Alternativa Galega pecha a campaña no Grove co apoio de varios ex-concelleiros

Todogrove.com

No último acto da campaña electoral antes de que a vila se mergulle na xornada de reflexión, a coalición Alternativa Galega de Esquerda (AGE) recibiu ante máis de cen persoas na Casa da Cultura o apoio dun feixe de ex-concelleiros grovenses, nun acto que contou coas intervencións do grovense Xan Lamelas e dos candidatos ao Parlamento Bernarda Rubianes e Juan Fajardo.

Texto: I. Rodríguez | Fotos: M. Muñiz 

Circunstancias de última hora motivaron que dos catro nomes anunciados no cartel de AGE para o mitin deste venres, tan só dous rematasen finalmente subindo ao escenario da Casa da Cultura Manuel Lueiro Rey, os números 1 e 8 da candidatura por Pontevedra, Juan Fajardo e Bernarda Rubianes, responsables de expoñer as liñas programáticas da coalición que lidera Xosé Manuel Beiras.

De presentalos a todos eles responsabilizouse, en substitución do ex–concelleiro e responsable local de Anova, Xosé Manuel Domínguez, outro antigo edil, o escritor e bibliotecario Luís Rei, quen para darlle a palabra en primeira instancia a outro antigo membro da corporación grovense, Xan Lamelas, aproveitou para saudar o “aval” que a esta formación brindaran outro bo número de representantes da esquerda grovense, que como membros do BNG, de EU ou do Partido Comunista, tamén tomaron asento no seu día no salón de plenos da Casa Consistorial.

Concelleiros como Manolo Mascato, Xan Caneda, Xesús María Domínguez, Antón Mascato, María Soilán ou Julio Oubiña amosaron o seu apoio á coalición, algo que Rei agradeceu ao inicio do mitin para posteriormente incidir no proceso de conformación dunha coalición na que conflúen diversas forzas e criticar que a maior actuación do Goberno autonómico no Grove fose un “heliporto no que investiron tres quilos de pintura”, ao mesmo tempo que lamentaba que en lugar de obras públicas, o PP trouxese ao Grove un “hotel que non pedimos”, en alusión á Pousada da Lanzada.

“Catástrofe nacional”

Tamén saudou a unión de “varias forzas da esquerda social e nacional de Galicia”, Xan Lamelas,quen interveu en substitución de José Antonio Taboada para explicar que esta coalición que engloba a Anova-Irmandade Nacionalista, Esquerda Unida, EQUO e Espazo Ecosocialista vén motivada por unha “situación de catástrofe nacional” da que culpou ás “políticas do PP e do PSOE”.

Lembrou Lamelas que Núñez Feijóo comezou a aplicar en Galicia as “políticas de recortes” antes de que Mariano Rajoy chegase á Presidencia do Goberno central, motivo polo que definiu ao Goberno galego como unha “avanzadilla das políticas da Troika” que conducen a Galicia ao “desastre social”. Ante esta situación, insistiu na necesidade de “botalos da Xunta” e parar unhas “políticas que conducen ao desastre social”.

Lamelas tamén criticou que o PPdeG empregase en campaña “o medo” aos gobernos de coalición, algo que na súa opinión vén motivado polo feito de que “ninguén quere pactar con eles, xa que están levando á ruína ao país”. O dos pactos permitiulle tamén ao representante de EU enfocar o seu discurso na política local, onde o PP goberna en coalición, para criticar a “incoherencia ideolóxica” deste partido. Destacou Lamelas que no Grove, esta formación goberna xunto cun edil “que se fai chamar galeguista, que gobernou coa esquerda, que agora goberna coa dereita e que pide o voto para unha forza que se presenta contra o PP”, en alusión a Alfredo Bea. Por isto, concluíu que o PP “só quere conseguir o poder”.

“Parar os recortes”

De explicar as liñas programáticas de AGE responsabilizáronse dous dos integrantes da candidatura da coalición na provincia de Pontevedra, a mestra Bernarda Rubianes, integrante de ANOVA, e o cabeza de lista Juan Fajardo, de EU, que incidiron na importancia de impedir que o PPdeG renove a maioría absoluta como un xeito de “para os recortes”.

Nas súas intervencións, tanto Rubianes coma Fajardo fixeron énfase na necesidade de preservar servizos públicos como a educación ou a sanidade, e reclamaron que a crise “a paguen os que a crearon”, en lugar dos traballadores.

Por outra banda, incidiron tamén na importancia  dunha “rexeneración democrática”, en rematar coa “corrupción” da clase política e en fomentar no Parlamento “unha democracia real e participativa”.

ver todas as fotografias