EU denuncia que o goberno deixou perder a garantía do local social de Reboredo e as reparacións deberán pagarse con cartos públicos

A formación alerta de que o Concello non obrigou á empresa construtora a reparar unhas deficiencias que eran evidentes desde a inauguración e que co paso do tempo se agravaron. 

Piden explicacións e responsabilidades tras coñecerse que a empresa adxudicataria foi extinguida en setembro de 2025, o que deixa practicamente sen efecto calquera reclamación económica.

O Grove, 6 de marzo de 2026.- Esquerda Unida denunciou a neglixencia do goberno municipal na xestión das deficiencias do local social de Reboredo, unha obra que apenas tres anos despois da súa apertura presenta graves problemas construtivos e desprendementos na fachada. 

O inmoble foi adxudicado en outubro de 2020 á empresa Sodein Soluciones Integrales SL por un importe de 152.157,50 euros e incluía unha mellora que ampliaba o prazo de garantía ata os tres anos. A última certificación da obra foi aprobada pola Xunta de Goberno Local o 30 de decembro de 2021, polo que a garantía remataría a comezos de 2025. 

Segundo lembra Esquerda Unida, xa no ano 2022, case un ano antes da apertura do local, a formación advertira publicamente das primeiras deficiencias detectadas no edificio, entre elas gretas na pasarela de acceso e sinais de deterioro no inmoble. Naquel momento, a propia concelleira responsable recoñeceu en pleno que a empresa construtora debía facerse cargo das reparacións. 

Porén, malia as reiteradas advertencias realizadas por Esquerda Unida nos anos seguintes, o goberno municipal limitouse a ofrecer respostas evasivas. Xa en maio de 2024 indicouse que a arquitecta municipal debía revisar o edificio, sen que se adoptase ningunha medida efectiva para obrigar á empresa a reparar os danos. 

A situación agravouse co paso do tempo. En xuño de 2025 o propio alcalde, tras preguntas de Esquerda Unida, recoñeceu en pleno que no edificio “están caendo cascotes e parte da fachada”, o que evidencia que as deficiencias da obra non só persistían senón que se estaban agravando. 

A pesar diso, Esquerda Unida lembra que durante todo este tempo o Concello non informou de ningún procedemento formal para esixir responsabilidades á empresa construtora nin para executar a garantía da obra. 

Ademais, segundo consta no Boletín Oficial do Rexistro Mercantil, a empresa Sodein Soluciones Integrales SL foi declarada en concurso voluntario o 30 de abril de 2025 e o procedemento concluíu o 8 de setembro dese mesmo ano por insuficiencia de masa activa, o que implica que a sociedade carece de bens para facer fronte ás súas obrigas. 

O voceiro de Esquerda Unida, José Antonio Otero, considera que o sucedido é “un exemplo claro de falta de dilixencia na defensa dos intereses públicos”. “O Concello sabía desde hai anos que había deficiencias graves nesta obra e, aínda así, deixou pasar o tempo sen obrigar á empresa a reparalas dentro do período de garantía. Agora atopámonos cunha empresa que entrou en concurso e que xa non ten bens para responder”, sinala. 

Para Otero, o máis preocupante é que esta situación pode acabar tendo consecuencias económicas para o propio Concello. “Se finalmente se confirma que non se fixo ningunha reclamación formal nin se executou a garantía da obra cando correspondía, estaremos ante unha neglixencia política moi grave. O que non se pode permitir é que por falta de xestión agora teñan que pagalo os veciños e veciñas con cartos públicos”, afirma. 

Por este motivo, e ao abeiro do afirmado polo alcalde no pleno do pasado luns, onde asegurou que a arquitecta municipal estaba elaborando un informe e que debían revisar a situación para comprobar se aínda era posible reclamar, Esquerda Unida presentou un escrito por rexistro no Concello solicitando información sobre se se realizou algún requirimento formal á empresa construtora, se se iniciou algún expediente administrativo para reclamar as deficiencias da obra ou executar a garantía e que actuacións se levaron a cabo dende o Concello ante esta situación. 

Dende Esquerda Unida teñen claro cal será a resposta, pois os feitos apuntan a que non se realizou ningunha actuación. Por iso consideran imprescindible aclarar o sucedido e depurar responsabilidades políticas se se confirma que non se actuou a tempo. 

“Alguén terá que explicar por que o Concello non fixo nada durante anos sabendo que a obra tiña problemas e que a garantía estaba en vigor. Defender os intereses públicos significa actuar cando toca, non cando xa é demasiado tarde”, conclúe Otero.

PLENO FEBREIRO 2026

ROGOS E PREGUNTAS

📅 2 de marzo de 2026

▶ Intervención: minuto 14:53

🔗 Enlace ao vídeo

Preguntas realizadas

🔻 Marquesiñas de Árdia e Balea

Preguntamos polo motivo polo que non se instalaron estas marquesiñas, despois de que no pleno de xaneiro se indicase que estaban no almacén e xa se instalara unha nas inmediacións do Instituto Monte da Vila.

🔻 Camiño público da praia de Con Roibo (rúa Xesteiriña)

Preguntamos polo estado do expediente de recuperación deste camiño público ocupado por unha empresa privada, tal e como ordenaba unha moción aprobada polo pleno municipal.

🔻 Fonte da rúa Concepción Arenal

Preguntamos polo motivo polo que non se procedeu á instalación desta fonte pública.

🔻 Local social de Reboredo

Preguntamos polo estado da reparación das deficiencias detectadas no edificio a través da garantía da obra.

🔻 Auditorio municipal

Preguntamos polo estado da reparación do ascensor e polas diferentes deficiencias existentes no edificio.

🔻 Ordenanza de Bo Goberno

Preguntamos cando se ía traer a pleno a modificación da ordenanza para incluír as dúas horas sen música nas atraccións de feira, tal e como ordenaba unha moción presentada polo noso grupo.

🔻 Plan de Sustentabilidade Turística “A Gastromeca”

Preguntamos polo grao de execución deste plan.

Rogos e solicitudes

🔻 Inundacións na Travesía Alexandre Bóveda

Solicitamos solucións ás inundacións que sufría unha familia desta rúa como consecuencia das obras realizadas na rúa principal.

🔻 Cambio de sentido na rúa Conchases

Solicitamos executar o cambio de sentido do tramo situado diante do salón de peiteado Loli Otero para permitir a saída cara Terra de Porto da veciñanza da Carballeira.

🔻 Terreos da SAREB para vivenda pública

Solicitamos información sobre a situación do trámite de solicitude destes terreos para a construción de vivenda pública.

🔻 Camiño do alto de Pardiños

Solicitamos solucións ante o mal estado deste camiño, que supón un risco para o tránsito de vehículos da veciñanza.

PLENO XANEIRO 2026

 ROGOS E PREGUNTAS

📅 26 de xaneiro de 2026

▶ Intervención: minuto 1:10:39

🔗 Enlace ao vídeo

Preguntas realizadas

🔻 Reforma da rúa Hortos

Preguntamos cando se ía iniciar a obra de reforma desta rúa, iniciativa proposta polo noso grupo con cargo ao Remanente 2023 e ampliada co Remanente 2024.

🔻 Relación de Postos de Traballo (RPT)

Preguntamos cando se ía convocar a mesa de negociación para a aplicación da RPT.

🔻 Subida salarial do persoal municipal

Preguntamos se se aplicara a subida salarial a todos os grupos laborais do Concello.

Rogos e solicitudes

🔻 Extintores do pavillón Monte da Vila

Solicitamos solución á situación dos extintores do pavillón novo Monte da Vila, que levaban sen revisar dende abril de 2024 e sen realizar o retimbrado dende abril de 2020.

🔻 Baldosas levantadas nas rúas peonís

Solicitamos unha solución para as numerosas plaquetas e baldosas levantadas en diferentes rúas peonís, que estaban provocando accidentes entre os viandantes, especialmente entre persoas maiores e cativos.

O goberno local quere entregar a auga pública aos intereses privados

O PSOE leva a pleno o inicio da privatización dun servizo esencial tras anos de abandono deliberado da xestión municipal. Dende Esquerda Unida opóñense frontalmente á esta decisión e consideran que a proposta demostra a nula capacidade do goberno. 

Alertan que a externalización do servizo de abastecemento de auga potable suporá a perda de control público e un forte encarecemento do recibo. Consideran que existen exemplos de modelos públicos exitosos noutros concellos que supoñen un claro beneficio para a veciñanza.

O Grove, 23 de xaneiro de 2026.- Esquerda Unida denuncia con rotundidade a privatización do servizo municipal de abastecemento de auga, logo de que o goberno municipal do PSOE dera xa o paso definitivo ao levar ao vindeiro pleno o expediente de inicio do proceso de externalización. O que a formación alertaba nos últimos meses, confírmase agora como unha decisión política consciente e premeditada. 

Dende Esquerda Unida acusan ao executivo local de provocar de maneira intencionada o deterioro do servizo público para xustificar a súa privatización. “É o manual clásico das políticas neoliberais, deixar caer o público, magnificar os problemas e vender logo a privatización como a única solución posible”, denuncian desde a formación. 

O seu voceiro municipal, José Antonio Otero, foi especialmente duro coa decisión do goberno. “Estamos ante unha auténtica renuncia ás responsabilidades públicas que confirman a nula capacidade de xestión do goberno municipal. O Concello pretende deixar de xestionar directamente un servizo básico e entregarllo a unha empresa privada cuxo único obxectivo será facer negocio coa auga, un ben esencial”, afirmou. 

EU advirte de que a privatización suporá a perda total de control municipal sobre o servizo. “Despois virán os problemas, as queixas e as denuncias, e o goberno volverá agocharse detrás da empresa concesionaria, exactamente igual que acontece co Servizo de Axuda no Fogar, onde, ante as denuncias que teñen trasladado as traballadoras, o Concello limítase a dicir que é cousa da empresa”, sinalou Otero. 

A formación lembra que existen exemplos no Estado que demostran que a xestión pública da auga non só é viable, senón máis eficiente e económica. Concellos como Valladolid ou Terrassa apostaron pola remunicipalización do servizo tras décadas de xestión privada, logrando frear as subas das tarifas, mellorar a calidade do servizo e recuperar o control público dun recurso esencial. 

Mesmo en Galicia existen exemplos de xestión pública solvente, como A Coruña, onde unha empresa municipal garante o abastecemento con maior control e transparencia. “Son exemplos claros de que o que aquí se presenta como inevitable non o é en absoluto”, subliña Otero, que lembra que alí onde se privatizou o resultado foi sempre o mesmo, recibos máis caros, menos transparencia e peor atención á veciñanza”. 

“Non hai nin un só exemplo no que a privatización da auga beneficiase á cidadanía. Pola contra, hai moitos casos nos que, tras anos de xestión privada, os concellos tiveron que remunicipalizar o servizo polos abusos das concesionarias”, lembra EU, que considera especialmente grave que se adopte esta decisión nun concello gobernado por un partido que se di de esquerdas. 

En Esquerda Unida defenden con firmeza que o problema non é o servizo público, senón a falta de vontade política e de capacidade de xestión do goberno local. Ademais, a formación quere desmontar de antemán o discurso do executivo, que tenta presentar este paso como un simple estudo técnico sen consecuencias.“Non estamos ante un informe neutro nin ante unha avaliación aberta de alternativas. O que se leva a pleno é a aprobación explícita do cambio de modelo, da xestión directa á concesión privada. O resto do procedemento, incluído o informe económico-financeiro e o estudo de viabilidade, non serve para decidir se se privatiza ou non, senón para concretar como se executa unha privatización xa decidida”, advertiu o voceiro. 

A formación subliña que o propio documento recoñece que a concesión é a opción elixida, que se inicia xa o expediente de contratación e que se comeza a tramitar o paso da taxa municipal a unha tarifa privada. “Que non intenten enganar á veciñanza con escusas técnicas, este pleno marca un punto de non retorno se sae adiante”, sinalan. 

Insisten en que aínda se está a tempo de frear este proceso se existe vontade política e lembra que outros concellos que privatizaron tiveron que rectificar anos despois polos sobrecustos e a perda de control. “Se noutros lugares se puido remunicipalizar, aquí tamén se pode evitar a privatización antes de que sexa demasiado tarde”, concluíu Otero, quen anunciou que Esquerda Unida se opoñerá frontalmente a esta decisión e traballará para frear este ataque a un servizo público esencial.”

Esquerda Unida denuncia que a mala tramitación municipal bloquea a reforma da subida a Meloxo

A Deputación de Pontevedra confirma que o Concello non completou as cesións de terreos necesarias e que o proxecto segue en revisión técnica. 

O voceiro municipal de Esquerda Unida acusa ao goberno local de falta de rigor, opacidade e de xerar falsas expectativas nunha obra clave para o abastecemento de Meloxo e a seguridade viaria.

O Grove, 8 de xaneiro de 2026.- O grupo municipal de Esquerda Unida fixo pública a resposta emitida a semana pasada pola Deputación de Pontevedra á solicitude de información presentada no mes de outubro polo seu voceiro, José Antonio Otero. O documento achega información detallada sobre o estado real da obra da Rampla de Meloxo e deixa en evidencia que o goberno municipal non cumpriu de maneira completa coa súa parte na tramitación do proxecto. 

Segundo recolle a resolución do Servizo de Infraestruturas e Vías Provinciais, o Concello do Grove non completou correctamente as cesións dos terreos necesarios para poder executar a actuación. En concreto, o Concello achegou 26 das 32 actas de cesión asinadas, pero non presentou documentos esenciais como as fichas de cesión cos planos asinados polos propietarios nin o certificado formal de posta a disposición dos terreos ante fedatario público, un requisito expresamente esixido pola Deputación para considerar os terreos plenamente dispoñibles. 

Unha situación que, segundo Otero, contradí frontalmente a información trasladada polo goberno municipal en diferentes sesións plenarias. “Queda claro que mentían cando aseguraban ter realizado todo o traballo que lles correspondía e que o atraso dependía exclusivamente da Deputación. Iso non é certo, porque a documentación entregada está incompleta e mentres non se remate correctamente o expediente a obra non pode avanzar”, sinalou o voceiro de EU. 

Ademais, existen seis parcelas nas que non houbo cesión voluntaria. A Deputación propuxo modificar o proxecto para evitar a ocupación de tres delas, aínda que segue sendo necesaria a afección doutras tres, o que obriga a modificar planos, incorporar un anexo de expropiacións e cambiar as medicións e o orzamento do proxecto. Estas expropiacións serán tramitadas pola Deputación, pero asumidas economicamente polo Concello do Grove, tal e como lle confirmou o propio alcalde ao ente provincial nun correo electrónico remitido o 13 de decembro de 2025. Un feito que, segundo Otero, “demostra que o problema está lonxe de estar resolto á vista da data dese último correo”. 

O voceiro municipal lembra tamén que, cando Esquerda Unida solicitou información á Deputación de Pontevedra, fixo o propio ao Concello do Grove, pedindo copia da documentación remitida ao ente provincial xunto co correspondente certificado de saída. “A día de hoxe esa solicitude segue sen resposta, o que volve poñer en cuestión a transparencia do goberno municipal”, denunciou. 

Por todo isto, o grupo municipal de Esquerda Unida esixe ao goberno do Grove que dea explicacións públicas á veciñanza, asuma responsabilidades polos atrasos acumulados e complete de inmediato toda a tramitación pendente para que a obra da Rampla de Meloxo poida executarse canto antes. Advirten de que, mesmo no caso de completarse a fase de expropiacións, mentres non se entreguen os planos asinados e o certificado oficial de posta a disposición dos terreos ante fedatario público, o expediente continuará bloqueado. 

Dende EU alertan ademais de que a situación actual da Rampla de Meloxo é xa insostible para a veciñanza, ao provocar problemas recorrentes no día a día, como roturas cada vez máis frecuentes na tubaxe de subministro de auga, que derivan en episodios de desabastecemento con cortes que se prolongan durante varias horas cada vez que se produce unha avaría. Así mesmo, estas roturas e as posteriores reparacións están a xerar situacións de inseguridade viaria, xa que os valados das obras adoitan prolongarse no tempo, afectando á circulación e á seguridade dos vehículos nunha rúa pola que transita habitualmente transporte pesado.

EU esixe explicacións ao SERGAS tras descubrir que un facultativo atendía consultas no Grove sen figurar como profesional en activo

EU denuncia unha situación "insólita e de extrema gravidade" ao comprobarse que o médico seguía atendendo pese a que o SERGAS certificou por escrito que non exerce en ningún centro público galego. 

O grupo municipal reclama responsabilidade política e unha investigación inmediata sobre como puido producirse esta irregularidade.

O Grove, 10 de decembro de 2025.- Esquerda Unida do Grove vén de facer pública unha denuncia de enorme gravidade tras constatar que un facultativo estivo atendendo na súa consulta habitual do Centro de Saúde do Grove malia que o SERGAS certificou oficialmente que non exerce actividade profesional en ningún dos centros dependentes do sistema sanitario público galego. 

Segundo explicou o voceiro de EU, José Antonio Otero, a situación "non só é irregular, senón completamente inadmisible nun servizo público esencial como é a atención primaria". Otero subliña que "non falamos dunha confusión administrativa menor, senón dun feito gravísimo: un médico atendendo pacientes sen constar como profesional en activo no SERGAS". 

A formación lembra que os problemas arredor deste facultativo se arrastran desde 2024, cando comezaron episodios reiterados de ausencias inxustificadas, presencia en estado embriaguez e outras condutas inapropiadas que derivaron en denuncias formais e mesmo intervención policial. Tras estes feitos, o doutor deixou de exercer arredor de outubro ou novembro dese ano, permanecendo afastado da actividade durante case un ano. 

Porén, hai apenas uns meses reincorporouse á consulta, e os pacientes advertiron que persistían as mesmas irregularidades, o que motivou novas reclamacións. Foi entón cando o SERGAS respondeu por escrito indicando que o facultativo non exerce en ningún centro público, unha afirmación que implicaría que non debería estar pasando consulta. 

Estas reclamacións ás que tivo acceso Esquerda Unida esta semana, e nas que se basea para esta denuncia, foron rexistradas polos usuarios os días 6 e 7 de novembro, e recibiron resposta oficial do SERGAS o 26 do mesmo mes, respectivamente. Foron estes mesmos pacientes quen trasladaron á organización tanto o contido da resposta como o sucedido no centro sanitario ao comprobar que o facultativo continuaba atendendo con normalidade malia ser considerado "non exercente" polo propio organismo. 

A sorpresa produciuse cando os usuarios acudiron ao centro sanitario e comprobaron que o médico seguía atendendo con total normalidade, mentres o propio persoal administrativo do ambulatorio mostraba desconcerto ante a contradición coa resposta oficial. 

"Estamos ante unha situación absolutamente excepcional e xuridicamente inexplicable", afirma Otero. "Se o SERGAS asegura que non está en activo, quen autorizou a súa presenza? Como é posible que accedese ás instalacións e á historia clínica dos pacientes? Que controis fallaron para permitir algo así?". 

O voceiro sinala que esta circunstancia supón un grave risco para a saúde e para a protección de datos sanitarios, ademais dunha vulneración flagrante dos protocolos de control profesional: "Ningún paciente pode ser atendido por alguén que oficialmente non existe no sistema. Isto non pasa nin nos peores escenarios de descoordinación institucional". 

Otero engadiu que, se xa durante a primeira etapa este profesional xeraba dúbidas entre a veciñanza sobre a fiabilidade dos diagnósticos e das receitas prescritas, "coñecer que nesta nova etapa atendía sen figurar como profesional en activo no sistema público multiplica a preocupación e fai saltar todas as alarmas". "Falamos de persoas que estaban sendo tratadas por alguén que oficialmente non debía exercer, o cal é dunha gravidade absoluta", apuntou. 

Esquerda Unida esixe ao SERGAS explicacións urxentes, transparencia total e a apertura inmediata dunha investigación que esclareza como se puido producir unha situación de tal magnitude. O grupo municipal reclama tamén responsabilidades políticas e organizativas polo que consideran "un fallo sistémico intolerable". 

"A confianza da veciñanza no sistema público non pode verse golpeada por erros deste calibre. Non imos permitir que isto quede en silencio nin que se intente minimizar", concluíu Otero.

PLENO NOVEMBRO 2025

ROGOS E PREGUNTAS

📅 9 de decembro de 2025

▶ Intervención: minuto 27:48

🔗 Enlace ao vídeo

Preguntas realizadas

🔻 Aplicación da Relación de Postos de Traballo

Preguntamos polo estado da aplicación da RPT no Concello.

🔻 Denuncias de traballadores municipais

Preguntamos pola situación na que se atopaban as denuncias presentadas por diferentes traballadores municipais e pola resposta do goberno.

🔻 Ofertas Públicas de Emprego

Preguntamos polo estado dos procesos correspondentes ás diferentes ofertas públicas de emprego.

🔻 Remolque náutico municipal

Preguntamos polo estado da compra do remolque náutico e pola xestión do seu uso polos clubs.

🔻 Pavillón de Conmeniño

Preguntamos polas filtracións de auga no pavillón tras investir 300.000 euros na súa reforma para evitar ese problema.

🔻 Regulamento de patinetes

Preguntamos polo número de sancións executadas tras a aprobación do regulamento de patinetes, xa que seguen circulando por zonas prohibidas e sen casco.

🔻 Cartel da Festa do Marisco 2027

Preguntamos pola situación do concurso do cartel da Festa do Marisco 2027, declarado deserto sen información pública.

🔻 Medicións de son en locais nocturnos

Preguntamos polo custo das medicións de son realizadas pola empresa Virocem en locais de ocio nocturno.

🔻 Acendido de Nadal

Preguntamos se o goberno consideraba adecuada a imaxe ofrecida ao anunciar o acendido de Nadal sen estar instalado en todo o concello.

🔻 Acordos co noso grupo municipal

Preguntamos polo estado de execución de diferentes acordos alcanzados co noso grupo municipal

• A posta en funcionamento do Consello Local de Deportes.
• A posta en funcionamento da Mesa de Patrimonio e Cultura.
• A cobertura do posto laboral de Técnico/a de Turismo.
• A creación do posto laboral para o Auditorio.
• A desafectación dos terreos de Rons.
• A ampliación da Casa da Cultura de San Vicente.
• A aplicación do Plan de Envellecemento Activo para combater a soidade non desexada.

🔻 Acordos financiados co Remanente 2024

Preguntamos polo grao de execución das actuacións, acordadas co noso grupo municipal, financiadas con cargo ao remanente de tesourería.

• A creación da área de descanso na Toxa, ao carón do Redondo.
• A compra do terreo de Entrehortas para ampliar o estacionamento.
• O proxecto de estudo para executar un aparcamento en dúas alturas en Entrehortas.
• A creación de espazos de sombras en parques infantís.

Rogos e solicitudes

🔻 Iluminación exterior do pavillón de Conmeniño

Solicitamos a instalación dun punto de luz no exterior do pavillón.

🔻 Muro de Entrehortas

Solicitamos información sobre o Decreto de Alcaldía que aprobou a memoria técnica do muro de Entrehortas.

🔻 Mesa de Patrimonio e Cultura

Solicitamos a convocatoria desta mesa para traballar na actualización do Catálogo de Patrimonio do PXOM.

🔻 Lixo na rúa O Mariño

Solicitamos solución á acumulación de lixo procedente da actividade nocturna.

🔻 Mercado municipal

Solicitamos información sobre a situación derivada das denuncias entre dúas usuarias do mercado.

🔻 Campamento de Nadal

Solicitamos que se procurase a realización dun campamento para facilitar a conciliación familiar.

🔻 Reloxo da Casa do Concello

Solicitamos o arranxo do reloxo da fachada do Concello.

Esquerda Unida considera incompetencia municipal a sentenza do TSXG que obriga a asumir outro sobrecusto do Auditorio

O Tribunal Superior de Xustiza de Galicia condena ao Concello a pagar máis de 34.700 euros en intereses tras incumprir os prazos legais de pago na obra do Auditorio, evidenciando un novo episodio de mala xestión municipal. 

Esquerda Unida subliña que as deficiencias utilizadas polo goberno como escusa para atrasar o pago foron reiteradamente minimizadas ou negadas polo executivo cando o seu grupo municipal as fixo públicas.

O Grove, 24 de novembro de 2025.- Esquerda Unida alerta de que a recente Sentenza 366/2025 do Tribunal Superior de Xustiza de Galicia supón un novo capítulo no que cualifican como o “descontrol económico e técnico” do Auditorio. O fallo obriga ao Concello a pagar 34.771,44 euros en intereses de demora á UTE encargada das obras, unha cifra que, segundo a organización, representa “un novo sobrecusto que se suma a unha longa lista de custes ocultos que a veciñanza leva anos asumindo sen explicacións”. 

O voceiro de Esquerda Unida, José Antonio Otero, subliña que a sentenza deixa claro que o Concello abonou as facturas fóra de prazo, xerando automaticamente intereses tal e como establece a Lei de Contratos do Sector Público. A sentenza evidencia que este sobrecusto tería sido perfectamente evitable se o Concello cumprira cos prazos legais de pago, pois nada obxectou cando abonou o principal e o atraso débese unicamente á súa inactividade administrativa. “Estamos ante un exemplo máis da nefasta xestión dun proxecto que naceu mal e que segue acumulando gastos derivados da falta absoluta de xestión”, afirma. 

A formación chama tamén a atención sobre o feito de que o propio Concello tentou evitar o pago destes intereses alegando a existencia de numerosas deficiencias na obra. Deficiencias que, tal e como lembra Otero, “o noso grupo municipal denunciou moito antes de que o goberno recoñecese absolutamente nada, mentres nos acusaban de alarmistas”. 

O Tribunal recolle na resolución que o Concello achegou un informe dos directores da obra describindo problemas graves: humidades, filtracións, fallos estruturais, deficiencias na climatización e na electricidade, problemas no anclaxe das butacas, inoperatividade do ascensor exterior, fallos no sistema de alarma de incendios e falta de documentación esencial, entre outros. “Practicamente todo o que agora aparece na sentenza é exactamente o que denunciamos no seu día e que o goberno minimizaba ou negaba sistematicamente”, engade Otero. 

A sentenza, con todo, desbota a argumentación municipal, lembrando que o Concello xa pagara o principal sen presentar reparos, polo que non pode agora utilizar as deficiencias como xustificación para evitar os intereses. Para Esquerda Unida, isto “evidencia a improvisación e a falta de control político e técnico coa que se levou este proxecto desde o primeiro día”. 

Por outra banda, Otero incide en que este novo desembolso “non será o último pago que o Concello terá que realizar por esta obra, malia que xa pasaron anos desde a súa inauguración”. O voceiro lembra que o Auditorio “segue xerando gastos de maneira permanente”, como poñen de manifesto reclamacións, informes técnicos negativos e novos investimentos que non estaban previstos. 

A organización volve denunciar tamén a opacidade que rodea este proxecto. “A día de hoxe, nin a veciñanza nin a oposición coñecemos o custo real do Auditorio. Sabemos que se disparou moi por riba do orzamento inicial, pero o goberno continúa ocultando as cifras finais”, critica Otero. 

Por iso, Esquerda Unida reclama unha auditoría integral da execución da obra e a publicación de todos os informes técnicos e económicos vinculados ao proxecto, incluídos aqueles aos que fai referencia o TSXG na sentenza. “Esta resolución volve poñer en evidencia o que levamos anos repetindo; que o Auditorio é un proxecto cargado de sombras, sobrecustos, defectos construtivos e opacidade, e que o goberno preferiu negar a realidade antes que asumir responsabilidades”, conclúe o voceiro de Esquerda Unida.

EU critica a falta de diálogo e precipitación no proxecto de reforma da rúa Luís A. Mestre

O grupo municipal lamenta que o goberno local actuase “coma se tivese maioría absoluta”, sen consensuar o proxecto coa oposición. Denuncian que se presenta un proxecto en función dunha axuda, non da realidade da vía. 

EU advirte de riscos para a seguridade viaria e para o tráfico pesado ao instaurarse plataforma única e reducir o ancho da estrada. Ademais, prevese eliminar máis de trinta prazas de estacionamento sen ofrecer alternativas.

O Grove, 7 de novembro de 2025.- O grupo municipal de Esquerda Unida do Grove explicou os motivos polos que decidiu non apoiar o proxecto de reforma da rúa Luís A. Mestre, aprobado no pleno municipal do pasado luns, día 3, e que se levará a cabo mediante un convenio coa Xunta de Galicia, que achegará entre o 70 e o 80 % do custo total, arredor de 2,6 millóns de euros. A aprobación do proxecto no pasado pleno tan só supoñía optar á financiación que lle corresponde ao concello a través da subvención do Plan Extra da Deputación de Pontevedra. 

O voceiro de Esquerda Unida, José Antonio Otero, cualificou o proxecto de “precipitado, pouco dialogado e alleo ás necesidades reais da rúa”, lamentando que o alcalde e o seu equipo actuasen “coma se aínda tivesen maioría absoluta”. 

“O proxecto presentouse con présa e sen consenso, cando o PSOE non ten maioría e necesitaba o apoio dalgún grupo da oposición. Volvemos á vella práctica de presentar propostas pechadas e sinalar á oposición como culpable se non as apoia”, denunciou Otero que resaltou que “este proxecto está enfocado en acadar a subvención do Plan Extra, non nas necesidades reais da rúa”. 

A formación sinala que o marxe de análise foi moi curto, mais aínda así detectaron cuestións graves que poden afectar á seguridade viaria e peonil. “Proponse facer plataforma única e reducir o ancho da estrada de sete a seis ou mesmo a cinco metros e medio o que supón un risco evidente”, advertiu Otero. “Por unha parte desa vía circulan autobuses e camións de gran tonelaxe; se agora teñen dificultades para cruzarse, coa plataforma única podería chegar a ser imposible, obrigando á invasión da beirarrúa e poñendo en perigo aos peóns”. 

EU defende que, polo menos no tramo entre Borreiros e o cruce coa Avenida de Portugal, se manteña o ancho actual da calzada, mellorando a accesibilidade das beirarrúas e os pasos de peóns, e que a plataforma única se limite ao segundo tramo, entre o cruce da Avenida de Portugal e a rúa da Praza. 

Outro aspecto que critican é a supresión de 35 prazas de aparcamento sen alternativa algunha. “Non é razoable eliminar máis da metade das prazas nunha rúa onde as preto de 80 existentes están ocupadas case todo o día. O Concello debería habilitar espazos de estacionamento en solares baleiros ou en desuso, como xa propuxemos noutras ocasións”, engadiu Otero. 

Dende Esquerda Unida teñen claro que o proxecto responde máis á oportunidade dunha subvención que a unha planificación seria da mobilidade local. “Non se pode aprobar un proxecto a cegas só por non perder unha axuda. O plan fíxose para encaixar nunha convocatoria e non para resolver os problemas reais da estrada”, insistiu Otero. 

A formación tamén expresou a súa sorpresa pola postura do PP e do BNG, que “compartiron e fixeron súas moitas das nosas denuncias durante o pleno, pero logo optaron por absterse e permitir a aprobación do proxecto”.

 “Permitiron que o alcalde saíse coa súa. Agora dise que nos reuniremos cos técnicos, pero esa reunión temémonos que será meramente informativa, porque cuestións como a plataforma única no primeiro tramo ou a redución do ancho dos carrís son condicións impostas polas bases da subvención da Deputación e dificilmente se poderán modificar”, explicou Otero. 

Pese a todo, Esquerda Unida adianta que levará as súas propostas á xuntanza cos técnicos municipais, coa intención de axustar o proxecto á realidade da estrada e garantir a seguridade dos viandantes e vehículos, e forzarán para que se modifique o proxecto “aínda que iso supoña renunciar á subvención”. 

“Preferimos perder unha axuda e ter que pedir un préstamo antes que hipotecar o futuro dunha das arterias principais do Grove cun proxecto mal deseñado. As boas decisións non se toman con présa nin con chantaxes, senón con diálogo e responsabilidade”, insistiu o voceiro de EU.

Lembran que ”a precipitación a hora de deseñar un proxecto para acadar unha subvención, sen contemplar os pros e os contras, provocou que a rúa Alexandre Bóveda tivese que suprimir un dos carrís de circulación, ocasionando numerosos problemas que a día de hoxe non foron resoltos. Non queremos que, novamente, se hipoteque o futuro dunha rúa polo simple feito de lograr o seu financiamento”.

Esquerda Unida pide claridade e transparencia sobre obra da subida a Meloxo e esixe celeridade

Cuestionan as explicacións do goberno local, que asegura ter remitido toda a documentación á Deputación e estar pendentes de asinar o convenio. Reclaman tanto ao Concello como á institución provincial información verificable sobre o estado do proxecto e os prazos de execución da obra.

Lembran que levan dende 2020 reclamando a substitución da tubaxe e alertan das continuas roturas, tres nos últimos cinco días, a última no día de onte, o que está ocasionando problemas de abastecemento á veciñanza.

O Grove, 15 de outubro de 2025.- Esquerda Unida vén de pedir explicacións ao goberno municipal e á Deputación de Pontevedra ante a falta de avances na substitución da rede de abastecemento e reforma estrada de subida a Meloxo, un proxecto anunciado no ano 2023 e que segue sen executarse. O grupo municipal reclama claridade, transparencia e depuración de responsabilidades e esixen celeridade na execución da obra. Do mesmo xeito, alerta que as roturas da tubaxe son continuas e a veciñanza está a sufrir os cortes no subministro de auga, a última rotura produciuse no día de onte, que se suma ás outras dúas que tiveron lugar na última semana.

O voceiro de Esquerda Unida, José Antonio Otero, lembra que no pleno do 2 de xuño, tras preguntar polo estado do proxecto, a concelleira de Obras, Ángeles Domínguez, asegurou que “toda a documentación xa estaba en mans da Deputación”, que “o Concello cumprira o seu traballo” e que só había catro propietarios que non aceptaran a cesión dos terreos. Afirmou ademais que era a Deputación quen debía fixar os prazos e decidir se expropiaba ou modificaba o proxecto. Así mesmo, no día de onte, o Alcalde afirmaba estar en contacto co ente provincial para a sinatura dun convenio, pero a realidade é que a obra segue a demorarse.

“Queremos saber se esa información é certa ou non. Por iso solicitamos formalmente á Deputación que nos confirme se o Concello lle trasladou realmente toda a documentación, cal é o estado do expediente e cales son os pasos previstos para que a obra sexa unha realidade. Tamén pedimos ao propio Concello que nos achegue as minutas ou xustificantes de envío da documentación para demostrar que fixeron o que din”, explicou Otero.

Otero advertiu de que “non sería a primeira vez que se maquilla unha realidade para aparentar xestión”, lembrando que en febreiro deste ano o alcalde, asegurara publicamente que xa se contaba co 90 % das cesións asinadas e que o resto se completaría “nun prazo de dez ou quince días”, co fin de enviar o expediente á Deputación a principios de marzo. “Estamos en outubro e seguimos sen obra, sen licitación e sen explicacións convincentes”, engadiu.

Esquerda Unida leva reclamando dende 2020, cando se produciron as primeiras roturas, a substitución da tubaxe de abastecemento “xa que tiñamos claro que o paso de vehículos pesados e o estado da rede ía provocar que se repetisen con frecuencia as roturas co conseguinte prexuízo para a veciñanza, que a fin de contas é quen sofre cortes de auga que se prolongan durante longas horas, tal e como sucedeu no día de onte e ata en dúas ocasións máis nesta última semana, o que constata que non é un problema novo, senón un problema ignorado”, asevera Otero que considera que “a pesar de levar cinco anos advertindo da gravidade, o que vemos é inacción e opacidade”.

A formación advirte de que a falta de execución está a provocar malestar entre a veciñanza e gastos innecesarios para o concello en cada rotura. “Se o proxecto leva dous anos atascado entre administracións, alguén debe dar explicacións e asumir responsabilidades. O que non pode ser é que a veciñanza siga sufrindo mentres o Concello e a Deputación botan balóns fóra”, concluíu o voceiro.

Esquerda Unida denuncia que o CEIP Valle-Inclán leva dúas semanas sen conserxe e esixe unha solución inmediata

A formación critica que o Concello priorice a Festa do Marisco fronte ao correcto funcionamento dun centro escolar público. 

Esixen que se cubra de inmediato o posto de conserxe mediante a bolsa de emprego e que non se condicione a prestación deste servizo esencial á celebración de eventos municipais.

O Grove, 06 de outubro de 2025.- Esquerda Unida vén de denunciar a falta dun conserxe no CEIP Valle-Inclán, unha situación que se prolonga dende o pasado 19 de setembro, cando rematou a persoa que viña ocupando o posto, e que, segundo sinalan, non ten visos de solucionarse a curto prazo. 

No pleno municipal foi o concelleiro de Esquerda Unida, Anxo Meis, quen preguntou pola ausencia de conserxe no centro. A resposta da concelleira de Educación foi que unha nova persoa da bolsa de emprego debería incorporarse o 25 de setembro, pero que, debido a un trámite administrativo, a contratación non puidera executarse, e que agardaban resolver a situación esa mesma semana. Porén, a realidade é que o problema continúa sen solución e o posto segue sen cubrir. 

Desde Esquerda Unida explican que o propio centro comunicou que a resposta do Concello é que o persoal municipal está actualmente destinado á Festa do Marisco, converténdose esta actividade na prioridade do goberno local. “Resulta inadmisible que se antepoña unha festa a un servizo esencial como é o da atención e seguridade do alumnado dun colexio público”, denuncian. 

A formación teme que a ausencia de conserxe se prolongue ata despois do 12 de outubro, data de remate da Festa do Marisco, “algo totalmente inaceptable nun servizo esencial para o funcionamento do centro e a atención diaria do alumnado”. 

EU cualifica de “lamentable” que se desatenda unha cuestión tan básica e que se engane á veciñanza con promesas que non se cumpren. “Non pode ser que o curso escolar chegue co centro sen conserxe e que, en lugar de buscar unha solución inmediata, o goberno municipal mire para outro lado”, sinalan desde EU. 

O grupo municipal esixe ao Concello que priorice os servizos públicos esenciais e que proceda de maneira urxente a cubrir o posto de conserxe no CEIP Valle-Inclán, “garantindo o correcto funcionamento do centro e a seguridade dos cativos”. 

“Non é de recibo que unha festa, por moi importante que sexa, estea por riba da educación e da atención ao alumnado. É preciso xestionar con responsabilidade, e non converter a desorganización nunha costume”, conclúen desde Esquerda Unida.

PLENO SETEMBRO 2025

ROGOS E PREGUNTAS

📅 29 de setembro de 2025

▶ Intervención: minuto 1:19:50

🔗 Enlace ao vídeo

Preguntas realizadas

🔻 Estación de carga de vehículos eléctricos da rúa Castelao

Preguntamos cando comezaría a funcionar esta estación de carga e cal sería o sistema de xestión do servizo.

🔻 Estación de carga nas inmediacións da Confraría

Preguntamos cando se iniciaría a instalación desta infraestrutura prevista.

🔻 Estación de carga da rúa Alexandre Bóveda

Preguntamos cando finalizaría a gratuidade do uso desta estación de carga.

🔻 Oficina municipal de Consumo

Preguntamos polo motivo do peche da oficina “ata novo aviso”.

🔻 Mercado Municipal

Preguntamos cando se licitarían os locais e postos vacantes do mercado.

🔻 Paso de peóns en Terra de Porto

Preguntamos cando se procedería ao pintado deste paso de peóns reclamado pola veciñanza.

🔻 Cambio de sentido da rúa Conchases

Preguntamos cando se faría efectivo o cambio de sentido neste tramo da rúa para facilitar a saída da veciñanza cara Terra de Porto.

🔻 Auditorio municipal

Preguntamos polo estado da reclamación da garantía de obra do ascensor e polas diferentes deficiencias do edificio.

🔻 Gretas na rúa Alexandre Bóveda

Preguntamos polo estado da reclamación da garantía da obra para reparar estas gretas.

🔻 Local do Club Remo Mecos

Preguntamos polo estado da reclamación pola obra de adaptación do local.

🔻 Compra do terreo de Entrehortas

Preguntamos polo estado do proceso de compra para ampliar o aparcadoiro.

🔻 Sentenza do TSX en Terra de Porto

Preguntamos polos motivos polos que o goberno municipal non executara a sentenza que obrigaba a repoñer a legalidade dunha obra.

🔻 Padrón municipal

Preguntamos polo motivo polo que se retirara do padrón municipal a unha familia do Grove mediante Decreto de Alcaldía.

Rogos e solicitudes

🔻 Camiño do alto de Pardiños

Solicitamos unha solución ante o mal estado deste camiño e o risco que supón para vehículos e viandantes.

🔻 Paso de peóns na rúa Escalinatas

Solicitamos unha solución á situación dos viandantes que deben circular pola estrada tras eliminarse o paso de peóns diante da parada de bus.

🔻 Foro La Toja

Solicitamos que o Alcalde non asistise a este evento en consideración co apoio ao pobo palestino.

Esquerda Unida acusa ao goberno local de “condenar O Grove ao caos” durante o verán

O grupo municipal denuncia que o verán no Grove estivo marcado polo caos circulatorio, a falta de prazas de estacionamento, os servizos públicos saturados e a inacción dun goberno que, malia ter recibido múltiples avisos, non puxo en marcha ningunha medida de prevención. 

A formación critica tamén a mala imaxe xerada pola falla de limpeza e recollida de lixo selectivo, o desleixo na atención ás praias e a ausencia de medidas de control e planificación, o que cualifican como “un novo fracaso do PSOE” á hora de xestionar a tempada estival.

O Grove, 3 de setembro de 2025.- Esquerda Unida do Grove fixo este mércores un balance moi crítico da tempada estival, asegurando que “cando pensabamos que o caos do verán pasado era insuperable, este goberno demostrou a súa capacidade de superación, conseguindo empeoralo”. A formación acusa ao executivo de José Cacabelos de “condenar a vila ao caos por culpa da súa deixadez e incompetencia”, e denuncia que “a imaxe que se ofreceu este verán foi nefasta, tanto para a veciñanza como para os milleiros de visitantes que nos escollen. A sensación que se levaron os turistas foi dunha vila abandonada”. 

O voceiro municipal, José Antonio Otero, foi rotundo, “Este goberno só funciona a base de improvisación e propaganda. Non existe nin unha soa planificación seria. Levamos meses pedindo o pintado dos pasos de peóns e o desbroce de rúas e estradas, e chegamos a xullo cunha vila sen sinalización horizontal, con rúas recen asfaltadas sen delimitar e con beirarrúas e camiños invadidos pola maleza, provocando unha imaxe dantesca e un serio perigo para os viandantes. É un auténtico milagre que non se producira un accidente fatal”. “Non é de recibo que se pinten parte das sinalizacións horizontais e se desbroce en pleno agosto” sentenciou. 

Otero incidiu tamén na falta de efectivos da Policía Local, na inexistencia dun servizo de guindastre e na falta de estacionamentos disuasorios. “Este verán O Grove converteuse practicamente nunha vila sen lei. Calquera podía aparcar diante dun garaxe, circular en dirección contraria ou ocupar beirarrúas sen que pasara nada. E mentres tanto, seguimos sen un servizo de guindastre, algo que levamos anos reclamando e que sería fundamental para garantir o cumprimento das normas e dar solución inmediata ás persoas afectadas”. “Este goberno non tivo capacidade para crear zonas de estacionamento disuasorio, tanto nas inmediacións dos areais como no propio casco urbano, a pesar de comprometerse a iso e contar con propostas enriba da mesa dende hai tempo. O abandono foi tal que incluso se reduciron prazas de estacionamento no aparcadoiro de Entrehortas debido á obra de humanización da zona, que acumula un serio retraso”. 

Tamén a concelleira Susana Millán cargou con dureza contra a xestión turística e a ausencia de planificación. “Neste último mes, o alcalde chegou a recoñecer que non estamos preparados para recibir a afluencia de visitantes, pero a realidade é que o que non está preparado é el nin o seu goberno. Despois de dez anos no poder, seguimos sen técnico especializado, sen un plan turístico, sen estratexia e sen mesas de traballo co sector. O que hai son declaracións vagas na prensa para xustificar o fracaso da súa xestión”. 

Millán fixo especial fincapé na problemática do autocaravanismo. “Pasamos do abandono absoluto á tentación de prohibir, e facelo de forma ilegal. O turismo de autocaravanas leva anos medrando e é tan respectable como calquera outro, pero necesita infraestruturas e servizos mínimos. Nós propuxemos a creación de áreas de autocaravanas con servizo de descarga e recollida de augas, gratuítas ou de pago, pero o goberno fixo oídos xordos. Se non se actúa, seguirán os problemas de convivencia e os discursos contra este tipo de visitantes”. “A acampada fóra dos espazos habilitados e as actitudes incívicas dunha parte dos autocaravanistas, como a do resto de visitantes e veciñanza, é sancionable sen necesidade de máis regularización, o problema é que non hai quen sancione”. 

 Para a concelleira de Esquerda Unida “a tempada pode considerarse exitosa en canto a afluencia, pero dubidamos que quen se achegou por primeira vez a O Grove contemple regresar o vindeiro ano”. Segundo Millán, “a solución pasa por contratar persoal especializado e sentar ao sector e traballar nunha planificación e unha estratexia turística conxunta que marque o camiño a seguir e as necesidades reais”. 

Pola súa parte, Anxo Meis, puxo o foco na situación dos paseos e accesos ás praias, que cualificou como “un perigo público”. “Levamos anos advertindo do deterioro das pasarelas de madeira e dos accesos aos areais, e a realidade é que cada ano están peor. Táboas levantadas, pasamáns rotos ou directamente inexistentes,… O resultado é que houbo numerosos incidentes, o máis grave o dunha persoa evacuada en helicóptero na zona de Pedras Negras. E o alcalde responde con cifras inventadas de máis de 4 millóns de euros para a súa reparación, sen auditoría nin informe técnico que o avale. Iso non é seriedade, é improvisación e abandono”. 

Meis insistiu en que esta situación podería terse evitado con algo tan simple como un plan de mantemento anual. “Non estamos falando de obras faraónicas, senón de revisar cada ano o estado dos paseos e accesos, reparar o que estea danado e asegurar a súa seguridade. Cando non se fai nada, o resultado é o que temos hoxe: infraestruturas en estado lamentable e risco para as persoas”. 

Outro dos puntos destacado por Meis foi a recollida selectiva de residuos, que, segundo denunciaron, “non funcionou como debería”. “Foron moitas as ocasións nas que os colectores de cartón, plástico e/ou vidro estiveron cheos durante días sen que a empresa encargada procedese á súa retirada. Xa o advertimos en pleno e pedimos aumentar a frecuencia de recollida, sobre todo no casco urbano polo incremento poboacional, pero o concello fixo caso omiso”. 

A situación levou a que moitos usuarios deixaran bolsas e caixas acumuladas a carón dos colectores, “ofrecendo unha imaxe lamentable da vila”. Meis lembrou que a primeira vez que EU denunciou o problema “díxosenos que fora un erro puntual, pero a realidade é que se repetiu en numerosas ocasións, demostrando que o problema é estrutural e de falta de previsión”. 

Os tres concelleiros coincidiron en que a vila non pode seguir neste camiño. “Cada verán a situación empeora, e todo porque non hai planificación, non hai mantemento e non se aposta polos servizos públicos. O Grove non pode seguir á deriva, funcionando a golpe de improvisación. Se non se toman medidas serias, cada tempada estival converterase nun problema maior ca o anterior”, concluíron. 

Entre as medidas que Esquerda Unida propón destacan: dotar de máis persoal e medios aos servizos municipais, crear unha brigada estable de limpeza e desbroce, poñer en marcha o servizo de guindastre e depósito de vehículos, habilitar zonas de estacionamento disuasorio, crear áreas para autocaravanas, mellorar a recollida selectiva de residuos e, sobre todo, abrir un debate serio sobre o futuro turístico da vila a través do Consello Local de Turismo e coa contratación dun técnico especializado. 

“Se non temos unha vila limpa, ordenada e mantida para nós mesmos, é imposible tela en boas condicións para os que nos visitan”, conclúen.