O grupo municipal de EU denuncia que non lle deixan acceder ao Auditorio

  

Os concelleiros de Esquerda Unida seguen agardando que lles respondan á solicitude realizada o día 6 de abril e lles permitan visitar o interior dun Auditorio que a día de hoxe segue pechado a pesar de que hai un mes que o Alcalde anunciou a recepción da obra.

O Grove, 25 de abril de 2022.- Preto dun mes despois de que o Alcalde anunciase a recepción do Auditorio Escola de Música, o edificio segue pechado a cal e canto sen que ninguén coñeza os motivos. O que si se pode ver son obreiros no exterior do inmoble traballando na estrutura do ascensor, que a día de hoxe segue sen estar rematada. Unha situación que alertan dende Esquerda Unida ademais de denunciar que ao seu grupo municipal non lle dan acceso ao interior do inmoble a pesares de telo pedido formalmente por rexistro.

E é que o pasado 6 de abril, o voceiro do grupo municipal, José Antonio Otero, e a compañeira na corporación, Ana Cristina Domínguez, solicitaron por rexistro o acceso ao Auditorio Escola de Música para visitar o seu interior e as diferentes salas do edificio. A día de hoxe, 18 días despois, seguen sen ter contestación da administración local e, aínda que ese silencio administrativo lles outorga o dereito a acceder ao inmoble, non saben a que departamento se teñen que dirixir para que lles abran as portas ou os acompañen para realizar a demandada visita.

Unha situación que chega a facer sospeitar aos esquerdistas que o Auditorio non esta listo para utilizar tal e como ten anunciado Cacabelos nas súas peculiares intervencións. Otero e Domínguez non entenden tal escurantismo entorno a un edificio municipal de tal envergadura e cal é o motivo polo que dende o día 6, que fixeron a solicitude, non recibiran resposta algunha á súa petición polo que instan ao goberno a non demorala máis e que lles indiquen o proceder para poder visitar o interior do Auditorio, xa que é un dereito que lles corresponde como concelleiros da corporación grovense. 

Gabinete de Prensa

Esquerda Unida O Grove

EU alerta que o goberno non fai nada para combater a soidade non desexada

  

Os esquerdistas lamentan que dez meses despois de aprobarse unha moción presentada polo seu grupo municipal relativa á soidade non desexada, o goberno non executara ningún dos puntos de acordo.

Instan ao goberno a elaborar o censo de persoas que viven soas e o Plan de Envellecemento Activo así como a adherirse á rede de Cidades Amigables coas Persoas Maiores e ao proxecto Cidades que Coidan. 

O Grove, 19 de abril de 2022.- A agrupación local de Esquerda Unida lamenta que a día de hoxe, o goberno municipal non teña feito nada do aprobado na moción que o seu grupo municipal presentou en xuño de 2021 co propósito de combater a soidade non desexada. 

E é que nesa moción, que foi aprobada por unanimidade, os esquerdistas instaban ao goberno a crear un censo local de persoas maiores que viven soas, a elaborar un plan de envellecemento activo e a adherirse á rede de “Cidades Amigables coas Persoas Maiores” e ao proxecto “Cidades que Coidan”. 

Segundo indican dende Esquerda Unida, dez meses despois dese pleno a concellería delegada non ten feito nada e así llo confirmaron no pleno do pasado 28 de marzo cando preguntaron polo cumprimento do aprobado. “Pero é que nin tan sequera, dúas semanas despois de quedar en evidencia no pleno, se deron pasos para, cando menos, iniciar os trámites de algún dos puntos de acordo”, denuncia o voceiro esquerdista José Antonio Otero. 

Otero lembra que a moción “pretendía que dende a administración local se traballase para combater a soidade non desexada, que a pesares de incidir en todas as etapas da vida, agudízase en persoas maiores de 65 anos, ocasionando un impacto directo e negativo sobre a saúde e o benestar de quen a padece”. Para iso, dende Esquerda Unida solicitaban a elaboración dun censo de persoas maiores que viven soas no Concello do Grove e con iso elaborar un Plan de Envellecemento Activo que tivese como obxectivos coñecer as necesidades das persoas que viven soas, ofrecer información de actividades lúdicas que puidesen ser do seu interese, ofrecer alternativas de ocio, informar e solicitar o servizo de teleasistencia de forma gratuíta, fomentar as relacións persoais e crear unha rede de axuda e acompañamento na que puidese colaborar a propia veciñanza. 

Así mesmo, tamén se instaba a que o Concello do Grove se adherise á rede de Cidades Amigables coas Persoas Maiores, da que forman parte outros 219 concellos do Estado, 5 deles galegos, así como ao proxecto Cidades que Coidan “co único fin de cumprir os seus obxectivos e promover un envellecemento activo e saudable e combater a soidade non desexada”, indica o voceiro esquerdista.  

É por iso que dende Esquerda Unida piden que “se comece a traballar axiña na posta en marcha dos puntos do acordo, e camiñar canto antes para lograr un maior coidado dos e das nosas maiores, sobre todo das que viven soas”. 

HORIZONTE REPÚBLICA

Manifesto de Esquerda Unida polo 14 de abril 

Hoxe 14 de abril é un día importante para todos e todas as demócratas do noso país. Hoxe é a data na que conmemoramos o 91 aniversario da proclamación da Segunda República, un fito que supuxo un avance histórico da democracia, os dereitos sociais e a liberdade. Lembremos que hoxe contamos cunha democracia –ameazada por forzas similares ás de outrora– grazas á loita de quen sacrificou o seu tempo e ás veces a súa vida por un sistema democrático, e grazas a quen hoxe en día seguen loitando pola xustiza, a liberdade e unha democracia plena, fronte a un réxime monárquico incapaz de responder as necesidades da clase traballadora e os sectores populares. 

A nosa historia demóstranos que as conquistas sociais lógranse mediante a unidade popular e a loita, por iso seguimos esixindo un sistema que antepoña os dereitos dos sectores populares por encima dos intereses das oligarquías. 

Nesta dirección, a República ten que ir máis aló do debate sobre a xefatura do Estado ou a crítica a unha institución anacrónica e corrupta como é a monarquía, que se opón á modernización do país e é unha das causas da crise política actual. De igual maneira, entendemos que o proxecto republicano non pode basearse só –nin principalmente– na nostalxia ou no recordo, xa que necesariamente ten que ser un proxecto de futuro que dea resposta aos problemas e aos anhelos da cidadanía e no que caibamos todos e todas. 

A clase traballadores e os sectores populares do noso país necesitamos condicións de vida dignas que nos permitan vivir en condicións de igualdade e liberdade plenas. Un traballo digno, acceso á vivenda, sanidade ou educación públicas e de calidade son algúns dos exemplos recolleitos na actual constitución pero que quedaron en papel mollado. Por tanto, un día como hoxe volvemos reafirmar a nosa aposta por un proceso constituínte que –en última instancia– acabe adaptando a constitución vixente aos retos e as necesidades actuais do noso pobo. 

Por iso, a República é sinónimo de rexeneración democrática, xustiza social e defensa do público; un proxecto integral e renovador capaz de dar resposta ao conxunto de particularidades do Estado, isto é, á  plurinacionalidad e ao mundo rural e abandonado. Un proxecto capaz de recoller as necesidades, problemas e anhelos da cidadanía e unifíqueos nun proxecto que en última instancia servirá para que todos e todas vivamos mellor partindo da nosa  cotidianeidad. É dicir, o republicanismo é unha maneira alternativa e integral de entender a política, a economía e a sociedade. 

Continuamos loitando de acordo coa nosa tradición democrática e  emancipatoria, porque somos ese fío vermello da historia que se  entretexe co fío morado feminista e o verde ecoloxista para seguir construíndo un novo país plural, federal e solidario, cun novo modelo económico e social mediante a democratización da económica. 

Dende Esquerda Unida reafirmamos a nosa aposta por un proceso constituínte que desemboque nunha República democrática, federal e solidaria nesta data tan sinalada para a historia democrática do noso país. De maneira coherente, reafirmamos a nosa aposta pola construción cotiá dun horizonte republicano que dea esperanza á clase traballadora e os sectores populares nun momento de crise e incertezas. 

EU denuncia que o Consello Local de Turismo volve quedar ao marxe do "Plan de Sustentabilidade Turística en Destino"

Os esquerdistas manifestan que tres semanas despois de presentalo ao sector turístico, o consello sectorial segue sen coñecer as liñas de actuación do proxecto que opta aos fondos europeos Next Generation. 

A representante de EU, Susana Millán, recorda que xa o ano pasado se deixou fóra deste proxecto aos integrantes do CLT a pesar de que a memoria indicaba que colaboraran no mesmo. Piden que se convoque unha xuntanza para coñecer as liñas de actuación e poder participar no desenrolo do PSTD.

O Grove, 9 de abril de 2022.- O pasado 21 de marzo o Alcalde reuníase co sector turístico para informar da intención de volver presentar un proxecto co que captar fondos europeos Next Generation a través dun Plan de Sustentabilidade Turística en Destino (PSTD). Unha xuntanza na que se expuxeron as liñas de actuación do proxecto e á que non foron convidados os membros do Consello Local de Turismo, segundo denuncia Esquerda Unida. Á representante dos esquerdistas no consello sectorial, Susana Millán, sorpréndelle que se excluíse aos integrantes do CLT desta xuntanza “cando tan só un mes antes, o 22 de febreiro, reuniuse o Consello Local no que non recibimos máis información que a intención de volver a presentar una nova proposta”. Millán sinala que, “agardabamos que cando menos se nos volvese convocar, pero a día de hoxe seguimos sen información relativa ao proxecto e, o que é peor, sen poder participar no mesmo, ao igual que o ano pasado”. 

A representante de Esquerda Unida lembra que na anterior convocatoria (2021), “o Consello Local de Turismo non tivo a oportunidade de coñecer nin de facer propostas ao Plan de Sustentabilidade Turística. En ningún momento se nos informou das liñas de actuación, quen era o equipo redactor e moito menos tivemos a oportunidade de traballar conxuntamente co concello e facer aportacións a ese proxecto”. Sobre isto, Millán manifesta que “soubemos do proxecto pola prensa e cando se tratou o tema no CLT xa estaba entregado no ministerio e nunca tivemos acceso a esa documentación”. A pesar de tela solicitado por rexistro, dende Esquerda Unida aseguran que o único que recibiron foi unha memoria do proxecto no que, “sorprendentemente se citaba ao Consello Local de Turismo como órgano colaborador no mesmo cando a realidade é que nunca se informou nin se contou con este órgano”, sostén Susana. 

Segundo a esquerdista, “nesa documentación afírmase que existe o compromiso estreito do Concello para dinamizar o CLT con fin de crear oferta e produto”. Para Susana Millán “non existe tal compromiso, pois iso mesmo xa o escoitamos os integrantes do CLT da boca do Alcalde, despois de que no ano 2020 se suspendese a Festa do Marisco pola pandemia. Un compromiso para traballar todos xuntos e levar ao consello propostas e facer mesas de traballo coas que o sector turístico puidese facer fronte á falta de actividade e a incerteza de que a situación se repetise no 2021”. “O tempo confirmou que a palabra do Alcalde non vale de nada. O Consello Local de Turismo cada vez ten menos presenza e unha nula repercusión nas decisións e no traballo turístico do pobo”, sinala Millán  

Dende Esquerda Unida entenden que “o CLT pode resultar un foro que incomoda ao Alcalde, xa que hai que dar explicación do que se está facendo en materia turística e neste concello o traballo é practicamente nulo”. Lembran que o goberno socialista continúa sen executar todos os compromisos adquiridos, ”a nova páxina web, o plan estratéxico, dotar a praza de Técnico/a de Turismo, a apertura da Oficina de Información en tempada baixa ou o proxecto Polos Turísticos Intelixentes” e consideran que “se o Consello Local de Turismo non é máis dinámico e participativo é porque non hai compromiso nin intención por parte do executivo local para que así sexa, pois non se nos informa nin se nos convida a participar en nada do que se supón, debería formar parte”. 

Deste modo, dende a formación de esquerdas piden que se convoque o Consello Local de Turismo “co propósito de reconducir esta situación e comezar a traballar na dinamización turística do noso concello, preparar de forma conxunta a tempada de verán e a Festa do Marisco e, sobre todo, coñecer as liñas de actuación do proxecto do Plan de Sustentabilidade Turística en Destino para poder participar do mesmo e lograr acadar a financiación dos fondos europeos”.