EU reúnese co concelleiro de limpeza e mantemento de espazos públicos para coñecer a realidade dos servizos e trasladar as súas propostas

O Grove, 2 de agosto de 2023. O pasado mércores, os concelleiros de Esquerda Unida, José Antonio Otero, Susana Millán e Anxo Meis, reuníronse co concelleiro delegado de Limpeza, Mantemento de Espazos Públicos e Mercado, Juan Ramón Outeda, co propósito de coñecer de primeira man a situación na que se atopan os servizos tanto o de limpeza como o de mantemento dos parques e outros espazos públicos, xa que nos últimos meses están recibindo numerosas críticas veciñais. Así mesmo, os esquerdistas aproveitaron a xuntanza para trasladar unha serie de propostas de actuación nos diferentes ámbitos.

En canto ao servizo de limpeza, dende Esquerda Unida solicitaron o de limpeza que realizan os operarios municipais durante a semana, “para coñecer a cobertura que este servizo está prestando ao municipio, pois son numerosas as queixas veciñais indicando que as súas rúas non están sendo visitadas polos varredores”, indica Otero. Logo de finalizar o proceso de estabilización, no servizo de limpeza incorporáronse 10 operarios pero, tal e como lles confirmou o concelleiro delegado, tan só 6 están destinados á limpeza de rúas, unha cifra que os concelleiros de Esquerda Unida consideran insuficiente, polo que pediron que se procurase o incremento de persoal nesta área.

A falta de recibir e revisar o plan de traballo que están realizando os varredores, dende Esquerda Unida propuxeron que se procurase o desvío puntual de algún dos operarios da zona do casco urbano a outras rúas e barrios máis esquecidos. Ademais, tras confirmar a incorporación de persoal para desbrozar, insistiron na limpeza inmediata dos beirais de diferentes rúas e que se continuase co traballo iniciado nos barrios co propósito de eliminar canto antes a maleza existente. Otero, Millán e Meis lembran que estas cuestións estaban incluídas no acordo do pleno de órganos e que “tendo en conta que xa deberían ter feito este traballo hai varios meses, ollamos como dende a sinatura do acordo foron realizando esa limpeza de maleza, tanto nas rúas como nos barrios. Aínda así, insistimos en que aínda quedan moitas zonas nas que é preciso actuar de inmediato”.

Por outro lado, dende o grupo municipal, tamén en base ao acordo alcanzado, quixeron coñecer a situación na que se atopa o mantemento dos parques infantís e insistiron na urxencia á hora de dar solución ao arranxo dos diferentes elementos que se atopan deteriorados, “pois estamos nunha época na que a demanda é moito maior debido ao bo tempo e ao período vacacional”, recalca o voceiro esquerdista, que tamén reiterou a necesidade de executar canto antes a mellora do firme exterior do parque de Terra de Porto, “xa que temos constancia de varias persoas, pequenas e maiores, que debido ao estado do firme sufriron caídas de diferente gravidade, polo que é preciso tomar cartas no asunto o máis axiña posible”.

Otero, Millán e Meis tamén solicitaron a limpeza habitual nos arredores dos colectores de lixo, “sobre todo os que se atopan nas zonas próximas a locais de hostalería, xa que adoitan estar graxentos e provocar malos cheiros, máxime nesta época estival”. Outra das demandas foi relativa á posibilidade de reformar a vella depuradora do Corgo, que é utilizada polos servicios de xardinería e limpeza, co propósito de mellorar o espazo de almacenaxe e traballo para os operarios municipais. Por último, dende Esquerda Unida pediron que se procurase a vixilancia da parte traseira da Lonxa nas xornadas de mercadillo, “pois debido ao mal estacionamento de moitos usuarios, a estrada, que se convirte na única opción de circulación, queda reducido a un só carril, provocando enormes atascos e inconvenientes para os vehículos que se ven obrigados a transitar por esa zona”.

O concelleiros do grupo municipal de Esquerda Unida, José Antonio Otero, Susana Millán e Anxo Meis, valoraron positivamente a xuntanza co concelleiro de Limpeza, Mercado e Mantemento de Espazos Públicos, “pois púxonos ao día sobre a situación das súas áreas, resolveunos as dúbidas e acolleu con gratitude as propostas que lle trasladamos”. Así, indicaron que este é o inicio dunha serie de xuntanzas cos diferentes concelleiros e concelleiras do grupo de goberno, “pois cremos que é o mellor modo de coñecer a situación das súas áreas, se é o caso, mostrar o noso desacordo co traballo que se realiza e, sobre todo, trasladar directamente as propostas do noso programa co propósito de mellorar os servizos”.

Foto denuncia EU - Estado da zona de tránsito dos viandantes no Monte de Vila

Este é o estado no que se atopa a zona de tránsito dos viandantes na zona do Monte da Vila.

Se xa resulta difícil transitar por esa zona por mor das obras do Auditorio, peor o teñen os peóns se deben facelo por ese paso.

#limpeza #camiñosaccesibles #fotodenunciaEU

Foto denuncia EU - Estado do camiño dos Pardiños

Estreamos nova tempada de #fotodenuncia

Recuperando unha denuncia da veciñanza dos Pardiños do 2019. Solicitaban o arranxo e a limpeza do camiño que ademáis ten un desnivel que supón un risco para os viandantes.

Agora volven a solicitar o mesmo. O concello só instalou una cinta para sinalar o perigo do desnivel, pero a maleza non parou de medrar invadindo o camiño, incluso na intersección coa Rúa Vilavella.

Foto denuncia EU - Restos de grava do asfaltado na Carretera do Conde

📣Dende hai 15 días os restos de grava da obra de asfaltado da Rúa do Conde, agardan a que alguén os recolla.👨‍🌾 🧹

📄Tras varios avisos ao concello, nin o propio ente municipal, nin o provincial (encargado das obras) fixeron nada para limpalos e continúan dando problemas ás vivendas da zona. 💁‍♀️💁‍♂️

#euogrove #fotodenuncia #limpeza #mantemento #TodosOsBarriosContan

Foto denuncia EU - Falta de mantemento da Fonte dos Cabaliños de Confín

📣A veciñanza do barrio de Confín lamenta a falta de mantemento da Fonte dos Cabaliños.

🚨A auga estanca converteuse nun foco de proliferación de insectos durante todo o verán afectando ás vivendas máis próximas. 

#euogrove #TodosOsBarriosContan #fotodenuncia #limpeza #mantemento #confin

Foto denuncia EU - Perigo nun tramo da beirarrúa da Teniente Domínguez por mor da maleza (Solucionado)

⚠️Un veciño da rúa Tte. Domínguez advertíanos do perigo existente nun tramo da beirarrúa ao non apreciarse o desnivel do terreo por mor da maleza.

📧✅Puxémolo en coñecemento da concellaría correspondente e tralo aviso procederon á limpeza do lugar.

#fotodenuncia #solucionada #limpeza #mantemento #euogrove

Foto denuncia EU - Maleza no barrio de Meloxo (Solucionado)

#fotodenuncia SOLUCIONADA‼️ 🙌 

✍️O 18 de xullo insistiamos no estado de abandono das rúas do barrio de Meloxo.

✅ A veciñanza agradece poder camiñar polas súas rúas libres de maleza.

👉 ver fotodenuncia

Foto denuncia EU - Maleza no barrio de Meloxo

🚨Hoxe no #fotodenuncia é a quenda do barrio de Meloxo! Os veciños e veciñas insinten nunha situación realmente preocupante polo estado de abandono no que se atopa este barrio do Grove.

🕵️‍♀️A petición de Esquerda Unida O Grove, fixéronse obras de asfaltado no ano 2016, pero semella que dende o concello nunca máis se preocuparon do estado das rúas nin das necesidades da veciñanza.

Foto denuncia EU - Maleza na rúa de Hortos (Solucionado)

👌O Lugar de Hortos xa se ve moito mellor despois de que se limpasen as beirarrúas da zona como reclamaba a veciñanza.

⏳Agora solo queda que a Concellería de Medio Ambiente faga efectivas as duras medidas, que anunciou en prensa a principios de xullo, ante os vertidos indiscriminados de basura.

👉 ver fotodenuncia

Foto denuncia EU - Maleza na rúa de Hortos

📸⚠️Esta vez as fotografías son da Rúa Hortos onde a vexetación ten unha altura considerable e a beirarrúa pasa a converterse en vertedoiro improvisado😳

Foto denuncia EU - Maleza nas beirarrúas da estrada do Sieiro-Campos

☝️Este é o estado das beirarrúas no Lugar de Campos.

📸  A maleza invade o espazo destinado aos peóns. A veciñanza desta zona, cansada desta situación, decidiu enviarnos estas fotografías.

Foto denuncia EU - Maleza nos arredores do parque infantil da Casa da Cultura de San Vicente

Seguimos coa campaña de limpeza!!! 

📸Estas fotografías fáinolas chegar unha veciña de San Vicente descontenta co estado no que se atopan o parque e os arredores da Casa da Cultura Ángel Vázquez Hereder.

Foto denuncia EU - Maleza na beirarrúa da rúa do Conde

📌 Continúan chegando, ás redes sociais de Esquerda Unida, fotos dos veciños solicitando a intervención dos servizos de limpeza. 

📸Esta fotografía fíxose na Rúa do Conde, a maleza case cubre toda a superficie de paso dos viandantes.

Foto denuncia EU - Maleza no acceso ao colexio Valle-Inclán (solucionado)

☝️ Esta semana trasladábamos ao concello unha queixa dos veciños molestos coa maleza nos arredores do colexio Valle Inclán. 

👌 Hoxe puidemos verificar que a queixa foi escoitada.

👉 Ver fotodenuncia

Foto denuncia EU - Maleza no acceso ao colexio Valle-Inclán

⚠️ Este é o estado no que se atopa o acceso ao colexio Valle-Inclán por onde, estes meses de xullo e agosto, transitarán cada día numerosos rapaces e rapazas para dirixirse ao Campamento de Verán do Concello do Grove que se desenrola no centro educativo. 

👨‍👨‍👧‍👦Varios pais e nais transmitíronnos as súas queixas sobre esta situación e dende Esquerda Unida xa o puxemos en coñecemento do concelleiro delegado para que se solucione o máis axiña posible.

EU reclama solucións ao caos circulatorio derivado do peche dun carril en Alexandre Bóveda

Denuncia o colapso que a medida ten xerado en rúas próximas como a Avenida de Portugal, e insta ao goberno local a avanzar na elaboración do Plan de Mobilidade

Reclamouno no pleno, onde tamén solicitou un maior celo do control aos propietarios que non recollen as deposicións dos seus animais en rúas e camiños

O Grove, 25 de setembro de 2018.- O grupo municipal de Esquerda Unida insta ao goberno local a convocar coa máxima urxencia unha xuntanza de traballo que permita avanzar na elaboración do Plan de Mobilidade local e aporte solucións aos problemas xerados polos últimos cambios relacionados coa ordenación do tráfico no casco urbano. A formación lamenta o caos circulatorio que o peche dun carril en Alexandre Bóveda ten xerado en rúas próximas como a Avenida de Portugal, e denuncia a falta de planificación nesta materia. Unha deficiente xestión que evidencia tamén o inaceptable atraso que acumula a posta en funcionamento dos novos sistemas de control do tráfico en rúas peonís como a Catorse, onde case un ano despois da obra de humanización os pivotes móbiles continúan sen funcionar. Foi un dos temas que os concelleiros de EU levaron ao pleno deste mes de setembro. Unha sesión na que os edís esquerdistas debullaron ademais a longa lista de deberes pendentes que, a pesar dos reiterados rogos realizados pola formación ao longo de sucesivos meses, o Concello continúa sen atender. 

Esquerda Unida urxe solucións, análise e traballo que permitan mellorar o mapa do tráfico da localidade, e lamenta que as palabras e compromisos do goberno local as leve o vento. E é que resulta inaceptable que, cando está a piques de cumprirse un ano da peonalización da Catorse, as tarxetas para residentes e usuarios anunciadas continúen sen estar en uso, e o pivote móbil permanentemente apagado.

Esquerda Unida lamenta a resistencia do goberno local do PSOE a ter en conta as aportacións e ideas que lle chegan dende as filas da oposición. Unha reticencia ao diálogo que perxudica, en última instancia, á cidadanía. E que se traduce nun inxente número de pequenos problemas do día a día pendentes de resolver que se prolongan no tempo. 

Sen solucionar está o problema de iluminación no entorno de Rosalía de Castro que a veciñanza ten feito chegar aos concelleiros de EU, e que éstes trasladaron ao conxunto do pleno xa en xaneiro. Do mesmo xeito que continúa pendente a instalación de bolardos que impidan o estacionamento e favorezan a visibilidade no cruce da Fontegrande coa rúa da Igrexa, solicitados en febreiro. 

A formación tamén aproveitou o pleno deste luns para volver lembrarlle ao grupo de goberno a necesidade dun paso de peón na saída de Entrehortas, entre a farmacia e a parada de taxis, que xa fora solicitado en maio. Así como o déficit de papeleiras en diferentes rúas grovenses, como Lepanto, Con do Gato ou Raposeira (neste caso, solicitado en marzo).

A formación incide ademais na mala imaxe e na falta de seguridade que provoca o estado da área de xogos infantís da Siradella. Un deterioro que Esquerda Unida xa ten denunciado en pleno en máis dunha ocasión, e en relación ao cal os concelleiros do grupo municipal de EU volveron solicitar ao Concello que se dirixa á Comunidade de Montes de San Martiño para pedir a retirada dos restos das randeeiras existentes antes de que éstas ocasionen algún accidente.

Esquerda Unida tamén aproveitou o pleno deste luns para volver reclamar ao Concello que solicite á Xunta a reposición da deteriorada sinalización viaria da estrada do istmo. E a Emgrobes a retirada da caseta informativa da Lanzada, pois son moitos os visitantes que paran alí pensando que está en funcionamento.

A formación lamenta ademais a resistencia do goberno local a facilitar información á oposición sobre distintos proxectos en marcha aínda a pesar de tela solicitado por rexistro. 

EU reclamou no Pleno a limpeza das estradas, rúas e barrios do Grove así como outros asuntos de importancia para os veciños

A apertura dos baños de detrás da Lonxa, o arranxo da balaustrada de cristal da rúa Castelao e a do paseo de Terra de Porto, a reparación dos lombos das estradas da parroquia de San Vicente, o arranxo do paseo da Lanzada, seguridade na Praza de Arriba, o compromiso cos veciños da Pratería, xunto con outros asuntos foron postos enriba da mesa polo Grupo Municipal de EU no último pleno.

Na sesión plenaria do 31 de xullo, o Grupo Municipal de Esquerda Unida mostrou a súa preocupación polo estado en que se atopan diferentes estradas, rúas e barrios da localidade. Así, o concelleiro José A. Otero instou ao goberno a reclamar a Xunta de Galicia a limpeza da estrada de entrada do Grove e 

que une a Lanzada con San Vicente do Mar. Tamén pediu que do mesmo xeito se lle esixise á Deputación de Pontevedra a mesma actuación nas súas estradas pois, en palabras de Otero, “o vial interior de San Vicente mostra un total abandono e a Estrada do Conde da asco”. No mesmo senso esixiu ao Goberno municipal a realizar unha limpeza das rúas e barrios pois "están sucios e con herbas sobresaíndo das baldosas".

O edil esquerdistas tamén solicitou que se mantivesen abertas durante toda a tempada estival e nun horario razoable as casetas dos baños situadas detrás da Lonxa e que son utilizadas tan só durante a Festa do Marisco e a Festa do Carme. Segundo José A. Otero “o servizo de baño público e unha demanda dos veciños e visitantes e non supón un excesivo gasto nin prexuízo para o Concello”

A reparación da balaustrada de cristal que existe na rúa Castelao, á altura do restaurante Pan de Millo, foi outra das reclamacións realizadas polo Grupo Municipal de Esquerda Unida. Unha demanda que xa volve a pleno, pois fai máis de catro meses que está destrozada e xa provocou algún incidente. Os esquerdistas aproveitaron para reclamar tamén a reposición da balaustrada do Paseo de Lordelo, a altura do parque de Terra de Porto, que fora destruída polo lume no San Xoán do 2013.

EU tamén pediu que se arranxase o paseo de madeira da Lanzada, concretamente o que transcorre dende a rotonda central ata a zona de Sanxenxo, pois “os usuarios da praia queixáronsenos de que existen tornillos levantados que poden provocar algún que outro incidente.”

Unha solución para os lombos existentes en dous viais que unen a estrada interior de San Vicente coa da Lanzada, un que vai dende as Baladas ata a estrada da Lanzada e o outro dende a Farmacia ata Balea Marítima, foi outra das peticións do edil esquerdista, recordando ademais que un deles xa fora unha demanda realizada nos orzamentos do 2016.

José A. Otero preguntou si se estaba cumprindo cos compromisos adquiridos cos veciños da rúa Pratería, pois “hai veciños que están moi molestos xa que se retirou a farola pero non se fixo nada do prometido e na rúa seguen outros elementos que estorban”. Así mesmo aproveitou para pescudar si o goberno estaba facendo deixadez de funcións en canto á ordenanza de terrazas.

Outra das preguntas foi en relación á en que estado se atopaba a redacción da Carta de Servizos municipal, aprobada en pleno meses atrás. Otero tamén se preocupou polo paradoiro dos aparatos de ximnasia biosaludable que se retiraron do paseo de Lordelo e aproveitou para instar ao goberno a realizar un repaso das árbores que se atopan ao largo do mesmo, “pois invaden tanto o carril-bici como o dos peóns”.

A modo seguridade, o edil esquerdista instou a concellería correspondente a instalar unha balaustrada ou algún outro elemento para disuadir aos usuarios da Praza de Arriba a cruzar polo lugar onde se retirou o paso de peóns, pois “moitos seguen a cruzan polo mesmo lugar e obrigan aos vehículos a frear cando son estes os que teñen preferencia de paso”.

Otero tamén trasladou a queixa de moitos veciños debido a que algún negocio local baleira o vidro no colector correspondente a altas horas da noite, provocando a perturbación do descanso, cando existe unha ordenanza en vigor que prohibe realizar esa tarefa nese horario.

Por último, o esquerdista dou traslado dunha reclamación dun pai de alumno do colexio de Bizocas que segundo indica nun escrito remitido ao Concello, o centro informou aos titores dos nenos das diferentes paradas do transporte escolar, entre a que se atopa unha co nome de “Caídos” en referencia a que se atopa próxima á Praza da Fonte do Galo –noutrora chamada dos Caídos–, instando dese xeito ao Concello a tomar medidas para que os responsables teñan en consideración a Lei da Memoria Histórica, que provocou o cambio da Praza, para nomear doutro xeito esa parada escolar.

Esquerda Unida pide o pintado dos pasos de peóns de Luis Seoane, limpeza nas rúas e outras melloras para os veciños

No  Pleno do pasado luns, o edil do Grupo Municipal de Esquerda Unida, José Antonio Otero, fixo unha serie de solicitudes e preguntas ao Goberno no derradeiro punto da orde do día.

O esquerdista volveu esixir, xa o fixera hai dous meses, que se pintasen os pasos de peóns de toda a rúa Luís Seoane (dende Abanca ata a Fonte dos Cabalos de Confín). Otero recordoulle á concelleira delegada que as condicións climatolóxicas que utilizou como escusa no pleno de xaneiro, non foi impedimento para marcar o paso de peóns do cruce do garda nin a sinalización da nova circulación e aparcadoiros do Monte da Vila.

Así mesmo, o edil de EU solicitou que se fixese unha revisión de todos os pasos de peóns do municipio e se pintasen os que estivesen en mal estado, poñendo como exemplo o da entrada da rúa Rosalía de Castro que, segundo indicou, é inexistente.

Continuando coa seguridade vial, o esquerdista pediu que se sinalizasen de mellor modo os lombos das estradas municipais, pois considera que hai ocasións en que é difícil apreciar a súa existencia ata o momento de ter que superalos. Cuestión que pode ocasionar graves problemas para os usuarios e veciños, aínda sen ter superado a velocidade permitida.

Otero tamén solicitou que se fixese un mantemento máis regular das diferentes rúas en canto a limpeza pois hai varias, e puxo como exemplo Rosalía de Castro, que mostran unha imaxe lamentable.

O edil esquerdista interesouse polo número de sancións que o concello tramitou nos dous últimos anos relacionadas coas deposicións caninas. Otero expresou a súa preocupación pola existencia de rúas nas que o seu tránsito se fai imposible sen ter que sortear os numerosos excrementos existentes. Así mesmo pediu contundencia ante este tipo de comportamentos do donos dos cans.

A situación do Centro de Saúde grovense foi outro dos temas que o edil de Esquerda Unida puxo sobre a mesa neste pleno. José A. Otero preguntoulle ao Concelleiro de Sanidade se estaba actuando para defender a sanidade pública no Grove pois, segundo indica, ten constancia do caos que está a provocar a baixa de varios médicos que non son substituídos, debendo facer fronte outros facultativos a un maior número de pacientes, o que ocasiona un problema a hora de resolver as problemática dos enfermos.

Tamén o Portal Cidadá da páxina web municipal foi eco de denuncia por parte do Grupo Municipal de Esquerda Unida, pois non funciona e nin tan sequera se poden descargar documentos.

Por último, Otero recordoulle ao goberno que segue á espera do Informe sobre os Voluntarios da Festa do Marisco. Un documento que, segundo o edil esquerdista, levan agardando máis de 5 meses e que debe elaborar o servizo municipal correspondente, polo que non aceptan as desculpas de falta de tempo da concelleira delegada, xa que iso lles crearía dubidas sobre a súa legalidade.

Cabe destacar que o goberno anunciou que tomaba nota das solicitudes para procurar realizalas, sen responder a ningunha delas no propio pleno. Tampouco dou resposta á pregunta relacionada coas multas por deposicións dos cans, nin se ían actuar con contundencia no tema. A concelleira de Turismo indicou que en breve se lle trasladaría ao Grupo Municipal de Esquerda Unida o documento sobre os voluntarios da Festa do Marisco. En canto ao problema do Centro de Saúde, o concelleiro de Sanidade anunciou que é coñecedor da problemática, pero non dou resposta sobre a actuación municipal neste aspecto, emprazando aos prexudicados a presentar reclamacións no propio centro.

Rogos e Preguntas do pleno do mes de xullo

Na sesión plenaria deste mes, saíron aprobadas todas as propostas da orde do día. Máis a moción que presentou o Grupo Municipal de Esquerda Unida solicitando da Xunta de Galicia a retirada do proxecto de Decreto para a ordenación de apartamentos turísticos, vivendas turísticas e vivendas de uso turístico na Comunidade autónoma de Galicia, foi REXEITADA, pois tan só contou con 4 apoios (2 de EU e 2 do BNG). O PSOE e PGD (9) abstivéronse e o PP (4) opúxose, co que o Alcalde tivo que facer uso do voto de calidade, que sorprendentemente, e ao contrario do que o seu partido fixo no Parlamento galego (onde foron precisamente os socialistas os que levaron unha iniciativa para solicitar o mesmo), votou en contra.

Nos Rogos e preguntas, os concelleiros de Esquerda Unida solicitaron que o Goberno realizase un mantemento continuo do Parque Canino da Toxa, pois mostra un estado de abandono totqal, no que a maleza invade boa parte do espazo. Pediron tamén que se instalase o cartel indicador e o das normas de uso, asunto que non foi atendido a pesar de que a concelleira o prometera no pleno de maio tras un rogo realizado tamén por Esquerda Unida. Así mesmo, instaron ao goberno a realizar a limpeza de maleza nos diferentes solares municipais e espazos públicos –en moitas zonas a maleza está invadindo os beirais e zonas de transito de peóns– xa que se está mostrando unha imaxe lamentable aos turistas que nos visitan estes días.

Os esquedistas solicitaron que se actúase nunha praga de cucarachas, que segundo indicacións dos veciños, prolifera na rúa Castelao, a altura das oficinas de Correos. Que se adecuara o estanque de Beiramar, a altura da cafetería Acuarela, foi outra das peticións realizadas. Os edís esquerdistas preguntaron polo paradoiro da escultura "Baticaso", do galego Ignacio Fernández, que no seu día fora retirada da rúa Pratería.

Outra das peticións que realizaron os edís foi no paseo de Lordelo a Rons, pois no inicio do mesmo –pola parte do Corgo– existe unha árbore que invade todo o ancho do paseo e obriga aos viandantes e ciclo-turistas a agocharse ou no peor dos casos ter que baixar á estrada para continuar o seu camiño, polo que pediron que se actuase para solucionar o problema.

Dende o Grupo Municipal de Esquerda Unida tamén se solicitou que se dotase de seguridade ou de carteis de advertencia o coñecido como Camiño da Serpe –entre a praia da Lavaxeira e Moreiras–. Este camiño, que dende que se instalou a ponte no Esteiro, é moi transitado e conta no seu trazado con zonas escorregadizas e pasos estreitos e perigosos, o que xa provocou o primeiro incidente logo de que un rapaz se precipitase ás rochas a semana pasada cando circulaba na súa bicicleta.

En canto a turismo, os esquerdistas criticaron a falta dun avance da programación da Festa do Marisco en pleno mes de xullo e preguntaron si se estaba a promover o evento gastronómico entre os nosos visitantes. A razón polo que cada ano se modifica a situación das praias caninas foi outra das cuestións que levaron a consulta, xa que está a crear certo descontrol entre os usuarios, máxime cando na web turística do concello non se pode coñecer a súa situación actual ao non funciona o enlace. Precisamente neste asunto, o da web turística, é onde incidiron máis os concelleiros de Esquerda Unida que, a pesar de que se está a crear unha nova web, criticaron a falta de actualización da mesma, pois se segue anunciando que o Grove conta con 6 praias con bandeiras azuis, cando o goberno local renunciou a elas e non existen os distintivos nos areais, o que pode provocar denuncias por publicidade enganosa.

Por último, os esquerdistas preguntaron pola situación na que se atopa o Plan Xeral de Ordenación Municipal (PXOM), pois non volveron ter noticias do mesmo dende a reunión á que foron convocados hai máis de tres meses.

[ver/descargar Rogos e Preguntas no seu contexto orixinal]
[ver/descargar moción retirada decreto vivendas uso turístico]