EU volve trasladar as súas propostas para a Festa do Marisco

Os esquerdistas recordaron as propostas que realizaron no 2019 relativas á accesibilidade e seguridade da festa. Queren que se facilite o acceso aos produtos ás persoas con mobilidade reducida, que se aumenten os efectivos que velen pola seguridade e que se instale un punto morado durante os concertos.

Descentralizar as actividades culturais e de ocio, potenciar a natureza e o rural dando visibilidade a San Vicente, a Siradella, Moreiras ou ó Monte Central, e desprazar os autobuses á Lanzada para facilitar máis estacionamento no Corgo son outras das medidas que Esquerda Unida puxo enriba da mesa no último Consello Local.

O Grove, 6 de agosto de 2022.- O pasado martes, logo de cinco meses, volveuse reunir o Consello Local de Turismo para coñecer o estado dos preparativos da vindeira edición da Festa do Marisco, que terá lugar entre o 29 de setembro e o 12 de outubro. Na xuntanza, Esquerda Unida, a través do seu voceiro, José Antonio Otero, trasladou unha serie de propostas que, consideran, mellorarán varios aspectos do evento gastronómico como a accesibilidade, a seguridade e a promoción cultural e turística do concello.  

Otero comezou lembrando varias das propostas realizadas e rexistradas xa no 2019 e que, segundo indica, non foron executadas nesa edición. Así, os esquerdistas volven pedir que se instale unha caixa a nivel do chan co propósito de facilitar a retirada de tickets ás persoas con mobilidade reducida (PMR) pois, segundo indican, “o acceso a estas, tal e como se instalan habitualmente supón, no mellor dos casos, unha auténtica odisea para unha persoa con cadeira de rodas”. “O mesmo sucede nos espazos nos que se despacha a comida, pois a zona dos soportais é totalmente inaccesible para estas persoas” sinala Otero. Para solucionar este problema, dende Esquerda Unida propoñen que o concello poña persoal de asistencia que poida realizar a retirada da comida ás persoas con mobilidade reducida que así o soliciten.  

Outra das medidas é que o recinto conte con mesas adaptadas para as persoas en cadeira de rodas xa que as habituais son demasiado altas. Aínda que non comentadas na xuntanza, Otero lembra que dentro das propostas rexistradas hai dous anos tamén pedían que se aproximen os baños adaptados ao recinto “pois estes atópanse na parte traseira da Lonxa, o que supón un desprazamento moi longo para calquera persoa con mobilidade reducida”, aproximar do mesmo modo as cadeiras que se prestan ás persoas que precisan utilizalas para degustar os pratos, recuperar a carta de produtos en formato braille e que na zona de lactación se incorpore un cambiador e un microondas. Unhas propostas, que segundo indica o voceiro esquerdista, “non implica un gran desembolso económico e supoñen un salto cualitativo da festa dando unha maior facilidade ás persoas con mobilidade reducida que no mes de outubro acudan a gozar do noso evento gastronómico”.

Dentro das propostas realizadas xa no 2019, atopábase un apartado relativo á seguridade do evento. Neste senso, os esquerdistas piden que se solicite axuda a outros concellos para aumentar as forzas públicas, Policía Local e Garda Civil, durante a Festa. “Se xa considerabamos importante esta medida no 2019, nesta edición é imprescindible pois, tras dous anos sen festa debido á Covid, seguramente o número de visitantes sexa maior que os rexistrados anteriormente, polo que entendemos preciso redobrar a seguridade e, ao igual que ten feito cambados co Albariño, pedimos ao goberno que solicite reforzos a outros concellos e á subdelegación do goberno” asevera o voceiro esquerdista.

Dende Esquerda Unida tamén fan fincapé na necesidade de instalar o Punto Morado, cando menos, durante os concertos que se realicen no recinto, máxime logo do aumento de casos de violencia que están sufrindo as mulleres coa fórmula de sumisión química a través de pinchazos. Para Otero “non é descartable que este novo formato de violencia machista, que se está expandindo por todos os recunchos do estado, poida aparecer na Festa do Marisco e dende o Concello e o Consello Local de Igualdade pódese habilitar un espazo onde alertar e axudar ás mulleres que sufran esta situación ou calquera outra na que se atente contra elas”.

Ademais destas medidas, que xa foran rexistradas no 2019, os esquerdistas realizaron novas propostas no Consello Local. Deste modo, Otero pediu ao executivo que procurase descentralizar as actividades culturais e de ocio, levando estas a outras zonas e barrios do concello e que se potencien outras zonas da vila como San Vicente, A Siradella, Moreiras ou o Monte Central da Toxa aproveitando o funcionamento do Grobus. “Polo xeral os visitantes acceden á zona do Corgo e, como moito, aos arredores, polo que é preciso ensinarlles outras zonas de encanto coas que conta o noso concello potenciando o rural e a natureza que nos rodea”, sinala Otero.

Por último, co propósito de aumentar as prazas de estacionamento, dende Esquerda Unida propuxeron que os autobuses que neses quince días chegan a O Grove, descarguen aos pasaxeiros na zona do Corgo e logo se dirixan ao aparcadoiro da Lanzada, ofrecendo un servizo de recollida dos condutores. Os esquerdistas consideran que, “neses días o Heliporto é ocupado por un gran número de autobuses, polo que con esta medida e unha boa organización daríamos cabida a moitos vehículos particulares nesa zona, mellorando e aumentando o escaso espazo de estacionamento que existe no Grove nesas datas”.

Esquerda Unida, que considera que todas as medidas expostas son asumibles e realizables, agarda que o executivo local as aplique na edición deste ano, aínda que non teñen moitas esperanzas pois, segundo o seu voceiro, “ao goberno non lle senta ben que o noso grupo faga propostas e menos ter que aplicalas, do contrario convocaría o consello sectorial para traballar e non para trasladarnos información”.

Esquerda Unida volve trasladar as súas propostas de accesibilidade e seguridade para a Festa do Marisco

A representante no Consello Local de Turismo lembra que no 2019 EU trasladou unha serie de actuacións en beneficio das persoas con mobilidade reducida que non foron executadas naquela edición da festa. Agarda que este ano poidan ser implantadas.

Dende a Área de Muller de Esquerda Unida volven pedir a instalación dun punto morado contra a violencia machista, esta vez dotado de persoal cualificado. Reclaman a solicitude de reforzos para o control do aforamento, distanciamento e uso das mascaras.

O Grove, 2 de agosto de 2021.- A agrupación local de Esquerda Unida rexistrou esta semana unha serie de propostas de accesibilidade e seguridade de cara a súa implantación nesta edición da Festa do Marisco. A representante dos esquerdistas no Consello Local de Turismo, Susana Millán, lembra que o 90% das propostas “xa foron realizadas no 2019 co propósito de que foran implantadas nesa edición, pero finalmente a gran maioría quedaron sen executar”.

Millán indica que, logo de ver como a Covid evitou que se puidera celebrar a edición do 2020 e ante a previsión de que este ano se recuperará o evento gastronómico, decidiron recordarlle ao goberno que “as nosas propostas están enriba da mesa dende hai 2 anos e que, naquel entón, o Alcalde vía con bos ollos as iniciativas aportadas polo noso grupo”. Por ese motivo, e ante a falta de convocatorias do Consello Local de Turismo, os esquerdistas decidiron recuperar aquel documento para, con algunha aportación a maiores, presentalo por rexistro co propósito de que, a dous meses de comezar o evento gastronómico, “non teñan desculpa para levalas a cabo”, dando así cumprimento ao anunciado polo voceiro do grupo municipal de Esquerda Unida no pleno da semana pasada durante o punto de rogos e preguntas.

Unhas propostas que, na súa maioría, están encamiñadas a facilitar a accesibilidade ás persoas con problemas de mobilidade. Así, dende Esquerda Unida instan aos organizadores da festa a que instalen, como mínimo, unha caixa a nivel do chan, co propósito de que as persoas con cadeiras de rodas ou mobilidade reducida poidan retirar os seus tíckets de comida con maior facilidade pois, o sistema actual impide o acceso a estas persoas. Así mesmo, solicitan que poñan persoal a disposición destes usuarios co propósito de axudarlles na recollida dos pratos nos diferentes soportais, pois para eles resultan inaccesibles. Para completar esta proposta dirixida ás persoas con cadeiras de rodas, os esquerdistas propoñen que se habiliten mesas adaptadas, xa que as actuais resultan demasiado altas para quen sufre esta problemática.

O acercamento dos baños públicos ao recinto da festa –agora atópanse detrás da lonxa– ou a habilitación dun espazo con cadeiras para que as persoas con problemas se poidan sentar durante o xantar, ou a recuperación da carta de produtos en braille, son outras das peticións que os esquerdistas realizaron no 2019 e que repiten para esta edición.

Por outro lado, dende Esquerda Unida insisten na necesidade de reforzar a seguridade do evento, polo que volven reclamar que, durante esas datas, o goberno municipal solicite axuda a outros concellos para que envíen axentes co propósito de velar pola seguridade dos asistentes. Os esquerdistas son conscientes de que este ano non será un evento das dimensións doutras edicións, pero a celebración en época de Covid obriga a unha maior vixilancia en canto a medidas de prevención (aforamentos, distanciamentos, uso da máscara facial...), co que este reforzo está máis que xustificado.

Por último, dende a Área da Muller que dirixe a concelleira Ana Cristina Domínguez, lembran que hai aprobada unha moción na que o goberno se compromete á instalación de Puntos Morados conta a violencia machista nos eventos multitudinarios, e solicita que nesta edición da Festa do Marisco se faga efectivo. Domínguez pide que non se cometa o erro do 2019 e que, desta vez, o Punto Morado conte con persoal cualificado que, ademais de informar á cidadanía, poida realizar a primeira atención e activar os protocolos correspondentes en caso de que algunha muller sufra algún tipo de violencia machista no transcurso da festa gastronómica. 

Tanto Susana Millán como Ana Cristina Domínguez, agardan que esta vez o goberno atenda as peticións esquerdistas e aplique as medidas encamiñadas a que “todas as persoas que nos visitan poidan disfrutar da Festa do Marisco en igualdade de condicións, obtendo as maiores facilidades e, sobre todo, se sintan seguras”.

Gabinete de Prensa

Esquerda Unida O Grove

DESCARGAR/VER DOCUMENTO  PRESENTADO POR REXISTRO COAS PROPOSTAS

Foto Denuncia EU - Barreira arquitectónica na Avda. Portugal

♿️Para que as beirarrúas sexan accesibles a tódalas persoas deben ser eliminadas as barreiras arquitectónicas.

📢A veciñanza da Avenida de Portugal leva tempo solicitando unha solución para unha das marxes da rúa, xa que a altura do bordo dificulta o paso das persoas con problemas de movilidade ou de maior idade.

🚸 Solicitan eliminar o bordo e substituílo por unha rampa, como xa se fixo na outra marxe da rúa.

EU traslada ao Consello Local de Turismo as súas propostas de accesibilidade e seguridade para a Festa do Marisco

Unha das carpas da Festa do Marisco. Foto: Faro de Vigo.

Ofrecer maiores facilidades ás persoas con mobilidade reducida durante o evento gastronómico foi a principal demanda dos esquerdistas.

Manter a seguridade no acceso ao recinto da festa, a solicitude de reforzos policiais e a instalación dun punto morado foron demandados por Esquerda Unida.

O Grove, 12 de setembro de 2019.- Este mércores tivo lugar a celebración do Consello Local de Turismo onde, ademais de analizar as contas da Festa do Marisco do 2018, visualizar o programa da actual edición que comezará o día 3 de outubro e realizar as propostas para as Centolas de Ouro, Esquerda Unida trasladou unha serie de propostas para mellorar o evento gastronómico en canto a accesibilidade e seguridade.

A agrupación esquerdistas, que estivo representada neste consello sectorial por Susana Millán e o concelleiro José Antonio Otero, trasladou ao resto de representantes e ao propio goberno a súa preocupación polas dificultades que as persoas con mobilidade reducida se atopan no recinto durante a celebración da festa gastronómica grovense. Unha problemática que, segundo indican, foilles trasladada durante a pasada campaña electoral por un colectivo local. E é que para os esquerdistas, “unha persoa con mobilidade reducida atópase coa primeira pedra nada máis achegarse ás caixas, pois non contan coa accesibilidade adecuada” e por iso “solicitamos que se habilite unha caixa a nivel do chan para facilitar que estas persoas poidan adquirir os tickets pola súa propia conta”. Pero os problemas non rematan aí pois, se son capaces de mercar os tickets, “teñen que facer números para retirar os produtos, pois a inaccesibilidade é aínda maior e dificulta a tarefa” sentencia Otero, que pide que, “ante a imposibilidade de mellorar este aspecto, se dispoña dunha persoa do concello que realice ese traballo”.

Outro dos problemas que preocupa a Esquerda Unida é a distancia á que se atopan os diferentes servizos a disposición das persoas con mobilidade reducida, “pois dende as caixas ou mesas, existe unha gran distancia ata o posto de socorro, onde deben solicitar unha cadeira en caso de precisala, ou ata os servizos adaptados, que se atopan detrás da lonxa”. Por ese motivo José Antonio Otero e Susana Millán solicitaron que se tentase mellorar este aspecto e procurar reducir esas distancias.

Ademais destes aspectos, os esquerdistas solicitaron que se procurase recuperar a carta de produtos en Braille, que xa estivo dispoñible outros anos, e que se instalase un microondas e un cambiador na sala de lactación xa que, segundo indican, tan só conta con dúas cadeiras.

Por outro lado, a seguridade da Festa foi outro dos aspectos nos que Esquerda Unida fixo propostas. Otero e Millán reclamaron que se mantivese o peche perimetral do recinto, ao igual que en edicións pasadas, “para evitar calquera posible incidente con vehículos que poidan tentar acceder á zona de festa co propósito de facer dano”. Así mesmo pediron ao goberno que se reclamase a outros concellos a cesión de axentes de Policía para reforzar durante o evento o precario servizo co que conta nestes momentos O Grove.  Por último, os esquerdistas reclamaron a instalación dun Punto Morado de atención e información ás vítimas de violencia de xénero durante os 10 días da festa, ou cando menos nos días de concertos e maior afluencia de visitantes.

Gabinete de Prensa

Esquerda Unida O Grove

DOCUMENTO PRESENTADO NO CONSELLO LOCAL DE TURISMO: 

Á ORGANIZACIÓN DA FESTA DO MARISCO

CONSELLO LOCAL DO TURISMO

Dende  Esquerda Unida queremos realizar unha serie de propostas para a presente edición da Festa do Marisco (2019). As mesmas están divididas en dous bloques.

1.- ACCESIBILIDADE

2.- SEGURIDADE

 

1.- ACCESIBILIDADE:

Logo de termos mantido unha xuntanza cun colectivo relacionado coas persoas con mobilidade reducida, este mostrounos unha serie de problemas de accesibilidade existentes durante a celebración da Festa do Marisco. Está claro que se ten mellorado moito no aspecto de accesibilidade nas últimas edicións, pero aínda así existen aspectos que poderían beneficiar aínda máis a estas persoas, e así nolo fixeron chegar.

Unha das problemáticas que se atopa unha persoa con mobilidade reducida dentro do recinto da festa é un dos primeiros puntos de parada: as caixas onde deben recoller os tickets para obter os produtos. Indícasenos que o acceso ás mesmas é complicada, pois as ramplas existentes non permite que estas persoas poidan mercar os seus tickets sen depender da axuda doutra persoa. A segunda dificultade que se atopan é no momento no que queren trocar eses tickets, mercados con dificultade, pois os postos de comida son inaccesibles pola súa configuración, corredoiros estreitos e con numerosos obstáculos.

Outra das cuestións da que nos alertan son as distancias que teñen que percorrer para acceder aos servizos á súa disposición. As distancias son excesivas; dende as caixas ao posto socorro, onde terían que dirixirse para solicitar unha cadeira, ou mesmo se desexan facer uso dos aseos adaptados, que se atopan detrás da lonxa.

Por último, tamén se nos indica da problemática que se atopan para visualizar os concertos, pois así como agradecen a iniciativa de instalar un palco reservado para estas persoas, atópanse con que o mesmo está sendo usado por persoas sen dificultades sen que ninguén lles impida ese uso, dificultando que o poidan usar con comodidade ou simplemente renuncien ao seu uso por non atoparse con problemas.

Por ese motivo, dende Esquerda Unida facemos unha serie de propostas, en base, tal e como indicamos anteriormente, ás indicacións e recomendacións dun colectivo relacionado coas persoas de mobilidade reducida.

 

-       Instalación, cando menos, dunha caixa a nivel do chan con preferencia para as persoas con mobilidade reducida ou mellorar a accesibilidade ás caixas con ramplas en condicións que faciliten o acceso.

-     Dispoñer de persoal de asistencia, non é preciso que de forma permanente, que realice a tarefa de recollida dos alimentos que merquen estas persoas, se así o requiren.

-   Dispor dunha zona na que existan mesas adaptadas, sen ser preciso que sexan reservadas pero si preferentes para este colectivo.

-    Procurar aproximar os aseos adaptados a unha zona máis próxima ao espazo dos comensais. Se é posible preto desas mesas preferentes indicadas no punto anterior.

-    Que o lugar no que se soliciten/recollan as cadeiras reservadas para persoas con mobilidade reducida se aproxime á zona de caixas ou ao espazo das mesas indicado no punto terceiro.

-      Que no palco dos concertos reservado para persoas con mobilidade reducida se dispoña de persoal que vixíe que o uso sexa exclusivo para estas.

-      Recuperar a carta en Braille existente en outras edicións.

Fora da accesibilidade pero como mellora noutros aspectos propoñemos;

-      Que á zona de lactación, ademais das dúas cadeiras, que era o único co que contaba, se incorpore un microondas e un cambiador.

 2.- SEGURIDADE

Co propósito de mellorar a seguridade da Festa do Marisco en todos os aspectos, propoñemos:

-   Tendo en conta que o Ministerio de Interior mantén o Nivel 4 de Alerta Antiterrorista (NAA) instamos a manter o peche perimétrico do recinto con obstáculos que dificulten o acceso de vehículos de forma descontrolada, tal e como se leva realizando dende hai uns anos tras instancia de Esquerda Unida.

-      Dada a precariedade na que se atopa o servizo da Policía Local instamos a que se soliciten reforzos a outros concellos (ao igual que ten feito Cambados co Albariño) e a outras forzas do estado (Garda Civil, Policía Autonómica) para o control e seguridade do recinto da festa así como do tráfico rodado do concello, sobre todo nos días de maior afluencia.

-      Que se instale un Punto Morado contra as violencias machistas durante os días da festa, localizado nunha zona visible e que conte co persoal cualificado.  

O Grove, 1 de setembro de 2019.

Agrupación Local de Esquerda Unida O Grove