EU presenta unha moción para protexer o medio mariño a través dunha campaña co lema “O Mar Comeza Aquí”

 

A proposta, que defenderá Anxo Meis no vindeiro pleno, pretende concienciar á poboación sobre a importancia de evitar a vertedura de residuos nas redes de augas pluviais. A iniciativa inclúe accións como a instalación de sinalización nos sumidoiros, actividades educativas e a colocación de trampas de lixo.

Esquerda Unida pide ademais que o Concello se adhira á Semana Europea da Redución de Residuos que se celebra anualmente nas últimas semana de novembro e que este ano enfócase no desperdicio de alimentos.

O Grove, 16 de setembro de 2024.– O Grupo Municipal de Esquerda Unida levará ao pleno deste mes unha moción coa que busca impulsar unha campaña de concienciación baixo o lema "O Mar Comeza Aquí". A proposta, que será defendida polo concelleiro Anxo Meis, ten como obxectivo principal sensibilizar á cidadanía sobre a importancia de evitar a vertedura de residuos nos sumidoiros, co fin de protexer a saúde do medio mariño e preservar a riqueza natural do municipio.

Meis explicou que "O Grove, co seu importante patrimonio natural e mariño, non pode permitirse ignorar o problema crecente da contaminación nas nosas costas. Pequenos residuos que se tiran ao chan, como cabichas ou plásticos, acaban nos sumidoiros e, finalmente, no mar, onde causan un impacto negativo tanto no ecosistema como nas actividades económicas que dependen del, como a pesca e o turismo."

A moción inclúe diversas accións concretas, entre as que destaca a instalación de sinalización específica en todos os sumidoiros e puntos de desaugue de augas pluviais do concello, advertindo sobre a conexión directa entre as rúas e o mar. Ademais, proponse a organización de actividades educativas en centros escolares e asociacións veciñais, así como a colaboración con entidades locais para maximizar o impacto da campaña.

Outra das medidas incluídas na proposta é a instalación de "trampas de lixo" nos sumidoiros, co fin de reter os residuos antes de que cheguen ao mar, facilitando así a súa recollida polos servizos de limpeza municipais.

Esquerda Unida tamén busca que o Concello se adhira á Semana Europea da Redución de Residuos (EWWR), que se celebra anualmente nas últimas semanas de novembro e que este ano (do 16 ao 26) enfoca o seu labor no desperdicio de alimentos.

Anxo Meis subliñou que "esta campaña non é só unha chamada á acción para a cidadanía, senón tamén unha oportunidade para que O Grove se converta nun referente na loita contra a contaminación mariña. A preservación do noso medio ambiente é unha responsabilidade compartida, e dende Esquerda Unida estamos comprometidos en liderar esta tarefa".

A moción será debatida no pleno municipal de setembro, onde Esquerda Unida espera contar co apoio do resto de grupos políticos e, sobre todo, co compromiso do goberno municipal para executar esta iniciativa de gran relevancia para o futuro do Grove.

[Ver/descargar Moción]

EU pide que se instalen puntos de recarga para vehículos eléctricos

No pleno do mes de xaneiro debaterase sobre a necesidade de que O Grove conte cunha rede de puntos de recarga para vehículos eléctricos. Así o solicitaremos dende Esquerda Unida por medio dunha moción na que instaremos ao goberno municipal a poñer en marcha dous puntos de recarga na Avenida Beiramar, a altura da confraría. Uns puntos que xa contan coa preinstalación dende hai dous anos, pois foron incluídos no proxecto da obra de desdobre do tramo que transcorre entre as dúas rotondas, pero que nunca se puxeron en funcionamento.

Así mesmo, entendemos que para lograr con eficacia un cambio positivo na mobilidade sustentable, o vehículo eléctrico é fundamental. O problema é que a implementación dos VE está sendo moi lenta, entre outros aspectos, pola falta de puntos de recarga. É por iso que dende Esquerda Unida, amparándonos nas liñas estratéxicas das sínteses do Plan de Mobilidade Urbana Sustentable do concello do Grove, pediremos que se executen con celeridade as liñas relacionadas cos vehículos eléctricos.

Para iso, aparte dos dous puntos fronte a Confraría, solicitaremos que se inclúa algún punto na actual obra de desdobre de Beiramar; que se estude a instalación de máis puntos de recarga VE no resto do concello, incluíndoos en futuras licitacións, e nas praias máis concorridas; que se traballe nun regulamento que potencie a instalación destes puntos nas novas edificacións; que a renovación dos vehículos municipais se efectúe apostando pola electrificación dos mesmos; e que se apliquen bonificacións no imposto de circulación aos usuarios con vehículos eléctricos e a gas.

 Unhas medidas que entendemos incentivarán a compra deste tipo de transporte menos contaminante e nos permitirá poder cumprir cos obxectivos da axenda 2030.

LER MOCIÓN COMPLETA:

MOCIÓN PARA A IMPLANTACIÓN DE PUNTOS DE RECARGA PARA VEHÍCULOS ELÉCTRICOS NO CONCELLO DO GROVE

EXPOSICIÓN DE MOTIVOS

Europa está inmersa nun proceso de descarbonización que ten como obxectivo chegar a 2050 logrando un nivel neto de cero emisións. Para iso, moitos países levan anos poñendo o foco no que supón unha das principais fontes de intoxicación do aire: o tráfico. A descarbonización da mobilidade implica, entre outras medidas, non só reducir senón tamén electrificar o transporte.

Na maioría das principais cidades europeas xa hai importantes restricións para entrar con vehículos de combustión. Cidades como Barcelona ou Madrid xa contan con restricións a vehículos sen etiqueta ambiental da DGT. Unhas medidas enmarcadas dentro do Plan estatal para a redución da contaminación no tempo establecido pola Unión Europea no Acordo de París.

Neste escenario, o vehículo eléctrico é fundamental para lograr con eficacia un cambio positivo na mobilidade sustentable. A electrificación do tráfico supón unha apertura cara novos horizontes para as empresas nun mercado innovador que está crecendo de maneira exponencial. Entre os países que xa aplicaron modelos sustentables e eléctricos na súa mobilidade destaca Noruega, onde xa sae máis a conta ter un vehículo eléctrico que un de combustión. Neste país a venda de coches eléctricos supón o 49,9% do mercado automobilístico. Séguelle Suecia e Países Baixos, onde as axudas para a compra e implementación dunha infraestrutura, os servizos de recarga, fabricación, e a produción de vehículos eléctricos foi crucial.

En España, segundo indica a Asociación Española de Fabricantes de Automóbiles e Camións (ANFAC), a implementación dos vehículos eléctricos avanza a ritmo máis lento do esperado. Namentres Europa avanza nunha media de entre 4 e 5 puntos na electrificación do parque de automóbiles, en España ese aumento só é de entre 1,6 e 2,5 puntos. Esta circunstancia ven achacada ao escaso desenrolo de infraestruturas de recarga, na que España tan só é quen de avanzar en décimas e segue nas últimas posicións do ranking europeo, tan só por riba de Portugal, Italia, República Checa e Hungría, tal e como indica ANFAC no seu informe do terceiro trimestre do 2020.

Os vehículos eléctricos contan cunha autonomía de entre 150 e 300 km sen recarga, na maioría dos casos suficiente para os desprazamentos diarios nas vilas e cidades. Sen embargo, hai varias causas polas que a cidadanía segue sen apostar pola adquisición dun vehículo eléctrico:

·         Un maior custo na adquisición

·    Custe da instalación do cargador nun aparcadoiro privado, e en moitos casos contar con ese espazo.

·  Maior tempo de recarga respecto ao subministro do carburante tradicional (gasolina, gasois, GLP)

·         A escaseza ou nula dispoñibilidade de puntos de recarga rápida na vía pública.

A día de hoxe, existen axudas das administracións centrais e autonómicas destinadas á adquisición e renovación dos vehículos, e en ocasións para a colocación de cargadores, tanto privados como públicos. Por outro lado, moitos concellos xa están ofrecendo incentivos, incluíndo nas súas ordenanzas reducións dos impostos de circulación para os vehículos eléctricos ou exención de pago nas prazas de aparcadoiro reguladas.

Sen embargo, é importante solucionar o inconveniente da inexistencia de puntos de recarga (rápida e ultrarápida) na vía pública que faciliten o uso dos vehículos eléctricos no día a día e dean unha opción de carga para aquelas persoas que non dispoñen dun aparcadoiro privado.

Unhas circunstancias que no noso concello con patentes, pois son numerosas vivendas e edificios que non contan con aparcamento privado e na vía pública tampouco existen puntos de recarga, co que a implantación resulta moito máis complicada. 

Por outra banda, tampouco hai indicios de que dende a administración local se estea traballando en mellorar esa implantación, pois o Plan de Mobilidade Urbana Sustentable, no que se comezou a traballar hai máis de dous anos, contempla nas súas sínteses de medidas, entre outras cuestións, coa instalación de puntos de recarga distribuídos polo concello. A día de hoxe non se instalou nin o primeiro.

Cabe recordar que existe unha rúa que foi reformada hai dous anos para desdobrala e na que o proxecto contemplaba a instalación de dous puntos de recarga. Dous anos despois esa infraestrutura non está funcionando e, a pesar de que dende Esquerda Unida interpelamos en varias ocasións para que se puxera en marcha o servizo, non se ven indicios de que nin a curto, nin a longo prazo O Grove vaia contar con puntos de recarga.

 Nos últimos anos realizáronse obras de acondicionamento, humanización e/ou modificación de diferentes rúas do casco urbano e en ningunha delas se contemplou a posibilidade de habilitar estes puntos de recarga, Alexandre Bóveda é un bo exemplo, pero tamén nos serve o actual desdobre de Beiramar ou a humanización do Sineiro, pois nos seus proxectos non está estipulado deixar preparada a rede eléctrica precisa para poñer en marcha este servizo.

Dende Esquerda Unida vemos necesaria a mellora do balance enerxético e medioambiental, e iso pasa por favorecer a utilización de vehículos menos contaminantes, co que a instalación dos puntos de recarga é unha das medidas máis importantes para esta implantación. Así mesmo, outorga un atractivo turístico para un sector que está en aumento e que programa os seus desprazamentos en función da autonomía dos seus vehículos e dos puntos de recarga existentes na súa ruta.

Por todo o anteriormente exposto, é polo que o Grupo Municipal de Esquerda Unida somete á consideración do pleno a aprobación da seguinte

PROPOSTA DE ACORDO

1.      Instar ao goberno municipal a iniciar o proceso para poñer en funcionamento o punto de recarga para 2 vehículos eléctricos en Beiramar (Fronte a Confraría) para a cal xa existe a preinstalación logo da obra de desdobre.

2.      Instar ao goberno municipal a incluír puntos de recarga de vehículos eléctricos no tramo da actual obra de desdobre de Beiramar, preferiblemente na zona de Confín.

3.      En base ao punto 6.1.1 da liña estratéxica 6 das Sínteses do PMUS, instar ao goberno municipal a:

a)   Estudar e procurar a instalación de máis puntos de recarga VE na rede viaria do noso concello e incluír estes nos futuros proxectos de obras.

b)   Estudar e procurar a instalación de puntos de recarga nos estacionamentos das praias máis concorridas.

c)    Traballar nunha nova regulamentación que potencie a instalación de puntos de recarga nas novas edificacións.

4.      En base ao punto 6.1.2 da liña estratéxica 6 das Sínteses do PMUS, instar ao goberno municipal a que as futuras renovacións da flota de vehículos dos distintos servizos municipais e/ou novas adquisicións se realicen apostando pola tecnoloxía euro VI e que preferiblemente sexan vehículos eléctricos ou de gas. 

5.      En base ao punto 6.1.3 da liña estratéxica 6 das Sínteses do PMUS, instar ao goberno municipal a que se estude e aplique con celeridade a inclusión de reducións, bonificacións e/ou eliminación temporal do imposto de circulación para os vehículos eléctricos e a gas co propósito de incentivar a súa compra.  

Xa están Instalados os sacos para a recollida de lixo mariño

 

Xa están instalados en boa parte dos areais do Grove os sacos para a recollida do lixo mariño.

Esta medida tomouse dende o Concello do Grove despois de que Esquerda Unida presentara unha moción no pleno do pasado agosto, e aprobada por unanimidade, na que instaba ao concello á instalación de sacos para a recollida do lixo mariño que chega ás nosas praias e costas.

Moitas persoas que adoitan pasear polos areais mecos recollen estes refugallos sen saber moi ben onde depositalos. Especialmente despois das tempestades do inverno nas que o mar expulsa todo tipo de residuos sólidos ás nosas costas. A recollida e xestión deste tipo de residuos non é doada e resulta un problema moi importante para o ecosistema mariño.

A veciñanza xa é consciente dos problemas medioambientais que causan na nosa ría as artes de pesca abandonadas á deriva e os restos de lixo doméstico que acaban no noso mar. A súa recollida de forma voluntaria xerou a necesidade da instalación de sacos de grandes dimensións nos que puidesen depositar estes obxectos. Puidemos comprobar que esta iniciativa está sendo ben recibida pola veciñanza xa que todos os sacos tiñan no seu interior lixo mariño.

Esperamos que o concello amplíe a rede a todos os areais e faga efectivas o resto das propostas da moción especialmente a que fai referencia á recollida puntual dos diferentes sacos e a xestión da súa reciclaxe ou eliminación co Punto Limpo.

Ler noticia da moción presentada por EU: http://www.euogrove.es/.../eu-pide-que-o-concello-instale...

 

O Concello adherirase á Rede de Entidades Local para desenrolar o ODS da axenda 2030

O Pleno aprobou por unanimidade a moción de Esquerda Unida que instaba ao Concello do Grove a adherirse  á "REDE DE ENTIDADES LOCAIS PARA DESENVOLVEMENTO DOS OBXECTIVOS DE DESENVOLVEMENTO SOSTIBLE DA AXENDA 2030" da Federación Española de Municipios e Provincias (FEMP).

Esta adhesión permitirá:

• Promover o coñecemento, sensibilización e implantación dos ODS da Axenda 2030 nas entidades locais españolas, mediante o fortalecemento institucional e a implicación dos diferentes actores locais.
• Fortalecer e lexitimar o papel estratéxico que xogan as autoridades locais no desenvolvemento da Axenda 2030 en España para conseguir a mellor incidencia política, promovendo o traballo en rede e a procura de alianzas que impulsen políticas de cohesión a nivel local e unha adecuada articulación multinivel (central, autonómica e local) e multi-actor para a construción e implementación da Axenda 2030 en nivel local.
• Actuar como foro de intercambio e experiencias entre os Gobernos Locais que integran a Rede. - Ofrecer servizos de asesoramento e asistencia para os seus membros, formación de técnicos e a mutua cooperación entre as autoridades das entidades locais na localización dos ODS da Axenda 2030 en España.
• Traballar cos Gobernos Locais liñas de actuación concretas tras a crise provocada pola Covid-19 para dar unha resposta ao territorio aliñada coa Axenda 2030. 

 

MOCIÓN COMPLETA:

MOCIÓN PARA ADHERIRSE Á "REDE DE ENTIDADES LOCAIS PARA DESENROLAR OS OBXECTIVOS DE DESENVOLVEMENTO SOSTIBLES DA AXENDA 2030" DA FEMP

EXPOSICIÓN DE MOTIVOS

A Axenda 2030 dos Obxectivos de Desenvolvemento Sostible (ODS), aprobada pola Asemblea Xeral das Nacións Unidas o 25 de setembro de 2015, converteuse na axenda internacional máis ambiciosa da humanidade. Por primeira vez, unha estratexia destas dimensións asúmese desde unha perspectiva holística: social, cultural, económica e medio ambiental.

O pasado 25 de setembro cumpríanse 5 anos desde que se adoptase a Axenda 2030 e os Obxectivos de Desenvolvemento Sostible (ODS), un fito fundamental no que o noso país comprometíase a afrontar os grandes retos do noso tempo, poñer fin á pobreza, reducir a desigualdade, lograr a igualdade de xénero, atallar a emerxencia climática ou garantir o traballo decente.

Cumprir 5 anos supón valorar o traballo realizado por moitos dos actores durante todos estes anos, pero tamén afrontar que só temos unha década por diante e que necesitamos profundar nas nosas accións se queremos cumprir coa Axenda 2030. É o momento de pasar das palabras aos feitos e reafirmar o noso compromiso con políticas decididas que nos leven a alcanzar os Obxectivos de Desenvolvemento Sostible. Detrás da Axenda 2030 e de todos e cada un dos Obxectivos de Desenvolvemento Sostible está precisamente mellorar a vida da xente do noso país, poñendo os grandes problemas sobre a mesa e sobre todo a vontade política para poñerlles fin.

O Concello do Grove é membro da Federación Española de Municipios e Provincias (FEMP).

A FEMP foi incluída polo Goberno español no Plan de Acción de España para a implementación da Axenda 2030, como institución panca no impulso da Axenda 2030.

O pasado 21 de setembro de 2019, no XII Pleno da FEMP, renovouse e reforzou politicamente o liderado e compromiso de aterrar os ODS nas cidades e territorios, a través da Declaración específica en favor da Axenda 2030 e os Obxectivos de Desenvolvemento Sostible.

A Xunta de Goberno da FEMP aprobou o 26 de novembro de 2019 a creación da "Rede de Entidades locais para desenvolver os ODS da Axenda 2030".

Dita Rede -sen personalidade xurídica propia diferente á FEMP- constituirase cos Gobernos Locais que se comprometan a implementar os ODS da Axenda 2030 de forma transversal nas políticas públicas municipais. O seu principal obxectivo será favorecer a coordinación de actuacións entre os Gobernos Locais permitindo alcanzar mellores resultados na implementación da Axenda 2030 nos municipios e provincias, a través da localización e desenvolvemento dos ODS no ámbito local.

A Rede será o instrumento que ofrecerá ferramentas aos Gobernos Locais para que logren os seus obxectivos, de acordo coa implementación da Axenda 2030 en España. E, ademais, ofrecerá aos Gobernos Locais pautas, información e propostas de actuación para facer fronte á crise provocada pola COVID-19, tendo moi presente unha das principais premisas da Axenda 2030: non deixar a ninguén atrás.

Pero este camiño só o lograremos percorrer se contamos co traballo fundamental dos Concellos, cuxa labor é clave para a localización da Axenda 2030 e o seu traballo diario é o que maior impacto ten sobre o día a día da xente. Temos a misión de levar a Axenda a cada rúa, a cada barrio e a cada praza porque os ODS son o mellor instrumento para mellorar o noso país. Significa apostar por uns servizos públicos de calidade, por unha educación e sanidade debidamente financiadas, por cidades e vilas sostibles que teñan todos os servizos que necesitan, pola mobilidade sostible e pola protección da nosa contorna natural. E supón tamén promover o consumo local, apoiar aos produtores das nosas rexións, traballar por uns servizos sociais sólidos en cada lugar e garantir, en definitiva, que avanzamos cara un país máis xusto e sostible.

Os Obxectivos da Rede son os seguintes:

·     Promover o coñecemento, sensibilización e implantación dos ODS da Axenda 2030 nas entidades locais españolas, mediante o fortalecemento institucional e a implicación dos diferentes actores locais.

·  Fortalecer e lexitimar o papel estratéxico que xogan as autoridades locais no desenvolvemento da Axenda 2030 en España para conseguir a mellor incidencia política, promovendo o traballo en rede e a procura de alianzas que impulsen políticas de cohesión a nivel local e unha adecuada articulación multinivel (central, autonómica e local) e multi-actor para a construción e implementación da Axenda 2030 en nivel local.

·   Actuar como foro de intercambio e experiencias entre os Gobernos Locais que integran a Rede. - Ofrecer servizos de asesoramento e asistencia para os seus membros, formación de técnicos e a mutua cooperación entre as autoridades das entidades locais na localización dos ODS da Axenda 2030 en España.

·     Traballar cos Gobernos Locais liñas de actuación concretas tras a crise provocada pola Covid-19 para dar unha resposta ao territorio aliñada coa Axenda 2030.

Entendemos que o noso Concello debe ser parte activa desta rede dentro da FEMP.

Por todo o anteriormente exposto, é polo que o Grupo Municipal de Esquerda Unida somete á consideración do pleno a aprobación da seguinte

PROPOSTA DE ACORDO

PRIMEIRO.- Que o Concello do Grove se adhira á "REDE DE ENTIDADES LOCAIS PARA DESENVOLVEMENTO DOS OBXECTIVOS DE DESENVOLVEMENTO SOSTIBLE DA AXENDA 2030" da Federación Española de Municipios e Provincias (FEMP).

SEGUNDO.- Instar á Alcaldía para realizar os trámites oportunos para a devandita adhesión.

TERCEIRO.- Instar ó goberno local a iniciar os traballos para aprobar un Plan de Actuación ou Estratexia Local, no que se elabore unha análise de situación e un plan de localización e implementación dos Obxectivos de Desenvolvemento Sostible da Axenda 2030.

Esquerda Unida acusa de irresponsable ao executivo de Cacabelos no caso da EDAR

A agrupación de esquerdas ve unha clara neglixencia por parte do goberno local ao negarse a facerse cargo da xestión da EDAR situada en Laxe de Rons. Consideran esta decisión unha falta de planificación organizativa e económica.

Dende Esquerda Unida recordan, que a xestión lle corresponde ao goberno municipal, ao igual que está xestionando a EDAR de San Vicente.

O Grove, 16 de xullo de 2019.- O pasado mes de xuño coñecíase, que ante a desatención por parte do Concello do Grove, o ente público autonómico Augas de Galicia facíase cargo da xestión da Estación Depuradora de Augas Residuais (EDAR), situada na Laxe de Rons, por risco de contaminación da Ría de Arousa ante a desatención por parte do Concello do Grove. O goberno municipal, que se nega a facerse cargo da xestión da depuradora, alega deficiencias nas instalacións así como discrepancias no cobro do canon de depuración de augas. Sen embargo, para Esquerda Unida o que se agocha detrás de este conflito é a falta de planificación do servizo por parte do executivo socialista, tanto no organizativo como no económico. Un conflito que aparentemente se estenderá no tempo, pois acabamos de coñecer a prórroga por un ano por parte da Xunta de Galicia na xestión da EDAR grovense, con un custo para as arcas municipais e por conseguinte para os petos da veciñanza, de preto de medio millón de euros.

Esquerda Unida, que dende o ano 2007 defendeu sempre a xestión municipal da EDAR –logo de que por aquel entón o seu concelleiro, Juan Lamelas, solicitara a realización dun informe que determinara a localización máis apta para a estación depuradora–, considera a postura do goberno municipal “totalmente irresponsable”. Segundo os esquerdistas a actitude de inacción do goberno presidido por Cacabelos ante as discrepancias alegadas é “claramente neglixente”. “Se fosen certas as eivas que argumenta o goberno local, deberían traballar para solucionalas e acoller a depuradora, tal e como está aprobado en pleno. Desatender por completo o asunto é unha irresponsabilidade máxima”, indican.

Desde o grupo que lidera José Antonio Otero, recórdanlle a Cacabelos que foi el mesmo quen sendo alcalde presentou a pleno un 26 de decembro de 2007 unha proposta de acordo que incluía o Compromiso de asumir a explotación, mantemento e conservación das obras, e de efectuar os traballos ordenados pola inspección facultativa despois da súa execución. Unha proposta aprobada pola maioría do pleno cos votos favorables de PSOE, BNG, EU e PG. Tamén lle fan coñecedor ao alcalde que o tratamento das augas residuais é unha competencia propia municipal segundo o artigo 25.2.c) da Lei Reguladora das Bases do Réxime Local que establece as competencias dos municipios. Así mesmo, dende as filas esquerdistas recórdanlle ao goberno municipal que xa están xestionando dende 1999 a EDAR de San Vicente, polo que non entenden a “teima que ten Cacabelos con que a xestión da EDAR de Laxe de Rons debe ser realizada por Augas de Galicia”.

Por último, en Esquerda Unida consideran a postura do PSOE nesta polémica como “hipócrita”. Para os esquerdistas, non se entende que os membros do PSOE “no pleno de investidura faga alusións ao seu traballo e compromiso co Medio Ambiente e á vez desatendan o tratamento das augas residuais do Grove posibilitando o vertido de augas sen tratar á Ría de Arousa”.

  

Gabinete de Prensa

Esquerda Unida O Grove

Esquerda Unida rexeita o depósito dos lodos do dragado do Lérez nas proximidades de Sálvora

A agrupación local de EU amosa o seu apoio á Plataforma en Defensa da Ría de Arousa na súa manifestación en contra da decisión de Portos de Galicia.

Instan a Cacabelos a reunir ás concelleiras e concelleiros trala conformación da nova corporación para facer unha declaración institucional opoñéndose ao depósito dos lodos do dragado do Lérez na boca da ría.

O Grove, 12 de xuño de 2019.-  Trala noticia dos últimos días na que se indicaba que Portos de Galicia autorizaba a depositar os lodos, que se retirarán do dragado do río Lérez, nas proximidades da Illa de Sálvora, Esquerda Unida mostra o seu rexeitamento a esta medida que consideran prexudicial para os intereses da ría de Arousa.

Os esquerdistas non entenden que o órgano dependente da Xunta de Galicia tome esta medida logo de que as confrarías de Pontevedra se opuxeran ao depósito dos lodos preto de Tambo, que era a primeira opción. Entenden que si é prexudicial para a ría de Pontevedra, máis o será para a de Arousa que é unha das máis produtivas do estado e instan á Consellería do Mar a valorar, de forma consensual cos sectores implicados, unha alternativa que non prexudique aos sectores produtivos, ao medio ambiente e ás rías galegas.

Esquerda Unida mostra o seu apoio á Plataforma en Defensa da Ría de Arousa nas súas reivindicacións e insta a Cacabelos a que a primeira medida que tome trala conformación da nova corporación e a toma de posesión como Alcalde, sexa a de convocar a todas as concelleiras e concelleiros para realizar unha declaración institucional apoiando as reivindicacións da PDRA, das confrarías e das asociacións de produtores da Ría de Arousa en contra desta decisión polo risco que este ataque ao noso medio natural supón para os recursos pesqueiros e a economía da zona.

Gabinete de Comunicación

Esquerda Unida O Grove