Esquerda Unida pide que se exonere a taxa do mercado e se aprace a do IVTM e Vaos

Os esquerdistas presentaron alegación aos anuncios de cobro da taxa das bancadas e mercado para o segundo trimestre e á do imposto de vehículos de tracción mecánica, entrada de vehículos e reserva de espazo.

Consideran que nesta situación é preciso exonerar ás propietarias e propietarios dos postos do mercado e retrasar o pago do IVTM e vaos, cuestións que xa solicitaron o pasado 25 de marzo.

Anuncian que apoian as medidas tomadas ata o momento polo goberno municipal, que están a súa disposición e que seguirán realizando propostas económicas e sociais para superar esta situación.

O Grove, 20 de abril de 2020.  O Grupo Municipal de Esquerda Unida O Grove ven de presentar alegacións aos dous anuncios municipais de cobranza da taxas publicadas a principio de mes no Boletín Oficial da Provincia. Unha corresponde ao cobramento da taxa de bancadas e mercado no seu segundo trimestre e a outra relativa á taxa do imposto de vehículos de tracción mecánica, entrada de vehículos e reserva de espazo.

En relación á primeira das alegacións, o voceiro de Esquerda Unida, José Antonio Otero, explica que consideran necesario que o concello suspenda o cobramento da taxa de bancadas e posto do mercado municipal e exonere ás propietarias e propietarios dos mesmos do pagamento do segundo trimestre. Entenden os esquerdistas que este é un trimestre no que as vendas baixaron considerablemente no mercado municipal debido á Alerta Sanitaria e algúns postos están pechados dende o decreto emitido polo Estado. Así mesmo, Otero  indica que a pesar de que se contempla o fin da Alerta Sanitaria para o vindeiro 9 de maio, o mercado tardará en recuperar a súa actividade normal moitos meses polo que esta sería unha pequena medida de axuda que está ao alcance do concello.

Por outro lado, dende Esquerda Unida tamén solicitan o aprazamento do pagamento da taxa de vehículos de tracción mecánica, vaos e reserva de espazo, pois o concello continuou co calendario fiscal municipal sen atender á situación que se está a vivir debido á Alerta Sanitaria. O voceiro esquerdista considera que non é de recibo cobrar esta taxa o día 4 de maio, como está indicado no anuncio, cando numerosas veciñas e veciños se encontran inmersas nun ERTE e non contarán cos ingresos correspondentes á metade de marzo e todo abril, como mínimo ata o 10 de maio. Así mesmo indican que son numerosos os negocios e autónomos que pararon a súa actividade dende o 14 de marzo e non contan con ingresos dende ese momento, polo que para os esquerdistas sería consecuente que o concello, cando menos, retrasara o pago desta taxa, como mínimo ata o 1 de xuño.

Por último José Antonio Otero recorda que o pasado 25 de marzo enviaron un escrito por rexistro no que solicitaban unha serie de medidas económicas nas que se atopaba o aprazamento destas taxas e exoneración das mesmas en algúns dos casos, e que non só non obtiveron resposta a esta solicitude, senón que vén como se segue aplicando o calendario fiscal do mesmo modo que sempre.

Otero finaliza indicando que Esquerda Unida apoia e apoiará todas as medidas que se estiveron e se están tomando en relación ao estado de Alerta Sanitaria dende o Concello, tanto na limpeza e desinfección de rúas, o traballo desenvolto pola policía local e emerxencias, as axudas prestadas ás persoas vulnerables dende o departamento de servizos sociais, axudas a familias para realizar as tarefas educativas... recordan que están a disposición deste goberno para o que se precise, pero tamén alerta que seguirán facendo e defendendo propostas económicas, sociais e laborais para axudar a paliar esta situación no noso concello tanto a curto como a longo prazo.

Alegación-Solicitude Mercado
Alegación-Solicitude IVTM-Vaos

Gabinete de Prensa

Esquerda Unida O Grove

Propostas locais do Grupo Municipal de EU en relación coa Alerta Sanitaria

O Grupo municipal de Esquerda Unida formado por, José Antonio Otero González e Ana Cristina Domínguez Domínguez, formularon este mércores por rexistro, unha serie de propostas ao goberno municipal relacionadas coa situación local derivada da Alerta Sanitaria decretada polo Presidente do Goberno debido á pandemia do Coronavirus Covid-19. 

Así mesmo, pediron que se tomen en consideración as propostas e convoquen os órganos correspondentes o máis axiña posible para a aplicación das mesmas

PROPOSTAS:

MEDIDAS DE PROTECCIÓN E ESTÍMULO ECONÓMICO

-          Que se realicen os trámites precisos para a aplicar aprazamentos, prorrateos, bonificación ou exencións no imposto do IBI e outras taxas municipais ás persoas desempregadas e en situación de emerxencia para o exercicio 2020.

-          Bonificación no imposto do IBI do exercicio 2020 para os propietarios que decidiron suspender o aluguer ás empresas/autónomos durante o peche decretado pola Alerta Sanitaria. Bonificación entre o 20% e o 50% (dependendo do tempo que dure a alerta) ou o proporcional aos meses que este deixou de cobrar polo aluguer.

-          Bonificación na taxa de lixo do exercicio 2020 a todos os negocios que tiveron que pechar as portas polo decreto de Alerta Sanitaria. Bonificación entre o 20% e o 50% (dependendo do tempo que dure a alerta) ou o proporcional aos meses que tiveron que permanecer pechados.

-          Bonificación do 100% da taxa de licenza de apertura/actividade aos negocios que abriron este ano 2020. Devolución dos pagos xa realizados. No mellor dos casos os negocios que se deron de alta no presente ano non chegaron a estar abertos máis de 2 meses e medio antes do decreto de Alerta Sanitaria.

-          Suspensión do cobramento de todas as taxas municipais estipuladas para o período no que está decretada a Alerta Sanitaria e prorrateo das mesmas ao remate do citado período para facilitar o pago das mesmas.

-          Bonificación do 100% da taxa do mercado municipal polas semanas que non estivo activo debido á Alerta Sanitaria decretada.

-          Bonificación do 100% da taxa da praza de abastos, correspondente ao tempo de Alerta Sanitaria, para os postos que permaneceron pechados e bonificación do 50% aos que continuaron abertos.

-          Solicitar a Portos de Galicia a suspensión do pago da taxa pola utilización do solo portuario correspondente ao período de Alerta Sanitaria.

MEDIDAS SERVIZOS SOCIAIS

-          Servizo de comida para menores en situación de emerxencia social. Procurar a través da Xunta de Galicia ou directamente coa empresa local que realiza o cátering do comedor de Rosalía de Castro, para realizar o servizo a domicilio para os/as cativos/as en situación de risco e que viron suspendido o servizo co peche dos centros escolares.

MEDIDAS EMPREGO MUNICIPAL

-          Que non se despida ningún empregado/a municipal durante a Alerta Sanitaria.

-          Que no se realice ningún ERTE entre a plantilla municipal durante a Alerta Sanitaria, nin permitir ERTEs nos servizos externalizados (Atención no Fogar, Limpeza de Edificios Públicos,...)

-          Co propósito de contar co maior número de efectivos namentres dure a Alerta Sanitaria e acadar unha maior cobertura e vixilancia para evitar que a veciñanza se salte o confinamento e/ou estar dispoñibles para calquera tarefa precisa nestes días:

o   Se proceda de maneira urxente á solicitude dun maior número de axentes da Policía Local para o noso concello.

o   Se proceda de maneira urxente á contratación e incorporación inmediata dos/as auxiliares de Policía Local que habitualmente se realiza chegado o verán.

O Grove, a 25 de marzo de 2020.

EU denuncia que as auxiliares do Servizo de Atención no Fogar prestan o servizo coa mínima protección ante o COVID-19

Os concelleiros de EU consideran unha irresponsabilidade non equipar ao persoal do servizo, xa que traballan coa veciñanza máis vulnerable.

Esixen ao goberno municipal e a Atendo a dotación de máscaras, batas e guantes ás auxiliares do SAF ou que o sexa o propio concello quen as dote desa protección.

O Grove, 19 de marzo de 2020.- A agrupación local de Esquerda Unida denuncia que dende o día antes de declararse a Alerta Sanitaria en todo o Estado, o persoal do Servizo de Atención no Fogar (SAF) do Concello do Grove xa tiñan alertado da falta de equipos de protección ante o COVID-19 e a vulnerabilidade tanto das usuarias e usuarios do servizo como do propio persoal auxiliar ante a pandemia do Coronavirus.

José Antonio Otero, voceiro da agrupación esquerdista, indica que a día de hoxe, seis días despois da declaración de Estado de Alerta, o persoal  auxiliar do SAF segue a preguntar polos equipos de protección e advirten da alta probabilidade de contaxio entre a veciñanza máis vulnerable. “Salvo algún persoal auxiliar, que persoalmente se auto equipou ante o que se viña enriba, a gran maioría non dispoñen de máscaras –nin tan sequera ás máis simples–, non contan con batas desbotables e contan con escasos guantes de protección”, sentencia Otero.

O esquerdista indica que “o cabreo é aínda maior entre o persoal do SAF cando ven que os empregados e empregadas municipais, que non teñen contacto directo con ningunha persoa (barredores/as) ou que o contacto é evitable (Policía Local, Emerxencias..) si contan con máscaras e guantes, e dende o propio Concello non se lle equipa nin se lle obriga á empresa a equipar ao persoal deste servizo”.

Para Otero é unha irresponsabilidade do goberno local “permitir que as e os auxiliares traballen sen un equipamento de protección adecuado e no seu lugar vexan como dende a propia empresa adxudicataria se limiten a enviarlles un documento de protocolo no que tenta xustificar a non necesidade de utilización das máscaras nin de batas desbotables”. No documento, a empresa “denomina o uso da máscara pola rúa como unha barbaridade e indícanlle ao seu persoal que pedir o equipamento no seu traballo é produto do medo e finaliza practicamente responsabilizando ás propias traballadoras de posibles contaxios aos usuarios ao indicar que se pode minimizar o risco coidando de non contaxiarse e facendo o traballo correctamente” conclúe Otero que considera que “o que é unha verdadeira barbaridade é tentar xustificar a falta de previsión, non querer gastar en equipamento de protección e poñer en risco ao persoal do Servizo de Atención no Fogar e ás veciñas e veciños máis vulnerables do noso concello.”

É por iso que Esquerda Unida responsabiliza á empresa do que poida suceder, pero tamén ao Alcalde, ao concelleiro de Sanidade e ao concelleiro de Igualdade e Benestar, “pois xa foron alertados ata en tres ocasión desta situación e non fixeron nada”, e pídelles que actúen canto antes e esixa á empresa que presta o servizo de atención no fogar a dotación de material de protección para o persoal, ou que o propio concello sexa quen llo facilite para que presten o servizo sen risco de contaxiarse nin contaxiar ás usuarias e usuarios.

Extracto do documento enviado ao persoal do SAF:

“El hecho de que en TV veamos millones de imágenes de gente caminando con mascarilla es una barbaridad y en vez de ayudar desinforma.

Pedir equipamiento “defensivo” en nuestro trabajo es producto del miedo, cuando somos nosotros los vectores del virus y podemos minimizar el riesgo solamente cuidando de no contagiarnos y haciendo el trabajo correctamente.”

Gabinete de Prensa

Esquerda Unida O Grove

Feminismo en Loita - Manifesto 8M

FEMINISMO EN LOITA

Cúmprense 110 anos da proposta de saír á rúa o 8 de marzo para conmemorar o día internacional da muller.

Despois de tanto tempo, o legado de feministas socialistas como Clara Zetkin lémbranos que o feminismo debe continuar en loita. Cada ano, as mulleres de todo o mundo saímos ás rúas o 8M para esixir unha alternativa a este sistema que pon en perigo as nosas vidas e o noso planeta. É moi importante que xa en 1910 as nosas compañeiras entenderon que só estando xuntas e loitando por resolver os problemas das mulleres do mundo podemos conseguir transformalo. Cada 8 de marzo seguimos fortes e xuntas enchendo as rúas, reflexo dese feminismo en loita constante que vai facéndonos avanzar como sociedade, soñando revolucións e construíndo resistencias.

Desde Chile ata a India, desde Palestina a Filipinas, as mulleres loitamos por un mundo sen violencias machistas, contra a división sexual do traballo e a mercantilización dos nosos corpos, polos dereitos reprodutivos e a liberdade das orientacións sexuais e identidades de xénero. O feminismo igual que o internacionalismo, cuxa pedra angular é a solidariedade, o respecto e a xustiza social, só pode valer se é para todas e en todas partes. Esa potencia subversiva fainos estar no punto de mira de quen se beneficia da nosa explotación, que están organizados nunha ofensiva patriarcal que tamén está a ser global.

O auxe do autoritarismo e a extrema dereita mostra o ataque dos poderes económicos aos nosos dereitos, mentres baleira de contido as democracias, que xa non se esforzan en manter un verniz de servizos públicos e sociais para convencernos do progreso.

Convértenos en obxectos cos que se comercia neste mercado global xerador de grandes beneficios baseados nunha salvaxe explotación das persoas. Desde Esquerda Unida dicimos BASTA á mercantilización dos nosos corpos e das nosas vidas.

As mulleres non imos permitir que este mundo se precarice a costa das máis vulnerables, nin que o odio, o racismo, o machismo, a xenofobia e a LGTBIfobia sexan a resposta de quen está dirixindo o planeta cara á guerra, a desigualdade e o colapso. Defendemos o acceso aos recursos necesarios para cubrir as nosas necesidades en condicións de igualdade e de sustentabilidade ambiental. Vidas dignas para todas as persoas en todas as partes do mundo!

En Esquerda Unida sabemos que non se pode transformar o mundo se non poñemos no centro das loitas a quen está no centro da explotación capitalista, patriarcal e imperialista. A centralidade do mundo só pode cambiarse desde ese “todas xuntas” e desde o entendemento de que os nosos retos como feministas son os mesmos que temos como sociedade. Por iso desde EU defendemos un feminismo antimilitarista, pola paz e a dignidade dos pobos e entendemos que debemos loitar coas compañeiras e compañeiros que loitan pola vivenda, as pensións, as políticas sociais, os servizos públicos, o dereito á terra e a auga, os dereitos de quen migran e polo traballo digno.

Este sistema económico necesita uns traballos de coidados aos que afoga, invisibiliza e fai recaer en nós. En Esquerda Unida reivindicamos a universalización dos traballos de coidados desde a corresponsabilidade cos homes e o Estado e desde a interdependencia e a ecodependencia.

Desde Esquerda Unida témolo claro, o feminismo a demais da loita das mulleres, é un prisma que amplifica as nosas loitas, interpelando directamente ás realidades materiais de quen máis sofren e creando alianzas e estratexias para cambiar as desigualdades que vivimos día a día a clase traballadora.

Este 8 de marzo volvemos saír ás rúas porque todas esas loitas son as nosas e o inimigo é o mesmo que hai 110 anos, cando en Copenhague un grupo de mulleres revolucionarias decidiron que debían saír todas xuntas a cambiar o mundo.

Porque o mundo é noso e imos mudalo.

FEMINISMO EN LOITA

Foto Denuncia EU - Lombos da Avenida Portugal

🔝Este luns Esquerda Unida O Grove preguntou no pleno polos lombos instalados dende Avenida de Portugal a Porto Meloxo.

👎Cremos que non cumpren a normativa xa que non é posible superalos a 30 km/h, a velocidade permitida nesa estrada.

🆕🤝O alcalde recoñeceu a perigosidade dos mesmos e comprometeuse a solventar esa situación.

Foto Denuncia EU - Estado da obra da rúa Alexandre Bóveda

🛑Esquerda Unida O Grove denunciou no pleno do luns a deplorable situación da rúa Alexandre Bóveda e trasladamos ao mesmo o enfando🤬 da veciñanza.🕳🕳🚗🕳🕳🚌🕳🕳

➡️ Preguntamos o motivo do enorme retraso nas obras e pedimos que cando menos se adecente o firme para permitir unha circulación segura por ese tramo

Foto Denuncia EU - Estado do camiño na Xesteiriña

⚠️A veciñanza da Rúa Xesteiriña trasládanos a súa preocupación polo estado da calzada. O tránsito de vehículos pesados🚛 e a falta de mantemento do pavimento supón un risco para as persoas🚸 e os vehículos que transitan pola zona.

Foto Denuncia EU - Barreira arquitectónica na Avda. Portugal

♿️Para que as beirarrúas sexan accesibles a tódalas persoas deben ser eliminadas as barreiras arquitectónicas.

📢A veciñanza da Avenida de Portugal leva tempo solicitando unha solución para unha das marxes da rúa, xa que a altura do bordo dificulta o paso das persoas con problemas de movilidade ou de maior idade.

🚸 Solicitan eliminar o bordo e substituílo por unha rampa, como xa se fixo na outra marxe da rúa.

Xan Xove visita O Grove e presenta unha iniciativa para que se afronte a obra de abrigo do Porto de Meloxo

O pasado xoves, o deputado do Grupo En Común da Esquerda, Xan Xove, visitou O Grove para reuniuse cos concelleiros de Esquerda Unida, José Antonio Otero e Ana Cristina Domínguez; e o presidente de Amegrove, Francisco Padín, e coñecer de primeira man a situación do porto de Porto Meloxo e así presentar na Comisión 8ª de Pesca e Marisqueo, celebrada na mañá do venres, unha iniciativa para que a Xunta de Galicia, a través de Portos, afronte dunha vez por todas a obra de ampliación do dique de abrigo.

Tanto os concelleiros de Esquerda Unida, como o presidente da cooperativa Amegrove recordaron a situación de parálise na que se atopa o proxecto, iniciado arredor do 2008, e na gran necesidade de levala a cabo para dar abrigo e seguridade ao centenar de embarcacións bateeiras existentes no concello meco, moitas delas agora desprazadas ao porto do Grove pola falta de abrigo no de Porto Meloxo. Unha obra que ao mesmo tempo permitiría a reordenación do porto pesqueiro situado no Corgo. Así mesmo, Otero e Padín fixeron fincapé en que esta obra ten que garantir que non afectará aos bancos marisqueiros da zona, tal e como ven reclamando a Confraría.

A iniciativa foi presentada o venres 17 na comisión 8ª de Pesca e Marisqueo da Xunta de Galicia por parte do grupo parlamentario Grupo Común da Esquerda obtendo o apoio unánime dos representantes do PSOE, BNG, Grupo Mixto e o mesmo PP. [ver vídeo]

Cabe recordar que dende Esquerda Unida O Grove, a través do grupo parlamentario Grupo Común de Esquerda presentou unha emenda aos orzamentos para o 2020 da Xunta de Galicia relativa a esta obra pero foi rexeitada polo goberno autonómico. [ver emendas presentadas por EU]

Máis info:

Parlamento de Galicia: Comisión 8ª de Pesca e Marisqueo

Web Grupo En Común da Esquerda: Apróbase porunanimidade a iniciativa do Grupo Común da Esquerda para desbloquear aconstrución do dique de abrigo no Porto de Meloxo

EU advirte que o PXOM non contempla a sentenza gañada a Costas no 2017

Os esquerdistas indican que a pesar de que a sentenza foi firme, as vivendas dos núcleos costeiros dentro dos cen metros seguen fóra de ordenación ou afectadas por ordes de demolición.

Solicitan ao concello que protexa á veciñanza incluíndo as vivendas, en base á sentenza, dentro das normas urbanísticas antes de que o PXOM se someta a aprobación.

O Grove, 13 de xaneiro de 2020. Dende a agrupación local de Esquerda Unida aseguran que o plan urbanístico, que Cacabelos anunciou que sometería a aprobación provisional o vindeiro mes de febreiro, deixa na mesma situación de irregularidade ás vivendas situadas nos núcleos costeiros do Grove.

Os esquerdistas recordan que O Grove conta cunha sentenza favorable dende principios do ano 2017 na que se recoñecen os núcleos costeiros e salvagardan as vivendas que na liña dos 20 e os 100 metros se atopaban fóra de ordenación ou con ordes de demolición. Así mesmo, indican que uns meses despois o propio Cacabelos anunciou na prensa que a sentenza era firme polo TSXG logo de que Costas non presentase recurso en tempo e forma e que só quedaba plasmar esa situación no documento urbanístico. Pero, dende Esquerda Unida aseguran que no documento presentado a finais do 2018 e que se atopa actualmente na web municipal non hai nada referente a esta sentenza e polo que puideron pescudar, tampouco na documentación que o Alcalde pretende expoñer nestas semanas se contempla esta situación, polo que consideran que as vivendas seguirán fóra de ordenación ou con ordes de demolición. 

É por iso que Esquerda Unida solicitou unha xuntanza con Cacabelos para tratar estes asuntos e piden que a sentenza do TSXG contra Costas se reflicta no PXOM antes de que este se someta a aprobación provisional do pleno co fin de protexer os núcleos costeiros consolidados de Rons, Agriños-Gandariña, Virxe das Mareas, Moreiras, Reboredo, A Igrexa-Praia de A Barcala, Carreiro, Espiño-Bizocas-Carreiro, Sobre do Pozo, As Laxes e Insuíña.

Gabinete de Prensa

Esquerda Unida O Grove

Foto Denuncia EU - Estado do terreo centro social Reboredo

⚠️A veciñanza de Reboredo trasládanos a súa preocupación polo estado no que se atopa o terreo municipal no que está previsto construír un centro social para os maiores.

📰O alcalde declaraba na prensa que a primeira fase do proxecto podería contemplarse nos primeiros meses de 2019. Xa comezou o 2020, sen noticias daquela primeira fase, pero cos terreos lindeiros sufrindo as consecuencias do abandono do lugar.

Foto denuncia EU - Solución ao pavimento da Rúa Gandariña

📣aA A veciñanza da Rúa Gandariña reclama unha mellora no pavimento da zona.`

🚧Este camiño conduce a varias empresas da zona e polo tanto é unha vía moi transitada que necesita unha mellora urxente.

EU tacha de incompetente ao goberno por non informar á veciñanza dos cortes de auga

Os esquerdistas consideran impropio que ante uns cortes de auga programados non se informe á veciñanza para que se poida organizar.

Advirten que esta actuación converte ao concello en responsable subsidiario ante calquera dano nos electrodomésticos ou prexuízos aos negocios.

O Grove, 12 de decembro de 2019. Esquerda Unida mostra o seu malestar coa xestión que o goberno municipal está a realizar nas obras da rúa Alexandre Bóveda e os cortes no subministro de auga potable desta semana.

Os esquerdistas entenden os inconvenientes e problemáticas que se suceden como consecuencia das obras, pero consideran que a falta de información e sobre aviso polos cortes que esta semana deixou por sorpresa en tres ocasións a numerosas vivendas sen servizo de auga durante longas horas do día "son a mostra da incompetencia do grupo de goberno". O voceiro de Esquerda Unida, José Antonio Otero, non concibe que "ante uns cortes programados, pois déronse durante tres días seguidos nas mesmas horas, non foran postos en coñecemento da veciñanza, para que esta se puidese organizar nos seus fogares e negocios".

Otero advirte que esta incompetencia pode ocasionar graves prexuízos á veciñanza e supor un desembolso económico para o concello, pois entende que o ente municipal “será responsable subsidiario ante posibles danos nos electrodomésticos, caldeiras, termos... ou ante os prexuízos ocasionados aos negocios por non por en sobre aviso destes cortes de auga”.

"Antes das eleccións o Alcalde informaba nas redes sociais practicamente ao minuto de calquera corte de auga, fose programado ou ocasionado por unha avaría, agora coa maioría absoluta amarrada non dan chío", indica Otero que ironiza coas situacións que se teñen dado no anterior mandato. "Teñen posto a megafonía a percorrer o pobo para anunciar os plenos para que acudise a veciñanza co propósito de presionar á oposición, pero para avisar a estas veciñas e veciños dos cortes de auga non o consideran preciso".

É por isto que os esquerdistas pide máis rigor e seriedade ao goberno e que, calquera situación que poida crear prexuízo á veciñanza e negocios locais, sexa advertida utilizando todos os medios posibles para evitar o maior dano posible.

Gabinete de Prensa

Esquerda Unida O Grove