venres, 30 de setembro de 2011

Sobre a situación económica municipal


A situación económica actual de crise do sistema capitalista de produción non a creamos os traballadores e traballadoras. Foron as políticas de corte neoliberal levadas a cabo por parte dos gobernos do PP e do PSOE nas distintas administracións públicas as que puxeron en marcha a maquinaria de destrución do Público, reducindo a capacidade de maniobra das adminstracións públicas á hora de dar resposta ás necesidades dos cidadáns, chegando ata o golpe de estado institucional perpetrado polos representantes da Banca e as grandes empresas, que son o PP e o PSOE, constitucionalizando a ideoloxía neoliberal pola vía de urxencia, sen tan sequera consultar á cidadanía, non fora ser que a democracia se interpuxera no seu camiño de destrución e imposición.


Agora que a bomba está a punto de estouparlles nas mans tras deixar de ingresar o Estado millóns de euros ao ano procedentes dos petos dos máis ricos, pertenden unha vez máis que sexan os traballadores, asalariados e pequenos autónomos, os que paguen cunha maior carga fiscal os pratos rotos.

A suba de impostos que nos propuxo o goberno Tripartito non pode ser asumida por Esquerda Unida. Son diversos os motivos que nos levan a tomar esta postura. Algúns deles supoñemos que os adiviñarán vostedes da introdución feita. Outros veñen dados polo xeito de operar deste Tripartito. As contradicións do Partido Popular e os seus socios son o colmo da hipocresía e o despropósito. Recordemos como hai tres anos o PP e Ameca criticaban a actualización das taxas de lixo e auga, así como a suba do Imposto de Vehículos, o mesmo que eles traen de novo para elevar. Daquela fixeron unha crítica acertada ao noso entender, e era que non se negociaran estas modificacións coa oposición, caíndo agora na postura que tanto criticaron.

Hai un mes aproximadamente, o Alcalde e o Concelleiro de Facenda facían unha rolda de prensa na que calificaban a situación económica do Concello de “asfixia financieira”. Desde Esquerda Unida, a través dos medios de comunicación, trasladamos unha proposta ao goberno Tripartito: que o Alcalde convocase aos voceiros dos distintos grupos municipais coa finalidade de darnos a coñecer a verdadeira situación económica (e non os datos cociñados para crear alarmismo na sociedade que presentaron á prensa), así como traballar en conxunto nos orzamentos municipais e na actualización de taxas que fosen precisas. Non houbo resposta.

Desde Esquerda Unida preguntámosnos:
  • En qué sustenta o goberno a suba dun 16% do Imposto de Vehículos nun periodo de tres anos?
  • Que foi daquela proposta do PP sobre o Imposto de Vehículos que presentou a Pleno en 2008? Era soamente para xustificar o seu voto en contra? Se non é así, que fai que agora non a incorporen á proposta que levaron a Pleno?
Reafirmámosnos na nosa proposta de reunir a todos os portavoces municipais para que desde o goberno local se nos acheguen datos reais da situación económica do Concello, e non o refrito de cifras cociñadas que desde o goberno se trasladaron aos medios de comunicación coa única finalidade de crear confusión e alarmismo, co abxectivo de abrir unha vía libre á modificacións tributarias unilaterias por parte do Tripartito.

Ningún comentario:

Publicar un comentario