EU reúnese co concelleiro de limpeza e mantemento de espazos públicos para coñecer a realidade dos servizos e trasladar as súas propostas

O Grove, 2 de agosto de 2023. O pasado mércores, os concelleiros de Esquerda Unida, José Antonio Otero, Susana Millán e Anxo Meis, reuníronse co concelleiro delegado de Limpeza, Mantemento de Espazos Públicos e Mercado, Juan Ramón Outeda, co propósito de coñecer de primeira man a situación na que se atopan os servizos tanto o de limpeza como o de mantemento dos parques e outros espazos públicos, xa que nos últimos meses están recibindo numerosas críticas veciñais. Así mesmo, os esquerdistas aproveitaron a xuntanza para trasladar unha serie de propostas de actuación nos diferentes ámbitos.

En canto ao servizo de limpeza, dende Esquerda Unida solicitaron o de limpeza que realizan os operarios municipais durante a semana, “para coñecer a cobertura que este servizo está prestando ao municipio, pois son numerosas as queixas veciñais indicando que as súas rúas non están sendo visitadas polos varredores”, indica Otero. Logo de finalizar o proceso de estabilización, no servizo de limpeza incorporáronse 10 operarios pero, tal e como lles confirmou o concelleiro delegado, tan só 6 están destinados á limpeza de rúas, unha cifra que os concelleiros de Esquerda Unida consideran insuficiente, polo que pediron que se procurase o incremento de persoal nesta área.

A falta de recibir e revisar o plan de traballo que están realizando os varredores, dende Esquerda Unida propuxeron que se procurase o desvío puntual de algún dos operarios da zona do casco urbano a outras rúas e barrios máis esquecidos. Ademais, tras confirmar a incorporación de persoal para desbrozar, insistiron na limpeza inmediata dos beirais de diferentes rúas e que se continuase co traballo iniciado nos barrios co propósito de eliminar canto antes a maleza existente. Otero, Millán e Meis lembran que estas cuestións estaban incluídas no acordo do pleno de órganos e que “tendo en conta que xa deberían ter feito este traballo hai varios meses, ollamos como dende a sinatura do acordo foron realizando esa limpeza de maleza, tanto nas rúas como nos barrios. Aínda así, insistimos en que aínda quedan moitas zonas nas que é preciso actuar de inmediato”.

Por outro lado, dende o grupo municipal, tamén en base ao acordo alcanzado, quixeron coñecer a situación na que se atopa o mantemento dos parques infantís e insistiron na urxencia á hora de dar solución ao arranxo dos diferentes elementos que se atopan deteriorados, “pois estamos nunha época na que a demanda é moito maior debido ao bo tempo e ao período vacacional”, recalca o voceiro esquerdista, que tamén reiterou a necesidade de executar canto antes a mellora do firme exterior do parque de Terra de Porto, “xa que temos constancia de varias persoas, pequenas e maiores, que debido ao estado do firme sufriron caídas de diferente gravidade, polo que é preciso tomar cartas no asunto o máis axiña posible”.

Otero, Millán e Meis tamén solicitaron a limpeza habitual nos arredores dos colectores de lixo, “sobre todo os que se atopan nas zonas próximas a locais de hostalería, xa que adoitan estar graxentos e provocar malos cheiros, máxime nesta época estival”. Outra das demandas foi relativa á posibilidade de reformar a vella depuradora do Corgo, que é utilizada polos servicios de xardinería e limpeza, co propósito de mellorar o espazo de almacenaxe e traballo para os operarios municipais. Por último, dende Esquerda Unida pediron que se procurase a vixilancia da parte traseira da Lonxa nas xornadas de mercadillo, “pois debido ao mal estacionamento de moitos usuarios, a estrada, que se convirte na única opción de circulación, queda reducido a un só carril, provocando enormes atascos e inconvenientes para os vehículos que se ven obrigados a transitar por esa zona”.

O concelleiros do grupo municipal de Esquerda Unida, José Antonio Otero, Susana Millán e Anxo Meis, valoraron positivamente a xuntanza co concelleiro de Limpeza, Mercado e Mantemento de Espazos Públicos, “pois púxonos ao día sobre a situación das súas áreas, resolveunos as dúbidas e acolleu con gratitude as propostas que lle trasladamos”. Así, indicaron que este é o inicio dunha serie de xuntanzas cos diferentes concelleiros e concelleiras do grupo de goberno, “pois cremos que é o mellor modo de coñecer a situación das súas áreas, se é o caso, mostrar o noso desacordo co traballo que se realiza e, sobre todo, trasladar directamente as propostas do noso programa co propósito de mellorar os servizos”.

EU supedita o seu apoio ás liberacións a unha rebaixa salarial e uns compromisos a curto prazo

O Grove, 1 de xullo de 2023.- O grupo municipal de Esquerda Unida vén de presentar unha serie de propostas ao alcalde de cara ao pleno de organización do concello, no que se votarán cuestións como a periodicidade dos plenos, comisións, representación na Mancomunidade do Salnés ou as retribucións dos concelleiros e concelleiras así como dos grupos municipais.

Desde Esquerda Unida apuntan que, para as negociacións, recibiron por parte do grupo socialista unha proposta do reparto das áreas de goberno, que xa foron aprobadas por decreto de Alcaldía, xunto coas liberacións previstas, así como unha proposta de dietas e retribución aos grupos municipais. Sen embargo, os esquerdistas entenden que esta proposta debería vir acompañada dun proxecto programático das áreas co traballo a desenvolver nestes catro anos para poder ser valorada con rigor. Máis aínda, segundo apuntan, “tendo en conta que o PSOE non presentou programa electoral nestas últimas eleccións municipais e que o cumprimento do presentado hai catro 4 anos non é superior ao 20%”.

Lonxe de rexeitar automaticamente a proposta do goberno, o grupo municipal de Esquerda Unida trasladaron ao PSOE unha serie de actuacións prioritarias a realizar ou iniciar antes de rematar este 2023: Cubrir varias prazas do cadro de persoal municipal, desatascar o expediente de desafectación dos terreos de Rons para a ampliación da Escola Infantil, o arranxo dos parques infantís e a limpeza dos diferentes barrios, colaborar coa ANPA do CEIP Rosalía de Castro para lograr as obras solicitadas á Xunta, un proxecto para a reforma do pavillón de Conmeniño e iniciar os trámites para a reforma e ampliación da Casa de Cultura Ángel Vázquez Hereder, un Plan de Envellecemento Activo e a mellora do servizo de Vellos Tempos, o control das licenzas de pisos turísticos e a mellora da democracia participativa coa creación dunha comisión para o seguimento da execución do Plan de Sustentabilidade Turístico ou a posta en marcha dos diferentes consellos sectoriais.

Acompañando a estas medidas os esquerdistas tamén propoñen unha baixada salarial para o Alcalde e concelleiros e concelleiras do PSOE, ata conseguir un aforro de 49.716,56 € para as arcas municipais respecto do que viña custando á veciñanza o goberno da maioría absoluta de Cacabelos.

Propoñen tamén que o representante de oposición do concello do Grove na Mancomunidade do Salnés sexa un concelleiro ou concelleira designado por Esquerda Unida, que se sumaría así aos 2 representantes do goberno no órgano comarcal.

Estas son as condicións que Esquerda Unida lle pon ao PSOE para lograr sacar adiante as liberacións para estes catro anos. “Se o Alcalde asina estes compromisos e a rebaixa salarial, non temos inconveniente en absternos para facilitar esas liberacións”, asevera o voceiro esquerdista, José Antonio Otero.

Nova etapa na política municipal

Segundo sinala Otero, “este mandato é unha nova etapa na política municipal do noso concello. O goberno de Cacabelos perdeu a maioría absoluta, e ten que ser consciente de que terán que alcanzar acordos”. Destaca que “Esquerda Unida estamos no concello para mellorar a vida das veciñas e veciños do Grove e soamente se pode conseguir a través dun programa de goberno progresista”. Por iso, di, “non alcanzamos a entender que a única proposta que se nos trasladou o PSOE foi canto ían cobrar”.

[proposta de acordo]

EU pide que o concello se acolla ás axudas do Estado para o control das colonias felinas

Lembran que coa nova lei de Protección dos Dereitos e Benestar Animal, os concellos están obrigados ao control das colonias e á aplicación do protocolo CER. O prazo para as solicitudes pecha o vindeiro 24 de xullo.

Agardan que non perdan esta oportunidade como sucedeu coa subvención para instalacións deportivas, advertida no seu momento polos esquerdistas, e a da contratación de socorristas.

O Grove, 27 de xuño de 2023.- A Subsecretaría de Dereitos Sociais e Axenda 2030, ven de abrir o prazo para a solicitude de subvencións a entidades locales, destinadas a mellorar e impulsar o control poboacional decolonias felinas, concedéndose axudas a proxectos dirixidos á implantación do método CER (Captura, Estirilización e Retorno), desparasitación ou vacinación, mellora das condicións de vida e alimentación das colonias ou para a formación de persoal municipal ou concienciación da poboación no respeto ás colonias felinas. 

O prazo para a presentación de proxectos finaliza o vindeiro 24 de xullo e dende Esquerda Unida piden que o Concello do Grove se presente a esta convocatoria, pois lembran que existe unha responsabilidade municipal no control das colonias felinas en base á nova lei de Protección dos Dereitos e Benestar Animal. 

Un control que agora está realizando a asociación local O Jato Meco, tendo que asumir prácticamente a totalidade dos gastos, pois a implicación municipal é mínima ou practicamente nula. Por ese motivo consideran que "cunha colaboración entre o concello e a asociación é posible presentar un proxecto para optar, incluso, ás catro liñas subvencionables, a maioría de ata o 100%". Ademais, indican, "o goberno local recibiu hai uns días unha guía elaborada pola Deputación de Pontevedra na que se informa e asesora do proceso de control das colonias e a aplicación dos protocolos CER" .

Dende Esquerda Unida agardan que desta volta non deixen escapar esta oportunidade ao igual que sucedeu coa liña de axudas para a reforma e mantemento de instalacións deportivas e material deportivo inventariable ou a relativa á contratación de socorristas. Lembran que no mes de abril pediran ao concello que se acollera á subvención para arranxo deinstalacións deportivas co propósito de dar solución ás deficiencias existentes na maioría delas pero, polo visto esta semana, "xa non é que non se concedera, é que nin tiveron a decencia de presentarse, ao igual que sucedeu coa liña aberta para contratación de socorristas" denuncian os esquerdistas.

EU ve no reparto de concellerías unha confirmación das críticas que lanzaron ao executivo local no pasado mandato

 

Os esquerdistas entenden que o intercambio de competencias demostra que os/as responsables das áreas non realizaron o traballo satisfactoriamente e que Cacabelos os responsabiliza da baixada de votos.

Preguntan se a sanidade xa non ten importancia no actual mandato, pois fulminaron a concellería coa saída do concelleiro delegado. Lembran que o Centro de saúde está na mesma situación que nos últimos anos.

 O Grove, 23 de xuño de 2023.- Esta semana, o Alcalde realizou a delegación de competencias das diferentes áreas entre os concelleiros que o acompañan no goberno. Son varias as áreas que mudan de mans neste novo mandato, destacando a Concellería de Deportes, que ostentaba Santi Meis e que agora dirixirá Quito Parada e o intercambio de competencias entre Noemi Outeda e Pili Galiñanes. Así, a concellería de Cultura pasa agora a Galiñanes, namentres Noemi se fará cargo de Educación.

Esquerda Unida ve neste movemento de áreas un castigo ao traballo realizado nos últimos catro anos en tres das áreas nas que houbo máis queixas por parte dos colectivos, “nalgúns casos pola falta de implicación das súas responsables e noutros polas formas nas que se trataba aos propios colectivos, como no caso de Deportes”, asevera o voceiro esquerdista José Antonio Otero, que lembra que o seu grupo foi quen trasladou en diferentes ocasións esas críticas ao goberno municipal e que “este aseguraba que non era certo, pero isto demostra o contrario”. Ademais, Otero entende que este novo reparto “é un modo de responsabilizar a estes edís pola perda de votos nas pasadas eleccións”.

Aínda así, os esquerdistas agardan que “estes trocos, sumado ao novo panorama político, no que teñen minoría, supoña un cambio nas actitudes e na forma de gobernar”, indica Otero.

Para Esquerda Unida si que lle resulta incomprensible a eliminación da área de Sanidade, máxime cando, a pesar de non ser de competencia municipal, o Alcalde facía gala desta área, tanto na Pandemia como na loita pola mellora das condicións do Centro de Saúde. “Que pasa, que agora xa non é importante? Xa se solucionaron os problemas do Centro de Saúde?” pregunta Otero, que agarda que o Alcalde dea explicacións ao respecto.

EU insta ao concelleiro de Deportes a facer uso das subvencións da Xunta de Galicia para arranxar as instalacións deportivas municipais

 

O Grove, 19 de abril de 2023.- A finais do pasado mes, a Xunta de Galicia publicou as bases dunha liña de axudas destinadas á construción, reforma, adecuación ou mellora de instalacións deportivas de titularidade municipal, así como para a adquisición de material deportivo inventariable.

A convocatoria está aberta ata o 27 de abril e dende Esquerda Unida piden ao goberno local e, concretamente, ao concelleiro de Deportes, que non deixe pasar esta oportunidade pois, entenden, “sobra onde investilos, xa que todas as instalacións deportivas municipais precisan reformas, adecuacións e melloras”, indica o voceiro esquerdista, José Antonio Otero, que empraza ao executivo a “falar cos clubs deportivos ou pasarse polas instalacións deportivas e de seguro que saca un bo listado de propostas para presentar á subvención”.

Así, dende Esquerda Unida remarcan que, logo de ter mantido xuntanzas con varios dos clubs deportivos, comprobaron que todas as instalacións teñen deficiencias, comezando polo sistema de iluminación de todas elas, pois segue sen actualizarse a LED, o que provoca un consumo enorme, ademais dos insoportable ruído que emanan moitos dos focos e as incomodidades de ter que agardar preto de media hora para ter unha boa iluminación cada vez que se acenden ou sofren un apagón. A humidade e filtración de auga é outra das deficiencias que teñen a maioría das instalacións, segundo indican os esquerdistas, e poñen como exemplo o pavillón náutico e, sobre todo, o pavillón do colexio Conmeniño, que é impracticable na maioría dos días de choiva. Tamén ven deficiencia nos marcadores electrónicos pois, agás no pavillón novo, son inexistentes ou inutilizables no resto das instalacións deportivas municipais que o precisan. Por último, consideran que, en todas as instalacións deportivas, "existen pequenas e medianas reparacións ou necesidades que os propios clubs usuarios teñen posto en coñecemento da nosa organización e sabemos que dende hai tempo tamén no do concelleiro e, aínda seguen sen ser atendidas".

Os esquerdistas entenden que todas as deficiencias e necesidades das instalacións deportivas municipais, ou a gran maioría delas, poden ter solución a través da subvención que a Xunta de Galicia ten aberta durante este mes. Por ese motivo insisten en solicitar ao concelleiro de Deportes que non desperdicie a oportunidade e presente un proxecto para facerse con algún financiamento autonómico.

Esquerda Unida garantirá a conciliación nas épocas de vacacións escolares

Os esquerdistas critican ao goberno municipal por non ofrecer un servizo de campamento ou ludoteca durante a Semana Santa que permitira a conciliación nunhas datas nas que para moitas familias é máis doado atopar traballo.

Aseguran que, nun goberno con José A. Otero como Alcalde, ofrecerán un servizo de conciliación familiar na Semana Santa, verán e Nadal, e que traballarán para que ese servizo se vexa ampliado ao resto dos días do ano.

O Grove, 15 de abril de 2023.- Logo de ver como na Semana Santa dende o concello non se programou ningún tipo de campamento e/ou ludoteca que axudase á conciliación familiar,  dende Esquerda Unida denuncian esta circunstancia e aproveitan para mostrar unha das medidas incluídas no seu programa de cara ás vindeiras eleccións municipais.

O seu candidato e actual voceiro do grupo municipal, José Antonio Otero, indica que non é de recibo que dende o concello non se puxese en marcha un campamento para nenos e nenas de entre 3 e 12 anos, ao igual que se ten feito no verán ou, nalgunha ocasión, nas vacacións de Nadal. E é que para Otero esas datas, as de semana santa, “son importantes para moitas familias, xa que poden acadar un posto de traballo que lle permite uns ingresos máis que precisos na actual situación económica”, e para lograr ese traballo, o esquerdista entende que “é necesaria a conciliación e só é posible coa implicación do Concello a través de campamentos ou ludotecas”.

Por iso, dende Esquerda Unida indican que, dentro do seu programa de cara a un goberno con Otero como Alcalde, teñen contemplada a posta en marcha dun servizo de conciliación, a través de campamentos ou ludotecas nas tres etapas máis longas dos paróns escolares; Semana Santa, Verán e Nadal. Pero ademais, aseguran que traballarán para que esa conciliación se leve a cabo tamén en xornada de tarde durante todas as semanas do curso escolar, así como nas fins de semana e nos días de festividade dos centros educativos do municipio.

Unha medida que consideran posible, “incluso sen ter que recorrer ao orzamento municipal, pois existen axudas para executar estes servizos, como o Plan Corresponsable, promovido e financiado polo Ministerio de Igualdade”, aseguran. Os esquerdistas indican que existen numerosos concellos de Galicia que fan uso deses fondos para ofrecer unha conciliación familiar durante todo o ano, e critican que “aquí nin tan sequera son capaces de poñer a funcionar un simple servizo de ludoteca durante unha semana”.