EU presenta unha moción para protexer o medio mariño a través dunha campaña co lema “O Mar Comeza Aquí”

 

A proposta, que defenderá Anxo Meis no vindeiro pleno, pretende concienciar á poboación sobre a importancia de evitar a vertedura de residuos nas redes de augas pluviais. A iniciativa inclúe accións como a instalación de sinalización nos sumidoiros, actividades educativas e a colocación de trampas de lixo.

Esquerda Unida pide ademais que o Concello se adhira á Semana Europea da Redución de Residuos que se celebra anualmente nas últimas semana de novembro e que este ano enfócase no desperdicio de alimentos.

O Grove, 16 de setembro de 2024.– O Grupo Municipal de Esquerda Unida levará ao pleno deste mes unha moción coa que busca impulsar unha campaña de concienciación baixo o lema "O Mar Comeza Aquí". A proposta, que será defendida polo concelleiro Anxo Meis, ten como obxectivo principal sensibilizar á cidadanía sobre a importancia de evitar a vertedura de residuos nos sumidoiros, co fin de protexer a saúde do medio mariño e preservar a riqueza natural do municipio.

Meis explicou que "O Grove, co seu importante patrimonio natural e mariño, non pode permitirse ignorar o problema crecente da contaminación nas nosas costas. Pequenos residuos que se tiran ao chan, como cabichas ou plásticos, acaban nos sumidoiros e, finalmente, no mar, onde causan un impacto negativo tanto no ecosistema como nas actividades económicas que dependen del, como a pesca e o turismo."

A moción inclúe diversas accións concretas, entre as que destaca a instalación de sinalización específica en todos os sumidoiros e puntos de desaugue de augas pluviais do concello, advertindo sobre a conexión directa entre as rúas e o mar. Ademais, proponse a organización de actividades educativas en centros escolares e asociacións veciñais, así como a colaboración con entidades locais para maximizar o impacto da campaña.

Outra das medidas incluídas na proposta é a instalación de "trampas de lixo" nos sumidoiros, co fin de reter os residuos antes de que cheguen ao mar, facilitando así a súa recollida polos servizos de limpeza municipais.

Esquerda Unida tamén busca que o Concello se adhira á Semana Europea da Redución de Residuos (EWWR), que se celebra anualmente nas últimas semanas de novembro e que este ano (do 16 ao 26) enfoca o seu labor no desperdicio de alimentos.

Anxo Meis subliñou que "esta campaña non é só unha chamada á acción para a cidadanía, senón tamén unha oportunidade para que O Grove se converta nun referente na loita contra a contaminación mariña. A preservación do noso medio ambiente é unha responsabilidade compartida, e dende Esquerda Unida estamos comprometidos en liderar esta tarefa".

A moción será debatida no pleno municipal de setembro, onde Esquerda Unida espera contar co apoio do resto de grupos políticos e, sobre todo, co compromiso do goberno municipal para executar esta iniciativa de gran relevancia para o futuro do Grove.

[Ver/descargar Moción]

EU presenta mocións para solucionar a situación do sector do transporte e de apoio á autodeterminación do pobo saharauí

 

No pleno do mes de marzo, o grupo municipal de Esquerda Unida someterá a debate unha moción para a adopción de medidas urxentes para solucionar a situación de incremento de custos do sector do transporte de mercadorías por estradas. Así mesmo, os esquerdistas pedirán o apoio da corporación para unha resolución do conflito do Sáhara Occidental e o dereito de autodeterminación do pobo saharauí mediante un referendo.

As dúas propostas trataranse no punto de mocións de urxencia no pleno que a corporación municipal celebrará este luns 28 a partir das 20.30 horas.

Ver/descargar moción transporte

Ver/descargar moción Sáhara

EU propón habilitar un servizo de comedor para o programa Vellos Tempos

O Grupo Municipal de Esquerda Unida presenta unha moción para o pleno do vindeiro luns 28 co propósito de valorar a posibilidade de poñer en marcha un servizo de comedor para o programa de Vellos Tempos e no futuro centro “Sociosanitario”.

A taxa de envellecemento indícanos que camiñamos cara unha sociedade cada vez máis vella, polo que a demanda de servizos destinados aos coidados, como o programa municipal de Vellos Tempos, un Centro de Día ou similares, será cada vez maior, tanto polo benestar das persoas maiores como polo das súas coidadoras que precisarán dunha conciliación laboral-familiar. A día de hoxe o Concello só conta co programa de Vellos Tempos, que se desenvolve tan só pola tarde, e, aínda supoñendo unha axuda e alivio para moitas familias, resulta insuficiente para unha conciliación plena.

É por iso que dende Esquerda Unida consideramos esencial habilitar unha quenda matutina para o programa de Vellos Tempos, así como por en marcha un servizo de comedor para quen así o requira. Así mesmo, como dende o goberno anunciaron a posta en marcha dun Centro Sociosanitario no edifico do Colexio das Monxas, no lugar do Centro de Día (seguimos apostando por este servizo), tamén entendemos que este debería ofrecer o servizo de comedor.

Para iso, a través desta moción, instamos ao Concello do Grove a realizar un estudo entre a veciñanza (usuarias actuais do programa Vellos Tempos e usuarios potenciais deste programa e dos Centros de Día ou Sociosanitarios) para valorar a posibilidade de habilitar unha quenda de mañá no programa Vellos Tempos e de ofertar o servizo de comedor tanto neste programa como no Centro de Día ou Sociosanitario.

Cremos que é preciso promover unha maior conciliación familiar-laboral e dar unha maior liberdade e alivio ás veciñas e veciños que teñen o labor de “coidadoras”.

 Moción completa:

PARA O ESTUDO E POSTA EN MARCHA DUN SERVICIO DE COMEDOR PARA O PROGRAMA "VELLOS TEMPOS" E O FUTURO CENTRO "SOCIOSANITARIO"

 EXPOSICIÓN DE MOTIVOS

 Como xa temos exposto na moción que presentamos uns meses atrás sobre os coidados das persoas maiores, a taxa de envellecemento é un índice claro de que camiñamos cara unha sociedade cada vez máis vella. Isto indícanos que o número de usuarias e usuarios que requirirán un servizo coma o centro de día e/ou formar parte de programas coma o de “Vellos Tempos”, que se desenvolve no noso concello, será cada vez maior.

Dende Esquerda Unida consideramos primordial que as persoas coidadoras poidan conciliar traballo e familia. O exemplo témolo no ámbito dos máis cativos, onde cada curso escolar ollamos que nos diferentes centros educativos, a demanda dun servizo de comedor escolar vai en aumento. Un servizo que, na maioría dos casos, supón un alivio para as familias e lles facilita a conciliación laboral/familiar ou ter a opción de acceder a un posto de traballo.

Non sucede o mesmo en canto ás familias coidadoras de persoas maiores dependentes. O Concello do Grove carece de Centro de Día e no seu lugar cubre esa necesidade co programa de “Vellos Tempos”. O problema xurde en que ese programa desenvólvese só pola tarde e, ao carecer dun servizo de mañá, moitas familias teñen complicado compatibilizar un traballo co coidado dos seus maiores. Entendemos que se debería estudar e, de ser o caso, poñer en funcionamento unha quenda de mañá para o programa de “Vellos Tempos”. Así mesmo, ao igual que ocorre cos máis cativos, tamén é preciso estudar a posibilidade de poñer en marcha un servizo de comedor para este programa. 

Do mesmo modo, xa que dende o Concello se ten anunciado que no futuro se porá en marcha un Centro Sociosanitario no antigo “edificio das Monxas”, cando se logre mercar, tamén sería preciso que este dispuxera de servizo de comedor, co propósito de promover unha maior conciliación familiar e dar maior liberdade ás veciñas e veciños que teñen a labor de “coidadoras”.

Por todo o anteriormente exposto, é polo que o Grupo Municipal de Esquerda Unida somete á consideración do pleno a aprobación da seguinte

PROPOSTA DE ACORDO

Instar ao goberno municipal a:

1.   Realizar, o máis axiña posible, un estudo entre as familias das actuais usuarias/os do programa “Vellos Tempos”, co propósito de determinar se é factible poñer en marcha unha quenda de mañá e que se oferte o servizo de comedor.

2.   Realizar o mesmo estudo entre as familias de usuarias/os potenciais do programa de “Vellos Tempos” que non acceden ao servizo por realizarse pola tarde.

3.   Cos estudos realizados, e se o resultado así o require, poñer en marcha de inmediato unha quenda de mañá do programa de “Vellos Tempos” e ofertar o servizo de comedor.

4.   Realizar un estudo entre a veciñanza para determinar as/os usuarias/os potenciais dun Centro de Día ou Centro Sociosanitario incluíndo a posibilidade de ofrecer o servizo de comedor en calquera deles e, se o resultado é positivo, poñer en marcha este servizo no momento en que estes funcionen.

 José Antonio Otero González

Concelleiro de Esquerda Unida

O Grove, a 20 de febreiro de 2022

EU cree que a pésima xestión do goberno é a única razón para non organizar a ludoteca de verán

 

Os esquerdistas lembran que a partida orzamentaria para a ludoteca atópase baleira logo de eliminala no 2020 e non ter as contas aprobadas do presente exercicio, polo que consideran que a Covid é tan só unha escusa cando o motivo real é outro.

Entenden que se outros concellos e entidades privadas poden organizalos, O Grove tamén, polo que piden ao goberno que reconsideren a súa postura negativa e organicen a ludoteca para que a veciñanza poida conciliar nunha época de maior actividade laboral. 

O Grove, 21 de maio de 2021. O pasado venres 14 as redes sociais do Concello do Grove sorprendían coa noticia de que a “ludoteca de verán” non ía organizarse debido á pandemia. O goberno socialista escudábase na situación sanitaria para descartar por segundo ano consecutivo a celebración desta actividade estival, moi reclamada polas familias do Grove xa que axuda a conciliar nunha das épocas de máis actividade laboral, que á vez coincide coas vacacións educativas. 

Esta decisión non convence a Esquerda Unida, pois entenden que ese non pode ser impedimento para realizar esta actividade, cando outros concellos e incluso entidades privadas locais si están traballando na realización destas ludotecas-campamentos. Segundo o seu voceiro, José Antonio Otero, “a única explicación que atopamos atende exclusivamente á pésima xestión deste goberno, pois a día de hoxe non teñen aprobado –nin está na axenda a curto prazo– o orzamento do presente exercicio, e estanse rexendo por unhas contas prorrogadas do 2020, nas que anularon a partida de 15.000€ destinadas a esta actividade”.

Otero recorda que en outubro de 2020, cando o executivo local someteu as contas á aprobación do pleno, el mesmo xa advertiu de que isto podería pasar, “pois ao aprobarse as contas a escasos dous meses de rematar o exercicio, ese orzamento sería o que rexería o seguinte ano se non se aprobaba un novo a principios do 2021”. Outro dos puntos que tamén o voceiro esquerdista puxo en dúbida naquel pleno, “o habitual no goberno de Cacabelos, dende que é alcalde é presentar as contas pasado o primeiro semestre, en lugar de facelo antes de comezar o ano ou como moi tarde no primeiro trimestre e isto débese á súa pésima xestión”.

Dende Esquerda Unida recordan que Cacabelos dixo no propio pleno que iso non sucedería, anunciando que ían traballar para presentar as contas como moi tarde en febreiro, pero “a realidade é que estamos en maio e, convocadas xa as comisións do pleno, o Orzamento non se vai debater neste mes”, sentenza Otero.

Por este motivo, os esquerdistas denuncian “as continuas mentiras e escusas utilizadas polo goberno do PSOE para tapar a nefasta xestión que están a realizar”. Para José Antonio Otero, “a pandemia en canto a desculpas, foi o mellor que lle puido pasar ao PSOE, pois xa son numerosas as veces que utilizou a Covid como pretexto, incluso para cuestións que tiñan que estar realizadas antes do comezo desta pandemia”. 

Así mesmo, Esquerda Unida pide ao executivo local que reconsideren a súa postura, procuren partida orzamentaria e organicen a Ludoteca adaptándose á nova normalidade e cumprindo coas medidas sanitarias e de seguridade esixidas, co propósito de ofrecer á veciñanza unha solución á necesaria conciliación que moitas familias do Grove precisan nunha época estival na que é presumible que aumente a actividade laboral e na que os nenos e nenas se atopan nas súas vacacións educativas.

Gabinete de Prensa

Esquerda Unida O Grove

INFORMACIÓN COMPLEMENTARIA:

Vídeo extracto do vídeo do pleno de outubro de 2020 onde o voceiro de EU fai referencia ao que sucedería coa ludoteca se non se aproban os orzamentos 2021 e continúan prorrogados os do 2020.

Vídeo extracto do vídeo do pleno de outubro de 2020 onde Cacabelos indica que querían traer os orzamentos do 2021 como moi tarde en febreiro.

 

Extracto da publicación no facebook do Concello do Grove o 14 de maio de 2021.

https://www.facebook.com/192621247423294/posts/4285066571512054/

A PANDEMIA IMPIDE A ORGANIZACIÓN DA ‘LUDOTECA DE VERÁN’

A situación sanitaria provoca que, por segundo ano consecutivo, non se leve a cabo esta actividade co modelo habitual de presencialidade.

O Concello do Grove leva xa varias semanas realizando as correspondentes consultas e valoracións de cara á recuperación realización da habitual “ludoteca de verán” na que participaban numerosos nenos e nenas da vila nos meses do verán. A pesar dos bos datos con respecto á incidencia da pandemia no municipio, a esixencia de medidas de seguridade relativas a capacidades, distancias de seguridade e uso de máscara e desinfectantes seguen estando vixentes e impiden o desenvolvemento desta actividade coas características previas á pandemia.

Tendo en conta estas circunstancias e a peculiaridade desta iniciativa, na que o fundamental é a interacción dos pequenos e pequenas contando ademais con espazos concretos e limitados, a busca de garantías de seguridade fai necesario non convocar a ludoteca e seguir traballando en medidas que, como esta, poidan contribuír á conciliación laboral das familias. Agárdase que esta complexa decisión contribúa a seguir mellorando no relativo á expansión do virus e que o vindeiro ano se poida recuperar a normalidade nesta e en todas as actividades educativas.