O arousán Juan Fajardo encabezará a candidatura de EU ao Parlamento galego por Pontevedra

Hoxe tivemos a sorte de poder acudir á convención provincial de ESQUERDA UNIDA en Vigo na que se presentaba como cabeza de lista para as vindeiras eleccións autonómicas a Juan Fajardo Recouso, actual concelleiro en Vilagarcía de Arousa e traballador Informático, aínda actualmente atópase no paro. Acompáñao como número 2 da candidatura a viguesa Eva Solla, enfermeira e responsábel da área de Saúde e Benestar Social en Vigo, traballadora do SERGAS. A candidatura aprobada supón unha renovación do 80% respecto das pasadas eleccións e conta cunha ampla participación da mocidade. Dita candidatura aínda deberá ser ratificada polo Consello Político Nacional de Esquerda Unida.

O acto iniciouse cunha asemblea aberta, na que un 50% dos asistentes eran persoas non afiliadas, representativos de diferentes sectores sociais e na que se realizaron aportacións aos documentos programáticos que EU defenderá no parlamento autonómico.

Na súa intervención, Juan Fajardo, destacou que EU aporta firmeza na construción dunha barreira contra a agresión ao emprego e aos servizos sociais; aporta coherencia entre o que se di e o que se fai; aporta solvencia na alternativa, para combater a resignación. O candidato chamou a mobilización para unha saída da crise que se faga tendo en conta ás persoas e non os poderes financeiros, chamados mercados.

Un sentir maioritario da Convención foi a aposta pola Convocatoria Social como método de construción e participación dende abaixo.

Desde EU do Grove confiamos plenamente neste aurensán comprometido co traballador e sectores en exclusión social, entusiasta de ideas claras, coherencia ideolóxica e que porá as cousas claras no Parlamento.