EU presenta unha moción de apoio á manifestación do 14 de novembro en defensa da Atención Primaria

O grupo municipal de Esquerda Unida elevará ao pleno do vindeiro día 2 de novembro unha moción na que pedirá o apoio da corporación á manifestación que a Plataforma SOS Sanidade Pública ten convocada para o vindeiro 14 de novembro en Santiago de Compostela baixo o lema "Salvemos a Atención Primaria”. Así mesmo, pídese ao goberno municipal que poña autobuses a disposición das veciñas e veciños que queira acudir á manifestación.

Esquerda Unida considera de suma importancia a implicación do conxunto da sociedade meca nesta convocatoria pois, dende hai mais de dous anos, o Grove está a sufrir de primeira man a falta de facultativos no Centro de Saúde, chegando a situacións estremas como as vividas a pasada fin de semana, onde non houbo médico de urxencias, e as veciñas e veciños que precisaron do servizo tiveron que desprazarse a Pontevedra ou ao concello de Sanxenxo.

MOCIÓN COMPLETA

EN DEFENSA DA ATENCIÓN PRIMARIA E DE APOIO Á MANIFESTACIÓN DA PLATAFORMA SOS SANIDADE PÚBLICA O 14 DE NOVEMBRO EN SANTIAGO

EXPOSICIÓN DE MOTIVOS

Antes da pandemia da Covid-19 a Atención Primaria xa atravesaba unha profunda crise estrutural, con déficit de profesionais pola falta de adecuación dos cadros de persoal ás necesidades da poboación, a non renovación de xubilacións, baixas e vacacións e as demoras e masificación na asistencia, como consecuencia dos recortes nos orzamentos aplicados polos sucesivos gobernos do Partido Popular. Na actualidade, os orzamentos na Atención Primaria apenas supoñen o 12% do orzamento sanitario total, que é evidentemente insuficiente e é urxente incrementalo.

Durante a pandemia, en Atención Primaria priorizouse a atención telefónica sobre a presencial o que impediu o acceso dos doentes aos centros sanitarios e reduciuse o aforo das salas de agarda obrigándoos a facer cola fóra dos centros de saúde. Suspendeuse a realización de probas e controles de saúde periódicos, sobre todo en pacientes con patoloxías crónicas. Estas medidas para evitar a transmisión, están tendo consecuencias negativas na calidade da atención que reciben as e os cidadáns, entre elas o atraso no diagnóstico de patoloxías como as tumorais.

Hoxe temos agardas de máis de 10-12 días para recibir atención médica de forma telefónica no Centro de saúde, que poden chegar a un mes para unha consulta presencial, o que non é comprendido pola cidadanía e orixina nela un sentimento de abandono e desprotección por parte do Sistema Sanitario Público.

O contacto e a relación médico-paciente constitúe o alicerce fundamental da Atención Primaria, polo que manter esta modalidade de consulta telefónica ou telemática como base da atención sanitaria supón unha enorme limitación da accesibilidade, racionalidade e calidade do modelo sanitario. Isto xera malestar social e profesional que vai en aumento, cun deterioro da imaxe do Sistema Sanitario Público.

Durante os meses de confinamento, as traballadoras e os traballadores da Sanidade Publica recibiron o recoñecemento e a gratitude da cidadanía ao labor desenvolvido en durísimas condicións. Este recoñecemento abría a esperanza de que, tras o estado da alarma sanitaria, o SERGAS impulsaría medidas e reformas para mellorar e fortalecer esta primeira liña asistencial, tal como recomendan as sociedades científicas, axentes sociais e sindicais. Lamentablemente a realidade é ben distinta e a cidadanía atopamos a mesma precariedade anterior acrecentada por unha atención baseada en primar consultas telefónicas sobre as presenciais e con restricións de acceso ao Centro de Saúde.

Hai que recuperar a atención presencial e o acceso aos centros o antes posible, para evitar un maior deterioro do propio sistema e empeorar os datos de saúde da poboación.

As barreiras de acceso á Atención Primaria favorece a privatización, coa correspondente fuxida das persoas con maior capacidade económica aos seguros privados (na actualidade xa supón un 20% da poboación) e a desprotección das persoas con menos recursos, en consecuencia un aumento da falta de equidade.

Para reverter esta situación, é necesario:

• A apertura dos Centros de Saúde, con consultas 100% presenciais como única maneira de garantir a igualdade de oportunidades á poboación, nun entorno seguro que manteña as medidas hixiénicas e sanitarias: máscaras e distancia de seguridade.
• Reapertura de todos os Consultorios existentes e que foron pechados pola pandemia da Covid-19.
• Mellorar a accesibilidade acabando coas listas de espera, co desdobramento das consultas e o incremento de persoal para a súa atención. Limitando as consultas telefónicas ou telemáticas a actividades complementarias, que non limiten ou interfiran a necesaria relación persoal e presencial entre traballadores e traballadoras da Atención Primaria e a poboación, e que non sigan discriminando aínda máis ás persoas maiores ou con dificultades de acceso no manexo das novas tecnoloxías.
• Incrementar de maneira urxente o orzamento sanitario destinado á Atención Primaria. O obxectivo sería acadar o 25% en 5 anos.
• Contratar e acabar coa precariedade laboral do persoal, poñendo en marcha un “Plan de Mellora da Atención Primaria” que volva a avaliar os equipos multidisciplinares para dar cobertura ás necesidades de saúde da poboación.

Dende a Plataforma SOS Sanidade Pública de Galicia consideran que: É urxente un cambio de política sanitaria da Xunta que poña en marcha medidas extraordinarias e urxentes, polo que esixen ao SERGAS e ao Goberno Galego:

• A recuperación da accesibilidade aos centros asistenciais. Atención 100% Presencial XA!! 
• Incremento do cadro de persoal, nos Centros de Saúde de Galicia.
• Repoñer a Xerencia de Atención Primaria que eliminaron, como forma de organización específica da área e orzamento propio e non dependente do hospital de referencia.

A Xunta de Galicia do Sr. Núñez Feijóo é a única responsable do deterioro da Atención Primaria en beneficio da sanidade privada. Se non facemos unha forte presión social e profesional para conseguir cambios de calado, a nova realidade pos-pandemia pode deteriorar aínda máis a situación que vimos padecendo dende hai moito tempo.

A plataforma SOS Sanidade Pública de Galicia, tralo traballo que están a realizar as Plataformas en Defensa da Sanidade Pública nos ámbitos locais, convocan unha Manifestación o domingo 14 de novembro, ás 12 h., en Santiago de Compostela, baixo o lema : “SALVEMOS A ATENCIÓN PRIMARIA”, para reverter esta situación.

Por todo o anteriormente exposto, é polo que o Grupo Municipal de Esquerda Unida somete á consideración do pleno a aprobación da seguinte

PROPOSTA DE ACORDO

1. Pleno do Concello do Grove mostra o seu apoio á manifestación que a plataforma SOS Sanidade Pública de Galicia convoca para o vindeiro domingo 14 de novembro, ás 12 horas en Santiago de Compostela baixo o lema: “SALVEMOS A ATENCIÓN PRIMAIRA”.
2. Instar ao goberno municipal a poñer a disposición das veciñas e veciños do Grove uns autobuses gratuítos para asistir á citada manifestación, xestionando o propio concello as reservas das prazas.

EU chama a participar nas mobilizacións do 1ª de maio para reclamar a recuperación de emprego de calidade

A pesar de que a economía galega leva catro anos medrando, a pobreza tense cronificado e a inmensa maioría dos contratos son temporais

O emprego medra, pero a costa dunha crecente precarización das condicións dos traballadores e, aínda máis, das traballadoras

O Grove, 28 de abril de 2018.- As agrupacións locais de Esquerda Unida en Vilagarcía e O Grove fan un chamamento para que a cidadanía acuda de forma masiva ás mobilizacións convocadas para o próximo Día Internacional do Traballo. A formación advirte da crecente precariedade que se ten apoderado do mercado laboral. E é que, a pesar de que as cifras do paro aparentan unha recuperación do mercado de traballo, cun número cada vez menor de desempregados; a realidade é que ese descenso da cifra de parados se produce a costa dun empeoramento das condicións laborais.

Ás 12 do mediodía do vindeiro martes, 1º de maio, arrincará da Praza de Ravella, en Vilagarcía, a manifestación convocada polos sindicatos CCOO e UGT. Mellor emprego, maiores salarios, pensións dignas e máis igualdade. Esas serán as reivindicacións que presidirán unha marcha que, tal e como destaca Esquerda Unida, resulta absolutamente necesaria neste momento.

Como adoita acontecer nestas datas pre-estivais, o último informe do paro publicado pola Consellaría de Traballo da Xunta de Galicia revela un descenso do número de desempregados. Porén, as cifras son enganosas, pois a realidade é que dos 75.688 contratos rexistrados no mes de marzo no conxunto da Comunidade, unicamente 8.021 foron indefinidos, fronte a 66.463 temporais, 634 de prácticas ou formación, e 569 doutras tipoloxías.

Nos últimos anos tense producido, ademais, unha crecente feminización do desemprego. Dos 9.298 desempregados rexistrados na comarca do Salnés en marzo, 5.092 son mulleres, fronte a 4.206 homes.

A pesar de que aos gobernos do Partido Popular se lles encha a boca falando da recuperación económica rexistrada nos últimos anos (a economía galega medrou un 3,1% no 2017, e agárdase que o faga un 2,5% neste 2018), a pobreza tense cronificado, e acada niveis moi superiores aos existentes antes da crise. 67.500 fogares galegos teñen a todos os seus membros activos en paro, e 34.700 carecen por completo de ingresos. Ademais, o 28,8% dos menores de 18 anos en Galicia está en risco de pobreza e exclusión. O 24,5% viven en fogares cunha renda por debaixo do 60% da media nacional; e o 26,5% das unidades familiares con cativos non dispoñen de solvencia para afrontar gastos imprevistos. En conclusión, o

emprego medra, pero a custa dunha crecente precariedade e do aumento do   número de persoas en risco de pobreza.

Esquerda Unida entende que, nun momento de recuperación económica como o actual, é de xustiza que esa tendencia positiva alcance tamén á clase traballadora.

Por elo, a formación avoga por conseguir que a negociación colectiva reflicta unha mellora substancial dos salarios en xeral, e dos máis baixos en particular. Con cláusulas de garantía que protexan o poder adquisitivo fronte a un aumento excesivo dos prezos dos produtos de consumo como o que está a producirse na actualidade.

En consonancia co que tamén reclaman os sindicatos, EU esixe ademais un aumento dos compromisos empresariais en relación coa estabilidade e a calidade do emprego; a redución das desigualdades; a protección da saúde; e o investimento produtivo.

Área de Comunicación

Esquerda Unida Vilagarcía e O Grove

O Pleno apoia a moción de EU solicitando a retirada do proxecto de modificación da Lei de Saúde de Galicia

O Pleno do Concello do Grove mostrou o seu rexeitamento ao proxecto de modificación da Lei 8/2008 de Saúde de Galicia e mostrou o apoio ás mobilizacións convocadas por SOS Sanidade Pública para tal fin a raíz da moción presentada polo Grupo Municipal de Esquerda Unida. 

Todos os partidos da corporación municipal (Agás o PP que se abstivo), mostraron o seu voto favorable á moción que pedía a Xunta de Galicia a retirada do Proxecto de modificación da Lei Galega de Saúde e abrir un proceso de debate e negociación participativa para manter e reforzar os hospitais comarcais co propósito de garantir a asistencia de saúde a toda a poboación en condicións de igualdade, para recuperar as Xerencias de Atención Primaria con autonomía e capacidade resolutiva, devolver e potenciar a formación, investigación e innovación con recursos públicos, potenciar a participación social en todas as estruturas do sistema sanitario e garantir a equidade de acceso ao sistema dos mellores profesionais e traballadores en base a criterios de igualdade, mérito e capacidade. Así mesmo, mostraron o seu apoio a mobilización convocada pola Plataforma SOS Sanidade Pública do 4 de febreiro en Santiago de Compostela para pedir a retirada do Proxecto de Modificación da Lei 8/2008 de saúde de Galicia

Moción completa 

para solicitar a retirada do proxecto de modificación da Lei 8/2008 de Saúde DE GALICIA E EN apoio ás mobilizacións convocadas por sos sanidade pública para tal fin

Esquerda Unida anima ás xentes da comarca a participar na manifestación en defensa do sector do mar este sábado en Compostela

A agrupación comarcal de Esquerda Unida celebra a vitoria das xentes  do mar en contra da Lei de Acuicultura, pero fai fincapé na necesidade de manter a mobilización social para mellorar as condicións dun sector  tan importante na comarca.

Vilagarcía de Arousa, 24 de febreiro de 2016.­ Dende Esquerda Unida celebran a retirada  do anteproxecto de Lei de Acuicultura, mediante a cal a Xunta pretendía entregar o litoral e  as augas interiores galegas ás multinacionais; aínda que, segundo recordan na organización de esquerdas, neste eido fica moito por mellorar como, por exemplo, no referente á mellora da lei de pesca ou co problema do cerco e a defensa da pesca artesanal, entre outros.

Segundo explica Juan Fajardo, membro da dirección de EU e deputado de AGE, “as facilidades para a instalación das multinacionais e as súas prácticas monopolistas   facían deste texto unha bomba perfecta para esnaquizar o noso mar e a economía do  noso sector primario. Tan só a protesta unánime da sociedade lograba, nun primeiro  momento, paralizar a lei e, esta mañá ​(polo martes), a catro días dunha manifestación  multitudinaria, foi posible que o Goberno galego aceptara finalmente retirar o  proxecto de Lei de Acuicultura​”, expón.

“Se ben a presión da sociedade e a manifestación convocada polas confrarías, foron factores decisivos para forzar á Xunta de Galicia a este cambio, o xesto do Goberno non acabará coa manifestación deste sábado e a convocatoria manterase, xa que agora é  o tempo de buscar solucións ao problema do cerco e as cotas, a defensa da pesca  artesanal, da rexeneración das nosas rías ou de mellorar a lei de pesca; desafíos aos  que a conselleira Quintana non está preparada, polo que seguimos a esixir a súa dimisión​”, di Fajardo.

Así, dende Esquerda Unida Arousa fan un chamamento ás xentes da comarca a mobilizarse  este sábado en Santiago de Compostela en defensa do sector do mar, “un sector  produtivo clave na nosa comarca​” en palabras do coordinador de EU en Arousa. Segundo Bueno “é unha excelente noticia a gran cantidade de autobuses que sairán  desde as distintas localidades este sábado para manifestarse en defensa dun sector que  dá emprego a milleiros de persoas na nosa comarca e en contra do cal se situou o goberno do PP na Xunta que prefire posicionarse en defensa dos intereses das multinacionais  fronte aos intereses das traballadoras e traballadores do mar​”.