A NECESARIA CONSTRUCIÓN DA TERCEIRA REPÚBLICA DÍA A DÍA [MANIFESTO]

Berrámolo ben alto: o marco político actual do estado español só pode rexenerarse coa construción da III República.

E cremos firmemente que para propicialo precisamos previamente dun proceso amplo de consensos no que ten que actuar toda a esquerda política organizada sobre os parámetros de federalismo, socialismo, solidariedade e recoñecemento do lexítimo dereito a decidir dos pobos, sen ambaxes.

Porque o marco actual que queremos tronzar é consecuencia dunha deriva actitudinal e discursiva que favorece a esta monarquía caduca e corrupta, dun modelo territorial pechado en falso, da herdanza dun capitalismo monopolista de estado e oligárquico que obviamente dificulta eses necesarios traballos que require a construción da Terceira República.

Sen eses traballos, sen eses alicerces, nada será posible. A República ten que construírse todos os días a través de accións políticas concretas. E debe facerse desde a esquerda. A loita pola chegada da Terceira República debe ser un dos alicerces ideolóxicos fundamentais do traballo político cotián. Se renunciamos a este campo ideolóxico de batalla, todo será máis difícil. E será un proceso longo e complexo, no que debe figurar de forma clara e concreta un programa político, explicitando as formas e os tempos do novo proceso constituínte. Porque a República é algo máis que a elección do xefe do Estado.

Cómpre actuar para desfacer as mentiras e renuncias que impuxeron os pactos de silencio, de esquecemento da idealizada transición. Cómpre actuar para convencer de que debemos derrgar a Lei de Amnistía, unha lei que sitúa en rango de igualdade aos verdugos e ás vítimas. Algo impensable nunha verdadeira democracia. Unha lei que permite a impunidade e ampara o  negacionismo do xenocidio franquista. Cómpre actuar para devolver a dignidade aos milleiros de persoas que aínda hoxe reclaman e reivindican que rachemos e denunciemos esa política de silencio e esquecemento. Non se debería ter aceptado que a suposta e falaz reconciliación se realizase sen xustiza e reparación para as vítimas de 40 anos de Ditadura. Sen que os vitimarios asumisen as súas responsabilidades.

Cómpre actuar para persuadir coa forza dos argumentos e da pedagoxía a toda esa masa da sociedade resignada que defende o pasado franquista, sen cuestionarse o tipo de Democracia que herdamos, de que así non se pode crear futuro. Temos que facerlles ver que os perpetradores, os verdugos e os executores que se apoderaron, de forma egoísta, clientelar e antidemocrática, das institucións básicas para o exercicio dunha Boa Democracia. Non só o fixeron obrigándonos a vivir baixo unha Monarquía, senón que adoraron ao becerro do diñeiro e do mercado capitalista e foron eles os que nos mergullaron na crise-estafa.

Por iso, vivimos nunha democracia feble, degradada, atada polo conservadurismo e o clericalismo. Por iso, aínda hoxe, asistimos a expresivas demostracións de posta en valor do pasado franquista, un pasado ilexítimo e que debera ser ilegalizado, con todas as consecuencias. Cómpre actuar recoñecendo os erros do noso pasado republicano para superalos cos acertos que tivemos e proxectarnos no horizonte mediante un presente republicano.

Cómpre recuperarmos os discursos e palabras emancipadoras. A República é unha Utopía. Temos unha tradición antifascista e unha cultura democrática no noso bagaxe e que foron quen de resistir e animar a loita pola liberdade e a defensa dos dereitos da clase traballadora.

A nosa Utopía chámase Terceira República. Esquerda Unida aposta incuestionablemente por construír unha base social ampla, hexemónica, que sosteña unha mudanza radical nas institucións públicas para termos unha democracia plena, onde a toma de decisións e a participación sexan reais. Unha República que remate coa alienación e a explotación que impón o capitalismo.

Unha República limpa e democrática, asentada na igualdade entre todas as persoas e pobos e que abranga nun mesmo obxectivo común de convivencia as demandas feministas, as reclamacións da clase traballadora, a defensa do medioambiente e a terra, a defensa do dereito a decidilo todo, a xeneración de novos consensos políticos e de configuración do estado e as reivindicacións de liberdade civil.

14 de abril de 2018

EU propón o acondicionamento da deteriorada Praza do Corgo

Os edís Juan Lamelas e José Antonio Otero apoiarán a solicitude de subvención para a obra da desdobramento da estrada da Confraría

Reclaman que os fondos que o Plan Concellos destinaba a esa actuación se invistan agora na mellora integral da gran explanada de Beiramar

O Grove, 6 de abril de 2018.- O grupo municipal de Esquerda Unida  ve necesario que o Concello actúe para mellorar o deteriorado estado da explanada do Corgo. E o luns farallo saber aos demais membros da corporación; no pleno extraordinario que o goberno local convocou para aprobar a solicitude de subvención para o desdobramento do treito da Avenida de Beiramar que transcorre dende a Confraría ata a rotonda das garzas. A formación á que representan Juan Lamelas e José Antonio Otero propón que os fondos que o Plan Concellos destinaba a esa obra se invistan, no caso de conseguirse a nomeada subvención, na rehabilitación integral da Praza do Corgo. Unha actuación urxente; tanto pola mala imaxe deste céntrico entorno; como polo perigo que supón o mal estado do seu firme.

Os edís esquerdistas apoiarán co seu voto favorable o procedemento de solicitude de subvención que o goberno local xa ten iniciado ante o IDAE. E é que, tal e como destaca o grupo municipal de EU, favorecer a posibilidade de que O Grove aumente as súas vías de financiamento é unha cuestión “de responsabilidade”. Porén, a formación non ve con bos ollos que o asunto teña motivado a convocatoria dun pleno extraordinario; que ocasionará un custo económico que non tiña por que terse producido. “Consideramos que existiu un erro na tramitación da solicitude, e que este asunto chega tarde e mal, pois tiña que ter sido traído a pleno antes”, indica o grupo. E é que, tal e como lembran Lamelas e Otero, “o órgano competente para a aprobación deste tipo de trámites adoita ser o pleno, e non a alcaldía”.

Á marxe diso, Esquerda Unida propón que os 101.000 euros da obra de Beiramar que, previsiblemente, subvencionará o IDAE, se destinen á humanización da explanada do Corgo. O desdobramento da estrada da Confraría inclúese entre as actuacións municipais financiadas polo Plan Concellos da Deputación, que reserva para ela 126.855,25 euros. “Se o IDAE subvenciona o 80%, quedarán dispoñibles algo máis de 100.000 euros, aos que haberá que cambiarlle o destino”. Indícano os edís de EU, que xa apuntan cara á próxima explanada do Corgo. Para esa área, o grupo municipal esquerdista resalta a necesidade dunha actuación que; ademais da reposición integral do pavimento; contemple a instalación de bancos e outros elementos que volvan facer da praza o concorrido punto de encontro e xogos que fora.

Área de Comunicación

Esquerda Unida O Grove

 Así o traslada a prensa:

Esquerda Unida pide que los 101.000 euros sobrantes de Beiramar se inviertan en la plaza de O Corgo [ver noticia web]

Esquerda Unida propone destinar el Plan Concellos a acondicionar la deteriorada plaza de O Corgo [ver noticia web] 
EU propone el arreglo de la Praza do Corgo porque da "mala imaxe" y "supón un perigo" 

 

EU critica a paralización e ineficacia da xestión turística do Concello

O Grove, 4 de abril de 2018. - Coa Semana Santa recén rematada, o grupo municipal de Esquerda Unida quere denunciar a absoluta falta de iniciativa do Concello en relación co eido turístico. A pesar de tratarse do período que inaugura a tempada alta para a hostalaría grovense; os visitantes que nestes días festivos se achegaron ata O Grove non atoparon unha oferta cultural e de ocio alternativa;  nin tampouco un servizo de información acorde á relevancia destas datas. A falta de planificación do goberno local fixo que a oficina municipal de turismo non cumprise cos horarios propios da época debido á falta de persoal. E, dous anos despois de que a concelleira responsable desta área convocase ao sector para poñer en marcha o tan anunciado novo Plan Estratéxico de Turismo; quedou de manifesto que ese documento non foi máis que un brinde ao sol.

Xa dende o inicio do mandato, o grupo municipal de Esquerda Unida ven demandando a incorporación á plantilla municipal dun Técnico de Turismo. Un profesional capaz de dotar a un Concello turístico como é o do Grove dunha xestión anual planificada; cuxa contratación, a día de hoxe, o goberno local continúa sen acometer.

A formación á que representan Juan Lamelas e José Antonio Otero lamenta que o goberno local non dote de estabilidade a unha área de importancia capital para a economía local. E é que, se ben para o 2017 o orzamento municipal incluíu, grazas á insistencia da oposición, unha partida para acometer esa contratación durante seis meses; esta nunca chegou a executarse.

Esquerda Unida critica ademais as recentes declaracións da edil de Turismo; que ao comezo desta Semana Santa incidía ante a prensa na variada oferta que o municipio ofrece aos visitantes. Palabras baleiras, pois o Concello non traballou para dar forma a ningún tipo de actividade de interese. E a programación municipal para este período vacacional foi inexistente. “Non houbo actividades municipais, publicidade nin propostas para os visitantes. A concelleira fala de que O Grove reúne nos seus 22 quilómetros cadrados todo o que un visitante pode buscar en Galicia, pero iso non se ve reflectido nunha actividade promocional axeitada, con folletos e guías con presenza en hoteis e restaurantes”, indican dende EU. “Por outra banda, nada volveu saberse do Plan Estratéxico de Turismo que ela mesma comezou hai dous anos, e que quedou paralizado ou gardado nun caixón. Como tampouco se volveu saber absolutamente nada sobre a renovación da obsoleta web de turismo, anunciada e presentada aos hostaleiros na Casa da Cultura. Non só iso, senón que neste momento dita web atópase baleira de contido; segue sen estar adaptada para móbiles; e, o máis grave de todo: segue anunciando que O Grove conta con praias con Bandeira Azul a pesar de que non é certo”.

Esquerda Unida lamenta que as intencións do goberno local queden en palabras que leva o vento; como aconteceu tamén no caso da renovación da oficina de turismo do Corgo realizada hai un ano. E é que, a pesar de que daquela se anunciara a instalación dun aseo para os empregados dese servizo; este continúa sen estar operativo.

 A formación esquerdista tamén pon o foco nos cambios de rumbo e criterio no que respecta á actividade promocional da área de Turismo do Concello. “Non entendemos que levou á concelleira a facer acto de presenza en Fitur este ano, cando en anteriores ocasións afirmara; de xeito reiterado e mesmo en resposta a preguntas realizada en pleno; que non servía para nada e que se trataba dun gasto inútil”.

Área Comunicación

Esquerda Unida O Grove

MANIFESTO 8 DE MARZO

MANIFESTO 8 MARZO

Para transformar o mundo: FEMINISMO

Este ano 2018 comezou especialmente cruento para as mulleres. Os representantes do Estado quitáronse a careta política e mostraron, sen disimulo, o que opinan sobre a desigualdade que as mulleres soportamos. Quitarlle importancia á fenda salarial non é unha anécdota máis do poder, é a representación simbólica do que as mulleres significamos para o capitalismo. É a estratexia que o patriarcado segue para desprestixiar e, se pode, cernar todas as nosas reivindicacións.

O capitalismo e o fascismo están a gañar terreo en numerosas partes do mundo. A crise foi o pretexto para arrebatar os débiles dereitos que nos amparaban. O patriarcado, o seu máximo aliado, foi paralelamente gañando o espazo conquistado e, as mulleres, hoxe, estamos nunha situación realmente de perigo.

A fenda salarial, a precariedade laboral, a infrarrepresentación, a responsabilidade dos coidados, a falta de autonomía e de dereitos propios están a calar na sociedade sen que a consciencia colectiva se alerte do que está a ocorrer.

Ningún Goberno mantén unha posición firme contra a violencia cara ás mulleres. O discurso lacrimóxeno non debe enganarnos, necesitamos políticas reais e compromiso orzamentario contra a violencia cara ás mulleres, con decisións políticas tanxibles. Necesitamos orzamentos e pactos transversais que encaren a globalidade das discriminacións e desigualdades que neste momento sostén ao patriarcado, para erradicalas das nosas vidas.

Tampouco debemos conformarnos con alegacións oportunistas que nos confundan porque as mulleres non necesitamos paliativos. Necesitamos unha política feminista para transformar o mundo. Necesitamos a perspectiva de xénero en todas as decisións e desde todos os ámbitos. Queremos ser donas das nosas vidas no presente e no futuro. As mulleres demandamos gobernos comprometidos coa causa das mulleres para posuír os espazos e a riqueza, e compartila con todos os seres humanos en igualdade e xustiza.

Este ano o movemento feminista fai un chamamento á folga, que desde EU apoiamos porque hai que tomar partido sen fisuras ante o que xa está a ocorrer e en prevención do que pretenden.

Apoiamos a folga no traballo, nos fogares, nos coidados, no consumo, no ámbito estudantíl,… Temos que explicar que a discriminación laboral é moito máis que a discriminación directa; temos que trasladar o valor social que teñen os coidados; temos que visibilizar que no consumo únense as peores caras do capitalismo e patriarcado, para usarnos como obxectos e explotarnos descaradamente; temos que apostar pola educación como principal ferramenta para acabar co machismo.

Instamos a que a loita continúe sen tregua, porque como xa manifestamos no comunicado de apoio á folga feminista, SOBRAN AS RAZÓNS, porque temos que soportar: 

Unha persistente división sexual do traballo, que xera unha profunda desigualdade social e laboral, con síntomas tan visibles como unha fenda salarial do 29% en Galicia, sen esquecer o sostemento de maiores niveis de desemprego e precariedade. En todo o mundo, as mulleres gañan entre o 60 e o 75 por cento do salario dos homes en traballos de igual valor.

Perpetuación do papel das mulleres como sustentadoras da vida e dos coidados, soportando en moitos casos dobres xornadas pola falta de corresponsabilidade dos homes e do Estado.

Unha violencia sistemática e continuada contra as mulleres, con múltiples manifestacións, que sostén ao patriarcado amparado por un sistema político capitalista e neoliberal que pretende a regresión dos dereitos conquistados, e que nos golpea con: os asasinatos machistas, as agresións sexuais e as violacións, aluguer dos ventres/úteros de mulleres, a explotación sexual e a prostitución; a violencia patrimonial e a custodia compartida imposta,...

A invisibilización, a falta de representación en espazos sociais, políticos, culturais, e a asimetría na repartición do poder.

Unha práctica da interrupción voluntaria do embarazo que segue penalizada parcialmente e non está garantida para todas as mulleres no Estado español.

Desde EU apoiamos a Folga Feminista e as manifestacións que o movemento feminista convocou para este 8 de marzo; porque queremos PARAR O MUNDO, PARA PODER TRANSFORMALO, cambiando os seus modelos patriarcales por modelos de igualdade, xustiza, paridade, diversidade e democracia.

É por iso, que facemos un chamamento á participación activa nestas convocatorias, desde o convencemento de que só cunha transformación feminista da nosa sociedade poderemos facer realidade a reivindicación de QUE OUTRO MUNDO É POSIBLE.

Área de Muller de Esquerda Unida

EU pide o apoio da corporación á Folga Feminista do vindeiro 8 de marzo

O Grupo Municipal de Esquerda Unida presenta unha moción para que o pleno do Concello do Grove se comprometa a apoiar a Folga Xeral das Mulleres facilitando o seu desenvolvemento, que facilite con todos os medios materiais, persoais e de difusión as manifestacións, concentracións, actividades e actos que convoquen as asociacións de mulleres no 8 de marzo e que a Casa do Concello enarbore a bandeira feminista como símbolo de apoio á loita das mulleres. 

A proposta debaterase no pleno do vindeiro luns 26 de febreiro

MOCIÓN COMPLETA

DE APOIO Á FOLGA FEMINISTA. 8 DE MARZO DE 2018

Esquerda Unida demanda que o Concello aplique a ordenanza de terrazas

Os edís de Esquerda Unida no Grove, Juan Lamelas e José Antonio Otero, reclamaron na xuntanza mantida para a modificación da ordenanza de terrazas que o Concello faga cumprir a mesma.

Esquerda Unida leva desde que se aprobou hai catro anos e medio esixindo o seu cumprimento.

O Grove, 21 de febreiro de 2018.- Os grupos municipais do Concello do Grove reuníronse onte pola tarde para valorar a proposta de modificación da ordenanza de terrazas. Trátase dunha proposta do goberno municipal, presidido José A. Cacabelos, que engade un modelo estético diferente á recentemente remodelada rúa Castelao.

Nesta xuntanza, o voceiro do grupo municipal de Esquerda Unida, Juan Lamelas, fixo fincapé en algúns dos problemas ocasionados polo incumprimento de funcións por parte do Concello á hora de facer cumprir a ordenanza que diferentes veciños lles teñen trasladado, e que son coñecidos polo alcalde, sen que este teña tomado ningunha medida ata agora para darlles solución. Así mesmo, tamén foi trasladado por parte dos edís esquerdistas consideracións sobre a modificación da ordenanza fiscal polo uso de terreo público que ocupan estas instalacións, ademais da importancia que teñen as terrazas na vida económica e social deste concello, e que a convivencia entre veciños, peóns e hostaleiros, é perfectamente compatible coa aplicación da ordenanza.

“En case tres anos de mandato do señor Cacabelos, nada se ten feito por parte do Concello para facer cumprir esta ordenanza” explica Lamelas. “Agardamos que agora que propoñen esta pequena modificación por fin se poñan a facer o seu traballo” conclúe.

O outro asunto importante desta xuntanza foi o relativo ás terrazas que ocupan terreos portuarios. Hai un consenso absoluto no arco municipal respecto de que Portos de Galicia debe aplicar os criterios aprobados polo Pleno do Concello do Grove no que respecta a este tipo de instalacións en zona portuaria.

Grupo Municipal de Esquerda Unida

O Grove

Esquerda Unida denuncia que Cacabelos deixou sen financiamento o Auditorio

Trala modificación do destino de 1,5 millóns, aprobada no pleno de xaneiro, faltan máis de 400.000 euros para completar o custo total da obra segundo denuncian os edís de EU.

Lamelas e Otero indican que o goberno vai destinar millón e medio de euros a actuacións sen proxectos e sen concretar a súa execución.Tachan a Cacabelos de actuar de modo electoralista.

O Grove, febreiro de 2018.- No pleno do mes de xaneiro, onde se aprobou o cambio de destino dos 1,5 millóns do crédito destinado inicialmente para o auditorio, o voceiro do Grupo Municipal de Esquerda Unida, Juan Lamelas, denunciou que con esa modificación o goberno deixaba a obra do auditorio municipal sen a totalidade do orzamento preciso para a súa construción, pois agora mesmo faltan mais de 400.000 euros. Os edís esquerdistas non entenden cal é o motivo para tal actuación "pois pasaron de ter cartos de mais a quedarse sen a totalidade do orzamento do auditorio". Consideran que "este goberno traballa a golpe de ocorrencias e son incapaces de recoñecer os seus propios erros" motivo polo que cren que o Alcalde continuou co trámite a pesares da advertencia de Esquerda Unida ao respecto.

Así mesmo, indican que esta modificación confírmalles o que levan denunciando dende que se aprobou a solicitude da subvención da deputación, "que non era preciso ter os cartos antes da solicitude, pois agora mesmo non se cumpre o 4 punto, o do compromiso de achegar pouco mais de 2.800.000 €. O que ven sendo o mesmo, que se podía solicitar a subvención e logo un crédito moito menor, sen ter que endebedarnos tanto". Pero tamén din que entenden a actitude de Cacabelos "pois dende hai preto dun ano o Alcalde só pensa de forma electoralista e atópase inmerso na súa propia campaña electoral, gastando todos os seus cartuchos vendo que non foi quen de cumprir as promesas que o levaron a gañar as eleccións".

Por outro lado, os esquerdistas indican que non votaron a favor da modificación do destino do crédito, porque o consideran "un fraude e unha proposta irreal e a saber si realizable" pois, segundo indican os edís "o mesmo alcalde confirmou no pleno que ningunha das cuestións ás que se pretenden destinar as partidas están pechadas, contan con proxecto e cos permisos precisos para executalas", polo que "non podemos apoiar algo que non sabemos si se vai facer ou si os cartos que se destinan son de máis ou insuficientes"