Este é o estado no que se atopa a zona de tránsito dos viandantes na zona do Monte da Vila.
Se xa resulta difícil transitar por esa zona por mor das obras do Auditorio, peor o teñen os peóns se deben facelo por ese paso. 
08 agosto 2020
Foto denuncia EU - Estado da zona de tránsito dos viandantes no Monte de Vila
Este é o estado no que se atopa a zona de tránsito dos viandantes na zona do Monte da Vila. Se xa resulta difícil transitar por esa zona por mor das obras do Auditorio, peor o teñen os peóns se deben facelo por ese paso. 
05 agosto 2020
Rogos e Preguntas realizados no Pleno de Agosto
Estes
son os temas que tratamos no pleno do luns no punto de Rogos e Preguntas:
O noso voceiro solicitou que o goberno concretase unha xuntanza co Comité de Empresa do Casino La Toja co propósito de coñecer a situación actual e procurar medidas dende a administración local. Chegan rumores de que a situación é preocupante e que dende Luckia estase procurando un desmantelamento da sala da Toxa en prol da nova sala situada en Vigo.
PAXINA WEB TURISMOGROVE
Volvemos solicitar, por cuarto ano consecutivo, a eliminación das referencias ás praias de Bandeira Azul na web de turismogrove, pois sigue anunciando que temos areais co distintivo da Unión Europea cando non é certo. Tamén preguntamos en que estado se atopa a nova web turística anunciara xa no 2016.
APP MERCANOGROVE
Interesámonos polo estado no que se atopa a aplicación/marketplace “Merca no Grove”. Si se está traballando nela, cantos comercios están adheridos e cando se vai ter previsto que estea operativa.
RECURSO
SENTENZA LEI DE COSTAS
Pedimos información sobre a contratación dun servizo de asistencia xurídica, a través dun decreto de Alcaldía, para un Recurso Contencioso-Administrativo contra a Resolución da Dirección Xeral de Sustentabilidade da Costa e do Mar – Delimitación de Núcleos. Quixemos saber si este asunto tiña algo que ver coa sentenza gañada a Costas no 2017.
FESTA DO MARISCO
Solicitouse durante o debate da moción do BNG que se convocase o Consello Local de Turismo para tratar a Festa do Marisco. Durante os Rogos e Preguntas instouse a que nesa convocatoria se presentasen tamén as contas do evento gastronómico do 2019.
TERRAZAS
Preguntamos o estado no que se atopaba o expediente para a bonificación do 100% da taxa de terrazas neste ano 2020, aprobado nunha moción no pleno no mes de xuño. Tamén preguntamos si se iniciaron os trámites para solicitarlle a Portos de Galicia e Costas do estado a que bonificasen o maior porcentaxe da taxa de terrazas dos negocios que se atopan nos seus dominios, tal e como solicitaba a moción anteriormente indicada.
Así mesmo, solicitóuselle ao Alcalde que deixara de mentir, logo de ter indicado en dúas ocasións que se ía ordenar a retirada de mesas a unha terraza á que se lle permitira ampliala tan só no Estado de Alarma e que se ía sancionar e ordenar retirar o cercado doutra terraza no casco urbano por ser antiestética e incumprir a ordenanza municipal. As dúas a día de hoxe, logo de máis dun mes, continúan igual.
CONSELLO LOCAL DE DEPORTES E PISTAS DE PADEL
Preguntamos cando se ten pensado convocar o Consello Local de Deportes para renovar os representantes do órgano sectorial, pois vai máis dun ano do novo mandato e non se convocou aínda este consello.
Tamén solicitamos ao Concelleiro de Deportes que deixe de mentir e pida perdón ao Club de Padel polas súas mentiras logo de ter afirmado que as restricións nas pistas de padel foran consensuadas coa directiva deste club nunha reunión no concello, cando estes indicaron que tan só acataron as decisións tomadas polo concelleiro.
Así mesmo volvemos preguntar o motivo polo que os monitores da pista de padel tiñan que ser autónomos para traballar neste departamento.
CAMBIO DE XEFE DA POLICÍA LOCAL
Preguntamos a que atendeu o cambio de xefe da Policía Local, tras ver que por Decreto se aprobou o día 10 de xullo a remoción da anterior xefa e 11 días despois se nomeou, tamén por Decreto de Alcaldía, o novo xefe accidental.
TARXETAS
DE RESIDENTES NAS RÚAS PEONÍS
Preguntamos novamente en que situación se atopa a expedición de tarxetas de residentes e a identificación de cores das rúas peonís do noso concello, tal e como indica a Ordenanza de Tráfico que entrou en vigor en febreiro de 2018.
PINTADO DA RÚA ALEXANDRE BÓVEDA
Ante a falta de visibilidade das liñas de delimitación de carrís e dos pasos de peóns do tramo de Alexandre Bóveda recentemente humanizada, solicitamos que se procure o repintado da mesma cunha pintura que resalte máis ou se procure outras cores, sempre que cumpran a normativa de tráfico.
CAMIÑO DENDE A ATLÁNTIDA ATA A SIRADELLA
Solicitamos que se procure coa Deputación de Pontevedra, como titular, a ampliación do camiño forestal que transcorre dende a Atlántida ata a Siradella. Veciños e usuarios do mesmo alértannos da perigosidade que supón circular por esa zona ao contar con un vial moi estreito por onde transitan camións e trailers (derivados polo concello a circular por esa zona) así como vehículos a grandes velocidades.
LORDELO – CON DAS SEÑORITAS
Instouse á reparación das escaleiras de baixada ao mar do paseo de Lordelo, que se atopan esnaquizadas, e tamén dun dos bloques de formigón do muro do paseo altura do Con das Señoritas, que está desprazado.
VELLOS TEMPOS
Preguntamos en que situación se atopa o servizo, cando se vai reacitvar, con que protolo e cantas familias se beneficiarán do mesmo coa nova normalidade. Considerámolo un servizo esencial pois moitas familias levan meses “atrapadas” nas súas casas sen un mínimo respiro.
Tamén quixemos saber o motivo polo que se informou que o servizo ía comezar o día 3 no Monte da Vila cando finalmente non foi así, e por que non se lle avisou ás familias desta suspensión con tempo e forma.
Así mesmo, tamén emprazamos á concellería de Igualdade e Benestar a atender as propostas e a solicitude de xuntanza dun colectivo de San Vicente para tratar asuntos de Servizos Sociais. Unha xuntanza pola que o colectivo leva agardando dende o día 12 de xullo sen ter reposta por parte do departamento.
PLAN DE MOBILIDADE (PMUS)
Pedimos información sobre o Plan de Mobilidade Urbana Sostible (PMUS), pois dende setembro do 2019 non volvemos saber nada sobre o asunto, cando quedáramos en reunirnos asiduamente.
Preguntamos pola propostas realizadas por Esquerda Unida ao documento do PMUS: humanización da rúa O Corgo, apertura do vial do Monte da Vila dende Xoán XXIII, o traslado da parada de taxis á avenida Beiramar, a creación do “Metrominuto” ou a creación dun mini-parque infantil de tráfico. Así mesmo interesámonos polo estado da proposta que realizamos sobre as bolsas de terreos para crear aparcamento, máxime logo de ter eliminado medio centenar trala humanización da Alexandre Bóveda, Rosalía e Conchases. Tamén criticamos que non se fixo nada sobre accesibilidade logo de ter advertido no documento presentado no 2019 dunha quincena de pasos de peóns que non contaban con rampla de acceso para persoas con mobilidade reducida
CAFETERÍA DA CASA DA TERCEIRA IDADE
Por último, preguntamos os motivos polo que non están publicados os pregos de condicións para o concurso de concesión da Cafetería da Casa da Terceira Idade, logo de que a actual concesionaria rematara o pasado 31 de xullo.
Tamén preguntamos por que motivo se estaba culpabilizando a última concesionaria do servizo da cafetería de provocar que estes pregos non estean publicados, máxime cando tiñan que estar preparados pois o servizo remataba en principio o 11 de xullo, e finalmente o 31 de xullo logo de que aprobaran a prorroga en Xunta de Goberno Local o 29 de xuño.
27 xullo 2020
EU pide que o concello instale sacos de grandes dimensións para a recollida de residuos expulsado polo mar
 |
| Fotos de Elena Castro Castro (facebook foro todogrove) mostrando os materiais impropios recollidos pola xente e despositados nos accesos das praias. |
O Grupo Municipal de Esquerda Unida elevará ao pleno do vindeiro luns unha moción na que instará ao goberno municipal á instalación de sacos de grandes dimensións en diferentes areais destinados á recollida e xestión dos materiais impropios expulsados polo mar nas costas grovenses.
Os esquerdistas entenden que cada día son máis as persoas que nas súas visitas aos areais e outros recunchos da costa grovense deciden aproveitar os paseos ou momentos de lecer para recoller os materiais que, tanto pola propia actividade humana como polo incivismo, rematan no mar e logo son devoltos ás costas.
Afirman así mesmo, que é habitual ver como eses materiais, que polas súas dimensión, por tratarse de residuos impropios ou pola falta de colectores na zona, son depositados nas proximidades dos accesos aos areais. Unha situación que, segundo Esquerda Unida, provoca que na maioría das ocasións rematen espallados pola contorna ou volvan novamente ao mar, ocasionando un problema aínda maior.
É por isto que dende
o Grupo Municipal de Esquerda Unida propoñen a instalación de sacos de grandes
dimensións, como os utilizados nas obras para a recollida de escombro, situados
en puntos estratéxicos do litoral grovense e perfectamente identificados. Unha
solución que dende a agrupación esquerdista consideran económica e axeitada e
que facilitaría á xente un medio sinxelo onde depositar os materiais que
voluntariamente recollen das praias, mar rochas e outros lugares, aliviando os
colectores, permitindo unha mellor xestión do lixo e mellora na reciclaxe e ofrecendo
unha mellor imaxe da contorna grovense.
 |
| Exemplo do saco proposto por Esquerda Unida |
Moción completa
PARA A INSTALACIÓN DE SACOS DE GRANDES DIMENSIÓNS, “SACOS DE ESCOMBRO”, DESTINADOS Á RECOLLIDA E XESTIÓN DOS MATERIAIS E RESIDUOS EXPULSADOS POLO MAR NAS NOSAS COSTAS
EXPOSICIÓN DE MOTIVOS
Nos últimos tempos vense observando un cambio radical na actitude tanto de veciñas e veciños como de visitantes que gozan das paraxes de todo o litoral grovense, máxime na súa fachada oeste (senda litoral dos tramos da praia da Lanzada e dende Pedras Negras ata con negro), en canto á sensibilización co medio ambiente e co gravísimo problema que supón a cantidade de materiais que, pola nosa actividade e ás veces tamén polo noso incivismo, rematan no mar co enorme prexuízo que iso supón.
Noutrora, a maioría da xente consideraba que todo o que o mar devolvía á praia ou a calquera punto da costa, tiña que ser recollido e xestionado polas administracións pertinentes: Xunta, Deputación ou Concello. Incluso se agardaba ás habituais actividades que algún centro escolar ou entidade organizaba para limpar espazos ou zonas concretas. Hoxe en día, a realidade é ben distinta e a preocupación e concienciación ante a situación medioambiental actual leva a que moitas persoas xa consideran que esta cuestión non só é responsabilidade das administracións, senón que implica a todo o mundo e que todas e todos podemos e debemos aportar o noso gran de area para facilitar a xestión destes materiais, na súa maioría plásticos, que constantemente chegan a ás nosas costas derivadas das correntes mariñas predominantes.
No noso concello é habitual ollar como no tramo da zona da Batería de San Vicente, por exemplo, moitas persoas e/ou familias enteiras, a título individual, aproveitan as súas visitas de lecer á zona e os seus paseos polas praias para recoller todo tipo de plásticos e materiais que se van atopando polo camiño. Na gran maioría dos casos vemos como estes elementos que se recollen son depositados preto das zonas nas que se atopan os colectores de lixo, cando existen, ou nas zonas máis próximas ao paseo ou accesos ás praias e sendeiros; aparcadoiro onde comeza a ruta de Punta Abelleiro (ao carón do Náutico), a pista de acceso á praia de Canelas ou o aparcadoiro de Con Negro. No caso da Lanzada adoitan ser depositados nos accesos peonís á praia ou no aparcadoiro central ou zona do Sanatorio. Na maioría dos casos estes elementos non son depositados nos colectores, ben por non existir, por atoparse cheos, por superar as dimensións do propio colector ou por tratarse de materiais ou residuos chamados impropios que deben ser xestionados doutro xeito. No mellor dos casos, onde existen colectores, a recollida realizase unha vez á semana, o que ás veces é insuficiente. Pero onde non existen estes colectores e os residuos quedan amontoados e non son recollidos polos servizos municipais, lamentablemente rematan outra vez no mar ou espallados polas praias e montes ocasionando un problema aínda maior.
Son moitas as veciñas e veciños que nos trasladan solucións, non custosas, para paliar esta situación e que dependen da administración local. Solucións das que temos constancia que xa foron postas en coñecemento da concellería correspondente tanto de palabra como a través dun escrito por rexistro, do cal xurde esta moción.
Unha destas solucións, que dende Esquerda Unida consideramos axeitada, pasa pola instalación de sacos de grandes dimensións, como os utilizados en obras para a recollida de escombro, situados en puntos estratéxicos do noso litoral (Con Negro, Canelas - Batería, Punta Abelleiro, Sanatorio, aparcadoiro Lanzada, Praia de Rons, Praia das Pipas...) e perfectamente identificados co logo do Concello e a súa finalidade (RECOLLIDA RESÍDUOS IMPROPIOS DO MAR). Sacos que o propio concello recollería habitualmente para xestionar a súa reciclaxe ou destrución.
Un método que facilitaría á xente un medio sinxelo onde depositar os materiais que voluntariamente recolle das praias, mar, rochas e outros lugares, aliviando os colectores e permitindo unha mellor xestión do lixo e mellora na reciclaxe. Así mesmo a instalación destes sacos permitiría unha mellor imaxe da nosa contorna, evitando ver espallado ese material que recolle a xente por todo o litoral provocando as veces que volva ao mar.
Por todo o anteriormente exposto, é polo que o Grupo Municipal de Esquerda Unida somete á consideración do pleno a aprobación da seguinte
PROPOSTA DE ACORDO
Instar ao Concello do Grove a:
1. Instalar sacos de grandes dimensións, coñecidos como “sacos de escombro”, debidamente identificados, en diferentes puntos do noso litoral para facilitar o depósito dos materiais expulsados polo mar nas nosas praias e costas.
2. Que se realice este servizo durante a época non estival, pero que se valore a posibilidade de realizalo tamén na época estival, aínda que se conte con servizo de limpeza de praias.
3. Que se faga unha programación de recollida puntual dos diferentes sacos e se xestione a súa reciclaxe ou eliminación co Punto Limpo.
4. Que se realice unha campaña de concienciación co medio ambiente e de información indicando os puntos de instalación dos citados sacos.
25 xullo 2020
UN NOVO ESTATUTO PARA BLINDAR DEREITOS E PROTECCIÓN SOCIAL
MANIFESTO 25 DE XULLO
Celebramos este 25 de xullo, día nacional de Galicia, coa firmeza e compromiso dos homes e mulleres de Esquerda Unida de ser parte decidida na loita contra os aspectos máis lesivos da crise sanitaria da COVID-19 e coa solidariedade e afecto ás persoas enfermas, a lembranza das falecidas e o agarimo ás familias, aos e ás profesionais sanitarias, dos servizos públicos e colectivos que foron vangarda na exemplar loita do noso país contra esta pandemia. Vaia o noso agradecemento e recoñecemento sincero.
Esta situación nova e imprevista, pero sobre todo as súas consecuencias e agravamento das desigualdades sociais xa existentes, obriga a repensar profundamente o noso marco político e institucional, obriga a vencellar a acción política e a normativa ao obxectivo de blindar servizos públicos esenciais, como un ben común que se convirte en faro e esperanza especialmente en momentos como este. E para blindalos hai que partir esencialmente de grandes consensos e audacia normativa. Un marco que en sociedades avanzadas artéllase en grande parte nos marcos constitucionais ou estatutarios.
É por iso que Esquerda Unida quere, neste 25 de xullo, recuperar a vella e non tan vella proposta de avanzar nos consensos que permitan a adaptación do estatuto de autonomía de Galicia a un marco xurídico de blindaxe e garantía dunha sociedade galega con dereitos e con servizos públicos garantidos. Un debate que estivo presente na axenda política de lexislaturas pasadas pero quedou posteriormente conxelado. Un debate que, ao noso entender, suporía que Galicia asumise o seu papel na construción dun Estado Federal sen privilexios entre as Comunidades Autónomas do Estado.
A primeira afirmación política que debemos de facer no debate e reflexión aberta sobre a Reforma do Estatuto, é que esta nin será acertada nin correcta se ao mesmo tempo non se impulsan as Reformas do título III e VIII (Das Cortes Xerais e Da Organización Territorial do Estado) da actual Constitución e se asume a necesidade de camiñar cara a construción do Estado Federal e solidario e o noso papel en Europa.
O noso Estatuto conquistouse pola vía rápida do artigo 151 da Constitución, polo antecedente do Estatuto aprobado maioritariamente en referendo en 1936. Esquerda Unida sigue a defender a necesidade de actualizar e adecuar aos novos tempos os Estatutos de Autonomía, acelerando en primeiro lugar o traspaso de competencias pendentes e incorporando as novas realidades emerxidas con posterioridade á súa aprobación.
Levamos moitos anos desde a aprobación do actual Estatuto de claro estancamento social pola aplicación de políticas conservadoras que impediron o avance na constitución nacional solidaria. Son anos perdidos de limitación da autonomía, nos que primou a simple xestión sobre a capacidade e potencialidade política real da sociedade galega, moitas veces limitándose a por en marcha as políticas da Unión Europea. Despois de case 40 anos aínda quedan pendentes importantes transferencias competenciais e infraestruturas estratéxicas do Estado a Galicia.
É evidente que todos os indicadores de emprego, de nivel de renda, de desequilibrios comarcais, de nivel de converxencia real, etc., demostran que aínda tendo medrado cuantitativamente, estamos aínda moi lonxe de acadar os niveis e obxectivos desexados. Cualitativamente, o modelo de desenvolvemento non se baseou na transformación senón que se seguiron patróns neoliberais.
O proxecto de Esquerda Unida avanza cara a construción dun modelo de Estado Federal, solidario e cooperativo, no marco dunha Europa Federal e Social. O Partido Comunista de Galicia xogou un papel protagonista na defensa do Estatuto de Autonomía do ano 1936, cuxa aprobación permitiu a Galicia acadar o seu Estatuto de Autonomía de 1981 pola chamada “vía rápida” do artigo 151 da Constitución. O PCG xogou un papel decisivo no actual Estatuto do que, ademais de ser redactor, foi un dos principais impulsores a través das mobilizacións que o demandaban.
Pero, anos despois destes importantes consensos, actualmente prodúcense unha serie de incumprimentos dos principios que marca o Estatuto ou tamén de carencias importantes nos seus artigos, entre outros, nos seguintes eidos:
1.- Acadar o pleno emprego..
2.- Aproveitar os recursos endóxenos de Galicia
3.- Superar os desequilibrios económicos e sociais entre distintos territorios de Galicia fomentando a solidariedade, fundamentalmente entre o ámbito rural e o urbano.
4.- Superar a emigración, posibilitar o retorno dos emigrantes e facilitar a integración dos inmigrantes.
5.- Efectividade da igualdade home-muller.
6.- Afianzar a identidade galega mediante a investigación, os valores históricos, culturais e lingüísticos galegos.
Esquerda Unida recollendo o legado do Partido Comunista de Galicia e as aspiracións do pobo galego manifestadas nestes últimos anos, aposta por profundar no autogoberno reformando o Estatuto, garantindo a cohesión e acometendo desafíos que están identificados (emprego, desigualdade, pobreza, inmigración, ...) encarando así, ademais, cun mellor instrumento e en mellores condicións os novos retos do futuro.
O modelo de Estado que propugnamos, a Reforma do Estatuto que pretendemos, constitúe un instrumento ao servizo do obxectivo primordial dunha Galicia sen desigualdades, cunha cidadanía plena, libre, responsable do seu destino, activa, que delibera e participa nas súas institucións e decide o seu futuro.
O mundo está asistindo a cambios espectaculares, con novas realidades como son a integración e ampliación europea, o Tratado constitucional europeo, o fenómeno da inmigración, os efectos perniciosos da globalización neoliberal, as novas demandas sociais, o nivel de esixencia ética aos representantes públicos nas Institucións, a calidade democrática, a estrutura territorial do Estado, a garantía no cumprimento dos dereitos humanos, os temas medioambientais e ecolóxicos, etc., son todos eles aspectos que deben inspirar as reformas para un novo Estatuto e un novo ordenamento constitucional.
O debate sobre a reforma non pode quedar reducido só ao ámbito parlamentario ou político; debe de contar cunha ampla participación e implicación social (axentes sociais, colectivos e profesionais, sectores profesionais, universidade, Institucións locais, ...). O proceso de reforma do Estatuto debe ser aberto e abarcar amplos e diversos sectores da sociedade, sen exclusións.
A apertura do debate político e social, a aspiración a conseguir un amplo consenso, debe afundir as súas raíces no pobo, as súas institucións e organizacións sociais. Por elo, apostamos por un proceso de escoita á sociedade, de respecto a todas as opinións, sen ningún tipo de vetos ou recortes. Debe perseguirse que a sociedade galega vexa a reforma como un instrumento útil, positivo e necesario.
Polo exposto, Esquerda Unida, neste 25 de xullo chama ás forzas políticas galegas a avanzar na ampliación do poder institucional de Galicia, a blindar e atender as demandas sociais da maioría social galega, a descentralizar política e administrativamente tamén cara os concellos galegos, e a avanzar na construción do Estado Federal e Solidario. En definitiva, a pular por unha reforma do Estatuto de Galicia para alcanzar máis autogoberno, máis poder galego, para máis dereitos sociais e democracia. Galicia como garantía do equilibrio federal do Estado.
Compostela 25 de xullo de 2020.
15 xullo 2020
EU pregunta polas tarxetas de residentes para acceder ás rúas peonís
O grupo municipal alédase
de que o goberno comece a vixiar as rúas peonís evitando o acceso de vehículos
non autorizados, pero denuncia que chegan tarde con esta medida, pois hai tempo
que debían aplicala.
Solicitan que se
identifiquen as rúas restrinxidas con cores e se tramiten as tarxetas de
residentes tal e como indica a Ordenanza de Tráfico que entrou en vigor en
febreiro do 2018.
O Grove, 15 de xullo
de 2020.-
O Grupo Municipal de Esquerda Unida alédase de que o goberno municipal
reaccione e comece a vixiar e multar aos vehículos que circulan polas rúas ás
que só teñen acceso os residentes e servizos. O seu voceiro, José Antonio
Otero, considera que “a sanción é o mellor modo de que se acabe con estas
condutas”, pero entende que se chega tarde con esta medida “pois xa tiña que
ser aplicada hai moito tempo”.
O
esquerdista indica que non só as rúas Luís Seoane e Jaime Solá precisan de
vixilancia e sanción xa que, “existen moitas máis rúas no casco urbano que teñen
restrinxido o acceso só aos residentes, pero polas que diariamente circulan
numerosos vehículos e incluso son utilizadas como zonas de estacionamento”.
“Moitas
persoas usan estas rúas como vía de escape ante posibles atascos ou simplemente
para evitar rodeos logo dos numerosos cambios de circulación que realizou este goberno nos últimos anos”
afirma Otero, que considera que “o Alcalde é consciente desta conduta dende hai
moito tempo, pero non quixo tomar medidas e tómanas agora que se lles foi das
mans”. O voceiro esquerdista indica isto
recordando que o 27 de novembro de 2017 o pleno do Grove aprobou a ordenanza de
tráfico que entrou en vigor o 6 de febreiro de 2018, onde no seu artigo 38.6
indica que nas rúas de acceso restrinxido a residentes e autorizados só poderán
acceder os que acrediten tal condición e obteñan a tarxeta de residente que
terán que ter colocada de xeito visible no interior do vehículo. Así mesmo a
ordenanza indica que se marcarían as rúas por cores para que os usuarios fosen
identificados con máis facilidade, “pero a día de hoxe non hai nada avanzado
neste aspecto, a pesar de ternos afirmado que estaban en elo, cada vez que
preguntábamos en pleno sobre as tarxetas”, sentenza Otero.
É
por iso que reclaman ao concello que, ademais de impoñer sancións por circular
por rúas restrinxidas sen autorización, “se comece a executar os puntos da
ordenanza, se identifiquen con cores as rúas e se tramiten as tarxetas de
residentes, para que estes non teñan que explicar continuamente ás forzas de
seguridade que teñen dereito a acceder a rúa onde se atopa a súa residencia ou
garaxe”, finaliza Otero.
Gabinete
de Prensa
Esquerda
Unida O Grove
03 xullo 2020
Galicia en Común comprométese a saldar a débeda da Xunta co Grove
A candidatura de Galicia En Común visitou onte O Grove para manter un encontro coas militancias e coñecer as necesidades do noso concello.
É coñecida a débeda histórica que a Xunta de Galicia ten co Grove e a necesidade de que o ente autonómico afronte dunha vez por todas inversións que den solucións ás necesidades da nosa vila.
Así, a cabeza de lista por Pontevedra, Eva Solla acompañada de Iria Figueroa e Marcos Cal, segunda e terceiro respectivamente pola mesma provincia, asumiron o compromiso de traballar para que O Grove conte dunha vez por todas co necesario novo Centro de Saúde; para que se afronte a ampliación do dique de abrigo de Porto Meloxo, respectando sempre os bancos marisqueiros próximos; para que se substitúa a tubaxe de subministro de auga potable, que agora mesmo provoca numerosas rupturas no tramo da Lanzada; para que a vía rápida conte con catro carrís entre Sanxenxo e O Grove; e para que os terreos do Corgo pasen a titularidade municipal.
Sabemos que traballarán para saldar esta débeda co Grove, pero para elo é preciso un cambio na Xunta de Galicia e iso só pasa por un goberno progresista con Galicia En Común á cabeza.
25 xuño 2020
Foto denuncia EU - Estado do Lavadoiro dos Paus
O Lavadoiro dos Paus en San Vicente é outros dos elementos patrimoniais do noso concello que corre o risco de desaparecer.
De seguir así, o camiño desaparecerá entre a maleza e a cuberta do lavadoiro rematará no chan. 
O pobre leva máis de dous anos agardando a súa reparación despois de perder un dos piares laterais.
22 xuño 2020
EU advirte que o goberno aprobou un sobrecusto do auditorio de medio millón de euros
O grupo municipal esquerdista indica que a Xunta de Goberno Local aprobou o 10 de xuño unha modificación do proxecto con un incremento do 14% do orzamento inicial, o que supón un de desembolso de máis de 560.000 €.
Denuncian que a modificación, entre outras cousas, é para reforzar unha das cubertas co propósito de permitir que se “fagan botellóns” con seguridade.
Consideran que o orzamento para afrontar esta modificación sairá dos 600.000 € destinados á apertura da estrada entre As Bouzas e a Castelao.
O Grove, 22 de xuño de 2020.- A comisión informativa de este luns dará conta do acordo da Xunta de Goberno Local do pasado día 10 de xuño no que se aprobou a modificación do proxecto do Auditorio e Escola de Música cun incremento do 14% sobre o orzamento adxudicado. Unha modificación que suporá un desembolso de máis de medio millón de euros e que a obra se dilate no tempo.
Dende Esquerda Unida indican que a modificación principal débese á necesidade de reforzar unha cuberta do auditorio ante a posibilidade de que se realicen botellóns sobre a mesma. Iso é o que deducen os esquerdistas logo de ter acceso ao documento de solicitude realizado pola dirección de obra, na cal se indica que detectaron reunións non controladas de mocidade na zona e que consideran que esta actividade pode continuar no futuro. A pesar de que a cuberta conta con cercado para impedir o acceso, a dirección de obra entende que non vai impedir que se salte o mesmo, e como precisaría de mantemento e atención a proposta é permitir este tipo de actividades facendo unha cuberta transitable, cuestión que dende Esquerda Unida consideran incomprensible, pois “en lugar de evitar ou disuadir ese tipo de actividades, o que facemos é facilitarlles e asegurarlles a estancia na zona”.
Outra das modificacións propostas foi en base á estabilidade en pendentes, detectadas segundo avanzaron os traballos de escavación, e pola que existía posibilidade de desprendemento de rochas co conseguinte risco para os traballadores. Dende Esquerda Unida tampouco comprenden moito esta cuestión, “pois vendo a singularidade do terreo e coñecendo a profundidade da escavación era case previsible a posibilidade de desprendementos”.
Tal e como denuncian os esquerdistas, estas modificacións supoñen un incremento de 561.633,79 € sobre o orzamento adxudicado (4.011.669,90 €), o que sumado ás direccións e coordinacións de obra (87.846,00 €) e ao proxecto do mesmo (63.926,96 €) elevan xa o custo do Auditorio e Escola de Música a un total de 4.725.076,65 €. Para Esquerda Unida isto só é o comezo, pois entenden que seguirán aparecendo gastos que provocarán que finalmente o Auditorio supere con creces os 5 millóns de euros.
Por último, dende a agrupación esquerdista pregúntanse de onde sairán eses máis de 550.000 € precisos para asumir esta modificación do proxecto, aínda que teñen unha idea e non descartan que nos vindeiros meses se presente en pleno unha modificación do destino dos 600.000 € previstos para a apertura da estrada entre as Bouzas e a Castelao.
19 xuño 2020
Foto denuncia EU - Estado da Fonte do Naval
"Adiós ríos, adiós fontes..." igual que Rosalía, sentimos moita tristura vendo como se vai perdendo o patrimonio etnográfico da nosa vila. A Fonte do Naval en San Vicente corre o risco de desaparecer polo estado de abandono e esquecemento no que se atopa. 
Pedimos ao concello que protexa e coide o noso patrimonio, porque forma parte da nosa cultura e da nosa historia.
11 xuño 2020
Foto denuncia EU - Estado do camiño dos Pardiños
Estreamos nova tempada de #fotodenuncia 
Recuperando unha denuncia da veciñanza dos Pardiños do 2019. Solicitaban o arranxo e a limpeza do camiño que ademáis ten un desnivel que supón un risco para os viandantes.Agora volven a solicitar o mesmo
. O concello só instalou una cinta para sinalar o perigo do desnivel, pero a maleza non parou de medrar invadindo o camiño, incluso na intersección coa Rúa Vilavella.
09 xuño 2020
EU insta ao goberno municipal a abrir a biblioteca da Casa da Cultura de San Vicente
Os esquerdistas consideran discriminatorio que logo de que o Estado permitira a apertura das bibliotecas municipais, o concello abrise a da Casa da Cultura Manuel Lueiro Rey e manteña pechada a de San Vicente.
Instan ao goberno a poñer en funcionamento o servizo bibliotecario da Casa da Cultura Ángel Vázquez Hereder, coas mesmas medidas de seguridade que a do Monte da Vila, para facilitar o desenrolo dos estudos ao colectivo estudantil da parroquia.
O Grove, 9 de xuño de 2020.- O pasado 11 de maio Galicia entrou na fase 1 da desescalada, o que permitía, entre outras moitas cousas, a apertura das bibliotecas municipais para o préstamo de libros e lectura con limitacións de aforo. No Grove, non foi ata o 20 de maio cando a biblioteca da Casa da Cultura Manuel Lueiro Rey abriu as súas portas coas medidas de seguridade pertinentes, namentres a pertencente á Casa da Cultura Ángel Váquez Hereder, na parroquia de San Vicente, continuaba pechada.
Coa entrada da fase 2, o pasado 25 de maio, as medidas esixidas para apertura das bibliotecas eran máis flexibles, permitindo neste caso actividades de consulta en sala sen superar o terzo do aforo. Novamente, a biblioteca da Casa da Cultura Manuel Lueiro Rey adaptábase a estas novas circunstancias, incluso coa instalación de un dispensador de pé de xel hidroalcohólico e un felpudo antibacterias, namentres a situada en San Vicente continuaba co porta pechada.
Este luns entramos na fase 3 e novamente esta situación incluíu normas máis flexibles que as anteriores pero, aínda así, a biblioteca da Casa da Cultura Ángel Vázquez Hereder segue tendo as portas pechadas, o que Esquerda Unida tacha como “unha clara discriminación cara a parroquia de San Vicente”.
Os esquerdistas consideran que esta circunstancia está a perxudicar a toda a veciñanza de San Vicente, pero en especial ao colectivo estudantil da parroquia, xa que non poden realizar os seus estudos nas mesmas condicións que os do casco urbano grovense. Segundo a concelleira de Esquerda Unida, Ana Cristina Domínguez, “No rural é complicado contar cunha conexión a internet decente, e moitas vivendas non contan nin tan sequera con ese servizo o que provocaba que para solucionar esta situación o alumnado da parroquia achegábase á biblioteca Casa da Cultura para realizar as tarefas que requirían dunha conexión”. “Durante o confinamento, o alumnado tivo que sufrir a falta dunha conexión a internet ao non poder estar abertas as instalacións municipais, pero non é comprensible que esta circunstancia continúe igual dende o pasado 11 de maio, cando entramos na fase 1” indica Domínguez, que considera esta situación “unha falta de previsión do goberno municipal e unha falta de respecto e discriminación cara a veciñanza de San Vicente”.
Por ese motivo, o Grupo Municipal de Esquerda Unida solicita ao goberno municipal a apertura inmediata da biblioteca da Casa da Cultura Ángel Vázquez Hereder e que se dote esta das mesmas medidas de seguridade que se aplicaron nas instalacións da Manuel Lueiro Rey.
Gabinete de Prensa
Esquerda Unida O
Grove
Subscribirse a:
Comentarios (Atom)