Esquerda Unida solicita a mellora das Praias para cans

Nas últimas semanas, o Concello do Grove decidiu modificar a situación das dúas praias caninas que, a petición da nosa agrupación, se crearon o ano pasado. Esta modificación realizouse sen un previo amaño das mesmas, sobre todo na referente á do Porto dos Padroneses (nas Laxes de Róns), na cal non se realizou unha limpeza previa nin conta cos servizos mínimos para atender á normativa de uso, xa que non hai instaladas papeleiras onde os usuarios poidan depositar os excrementos dos cans e outros restos orgánicos.

Por este motivo, o noso concelleiro, Xam Lamelas, realizou unha petición por escrito no rexistro municipal solicitando a mellora das condicións destes areais para que os usuarios poidan utilizalos en condicións. 

 Nota de Prensa:

Esquerda Unida solicita a mellora das praias caninas.

O Grove, 10 de xullo de 2014.- Esquerda Unida solicitou no Concello do Grove a mellora das praias caninas. Veciños e usuarios deste servizo, proposto pola nosa organización o ano pasado, presentáronnos queixas do estado de limpeza das praias caninas, en especial a praia do Porto dos Padroneses, na que ademais dos lixos traídos pola marea se puideron atopar latas de conservas abertas e outro materiais, co conseguinte perigo de cortes para animais e persoas que visitan a praia.

Ademais de solicitar a mellora na limpeza nestes areais, a nosa petición inclúe tamén a demanda de papeleiras, inexistentes no Porto dos Padroneses, o que facilita que se emporque a praia, non só cos refugallos xerados pola presenza humana, senón que tamén dificulta a obrigatoriedade de recoller os excrementos dos animais ao non ter onde depositalos.

Así mesmo, os accesos a estas praias tamén deben ser obxecto de mellora, volvendo a ser o areal situado nas Laxes de Rons o que en peor estado se atopa, con fochas en todo o camiño xerados polo paso continuo de camións que se dirixen non só ás empresas situadas na zona, senón tamén ás obras da EDAR.

Desde Esquerda Unida consideramos que o cambio de situación destas praias, que permiten o espallamento dos cans cos seus donos, non se puido facer de peor xeito posíbel, coa temporada estival comezada e sen un amaño previo dos areais.

Todas estas cuestións foron trasladadas por escrito ao Concello para que se actúe de xeito inmediato, sendo as actuacións necesarias de un custe mínimo para a administración local.

Juan Lamelas Alfonso

Concelleiro de Esquerda Unida