Foto denuncia EU - Maleza na rúa de Hortos

📸⚠️Esta vez as fotografías son da Rúa Hortos onde a vexetación ten unha altura considerable e a beirarrúa pasa a converterse en vertedoiro improvisado😳

Esquerda Unida pregunta en que condición asistiu a exconcelleira de Turismo á presentación da Festa do Marisco en Holanda e quen pagou a súa viaxe

José Antonio Otero e Cristina Domínguez queren coñecer o motivo polo que a exconcelleira acudiu a Amsterdam representando ao Concello cando xa non está vinculada ao goberno local.

Solicitan información relativa aos gastos da viaxe a terras holandesas e preguntan se o goberno ten contemplado contratar a exconcelleira como asesora.

O Grove, 09 de xullo de 2019.- O pasado xoves, unha comitiva grovense acudiu a Amsterdam (Holanda), para realizar a presentación internacional da Festa do Marisco. Ademais do Alcalde e o persoal que sempre o acompaña neste tipo de actos, este ano tamén formou parte da comitiva a que, ata o pasado mes de xuño, foi a concelleira de Turismo do Grove. Unha circunstancia que en Esquerda Unida consideran incomprensible e máis aínda cando o Alcalde anunciou nos medios de comunicación que asistía como representante do Concello.

Así, os concelleiros de Esquerda Unida, José Antonio Otero e Cristina Domínguez, queren coñecer o motivo polo que a exconcelleira acompañou ao Alcalde á Amsterdam e quen sufragou os gastos da súa viaxe, máxime cando non ten ningunha vinculación co Concello. Se se confirma que foi o concello quen correu cos gastos desa viaxe, os esquerdistas pedirán responsabilidades pois, entenden que se estaría pagando a viaxe dunha persoa vinculada unicamente ao PSOE con cartos públicos.

Para Otero e Domínguez que a exconcelleira fose a encargada de preparar a presentación antes de abandonar o seu cargo, non é motivo para que acompañe ao Alcalde a Amsterdam e que este a presente como representante do municipio e menos que lle paguen a viaxe con cartos das arcas municipais. Por iso os edís esquerdistas consideran isto como unha mostra do despotismo que ten este goberno de maioría e non entenden que con dez concelleiros/as, o Alcalde teña que recorrer a unha exconcelleira para poder levar a cabo a presentación da Festa do Marisco fora do estado, salvo que contemple outorgarlle un cargo no goberno municipal como asesora.  

Gabinete de Prensa

Esquerda Unida O Grove

Foto denuncia EU - Maleza nas beirarrúas da estrada do Sieiro-Campos

☝️Este é o estado das beirarrúas no Lugar de Campos.

📸  A maleza invade o espazo destinado aos peóns. A veciñanza desta zona, cansada desta situación, decidiu enviarnos estas fotografías.

Foto denuncia EU - Maleza nos arredores do parque infantil da Casa da Cultura de San Vicente

Seguimos coa campaña de limpeza!!! 

📸Estas fotografías fáinolas chegar unha veciña de San Vicente descontenta co estado no que se atopan o parque e os arredores da Casa da Cultura Ángel Vázquez Hereder.

Esquerda Unida insta ao concello a activar o “punto morado” durante as Festas do Carme

Punto Morado instalado no pavillón durante o Festival de Comparsas 2019.
Foto CIM O Grove

A concelleira de Esquerda Unida e responsable da área de Muller preguntou por rexistro se o Concello vai poñer en marcha o “punto morado” durante a Festa do Carme.

Os esquerdistas instan a cumprir a moción aprobada en maio do 2018 e poñer durante as festas un punto de información contra a violencia machista con persoal cualificado.

O Grove, 08 de xullo de 2019.- A menos dunha semana de que dea comezo a Festa do Carme, Esquerda Unida non ten constancia se a concellería de Igualdade ten previsto poñer en marcha o “Punto Morado”. Un servizo de información sobre a igualdade entre mulleres e homes e atención para posibles casos de violencia de xénero.

Por ese motivo, a concelleira de Esquerda Unida e responsable da área de Muller, Cristina Domínguez, preguntou por rexistro o pasado xoves si o Concello contempla a instalación dese punto para as festas do Carme e en caso contrario insta a facelo en base a moción aprobada en maio do 2018.

E é que en maio do ano pasado, os esquerdistas elevaron a pleno unha moción na que se pedía, entre outras medidas, a creación de “Espazos Seguros” para as mulleres durante os espectáculos masivos, elaborando un protocolo en colaboración con Consello Local da Igualdade e o Centro de Información á Muller.

Cristina Domínguez recorda que xa nas festas do ano pasado non foi activado ese “espazo seguro” ou “Punto Morado”, a pesar de estar aprobada a moción e que na Festa do Marisco do 2018, logo de ter anunciado a súa posta en marcha, o “Punto Morado” reduciuse a unhas simples mesas con varios dípticos, pero sen persoal que informara. É por iso que Esquerda Unida pide a súa posta en marcha para esta edición das Festas do Carme do mesmo modo que funcionou, trala insistencia do seu Grupo Municipal, no pasado Entroido pero reclama que a partir de agora, aparte das persoas que forman parte do CLI tamén se inclúa persoal cualificado e preparado para informar e atender posibles casos de violencia machista.

Punto Morado instalado na rúa Castelao durante o desfile de disfraces 2019. 
Foto CIM O Grove

Gabinete de Prensa

Esquerda Unida O Grove

Foto denuncia EU - Maleza na beirarrúa da rúa do Conde

📌 Continúan chegando, ás redes sociais de Esquerda Unida, fotos dos veciños solicitando a intervención dos servizos de limpeza. 

📸Esta fotografía fíxose na Rúa do Conde, a maleza case cubre toda a superficie de paso dos viandantes.

Foto denuncia EU - Maleza no acceso ao colexio Valle-Inclán (solucionado)

☝️ Esta semana trasladábamos ao concello unha queixa dos veciños molestos coa maleza nos arredores do colexio Valle Inclán. 

👌 Hoxe puidemos verificar que a queixa foi escoitada.

👉 Ver fotodenuncia

Foto denuncia EU - Elementos de xogo do parque infantil do Corgo rotos

📷 Unha usuaria do parque infantil do Corgo achéganos estas imaxes onde se pode ollar que un dos seus elementos de xogo está roto. Entre unha imaxe e outra hai 15 días de diferenza, o que demostra que dende o concello non están a solucionar o problema, nin se toman as precaucións precisas para evitar incidentes.

👨‍🔧 Dende Esquerda Unida temos insistido na necesidade dun plan de mantemento continuo nos parques infantís, que procuren repoñer e/ou arranxar os elementos de xogo que se atopen deteriorados ou rotos. Por ese motivo, instamos á concellería delegada para que solucione o problema do parque Infantil do Corgo e, ante o aumento do uso dos parques nestas épocas, se faga unha revisión continua de todos os do Concello.

Foto denuncia EU - Maleza no acceso ao colexio Valle-Inclán

⚠️ Este é o estado no que se atopa o acceso ao colexio Valle-Inclán por onde, estes meses de xullo e agosto, transitarán cada día numerosos rapaces e rapazas para dirixirse ao Campamento de Verán do Concello do Grove que se desenrola no centro educativo. 

👨‍👨‍👧‍👦Varios pais e nais transmitíronnos as súas queixas sobre esta situación e dende Esquerda Unida xa o puxemos en coñecemento do concelleiro delegado para que se solucione o máis axiña posible.

Esquerda Unida móstrase molesto por non ser convidado ao izado da bandeira representativa do colectivo LGTBIQ e pregunta que ten feito o goberno no seu favor nestes últimos anos

Onte conmemorouse o 50 aniversario das revoltas de Stonewall en New York en 1969. O colectivo LGTBIQ leva dende entón defendendo os seus dereitos e loitando para que a orientación sexual e as diferenzas de identidade de xénero deixen de ser un estigma social. As súas reivindicacións están de actualidade máis que nunca por mor dos discursos homófobos das formacións políticas de dereitas que fomentan todo tipo de mentiras e prexuízos sobre este colectivo.

En maio de 2016 o grupo municipal de Esquerda Unida O Grove levou a pleno una moción que foi aprobada por unanimidade e na que instaba ao goberno local a adquirir a partir dese momento un compromiso cos veciños do Grove para que a nosa vila sexa un lugar libre de discriminación por orientación sexual, diversidade de xénero e diversidade familiar.

A día de hoxe non sabemos que ten feito o goberno neste senso alén de colgar a bandeira representativa do colectivo no balcón do Concello á media mañá do día da celebración do Orgullo LGTBIQ. Nesa moción, ademais de pedir que se colgase a devandita bandeira en apoio ao colectivo, instábase a que o Concello fomentara o asociacionismo LGTBIQ reivindicativo para lograr o seu fortalecemento e crecemento, promover o coñecemento e compromiso coa loita contra a LGTBIfobia entre o persoal laboral da administración local e sobre todo das forzas e corpos de seguridade a través de cursos de formación, apoiar e difundir as convocatorias dos colectivos LGTBIQ, promover charlas nos institutos da campaña da FedLGTB “escolas sen armarios”,... Dende Esquerda Unida temos o convencemento de que hai que seguir traballando para eliminar todo tipo de discriminación cara este colectivo e queremos recordarlle ao goberno que os compromisos adquiridos son para cumprilos porque é unha obriga que temos coa veciñanza.

A LGTBIfobia debe ser combatida por todos nós e polas administracións públicas. Cunha lexislación que fomente a igualdade e liberdade, que defenda unha da sociedade plural e respectuosa con todas as persoas, e que garanta unha vida digna ao colectivo LGTBIQ.

Así mesmo, dende Esquerda Unida mostramos o noso malestar polo que consideramos unha falta de respecto á nosa organización e aos membros da oposición en si, ao non ser convidados ao izado da bandeira representativa do movemento LGTBIQ no día de onte. Unha circunstancia que xa se ven dando nos últimos dous anos. O alcalde no acto de investidura resaltou a importancia do acto de gobernar fronte ao de mandar, destacando o traballo das 17 persoas que forman a corporación. Que os grupos da oposición tivesen presenza no acto de colocación da bandeira arco iris no balcón do concello puido ser una boa forma de demostra que non eran solo verbas. Sobre todo porque a moción que dou lugar ao acto de hoxe presentouna o noso grupo municipal de Esquerda Unida.

Puntos de acordo aprobados por unanimidade no pleno de maio de 2016

1- Contribuír, nas competencias que lle son propias a este Concello, ao desenvolvemento e aplicación de todas as medidas previstas na lexislación vixente contra toda discriminación por orientación sexual, identidade de xénero e diversidade familiar, coa finalidade de erradicar da nosa sociedade calquera tipo de LGTBfobia no ámbito familiar, escolar, laboral, social e/ou político.

2- Fomentar as condicións de posibilidade para o fortalecemento e o crecemento do asociacionismo LGTBI reivindicativo, entendendo a este como un protagonista clave na loita contra a homofobia, transfobia, bifobia e lesbofobia.

3-  Promover o coñecemento e o compromiso coa loita contra a LGTBfobia entre o persoal laboral da administración local, especialmente entre os corpos policiais, a través de campañas de sensibilización e cursos de formación desenvolvidos polos propios colectivos.

4- Apoiar e difundir as convocatorias contra as agresións que realizan os colectivos LGTBI en todos os espazos que competen á administración local, especialmente nos lugares de lecer, educativos, asistenciais, administrativos e de transporte.

5- Garantir atención integral a todas as persoas que sufriron discriminación ou que foron obxecto dun delito de odio, con especial atención aos colectivos máis vulnerables.

6- Recoñecer a determinante contribución de todas aquelas persoas e colectivos que veñen defendendo durante décadas os dereitos de lesbianas, homosexuais, transexuais e bisexuais.

7-  Estender, durante o día 28 de xuño, día internacional do orgullo gai, unha ensina coas cores da bandeira arco iris, representativa do colectivo LGTB, na fachada principal do edificio do concello, xunto ao resto de bandeiras institucionais.

8- Instar á Xunta ao cumprimento das 5 recomendacións urxentes da Valedora do Pobo. Así, urxe a existencia dun documento transitorio de identidade para os maiores de idade no que se recolla o seu nome elixido sen ter que esperar ata “dous anos” para ese cambio; así como cambiar no nome nos cartóns sanitarios de menores transexuais. Maior pedagoxía en escolas; aumentar a formación de profesionais da educación, sanidade e administración; e desenvolvemento dun protocolo de Atención Primaria no Sergas para asistir de “forma certa e segura”. Paso previo dunha lei galega de igualdade e diversidade.

9- Convidar a FELGTB, ou no seu caso galega, a realizar charlas nos institutos da súa campaña “Escuela sin armarios” (www.escuelasinarmarios.com)

Esquerda Unida solicita a documentación actualizada do PXOM

José Antonio Otero indica que o Alcalde comprometeuse en campaña a entregar a documentación corrixida do Plan Xeral á oposición e subila á web.

Dende Esquerda Unida recordan que o publicado na páxina do Concello e en diversos locais públicos non se corresponde coa planimetría real do PXOM.

O Grove, 20 de xuño de 2019.- Esquerda Unida afirma que o pasado 17 de maio, en plena campaña electoral, un medio comarcal publicou unha entrevista realizada ao candidato do PSOE e Alcalde do Grove, José Cacabelos, onde indicaba que neses días se estaban aplicando as correccións de mais de 150 erros detectados polos veciños e veciñas e aseguraba que ía mandar á oposición toda a documentación cos erros xa corrixidos e que nos días vindeiros –á realización da entrevista– se ía subir á web para que se puidese consular por toda a veciñanza.

O voceiro de Esquerda Unida, José Antonio Otero declara que “Non sabemos cantos días corresponden no calendario de Cacabelos a vindeiros, pero xa contando dende a publicación da entrevista (17 de maio) pasou un mes e nin a oposición temos a documentación, nin a veciñanza ten coñecemento de si as súas reclamacións foron atendidas ou non, pois o PXOM que segue colgado na web segue a ser o mesmo que contiña os erros”.

Esta é unha situación á que, segundo Otero, os ten habituado o Sr. Cacabelos, “pois no mandato que rematou foi constante o número de veces que anunciou datas para innumerables asuntos e logo non se cumpriran os tempos ou simplemente non se facían”. “E vendo este novo incumprimento, esta vez tralo anuncio en campaña electoral, entendemos que sufriremos esta situación outros catro anos máis”, subliña o voceiro esquerdista.

Para Esquerda Unida, xa non valen as escusas, pois “si non o tiña listo non debería ter anunciado datas, e si realmente está xa corrixido e listo para amosar, non sabemos a que agarda. Non nos vale a escusa das eleccións, pois salvo que siga de resaca electoral, o goberno non cambiou e non foi preciso unha adaptación como sería habitual si houbese un novo equipo ao mando”.

Por ese motivo, os esquerdistas solicitan que se lle entregue a nova planimetría cos erros xa corrixidos e se publique canto antes na web para que os veciños poidan comprobar que os cambios foron realmente realizados.

Gabinete de Prensa

Esquerda Unida O Grove

Ler entrevista do Diario de Arousa do 17 de maio de 2019.

Esquerda Unida rexeita o depósito dos lodos do dragado do Lérez nas proximidades de Sálvora

A agrupación local de EU amosa o seu apoio á Plataforma en Defensa da Ría de Arousa na súa manifestación en contra da decisión de Portos de Galicia.

Instan a Cacabelos a reunir ás concelleiras e concelleiros trala conformación da nova corporación para facer unha declaración institucional opoñéndose ao depósito dos lodos do dragado do Lérez na boca da ría.

O Grove, 12 de xuño de 2019.-  Trala noticia dos últimos días na que se indicaba que Portos de Galicia autorizaba a depositar os lodos, que se retirarán do dragado do río Lérez, nas proximidades da Illa de Sálvora, Esquerda Unida mostra o seu rexeitamento a esta medida que consideran prexudicial para os intereses da ría de Arousa.

Os esquerdistas non entenden que o órgano dependente da Xunta de Galicia tome esta medida logo de que as confrarías de Pontevedra se opuxeran ao depósito dos lodos preto de Tambo, que era a primeira opción. Entenden que si é prexudicial para a ría de Pontevedra, máis o será para a de Arousa que é unha das máis produtivas do estado e instan á Consellería do Mar a valorar, de forma consensual cos sectores implicados, unha alternativa que non prexudique aos sectores produtivos, ao medio ambiente e ás rías galegas.

Esquerda Unida mostra o seu apoio á Plataforma en Defensa da Ría de Arousa nas súas reivindicacións e insta a Cacabelos a que a primeira medida que tome trala conformación da nova corporación e a toma de posesión como Alcalde, sexa a de convocar a todas as concelleiras e concelleiros para realizar unha declaración institucional apoiando as reivindicacións da PDRA, das confrarías e das asociacións de produtores da Ría de Arousa en contra desta decisión polo risco que este ataque ao noso medio natural supón para os recursos pesqueiros e a economía da zona.

Gabinete de Comunicación

Esquerda Unida O Grove

Oposición construtiva e estar ao lado da veciñanza, comenda da militancia aos concelleiros e á organización.

A pasada semana, a coordinadora local reuniuse coa candidatura e a militancia para analizar os resultados emanados do proceso electoral do pasado 26 de maio e marcar a liña de traballo para o novo mandato. Dende Esquerda Unida queremos compartir as nosas conclusións;

Os resultados acadados pola nosa formación foron óptimos, logramos mellorar lixeiramente o número de apoios e mantemos as dúas actas que posuíamos.

Certamente o noso obxectivo era sumar máis actas, máxime cando no 2015 quedamos a escasos trinta e nove votos de obter a terceira. Desta volta, a pesar de baixar a participación (2,44 puntos menos) e termos subido lixeiramente en apoios, non logramos o aumento de representación, quedando novamente a escasos votos de acadar esa terceira acta.

Fomos a única forza da catro que formábamos a oposición que no tanto de perder apoios, logramos aumentalos. Isto non se produciu por inercia, senón polo traballo realizado estes catro anos como grupo referente da oposición, levando propostas e sendo fiscalizadores do traballo do goberno. Un traballo que, a pesar de consideralo bo, non logramos que chegara a toda a veciñanza –así nolo transmitiron–, polo que non podemos máis que considerar óptimos os resultados obtidos.

Por outro lado, dende Esquerda Unida entendemos o ascenso do PSOE derivado de tres factores. O primeiro debido á tendencia a alza producida polas eleccións xerais –sucedeu o mesmo no 90% dos concellos do estado–, en segundo lugar polo seu traballo de marketing e visualización dende o goberno, a pesar de que os feitos non son reais, e en terceiro lugar, polo descenso dos demais grupos da oposición. No caso do Partido Popular, que contaba con catro concelleiros e pasou a 3, non fixo oposición ningunha estes catro anos, polo que non só non foi quen de recuperar o electorado que perdera no 2015 a raíz do PXOM, senón que aumentou considerablemente esa perdida de votantes. O mesmo sucedeu con BNG e PGD. A partir de agora agárdanos un panorama complexo, pero non moi diferente ao vivido estes dous últimos anos, pois o PSOE xa contaba con maioría absoluta –co apoio cegado do PGD–.

A militancia e simpatizantes márcannos unha ruta pola que o grupo municipal e a organización se debe rexer estes catro anos; realizar un traballo de oposición construtiva, fiscalizadora e aportando propostas que melloren os servizos públicos e a calidade de vida da veciñanza; e estar máis na rúa, ao lado das veciñas e veciños, colectivos, asociacións... manter un contacto máis constante e ser a súa voz si así o requiren. Dende a agrupación local asumimos, como non pode ser doutro modo, ese mandato e porémonos a traballar dende xa.

Ao goberno pedímoslle transparencia, diálogo e traballo. O primeiro é que faciliten a documentación do PXOM á oposición e que lla mostren á cidadanía, tal e como anunciou en campaña. Tras isto que aprobe o documento urbanístico neste ano. Non ten escusas para levalo adiante, aínda que tampouco as tiña antes, pois ningún grupo da oposición puxo impedimentos na labor do goberno.

Instamos tamén ao goberno a poñer en marcha a construción do Centro de Día e o seu funcionamento cunha xestión pública, así como a cesión dos terreos á Xunta de Galicia para que se comprometan á construción do Centro de Saúde. Por outro lado este goberno debe pechar a negociación da RPT e sacar a oferta pública de emprego, cubrir os postos da policía local e poñer a funcionar o servizo 24 horas,... en definitiva, cuestións que a pesar de poder ter realizado sen ningún problema durante os pasados catro anos, deixou de lado e incluso acusou á oposición e outras administracións de ter paralizado.

A Coordinadora Local de Esquerda Unida O Grove

Consulta a nosa web electoral

Nova web para as Eleccións Locais 2019

Consulta Programa e as Candidatas e Candidatos de Esquerda Unida
Realiza propostas ao programa ou consulta os actos.

http://locais2019.euogrove.es

EU denuncia ante a Xunta Electoral que o PSOE empregue a alcaldía con fins electorais

A formación reclama a adopción das medidas oportunas ante o acto convocado por Cacabelos para facer propaganda da xestión municipal

O Grove, 25 de abril de 2019.- Esquerda Unida ven de presentar ante a Xunta Electoral de Zona de Cambados unha reclamación polo uso electoralista das institucións municipais que pretende realizar o PSOE. A formación denuncia que o goberno local socialista empregue o Concello como un instrumento de propaganda. E reclama a adopción das medidas oportunas ante a convocatoria dun acto co que o alcalde está a saltar de xeito obvio e descarado o Réxime Electoral Xeral. 

Esquerda Unida solicita que a Xunta Electoral actúe ante a charla anunciada polo alcalde para falar do PXOM, o auditorio e o centro de día. A formación denuncia un evento co que o goberno de Jose Cacabelos incumpre o artigo 50.2 da Lei Orgánica 5/1985, de 19 de xuño, de Réxime Electoral Xeral. Punto onde se indica textualmente que “desde a convocatoria das eleccións e ata a celebración das mesmas queda prohibido calquera acto organizado ou financiado, directa ou indirectamente, polos poderes públicos que conteña alusión ás realización ou logros obtidos”. 

Habida conta de que a convocatoria de eleccións foi publicada no BOE o pasado 2 de abril, Esqueda Unida denuncia que o PSOE pretenda saltar a lei nalgo tan obvio e de xeito descarado. “Se con isto actúa deste xeito, que non se terá feito na opacidade do despacho do alcalde, por onde Cacabelos mandou desfilar a todo veciño preocupado polo PXOM”, critica a formación. 

EU entende que a nomeada charla non é outra cousa que un mitin con intencións electoralistas. Un acto co que o PSOE pon de manifesto a súa visión das institucións como un instrumento que empregar en beneficio propio en lugar de ao servizo da veciñanza. 

EU presenta a súa candidatura para impulsar no Grove “un goberno social que escoite á xente”

O Grove, 20 de abril de 2019.- Esquerda Unida Esquerda Unida vén de aprobar en asemblea a que será a súa candidatura nas vindeiras eleccións municipais do 26 de maio.

A lista, tal e como aprobara a agrupación de esquerdas hai varios meses en primarias, será liderada polo actual concelleiro da corporación municipal José Antonio Otero González. Seguiráo na lista a responsable local da Área de Muller de Esquerda Unida Cristina Domínguez. Quen desenvolve a súa actividade social no movemento feminista, ademais de participar tamén no tecido cultural local a través de Paradanda-Mecos.

O tamén actual concelleiro da agrupación Juan Lamelas ocupará a terceira posición da candidatura. Quen encabezara a lista de Esquerda Unida hai catro anos continúa a súa actividade política arroupando ao candidato José Antonio Otero, quen xa o relevou non soamente na cabeza de cartel dos esquerdistas senón tamén como coordinador local de EU.

A técnico en turismo Susana Millán e o sindicalista de CCOO Antonio Gondar completan os cinco primeiros postos da candidatura de Esquerda Unida.

Desde a organización de esquerdas salientan que esta lista que presentan ás eleccións municipais é a candidatura que mellor representa a sociedade do Grove. "Esta é unha candidatura de traballadoras e traballadores, de xente que vive e traballa no Grove e coñece a realidade do noso Concello"."Saímos a gañar. Esquerda Unida presentámonos a estas eleccións municipais como alternativa de goberno para O Grove en contra do despotismo e a imposición do PSOE”, asegura a formación.

Os esquerdistas poñen en valor a súa oferta política fronte aos valores e o modelo de xestión que representan o PP e o PSOE. “No Grove son o mesmo can con distinta cadea”, critica EU. Que enfronta as eleccións municipais de maio coa intención de ser a alternativa para formar "un goberno que escoite á xente, un goberno social, que fomente a creación de emprego, con políticas sociais e polo bo funcionamento dos servizos públicos".

Unha vez feita pública a lista electoral para os comicios de maio, nos vindeiros días Esquerda Unida irá dando a coñecer o seu programa electoral á venciñanza.

Lista completa:

 1- JOSE ANTONIO OTERO GONZALEZ

 2- ANA CRISTINA DOMINGUEZ DOMINGUEZ

 3- JUAN LAMELAS ALFONSO

 4- SUSANA MILLAN PROL

 5- JOSE ANTONIO GONDAR TRIÑANES

 6- MARIA ISABEL MONTENEGRO FONTOIRA

 7- DAVID GONDAR PRIETO

 8- PATRICIA VILAR PEREZ

 9- JUDIT TRIÑANES LOIS

10- EDUARDO GARCÍA IGLESIAS

11- SONIA GONDAR GONDAR

12- ANA ISABEL VISO VAZQUEZ

13- FRANCISCO MIGUEZ GUILLAN

14- AMELIA SOUTULLO FIGUEIRO

15- JOSE ANTONIO TABOADA MAGDALENA

16- MARIA CARMEN GONDAR TORRES

17- MARIA LEONOR SOILAN CALVO

S1- JOSE MANUEL BOULLOSA PRIETO

S2- ELVIRA VARELA GONDAR

S3- GONZALO BEA MONTENEGRO

EU denuncia a continua improvisación do PSOE e reclama un plan de mobilidade consensuado, realista e con visión de conxunto

A formación reclama un PMUS exhaustivo, que teña en conta as achegas de expertos e axentes sociopolíticos e que permita trazar unha folla de ruta clara para o conxunto do casco urbano

Critica as decisións unilaterias e sen fundamento do goberno local, así como os problemas de tráfico xerados por peonalizacións e cambios de sentido impulsados sen ter en conta as característias do conxunto da rede viaria

O Grove, 21 de marzo de 2019.- Esquerda Unida denuncia a continua improvisación do PSOE no que a mobilidade e tráfico se refire, e insta ao goberno local a actuar con responsabilidade e a impulsar o Plan de Mobilidade Urbana Sostible que O Grove precisa. A formación denuncia os problemas circulatorios causados polas ideas inconexas do grupo de Jose Cacabelos, que continúa amosando a súa incapacidade de impulsar un PMUS rigoroso e con visión de conxunto e apostando por parches e solucións a salto de mata para solventar problemas que el mesmo creou.

EU insta ao goberno local a deixar de lado a improvisación e a dar forma a un Plan de Mobilidade Urbana realista e ben fundamentado, que teña en conta as características do conxunto da rede viaria grovense e que realmente permita rematar cos problemas de tráfico que esta padece. Moi lonxe de avanzar nesa dirección, e a pesar das continuas reclamacións do grupo de Esquerda Unida ao respecto, o alcalde continúa anunciando cambios illados e decididos de xeito unilateral. “O goberno local estase escudando nun Plan de Mobilidade Urbana Sostible para realizar peonalización e cambios de sentido e solicitar subvencións, cando en realidade non se ten avanzado nada dende a aprobación hai dous anos do documento base. Un documento que indicaba como primeiro paso para o avance do PMUS a participación tanto cidadá como política, coa creación de grupos de traballo onde estean representados os partidos e representantes sociais, económicos, laborais e medio ambientais. Así como unha comisión composta por técnicos en materia de transporte e urbanismo, medio ambiente, integración social e representantes do transporte público. Todo isto contando coa implicación do público, representado por diferentes colectivos relacionados coa mobilidade, pois a cidadanía é a clave en todo o proceso de elaboración, implantación  e seguimento do PMUS”, explica o responsable local de EU.

Moi lonxe de avanzar nesa senda, o alcalde anuncia agora a súa intención de invertir o sentido de circulación no Paseo de Lordelo para solucionar un problema que el mesmo provocou. “Estamos ante unha nova decisión de Cacabelos ao tun tun, que atende á un intento de solventar un problema ocasionado pola súas decisións sen planificación”, indica José Antonio Otero, que lembra as advertencias que Esquerda Unida xa realizou no pasado en relación ao incremento do tráfico e os problemas que o peche dun sentido de circulación no primeiro treito de Alexandre Bóveda ía ocasionar en ruelas da contorna como Sol, Raposeira, Dornas, Horta do Río ou Avenida de Hortos. Rúas estreitas que non estaban preparadas para acoller a densidade de tráfico provocada polas ocorrencias do PSOE. “Daquela non se nos fixo caso, e mesmo se nos tentaba atacar por esas advertencias. Agora é o propio alcalde o que tenta xustificar o cambio de sentido do paseo de Lordelo para reducir o tráfico nesas mesmas rúas que, como xa dixemos, el mesmo provocou”.

Chegamos a este punto, Esquerda Unida advirte das consecuencias desta nova decisión apresurada, “pois derivar a circulación cara ao Corgo vai provocar continuos caos na zona portuaria, máxime en días de mercado e peches da praza por festas como o Carme e o Marisco. E todo isto por non traballar o Plan de Mobilidade de forma consensuada e tomar as decisions en base a unha planificación organizada”.

Esquerda Unida  insta ao goberno local a actuar con rigor e a impulsar a posta en marcha do PMUS. “Levamos dous anos solicitando as devanditas xuntanzas e atopándonos con continuas escusas dende o executivo local. E o que é peor: con modificacións e anexos ao PMUS e, como se está vendo neste último ano, propostas de modificacións de rúas e estradas impulsadas sen tan sequera ter reunido a políticos e veciños previamente”.

A formación considera imprescindible elaborar canto antes un plan de mobilidade no que participen técnicos de mobilidade, Policía Local, Garda Civil e servizos de emerxencias, así como actores sociais e partidos politicos. “Que sexa eleborado en conxunto, en consenso  (un factor moi importante, pois dará lugar a que todos estaremos implicados e calquera goberno futuro continuará traballando sobre esa mesma base). E, sobre todo, que estea orzamentado. Unha elaboración global que “vai a marcar o camiño a tomar e sobre todo por onde comezar para non crear un caos circulatorio. Non sucede isto agora, cando foi aprobado un plan que marcaba esas pautas, pero que se usou para que o goberno movera e queira seguir movendo direccións. Para penalizar rúas a golpe de ocorrencias, ocasionando caos circulatorio e prexuizos para a veciñanza”, denuncia EU, que anima a traballar en colaboración coa veciñanza e cunha programación clara.

Feminismo para mudalo todo

Manifesto da área de Muller de Esquerda Unida

8 de marzo de 2019

 

A centralidade do mundo está a cambiar. As milleiros de mulleres indias, arxentinas, estadestadounidensesnses ou chilenas que loitan xuntas contra unha situación insostible de precariedade, opresión, violencia e invisibilización, compoñen un movemento global imparable ao longo e ancho do planeta. Con lemas como “Nin unha menos” converten os sentimentos de rabia e inxustiza, en loita organizada, construíndo unha alternativa fronte ao capitalismo e o patriarcado que, do mesmo xeito que estes, quere abarcar todas as esferas da vida. 

O feminismo lanza unha mirada subversiva e estrutural ao neoliberalismo, e actúa colectiva e de forma solidaria contra o marco individualista e fragmentado que se instaurou nesta sociedade á vez global e dividida. En toda a nosa diversidade, as feministas recoñecémonos irmás e aprendemos e loitamos contra as diferentes opresións que sufrimos por cuestión de clase, raza ou orixe, diversidade sexual, identidade e/ou expresión de xénero, diversidade funcional ou idade. Todas xuntas polos dereitos de todas! 

O movemento feminista é o mellor exemplo de unidade popular que temos en Galicia e no Estado. É a posta en práctica do traballo colectivo desde abaixo, para construír -a partir do que nos une- unha forza transformadora. Os partidos políticos debemos aprender moito do movemento feminista para incorporar as súas estratexias e formas de traballo á nosa actividade política, organizativa e propositiva. En Esquerda Unida adquirimos ese compromiso, desde o convencemento de que a nosa organización política ten que verse transformada pola visión transversal do feminismo. 

O feminismo que se clama nas rúas é un feminismo anticapitalista, radical e subversivo que non deixa indiferente a ninguén. Vimos este ano moitas reaccións en contra da construción do mundo que queremos as mulleres. Pero á vez, novas capas de mulleres están a unirse á loita feminista, facendo dela un movemento masivo e internacionalista e isto tórnao perigoso para quen defende esta sociedade desigual e inxusta desde o medo e o odio. 

Neste contexto, as feministas lonxe de sentirnos acurraladas ou defendendo unha Lei Contra a Violencia de Xénero insuficiente e sen a dotación orzamentaria necesaria que, por exemplo, destina cantidades irrisorias aos municipios, avanzamos no noso camiño. Non nos desviaremos do noso obxectivo: querémolo todo. 

Desde Esquerda Unida non temos dúbidas, o feminismo non é só a loita das mulleres, é un prisma que amplifica as nosas loitas, interpelando directamente ás realidades materiais de quen máis sofren e creando alianzas e estratexias para cambiar as desigualdades que vivimos día a día as clases populares. 

Para iso necesitamos a forza de todas e de todos, tamén dos nosos compañeiros que, como aliados, teñen espazo na folga feminista e deben realizar un compromiso colectivo e mantido no tempo para repensar o seu rol na sociedade e de que forma poden achegar ao cambio social desde a súa vida diaria e a súa militancia, demostrando que outra masculinidade é posible. 

E é precisamente ese, un dos grandes logros do movemento feminista, elevar a conciencia colectiva para cuestionar as bases do sistema capitalista, patriarcal e colonialista. O feminismo é o exemplo de que é posible cambiar as cousas desde abaixo cunha alternativa transformadora para unha sociedade xusta, libre, solidaria e igualitaria. 

Compañeiras e compañeiros, neste proceso de acumulación de forzas, o 8 de marzo adquire un novo significado coa folga feminista: Feminismo para mudalo todo.