EU pide ao goberno que municipalice os servizos de Axuda a Domicilio e Limpeza de Instalacións Municipais

 

Os servizos xestionados por Atendo Calidade SL e Clece SA remataron o contrato en 2018 e 2020 respectivamente e dende entón prestan o servizo de forma “irregular”.

Clece denunciou ao concello por non ter convocada unha nova licitación e o xulgado deulles a razón. EU quere que se aproveite a situación para prestar os dous servizos con xestión directa municipal.

O Grove, 5 de abril de 2023.- Foi xa en outubro de 2018 cando Atendo Calidade SL rematou o contrato que, a través da licitación pública, adquiriu co Concello do Grove para prestar o servizo de Axuda a Domicilio. Dende entón foron numerosas as ocasións nas que o grupo municipal de Esquerda Unida ten preguntado no pleno pola situación na que se atopa este demandado servizo e cando se procedería a unha nova licitación, facendo sempre fincapé na necesidade de procurar unha xestión pública do servizo, máxime tendo en conta as diferentes queixas que as traballadoras lles teñen trasladado sobre o trato que lles dá a empresa actualmente responsable do servizo. Segundo o voceiro de Esquerda Unida, José Antonio Otero, "a resposta dende o goberno sempre foi a mesma, que estaban preparado os pregos e que, entre tanto, o servizo se seguía prestando dun xeito un tanto irregular en canto ao formato utilizado para continuar vinculando a relación contractual" e indica que ante a petición de que se procurase a remunicipalización do servizo, “dende o goberno recibíamos unha negativa absoluta”, cuestión que non lles era estraña, “pois só hai que ver como nos últimos 8 anos de mandato de Cacabelos o que se fixo foi todo o contrario, externalizar os servizos”. Otero indica que no último pleno, “o Alcalde asegurou contar cun informe que lles avalaba a continuidade do servizo de forma externalizada”, documento que xa ten pedido o voceiro esquerdista por rexistro, pois “dubida” da veracidade das palabras do Alcalde.

Así as cousas, dende Esquerda Unida seguen apostando pola xestión pública dos servizos que ten que prestar o concello aos seus veciños e, ao servizo de Axuda a Domicilio, suman agora a petición de recuperar o servizo de Limpeza de Instalacións Municipais, pois comprobaron que o contrato que concello ten con Clece SA tamén finalizou hai uns anos, concretamente en xuño de 2021, se ben a empresa xa pedira a finalización do mesmo logo do primeiro ano de prórroga no 2020, un ano antes de que rematase o tempo máximo da concesión. “Isto significa que, como mínimo, temos dous servizos externalizados que prestan o seu traballo para o concello de forma irregular pois, como mínimo tiñan que ter realizado unha nova licitación”, asevera o voceiro de Esquerda Unida.

Para os esquerdistas, a diferencia entre a situación do servizo de Axuda no Fogar e o de Limpeza de Instalacións Municipais radica na denuncia que a propia empresa xestora da última, Clece SA, ten posto no xulgado ante a pasividade do goberno municipal, pois teñen reclamado a necesidade de realizar unha nova licitación do servizo.

Foi o 14 de novembro do 2022 cando o Xulgado do Contencioso-Administrativo número Un de Pontevedra ditou sentenza favorable a Clece SA e condenou ao concello a tramitar e aprobar, no prazo dun mes, un expediente de contratación e que se formalizara o contrato dentro dos tres meses seguintes, entendendo que, se era preciso que se seguira realizando a conservación e limpeza das instalacións municipais de forma externa, o concello tiña que licitar debidamente o servizo. O concello puxo recurso e este foi desestimado o 10 de marzo deste mesmo ano, condenando tamén ao concello a pagar as costas ata un máximo de 1.000 euros.

A pesar de que a sentenza segue sen ser firme, para Esquerda Unida esta é unha nova mostra “da nula capacidade de xestión do goberno municipal, que incumpre os procedementos administrativos e logo tenta solucionalos utilizando os recursos públicos en batallas xudiciais sen sentido”, denuncia José Antonio Otero, que lle pide ao Alcalde “que aproveite a circunstancia para traballar nunha recuperación do servizo e xestionalo de xeito público a través do concello”.

Sentenza Xulgado Clece SA

O goberno do Grove privatiza a xestión do museo da Salga en Punta Moreiras

Dende Esquerda Unida denuncian a contratación dunha empresa relacionada coa construción para xestionar o contrato da persoa que presta os servizos no Museo da Salga. Dende o pasado 28 de setembro, e ata o vindeiro 31 de decembro, persoal do museo non é contratado polo concello.

Critican que o Alcalde xustifique a privatización dos servizos amparándose na Reforma Laboral, cando a única razón é a deixadez na estabilización dos postos e a Lei Montoro. Os esquerdistas lémbranlle que a solución está na creación dunha Empresa Municipal de Servizos.

O Grove, 9 de novembro de 2022.- Desde o pasado día 28 de setembro, as instalacións do museo da Salga, sito no lugar de Punta Moreiras, está sendo xestionado por unha empresa privada. O goberno do Grove, presidido por José Cacabelos do PSOE, privatizou a xestión deste espazo museístico municipal unha vez finalizado o contrato das dúas persoas que atendían as instalacións dependentes do departamento de Cultura, competencia delegada na deputada provincial do PSOE, Noemí Outeda. O grupo municipal de Esquerda Unida vén de denunciar este feito, que consideran “unha nova privatización de servizos por parte do Partido Socialista”. Así mesmo, poñen en dúbida que a empresa concesionaria estea cualificada para prestar este servizo.

No pasado pleno do mes de outubro, o voceiro de Esquerda Unida, José Antonio Otero, preguntou pola forma de xestión do Museo da Salga, logo de ter sospeitas de que estaba xestionado por unha empresa privada e ante a dificultade de atopar información ao respecto. O Alcalde, José Cacabelos, confirmou que o contrato da persoa que está actualmente a atender as instalacións de Punta Moreiras ata o 31 de decembro está a ser xestionado pola empresa GESTCONVERT SL, contratada directamente por decreto de Alcaldía. Unha empresa que realiza os seus traballos no ámbito da construción, compra-venda de fincas e instalacións eléctricas e de climatización, sendo adxudicataria de diferentes obras públicas do propio Concello do Grove.

Desde Esquerda Unida veñen a denunciar o que consideran “unha nova privatización de servizos” por parte do goberno socialista, algo que consideran xa unha tónica habitual na xestión de Cacabelos. Ademais, fan fincapé que a empresa adxudicataria da xestión do espazo museístico de Punta Moreiras non está relacionada coa xestión cultural pois “trátase dunha construtora que se pon a cargo dun espazo museístico”.

Denuncian tamén “a incapacidade deste goberno municipal para xestionar o concello” así como a deixadez das súas obrigas da “permanentemente ausente” concelleira de Cultura, Noemí Outeda.

Así mesmo, José Cacabelos xustificou no pleno esta decisión debido á reforma Reforma Laboral aprobada polo goberno de coalición. Non é a primeira vez que o Alcalde do Grove utiliza a Reforma Laboral para xustificar as críticas pola falta de persoal municipal e a externalización de servizos. Sen embargo, desde EU non comprenden esta situación, “por moito que buscamos, o señor Cacabelos é o único alcalde en toda España que se queixa da Reforma Laboral de Yolanda Díaz” e ven nesta xustificación “unha escusa ante a súa incapacidade de solucionar os graves problemas de plantilla do Concello do Grove, froito de máis dunha década de deixadez e da Lei Montoro”.

Ante esta deriva, desde Esquerda Unida propoñen a creación dunha Empresa Municipal de Servizos. Esta proposta non é nova, pois non é a primeira vez que aparece no programa electoral do grupo de esquerdas. “Cunha Empresa Municipal de Servizos teríamos unha ferramenta eficaz para a dotación de persoal aos diferentes servizos municipais, así como unha fonte de financiamento para investimentos públicos do Concello”. Engaden ademais que ante esta proposta, ou a falta de impulso da oferta pública de emprego do concello, o Partido Socialista “prefira solucións máis propias dun cacique de dereitas”.

Esquerda Unida denuncia unha nova privatización dun servizo público

Os esquerdistas fanse eco das palabras do concelleiro de Seguridade Cidadá na prensa anunciando a contratación dunha empresa privada para operar coa grúa dende esta semana ata o mes de outubro. Denuncian que con esta xa son catro as externalizacións de servizos públicos efectuadas polo goberno socialista.

Reclaman, por enésima vez, que se poña en marcha o servizo de guindastre durante todo o ano e cunha xestión pública, tal e como se comprometeu nas negociacións dos orzamentos do 2016.

O Grove, 18 de agosto de 2021.- O Grupo Municipal de Esquerda Unida móstrase sorprendido polas declaracións do concelleiro de Seguridade Cidadá, reflectidas nun medio de comunicación o pasado luns, anunciando a posta en marcha do servizo de guindastre a través dunha empresa privada. 

Os esquerdistas denuncian así a privatización dun novo servizo municipal, “algo que se está convertendo en habitual no goberno de Cacabelos”, indica o seu voceiro, José Antonio Otero, que recorda que nos seis anos de mandato do PSOE “este e o cuarto servizo público derivado a mans privadas pois, primeiro externalizaron o servizo de limpeza de edificios públicos, logo tocoulle ás pistas de padel, en abril deste ano ao mantemento de parques infantís e agora será o guindastre municipal”.

Dende Esquerda Unida indican que a posta en marcha do servizo de guindastre municipal é unha demanda histórica da súa agrupación e que no 2016 chegou a ser un dos acordos co goberno socialista para favorecer a aprobación dos orzamentos nese exercicio, “acordo que Cacabelos nunca cumpriu e, de feito, ese incumprimento constante foi unha das razóns para non apoiar os orzamentos deste ano”, indica o voceiro esquerdista.

Segundo Otero, “reclamamos a posta en marcha do servizo de guindastre porque é unha demanda da veciñanza, pero tamén porque é un dereito das veciñas e veciños que pagan a taxa de vaos, como así se recolle no artigo 10 da ordenanza” e indica que “mesmo a Policía Local ten emitido un informe no 2017 mostrando a necesidade de contar con este servizo”.  

A pesar de que o goberno pon en marcha o servizo de guindastre, Esquerda Unida non admite que este sexa a través dunha xestión privada e tampouco entenden a que atende a contratación da grúa dende esta semana ata o mes de outubro, como sinalou o concelleiro de Seguridade Cidadá na prensa pois, “a necesidade do guindastre é anual, xa que son moitas as veciñas e veciños que ven obstaculizados os seus garaxes sen que se lle dea unha solución”, indica o voceiro esquerdista. 

Dende Esquerda Unida piden ao goberno que renuncie á idea da privatización e traballen para dotar O Grove dun servizo de guindastre durante todo o ano e cunha xestión municipal. “É moi doado gobernar cando os servizos se prestan a través de externalizacións, para iso non é preciso un Alcalde nin concelleiros, o complicado é xestionar os recursos municipais para prestar uns servizos públicos de calidade e este goberno non sabe facelo”, sostén José Antonio Otero.

Gabinete de Prensa

Esquerda Unida O Grove

EU denuncia unha nova privatización de servizos por parte do goberno local

 

O servizo de mantemento dos parques infantís e elementos biosaudables pasará a mans privadas tal e como anunciou o concelleiro de limpeza no pleno do luns.

Os esquerdistas denuncian que esta nova externalización, sumada á da limpeza dos edificios públicos e á semi-privatización das Pistas de Padel, supón un detrimento dos servizos públicos municipais e preguntan cal será o seguinte.

 O Grove, 28 de abril de 2021.- No pleno do pasado luns, o concelleiro de limpeza e mantemento de espazos públicos anunciou, durante a quenda de rogos e preguntas, que o mantemento dos parques infantís e elementos biosaudables pasará a ser realizado por unha empresa privada. Este servizo, que se atopa dende o pasado mércores 21 aberto á presentación de ofertas, conta cun orzamento de licitación de 29.040 € e terá unha duración de 2 anos prorrogables a outros dous. A apertura de ofertas terá lugar o primeiro xoves de maio. 

Para o voceiro de Esquerda Unida, José Antonio Otero, “esta é unha nova mostra do que este goberno leva facendo en detrimento dos servizos públicos do noso concello dende que tomaron as rendas do noso municipio, externalizando o maior número de servizos”.

Segundo indica Otero, “as privatizacións comezaron no pasado mandato cando o servizo de limpeza de edificios públicos pasou a mans dunha empresa externa, unificándose ao da limpeza dos centros educativos (que xa estaba externalizado)”. “Este ano atopámonos cun formato de privatización encuberto nas Pistas de Padel, cando en lugar contratar persoal, ou formalizar as prazas, pasaron a prestar o servizo a través de autónomos”, continua o esquerdista. “Agora tócalle ao servizo de mantemento de parques infantís e elementos biosaudables, pero auguramos que non será o último”, asevera Otero.

José Antonio Otero incide en que “no tanto de recuperar servizos como o da limpeza dos edificios educativos, ou o de axuda no fogar, tal e como lle instou Esquerda Unida en innumerables ocasións, este goberno segue externalizando servizos”.

“Dende Esquerda Unida denunciamos esta situación e preguntamos ao executivo local cal será o seguinte servizo en privatizar; o de augas?, limpeza das rúas ou o da recollida do lixo?” sentenza Otero a vez que recorda que no mandato do cuatripartito (2007-2011) “o servizo de recollida de lixo estivo a piques de ser privatizado, pois o PSOE concordaba co PGD na súa externalización e foi a oposición tallante do concelleiro de EU (Juan Lamelas) á que logo se sumou o BNG, a que evitou esa privatización”.

Así mesmo, a agrupación de esquerdas recorda que o goberno local do PSOE ten paralizada a Oferta de Emprego Público que eles mesmos aprobaron, e que a RPT do concello segue sen aprobar desde que fora impulsada por EU cando participou no goberno cuadripartito. Segundo Otero “estas son dúas ferramentas fundamentais para a dotación de persoal e poder ter uns servizos públicos de calidade, cuestión totalmente abandonada por Cacabelos e o seu goberno”.

Esquerda Unida “lamenta a asunción do programa neo-liberal por parte da agrupación local do PSOE do Grove e os seus representantes no concello” e indican que desde a chegada de Cacabelos á secretaría local do seu partido, este “ocupou o espazo político do PP e converteuse no referente da dereita política no Grove”.

Gabinete de Prensa

Esquerda Unida O Grove