Esquerda Unida móstrase molesto por non ser convidado ao izado da bandeira representativa do colectivo LGTBIQ e pregunta que ten feito o goberno no seu favor nestes últimos anos

Onte conmemorouse o 50 aniversario das revoltas de Stonewall en New York en 1969. O colectivo LGTBIQ leva dende entón defendendo os seus dereitos e loitando para que a orientación sexual e as diferenzas de identidade de xénero deixen de ser un estigma social. As súas reivindicacións están de actualidade máis que nunca por mor dos discursos homófobos das formacións políticas de dereitas que fomentan todo tipo de mentiras e prexuízos sobre este colectivo.

En maio de 2016 o grupo municipal de Esquerda Unida O Grove levou a pleno una moción que foi aprobada por unanimidade e na que instaba ao goberno local a adquirir a partir dese momento un compromiso cos veciños do Grove para que a nosa vila sexa un lugar libre de discriminación por orientación sexual, diversidade de xénero e diversidade familiar.

A día de hoxe non sabemos que ten feito o goberno neste senso alén de colgar a bandeira representativa do colectivo no balcón do Concello á media mañá do día da celebración do Orgullo LGTBIQ. Nesa moción, ademais de pedir que se colgase a devandita bandeira en apoio ao colectivo, instábase a que o Concello fomentara o asociacionismo LGTBIQ reivindicativo para lograr o seu fortalecemento e crecemento, promover o coñecemento e compromiso coa loita contra a LGTBIfobia entre o persoal laboral da administración local e sobre todo das forzas e corpos de seguridade a través de cursos de formación, apoiar e difundir as convocatorias dos colectivos LGTBIQ, promover charlas nos institutos da campaña da FedLGTB “escolas sen armarios”,... Dende Esquerda Unida temos o convencemento de que hai que seguir traballando para eliminar todo tipo de discriminación cara este colectivo e queremos recordarlle ao goberno que os compromisos adquiridos son para cumprilos porque é unha obriga que temos coa veciñanza.

A LGTBIfobia debe ser combatida por todos nós e polas administracións públicas. Cunha lexislación que fomente a igualdade e liberdade, que defenda unha da sociedade plural e respectuosa con todas as persoas, e que garanta unha vida digna ao colectivo LGTBIQ.

Así mesmo, dende Esquerda Unida mostramos o noso malestar polo que consideramos unha falta de respecto á nosa organización e aos membros da oposición en si, ao non ser convidados ao izado da bandeira representativa do movemento LGTBIQ no día de onte. Unha circunstancia que xa se ven dando nos últimos dous anos. O alcalde no acto de investidura resaltou a importancia do acto de gobernar fronte ao de mandar, destacando o traballo das 17 persoas que forman a corporación. Que os grupos da oposición tivesen presenza no acto de colocación da bandeira arco iris no balcón do concello puido ser una boa forma de demostra que non eran solo verbas. Sobre todo porque a moción que dou lugar ao acto de hoxe presentouna o noso grupo municipal de Esquerda Unida.

Puntos de acordo aprobados por unanimidade no pleno de maio de 2016

1- Contribuír, nas competencias que lle son propias a este Concello, ao desenvolvemento e aplicación de todas as medidas previstas na lexislación vixente contra toda discriminación por orientación sexual, identidade de xénero e diversidade familiar, coa finalidade de erradicar da nosa sociedade calquera tipo de LGTBfobia no ámbito familiar, escolar, laboral, social e/ou político.

2- Fomentar as condicións de posibilidade para o fortalecemento e o crecemento do asociacionismo LGTBI reivindicativo, entendendo a este como un protagonista clave na loita contra a homofobia, transfobia, bifobia e lesbofobia.

3-  Promover o coñecemento e o compromiso coa loita contra a LGTBfobia entre o persoal laboral da administración local, especialmente entre os corpos policiais, a través de campañas de sensibilización e cursos de formación desenvolvidos polos propios colectivos.

4- Apoiar e difundir as convocatorias contra as agresións que realizan os colectivos LGTBI en todos os espazos que competen á administración local, especialmente nos lugares de lecer, educativos, asistenciais, administrativos e de transporte.

5- Garantir atención integral a todas as persoas que sufriron discriminación ou que foron obxecto dun delito de odio, con especial atención aos colectivos máis vulnerables.

6- Recoñecer a determinante contribución de todas aquelas persoas e colectivos que veñen defendendo durante décadas os dereitos de lesbianas, homosexuais, transexuais e bisexuais.

7-  Estender, durante o día 28 de xuño, día internacional do orgullo gai, unha ensina coas cores da bandeira arco iris, representativa do colectivo LGTB, na fachada principal do edificio do concello, xunto ao resto de bandeiras institucionais.

8- Instar á Xunta ao cumprimento das 5 recomendacións urxentes da Valedora do Pobo. Así, urxe a existencia dun documento transitorio de identidade para os maiores de idade no que se recolla o seu nome elixido sen ter que esperar ata “dous anos” para ese cambio; así como cambiar no nome nos cartóns sanitarios de menores transexuais. Maior pedagoxía en escolas; aumentar a formación de profesionais da educación, sanidade e administración; e desenvolvemento dun protocolo de Atención Primaria no Sergas para asistir de “forma certa e segura”. Paso previo dunha lei galega de igualdade e diversidade.

9- Convidar a FELGTB, ou no seu caso galega, a realizar charlas nos institutos da súa campaña “Escuela sin armarios” (www.escuelasinarmarios.com)

Esquerda Unida solicita a documentación actualizada do PXOM

José Antonio Otero indica que o Alcalde comprometeuse en campaña a entregar a documentación corrixida do Plan Xeral á oposición e subila á web.

Dende Esquerda Unida recordan que o publicado na páxina do Concello e en diversos locais públicos non se corresponde coa planimetría real do PXOM.

O Grove, 20 de xuño de 2019.- Esquerda Unida afirma que o pasado 17 de maio, en plena campaña electoral, un medio comarcal publicou unha entrevista realizada ao candidato do PSOE e Alcalde do Grove, José Cacabelos, onde indicaba que neses días se estaban aplicando as correccións de mais de 150 erros detectados polos veciños e veciñas e aseguraba que ía mandar á oposición toda a documentación cos erros xa corrixidos e que nos días vindeiros –á realización da entrevista– se ía subir á web para que se puidese consular por toda a veciñanza.

O voceiro de Esquerda Unida, José Antonio Otero declara que “Non sabemos cantos días corresponden no calendario de Cacabelos a vindeiros, pero xa contando dende a publicación da entrevista (17 de maio) pasou un mes e nin a oposición temos a documentación, nin a veciñanza ten coñecemento de si as súas reclamacións foron atendidas ou non, pois o PXOM que segue colgado na web segue a ser o mesmo que contiña os erros”.

Esta é unha situación á que, segundo Otero, os ten habituado o Sr. Cacabelos, “pois no mandato que rematou foi constante o número de veces que anunciou datas para innumerables asuntos e logo non se cumpriran os tempos ou simplemente non se facían”. “E vendo este novo incumprimento, esta vez tralo anuncio en campaña electoral, entendemos que sufriremos esta situación outros catro anos máis”, subliña o voceiro esquerdista.

Para Esquerda Unida, xa non valen as escusas, pois “si non o tiña listo non debería ter anunciado datas, e si realmente está xa corrixido e listo para amosar, non sabemos a que agarda. Non nos vale a escusa das eleccións, pois salvo que siga de resaca electoral, o goberno non cambiou e non foi preciso unha adaptación como sería habitual si houbese un novo equipo ao mando”.

Por ese motivo, os esquerdistas solicitan que se lle entregue a nova planimetría cos erros xa corrixidos e se publique canto antes na web para que os veciños poidan comprobar que os cambios foron realmente realizados.

Gabinete de Prensa

Esquerda Unida O Grove

Ler entrevista do Diario de Arousa do 17 de maio de 2019.

Esquerda Unida rexeita o depósito dos lodos do dragado do Lérez nas proximidades de Sálvora

A agrupación local de EU amosa o seu apoio á Plataforma en Defensa da Ría de Arousa na súa manifestación en contra da decisión de Portos de Galicia.

Instan a Cacabelos a reunir ás concelleiras e concelleiros trala conformación da nova corporación para facer unha declaración institucional opoñéndose ao depósito dos lodos do dragado do Lérez na boca da ría.

O Grove, 12 de xuño de 2019.-  Trala noticia dos últimos días na que se indicaba que Portos de Galicia autorizaba a depositar os lodos, que se retirarán do dragado do río Lérez, nas proximidades da Illa de Sálvora, Esquerda Unida mostra o seu rexeitamento a esta medida que consideran prexudicial para os intereses da ría de Arousa.

Os esquerdistas non entenden que o órgano dependente da Xunta de Galicia tome esta medida logo de que as confrarías de Pontevedra se opuxeran ao depósito dos lodos preto de Tambo, que era a primeira opción. Entenden que si é prexudicial para a ría de Pontevedra, máis o será para a de Arousa que é unha das máis produtivas do estado e instan á Consellería do Mar a valorar, de forma consensual cos sectores implicados, unha alternativa que non prexudique aos sectores produtivos, ao medio ambiente e ás rías galegas.

Esquerda Unida mostra o seu apoio á Plataforma en Defensa da Ría de Arousa nas súas reivindicacións e insta a Cacabelos a que a primeira medida que tome trala conformación da nova corporación e a toma de posesión como Alcalde, sexa a de convocar a todas as concelleiras e concelleiros para realizar unha declaración institucional apoiando as reivindicacións da PDRA, das confrarías e das asociacións de produtores da Ría de Arousa en contra desta decisión polo risco que este ataque ao noso medio natural supón para os recursos pesqueiros e a economía da zona.

Gabinete de Comunicación

Esquerda Unida O Grove

Oposición construtiva e estar ao lado da veciñanza, comenda da militancia aos concelleiros e á organización.

A pasada semana, a coordinadora local reuniuse coa candidatura e a militancia para analizar os resultados emanados do proceso electoral do pasado 26 de maio e marcar a liña de traballo para o novo mandato. Dende Esquerda Unida queremos compartir as nosas conclusións;

Os resultados acadados pola nosa formación foron óptimos, logramos mellorar lixeiramente o número de apoios e mantemos as dúas actas que posuíamos.

Certamente o noso obxectivo era sumar máis actas, máxime cando no 2015 quedamos a escasos trinta e nove votos de obter a terceira. Desta volta, a pesar de baixar a participación (2,44 puntos menos) e termos subido lixeiramente en apoios, non logramos o aumento de representación, quedando novamente a escasos votos de acadar esa terceira acta.

Fomos a única forza da catro que formábamos a oposición que no tanto de perder apoios, logramos aumentalos. Isto non se produciu por inercia, senón polo traballo realizado estes catro anos como grupo referente da oposición, levando propostas e sendo fiscalizadores do traballo do goberno. Un traballo que, a pesar de consideralo bo, non logramos que chegara a toda a veciñanza –así nolo transmitiron–, polo que non podemos máis que considerar óptimos os resultados obtidos.

Por outro lado, dende Esquerda Unida entendemos o ascenso do PSOE derivado de tres factores. O primeiro debido á tendencia a alza producida polas eleccións xerais –sucedeu o mesmo no 90% dos concellos do estado–, en segundo lugar polo seu traballo de marketing e visualización dende o goberno, a pesar de que os feitos non son reais, e en terceiro lugar, polo descenso dos demais grupos da oposición. No caso do Partido Popular, que contaba con catro concelleiros e pasou a 3, non fixo oposición ningunha estes catro anos, polo que non só non foi quen de recuperar o electorado que perdera no 2015 a raíz do PXOM, senón que aumentou considerablemente esa perdida de votantes. O mesmo sucedeu con BNG e PGD. A partir de agora agárdanos un panorama complexo, pero non moi diferente ao vivido estes dous últimos anos, pois o PSOE xa contaba con maioría absoluta –co apoio cegado do PGD–.

A militancia e simpatizantes márcannos unha ruta pola que o grupo municipal e a organización se debe rexer estes catro anos; realizar un traballo de oposición construtiva, fiscalizadora e aportando propostas que melloren os servizos públicos e a calidade de vida da veciñanza; e estar máis na rúa, ao lado das veciñas e veciños, colectivos, asociacións... manter un contacto máis constante e ser a súa voz si así o requiren. Dende a agrupación local asumimos, como non pode ser doutro modo, ese mandato e porémonos a traballar dende xa.

Ao goberno pedímoslle transparencia, diálogo e traballo. O primeiro é que faciliten a documentación do PXOM á oposición e que lla mostren á cidadanía, tal e como anunciou en campaña. Tras isto que aprobe o documento urbanístico neste ano. Non ten escusas para levalo adiante, aínda que tampouco as tiña antes, pois ningún grupo da oposición puxo impedimentos na labor do goberno.

Instamos tamén ao goberno a poñer en marcha a construción do Centro de Día e o seu funcionamento cunha xestión pública, así como a cesión dos terreos á Xunta de Galicia para que se comprometan á construción do Centro de Saúde. Por outro lado este goberno debe pechar a negociación da RPT e sacar a oferta pública de emprego, cubrir os postos da policía local e poñer a funcionar o servizo 24 horas,... en definitiva, cuestións que a pesar de poder ter realizado sen ningún problema durante os pasados catro anos, deixou de lado e incluso acusou á oposición e outras administracións de ter paralizado.

A Coordinadora Local de Esquerda Unida O Grove

Consulta a nosa web electoral

Nova web para as Eleccións Locais 2019

Consulta Programa e as Candidatas e Candidatos de Esquerda Unida
Realiza propostas ao programa ou consulta os actos.

http://locais2019.euogrove.es

EU denuncia ante a Xunta Electoral que o PSOE empregue a alcaldía con fins electorais

A formación reclama a adopción das medidas oportunas ante o acto convocado por Cacabelos para facer propaganda da xestión municipal

O Grove, 25 de abril de 2019.- Esquerda Unida ven de presentar ante a Xunta Electoral de Zona de Cambados unha reclamación polo uso electoralista das institucións municipais que pretende realizar o PSOE. A formación denuncia que o goberno local socialista empregue o Concello como un instrumento de propaganda. E reclama a adopción das medidas oportunas ante a convocatoria dun acto co que o alcalde está a saltar de xeito obvio e descarado o Réxime Electoral Xeral. 

Esquerda Unida solicita que a Xunta Electoral actúe ante a charla anunciada polo alcalde para falar do PXOM, o auditorio e o centro de día. A formación denuncia un evento co que o goberno de Jose Cacabelos incumpre o artigo 50.2 da Lei Orgánica 5/1985, de 19 de xuño, de Réxime Electoral Xeral. Punto onde se indica textualmente que “desde a convocatoria das eleccións e ata a celebración das mesmas queda prohibido calquera acto organizado ou financiado, directa ou indirectamente, polos poderes públicos que conteña alusión ás realización ou logros obtidos”. 

Habida conta de que a convocatoria de eleccións foi publicada no BOE o pasado 2 de abril, Esqueda Unida denuncia que o PSOE pretenda saltar a lei nalgo tan obvio e de xeito descarado. “Se con isto actúa deste xeito, que non se terá feito na opacidade do despacho do alcalde, por onde Cacabelos mandou desfilar a todo veciño preocupado polo PXOM”, critica a formación. 

EU entende que a nomeada charla non é outra cousa que un mitin con intencións electoralistas. Un acto co que o PSOE pon de manifesto a súa visión das institucións como un instrumento que empregar en beneficio propio en lugar de ao servizo da veciñanza. 

EU presenta a súa candidatura para impulsar no Grove “un goberno social que escoite á xente”

O Grove, 20 de abril de 2019.- Esquerda Unida Esquerda Unida vén de aprobar en asemblea a que será a súa candidatura nas vindeiras eleccións municipais do 26 de maio.

A lista, tal e como aprobara a agrupación de esquerdas hai varios meses en primarias, será liderada polo actual concelleiro da corporación municipal José Antonio Otero González. Seguiráo na lista a responsable local da Área de Muller de Esquerda Unida Cristina Domínguez. Quen desenvolve a súa actividade social no movemento feminista, ademais de participar tamén no tecido cultural local a través de Paradanda-Mecos.

O tamén actual concelleiro da agrupación Juan Lamelas ocupará a terceira posición da candidatura. Quen encabezara a lista de Esquerda Unida hai catro anos continúa a súa actividade política arroupando ao candidato José Antonio Otero, quen xa o relevou non soamente na cabeza de cartel dos esquerdistas senón tamén como coordinador local de EU.

A técnico en turismo Susana Millán e o sindicalista de CCOO Antonio Gondar completan os cinco primeiros postos da candidatura de Esquerda Unida.

Desde a organización de esquerdas salientan que esta lista que presentan ás eleccións municipais é a candidatura que mellor representa a sociedade do Grove. "Esta é unha candidatura de traballadoras e traballadores, de xente que vive e traballa no Grove e coñece a realidade do noso Concello"."Saímos a gañar. Esquerda Unida presentámonos a estas eleccións municipais como alternativa de goberno para O Grove en contra do despotismo e a imposición do PSOE”, asegura a formación.

Os esquerdistas poñen en valor a súa oferta política fronte aos valores e o modelo de xestión que representan o PP e o PSOE. “No Grove son o mesmo can con distinta cadea”, critica EU. Que enfronta as eleccións municipais de maio coa intención de ser a alternativa para formar "un goberno que escoite á xente, un goberno social, que fomente a creación de emprego, con políticas sociais e polo bo funcionamento dos servizos públicos".

Unha vez feita pública a lista electoral para os comicios de maio, nos vindeiros días Esquerda Unida irá dando a coñecer o seu programa electoral á venciñanza.

Lista completa:

 1- JOSE ANTONIO OTERO GONZALEZ

 2- ANA CRISTINA DOMINGUEZ DOMINGUEZ

 3- JUAN LAMELAS ALFONSO

 4- SUSANA MILLAN PROL

 5- JOSE ANTONIO GONDAR TRIÑANES

 6- MARIA ISABEL MONTENEGRO FONTOIRA

 7- DAVID GONDAR PRIETO

 8- PATRICIA VILAR PEREZ

 9- JUDIT TRIÑANES LOIS

10- EDUARDO GARCÍA IGLESIAS

11- SONIA GONDAR GONDAR

12- ANA ISABEL VISO VAZQUEZ

13- FRANCISCO MIGUEZ GUILLAN

14- AMELIA SOUTULLO FIGUEIRO

15- JOSE ANTONIO TABOADA MAGDALENA

16- MARIA CARMEN GONDAR TORRES

17- MARIA LEONOR SOILAN CALVO

S1- JOSE MANUEL BOULLOSA PRIETO

S2- ELVIRA VARELA GONDAR

S3- GONZALO BEA MONTENEGRO

EU denuncia a continua improvisación do PSOE e reclama un plan de mobilidade consensuado, realista e con visión de conxunto

A formación reclama un PMUS exhaustivo, que teña en conta as achegas de expertos e axentes sociopolíticos e que permita trazar unha folla de ruta clara para o conxunto do casco urbano

Critica as decisións unilaterias e sen fundamento do goberno local, así como os problemas de tráfico xerados por peonalizacións e cambios de sentido impulsados sen ter en conta as característias do conxunto da rede viaria

O Grove, 21 de marzo de 2019.- Esquerda Unida denuncia a continua improvisación do PSOE no que a mobilidade e tráfico se refire, e insta ao goberno local a actuar con responsabilidade e a impulsar o Plan de Mobilidade Urbana Sostible que O Grove precisa. A formación denuncia os problemas circulatorios causados polas ideas inconexas do grupo de Jose Cacabelos, que continúa amosando a súa incapacidade de impulsar un PMUS rigoroso e con visión de conxunto e apostando por parches e solucións a salto de mata para solventar problemas que el mesmo creou.

EU insta ao goberno local a deixar de lado a improvisación e a dar forma a un Plan de Mobilidade Urbana realista e ben fundamentado, que teña en conta as características do conxunto da rede viaria grovense e que realmente permita rematar cos problemas de tráfico que esta padece. Moi lonxe de avanzar nesa dirección, e a pesar das continuas reclamacións do grupo de Esquerda Unida ao respecto, o alcalde continúa anunciando cambios illados e decididos de xeito unilateral. “O goberno local estase escudando nun Plan de Mobilidade Urbana Sostible para realizar peonalización e cambios de sentido e solicitar subvencións, cando en realidade non se ten avanzado nada dende a aprobación hai dous anos do documento base. Un documento que indicaba como primeiro paso para o avance do PMUS a participación tanto cidadá como política, coa creación de grupos de traballo onde estean representados os partidos e representantes sociais, económicos, laborais e medio ambientais. Así como unha comisión composta por técnicos en materia de transporte e urbanismo, medio ambiente, integración social e representantes do transporte público. Todo isto contando coa implicación do público, representado por diferentes colectivos relacionados coa mobilidade, pois a cidadanía é a clave en todo o proceso de elaboración, implantación  e seguimento do PMUS”, explica o responsable local de EU.

Moi lonxe de avanzar nesa senda, o alcalde anuncia agora a súa intención de invertir o sentido de circulación no Paseo de Lordelo para solucionar un problema que el mesmo provocou. “Estamos ante unha nova decisión de Cacabelos ao tun tun, que atende á un intento de solventar un problema ocasionado pola súas decisións sen planificación”, indica José Antonio Otero, que lembra as advertencias que Esquerda Unida xa realizou no pasado en relación ao incremento do tráfico e os problemas que o peche dun sentido de circulación no primeiro treito de Alexandre Bóveda ía ocasionar en ruelas da contorna como Sol, Raposeira, Dornas, Horta do Río ou Avenida de Hortos. Rúas estreitas que non estaban preparadas para acoller a densidade de tráfico provocada polas ocorrencias do PSOE. “Daquela non se nos fixo caso, e mesmo se nos tentaba atacar por esas advertencias. Agora é o propio alcalde o que tenta xustificar o cambio de sentido do paseo de Lordelo para reducir o tráfico nesas mesmas rúas que, como xa dixemos, el mesmo provocou”.

Chegamos a este punto, Esquerda Unida advirte das consecuencias desta nova decisión apresurada, “pois derivar a circulación cara ao Corgo vai provocar continuos caos na zona portuaria, máxime en días de mercado e peches da praza por festas como o Carme e o Marisco. E todo isto por non traballar o Plan de Mobilidade de forma consensuada e tomar as decisions en base a unha planificación organizada”.

Esquerda Unida  insta ao goberno local a actuar con rigor e a impulsar a posta en marcha do PMUS. “Levamos dous anos solicitando as devanditas xuntanzas e atopándonos con continuas escusas dende o executivo local. E o que é peor: con modificacións e anexos ao PMUS e, como se está vendo neste último ano, propostas de modificacións de rúas e estradas impulsadas sen tan sequera ter reunido a políticos e veciños previamente”.

A formación considera imprescindible elaborar canto antes un plan de mobilidade no que participen técnicos de mobilidade, Policía Local, Garda Civil e servizos de emerxencias, así como actores sociais e partidos politicos. “Que sexa eleborado en conxunto, en consenso  (un factor moi importante, pois dará lugar a que todos estaremos implicados e calquera goberno futuro continuará traballando sobre esa mesma base). E, sobre todo, que estea orzamentado. Unha elaboración global que “vai a marcar o camiño a tomar e sobre todo por onde comezar para non crear un caos circulatorio. Non sucede isto agora, cando foi aprobado un plan que marcaba esas pautas, pero que se usou para que o goberno movera e queira seguir movendo direccións. Para penalizar rúas a golpe de ocorrencias, ocasionando caos circulatorio e prexuizos para a veciñanza”, denuncia EU, que anima a traballar en colaboración coa veciñanza e cunha programación clara.

Feminismo para mudalo todo

Manifesto da área de Muller de Esquerda Unida

8 de marzo de 2019

 

A centralidade do mundo está a cambiar. As milleiros de mulleres indias, arxentinas, estadestadounidensesnses ou chilenas que loitan xuntas contra unha situación insostible de precariedade, opresión, violencia e invisibilización, compoñen un movemento global imparable ao longo e ancho do planeta. Con lemas como “Nin unha menos” converten os sentimentos de rabia e inxustiza, en loita organizada, construíndo unha alternativa fronte ao capitalismo e o patriarcado que, do mesmo xeito que estes, quere abarcar todas as esferas da vida. 

O feminismo lanza unha mirada subversiva e estrutural ao neoliberalismo, e actúa colectiva e de forma solidaria contra o marco individualista e fragmentado que se instaurou nesta sociedade á vez global e dividida. En toda a nosa diversidade, as feministas recoñecémonos irmás e aprendemos e loitamos contra as diferentes opresións que sufrimos por cuestión de clase, raza ou orixe, diversidade sexual, identidade e/ou expresión de xénero, diversidade funcional ou idade. Todas xuntas polos dereitos de todas! 

O movemento feminista é o mellor exemplo de unidade popular que temos en Galicia e no Estado. É a posta en práctica do traballo colectivo desde abaixo, para construír -a partir do que nos une- unha forza transformadora. Os partidos políticos debemos aprender moito do movemento feminista para incorporar as súas estratexias e formas de traballo á nosa actividade política, organizativa e propositiva. En Esquerda Unida adquirimos ese compromiso, desde o convencemento de que a nosa organización política ten que verse transformada pola visión transversal do feminismo. 

O feminismo que se clama nas rúas é un feminismo anticapitalista, radical e subversivo que non deixa indiferente a ninguén. Vimos este ano moitas reaccións en contra da construción do mundo que queremos as mulleres. Pero á vez, novas capas de mulleres están a unirse á loita feminista, facendo dela un movemento masivo e internacionalista e isto tórnao perigoso para quen defende esta sociedade desigual e inxusta desde o medo e o odio. 

Neste contexto, as feministas lonxe de sentirnos acurraladas ou defendendo unha Lei Contra a Violencia de Xénero insuficiente e sen a dotación orzamentaria necesaria que, por exemplo, destina cantidades irrisorias aos municipios, avanzamos no noso camiño. Non nos desviaremos do noso obxectivo: querémolo todo. 

Desde Esquerda Unida non temos dúbidas, o feminismo non é só a loita das mulleres, é un prisma que amplifica as nosas loitas, interpelando directamente ás realidades materiais de quen máis sofren e creando alianzas e estratexias para cambiar as desigualdades que vivimos día a día as clases populares. 

Para iso necesitamos a forza de todas e de todos, tamén dos nosos compañeiros que, como aliados, teñen espazo na folga feminista e deben realizar un compromiso colectivo e mantido no tempo para repensar o seu rol na sociedade e de que forma poden achegar ao cambio social desde a súa vida diaria e a súa militancia, demostrando que outra masculinidade é posible. 

E é precisamente ese, un dos grandes logros do movemento feminista, elevar a conciencia colectiva para cuestionar as bases do sistema capitalista, patriarcal e colonialista. O feminismo é o exemplo de que é posible cambiar as cousas desde abaixo cunha alternativa transformadora para unha sociedade xusta, libre, solidaria e igualitaria. 

Compañeiras e compañeiros, neste proceso de acumulación de forzas, o 8 de marzo adquire un novo significado coa folga feminista: Feminismo para mudalo todo.

Esquerda Unida solicita explicacións sobre o posible funcionamento irregular da Escola de Música

O Concello aínda non sacou a concurso a adxudicación do servizo, a pesar de que o contrato polo que se rexe o funcionamento do centro municipal xa finalizou

A formación solicita información detallada sobre o estado do procedemento e insta ao goberno local a garantir a continuidade das ensinanzas musicais dentro da legalidade

O Grove, 15 de febreiro de 2019.- O grupo municipal de Esquerda Unida alerta do posible funcionamento irregular da Escola de Música e insta ao Concello a garantir a continuidade das ensinanzas musicais que presta o centro municipal, de acordo coa legalidade vixente. A pesar de que o contrato do servizo finalizou o pasado mes de novembro, o goberno local non ten iniciado o procedemento para acometer a nova adxudicación do mesmo. Motivo polo cal EU insta ao goberno local a explicar a situación e a axilizar os trámites que puideran ser precisos para restablecer a legalidade.

Esquerda Unida amosa a súa preocupación sobre a posible situación irregular da Escola de Música, así como sobre as consecuencias que esta puidera ter sobre o funcionamento do centro. En  novembro  finalizou  o  contrato  de  dous anos  dun  servizo que, de acordo cos prazos do mesmo, adoitaba sacarse a concurso contra o mes de outubro. Sen embargo, de acordo coa información dispoñible, este ano o Concello non acometeu aínda o necesario procedemento para a renovación do servizo.

O prego de condicións para a licitación do servizo da Escola de Música Municipal non figura non na web de Contratos Públicos de Galicia nin en ninguna das actas da Xunta de Goberno de finais de ano. Motivo polo cal Esquerda Unida teme que o centro puidera estar funcionando de xeito irregular, ou mesmo ver comprometida a súa continuidade. 

Aínda que xa hai quince días que a formación que lidera José Antonio Otero solicitou ao goberno local información detallada sobre o estado do procedemento, así como sobre as condicións nas que está a prestarse o servizo, ata o de agora o grupo do PSOE non facilitou dato algún ao respecto. “Solicitamos  se  nos  indique  se  foi  licitada  a  contratación  do  servizo  para  a  Escola de  Música  Municipal,  e en caso  afirmativo  queremos saber en  que  termos  e  condicións  se  licitou”, explica o responsable local de EU, que insta ao Concello a facilitar copia  do  expediente.  “En  caso  de que o servizo non se teña  licitado  ata  o  momento, queremos saber  cal  é  o  motivo, e instamos ao goberno local a explicar con claridade se a Escola de Música se atopa paralizada, tendo  en  conta  que o contrato co anterior adxudiatario finalizou. De  non  ser  así,  como  é  posible  que  se  continúe  prestando  o servizo  logo  de  ter  rematado  o  contrato  e  non  ter sido  sometido  a  unha nova licitación pública?”, pregunta a formación.

Esquerda Unida chama a participar na manifestación en defensa da sanidade pública do domingo

A formación anima á cidadanía a acudir a Santiago de Compostela para denunciar a política sanitaria impulsada polo Partido Popular dende a Xunta de Galicia

O grupo municipal lamenta que, a pesar do consenso existente na corporación, o Concello non peña habilitado autobuses para facilitar a participación na mobilización

A situación do centro de saúde do Monte da Vila é un exemplo dos recortes impostos, que derivan en falta de médicos suficientes, na precarización das condicións de traballo do persoal sanitario e nunha perda da calidade asistencial

O Grove, 7 de febreiro de 2019.- Esquerda Unida anima á cidadania a participar na mobilización en defensa da sanidade pública convocada para o domingo en Santiago de Compostela. A formación fai un chamamento para que as e os grovenses secunden de xeito masivo unha manifestación que permitirá evidenciar o enorme malestar existente polo deterioro do sistema sanitario provocado polos recortes do goberno da Xunta. Unha perda da calidade asistencial da que o centro de saúde do Monte da Vila é bo exemplo; pero que, lamentablemente, se extende á  atención primaria e especializada e ás urxencias de toda Galicia. 

Unhas semanas despois de que a corporación do Concello do Grove aprobase de xeito unánime unha moción para denunciar as carencias do centro de saúde da localidade, Esquerda Unida anima á poboación local a participar na gran manifestación coa que o colectivo SOS Sanidade Pública quere denunciar unha problemática que afecta a hospitais, PACs e consultas de atención primaria de toda Galicia. A formación lamenta que, a pesar do consenso existente a nivel local, o goberno grovense non teña dado aínda paso algún de cara á convocatoria da manifestación local pola que avogaba Esquerda Unida, así como outros grupos da corporación. Así como o feito de que o Concello non teña habilitado ningún tipo de transporte que facilite a participación da cidadanía do Grove na manifestación do domingo. 

“Os recortes matan, non ao negocio coa saúde” é o lema co que persoal sanitario,  organizacións políticas e sindicais e cidadania denunciarán o domingo os recortes de persoal sanitario, camas e orzamentos impostos polo Partido Popular ao sistema galego de saúde. “A Xunta de Galicia basea a súa política en recortar gasto, reducir as prazas de persoal, pechar camas, privatizar os novos hospitais, incrementar a concertación co sector privado, suprimir áreas sanitarias, desmantelar hospitais comarcais, marxinar á atención primaria e aos PACs, eliminar pediatras, deteriorar servizos de urxencias, poñer a investigación, a innovación e a formación en mans de multinacionais, precarizar as condicións dos novos especialistas favorecendo a súa emigración, e acabar coa participación social no control dun sistema que pagamos entre todas e todos”. Así explica SOS Sanidade Pública as razóns dunha convocatoria que partirá da Alameda compostelana, e que Esquerda Unida considera fundamental para deixar constancia clara do fartazgo e do malestar que os reiterados ataques do goberno da Xunta á sanidade pública teñen provocado na sociedade.

Esquerda Unida anima á poboación local a congregarse ás 11:40 á altura da estatua das Marías para participar conxuntamente na marcha que arrincará ás 12 para esixir dotacións de personal e medios axeitados e suficientes para PACs, servizos de urxencias e centros de atención primaria. Entre as reclamacións figura tamén a recuperación das áreas sanitarias e dos hospitais comarcais, así como dos servizos e centros privatizados; e a fin dos recortes e da precariedade laboral. 

Esquerda Unida insta ao Concello a actuar para rematar cos problemas do transporte escolar

A formación anima á Concellería de Educación a impulsar o antes posible accións conxuntas e coordinadas coas ANPAS, as direccións dos centros e a oposición

Consideran intolerable que unha empresa de autobuses condicione os horarios das clases e obstaculice as posibilidades de conciliación 

O Grove, 5 de febreiro de 2019.- O grupo municipal de Esquerda Unida insta ao Concello a tomar a iniciativa para tentar solventar os continuos problemas que están a producirse nas liñas de transporte escolar. A formación considera intolerable que as condicións impostas por unha empresa de autobuses obriguen ao alumnado a chegar tarde a clase un día tras outro; ou condicionen os horarios dos centros de ensino e obstaculicen as necesidades de conciliación das familias. A formación considera que a situación non pode prolongarse por máis tempo, e anima á Concellería de Educación a actuar para formar unha fronte común e esixir solucións.

Hai meses que familias e persoal docente veñen alertando do deficiente funcionamento do transporte escolar no Grove. E é que o sistema actual, que permite combinar liñas para que un mesmo autobús preste servizo a centros diferentes, non semella contentar a ninguén máis que á propia empresa que o presta. As problemáticas derivadas desta circunstancia están a afectar tanto aos centros de primara como aos institutos da localidade. Centros nos que, segundo alerta a comunidade educativa, en ningún caso o transporte está a funcionar de xeito adecuado.

Esquerda Unida considera que o Concello debe tomar cartas no asunto e poñerse á fronte das reclamacións. A formación, que xa ten trasladado a súa postura ao goberno local, insta á Concellería de Educación a convocar coa máxima urxencia ás direccións dos centros educativos e ás ANPAS da localidade, así como aos grupos da oposición, para abordar as carencias e idear unha estratexia de presión conxunta e coordinada. 

Esquerda Unida entende que non é de recibo que unha empresa de transporte sexa quen marque os horarios dos centros educativos e coarte a adaptación de xornada que nalgúns casos reclaman as familias; ou que posúa potestadade para decidir adiantar a hora de chegada do alumnado dun instituto 20 minutos. A formación considera que o servizo debe adecuarse ás necesidades educativas e de conciliación, primando en todo caso o benestar dos menores aos que atende. Nese senso, o grupo de EU considera que non caben excusas, e insta ao Concello a actuar para esixir que a Xunta de Galicia se implique e obrigue á concesionaria a adaptarse e a prestar un servizo de calidade e acorde a eses parámetros.

Esquerda Unida insta a axilizar a aplicación da ordenanza de terrazas e lamenta o desleixo do goberno ao respecto

A xuntanza para analizar a proposta de modificación presentada por Emgrobes que ía realizarse pasada a época estival continúa pendente

A formación alerta de que o tempo para que os cambios poidan entrar en vigor este ano apremia, e lembra que a moratoria concedida para que os locais se adaptasen á nova norma finalizou en 2018

O Grove, 30 de xaneiro de 2019.- O grupo municipal de Esquerda Unida insta ao Concello a axilizar os traballos relacionados coa aplicación da Ordenanza de Terrazas. Coa moratoria de cinco anos concedida para que os locais puidesen adaptarse á nova norma xa finalizada, esta debería estar xa plenamente vixente este ano. Porén, debido ao desleixo do goberno local os hostaleiros non poden ter aínda a certeza de cales son as directrices que se aplicarán, pois o Concello non ten convocado a xuntanza anunciada para analizar a proposta de modificación que Emgrobes presentou o verán pasado.

Esquerda Unida insta ao goberno local a asumir a súa responsabilidade e a acometer as tarefas relacionadas coa aplicación da nova Ordenanza de Terrazas. Unha norma aprobada en pleno que este ano debera estar plenamente en vigor, e en relación á cal o PSOE semella estar a incorrer nunha inaceptable deixadez de funcións.

A formación insta ao Concello a procurar solucións que conxuguen os intereses da hostelaría e o axeitado funcionamento dos negocios locais cos dereitos da veciñanza. A formación destaca que o período de excepcionalidade polo que se optou o ano pasado xa ten rematado, polo que anima ao goberno local a pronunciarse o antes posible sobre a proposta de modificación de Emgrobes, a deixar de eludir o seu deber e a velar pola axeitada aplicación dunha ordenanza que foi aprobada pola corporación.

Esquerda Unida lembra que os meses pasan e o tempo apremia, polo que anima ao goberno local a asumir a súa responsabilidade e acometer coa máxima urxencia as tarefas pendentes. E é que, tal e como denuncian dende EU, o Concello non se ten pronunciado aínda nin ten convocado a xuntanza para valorar a proposta de modificación á nomeada ordenanza que Emgrobes presentou en xullo. Proposición que o Concello decidiu analizar con calma unha vez finalizada a época estival e que, sen embargo, o goberno de Cacabelos semella ter deixado aparcada nun caixón. “A día de hoxe non se ten realizado ningunha xuntanza para analizar esa proposta, e o tempo é moi xusto. Se queremos que as posibles modificacións entren en vigor este ano debemos apresurarnos, polo que pedimos unha xuntanza o máis axiña posible para tratar este tema”, apremia Esquerda Unida.

Á espera de que o goberno local se pronuncie, a formación á que representan Xan Lamelas e José Antonio Otero teme que o Concello nada teña feito ata o de agora para propiciar a axeitada aplicación dunha ordenanza que xa está en vigor. EU quere saber que medidas ten adoptado o Concello a ese respecto e insta ao goberno local a actuar con rigor e a facer cumprir a norma conforme á legalidade.

Esquerda Unida insta ao Goberno local a cumprir co seu deber, e lembra as protestas e reclamacións da veciñanza coas que o rexedor se comprometeu de xeito público xa no 2016. Daquela o alcalde prometera aos residentes da rúa Pratería, unha das máis afectadas por esta cuestión debido á cantidade de terrazas que alberga, que se ía delimitar un carril claro de circulación para acceso a garaxes que non puidera ser invadido polo mobiliario dos locais. Un acordo que segue sen realizarse, e sobre o que o responsable do goberno local non deu resposta ás preguntas que EU lle fixo nos plenos de xullo, outubro e novembro. 

Esquerda Unida insta ao Concello a cumprir co seu deber, a facer cumprir a norma e a rematar coa folga de brazos caídos pola que o PSOE semella estar a apostar neste asunto. Nese senso, a formación solicita toda a información relacionada coas denuncias relacionadas coa posible instalación indebida de mobiliario na vía pública, así como a relativa ás sancións ou apercibimentos aplicados. 

EU pregúntase tamén se o Concello ten enviado algún bando ou comunicado á hostelaría para lembrarlles aos responsables de locais que o 31 de xaneiro remata, de acordo ao que recolle a nomeada ordenanza, o prazo para solicitar a instalación de terrazas para a próxima tempada. 

Debido á falta de tempo que evitou que este asunto fose abordado nos Rogos e Preguntas do último pleno, a formación ten presentado as súas solicitudes en relación a este asunto a través do Rexistro.

Esquerda Unida reclama un maior control sobre as casas de apostas e anima ao Concello a actuar para previr ludopatías

A formación aposta por formación específica para a Policía Local e accións nos centros de ensino para frear condutas aditivas entre a mocidade 

O Grove, 28 de xaneiro de 2019. - O grupo municipal de Esquerda Unida ve necesario que o Concello se involucre de xeito activo para incrementar o control sobre as casas de apostas e previr condutas aditivas, especialmente entre a poboación máis nova. Os edís de EU animan ao goberno local a dar un paso á fronte e a tomar parte activa para frear o incremento da ludopatía que se ten detectado nos últimos meses, e que resulta especialmente preocupante por afectar en gran medida a mocidade e menores de idade. É por elo que a formación leva ao pleno do Concello do Grove unha moción, a través da que insta ao consistorio a traballar, da man de clubes deportivos, centros de ensino e Policía Local, para combater esta problemática e fomentar hábitos saudables.

Dende hai uns anos proliferan os anuncios de casas de apostas deportivas online. Unha publicidade moi agresiva, que tamén se insire en eventos e retransmisións deportivas; e que ten impulsado de xeito alarmante o incremento do número de usuarios. Segundo o último informe trimestral do Mercado do Xogo Online, neste momento hai en España 613.812 persoas que fan uso das casas de apostas; un 13,44% máis que no mesmo período de 2016. 

O xogo patolóxico é un trastorno que figura entre as adiccións de tipo comportamental nas clasificacións médicas e psicolóxicas. Unha adición que consiste na perda do control do comportamento e que se caracteriza por ter graves consecuencias para as persoas que a padecen, como problemas académicos, laborais, económicos, sociais e mesmo legais. É por elo que Esquerda Unida considera necesario que as distintas administracións, dende o Concello ata o goberno central, pasando polo autonómico, actúen adaptando o marco legal e implementando un maior control sobre a publicidade. “Por un lado entendemos que é necesario prohibir a publicidade destes locais e frear a súa expansión a través das ordenanzas ou as normas urbanísticas. Tamén son importantes as medidas de prevención ante a ludopatía. E, por último, expomos unha serie de propostas a nivel fiscal para gravar a actividade das casas de apostas e do xogo online”, explica o grupo municipal de EU.

A formación anima ao Concello a estudar a revisión das ordenanzas municipais para introducir limitacións urbanísticas á implantación de locais de apostas nas inmediacións de espazos frecuentados pola infancia, a adolescencia e a mocidade, como centros educativos, culturais, deportivos e xuvenís. Así como a regular a eliminación de calquera cartelería do mobiliario urbano ou do espazo público deste tipo de establecementos. Igualmente, EU ve necesario que o goberno local impulse actividades formativas nos centros escolares para afondar no uso que a poboación máis nova fai dos xogos online e previr problemas derivados dos mesmos, e anima ao Concello a impulsar espazos e modelos de lecer e socialización que fomenten un ocio san e potencien o coñecemento, o deporte e as artes entre a mocidade.

Esquerda Unida aposta por involucrar tamén á Policía Local, reforzando a formación dos axentes para mellorar a súa capacidade de resposta ante infraccións relacionadas coas apostas e o xogo, particularmente no que se refire ao acceso de menores. Pero tamén aos clubes e aos equipos de fútbol locais, de xeito que estes colaboren eliminando calquera identificación do deporte coas apostas e pondo en marcha campañas de concienciación. 

EU tamén aposta por crear no Concello unha taxa específica para os establecementos que instalen pantallas ou outro tipo de dispositivos na vía pública. No que se refire á implicación do Estado, o grupo municipal ista ao goberno local a demandar do executivo central a reforma da Lei Xeral da Comunicación Audiovisual e da Lei Xeral de Publicidade e a impulsar o Real Decreto de Comunicacións Comerciais das Actividades de Xogo e de Xogo Responsable co obxectivo de restrinxir a publicidade para xogos e apostas online e incrementar a protección do público infantil e xuvenil. Así como a aumentar o tipo aplicable no Imposto sobre Actividades do Xogo para as casas de apostas e do xogo online. 

Por último, EU anima ao goberno local a reclamar tamén a implicación do goberno da Xunta para que este limite a proliferación de casas de apostas físicas mediante o establecemento dun mínimo de metros de separación entre elas, ou por núcleos de poboación; e para que prohiba as terminais de apostas deportivas en bingos, salóns de xogos e casinos.