EU denuncia o caos producido polas obras de Alexandre Bóveda e o paseo de Lordelo

 

Consideran un grave erro ter iniciado as dúas actuacións ao mesmo tempo e alertan que non hai indicacións suficientes sobre a circulación e que se produciron cambios respecto ao anunciado e ao mapa elaborado pola Policía Local, provocando caos e desorientación entre a veciñanza. Tachan ao Alcalde de mentireiro por incumprir o anunciado.

Pedirán información sobre as dúas plataformas que se instalarán en sendas curvas do paseo de Lordelo para que circulen autobuses ao entender que será un perigo para os usuarios do carril-bici. Queren coñecer se existe un informe que avale tal circunstancia.

O Grove, 5 de setembro 2022. Hai pouco máis dunha semana, o Alcalde anunciaba o comezo, de forma conxunta, das obras da 3° fase da humanización da rúa Alexandre Bóveda e o asfaltado do paseo de Lordelo, cuestión que dende Esquerda Unida consideran un grave erro pois significa ter pechadas dúas arterias cunha importante circulación de tráfico, así como complicacións para un gran número de veciñas e veciños que teñen as súas residencias nas zonas afectadas. Do mesmo modo, os esquerdistas entenden que esta actuación supón o primeiro engano do Alcalde á veciñanza, pois meses antes afirmou que estas actuacións se desenvolverían por separado. 

Coas obras xa iniciadas, dende Esquerda Unida denuncian que non se está a cumprir o anunciado polo Alcalde e que o mapa que elaborou a Policía Local non ten nada que ver coa situación de circulación actual, "o que está a provocar un caos circulatorio e unha gran desorientación na veciñanza da zona e no resto dos condutores, sobre todo nos que nestes días seguen de vacacións no noso concello", aseveran. 

Falan os esquerdistas da zona de Lordelo que nun principio tíñase anunciado o asfaltado ata o edificio que alberga o SPAD, permitindo a circulación dende esa zona ata a avenida Irmáns Otero Goday, mantendo a rúa do serradoiro co sentido de circulación de sempre. A realidade que se atopan os veciños é que o asfaltado se prolongou a todo o paseo, atopándose cortada a circulación e vendo como a rúa do serradoiro cambiou o seu sentido de circulación sendo agora dende a Aguieira cara a avenida Irmáns Otero Goday. O mesmo sucedeu en Alexandre Bóveda, pois o Alcalde anunciou que o sentido permitido no comezo das obras sería de Terra de Porto cara Rosalía e resulta que é xustamente ao contrario. 

A falta dunha información clara nas diferentes rúas que tornaron o seu sentido, nas que se eliminou o acceso ou se restrinxiu un dos carrís é outro dos motivos criticados por Esquerda Unida que, segundo indican, está a provocar numerosas incidencias. Para os esquerdistas, "o ideal sería ter uns paneis informativos indicando a situación actual da rúa e informando das alternativas para evitar problemas e malestar". 

Así, dende Esquerda Unida tamén indican que, unha semana despois de comezar as obras, nas rúas que cambiaron de sentido seguen aparcados vehículos na dirección anterior, o que crea desorientación entre os usuarios e pode provocar accidentes cando queiran retiralos. 

Toda esta situación, din os esquerdistas, ten culpables "e non son outros que o Alcalde e o seu equipo de goberno, que incumpren co que anuncian e non son quen de facer as actuacións contando co resto dos grupos políticos e sobre todo coa colaboración da cidadanía". Por ese motivo, piden ao executivo "que se poñan as pilas e, xa que as obras aínda van durar un tempo, que fagan o que faga falla para minimizar o caos e a desorientación da veciñanza e que para futuras actuacións non se chegue a esta situación".

Por outra banda, dende Esquerda Unida tamén pedirán información sobre as zonas elevadas que se van a instalar en dous tramos curvos do paseo de Lordelo co propósito de que transiten autobuses, máxime cando non se contemplan no proxecto que saíu a licitación. Para os esquerdistas esta circunstancia supón un gran perigo para os usuarios do carril-bici, pois ao poñer ao mesmo nivel a estrada nesas zonas, os autobuses terán que invadir, sen apenas visibilidade, o carril de circulación destinado ás bicicletas e patinetes. “Queremos saber en base a que informes ou recomendacións se decidiu facer esta modificación do proxecto e quen será o responsable cando suceda unha desgraza nesa zona”, indican dende a agrupación de esquerdas.

EU pregunta polos plans de circulación e estacionamento previstos para o peche dun carril en Alexandre Bóveda

 

Os esquerdistas solicitan unha xuntanza para analizar as posibles consecuencias que provocará esta obra en rúas adxacentes. Xa alertaron disto en setembro de 2021 e queren saber se se preparou algún plan.

Preguntan tamén se o goberno ten algunha alternativa á eliminación de prazas de estacionamento e se valoraron a proposta de EU para crear bolsas de aparcamentos.
O Grove, 7 de febreiro de 2022.- O Grupo Municipal de Esquerda Unida quere despexar dúbidas sobre a obra de humanización do último tramo da rúa Alexandre Bóveda e solicita unha xuntanza de voceiros. E é que os esquerdistas, logo do anuncio da sinatura do convenio entre o Concello e Deputación para o inicio da obra e tras recibir o proxecto da mesma, queren coñecer o plan de circulación previsto para toda esa zona logo de confirmarse que a rúa será de sentido único dende o cruce de Rosalía ata Terra de Porto. Así mesmo, tamén se preocupan polas numerosas prazas de estacionamento que serán eliminadas e preguntan se o goberno contempla algunha alternativa para compensar esta perda.

Dende Esquerda Unida lembran que o pasado mes de setembro, durante unha xuntanza do Plan de Mobilidade Urbana Sustentable (PMUS), o seu voceiro, José Antonio Otero, xa alertou das posibles consecuencias que provocaría en viais alternativos a eliminación dun carril de circulación na rúa Alexandre Bóveda, pois entenden que o tráfico rematará desviándose por estas rúas adxacentes que, segundo a valoración dos esquerdistas, non están capacitadas para soportar un fluxo moi alto de tráfico. Esquerda Unida considera que a veciñanza de rúas como Camiño de Hortos, Sol ou Holanda veranse prexudicados por ese aumento de tráfico, o que provocará maior perigosidade para os viandantes ao tratarse de carrís de circulación estreitos e sen beirarrúas.

Así mesmo, dende Esquerda Unida tamén recollen as queixas polas dúbidas que se lles presentan a moitas das nais e pais dos alumnos e alumnas do CEIP Rosalía de Castro, que entenden que terán que dar un enorme rodeo para levar e recoller as súas crianzas do colexio. 

Os esquerdistas queren saber se, dende que alertaron desta situación en setembro do ano pasado, o goberno traballou para solventar eses posibles problemas e por iso piden unha xuntanza para tratar o asunto. Aínda que dende a formación esquerdista se mostran escépticos co goberno, pois entenden que “a dinámica é solucionar os problemas segundo se produzan, tal e como fixeron cando humanizaron as primeiras fases da rúa”, indica José Antonio Otero que lembra “como se foron cambiando direccións de rúas cando comezaban as queixas da veciñanza, en lugar de facer un estudo completo con anterioridade”.

Do mesmo modo, dende Esquerda Unida tamén mostran a súa preocupación pola eliminación de prazas de estacionamento. Segundo Otero, “ollando o proxecto vemos como se eliminarán preto de 20 prazas de aparcadoiro, que se duplican se sumamos as que xa se suprimiron coas primeiras fases da humanización”. Por ese motivo, o voceiro esquerdista pregunta se traballaron a proposta que Esquerda Unida lles trasladou xa no 2019 para crear bolsas de estacionamento alternativo en solares sen edificar. “Existen numerosos solares en toda a zona e tan só é preciso negociar cos propietarios, pero vendo como se lle dan as negociacións a Cacabelos imaxinamos que esa idea é descartable neste goberno”, sentenza Otero.

Para esquerda Unida toda esta falta de información é unha nova mostra da nula transparencia e participación do goberno coa elaboración do PMUS, “feito en base ás ocorrencias do goberno municipal e adaptando a cada paso para solucionar os problemas que se ían presentando, en lugar de elaborarse de forma partícipe entre técnicos, veciñanza, actores sociais e políticos, tal e como manda o propio documento, e como se está facendo en numerosos concellos do pais” denuncia Otero.

Gabinete de Prensa

Esquerda Unida O Grove

EU pide ao goberno que remate dunha vez a obra de Alexandre Bóveda

O grupo municipal de Esquerda Unida tacha ao goberno de incompetente por ter unha arteria principal do casco urbano nun estado lamentable durante tantos meses.

Queren coñecer o motivo polo que non se continuaron cos traballos nun momento en que a molestia ía ser menor ao non haber tráfico debido ás restricións pola Alerta Sanitaria.

O Grove, 27 de maio de 2020.- O grupo municipal de Esquerda Unida quere coñecer os motivos reais polo que a obra de humanización da rúa Alexandre Bóveda está paralizada dende hai máis de 3 meses á vez que lles pide que a remate dunha vez por todas, pois consideran que é lamentable o estado no que se atopa unha das arterias principais da vila.

Os esquerdistas indican que xa no pleno do 6 de marzo denunciaban o estado tercermundista da rúa Alexandre Bóveda e os problemas que estaba ocasionando a viandantes, vehículos e, sobre todo, ás veciñas e veciños dese tramo. Preguntaron tamén os motivos polos que naquel momento a obra non avanzaba. Recordan que o propio Alcalde recoñecía os erros cometidos na execución da obra, asumía as culpas e afirmaba que nun curto espazo de tempo continuarían coa mesma pois tan só faltaba a sinatura dos propietarios das parcelas para a cesión duns metros das mesmas, cuestión que xa tiña encamiñada.

O voceiro de Esquerda Unida, José Antonio Otero denuncia que “a día de hoxe a rúa continúa na mesma situación que hai tres meses, con fochas e ocasionando os mesmos problemas a viandantes, vehículos e veciñanza, coa única diferenza de que a circulación rodada e a pé se viu reducida polas restricións derivadas da Alerta Sanitaria”. Unha circunstancia que, segundo Otero, non foi aproveitada polo goberno municipal, “pois tivo tempo suficiente para pechar as negociacións cos propietarios e todas as facilidades para executar a obra debido a ese descenso do tráfico e a menor presenza de veciñanza circulando pola rúa”.

A pesar de que o Alcalde volveu asumir toda a responsabilidade o pasado sábado na súa habitual rolda de prensa pola Alerta Sanitaria, para Esquerda Unida non foi suficiente xa que, segundo indican, “non dou a coñecer os motivos reais de por qué a obra segue paralizada dende entón e non explicou a verdadeira razón pola que a día de hoxe non pechou a cesións dos terreos cando dixo que tiña os papeis listos e o compromiso dos propietarios para asinar”.

Unha situación pola que Esquerda Unida volve tachar ao goberno de Cacabelos de falta de xestión e de traballar a salto de mata, “pois se a realidade é a falta de acordo cos propietarios dos terreos, non fai máis que demostrar a incompetencia do goberno á hora de xestionar as obras públicas do noso concello, comezando as mesmas sen ter claro o que ten ou quere facer”, sentencia Otero.

Gabinete de Prensa

Esquerda Unida O Grove

Foto Denuncia EU - Estado da obra da rúa Alexandre Bóveda

🛑Esquerda Unida O Grove denunciou no pleno do luns a deplorable situación da rúa Alexandre Bóveda e trasladamos ao mesmo o enfando🤬 da veciñanza.🕳🕳🚗🕳🕳🚌🕳🕳

➡️ Preguntamos o motivo do enorme retraso nas obras e pedimos que cando menos se adecente o firme para permitir unha circulación segura por ese tramo