xoves, 29 de setembro de 2011

EU critica a concesión de axudas a entidades que non presentaron a solicitude en prazo

Prensa: todogrove.com 
miércoles, 28 de septiembre de 2011   

Esquerda Unida pedirá explicacións no pleno deste xoves respecto do reparto de subvencións a entidades culturais do presente ano, no que foron concedidas axudas a catro entidades que presentaron as súas solicitudes fóra de prazo.


Redacción | Foto: M. Muñiz
O voceiro desta formación na corporación, José Antonio Taboada, trasladará esta cuestión na quenda de rogos e preguntas do pleno de mañá, na que buscará saber por que o Goberno local acordou incluír no reparto de subvencións a catro colectivos que presentaron as súas solicitude fóra do prazo establecido nas bases publicadas no Boletín Oficial da Provincia (BOP) do pasado 25 de maio, de quince días naturais.
Segundo denuncia EU no seu escrito de rogos e preguntas, este reparto conta cun informe desfavorable de Intervención, no que ademais de observar unha falta de documentación “na maioría das entidades solicitantes”, un feito corrixible e que a propia formación define como “algo normal”, indícase tamén que “catro solicitudes presentadas fóra do prazo” establecido.
Concretamente, tratase das solicitudes da Asociación Cultural Cantodorxo, que resultou beneficiaria de 3.920 euros; a Asociación de Mulleres Rurais Adro Vello, que obtivo 1.295; o Club Náutico de San Vicente, ao que se lle concederon 1.195; e a Coral Polifónica Boca da Ría, que obtivo, 900 euros; e o CMCD Breogán, ao que se lle outorgaron 600 euros, segundo informou EU.

Outros rogos
Taboada tamén requirira información no pleno de mañá respecto de cómo foi adxudicado o posto de venda de sobremesas da Festa do Marisco, que “estes últimos anos era abastecido polas diferentes pastelerías da vila”, mentres que, desta volta, “parece ser que, cando menos, a dúas destas, se lles indicou que este ano non ían realizar o traballo”.
Por outra parte, EU tamén pedirá mañá explicacións respecto da “demora” na resposta dos rogos e preguntas que realizou no pleno de xullo, aos que o Goberno se comprometeu a contestar por escrito. Pasados dous meses daquela sesión, esta formación continúa “agardando polas correspondentes respostas”.
Así mesmo, EU tamén abordará as “deficiencias de iluminación” da rúa do Altiño; a “falta de visibilidade” nas interseccións da rúa das Barqueiras e das rúas Montiño A e Montiño C; ou as queixas dos veciños da Fontiña e do Montiño respecto da prohibición de estacionar nas inmediacións do edificio Campiño que fixou o actual Goberno e que converteu a estas rúas “nun novo sistema de recadación mediante multas de tráfico que sofren os propios veciños”, lamenta esta formación.

Ningún comentario:

Publicar un comentario