1º de maio. Unidas Conquistamos Dereitos

 

MANIFESTO DE ESQUERDA UNIDA 1º DE MAIO DE 2022

Este 1º de Maio celebramos por primeira vez nos máis de 40 anos desde a aprobación do Estatuto dos Traballadores que as persoas traballadoras deste país recuperamos dereitos cunha reforma laboral: dereito á negociación colectiva e á ultraactividade dos convenios colectivos; dereito á igualdade entre as persoas encadradas no réxime agrario e o xeneral e, sobre todo, o piar de calquera dereito, o traballo estable mediante un contrato digno.

‘Vou darlles varios datos’: os contratos indefinidos pasaron do 5% ao 30% en marzo, o mellor mes ata o de agora desde que existen rexistros, e iso a pesar dos efectos da guerra e do paro no transporte. Ademais, no último ano o paro reduciuse en máis de 840.000 persoas e hai 19.958.479 persoas afiliadas á Seguridade Social, o nivel máis alto da serie histórica.

Os ministerios baixo responsabilidade de Unidas Podemos teñen como gran obxectivo mellorar a vida das persoas traballadoras do noso país, o mesmo que sinalou Esquerda Unida dende o primeiro momento de formar parte do Goberno de coalición. Púxose en práctica dignificando o Salario Mínimo Interprofesional (SMI), defendendo o dereito das consumidoras e consumidores fronte ao capitalismo especulador, indo máis aló na defensa da igualdade de xénero en todos os ámbitos, realizando propostas para unha política fiscal xusta e para desenvolver unha industria sostible que cre emprego e beneficie á clase traballadora, rompendo esa dinámica do capital na que os ricos saen máis ricos das crises que eles mesmos provocaron.

Esquerda Unida considera que a recuperación de dereitos coa reforma laboral é só o principio, de feito, ao día seguinte da súa posta en marcha definitiva fixemos pública nosa proposta para un novo Estatuto dos Traballadores, que equilibre as relacións laborais, reforce o sindicalismo de clase e democratice a vida laboral das persoas traballadoras.

Nestes momentos toca loitar por manter o poder adquisitivo dos salarios. EU está firmemente comprometida cos sindicatos para defender a revisión dos convenios colectivos en base ao IPC. Apoiamos tamén unha nova normativa que dignifique as prácticas non laborais e evite as fraudes nesta materia. Ademais, buscamos que se mellore de forma urxente a protección das persoas traballadoras máis vulnerables, por iso apoiamos a Iniciativa Lexislativa Popular Regularización, e a ratificación do convenio 189 da OIT para que os dereitos das empregadas do fogar sexan recoñecidos. En definitiva, é a hora de avanzar en dereitos para todas.

Non esquecemos que as guerras afectan á vida das traballadoras e os traballadores, ameazan os seus empregos e afunden as economías dos países que as sofren directa ou indirectamente. Este 1º de Maio esiximos que pare inmediatamente a guerra en Ucraína e todas as que hai no mundo. Estamos en contra do anunciado aumento do gasto militar, que se fará á conta de recortar gastos sociais. Dende os centros de traballo debe soar un berro unánime: NON Á GUERRA!

Estamos seguras de que unidas conquistamos dereitos: dende a rúa, con gobernos de esquerda e dende a dignificación dos centros de traballo:

POLOS DEREITOS LABORAIS EN IGUALDADE!

VIVA O 1º DE MAIO!

O grupo municipal de EU denuncia que non lle deixan acceder ao Auditorio

  

Os concelleiros de Esquerda Unida seguen agardando que lles respondan á solicitude realizada o día 6 de abril e lles permitan visitar o interior dun Auditorio que a día de hoxe segue pechado a pesar de que hai un mes que o Alcalde anunciou a recepción da obra.

O Grove, 25 de abril de 2022.- Preto dun mes despois de que o Alcalde anunciase a recepción do Auditorio Escola de Música, o edificio segue pechado a cal e canto sen que ninguén coñeza os motivos. O que si se pode ver son obreiros no exterior do inmoble traballando na estrutura do ascensor, que a día de hoxe segue sen estar rematada. Unha situación que alertan dende Esquerda Unida ademais de denunciar que ao seu grupo municipal non lle dan acceso ao interior do inmoble a pesares de telo pedido formalmente por rexistro.

E é que o pasado 6 de abril, o voceiro do grupo municipal, José Antonio Otero, e a compañeira na corporación, Ana Cristina Domínguez, solicitaron por rexistro o acceso ao Auditorio Escola de Música para visitar o seu interior e as diferentes salas do edificio. A día de hoxe, 18 días despois, seguen sen ter contestación da administración local e, aínda que ese silencio administrativo lles outorga o dereito a acceder ao inmoble, non saben a que departamento se teñen que dirixir para que lles abran as portas ou os acompañen para realizar a demandada visita.

Unha situación que chega a facer sospeitar aos esquerdistas que o Auditorio non esta listo para utilizar tal e como ten anunciado Cacabelos nas súas peculiares intervencións. Otero e Domínguez non entenden tal escurantismo entorno a un edificio municipal de tal envergadura e cal é o motivo polo que dende o día 6, que fixeron a solicitude, non recibiran resposta algunha á súa petición polo que instan ao goberno a non demorala máis e que lles indiquen o proceder para poder visitar o interior do Auditorio, xa que é un dereito que lles corresponde como concelleiros da corporación grovense. 

Gabinete de Prensa

Esquerda Unida O Grove

EU alerta que o goberno non fai nada para combater a soidade non desexada

  

Os esquerdistas lamentan que dez meses despois de aprobarse unha moción presentada polo seu grupo municipal relativa á soidade non desexada, o goberno non executara ningún dos puntos de acordo.

Instan ao goberno a elaborar o censo de persoas que viven soas e o Plan de Envellecemento Activo así como a adherirse á rede de Cidades Amigables coas Persoas Maiores e ao proxecto Cidades que Coidan. 

O Grove, 19 de abril de 2022.- A agrupación local de Esquerda Unida lamenta que a día de hoxe, o goberno municipal non teña feito nada do aprobado na moción que o seu grupo municipal presentou en xuño de 2021 co propósito de combater a soidade non desexada. 

E é que nesa moción, que foi aprobada por unanimidade, os esquerdistas instaban ao goberno a crear un censo local de persoas maiores que viven soas, a elaborar un plan de envellecemento activo e a adherirse á rede de “Cidades Amigables coas Persoas Maiores” e ao proxecto “Cidades que Coidan”. 

Segundo indican dende Esquerda Unida, dez meses despois dese pleno a concellería delegada non ten feito nada e así llo confirmaron no pleno do pasado 28 de marzo cando preguntaron polo cumprimento do aprobado. “Pero é que nin tan sequera, dúas semanas despois de quedar en evidencia no pleno, se deron pasos para, cando menos, iniciar os trámites de algún dos puntos de acordo”, denuncia o voceiro esquerdista José Antonio Otero. 

Otero lembra que a moción “pretendía que dende a administración local se traballase para combater a soidade non desexada, que a pesares de incidir en todas as etapas da vida, agudízase en persoas maiores de 65 anos, ocasionando un impacto directo e negativo sobre a saúde e o benestar de quen a padece”. Para iso, dende Esquerda Unida solicitaban a elaboración dun censo de persoas maiores que viven soas no Concello do Grove e con iso elaborar un Plan de Envellecemento Activo que tivese como obxectivos coñecer as necesidades das persoas que viven soas, ofrecer información de actividades lúdicas que puidesen ser do seu interese, ofrecer alternativas de ocio, informar e solicitar o servizo de teleasistencia de forma gratuíta, fomentar as relacións persoais e crear unha rede de axuda e acompañamento na que puidese colaborar a propia veciñanza. 

Así mesmo, tamén se instaba a que o Concello do Grove se adherise á rede de Cidades Amigables coas Persoas Maiores, da que forman parte outros 219 concellos do Estado, 5 deles galegos, así como ao proxecto Cidades que Coidan “co único fin de cumprir os seus obxectivos e promover un envellecemento activo e saudable e combater a soidade non desexada”, indica o voceiro esquerdista.  

É por iso que dende Esquerda Unida piden que “se comece a traballar axiña na posta en marcha dos puntos do acordo, e camiñar canto antes para lograr un maior coidado dos e das nosas maiores, sobre todo das que viven soas”.