Willy Meyer reuniuse esta mañá con Juan Manuel Fajardo, candidato de Esquerda Unida pola provincia de Pontevedra. A reunión de traballo permitiu perfilar unha serie de iniciativas concretas que se porán en marcha de forma inmediata, como resposta ás consecuencias da crise económica, que azouta con especial dureza á Comunidade galega, onde a pobreza e a exclusión social afectan ao 20% dos fogares, cun total de 201.316 parados, e onde se duplica a taxa de precariedade laboral da Unión Europea. Na reunión celebrada en Bruxelas, participou tamén Joan Josep Nuet, Senador de Esquerda Unida, quen explicou á prensa que ” puxemos en común unha acción coordinada as delegacións de EU no Parlamento Europeo, o Congreso dos deputados, o Senado e Esquerda Unida, para situar a Galicia no centro do debate”.
Willy Meyer, afirmou que “á luz das previsións da Comisión europea para 2009, a taxa de paro roldará o 20% da poboación activa en Galicia. É necesario tomar medidas efectivas contra a destrución do emprego, e garantir a protección social e o mantemento dos servizos públicos de calidade”.
Fajardo pediu ao eurodiputado de Esquerda Unida que “tome a iniciativa fronte á crise do sector automobilístico e a situación dos seus traballadores” e continuou dicindo “esiximos ao goberno do bipartito galego que se tomen en serio a situación de Citroen”.
Citroen -Vigo, cuxa produción representa o 17% do PIB galego, e onde se constrúen 1 de cada 5 coches españois, enfróntase a un posible expediente de regulación a partir do mes de Marzo, xa que segundo declaracións do Pierre Ianni, director de PSA-Peugeot-Citroen Vigo, “a empresa sofre un descenso da produción prevista para este ano”. A empresa, onde traballan unhas 10.000 persoas, podería ver reducida o seu persoal nun 29,9%, afectando particularmente aos traballadores eventuais.
Fajardo mostrouse escéptico ante o plan investidor presentado por Citroen-Vigo e recordou que “este plan non garante os postos de traballo. É inaceptable que empresas que recibiron subvencións públicas e que pecharon os exercicios anuais con beneficios estean deslocalizando a súa produción deixando no paro aos traballadores galegos. Debe haber un control efectivo sobre as axudas recibidas polas empresas, e deben ser axudas vinculadas ao mantemento e a creación de emprego, e a un compromiso de non deslocalización”.
Fajardo criticou duramente a “incapacidade do bipartito para poder optar ao Fondo de adaptación á globalización”, aprobado o pasado 10 de Febreiro pola Comisión Europea, cunha partida orzamentaria de 1,7 millóns de euros destinados á formación e reinserción laboral de traballadores do sector automobilístico, finalmente destinado aos despedidos de Castela e León.
Willy Meyer e Juan Fajardo coincidiron ao sinalar que “o suposto compromiso alcanzado para reducir de 1000 a 500 despedidos para poder acceder ás axudas, foi unha burla, que lonxe de solucionar o problema real dos traballadores que hoxe se atopan en paro, oculta a realidade sufrida en Galicia, onde a cifra real de traballadores que perderon os seus posto de traballo no sector automobilístico durante o 2008 ascende a máis de 3.500 traballadores; e oculta o feito de que máis de 2.000 deles nunca contabilizaron, nin contarán no futuro para recibir este tipo de axudas, xa que se trata de traballadores eventuais” .
Ademais, no marco do plan nacional de axuda á industria automobilística, e fronte á postura adoptada pola UE, Meyer dixo que non se pode construír unha Europa cohesionada no social e no rexional sen intervención pública na económica. É necesario rescatar sectores craves como o naval, o enerxético (eólico -privatizado polo BNG- auga, electricidade, petróleo), e os sectores públicos como corrédevos.” Neste sentido, o eurodiputado de Esquerda Unida comprometeuse a transmitir ao goberno español a súa preocupación sobre a situación que atravesa o sector automobilístico e os seus traballadores e a promover no Parlamento Europeo un debate en sesión plenaria, contando coa participación dos afectados e dos axentes sociais.
Durante a reunión Juan Fajardo e Willy Meyer revisaron distintos proxectos relacionados co desenvolvemento urbanístico en Galicia, como o Plan Xeral de ordenación Urbana de Vigo -que pretende duplicar o número de vivendas na cidade-, e construcións como a urbanización de situada na contorna de “A Tomada” que vulneran abertamente a normativa europea e que deberán ser examinadas á luz do recentemente aprobado informe Auken. Para Fajardo, “o modelo de desenvolvemento turístico do goberno galego centrado nos campos de golf está destruíndo a riqueza da contorna ambiental no que vivimos.” “Estas políticas sumadas á corrupción urbanística están condenando á morte a paisaxe natural galego”- finalizou Fajardo.
Ningún comentario:
Publicar un comentario