, administrativa e económica. "Os fondos europeos non se avalían polas fotografías nin polas notas de prensa. Avalíanse mediante certificacións, informes técnicos e unha correcta xustificación económica. Iso é o que queremos comprobar", subliña o voceiro. 

Ademais da documentación, Esquerda Unida solicita ao goberno municipal a convocatoria do Consello Local de Turismo, co obxectivo de presentar un balance público da execución do Plan de Sustentabilidade Turística, informar do grao de cumprimento dos obxectivos previstos e explicar o resultado final da xustificación dos fondos europeos perante os representantes do sector turístico e a veciñanza. 

Para a formación, un proxecto que mobilizou dous millóns de euros de financiamento europeo debe concluír cun exercicio de transparencia e rendición de contas. "Estamos a falar dun dos maiores investimentos públicos recibidos polo Concello do Grove nas últimas décadas. A veciñanza ten dereito a saber canto se executou, como se executou, se todas as actuacións foron aceptadas polos organismos competentes e se existe algún risco de perda ou devolución de fondos. Esa información debe facerse pública", conclúe Otero. 

Esquerda Unida insiste en que a correcta xestión dos fondos europeos non remata coa inauguración das actuacións, senón coa súa completa execución, certificación e xustificación administrativa. Por iso agardan que o goberno facilite, na maior brevidade posible, toda a documentación solicitada e convoque o Consello Local de Turismo para presentar un balance público dun proxecto que supuxo un dos maiores investimentos recibidos polo municipio e sobre o que consideran imprescindible ofrecer a máxima transparencia.

Esquerda Unida acusa ao goberno local de “condenar O Grove ao caos” durante o verán

O grupo municipal denuncia que o verán no Grove estivo marcado polo caos circulatorio, a falta de prazas de estacionamento, os servizos públicos saturados e a inacción dun goberno que, malia ter recibido múltiples avisos, non puxo en marcha ningunha medida de prevención. 

A formación critica tamén a mala imaxe xerada pola falla de limpeza e recollida de lixo selectivo, o desleixo na atención ás praias e a ausencia de medidas de control e planificación, o que cualifican como “un novo fracaso do PSOE” á hora de xestionar a tempada estival.

O Grove, 3 de setembro de 2025.- Esquerda Unida do Grove fixo este mércores un balance moi crítico da tempada estival, asegurando que “cando pensabamos que o caos do verán pasado era insuperable, este goberno demostrou a súa capacidade de superación, conseguindo empeoralo”. A formación acusa ao executivo de José Cacabelos de “condenar a vila ao caos por culpa da súa deixadez e incompetencia”, e denuncia que “a imaxe que se ofreceu este verán foi nefasta, tanto para a veciñanza como para os milleiros de visitantes que nos escollen. A sensación que se levaron os turistas foi dunha vila abandonada”. 

O voceiro municipal, José Antonio Otero, foi rotundo, “Este goberno só funciona a base de improvisación e propaganda. Non existe nin unha soa planificación seria. Levamos meses pedindo o pintado dos pasos de peóns e o desbroce de rúas e estradas, e chegamos a xullo cunha vila sen sinalización horizontal, con rúas recen asfaltadas sen delimitar e con beirarrúas e camiños invadidos pola maleza, provocando unha imaxe dantesca e un serio perigo para os viandantes. É un auténtico milagre que non se producira un accidente fatal”. “Non é de recibo que se pinten parte das sinalizacións horizontais e se desbroce en pleno agosto” sentenciou. 

Otero incidiu tamén na falta de efectivos da Policía Local, na inexistencia dun servizo de guindastre e na falta de estacionamentos disuasorios. “Este verán O Grove converteuse practicamente nunha vila sen lei. Calquera podía aparcar diante dun garaxe, circular en dirección contraria ou ocupar beirarrúas sen que pasara nada. E mentres tanto, seguimos sen un servizo de guindastre, algo que levamos anos reclamando e que sería fundamental para garantir o cumprimento das normas e dar solución inmediata ás persoas afectadas”. “Este goberno non tivo capacidade para crear zonas de estacionamento disuasorio, tanto nas inmediacións dos areais como no propio casco urbano, a pesar de comprometerse a iso e contar con propostas enriba da mesa dende hai tempo. O abandono foi tal que incluso se reduciron prazas de estacionamento no aparcadoiro de Entrehortas debido á obra de humanización da zona, que acumula un serio retraso”. 

Tamén a concelleira Susana Millán cargou con dureza contra a xestión turística e a ausencia de planificación. “Neste último mes, o alcalde chegou a recoñecer que non estamos preparados para recibir a afluencia de visitantes, pero a realidade é que o que non está preparado é el nin o seu goberno. Despois de dez anos no poder, seguimos sen técnico especializado, sen un plan turístico, sen estratexia e sen mesas de traballo co sector. O que hai son declaracións vagas na prensa para xustificar o fracaso da súa xestión”. 

Millán fixo especial fincapé na problemática do autocaravanismo. “Pasamos do abandono absoluto á tentación de prohibir, e facelo de forma ilegal. O turismo de autocaravanas leva anos medrando e é tan respectable como calquera outro, pero necesita infraestruturas e servizos mínimos. Nós propuxemos a creación de áreas de autocaravanas con servizo de descarga e recollida de augas, gratuítas ou de pago, pero o goberno fixo oídos xordos. Se non se actúa, seguirán os problemas de convivencia e os discursos contra este tipo de visitantes”. “A acampada fóra dos espazos habilitados e as actitudes incívicas dunha parte dos autocaravanistas, como a do resto de visitantes e veciñanza, é sancionable sen necesidade de máis regularización, o problema é que non hai quen sancione”. 

 Para a concelleira de Esquerda Unida “a tempada pode considerarse exitosa en canto a afluencia, pero dubidamos que quen se achegou por primeira vez a O Grove contemple regresar o vindeiro ano”. Segundo Millán, “a solución pasa por contratar persoal especializado e sentar ao sector e traballar nunha planificación e unha estratexia turística conxunta que marque o camiño a seguir e as necesidades reais”. 

Pola súa parte, Anxo Meis, puxo o foco na situación dos paseos e accesos ás praias, que cualificou como “un perigo público”. “Levamos anos advertindo do deterioro das pasarelas de madeira e dos accesos aos areais, e a realidade é que cada ano están peor. Táboas levantadas, pasamáns rotos ou directamente inexistentes,… O resultado é que houbo numerosos incidentes, o máis grave o dunha persoa evacuada en helicóptero na zona de Pedras Negras. E o alcalde responde con cifras inventadas de máis de 4 millóns de euros para a súa reparación, sen auditoría nin informe técnico que o avale. Iso non é seriedade, é improvisación e abandono”. 

Meis insistiu en que esta situación podería terse evitado con algo tan simple como un plan de mantemento anual. “Non estamos falando de obras faraónicas, senón de revisar cada ano o estado dos paseos e accesos, reparar o que estea danado e asegurar a súa seguridade. Cando non se fai nada, o resultado é o que temos hoxe: infraestruturas en estado lamentable e risco para as persoas”. 

Outro dos puntos destacado por Meis foi a recollida selectiva de residuos, que, segundo denunciaron, “non funcionou como debería”. “Foron moitas as ocasións nas que os colectores de cartón, plástico e/ou vidro estiveron cheos durante días sen que a empresa encargada procedese á súa retirada. Xa o advertimos en pleno e pedimos aumentar a frecuencia de recollida, sobre todo no casco urbano polo incremento poboacional, pero o concello fixo caso omiso”. 

A situación levou a que moitos usuarios deixaran bolsas e caixas acumuladas a carón dos colectores, “ofrecendo unha imaxe lamentable da vila”. Meis lembrou que a primeira vez que EU denunciou o problema “díxosenos que fora un erro puntual, pero a realidade é que se repetiu en numerosas ocasións, demostrando que o problema é estrutural e de falta de previsión”. 

Os tres concelleiros coincidiron en que a vila non pode seguir neste camiño. “Cada verán a situación empeora, e todo porque non hai planificación, non hai mantemento e non se aposta polos servizos públicos. O Grove non pode seguir á deriva, funcionando a golpe de improvisación. Se non se toman medidas serias, cada tempada estival converterase nun problema maior ca o anterior”, concluíron. 

Entre as medidas que Esquerda Unida propón destacan: dotar de máis persoal e medios aos servizos municipais, crear unha brigada estable de limpeza e desbroce, poñer en marcha o servizo de guindastre e depósito de vehículos, habilitar zonas de estacionamento disuasorio, crear áreas para autocaravanas, mellorar a recollida selectiva de residuos e, sobre todo, abrir un debate serio sobre o futuro turístico da vila a través do Consello Local de Turismo e coa contratación dun técnico especializado. 

“Se non temos unha vila limpa, ordenada e mantida para nós mesmos, é imposible tela en boas condicións para os que nos visitan”, conclúen.

Esquerda Unida denuncia que O Grove segue sen estratexia turística mentres o alcalde só fala da taxa

 

Para a concelleira Susana Millán, a presenza do Grove en FITUR 2025 volveu depender da iniciativa privada e do liderado doutros concellos ou administracións, evidenciando a falta dunha estratexia turística propia.

Critican que o goberno municipal siga sen impulsar proxectos reais mentres centra todos os seus esforzos en reclamar unha taxa turística.

O Grove, 31 de xaneiro de 2025. Un ano máis, o Grove careceu dunha presenza propia e diferenciada en FITUR, a maior feira de turismo do Estado. A participación da vila limitouse a unha iniciativa externa, a que supuxo a promoción da Festa da Centola levada a cabo pola asociación empresarial Emgrobes, e a unha compartida, como foi á presentación da media maratón "Entre Rías" que transcorre entre o Grove e o Concello de Sanxenxo.

Sobre este evento, a concelleira de Esquerda Unida, Susana Millán, denuncia que o goberno municipal non foi capaz de reclamar para O Grove o protagonismo que lle corresponde na organización desta proba deportiva. "O compromiso inicial era que cada ano a carreira alternase o inicio e final entre os dous concellos, pero nin sequera isto foi quen de defender con forza o noso alcalde”, lamenta Millán, que á vez afirma que “acoller a chegada suporía un impulso importante para a hostalería local, pero teremos que conformarnos con ser saída por segundo ano consecutivo, o que demostra o pouco peso político de Cacabelos ante o seu homólogo e Sanxenxo”.

Desde Esquerda Unida tamén critican que a única prioridade do Alcalde, que á vez é o concelleiro de Turismo, sexa a implantación dunha taxa turística. "En agosto do pasado ano, Cacabelos declaraba que o turismo supón un gasto de máis de medio millón de euros para o Concello. O que nos preguntamos é de onde vén este afán recadatorio, sobre todo cando ten dende 2023 dous millóns de euros da Unión Europea para a Gastromeca e aínda non foi capaz de executar máis que o 32%. Nin tan sequera sacou a concurso a contratación da consultora necesaria para desenvolver todo o proxecto", denuncia Millán.

A edil de EU tamén lembra que o goberno municipal segue sen aprobar normativas esenciais para a xestión turística da vila, como a ordenanza de caravanas ou a de terrazas, ou crear unha mesa de traballo para procurar unha solución á proliferación das vivendas turísticas, tal e como acordaron ao inicio do mandato. Ademais, están pendentes compromisos como as bases para as Centolas de Ouro, a actualización do material promocional ou a recuperación dunha páxina web turística propia.

Por último, Esquerda Unida considera que os fondos europeos Next Generation deberían destinarse a crear un produto turístico sólido, que beneficie ao empresariado local e que poida ser levado a FITUR como unha aposta propia do Concello. "Hai oito anos coincidiamos en que o modelo de promoción en FITUR non era o axeitado, pero Cacabelos prometera buscar unha nova fórmula adaptada ás demandas actuais do sector. O problema é que, desde entón, nada se fixo", conclúe Millán.

Esquerda Unida solicita información sobre o servizo de Tren Turístico

O grupo municipal, que xa realizou unha pregunta no último pleno, ven de solicitar por rexistro información detallada sobre o proceso de licitación do servizo de Tren Turístico. Buscan esclarecer as condicións do contrato e verificar que o vehículo cumpre con toda a normativa vixente.

O Grove, 10 de outubro de 2024.- Esquerda Unida demanda máis información sobre o proceso de adxudicación do servizo de Tren Turístico do Grove. Despois de que no pleno municipal do pasado 30 de setembro se abordara a situación de retraso na posta en marcha do servizo, derivada da renuncia da empresa inicialmente gañadora, o grupo municipal presentou un requirimento formal para ter acceso ao expediente completo de licitación. O goberno local, tal e como manifestou nesa sesión plenaria, recoñeceu que foi necesario acudir á segunda empresa clasificada, e que esta solicitou unha prórroga para asinar o contrato, aínda que nun curto espazo de tempo o servizo xa se puxo en funcionamento.

Ante esta situación, Esquerda Unida quere coñecer con exactitude a data na que se formalizou o contrato e o momento en que se puxo en marcha o tren. Asemade, consideran imprescindible que se achegue toda a documentación que acredite que o vehículo cumpre coa normativa vixente, incluíndo homologacións, seguros e a ITV actualizada, garantindo así a seguridade e legalidade do servizo ofrecido.

Outro dos puntos sobre os que solicitan información é relativa á proposta técnica presentada pola empresa adxudicataria. Esquerda Unida quere comprobar que se está a prestar o servizo conforme ás condicións recollidas na oferta inicial, especialmente en termos de calidade e seguridade para os usuarios, tanto veciños como turistas.

Advirten que obxectivo é asegurar que o servizo do tren turístico se preste nas mellores condicións posibles, sen prexudicar o interese xeral, polo que seguirán vixiantes para garantir que o servizo se preste en condicións adecuadas para os turistas e a propia veciñanza.

EU presenta unha moción para abordar a situación da vivenda no Grove

 

Poñen o foco na proliferación de vivendas de uso turístico, o incremento do alugueiro e a falta de oferta, como principais causas para o acceso a unha vivenda digna e accesible. 

Solicitan un estudo exhaustivo sobre a vivenda no concello, co obxectivo de abordar a problemática de acceso á mesma. Piden ademais a avaliación da necesidade de declarar zonas de mercado tensionado no Grove.

O Grove, 10 de agosto de 2024 - O grupo municipal de Esquerda Unida presentará no vindeiro pleno do Concello do Grove unha moción que busca abordar a crecente problemática do acceso á vivenda no municipio. A iniciativa pon o foco na urxente necesidade de realizar un estudo detallado sobre a situación da vivenda no Grove, co obxectivo de adoptar medidas efectivas para solucionar un escenario que consideran crítico.

Esquerda Unida sinala que o acceso á vivenda converteuse nun dos problemas máis urxentes e complexos para a veciñanza. Destacan que unha das causas desta situación é debido á proliferación de vivendas de uso turístico que, segundo datos do Instituto Galego de Estatística, no Grove sufriu un incremento do 109,6% dende o 2020, o que está a provocar un impacto negativo no acceso a vivendas de alugueiro e na evolución dos prezos, complicando cada vez máis a posibilidade de acceder a unha vivenda digna.

A moción insta ao goberno municipal a levar a cabo un estudo detallado sobre a situación da vivenda no Grove. Este estudo deberá incluír un censo das vivendas de uso turístico, tanto rexistradas como non rexistradas, un rexistro das vivendas baleiras e as dispoñibles para alugueiro ou compra, e unha análise dos expedientes pendentes de aprobación para novas construcións. Ademais, o estudo deberá avaliar o impacto que está a ter a proliferación das vivendas de uso turístico na poboación residente, así como determinar a necesidade de declarar zonas de mercado tensionado segundo as recentes normativas estatais e autonómicas.

Para garantir un enfoque participativo e rigoroso, Esquerda Unida tamén propón a creación dunha comisión de traballo que integre a todos os grupos municipais e a técnicos especialistas na materia, co propósito de buscar solucións baseadas na información recadada. A moción subliña a importancia de manter un compromiso de transparencia e de comunicación activa coa veciñanza ao longo de todo o proceso, garantindo que as medidas que se implementen sexan coñecidas e discutidas con todos os sectores afectados.

Este movemento de Esquerda Unida busca, en definitiva, poñer sobre a mesa unha problemática que afecta a un número crecente de veciños e veciñas do Grove, e ofrecer ferramentas para abordala de xeito eficaz, garantindo o dereito a unha vivenda digna para todos.

[ver/descargar moción]

EU critica a xestión turística do Grove e cuestiona a implantación dunha taxa na situación actual do concello

Susana Millán realizou unha contundente análise da situación turística do concello que cualifica como desoladora.

Denuncia o estado de deterioro de paseos, accesos a praias, rutas de sendeirismo ou o estado das rúas, pero tamén da falta de promoción turística. 

Consideran que antes de falar de Taxa Turística é preciso contar cunha imaxe e uns servizos mínimos que, entenden, agora mesmo non se están ofrecendo.

O Grove, 9 de xullo de 2024.– O grupo municipal de Esquerda Unida mostrou as súas reservas sobre a proposta do Alcalde de crear unha Taxa Turística no Grove. Aínda que a agrupación considera comprensible a necesidade de cubrir os gastos xerados pola afluencia turística, como a contratación de persoal, o aumento do consumo da auga, o acondicionamento das praias e accesos,... consideran que “é difícil que esta taxa sexa acollida con agrado polos turistas e o sector nas condicións que está a día de hoxe o concello”. Entenden, en palabras da súa concelleira, Susana Millán, que "antes de falar dunha taxa, é preciso ofrecer unha imaxe e uns servizos, cando menos, mínimos, que a día de hoxe non se están dando".

Cumprido un ano desde as últimas eleccións municipais, a análise que Esquerda Unida fai sobre o estado do turismo no Grove é desoladora. Millán destacou que "nos últimos anos pasamos de ser unha vila referente na nosa contorna a ser unha vila na que levamos máis de 4 anos sen planificación e sen realizar ningunha actuación nesta área". Proxectos emblemáticos como o Paseo de Pedras Negras, Punta Moreiras, Monte Siradella e iniciativas innovadoras como a "Aldea Grobit" ou o "Proxecto Pío" foron abandonados, reflectindo a falta de interese do goberno local polo sector turístico.

A concelleira puxo de relevo o deterioro de diversas infraestruturas turísticas, mencionando especificamente o estado dos paseos de A Lanzada, Pedras Negras ou os accesos ás praias, pero tamén do Paseo de Beiramar, onde “o mobiliario urbano está deteriorado, con elementos oxidados, baldosas rotas e chans afundidos”. Tamén sofren as consecuencias da falta dun plan de actuación o entorno de Punta Moreiras e os Miradoiros de Monte Siradella ou Con da Edra. “Os sinais das rutas de sendeirismo de Adro Vello, Con Negro ou da Ruta Padre Sarmiento foron desaparecendo sendo case imposible facer ou recoñecer o seu trazado e o Museo da Salazón de Moreiras está nun estado lamentable”, denunciou Millán.

Millán criticou a falta de materiais promocionais nos últimos cinco anos, tanto en papel como en formato dixital, e a desaparición da presenza do Grove en feiras de turismo como FITUR. "Pasamos de ter unha web oficial a ter un espazo na web compartida con Sanxenxo do proxecto RED.es. E na última Festa do Marisco, por primeira vez, non se fixo a presentación do cartel da seguinte edición, que finalmente será presentado esta semana, a tres meses de comezar a festa", explicou.

Esquerda Unida tamén destacou a falta de persoal no sector turístico, mencionando a demanda histórica dun técnico de turismo e a vacante no Museo de Salazón que aínda non foi cuberta. Subliñan tamén a preocupación dos veciños e visitantes pola falta de mantemento dos accesos ás praias, a deterioración dos paneis informativos, a falta de limpeza nas rúas e os cheiros dos colectores nos meses de calor. "O lamentable estado do asfaltado, a confusa sinalización viaria e as vivendas en estado ruinoso contribúen á sensación de abandono da vila", indicou.

A concelleira de Esquerda Unida destacou a inacción do goberno local respecto ao Plan de Sustentabilidade Turística "Gastromeca", que conta con 2 millóns de euros de fondos europeos, "un ano despois do anuncio, aínda non se executou un só euro”. Por último, critica a falta de constitución do Consello Local de Turismo e a ausencia de reunións prometidas. "Todo isto demostra a falta de interese deste goberno polo sector turístico, clave na economía local do Grove”.

Millán concluíu indicando que están dispostos a sentarse e falar de Taxa Turística, “pero primeiramente é preciso saber cal é o modelo turístico que queremos para O Grove e ofrecer uns servizos mínimos e unha imaxe de calidade que a día de hoxe non se está ofrecendo”.

Esquerda Unida denuncia a inacción do goberno cos fondos europeos

 

O grupo municipal Esquerda Unida advirte que, tras un ano dende a autorización para a execución dos 2.000.000 de euros do PSTD A Gastromeca, o Concello do Grove aínda non investiu nada debido á falta de contratación dunha consultora. Esta demora ameaza a execución do proxecto e podería obrigar ao Concello a devolver os fondos, xunto cos intereses, afectando negativamente á economía local.

Piden a convocatoria do Consello Local de Turismo para que o Alcalde explique os motivos do atraso na contratación da consultora e o impacto desta demora no PSTD. O grupo reafirma o seu compromiso coa transparencia e responsabilidade na xestión dos recursos públicos, vixiando a evolución deste tema para asegurar o uso eficaz dos fondos europeos.

O Grove, 14 de xuño de 2024 – O grupo municipal de Esquerda Unida denuncia que este mes cúmprese un ano dende que a Xunta de Galicia autorizou ao Concello do Grove a execución dos 2.000.000 de euros do plan de Recuperación, Transformación e Resilencia a través do Plan de Sustentabilidade Turística en Destino (PSTD) denominado A Gastromeca e que “lamentablemente, a día de hoxe, aínda non se investiu nin un só euro deses fondos europeos”

Dende Esquerda Unida indican que o Plan A Gastromeca, destinado a impulsar o turismo sostible e a dinamización económica do Grove, está estancado debido a que non se realizou a contratación da consultora encargada de desenvolver o proxecto. Esta parálise non só representa unha perda de tempo valioso, senón que tamén ameaza a execución completa das actuacións previstas antes do 31 de decembro de 2025, xa que, de non cumprirse os prazos, o Concello arríscase a ter que devolver os fondos á Unión Europea, “co correspondente pago de intereses, que sairán dos petos dos veciños e veciñas do Grove”.

Susana Millán, concelleira de Esquerda Unida, manifestou a súa preocupación, “temos un proxecto que inicialmente contemplaba a execución en dous anos e medio e que agora terá que desenvolverse en pouco máis dun ano, cos conseguintes problemas e riscos. Non podemos permitir que este financiamento crucial se perda pola incompetencia do goberno e a falta de planificación. É fundamental que se tomen medidas inmediatas para evitar que esta situación nos leve a un escenario que afectaría ás arcas municipais." 

Esquerda Unida insta ao goberno municipal a actuar con urxencia para desbloquear a situación e asegurar que os fondos Next Generation sexan empregados adecuadamente para o desenvolvemento do noso concello. “É imprescindible que se inicie o proceso de licitación da consultora canto antes, garantindo así a implementación efectiva da totalidade do Plan A Gastromeca e evitar repercusións económicas negativas para a veciñanza”, asevera Millán.

Dende Esquerda Unida piden ao Alcalde, quen á súa vez é o concelleiro responsable de Turismo, a convocatoria do Consello Local de Turismo para que dea conta dos motivos do retraso da contratación da consultora e como afectará a demora ao desenvolvemento do PSTD.

Deste modo, o grupo municipal volve mostrar o seu compromiso en defender os intereses dos veciños e veciñas do Grove, esixindo transparencia e responsabilidade na xestión dos recursos públicos e aseguran que seguirán vixiando atentamente a evolución deste tema e non dubidarán en tomar as accións necesarias para asegurar que os fondos europeos sexan utilizados de maneira eficaz e beneficiosa para a nosa localidade.

EU insta ao Concello do Grove a aproveitar as axudas para o Embelecemento Turístico do Litoral

 

Cun investimento global que supera os 2,7 millóns de euros, a concelleira de Esquerda Unida, Susana Millán, realiza propostas concretas en cada unha das tres liñas subvencionables; Transición Verde Ecolóxica, Transición Dixital e Transición Accesible e Inclusiva.

Esquerda Unida busca mellorar infraestruturas e promover a sustentabilidade para fortalecer o turismo local no Grove e pide que convoque o Consello Local de Turismo para valorar as propostas e crear os correspondentes proxectos antes de que remate o prazo o vindeiro 5 de marzo.

O Grove, 22 de febreiro de 2024 - O grupo municipal de Esquerda Unida, insta ao Goberno local a aproveitar as oportunidades proporcionadas pola segunda convocatoria de axudas da Xunta de Galicia para o embelecemento turístico do litoral, cun investimento global de máis de 2,7 millóns de euros.

A Xunta de Galicia, a través do Diario Oficial de Galicia, publicou a convocatoria destas subvencións que se poden solicitar ata o 5 de marzo. Así, Esquerda Unida, a través da súa concelleira, Susana Millán, presenta unha serie de propostas concretas para cada unha das liñas subvencionables.

Na Liña 1, correspondente á Transición Verde e Ecolóxica, Esquerda Unida considera que se pode utilizar para mellorar e musealizar o Museo de Salga, potenciar as rutas “Xacobea Mar de Arousa” e a do “Padre Sarmiento”, recuperar e poñer en valor a ruta do litoral “As Xentes e o Mar” e mellorar os elementos e sinaléticas da zona de especial protección de aves do litoral grovense.

En canto á Transición Dixital (liña 2) Susana Millán entende que o concello pode aproveitala para crear códigos QR, guías turísticas interactivas e folletos dixitais, así como deseñar aplicacións para promover o destino e eventos, tales como a Festa do Marisco.

Por último, na liña 3, que inclúe a Transición Accesible e Inclusiva, dende Esquerda Unida propoñen mellorar a accesibilidade a espazos do litoral, como praias, paseos e miradoiros e adaptar a sinalética turística para que poida chegar ás persoas invidentes.

Millán exhorta ao Goberno local a valorar as propostas e, en todo caso, a convocar o Consello Local de Turismo pa consensuar e preparar proxectos sólidos para acollerse estas axudas antes de que finalice o prazo. Destacan a relevancia de investir nestas áreas para fomentar o turismo local e contribuír ao desenvolvemento sustentable do concello.

Esquerda Unida denuncia a inacción do goberno local en materia de turismo

A formación política reclama a convocatoria do Consello Local de Turismo, a definición das bases para as Centolas de Ouro, a publicación das bases para o cartel da Festa do Marisco 2024 e a constitución da mesa para o seguimento da aplicación do PSTD.

Esquerda Unida continúa agardando que o goberno local cumpra coas súas promesas e compromisos en materia de turismo, un sector estratéxico para o desenvolvemento económico e social do Grove. Así o manifestou a concelleira esquerdista, Susana Millán, nun comunicado de prensa.

O Grove, 20 de decembro de 2023.- Esquerda Unida expresou a súa preocupación pola falta de avances na área de turismo e as promesas incumpridas por parte do actual goberno local, encabezado por José Antonio Cacabelos que, ademais de Alcalde, é o concelleiro delegado da área de Turismo.

Segundo a concelleira de Esquerda Unida, Susana Millán, dende que o pasado mes de xullo Cacabelos tomara posesión de Alcalde e asumira as funcións da área de turismo, os membros do Consello Local continúan agardando a que se convoque a xuntanza de constitución do órgano sectorial, que debería ser o espazo de participación e consenso entre os axentes implicados no turismo. “Non entendemos por que o Alcalde non convoca o CLT, cando é unha ferramenta fundamental para planificar, coordinar e avaliar as políticas de turismo no Grove. Non se pode xestionar o turismo de costas á cidadanía, aos profesionais e ás entidades que traballan neste ámbito”, declarou Millán.

A esquerdista tamén criticou a falta de interese do goberno local por crear as bases para as Centolas de Ouro, o máximo distintivo que se outorga durante a Festa do Marisco. Segundo Millán, o Alcalde comprometeuse a reunir en novembro o CLT para redactar unhas bases que definiran os méritos para ser nominado ás Centolas de Ouro, pero a día de hoxe segue sen ser convocado. “É unha falta de respecto e de seriedade por parte do Alcalde, que non cumpre coa súa palabra nin coas súas obrigas. Levamos anos falando da necesidade de crear esas bases, e desta volta asegurou e perxurou que en novembro comezaríamos a súa redacción”, afirmou Millán.

A carencia de interese do goberno local na Festa do Marisco tamén foi resaltada por Millán, mencionando a ausencia, por primeira vez, do cartel anunciador da edición 2024 durante o evento deste ano e denunciando que a día de hoxe sigan sen publicarse as bases para o concurso dese cartel, que é crucial para a promoción da Festa, un dos eventos gastronómicos máis importantes da comunidade. “É unha mostra máis da falta de planificación e de promoción do turismo por parte do goberno local, que non é capaz de aproveitar o potencial da Festa do Marisco como un reclamo turístico de primeira orde”, concluíu Millán.

Outra das cuestións que preocupa a Esquerda Unidaé a falta de información sobre o Plan de Sustentabilidade Turística en Destino (PSTD), un proxecto financiado polo Ministerio de Industria, Comercio e Turismo a cargo dos fondos do Plan Recuperación da Unión Europea, no que O Grove conta cun orzamento de 2.000.000 euros para mellorar a competitividade e a sustentabilidade do destino turístico. Millán denunciou que o Alcalde non creou a mesa de seguimento da execución do plan, tal e como se comprometera con Esquerda Unida, polo que descoñecen se xa se contratou a consultora que se precisaba para traballar neles, e cales son as consecuencias de non ter executado a parte correspondente ao 2023. “Temos moitas dúbidas sobre este proxecto, que debería ser unha oportunidade para impulsar un modelo de turismo máis sostible, innovador e inclusivo, pero que tememos que se converta nun fracaso por culpa da mala xestión do goberno local”, advertiu Millán.

Esquerda Unida considera unha burla que o Alcalde fale de taxa turística tal e como ten a vila

O Grove, a 12 de agosto de 2023.- A principios de semana, o Alcalde do Grove facía unhas declaracións sobre a necesidade de crear unha taxa turística no concello grovense a raíz das noticias sobre a aplicación da mesma na capital galega. Afirmaba que en moitas cidades españolas e europeas xa se aplica este tipo de taxa e que estaba valorando a aplicación no Grove. Unhas palabras que Esquerda Unida considera "desproporcionadas e unha burla". 

Para a concelleira e responsable de turismo da agrupación esquerdista, Susana Millán, “querer comparar a nosa vila con urbes que ofrecen aos visitantes servizos que aquí nin se abordan, parécenos desproporcionado. Unhas vilas e cidades que contan durante todo o ano con transporte público, estacionamentos vixiados ou actividades de ocio, deportivas, culturais, congresos, exposicións,...”  

Así, Esquerda Unida considera “unha burla que o Alcalde e o seu equipo de goberno cheguen a falar deste tipo de canon e menos dunha aplicación a curto ou medio prazo despois dos últimos catro anos de nula xestión turística que levou a O Grove a un estado de abandono que enfada por igual á veciñanza e aos turistas”. 

Susana Millán opina que non se pode falar de taxa turística “mentres non exista consenso co sector e contemos con un Plan de Desenvolvemento Turístico, un departamento de turismo con persoal, unha oficina de turismo aberta durante todo o ano,  unha páxina web de turismo actualizada, bolsas de estacionamento, unha ordenanza municipal actualizada que regule as terrazas, unha que regule as vivendas de uso turístico, o estacionamento de autocaravanas, os ruídos, as zonas de carga e descarga dos buses turísticos,...”. 

Segundo Millán, “agora que xa estamos na metade do mes de Agosto e vendo como se preparou a nosa vila para a chegada do verán podemos afirmar que, outro ano máis, o que identifica a este goberno é a falta de previsión e interese polo sector turístico”.  “Moitas das labores de mantemento, limpeza e desbroce, reparacións de infraestruturas, continúan pendentes. Incluso un dos servizos máis demando nos meses de verán como o de socorrismo nas praias, estivo a piques de desaparecer”, denuncia a esquerdista, que considera que o goberno municipal “non aposta polo sector turístico a pesar de presumir de que é un dos eixos económicos máis importantes da nosa vila, e a mostra está en que non existe unha liña real de traballo”. 

Por estes motivos, dende Esquerda Unida ven a proposta de aplicación dunha taxa turística, como “unha burla e un afán meramente recaudatorio de Cacabelos” e instan ao Alcalde a “traballar para ofrecer primeiramente uns servizos de calidade ao nosos visitantes e logo poderemos ver de aplicar a taxa correspondente”.