Esquerda Unida acusa ao goberno local de “condenar O Grove ao caos” durante o verán

O grupo municipal denuncia que o verán no Grove estivo marcado polo caos circulatorio, a falta de prazas de estacionamento, os servizos públicos saturados e a inacción dun goberno que, malia ter recibido múltiples avisos, non puxo en marcha ningunha medida de prevención. 

A formación critica tamén a mala imaxe xerada pola falla de limpeza e recollida de lixo selectivo, o desleixo na atención ás praias e a ausencia de medidas de control e planificación, o que cualifican como “un novo fracaso do PSOE” á hora de xestionar a tempada estival.

O Grove, 3 de setembro de 2025.- Esquerda Unida do Grove fixo este mércores un balance moi crítico da tempada estival, asegurando que “cando pensabamos que o caos do verán pasado era insuperable, este goberno demostrou a súa capacidade de superación, conseguindo empeoralo”. A formación acusa ao executivo de José Cacabelos de “condenar a vila ao caos por culpa da súa deixadez e incompetencia”, e denuncia que “a imaxe que se ofreceu este verán foi nefasta, tanto para a veciñanza como para os milleiros de visitantes que nos escollen. A sensación que se levaron os turistas foi dunha vila abandonada”. 

O voceiro municipal, José Antonio Otero, foi rotundo, “Este goberno só funciona a base de improvisación e propaganda. Non existe nin unha soa planificación seria. Levamos meses pedindo o pintado dos pasos de peóns e o desbroce de rúas e estradas, e chegamos a xullo cunha vila sen sinalización horizontal, con rúas recen asfaltadas sen delimitar e con beirarrúas e camiños invadidos pola maleza, provocando unha imaxe dantesca e un serio perigo para os viandantes. É un auténtico milagre que non se producira un accidente fatal”. “Non é de recibo que se pinten parte das sinalizacións horizontais e se desbroce en pleno agosto” sentenciou. 

Otero incidiu tamén na falta de efectivos da Policía Local, na inexistencia dun servizo de guindastre e na falta de estacionamentos disuasorios. “Este verán O Grove converteuse practicamente nunha vila sen lei. Calquera podía aparcar diante dun garaxe, circular en dirección contraria ou ocupar beirarrúas sen que pasara nada. E mentres tanto, seguimos sen un servizo de guindastre, algo que levamos anos reclamando e que sería fundamental para garantir o cumprimento das normas e dar solución inmediata ás persoas afectadas”. “Este goberno non tivo capacidade para crear zonas de estacionamento disuasorio, tanto nas inmediacións dos areais como no propio casco urbano, a pesar de comprometerse a iso e contar con propostas enriba da mesa dende hai tempo. O abandono foi tal que incluso se reduciron prazas de estacionamento no aparcadoiro de Entrehortas debido á obra de humanización da zona, que acumula un serio retraso”. 

Tamén a concelleira Susana Millán cargou con dureza contra a xestión turística e a ausencia de planificación. “Neste último mes, o alcalde chegou a recoñecer que non estamos preparados para recibir a afluencia de visitantes, pero a realidade é que o que non está preparado é el nin o seu goberno. Despois de dez anos no poder, seguimos sen técnico especializado, sen un plan turístico, sen estratexia e sen mesas de traballo co sector. O que hai son declaracións vagas na prensa para xustificar o fracaso da súa xestión”. 

Millán fixo especial fincapé na problemática do autocaravanismo. “Pasamos do abandono absoluto á tentación de prohibir, e facelo de forma ilegal. O turismo de autocaravanas leva anos medrando e é tan respectable como calquera outro, pero necesita infraestruturas e servizos mínimos. Nós propuxemos a creación de áreas de autocaravanas con servizo de descarga e recollida de augas, gratuítas ou de pago, pero o goberno fixo oídos xordos. Se non se actúa, seguirán os problemas de convivencia e os discursos contra este tipo de visitantes”. “A acampada fóra dos espazos habilitados e as actitudes incívicas dunha parte dos autocaravanistas, como a do resto de visitantes e veciñanza, é sancionable sen necesidade de máis regularización, o problema é que non hai quen sancione”. 

 Para a concelleira de Esquerda Unida “a tempada pode considerarse exitosa en canto a afluencia, pero dubidamos que quen se achegou por primeira vez a O Grove contemple regresar o vindeiro ano”. Segundo Millán, “a solución pasa por contratar persoal especializado e sentar ao sector e traballar nunha planificación e unha estratexia turística conxunta que marque o camiño a seguir e as necesidades reais”. 

Pola súa parte, Anxo Meis, puxo o foco na situación dos paseos e accesos ás praias, que cualificou como “un perigo público”. “Levamos anos advertindo do deterioro das pasarelas de madeira e dos accesos aos areais, e a realidade é que cada ano están peor. Táboas levantadas, pasamáns rotos ou directamente inexistentes,… O resultado é que houbo numerosos incidentes, o máis grave o dunha persoa evacuada en helicóptero na zona de Pedras Negras. E o alcalde responde con cifras inventadas de máis de 4 millóns de euros para a súa reparación, sen auditoría nin informe técnico que o avale. Iso non é seriedade, é improvisación e abandono”. 

Meis insistiu en que esta situación podería terse evitado con algo tan simple como un plan de mantemento anual. “Non estamos falando de obras faraónicas, senón de revisar cada ano o estado dos paseos e accesos, reparar o que estea danado e asegurar a súa seguridade. Cando non se fai nada, o resultado é o que temos hoxe: infraestruturas en estado lamentable e risco para as persoas”. 

Outro dos puntos destacado por Meis foi a recollida selectiva de residuos, que, segundo denunciaron, “non funcionou como debería”. “Foron moitas as ocasións nas que os colectores de cartón, plástico e/ou vidro estiveron cheos durante días sen que a empresa encargada procedese á súa retirada. Xa o advertimos en pleno e pedimos aumentar a frecuencia de recollida, sobre todo no casco urbano polo incremento poboacional, pero o concello fixo caso omiso”. 

A situación levou a que moitos usuarios deixaran bolsas e caixas acumuladas a carón dos colectores, “ofrecendo unha imaxe lamentable da vila”. Meis lembrou que a primeira vez que EU denunciou o problema “díxosenos que fora un erro puntual, pero a realidade é que se repetiu en numerosas ocasións, demostrando que o problema é estrutural e de falta de previsión”. 

Os tres concelleiros coincidiron en que a vila non pode seguir neste camiño. “Cada verán a situación empeora, e todo porque non hai planificación, non hai mantemento e non se aposta polos servizos públicos. O Grove non pode seguir á deriva, funcionando a golpe de improvisación. Se non se toman medidas serias, cada tempada estival converterase nun problema maior ca o anterior”, concluíron. 

Entre as medidas que Esquerda Unida propón destacan: dotar de máis persoal e medios aos servizos municipais, crear unha brigada estable de limpeza e desbroce, poñer en marcha o servizo de guindastre e depósito de vehículos, habilitar zonas de estacionamento disuasorio, crear áreas para autocaravanas, mellorar a recollida selectiva de residuos e, sobre todo, abrir un debate serio sobre o futuro turístico da vila a través do Consello Local de Turismo e coa contratación dun técnico especializado. 

“Se non temos unha vila limpa, ordenada e mantida para nós mesmos, é imposible tela en boas condicións para os que nos visitan”, conclúen.

Esquerda Unida propón recuperar os solares abandonados do Grove para usos comunitarios

O grupo municipal leva ao pleno unha moción para poñer en marcha un programa de cesión temporal de parcelas privadas a cambio do seu mantemento. 

 A iniciativa permitiría crear hortas urbanas, zonas verdes ou aparcadoiros provisionais, dando unha saída útil a fincas sen uso e evitando problemas de insalubridade e risco de incendio. 

A proposta aposta pola colaboración voluntaria dos propietarios e por un enfoque social, ambiental e participativo da xestión do solo urbano e rústico.

O Grove, 18 de agosto de 2025.- O grupo municipal de Esquerda Unida vén de presentar unha moción para o seu debate, coa que propón a creación dun Programa Municipal de Cesión Temporal de Solares Privados, que permita ao Concello poñer en uso, de maneira provisional e sen alterar a propiedade, as numerosas fincas que permanecen abandonadas, sen uso ou en mal estado no termo municipal. 

A moción foi rexistrada solicitando a súa inclusión no pleno extraordinario que o goberno municipal ten previsto celebrar o 25 deste mes. No caso de non ser incorporada a esa sesión, a moción debaterase no pleno ordinario fixado para o 29 de setembro. 

A proposta permitiría que os propietarios de solares cedesen temporalmente o uso das súas fincas ao Concello a cambio de que este se encargue do seu mantemento, limpeza e posta en valor, destinándoas a usos de interese público e comunitario, como hortas urbanas, zonas verdes, espazos educativos ou mesmo aparcadoiros disuasorios temporais. 

“Hai moitas parcelas no Grove que levan anos sen coidado, acumulando maleza e lixo, con risco de incendio ou pragas, e xerando malestar entre a veciñanza. Moitas veces detrás desa situación hai persoas maiores, con problemas de saúde ou sen recursos. Non sempre é cuestión de vontade, senón de falta de capacidade”, explicou o voceiro de Esquerda Unida, José Antonio Otero. 

A moción inclúe tamén a elaboración dunha ordenanza municipal específica que regule esta fórmula de cesión voluntaria, e que garanta os dereitos da propiedade ao tempo que permite o uso comunitario do solo en beneficio do ben común. O programa incluiría a posibilidade de implicar a entidades sociais, centros educativos ou colectivos veciñais na xestión dos espazos cedidos. 

Dende Esquerda Unida deixan claro que esta proposta non exime nin aos propietarios de cumprir coa súa obriga legal de manter os seus solares en bo estado, nin ao Concello da súa responsabilidade de facer cumprir a ordenanza municipal vixente. 

“Estamos a propoñer unha ferramenta útil, solidaria e intelixente. Evitamos sancionar a quen non pode cumprir coa súa obriga, ofrecéndolle unha alternativa digna, e ao mesmo tempo recuperamos espazos mortos para a vida comunitaria. Pero iso non significa que se poida mirar para outro lado: o Concello debe seguir vixiando, actuando e esixindo o cumprimento das obrigas legais a quen non colabore”, concluíu Otero. 

Co propósito de facilitar a posta en marcha efectiva desta medida e evitar atrasos innecesarios, Esquerda Unida entregará ao goberno municipal un borrador de ordenanza reguladora e un modelo de convenio tipo, que poidan servir como base de traballo inmediata para desenvolver o programa. 

Dende Esquerda Unida agardan que o goberno e resto dos grupos municipais apoien a iniciativa, que se enmarca nun modelo de vila máis habitable, coidada e centrada na participación cidadá. Insisten en que o programa será voluntario, transparente e respectuoso coa propiedade privada, e que está pensado como unha solución práctica fronte á desatención do espazo privado que impacta negativamente no interese colectivo.

[ver/descargar moción]

Esquerda Unida pregunta pola licitación da Escola de Música José Silva Torres e alerta dun posible atraso no inicio do curso

A formación critica que, a un mes do comezo do curso escolar, o servizo segue sen licitar nin publicarse os pregos, xerando incerteza para familias e alumnado. 

O goberno municipal comprometérase a licitar por 4 anos, pero Esquerda Unida teme que se repita a improvisación e irregularidades do pasado ano.

O Grove, 14 de agosto de 2025.- Esquerda Unida vén de rexistrar unha pregunta formal no Concello para coñecer a situación da licitación da Escola de Música José Silva Torres. A poucas semanas de comezar o novo curso, a formación denuncia que non existe licitación publicada no portal de contratación da Xunta, nin se coñecen os pregos, malia que o goberno municipal asegurara que, desta volta, o contrato sería por catro anos. 

O seu voceiro municipal, José Antonio Otero, lembra que no curso pasado tamén se anunciou unha licitación plurianual e, finalmente, “tivo que prorrogarse a contratación cunha fórmula ao límite da legalidade”. “Naquel momento aseguráronnos que a partir de xaneiro deste ano contaríamos coas bases para licitar por 4 anos, dando seguridade ás familias e á empresa que resultase adxudicataria, pero hoxe seguimos sen nada publicado”, engade. 

Otero advirte de que unha licitación por catro anos require máis tempo de publicidade e tramitación. “Se seguen demorando o proceso, non vai dar tempo a comezar o curso en setembro ou outubro, que sería o normal, e isto supón incerteza para familias e alumnado que deben planificar as actividades extraescolares”, afirma. 

Esquerda Unida reclama que o goberno municipal actúe “con seriedade e previsión” e que, de forma urxente, publique os pregos, convoque o concurso e adxudique o servizo para evitar que as clases se vexan afectadas.

EU presenta unha moción para reclamar que o Ministerio de Vivenda ceda ao Concello do Grove dous terreos da Sareb para vivenda pública

A proposta será debatida no pleno do luns e insta ao Goberno a transferir dous solares en mans da Sareb para impulsar vivenda social municipal.

Desde EU consideran que a situación da vivenda no Grove é insostible e cómpre mobilizar todos os recursos dispoñibles para garantir o dereito a un fogar digno.

O Grove, 23 de xullo de 2025.-O grupo municipal de Esquerda Unida vén de rexistrar unha moción para o seu debate no pleno ordinario deste mes, previsto para o vindeiro luns, na que reclama ao Ministerio de Vivenda e Axenda Urbana que ceda ao Concello do Grove dous terreos de titularidade da Sareb para destinalos á construción de vivenda pública.

A proposta sinala como obxectivo prioritario mobilizar solo en mans públicas para dar resposta á grave crise de acceso á vivenda que sofre a veciñanza do Grove, especialmente a xuventude e as familias traballadoras. En concreto, Esquerda Unida insta ao Goberno a transferir gratuitamente dous solares situados na Rúa Bouzas e na Rúa Luis A. Mestre, ambos os dous propiedade da Sareb, pero que segundo a nova estratexia estatal xa foron ou están sendo incorporados ao patrimonio do Ministerio.

“Trátase de dous terreos perfectamente viables para desenvolver pequenas promocións públicas de vivenda en réxime de alugueiro social, que é o que necesita esta vila”, explicou o voceiro de EU, José Antonio Otero. “Sabemos que non acadan os 30 fogares que esixe o Ministerio para as súas actuacións directas, pero iso non debe ser impedimento para que o Concello poida actuar con apoio doutras administracións”, engadiu.

A moción tamén solicita a elaboración dun informe técnico municipal que avalíe a viabilidade urbanística dos dous solares, e á Xunta de Galicia e ao propio Ministerio a súa implicación económica mediante convenios co Concello. Segundo os datos recollidos por EU, entre os dous terreos poderían construírse entre 30 e 33 vivendas, cifra nada desdeñable nun municipio sen parque público de vivenda.

Otero advertiu de que “a situación da vivenda no Grove está completamente desbordada: prezos imposibles, presión turística, ausencia de vivenda social e persoas obrigadas a marchar do seu propio concello. A resposta institucional ten que ser proporcional á gravidade da situación”.

Desde Esquerda Unida afirman que esta iniciativa forma parte do seu compromiso con políticas valentes en materia de vivenda pública e dereito á cidade, é dicir, o dereito de vivir dignamente, decidir sobre o noso territorio e non ser expulsadas dos nosos barrios. “Os terreos están aí, son públicos e poden cambiar a vida de moita xente. Só fai falta vontade política e cooperación entre administracións.”, concluíu o voceiro.

ver/descargar moción

Esquerda Unida formulou alegacións ao borrador do novo regulamento das Centolas de Ouro

Logo de que o grupo municipal o viñese solicitando durante varios anos, o goberno local presentou o borrador dun regulamento para as Centolas de Ouro no Consello Local de Turismo que se celebrou este mércores.

Esquerda Unida advirte que o texto presentado polo goberno local podería desnaturalizar o premio e desvincular as Centolas de Ouro da súa esencia como máximo recoñecemento local. Defenden que os galardoados deben manter un vínculo real co Grove e reclama abrir o proceso de propostas á participación cidadá.

O Grove, 3 de xullo de 2025.-Esquerda Unida trasladou varias alegacións ao Consello Local de Turismo, que tivo lugar este mércores, no marco da elaboración do primeiro regulamento das Centolas de Ouro, o galardón máis simbólico e de maior prestixio institucional do Grove, que ata agora carecía de normativa formal.

Desde a formación amosan a súa preocupación pola posible desnaturalización deste recoñecemento. Segundo interpretan, o texto que pretende impulsar o goberno local podería desvincular o premio da súa esencia: o compromiso e a relación co Grove.

A concelleira de Esquerda Unida, Susana Millán, lembra que "ata o de agora, as Centolas de Ouro foron entregadas a persoas, colectivos e empresas que, sendo do Grove ou de fóra, mantiveron sempre unha conexión clara co municipio, contribuíndo á súa promoción, ao seu desenvolvemento social ou á súa proxección exterior".

"A intención do alcalde é converter estes galardóns nuns novos Príncipe de Asturias, sen que os premiados teñan que ter vínculos co Grove, e así o deixou entrever nas últimas xuntanzas do Consello Local de Turismo", advirte Millán. Para a formación, o borrador do regulamento recolle esa orientación, polo que defenden que "o criterio de vinculación co Grove debe seguir sendo o eixe central da distinción, evitando que o galardón perda o seu valor identitario ou se converta nun premio deslocalizado sen conexión co territorio".

"Queremos blindar a relación co Grove no propio regulamento. Non se pode abrir a porta a que este premio, que simboliza o máximo recoñecemento municipal, se conceda a persoas ou entidades sen ningún tipo de vínculo coa nosa vila. Iso sería baleirar de contido as Centolas de Ouro e desnaturalizar o seu sentido", insiste Millán.

Entre as alegacións que presentaron, Esquerda Unida propón incorporar a posibilidade de conceder o galardón a título póstumo a persoas que, por diversas razóns, non foron recoñecidas en vida, recuperando así figuras de especial relevancia para a memoria colectiva da vila. "Non entendemos que o borrador prohiba outorgar este distintivo a persoas falecidas", sinalan.

Outro dos puntos fundamentais que defenden é abrir a presentación de candidaturas á veciñanza, aos colectivos e ás entidades sociais e culturais, garantindo un proceso máis participativo e inclusivo, e non restrinxido unicamente aos membros do Consello Local de Turismo, como era ata agora e como tamén recolle o borrador actual. "Se abrimos a participación da veciñanza, poderemos recoller propostas que quizais se nos escapan aos membros do Consello", explica Millán.

"É importante que a regulación desta distinción, que compartimos que debe existir, non sirva para afastala da nosa realidade nin da nosa xente. As Centolas de Ouro deben seguir pertencendo ao Grove", concluíu Millán.

EU esixe o pintando de todas as sinalizacións horizontais do Grove e a inclusión do lema “O Mar Comeza Aquí” nas arquetas dos sumidoiros

A formación alerta do perigo que supón a ausencia de pasos de peóns e outras sinalizacións horizontais en moitas das rúas do concello e pide que o pintado non se limite ás recentemente asfaltadas.

Aproveitan para reclamar a aplicación efectiva da campaña “O Mar Comeza Aquí”, aprobada por unanimidade en 2024 a proposta de Esquerda Unida, que pretende concienciar sobre a conexión entre o lixo nas rúas e a contaminación mariña.

O Grove, 17 de xuño de 2025.-Esquerda Unida solicita ao goberno municipal que os traballos de pintado de sinalización horizontal non se limite ás rúas que veñen de ser asfaltadas e se estendan ao resto do concello. A formación alerta de que en moitos puntos do municipio a sinalización é “inapreciable ou inexistente”, especialmente os pasos de peóns, e isto “supón un perigo real tanto para os vehículos como para os viandantes”, explica o seu voceiro José Antonio Otero.

Desde Esquerda Unida lembran que en varios plenos anteriores xa advertiran desta situación, e que dende o goberno municipal se xustificou o atraso no pintado pola execución do plan de asfaltados. Con todo, “tememos que só se vai pintar o novo, e que volverán esquecer o resto das rúas, xusto cando se achega o verán e aumenta a afluencia de visitantes, o que fai aínda máis necesario garantir a seguridade peonil”, insiste Otero.

Ao mesmo tempo, Esquerda Unida propón que se aproveiten estes traballos para incorporar unha acción de sensibilización ambiental de baixo custo e alto valor educativo: o pintado do lema “O mar comeza aquí” nas arquetas dos sumidoiros, especialmente nas zonas máis transitadas.

Esta acción forma parte dunha campaña ambiental presentada por Esquerda Unida e aprobada por unanimidade no pleno de setembro de 2024, co obxectivo de lembrar á cidadanía que os residuos depositados nas rúas, como as cabichas, rematan moitas veces no mar. “Moita xente non é consciente de que o lixo que tiramos ao chan ou aos sumidoiros acaba na nosa ría. Este pintado é unha maneira visual, directa e económica de concienciar”, sinala o concelleiro Anxo Meis, defensor da iniciativa.

A medida xa foi implantada en numerosas cidades europeas e está recoñecida como boa práctica ambiental. Desde Esquerda Unida consideran que esta intervención debería ser o primeiro paso dunha campaña máis ampla, que inclúa tamén sistemas físicos de recollida de residuos nos sumidoiros.

“Se se están a pintar pasos de peóns e marcas viarias, non hai razón para non aplicar tamén esta medida que xa foi aprobada por este mesmo pleno”, engade Meis. A formación lembra que O Grove ten no mar o seu principal recurso económico e ambiental, polo que toda acción que contribúa a preservar o ecosistema mariño debe ser prioritaria.

Por todo isto, Esquerda Unida reclama que o Concello actúe de inmediato para estender o pintado de sinalizacións a todo o termo municipal e que execute xa os compromisos adquiridos coa campaña “O mar comeza aquí”.

Esquerda Unida denuncia un novo gasto do auditorio a raíz dunha sentenza do TSXG

A Xustiza dá a razón á UTE executora da obra do Auditorio e Escola de Música do Grove e obriga ao Concello do Grove a pagar máis de 180.000 € pola revisión de prezos e os xuros. Consideran esta sentenza froito dunha mala xestión e deixadez do goberno municipal.

A agrupación lamenta que o Auditorio siga acumulando sobrecustos e aproveita para instar ao Alcalde a esixir a subsanación de todas as deficiencias que presenta a edificación dende a súa inauguración.

O Grove, 8 de xuño de 2025.-O Tribunal Superior de Xustiza de Galicia (TSXG) vén de condenar ao Concello do Grove a aboar 151.303,68 euros, máis o IVE e os xuros legais desde abril de 2022 á UTE encargada da construción do Auditorio e Escola de Música, tras recoñecer que a empresa tiña dereito a unha revisión extraordinaria de prezos polo incremento dos custos dos materiais, ao abeiro do Real Decreto-lei 3/2022.

A empresa presentara a súa solicitude en abril de 2022, cando aínda non se aprobara a certificación final das obras. Sen embargo, o Goberno local non respondeu, dando lugar a unha desestimación por silencio administrativo. O recurso da UTE foi inicialmente rexeitado polo Xulgado de Pontevedra, pero agora o TSXG revoga esa decisión ao considerar que a solicitude foi presentada en prazo e cumpría os requisitos legais.

Aínda que cabe recurso, desde Esquerda Unida lamentan o que esta sentenza supón, “máis de 180.000 euros de fondos públicos que poderían terse evitado, ou cando menos a cantidade podía ser menor, se se fixese una xestión rigorosa, transparente e eficaz”, asevera o seu voceiro, José Antonio Otero, que considera que “tal e como se desprende da sentenza, isto é froito da mala xestión do goberno municipal, que actuou con deixadez, sen responder ás solicitudes da empresa e sen anticiparse a unha reclamación perfectamente encaixada na normativa vixente”.

Segundo a sentenza, o impacto dos materiais como o aceiro, o aluminio ou o cobre superou o 5% do orzamento, o que, para a xustiza, xustifica unha revisión de 151.303,68 euros, máis o IVE e os xuros legais desde abril de 2022. “A pesar de que a sentenza non é firme entendemos que non hai moitas opcións de cambiar o veredicto, polo cal o Concello deberá afrontar agora ese pagamento cos cartos de toda a veciñanza”, indica Otero.

Para Esquerda Unida, esta sentenza, ademais, pon de manifesto unha realidade preocupante, “a día de hoxe, seguimos sen saber cal é o custo real da obra do Auditorio. Tres anos despois da súa recepción, seguen aparecendo gastos asociados a unha infraestrutura que conta con numerosas deficiencias dende a súa inauguración”, afirma o seu voceiro.

Filtracións de auga, baños inutilizados, cableados de son e corrente oxidados, marcos das fiestras fendidos, focos de iluminación inservibles,... foron algunhas das deficiencias detectadas polos concelleiros de Esquerda Unida cando realizaron a visita ao Auditorio hai ano e medio. Segundo indican, a gran maioría seguen sen subsanarse, sen mencionar o ascensor, que funciona por tempadas, polo que instan ao Alcalde a que esixa á UTE a solución de todas esas deficiencias.

“Se temos que asumir este novo pago, que o Goberno local actúe con responsabilidade e lle reclame á empresa construtora a reparación de todas as deficiencias que presenta o edificio, que non son poucas. É inaceptable que, ademais de asumir sobrecustos e pagos por sentenza, o Concello tolere que o edificio presente problemas estruturais, técnicos ou funcionais sen reacción nin supervisión”, sentenza Otero.

EU presenta propostas para executar con un remanente que evidencia un goberno esgotado e incapaz

A formación reclama actuacións realistas, executables neste mesmo exercicio, que melloren a mobilidade, os servizos públicos, a xestión ambiental e o benestar da veciñanza.

As propostas inclúen a adquisición de terreos, reformas en equipamentos públicos, melloras na rede de auga, instalación de zonas de sombra, espazos para animais e novo equipamento municipal.

O Grove, 27 de maio de 2025.- Esquerda Unida vén de trasladar ao goberno unha batería de propostas concretas para seren financiadas con cargo ao remanente de tesourería do exercicio 2024, que ascende a máis de 6 millóns de euros. A formación volve criticar con contundencia que, malia dispor deses 6 millóns de euros de remanente e tamén dun superávit de 2,5 millóns, se siga traballando cuns orzamentos prorrogados dende o 2022.

Dende Esquerda Unida sinalan que “isto evidencia que contar con un orzamento non era nin é cuestión de falta de cartos, senón dunha nefasta xestión. É a mostra dun goberno esgotado e incapaz de executar nin sequera os seus propios orzamentos”. A formación cualifica a situación de preocupante, “chegamos ao punto de que son incapaces ata de mandar pintar un paso de peóns”.

A pesar deste panorama, Esquerda Unida mantén a súa vontade construtiva e achegou ao executivo local, tal e como anunciaran, un conxunto de actuacións pensadas para seren realistas e executables dentro do presente ano, tal e como esixe a normativa. As propostas céntranse na mellora de infraestruturas, servizos públicos e espazos comúns, con impacto directo na calidade de vida da veciñanza.

Entre as actuacións propostas, destaca a compra do terreo de Entrehortas, unha operación comprometida nas negociacións do ano pasado que finalmente non se chegou a pechar. A formación considera esencial esta adquisición para ampliar o aparcadoiro da zona e habilitar un acceso dende Conricado. Así mesmo, Esquerda Unida propón valorar a posibilidade de crear un aparcadoiro a dúas alturas nese espazo e, "no caso de resultar viable, encargar xa a redacción dun proxecto técnico que permita acometer a obra nun futuro próximo".

Outra proposta é a compra dun terreo situado na parte traseira do pavillón do CEIP Conmeniño, co obxectivo de habilitalo como zona de estacionamento. "Tendo en conta que se está abrindo unha porta cara o exterior, esta actuación melloraría o estacionamento e facilitaría o acceso ás actividades deportivas non lectivas sen ter que entrar no recinto escolar", indican.

No ámbito da protección animal, Esquerda Unida pide que se habilite unha aula no edificio do Monte das Flores para a asociación O Jato Meco. O obxectivo é crear un espazo axeitado para a atención dos gatos das colonias, especialmente aqueles aos que se lles aplica o protocolo CES ou que precisan coidados veterinarios. Lembran que "este é un servizo de competencia municipal que actualmente realiza a asociación e son as propias voluntarias as que acollen aos animais nas súas casas, cos conseguintes problemas que lles supón".

A formación tamén propón unha obra de reforma no Punto de Atención á Infancia, para conectar a sala de usos múltiples, onde se traballa cos nenos de maior idade, co cuarto de baño. Actualmente, a separación entre ambas zonas obriga a atravesar un corredor, dificultando o control dos menores por parte do persoal.

En materia de xestión da auga, Esquerda Unida solicita que se avance na execución das recomendacións incluídas na auditoría hidráulica realizada o pasado ano. En concreto, propoñen instalar os caudalímetros que non requiran permisos doutras administracións, iniciando así un proceso que no seu conxunto está valorado en 63.000 euros.

A reposición dos valados e da sinalización no Monte Central Xaquín Álvarez Corbacho, así como a instalación de bancos e mesas na parcela municipal ao carón do Redondo para crear unha área de descanso, son tamén propostas incluídas no documento.

En base a dúas mocións de Esquerda Unida aprobadas por unanimidade no 2024, a formación reclama a creación de zonas de espallamento canino en Confín, Porto Meloxo e San Vicente, e a instalación de zonas de sombra nos parques infantís. Neste último caso, propoñen comezar pola creación de sombra nas áreas de bancos mediante estruturas de madeira con enredadeiras.

Tamén se solicita ampliar o valado entre o campo de fútbol 5 e o parque infantil da zona recreativa de Terra de Porto, para evitar que os balóns impacten nos menores que xogan no parque.

Finalmente, Esquerda Unida propón a compra dun novo guindastre municipal, despois de que hai uns anos se dese de baixa o único vehículo dispoñible, co obxectivo de recuperar un servizo público esencial.

Desde a formación expresan o seu desexo de que todas estas propostas sexan recollidas no documento definitivo que se leve a pleno. “Son actuacións realistas, necesarias e viables. Esperamos que o goberno as teña en conta e comece a traballar nelas”, afirman.

Así mesmo, consideran positivas moitas das propostas formuladas polo propio goberno, “xa que responden a demandas que Esquerda Unida leva anos formulando tanto no pleno como na prensa”.

Esquerda Unida critica a inacción do goberno ao non poñer en funcionamento a app “Meu Concello”

A ferramenta tecnolóxica permitiría unha mellor xestión de incidencias e unha comunicación máis eficaz coa cidadanía, pero segue sen estar operativa dende que a Deputación a lanzou hai case un ano.

Outros concellos da provincia xa a empregan con éxito, mentres que no Grove segue sen ofrecerse este servizo gratuíto proporcionado pola Deputación de Pontevedra. Esquerda Unida pide que se active xa.

O Grove, 14 de maio de 2025.- Esquerda Unida vén de denunciar a falta de vontade do goberno municipal para poñer en marcha a aplicación "Meu Concello", unha ferramenta dixital proporcionada pola Deputación de Pontevedra para xestionar incidencias, alertas e comunicacións coa veciñanza a través do móbil.

Segundo sinala o seu concelleiro, Anxo Meis, o Concello do Grove conta con esta ferramenta dende xuño de 2024, pero segue sen estar operativa. “En setembro dese mesmo ano, preguntamos en pleno cando se ía activar, e a resposta foi que estaban estudando como xestionala por falta de persoal. En marzo deste ano, ao volver preguntar, indicóusenos que procurarían poñela en funcionamento. Con todo, a día de hoxe nada mudou”, afirma Meis.

Para Esquerda Unida, esta ferramenta é "importante e imprescindible" para modernizar a administración local e mellorar a resposta ás necesidades cidadás. Tal e como indica Meis, “a app permite que a veciñanza poida comunicar incidencias como losetas levantadas, papeleiras cheas, farois sen luz, problemas de limpeza, bancos rotos,... e ofrece ademais un seguimento da resolución da incidencia, o que axiliza a resposta municipal e mellora a percepción do servizo”.

A aplicación conta ademais cun apartado para noticias, bandos e avisos, tales como de cortes de auga ou de tráfico, e mesmo un mapa con puntos de interese local, o que para Meis supón “a posibilidade de ter unha comunicación directa e inmediata con todas as persoas usuarias, e especialmente útil en situacións de urxencia ou de información sobre servizos municipais”.

Concellos como Sanxenxo, Cambados, Soutomaior, Bueu, Tomiño, Vilaboa, Mos ou Covelo xa activaron esta ferramenta e resolven mediante a mesma numerosas incidencias cada semana. Mentres tanto, no Grove continúa sen ofrecerse este servizo, a pesar da súa utilidade e de ser totalmente gratuíto para o Concello. “Quizais o problema sexa que, tal como está a vila, poñer a funcionar a app suporía unha saturación de incidencias e obrigaría ao goberno local a asumir a realidade na que se atopa o municipio", afirma Meis.

Esquerda Unida insta ao goberno municipal a activar de inmediato esta ferramenta dixital, aproveitar o seu potencial e atender todas as comunicacións cidadás que se reciban por esta vía, sen deixar de empregar as canles tradicionais de contacto co Concello.

Esquerda Unida carga contra a falta de xestión do goberno municipal trala liquidación do orzamento 2024

Denuncian que o Concello pecha o 2024 cun superávit de 2,5 millóns de euros e, por segundo ano consecutivo, cun remanente de tesourería que supera os 6 millóns, cando ten os orzamentos prorrogados dende 2022.

Esquerda Unida presentará unha proposta para investir a maior parte do remanente en medidas que beneficien á veciñanza. Pídenlle ao Alcalde que faga presión no seu partido para que a Ministra de Facenda permita o uso do remanente ou, pola contra, prepare un Plan Económico Financeiro.

O Grove, 8 de maio de 2025.-Esquerda Unida denuncia que, por segundo ano consecutivo, o Concello do Grove pecha o exercicio cun remanente de tesourería millonario que, nesta ocasión, a liquidación do 2024 sitúa en 6.312.143,80 €. Ademais, as contas arroxan un superávit de 2.485.900,20 €, mentres mantén os orzamentos prorrogados dende 2022.

O seu voceiro, José Antonio Otero, acusa ao Alcalde de escudarse ano tras ano na imposibilidade de sacar adiante uns orzamentos ao non ser quen de cadrar os números debido ao incremento do gasto anual, facendo fincapé especialmente no incremento de servizos como a Axuda no Fogar ou o Punto de Atención á Infancia. "Unha escusa inxustificable á vista das cifras", afirma Otero, que considera que “a liquidación evidencia que non se trata dun problema de cartos, senón de falta de capacidade, de planificación e de xestión por parte do goberno municipal”.

Para Otero o exemplo está en que “o ano pasado aprobouse un paquete de 2 millóns de euros en investimentos con cargo ao remanente e só se executou a metade, deixando sen facer moitas das actuacións pactadas, incluídas varias das propostas presentadas polo noso grupo”.

Aínda así, o voceiro esquerdista anuncia que, ante un remanente tan elevado, volverán presentar unha proposta ampla de accións e investimentos concretos para executar, que serán trasladadas ao goberno nos vindeiros días. “Sabemos que este ano o Ministerio de Facenda impón máis limitacións ao uso do remanente, pero hai ferramentas para tentar sortear esa situación, polo que queremos que o goberno municipal se poña a traballar canto antes”, indica Otero.

Desde Esquerda Unida sinalan que o seu partido a nivel estatal leva tempo presionando para que o Goberno central emita un decreto que permita, como en 2024, o uso do remanente en beneficio da veciñanza. Por iso piden ao Alcalde que faga o propio e “inste ao seu partido a presionar á súa ministra de Facenda para desbloquear a situación e poña os intereses do Grove por diante dos intereses partidistas”.

Mentres tanto, dende Esquerda Unida agardan que o goberno municipal comece a traballar e estude todas a vías para poder utilizar o remanente. “Queremos que se valoren todas as nosas propostas e se non se emite o decreto, haberá que explorar outras vías, como un posible plan económico-financeiro, se é que se rompe a regra de gasto ou a estabilidade orzamentaria", afirma Otero.

Finalmente, José Antonio Otero insta ao Alcalde a “cumprir coa lei e presentar un novo orzamento”, lembrándolle que “hai marxe para cadrar os números, e xa o demostramos”. “O que non se pode permitir é que un Concello que pecha liquidacións con superávit millonario continúe funcionando con orzamentos caducados e sen executar as accións acordadas”, remata Otero.

Esquerda Unida esixe a convocatoria urxente da Xunta Local de Seguridade ante a vaga de roubos no Grove

Lamentan que o alcalde non convocara antes este órgano pese á crecente inseguridade que vive o municipio e solicita participar como membro.

O seu voceiro, José Antonio Otero, alerta de que a resposta institucional está a chegar tarde, mentres a veciñanza vive con medo e sen garantías de protección fronte aos continuos delitos.

O Grove, 22 de abril de 2025.- Esquerda Unida vén de solicitar a convocatoria urxente da Xunta Local de Seguridade para abordar a grave situación de inseguridade cidadá que está a sufrir O Grove nas últimas semanas, con roubos en establecementos, entradas en vivendas e tiróns de bolsos que están convertéronse nun feito habitual que afecta directamente ao benestar e á tranquilidade da veciñanza. Nos últimos días a situación agravouse ata niveis alarmantes, con un, dous e incluso tres roubos por noite, o que está xerando unha fonda preocupación na veciñanza.

O seu voceiro, José Antonio Otero, lamenta que o alcalde, José Cacabelos, "non tivera convocado antes este órgano de coordinación en materia de seguridade, cando os episodios delituosos levan tempo producíndose no noso municipio". Otero lembra que "ao comezo do mandato se nos solicitou desde o Concello un representante para formar parte da Xunta Local de Seguridade, mais nunca se nos convocou a ningunha xuntanza", polo que esixe que Esquerda Unida poida participar con voz e voto neste órgano como forza con representación municipal.

A formación recoñece que, segundo manifestou recentemente o alcalde, xa se solicitou reforzo de axentes da Garda Civil á Subdelegación do Goberno e que se está traballando para incorporar novos efectivos á Policía Local. Con todo, Otero subliña que "estas medidas chegan tarde, pois a vaga de roubos non é nova, e a resposta do goberno municipal foi ata agora absolutamente insuficiente".

Desde Esquerda Unida insisten en que a plantilla da Policía Local leva anos reducíndose sen que se cubriran as prazas dos axentes pasados a segunda actividade, e denuncian que segue sen haber patrullas nocturnas, precisamente cando se producen a maioría dos roubos. “O alcalde leva anos escudándose nas dificultades legais para contratar novo persoal, pero mentres tanto os efectivos minguan e a delincuencia aumenta”, denuncia o voceiro.

A situación agrávase, segundo Esquerda Unida, porque a Garda Civil tampouco pode dar resposta suficiente, ao ter que cubrir unha ampla área da comarca con recursos moi limitados. “Mentres noutros concellos limítrofes se reforzan os corpos de seguridade e se poñen en marcha medidas preventivas, no Grove reina a pasividade”, engade Otero.

Desde Esquerda Unida reiteran que a convocatoria da Xunta Local de Seguridade é indispensable para poñer enriba da mesa a situación real do municipio e adoptar medidas conxuntas e coordinadas. “Non se trata só de reforzar efectivos —que é imprescindible—, senón de mostrar empatía coas persoas afectadas e de poñer en marcha un verdadeiro plan de seguridade cidadá”, conclúe Otero.

EU esixe a recuperación do nome de José Silva Torres para a Escola de Música municipal

Dende o traslado ao Auditorio Municipal, a Escola de Música deixou de empregar o nome oficial outorgado en 2013 en homenaxe a “Pepe Silva”. Esquerda Unida reclama que se restitúa o nome e se repoña a placa conmemorativa no emprazamento actual.

O nome da Escola honra a un grovense cuxa zapataría foi berce de xeracións de músicos locais. A día de hoxe, o goberno local segue sen cumprir o compromiso de restaurar esta denominación histórica.

O Grove, 21 de abril de 2025.- Esquerda Unida vén de reclamar ao goberno municipal que restitúa o nome oficial da Escola de Música Municipal, que dende xuño de 2013 leva o nome de José Silva Torres, “Pepe Silva”, en homenaxe a quen fixo da súa zapataría na Rúa da Praza un espazo de aprendizaxe musical para moitas xeracións de grovenses.

O voceiro de Esquerda Unida, José Antonio Otero, lembrou no pleno do mes de xaneiro que dende que se realizou o traslado da Escola de Música ao Auditorio Municipal, deixouse de empregar a denominación oficial, pasando a referirse a ela simplemente como Escola de Música do Grove. A placa que daba nome á escola no antigo edificio do Monte das Flores segue no mesmo sitio e non foi trasladada ao Auditorio.

“Queremos deixar claro que o nome de José Silva Torres non se lle puxo ao edificio anterior, senón á propia escola, e por tanto debe seguir presente sexa cal sexa o seu emprazamento”, declarou Otero. No mesmo pleno, a concelleira de Educación recoñeceu esta omisión e comprometeuse a resolvela, pero tres meses despois non se ten producido ningún cambio.

Desde Esquerda Unida denuncian que a omisión de utilizar o nome de José Silva Torres cando se fala da escola de música estase producindo en todas as publicacións e actos oficiais do Concello, como se puido comprobar hai dous venres durante a audición que os alumnos da escola ofreceron no propio Auditorio, o que consideran unha falta de respecto á memoria dunha figura fundamental na historia musical do Grove. “É unha cuestión de xustiza e de coherencia co acordo aprobado no seu día. Non se pode borrar do mapa unha homenaxe tan merecida”, concluíu Otero.

A formación esixe que se repare esta situación de maneira inmediata, trasladando a placa ao actual edificio do Auditorio e restituíndo o nome oficial da Escola en todos os soportes institucionais e comunicativos.

Esquerda Unida rexeita a expropiación do solar da “Casa de Beni”

A formación critica as formas e a falta de proxecto claro do goberno municipal, e alerta de que esta operación supón prexudicar a unha familia que adquiriu legalmente a propiedade para fixar nela o seu fogar.

Piden ao goberno que, en vista de que xa se fixo efectiva a venda, desista da expropiación e suspenda o expediente.

O Grove, 16 de abril de 2025.- Esquerda Unida vén de manifestar o seu rexeitamento á expropiación impulsada polo goberno municipal sobre a coñecida como “Casa de Beni”, ata este martes propiedade de Benito Maneiro. A formación asegura que son conscientes de que o executivo local perdeu unha oportunidade de ouro para adquirir o solar por vías de negociación e considera inxusto recorrer agora á expropiación cando a vivenda xa foi adquirida por unha familia para convertela no seu fogar.

“Non compartimos as maneiras nas que se desenvolveron os feitos, pero a expropiación non é a solución neste caso”, sinalan desde Esquerda Unida. Lembran que o motivo esgrimido polo goberno municipal para iniciar este proceso de expropiación, despois de non fraguarse a compra, foi a suposta necesidade de mellorar a accesibilidade ao edificio das monxas, pero aseguran que non existe ningún proxecto concreto que avale esa finalidade.

Desde Esquerda Unida denuncian que dende a compra do edificio das monxas, este carece de planificación e o uso que se lle dá aos espazos responde máis a unha xestión improvisada que a un proxecto consolidado. “Cédense aulas a distintos colectivos, incluso compartindo os mesmos espazos para diferentes actividades sen adaptar o inmoble ás súas necesidades reais. Non se executou nin existe proxecto para unha reforma interior nin teñen certeza dos usos que se van implantar. Todo é improvisado”, afirman.

Tamén sinalan que nos últimos meses o goberno local fixo anuncios contraditorios sobre o uso deste espazo, como a implantación do servizo Vellos Tempos, o cal levan anos indicando que se ía desenvolver nese edificio, cando non será así, ou a creación dunha aula de estudo, que tampouco pode realizarse porque as aulas non están adaptadas para tal fin. “Prometen servizos sen capacidade para exercelos, xa que as aulas da primeira planta comunícanse entre si, o que impide unha verdadeira compartimentación”, explican.

En canto ao argumento da accesibilidade, Esquerda Unida pon en dúbida a súa viabilidade a curto prazo. “Mesmo recoñeceron na última xuntanza que non dispoñen de orzamento para tirar a vivenda e adaptar o solar. Iso significa que poderían pasar anos antes de que se materialice esa suposta mellora, cando a impresión que daban na prensa é que sería inmediata. Mentres tanto a familia propietaria quedaría prexudicada sen necesidade”, denuncian.

Advirten de que, mesmo chegando a executar a demolición e urbanización do terreo, os problemas de acceso ao edificio das monxas persistirían, xa que a rúa pola que se entra é de paso único, o que seguirá a dificultar a circulación e pode provocar colapsos na vía principal.

En definitiva, dende Esquerda Unida, non comparten a necesidade de abrir un proceso de expropiación nestas circunstancias e lembran “que non é a primeira vez que este goberno municipal non chega a acordos cos veciños para cesións ou compra de terreos, como foi o caso da rúa das Bouzas, dos terreos de Alexandre Bóveda ou, no último caso, co terreo de Entrehortas, e nestes casos non se procedeu a abrir ningún expediente de expropiación”, sinalan.

“Non estamos diante dun proxecto planificado, senón dunha decisión precipitada, mal xustificada e con consecuencias directas sobre unha familia do Grove. Por iso, desde Esquerda Unida rexeitamos esta expropiación e esiximos que se suspenda o expediente”, conclúen.

EU insta ao goberno municipal a solicitar as axudas para modernizar e dinamizar o mercado municipal

A convocatoria da Consellería de Emprego, Comercio e Emigración permite aos concellos acceder a ata 320.000 € para obras de mellora, rehabilitación ou accións de dinamización e pode cubrir ata o 80% do investimento.

Anxo Meis reclama ao executivo local que solicite estas achegas para modernizar e dinamizar a praza de abastos, evitando así perder unha oportunidade clave para o comercio local.

O Grove, 19 de marzo de 2025 – O grupo municipal de Esquerda Unida pide ao goberno local, e en concreto ao concelleiro de Mercados, que non deixe pasar a oportunidade de acollerse ás axudas que ofrece a Xunta de Galicia para a dinamización e rehabilitación das prazas e mercados municipais. Estas achegas, dotadas cun orzamento de 3,3 millóns de euros, buscan fortalecer a rede de Mercados Excelentes e mellorar as infraestruturas comerciais da comunidade.

O concelleiro de Esquerda Unida, Anxo Meis, indicou que “o mercado municipal é un espazo clave para a economía local e o comercio de proximidade, polo que resulta fundamental aproveitar este tipo de investimentos para modernizalo, facelo máis atractivo e mellorar os servizos tanto para vendedores como para clientes”.

A nova convocatoria da Consellería de Emprego, Comercio e Emigración permite aos concellos acceder a ata 320.000 euros para obras de mellora, rehabilitación ou accións de dinamización. Segundo indica Meis, “a liña de subvencións pode cubrir ata o 80% do investimento, polo que o Concello debe presentar un proxecto ambicioso para modernizar un espazo esencial para o comercio local”. Así mesmo, a liña de axudas inclúe un período de execución bianual, o que, para Esquerda Unida, supón “unha oportunidade única para planificar actuacións de maior calado sen presións de prazos excesivamente curtos”.

Desde Esquerda Unida consideran que a solicitude destas axudas sería un paso decisivo para revitalizar o mercado municipal, fomentando a súa competitividade e fortalecendo a súa función como motor económico e social da vila. “Non podemos quedar atrás mentres outras localidades avanzan na modernización dos seus mercados. O goberno municipal debe actuar con dilixencia e presentar un proxecto sólido antes do prazo límite do 14 de abril”, subliñou Meis que insiste en que “hai financiamento dispoñible, polo que só falta vontade política para non perder esta oportunidade”.

O grupo municipal presentará un escrito solicitando información ao goberno local sobre as súas intencións respecto a esta convocatoria. “Se a resposta é que non teñen previsto solicitar estas axudas, estaremos ante outro exemplo de desinterese pola dinamización económica do noso concello. O noso compromiso está claro: esixiremos que se aproveiten todos os recursos dispoñibles para mellorar o Mercado Municipal”, concluíu Meis.

Esquerda Unida denuncia que O Grove segue sen estratexia turística mentres o alcalde só fala da taxa

 

Para a concelleira Susana Millán, a presenza do Grove en FITUR 2025 volveu depender da iniciativa privada e do liderado doutros concellos ou administracións, evidenciando a falta dunha estratexia turística propia.

Critican que o goberno municipal siga sen impulsar proxectos reais mentres centra todos os seus esforzos en reclamar unha taxa turística.

O Grove, 31 de xaneiro de 2025. Un ano máis, o Grove careceu dunha presenza propia e diferenciada en FITUR, a maior feira de turismo do Estado. A participación da vila limitouse a unha iniciativa externa, a que supuxo a promoción da Festa da Centola levada a cabo pola asociación empresarial Emgrobes, e a unha compartida, como foi á presentación da media maratón "Entre Rías" que transcorre entre o Grove e o Concello de Sanxenxo.

Sobre este evento, a concelleira de Esquerda Unida, Susana Millán, denuncia que o goberno municipal non foi capaz de reclamar para O Grove o protagonismo que lle corresponde na organización desta proba deportiva. "O compromiso inicial era que cada ano a carreira alternase o inicio e final entre os dous concellos, pero nin sequera isto foi quen de defender con forza o noso alcalde”, lamenta Millán, que á vez afirma que “acoller a chegada suporía un impulso importante para a hostalería local, pero teremos que conformarnos con ser saída por segundo ano consecutivo, o que demostra o pouco peso político de Cacabelos ante o seu homólogo e Sanxenxo”.

Desde Esquerda Unida tamén critican que a única prioridade do Alcalde, que á vez é o concelleiro de Turismo, sexa a implantación dunha taxa turística. "En agosto do pasado ano, Cacabelos declaraba que o turismo supón un gasto de máis de medio millón de euros para o Concello. O que nos preguntamos é de onde vén este afán recadatorio, sobre todo cando ten dende 2023 dous millóns de euros da Unión Europea para a Gastromeca e aínda non foi capaz de executar máis que o 32%. Nin tan sequera sacou a concurso a contratación da consultora necesaria para desenvolver todo o proxecto", denuncia Millán.

A edil de EU tamén lembra que o goberno municipal segue sen aprobar normativas esenciais para a xestión turística da vila, como a ordenanza de caravanas ou a de terrazas, ou crear unha mesa de traballo para procurar unha solución á proliferación das vivendas turísticas, tal e como acordaron ao inicio do mandato. Ademais, están pendentes compromisos como as bases para as Centolas de Ouro, a actualización do material promocional ou a recuperación dunha páxina web turística propia.

Por último, Esquerda Unida considera que os fondos europeos Next Generation deberían destinarse a crear un produto turístico sólido, que beneficie ao empresariado local e que poida ser levado a FITUR como unha aposta propia do Concello. "Hai oito anos coincidiamos en que o modelo de promoción en FITUR non era o axeitado, pero Cacabelos prometera buscar unha nova fórmula adaptada ás demandas actuais do sector. O problema é que, desde entón, nada se fixo", conclúe Millán.

EU denuncia que a incapacidade do goberno municipal provoca a perda de 1 millón de euros en investimentos

O grupo municipal acusa ao executivo local de irresponsabilidade ao non lograr executar actuacións importantes que estaban financiadas co remanente de tesourería e que supoñen a perda dun millón de euros.

Os concelleiros de EU critican duramente a xestión do goberno, que supón non só a perda de máis do 41% do remanente, senón tamén o incumprimento na execución das propostas acordadas co seu grupo.

O Grove, 30 de decembro de 2024. Esquerda Unida lamenta que o ano 2024 remate cun millón de euros en investimentos non executados procedentes do remanente de tesourería, debido, segundo denuncian, "á nula capacidade de xestión do goberno municipal do PSOE”.

Segundo explicou o seu voceiro, José Antonio Otero, “en xullo aprobáronse 2,4 millóns de euros do remanente de tesourería, para máis de 50 actuacións, entre as que se incluían propostas realizadas polo noso grupo municipal e pactadas co goberno local. Chegados a finais de ano, non só non se executaron moitas destas actuacións, senón que tras unha xuntanza co alcalde, confirmamos que ata un millón de euros se perderán definitivamente por non terse completado os proxectos a tempo”.

Entre as propostas impulsadas por Esquerda Unida e que non se levaron a cabo neste 2024 destacan actuacións como a mellora da rúa Rioxa no Sineiro, cun investimento previsto de 100.000 euros; a compra dun terreo en Entrehortas por valor de 220.000 euros, destinada a ampliar o aparcadoiro; ou o proxecto para o aparcadoiro da praia das Pipas, cun orzamento de 6.000 euros. Tamén salientan que, no caso da rúa Hortos, perderanse 30.000 euros dun total de 100.000, xa que aínda que se realizaron os acopios de materiais, as obras non comezarán ata o 2025.

“A irresponsabilidade deste goberno é flagrante”, destacou a concelleira Susana Millán. “Estas actuacións estaban financiadas con remanente de tesourería, polo que os cartos que non se executen este ano non quedarán prorrogados nin se sumarán ao remanente de 2025. Estamos ante unha perda real e directa para O Grove, e a veciñanza será a principal prexudicada”.

Segundo Esquerda Unida, ademais das súas propostas, hai actuacións que quedarán sen executar e perderán o seu financiamento, como  a obra de Bizocas (200.000 €), a instalación de novas comportas no pozo de tratamento de augas do Corgo (100.700 €), a compra dun terreo ao lado das monxas (70.000 €) e outro nas Touzas (15.000 €), a instalación dun telón no Auditorio (20.000 €) e dun marcador no pavillón vello (15.200 €) ou as obras de mellora na Casa da 3ª Idade (18.000 €). Tamén outras actuacións quedarán incompletas e perderán parte do financiamento, como o plan de asfaltados (160.000 €) ou a humanización de Entrehortas (58.000 €).

Otero engadiu que esta situación tamén representa un "incumprimento flagrante" do acordo alcanzado co goberno municipal. “Votamos a favor da proposta xeral de investimentos porque incluía actuacións promovidas por Esquerda Unida. Agora vemos que ese compromiso foi papel mollado. É un engano a nós como grupo municipal e á propia veciñanza”.

Por este motivo, Esquerda Unida anunciou que convocará unha asemblea local en xaneiro para analizar a situación e definir as decisións políticas a tomar. Segundo indicou Anxo Meis, “esta grave falta de xestión reforza a nosa proposta de reducir drasticamente as asignacións económicas dos concelleiros liberados no goberno municipal, algo que xa levamos ás negociacións dos orzamentos neste 2024 e que supuxo a rotura das mesmas”

"Quen non é capaz de xestionar, tampouco debería cobrar retribucións tan elevadas. Non podemos permitir que esta falta de compromiso e de responsabilidade siga custándolle cartos á veciñanza” concluíu Otero.

EU denuncia a inacción do goberno local na mellora dos campos de fútbol do Monte da Vila e As Lampáns

  

A formación critica que, máis de cinco meses despois de aprobarse os fondos para unha nova iluminación e un marcador para cada un dos campos, as instalacións continúan en estado precario, prexudicando aos equipos locais.

O derbi desta fin de semana entre Anduriña SD e CD Grove deixou en evidencia as pésimas condicións de visibilidade, provocando malestar entre os clubs e os numerosos seareiros que acudiron ao Monte da Vila. Pero esta situación tamén se da no campo de San Vicente.

O Grove, 3 de decembro de 2024. Esquerda Unida do Grove presentou unha pregunta por rexistro este luns para esixir explicacións ao goberno local polos retrasos na instalación da nova iluminación LED e marcador no campo de fútbol municipal do Monte da Vila e no de As Lampáns, en San Vicente. Segundo indican, o pleno do 3 de xuño aprobou unha partida de 36.000 € para o primeiro e 44.000 € para o segundo, con cargo ao remanente de tesourería, para acometer estas melloras. Porén, cinco meses despois, as actuacións seguen sen executarse.

Esquerda Unida considera que esta situación é "inaceptable" e constitúe un grave prexuízo para os clubs locais, que teñen serias dificultades para adestrar e disputar encontros oficiais nas actuais condicións. "Neste momentos no que as horas de luz natural son limitadas, os novos proxectores LED non só son unha necesidade para garantir o desenvolvemento dos adestramentos e competicións oficiais, senón que a súa falta podería carrexar sancións federativas aos clubs", advirte dende a formación.

O malestar dos clubs, que xa teñen denunciado esta situación, e dos seareiros, púxose de manifesto durante o derbi local disputado este domingo. O partido evidenciou as limitacións da actual luminaria, con zonas do terreo de xogo que dificultaban a visibilidade para xogadores e afeccionados. Esta situación provocou críticas e queixas entre o numeroso público que acudiu ao Monte da Vila.

Para Esquerda Unida, esta demora reflicte "unha preocupante falta de planificación e compromiso co deporte local por parte do goberno municipal". A agrupación esixe unha resposta inmediata e medidas urxentes para que estas melloras se materialicen canto antes. "Non é aceptable que, con partidas aprobadas desde hai case medio ano, os clubs continúen a padecer unhas condicións impropias dunhas instalacións municipais", sentenciaron.

EU demanda explicacións pola paralización das obras de retranqueo do muro en Entrehortas

 

O grupo municipal de Esquerda Unida pregunta polos motivos que levaron á paralización das obras no retranqueo do muro da saída do aparcadoiro de Entrehortas, que comezaron hai dous meses e levan, alomenos, quince días detidas.

Ademais de esixir transparencia sobre a situación, solicitan medidas inmediatas para minimizar as molestias que están a sufrir os usuarios e a veciñanza.

O Grove, 25 de novembro de 2024. O grupo municipal de Esquerda Unida quere coñecer os motivos reais polos que as obras de retranqueo do muro da saída do aparcadoiro de Entrehortas están paralizadas dende hai quince días. Segundo indican, os traballos comezaron hai dous meses e, dende entón, os usuarios víronse obrigados a utilizar un único acceso de entrada e saída, regulado mediante semáforos, unha solución que consideran comprensible durante o transcurso das obras, pero que carece de sentido agora que estas están detidas.

Desde a formación especulan coa posibilidade de que a paralización poida deberse á falta de permisos de Patrimonio, algo que consideran "incomprensible", dado que o inicio das obras debera estar condicionado á existencia de toda a documentación necesaria. Se isto non fose así, Esquerda Unida considera que estaríamos ante un exemplo de "falta de responsabilidade" por parte do goberno municipal encabezado polo PSOE.

Por este motivo, o grupo presentou unha pregunta por rexistro solicitando aclaracións sobre a situación real das obras e sobre o tempo que se prevé para retomalas. Así mesmo, instan ao goberno local a que, mentres a paralización continúe, se proceda á retirada dos valados e se permita o uso normalizado do acceso ao aparcadoiro para evitar os prexuízos que está a sufrir a veciñanza.

"Non é razoable que os usuarios teñan que esperar ata quince minutos para acceder ou saír do aparcadoiro cando as obras están completamente detidas", sinalaron desde Esquerda Unida, reiterando a urxencia de tomar medidas que garantan a comodidade e seguridade dos veciños e veciñas afectadas.

QUE A VERGOÑA MUDE DE BANDO!

 

MANIFESTO 25N 2024 DA REDE FEMINISTA DE IZQUIERDA UNIDA

Este 25 de novembro voltamos ás rúas contra todas as violencias machistas e a berrar alto e claro “que a vergoña mude de bando!”

40 mulleres foron asasinadas no Estado español no que levamos de ano (non esquecemos as 5 asasinadas dende o 25n do 2023 ao 31 de decembro de 2023, que pasan desapercibidas nas estatísticas) e 1283 dende 2003, data na que comezan a contabilizarse os asasinatos de mulleres. O número de menores orfos por violencia de xénero son 29 no que levamos de ano e 443 dende 2013; dende ese ano a 2024, 63 foron as menores asasinas polos seus pais en casos de violencia vicaria.

A violencia machista é unha violencia estrutural que afonda as súas raíces en relacións patriarcais arraigadas en profundas desigualdades. Unha violencia que dáse en todos os países e que se dirixe a todas as mulleres. A violencia contra as mulleres ten múltiples formas; a violencia sexual é unha das formas máis significativas da violencia contra as mulleres e moitos dos perpetradores gozan de total impunidade. No mundo, 150 millóns de nenas menores de 18 anos sufriron agresións sexuais, e na Unión Europea unha de cada tres mulleres sufriron agresións ou abusos sexuais dende os 15 anos.

Millóns de mulleres son sometidas a mutilacións xenitais, obrigadas a casarse, asasinadas, violadas e prostituídas, queimadas vivas ou torturadas polo feito de ser mulleres; usadas como vasijas para enxendrar seres humanos previamente comprados. Sociedades machistas que penalizan tamén ás mulleres LGTBIQA+ polas súas disidencias da norma heterosexual patriarcal.

Esta violencia agravase en países en conflito bélico, o corpo das mulleres convertese en lugar estratéxico para os fins da guerra.

Non podemos pasar por alto a violencia perpetrada baixo a ocupación e o colonialismo. Denunciamos ao ilexítimo Estado de Israel que está a perpetrar un xenocidio en Gaza, onde mulleres e menores son asasinados diariamente ante o silencio internacional.

Avanzamos coa Lei Si es Si, coa Lei Trans, coa Lei de Memoria Democrática. Unidas paramos os desafiuzamentos das nosas veciñas, saimos a defender a paz e contra a guerra, saimos ás rúas cas mulleres palestinas, saharauís, iraníes; saímos a defender os dereitos das mulleres migrantes para acabar ca violencia exercida sobre elas.

Dende Izquierda Unida cremos que o apoio e atención ás vítimas é fundamental, por isto reclamamos que se aproveiten os fondos do Pacto de Estado para implementar unha rede de atención de proximidade potente que permita recibir os apoios que precisan.

Somos abolicionistas da prostitución e por iso consideramos necesario que no noso país se traballe nese horizonte, ampliando os fondos destinados ás mulleres que desexen saír desa situación de prostitución e fondos adicionais para a educación da sociedade. Porque é necesario que se poñan en marcha en todas as provincias os centros 24 horas.

Saímos á rúa este 25N para lembrar aos distintos gobernos, central, autonómico e local, a urxente necesidade de por en marcha unha axenda feminista, porque o capitalismo depredador e especulativo impide o acceso á vivenda, onde o 60% dos fogares de aluguer encabezados por mulleres situase por debaixo do umbral da pobreza.

Seguimos a loitar contra un sistema que perpetúa as desigualdades de clase e fomenta a violencia estrutural contra as mulleres; mulleres traballadoras, precarizadas e empobrecidas, que subsisten en condicións de explotación. Seguimos loitando para que o feminismo sexa unha ferramenta de transformación económica.

Seguimos demandando un sistema público – comunitario de coidados que asuma o traballo non pagado que fan as mulleres na familia, e que son un síntoma dos privilexios dos que sérvese o patriarcado para manterse.

Un ano máis sairemos á rúa para denunciar un sistema capitalista e patriarcal que non coida a vida nin o planeta. É necesario incorporar mulleres tanto ao cambio de modelo produtivo como ao enerxético, así como diminuír a pobreza enerxética que incide nas mulleres.

Este 25N saímos ás rúas a denunciar a violencia sexual que se exerce sobre as mulleres e as nenas, violencia aceptada e normalizada pola sociedade. Os relatos masivos que as mulleres fixeron das súas experiencias dan idea da envergadura e da normalización da violencia, do silencio e das complicidades. Saímos á rúa a reclamar que se poña o foco nos agresores e non nas vítimas.

En Izquierda Unida somos conscientes de que o machismo é transversal e atravésanos tamén ás organizacións da esquerda transformadora, que tamén temos formado parte dese silencio colectivo e colaborador cos agresores. Que a violencia política é unha manifestación do poder, baseada en relacións asimétricas que danse dentro das organizacións, sabemos que a impunidade non se derruba cun escándalo pasaxeiro, que é unha estratexia de fondo.

Como feministas sabemos moi ben que construír organizacións e referencias políticas libres de machismo e patriarcado é a base para mudar o noso mundo.

Estamos convencidas de que a vergoña mudará de bando gracias á loita feminista, por isto:

Este 25N fronte as violencias machistas berramos con rabia feminista:

Que a vergoña mude de bando!