Resposta do voceiro de EU ás declaracións do Concelleiro de Deportes no pleno de novembro

O noso voceiro, José A.Otero, e a concelleira Cristina Domínguez nun pleno

EN RESPOSTA Á INTERVENCIÓN DO CONCELLEIRO DE DEPORTES NO PLENO DO 29 DE NOVEMBRO

Logo do comunicado emitido pola Asociación do Deporte Meco (ADM) en relación ás declaracións do Concelleiro de Deportes no pasado pleno, estou en disposición de responder aos ataques e mentiras emitidas polo Sr. Meis.

No pleno do pasado 29 de novembro, o Sr. Meis, concelleiro de Deportes, intervén no punto de "Rogos e Preguntas" respondendo, supostamente, ás preguntas realizadas por min na sesión anterior. Dicir que, realmente, non dou resposta a esas preguntas porque seguimos sen saber se se está traballando para cubrir a praza da Técnica de Deportes que deixou de forma voluntaria o seu posto hai máis dun mes, e cales serían as consecuencias da ausencia da mesma. Unha das cuestións que máis nos preocupaba, ao igual que aos clubs deportivos. Ao que si respondeu o Sr. Meis foi ás notas de prensa emitidas polo partido que represento (Esquerda Unida) e, en consecuencia, a ADM e demais clubs deportivos da localidade.

Esta resposta confirmou no mesmo pleno a nosa sospeita, que non é outra que a actitude prepotente e maleducada do concelleiro, á que agora lle sumamos a de mentireiro, logo de que a ADM o deixara en evidencia.

Así mesmo no pleno, o Sr. Meis, co seu alarde de superioridade, vociferou contra a miña persoa indicando que lle parecía incrible que “un concelleiro que pretende ser Alcalde non saiba que as bases das subvencións non poden publicarse sen os orzamentos aprobados”. O incrible é que un concelleiro que leva seis anos no cargo tente usar ese argumento pois, ou verdadeiramente é el o que non ten idea, ou tenta enganar á veciñanza. Primeiramente, as bases poden publicarse igual, xa que ata a aprobación das contas do propio ano, o goberno conta con uns orzamentos prorrogados do exercicio anterior, e non é a primeira vez que sucede. O problema xurde cando non se usan as mesmas partidas. No 2020 o equipo de goberno quixo reducir, e finalmente reduciu, a partida de subvencións directas en 22.000€, de 97.000 € (91.000 para os demais de 30 licenzas e 6.000 para os de menos) a 75.000 € (70.000 e 5.000) polo que loxicamente era imposible sacar as bases no primeiro semestre, xa que se verían obrigados a manter os 97.000 € no orzamento (aprobado en outubro). No 2021 volve suceder algo parecido. Esta vez, no orzamento prorrogado xa existe a partida de 75.000 € co que poderían saír as bases no primeiro semestre, pero, como prometeu volver aos 97.000 €, debía agardar á aprobación dos orzamentos do propio exercicio (finalmente o Sr. Meis non foi quen de recuperar os 22.000 € e mantívose o recorte do ano anterior). Aínda así, como ben indica tamén a ADM, escusar o retraso na publicación das bases das subvencións nos tempos trala aprobación do orzamento é rastrero pois, se os orzamentos do 2020 e 2021 se aprobaron tarde foi única e exclusivamente por incompetencia do propio goberno, que, con maioría absoluta, non é quen de aprobar as contas en tempo e forma.

Por outro lado, o Sr. Meis vociferou da mesma maneira para asegurar que non teño idea de como se reparten as subvencións. En primeiro lugar, durante todos os anos que fun secretario dun club,  tiven que lidar coas subvencións, polo que non creo que poida darme leccións. Segundo afirmaba o concelleiro, os que non competiron no 2020 non terían puntos para optar ás subvencións. Ten razón, pero para iso estamos os concelleiros, para procurar solucións e axudar ás entidades locais. E neste caso a solución era ben sinxela: negociar cos clubs, de maneira excepcional, usar nas bases deste ano os baremos do 2019 (última tempada na que competiron de forma regular), co propósito de que en esta tempada, que volven á normalidade, conten con cartos suficientes para poder sufragar os diferentes gastos que teñen, xa mermados pola redución de ingresos en canto a patrocinadores.

Dicirlle ao Sr. Meis que si, que este concelleiro que se presentou a Alcalde, e pode que o volva facer no 2023, e as persoas que forman parte de Esquerda Unida O Grove, sabemos de sobra como funciona a administración local, pero sobre todo sabemos como procurar solucións para as trabas que se van sucedendo no camiño co propósito de axudar e prexudicar o máis mínimo ás entidades, asociacións e/ou á propia veciñanza. Vostede demostrou que non. O que si evidenciou foi a súa prepotencia, a súa mala educación, as súas formas ameazantes, os seus enganos e as súas mentiras. Quizais vaia sendo hora de que presente a súa dimisión.

Por certo, no Grove igual hai 22 clubs deportivos e a ADM representa a tan só 8, pero eses 8 albergan o 90% das fichas federativas de base, e 7 entran dentro dos 9 que optan aos 70.000 € das subvencións deportivas. Algo terán que dicir e, cando menos, merecerán un respecto, o cal nós si lle temos.

O Grove, 7 de decembro de 2021.

José Antonio Otero González

Voceiro do Grupo Municipal de Esquerda Unida 

 

DATOS DE INTERESE

Intervención do Concelleiro de Deportes no punto de Rogos e Preguntas:

https://youtu.be/XYEHsd2lCiU?t=10196

Comunicado emitido pola Asociación do Deporte Meco

https://m.facebook.com/story.php?story_fbid=10157911351846213&id=87073556212

TÁBOA EVOLUCIÓN ORZAMENTOS SUBVECIÓNS
Subvencións clubs deportivos con máis de 30 licenzas
2019	2020	2021
91.000 €	70.000 €	70.000 €
Subvencións clubs deportivos con menos de 30 licenzas
2019	2020	2021
6.000 €	5.000 €	5.000 €
Subvencións eventos deportivos
2019	2020	2021
25.000 €	5.000 €	10.000 €

 

EU considera unha burla a subida salarial do Concelleiro de Deportes

O goberno aprobará unha dedicación do 50% para o Concelleiro de Deportes con unha retribución de 17.000 € brutos anuais.

Os esquerdistas non entenden que, tralas numerosas críticas á súa labor ao fronte da concellería de Deportes, o Alcalde o compense cunha subida salarial.

O Grove, 25 de novembro de 2021.- O vindeiro luns, o pleno do Concello do Grove aprobará previsiblemente –dada a maioría absoluta do goberno– o aumento da dedicación exclusiva do Concelleiro de Deportes e con iso unha suba na súa asignación salarial. Será un aumento da súa dedicación parcial, pasando dun 25% da xornada a un 50%, obtendo un aumento na súa retribución anual bruta de 7.000 € (17.021,06€) repartidos en 14 pagas. Esta circunstancia é tachada polo grupo municipal de Esquerda Unida como unha burla, pois entenden que “cando máis acrecentan as críticas cara o concelleiro por parte dos clubs deportivos, debido ao desleixo mostrado cara o deporte local, o Alcalde prémiao cunha subida salarial”.

Cabe recordar que a principios de mes, os clubs pertencentes a Asociación do Deporte Meco (ADM) lanzaron un comunicado no que afirmaban sentirse “ninguneados” polo goberno municipal. No mesmo, mostraban o seu malestar co Alcalde e o Concelleiro de Deportes logo de ver como se mantiña, por segundo ano consecutivo, a redución na contía para as subvencións deportivas tras afirmar que este ano se recuperarían os 96.000 €. Tamén criticaban a tardanza na saída das bases para esas subvencións, pois prometéraselle publicalas no primeiro trimestre e saíron no cuarto, e tachaban de menosprezo o feito de non atender as peticións de reunións, namentres os chamaban para organizar eventos como o campamento deportivo de verán. Esta situación foi tamén denunciada por Esquerda Unida que, tras intervir no pleno e reunirse coa ADM, a pasada semana enviaba á prensa un comunicado tachando de desdén o trato do goberno municipal ao deporte local.

Esta non é a única crítica que dende os esquerdistas se ten lanzado cara o Concelleiro de Deportes, pois tal e como recorda o seu voceiro, José Antonio Otero, “no anterior mandato e neste, son numerosas as ocasións nas que temos denunciado as accións e actuacións do concelleiro”. Otero recorda que “xa temos denunciado o cobro ilegal polo uso das Pistas de Pádel e as burlas e enfrontamentos co club, pedido en innumerables ocasións a convocatoria do Consello Local do Deporte para a renovación dos cargos, denunciado o abandono de instalacións deportivas ou retraso nas obras do Club de Remo Mecos”. Unhas críticas que exceden o político, como mostran as denuncias feitas polos propios clubs, o de Pádel no seu momento e os da ADM nesta última ocasión, polo que os esquerdistas non entenden que no lugar de terlle retirado as competencias ao concelleiro delegado, o Alcalde o compense con un aumento das súas retribucións.

Gabinete de Prensa

Esquerda Unida O Grove

EU tacha de desdén o trato do goberno municipal ao deporte local

 

Os esquerdistas seguen agardando polas repostas ás preguntas realizadas no último pleno. Entenden que a renuncia da técnica de Deportes provoca unha parálise no departamento que vai afectar ao reparto das subvencións.

Logo de reunirse coa ADM, Esquerda Unida considera que o Concelleiro de Deportes menospreza aos clubs deportivos, mentiulles no orzamento e provócalles dificultades económicas ao publicar as bases das subvencións no último trimestre, polo que piden un “cambio de actitude cara o deporte local ou que presente a súa dimisión”

O Grove, 20 de novembro de 2021.- A agrupación local de Esquerda Unida considera que o goberno municipal actúa cos clubs deportivos con un total menosprezo, indiferenza e desconsideración, e que o Concelleiro de Deportes mostra unha falta de interese e desidia co deporte local.

A principios deste mes de novembro, a Asociación do Deporte Meco (ADM) denunciaba publicamente o seu malestar polo incumprimento dos acordos cos clubs deportivos, polo recorte nas subvencións deportivas e pola falta de diálogo e compromiso do executivo.

O grupo municipal de Esquerda Unida, que xa ten interpelado en numerosas ocasións sobre asuntos relacionados do deporte, fíxose eco das críticas da ADM e, a través do seu voceiro, José Antonio Otero, no pleno do pasado día 2, criticaron novamente a redución das subvencións deportivas –xa o fixeran no debate dos orzamentos– e preguntaron o motivo polo que se publicaron as bases, por segundo ano consecutivo, no derradeiro trimestre do ano, cando o habitual era facelo no primeiro ou segundo. Para Otero este retraso na publicación leva ás directivas a “ter que apurar o seu traballo, ante o axustado dos tempos, pero sobre todo, provoca que os clubs non conten con efectivo, cando máis o precisan, máxime logo dunha pandemia na que os ingresos publicitarios se viron reducidos drasticamente”.

Así mesmo, o voceiro esquerdista interesouse polas consecuencias que causaría a renuncia da Técnica de Deportes e preguntou se se estaba traballando para cubrir o máis axiña posible a praza, pois entende que “é preciso contar con persoal para traballar no día a día do deporte local, pero sobre todo para resolver os trámites das subvencións”.

Os esquerdistas recordan que o Concelleiro de Deportes non dou resposta a ningunha das cuestións e afirmou que daría debida conta das mesmas a través do correo electrónico. Máis de 15 días despois, Otero indica que “non recibimos tal correo, nin sequera unha chamada para darnos as explicacións oportunas, o que demostra unha falta de respecto absoluto cara os membros da oposición e a indiferenza que lle causa ao concelleiro as nosas preocupacións, que non deixan de ser as dos propios clubs”.

Otero afirma que “esa falta de respecto e indiferenza que ten con nós, tamén a ten cos clubs deportivos”, pois así llo trasladaron as directivas das entidades pertencentes a ADM, cos que Esquerda Unida se reuniu unha semana despois do pleno. Nesa xuntanza, trasladaron aos esquerdistas as problemáticas coas que se atopan ao retrasarse tanto o reparto das subvencións pois, segundo lles relataron, chegan moi tarde, cos tempos moi xustos e con novas modificacións que afectan considerablemente ás xustificacións.

Segundo Otero, “os  clubs criticaron as actitudes e desconsideración do Concelleiro de Deportes xa que, ademais de non cumprir co compromiso de recuperar a partida orzamentaria reducida no 2020, mostrou unha falta de diálogo e negociación para tratar as bases das subvencións”, pero o máis grave para o esquerdista, e que ”polo que nos din, tampouco atende á petición de xuntanzas que a ADM ten formulado en varias ocasións”. Unha actitude que sorprende aos esquerdistas pois “agardabamos obter dos clubs as respostas que non tivemos no pleno, e resultou que eles buscaban esas respostas en nós, agardando que nos tivera respondido por e-mail como prometera”, sentenza Otero.

Tamén houbo críticas polo estado en que se atopan moitas das instalacións deportivas do municipio, “polo visto as canastras do pavillón de Conmeniño non se poden utilizar e na cantina do Campo de fútbol de Lampáns entra auga” indica Otero, que tamén denuncia o retraso da obra de adaptación do club de Remo Mecos, “que tiña que estar rematada hai máis dun ano e que está a ocasionar problemas aos directivos e deportistas do club”.

Deste modo, Esquerda Unida quere denunciar este desdén aos clubs e esixe ao Concelleiro de Deportes “respostas e un cambio de actitude cara o deporte local e se non está capacitado para facer ben o seu traballo que presente a súa dimisión”.

Gabinete de Prensa

Esquerda Unida O Grove