Prensa. Todogrove.com.- Medio cento de autores participan cos seus textos en Manuel Lueiro Rey (1916-1990). A liberdade ferida,
un libro de Edicións Xerais coordinado polo profesor e crítico
literario Ramón Nicolás que este sábado ás 20.00 horas será presentado
na Galería Besada.
Redacción
Na que será a estrea en sociedade deste volume de máis de 200 páxinas que
afonda na vida e obra do máis insigne escritor grovense o director de
Xerais, Manuel Bragado, e o coordinador da obra, Ramón Nicolás, estarán
acompañados do escritor Luís Cochón e do presidente da Real Academia
Galega, Xesús Alonso Montero, así como do responsable deste espazo
expositivo da rúa Concepción Arenal, Carlos Álvarez Besada.
Como se pode ler na web de Edicións Xerais, Manuel Lueiro Rey (1916-1990). A liberdade ferida
é unha obra colectiva que “pretende actualizar e pór ao día” a
traxectoria biográfica deste escritor grovense, así como o “o pouso
humano que deixou en tantas persoas, o seu pensamento político e, xaora,
a súa extensa e aínda hoxe pouco divulgada produción” literaria.
Para abordar a súa figura, neste libro coordinado polo profesor e crítico
Ramón Nicolás, responsable de varias antoloxías deste escritor nacido en
Fornelos de Montes, contouse coa participación de medio cento de
persoas “de diversas xeracións e sensibilidades”, que engloban tanto aos
que o trataron en vida como aos que estudaron a súa obra ou aos que
directamente “aínda se senten preto del”. Ademais, para o volume que se
presentará este sábado tamén se recuperaron textos inéditos ou
“escasamente coñecidos” da súa autoría e un “abondoso corpus fotográfico
e documental nunca antes publicado”.
Ningún comentario:
Publicar un comentario