EU denuncia a situación do Centro de Saúde do Grove e súmase ás protestas

Dende Esquerda Unida sumámonos á concentración que o BNG convocou para o vindeiro luns ás 12 do mediodía á porta do Centro de Saúde en protesta pola situación que se está a vivir coa nosa atención primaria.

Nos últimos meses estamos vivindo unha grave precariedade en canto a servicios de atención no noso Centro de Saúde. A falta continua de facultativos tanto no servizo de atención primaria como do PAC está a provocar longas demoras á hora de acadar unha cita, a anulación das xa concertadas, a derivación da atención a outros centros da contorna ou ao Hospital Provincial e, o que é peor, a necesidade de acudir a centros privados para lograr solucións.

Esta situación agravouse nestes últimos días, no que o Centro de Saúde do Grove pasou a contar con un único facultativo que só atendía urxencias. De continuar esta condición, a gravidade verase acentuada debido ao aumento poboacional derivado do comezo da época estival.

Lamentamos as verbas do xerente da EOXI do pasado martes, que en lugar de procurar solucións limitouse a indicar que non se cubrirán as vacacións dos facultativos e que a atención estaría garantida, cuestión que como se demostra no Centro de Saúde do Grove é totalmente mentira. Dende Esquerda Unida solicitamos a dimisión do xerente e do seu equipo ao fronte da área sanitaria Pontevedra-Salnés, pois quedou demostrado que no lugar de resolver os problemas que se veñen sucedendo, estes estanse a agravar cada vez máis.

É preciso saír á rúa para parar as políticas que están a acabar coa atención primaria en particular, e coa sanidade pública en xeral. Desde Esquerda Unida seguimos apostando por unha resposta conxunta de toda a corporación municipal e a poboación en xeral ante esta situación de deterioro do servizo no noso centro de saúde.

Neste senso, apreciamos  unha falta de interese por parte do goberno municipal á hora de procurar estas accións conxuntas. É por iso polo que xa solicitamos unha xuntanza de voceiros, na que proporemos a petición formal da corporación municipal para solicitar a dimisión da dirección da EOXI de Pontevedra/Salnés e do Conselleiro de Sanidade. 

Así mesmo facemos un chamamento á participación de toda a veciñanza na concentración do vindeiro luns ás 12 do medio día diante do Centro de Saúde do Monte da Vila.

EU denuncia que a Oficina de Turismo se atopa pechada ao público

 

Os esquerdistas alertan que esta situación, tal e como recolle a Lei de Turismo da Xunta de Galicia, pode causar a perda da condición de Municipio Turístico despois de 22 anos.

Acusan ao goberno local de desidia na área de turismo e piden que se poñan as pilas e abran a Oficina de Turismo durante todo o ano, que contraten o Técnico/a de Turismo e que convoque o Consello Local de Turismo para traballar de forma conxunta nunha planificación turística anual.

O Grove, 11 de xuño de 2022.- Calquera persoa que nestas semanas se achegase ata O Grove para visitar a súa contorna e precisase de calquera tipo de información turística, marchou igual que chegou, pois o único que puideron e poden atopar ao chegar á Oficina de Turismo municipal é a porta pechada e un cartel no que se indica que “Esta oficina permanecerá pechada ata novo aviso”. 

Unha situación que denuncian dende a agrupación local de Esquerda Unida, pois non entenden que “un concello como O Grove, que ostenta a condición de Municipio Turístico dende hai 22 anos teña a súa Oficina de Turismo pechada ao público.” Así, os esquerdistas alertan de que “ter pechada a oficina pode supoñer a perda desta condición”, pois a Lei 7/2011 do 27 de outubro do Turismo de Galicia no seu punto E do artigo 28 indica que unha das condicións mínimas para ser declarado Municipio Turístico é a de prestar a atención e orientación aos usuarios e usuarias turísticas mediante unha oficina de información que ten que estar aberta todo o ano, “cuestión que claramente no Grove non se cumpre”, apuntan dende Esquerda Unida que fan referencia ao punto C do artigo 30 onde se indica que o incumprimento dos servizos mínimos é un dos motivos para perder a condición de Municipio Turístico.

Do mesmo modo, dende Esquerda Unida denuncian tamén a desidia do goberno municipal en canto ao traballo turístico, “que parece que tan só se centra na Festa do Marisco, como se non existisen outros asuntos nos que traballar”. Neste aspecto, os esquerdistas seguen agardando pola convocatoria do Consello Local de Turismo co propósito de traballar de forma conxunta nunha planificación turística para todo o ano, “tal e como se comprometera o Alcalde alá polo 2020”. Pero dende Esquerda Unida non se estrañan desa parsimonia e desa falta de interese, pois segue sen cumprir co acordo ao que chegaron no 2016, cando se comprometeu a cubrir a praza de Técnico/a de Turismo.

Así, dende Esquerda Unida piden ao executivo local que se poñan as pilas, que abran a Oficina de Turismo de forma permanente como marca a lei, que cubran a praza de Técnico/a de Turismo e que convoque o Consello Local de Turismo para traballar de forma conxunta nunha planificación anual.

EU pedirá ao Consello Local da Igualdade que se implique na detección dos puntos escuros do Grove

 

Ana Cristina Domínguez proporá ao CLI que traballe na elaboración dun informe que inste ao goberno a iluminar as zonas que poidan resultar intimidatorias para as mulleres que fan eses percorridos soas.  

O Grove, 02 de maio de 2022.- En maio de 2018, o pleno aprobou unha serie de medidas de prevención para as mulleres, entre elas a eliminación de puntos negros/escuros no Concello do Grove. Iso é, iluminar as rúas, camiños e lugares frecuentados pola veciñanza que, ao carecer dunha boa iluminación, fanse perigosos ou intimidatorios para os viandantes, sobre todo os do xénero feminino.  

Pois ben, segundo indican dende Esquerda Unida, a pesares de ter reclamado o cumprimento dese punto en numerosas ocasións e de pedir a iluminación de sitios concretos en diferentes plenos, o goberno non fixo nada dende aquela. "No Grove existen moitos espazos que, por unhas razóns ou outras, non se atopan iluminadas. Rúas, camiños, curruchos,.. Traxectos polos que a diario transitan mulleres, ben sexa para ir traballar, aos recados ou simplemente para pasear. Percorridos que en ocasións provocan que esas mulleres o realicen con medo debido á falta de iluminación", indica a responsable da Área de Muller, Ana Cristina Domínguez.  

É por iso que, cansos de pedilo en pleno, a esquerdista, levará o tema ao Consello Local da Igualdade de mañá martes, procurando a implicación do órgano sectorial na detección deses puntos e co resultado, elaborar un informe que inste ao goberno municipal a poñer fin a esa escuridade na rúa dando así unha maior seguridade para as mulleres do Grove.