O grupo municipal de EU insta a En Marea a apoiar sen fisuras no Parlamento a solicitude de desafección do Corgo

A solicitude de recuperación da praza e dos terreos nos que se asentan a Casa do Concello ou o mercado municipal foi aprobada por unanimidade do pleno en reiteradas ocasións

IMAXE DE ARQUIVO DA PRAZA DO CORGO - TODOGROVE.ES

O Grove, 13 de xullo de 2018.- O grupo municipal de Esquerda Unida ten solicitado o apoio unánime e sen fisuras do grupo parlamentario de En Marea para conseguir que a tan demandada desafección do Corgo poida ser unha realidade. O asunto será tratado este venres na Comisión 8ª de Pesca e Marisqueo do Parlamento de Galicia, por iniciativa do PSOE. Un foro ao que a postura da formación esquerdista no Grove chegará da man do partido que lidera Luís Villares.

A desafección dos terreos do Corgo que, a pesar de non ter uso portuario, se atopan baixo a titularidade da Xunta de Galicia e polos que ano tras ano O Grove debe aboar a Portos miles de euros debátese hoxe no Parlamento de Galicia. Un asunto de importancia para o Grove, en relación ao cal Esquerda Unida entende debe adoptarse unha postura rotunda, unánime e sen fisuras.

Así as cousas, o grupo municipal de EU tense posto en contacto co grupo parlamentario de En Marea para solicitarlle o seu apoio a unha reclamación que, de saír adiante, suporía un importante aforro para as arcas municipais. E abriría tamén a porta a un aproveitamento máis racional e eficiente dun espazo que a día de hoxe presenta un estado lamentable debido á total falta de mantemento por parte de Portos.

Cabe lembrar que se trata do único espazo aberto, amplo e céntrico co que conta o municipio para a realización de eventos. Nel desenvólvense, como é sabido, o mercado semanal, a Festa do Carme e a do Marisco, e numerosos espectáculos e actuacións. Así as cousas, Esquerda Unida aposta por aunar forzas para que do Parlamento poida saír un posicionamento favorable a esta reclamación; que suporía un importante espaldarazo ás pretensións do Grove ante a Xunta de Galicia.

Gabinete de Comunicación

Esquerda Unida O Grove

José Antonio Otero convírtese no novo candidato de Esquerda Unida O Grove co aval maioritario da militancia

O proceso de primarias contou cunha participación do 81,30% dos afiliados, que de xeito unánime apoiaron a candidatura do coordinador local

José Antonio Otero

 O Grove, 7 de xullo de 2018.- José Antonio Otero será o candidato de Esquerda Unida á alcaldía nas vindeiras eleccións municipais. Así o decidiu por esmagante maioría a militancia da formación no Grove; que de xeito unánime ten depositado a súa confianza no que desde o ano pasado é xa o coordinador local da formación.

Cunha participación do 81,30% no proceso de primarias convocado para designar ao que será o próximo candidato de EU á alcaldía do Grove; e o respaldo do 100% dos votantes; José Antonio Otero conta sen ningunha dúbida coa confianza maioritaria da militancia grovense para poñerse á fronte da próxima campaña electoral.

Deste xeito, consolídase co pleno acordo dos afiliados o cambio de ciclo que xa se iniciara a finais do ano pasado, cando a militancia aprobou en asemblea, e tamén de xeito unánime, o nomeamento de Otero como máximo responsable da dirección local do partido.

Ao igual que fixera daquela, o que é xa un dos representantes de Esquerda Unida na corporación local recolle o testemuño de Juan Lamelas con ilusión e ganas de sacar adiante proxectos útiles para a cidadanía grovense e o desenvolvemento do municipio.

O nomeamento de Otero como novo candidato tense producido do xeito máis natural no seo da formación; logo da delegación de responsabilidades pola que xa se optara o pasado novembro co pequeno paso atrás de Lamelas e a súa substitución por Otero á fronte da coordinadora local.

Trátase, de calquera xeito, dun pequeno cambio no timón absolutamente consensuado. E que, dados os postos de responsabilidade que Otero xa ostentaba, como concelleiro e coordinador, non implicará grandes cambios a nivel político nin no que afecta á liña de actuación da formación.

Gabinete de Comunicación

Esquerda Unida O Grove

EU demanda unha web municipal de turismo ao día e que funcione como un verdadeiro elemento dinamizador

A formación reclama unha axeitada actualización da páxina, que segue publicitando praias con Bandeira Azul a pesar de que hai xa dous anos que O Grove prescindiu deses distintivos

Imaxe da web turismogrove.es co información das praias

  O Grove, 5 de xullo de 2018.- O grupo municipal de Esquerda Unida esixe que o Concello poña ao día e actualice coa axeitada periodicidade a web de turismo municipal. Unha páxina que nen de lonxe está a funcionar como o elemento dinamizador que debera ser. E que ofrece información tremendamente desactualizada e errónea, dando unha imaxe de desleixo para nada acorde ás necesidades promocionais da vila e do seu tecido turístico.

Hai xa dous anos que Esquerda Unida abordou no pleno a necesidade dunha posta ao día e dunha xestión máis eficiente da web de turismo do Concello. E é que, a pesar de que a renovación desta páxina foi unha das medidas estrela que a edil responsable desta área propuxo aos representantes da hostelaría e das demais empresas vinculadas co turismo no Grove ao comezo do mandato, semella que aquela iniciativa caeu no esquecemento.

A web continúa informando aos visitantes da existencia de praias con Bandeira Azul. Un distintivo que non ondea nos areais mecos desde hai xa dous veráns. Pero non só, pois tampouco a información de eventos tan relevantes para a localidade como a Festa do Marisco se atopa ao día (neste caso, por ningures aparece o cartel da edición deste ano, nunha mostra inaceptable de desinterese e deixadez).

Así as cousas, o grupo municipal de EU califica de “vergoña” a xestión que o Concello está a realizar deste instrumento promocional; e volve incidir na necesidade de que o goberno local tome cartas no asunto e preste a atención debida a un elemento que debera servir de catapulta para a oferta de ocio e a totalidade dos recursos turísticos da vila. 

Sección da Festa do Marisco na web turismogrove.es

Cartel da edición 2017 na sección da Festa do Marisco

Gabinete de Comunicación

Esquerda Unida O Grove

EU pide que se sinalicen axeitadamente os itinerarios alternativos provocados por obras e demais cambios na rede viaria

Valado da obra de Alexandre Bóveda

A formación xa solicitou ao Concello a adopción desta medida no último pleno

O Grove, 2 de xullo de 2018.- O grupo municipal de Esquerda Unida pídelle ao Concello que aporte a información precisa a pé de rúa para facilitar a circulación de vehículos e evitar que os condutores se vexan na obriga de procurar por si mesmos itinerarios alternativos para chegar ao seu destino. A pesar de que a formación xa solicitou esta medida no último pleno, a día de hoxe o executivo municipal continúa sen atendela; dando lugar a embotellamentos e episodios de desorientación e caos circulatorio, que ben poderían evitarse coa reclamada sinalización.

Se ben é certo que este ano a tempada estival non arrincou coa forza habitual debido ás condicións meteorolóxicas, no casco urbano xa se deixa sentir o incremento do tráfico rodado propio dos meses de verán. Un aumento que debe compaxinarse coas distintas obras en marcha en viais como Alexandre Bóveda e a da Praza. E que, sen as necesarias indicacións a pé de rúa, xa está a provocar complicacións.

Sen indicadores que informen aos condutores dos cortes de rúas e dos itinerarios alternativos que deben tomar para chegar a destino, nos últimos días vense repetindo a estampa de coches “atrapados”, que non se decatan da imposibilidade de seguir o seu camiño ata atoparse de fronte coas vallas de obra. Pasou, sen ir máis lonxe, o sábado; cando contrariamente ao que anunciara ante os medios de comunicación e a través das redes o Concello non abriu ao tráfico a Rúa da Praza; orixinando problemas no tráfico e obrigando a máis dun condutor a retroceder marcha atrás polo estreito vial.

Algo similar ven acontecendo nas estreitas ruelas situadas nas inmediacións de Alexandre Bóveda, que dende que comezaron as obras se ven saturadas de condutores, moitas veces desorientados, que se ven obrigados a improvisar na procura dun camiño alternativo.

Así as cousas, Esquerda Unida destaca a necesidade de que o Concello se faga cargo da situación e aporte a información precisa, instalando carteis indicadores, para evitar embotellamentos e minimizar o impacto das obras sobre o tráfico rodado, facilitando que tanto veciños como visitantes poidan circular coa maior normalidade e seguridade posible polo casco urbano grovense.

Publicación do Concello o venres 29 no seu facebook

Rúa da Praza cortada o sábado 30 e domingo 1

Gabinete de Comunicación

Esquerda Unida O Grove

EU lamenta os axustes e problemas de prazos provocados ao auditorio pola terquedade do alcalde

A licitación da obra comezará máis dun ano despois de que o goberno local anunciase a posta en marcha do proxecto de construción desta infraestrutura cultural

“Esperamos que o Concello do Grove non teña a desgraza de ter que devolver millón e medio de euros. Se chega a producirse, será pola terquedade do goberno municipal: por embarcarse nun proxecto sen ter claros os terreos”

Critica a manipulación do alcalde para facerse cun millón e medio de euros de libre disposición co beneplácito do Partido Galeguista Demócrata

O Grove, 27 de xuño de 2018.- O grupo municipal de Esquerda Unida lamenta a manipulación que o alcalde ven facendo respecto da postura desta formación en relación ao auditorio que o Concello proxecta para o Monte da Vila. Unha infraestrutura cultural que a formación esquerdista ve pertinente; pero que, sen embargo, adoece dende o momento no que foi anunciada, hai xa máis dun ano, dunha moi deficiente xestión. Así llo fixo saber o concelleiro Juan Lamelas ao grupo de goberno municipal no último pleno. Unha sesión na que EU optou por absterse na votación deste proxecto, coa finalidade de facer notar a mala praxe municipal a este respecto.

“Esperamos que non aconteza, pero se finalmente O Grove ten a desgraza de ter que devolver millón e medio de euros por non poder cumprir cos prazos da subvención da Deputación será por culpa da terquedade do alcalde”. Son palabras de Juan Lamelas, que lembra que esas presas do rexedor local teñen obrigado a reformular o proxecto do auditorio, que no seu día foi deseñado e presentado ao público sen ter en conta as características e a delimitación real dos terreos.

Foi precisamente esa inxustificada presa do grupo de goberno a que levou á paralización da construción do auditorio durante máis dun ano. Tamén a que obrigou a reformular o proxecto e a mermar o número de butacas. E a que, en último caso, ten deixado ao Concello do Grove entre a espada e a parede ante a necesidade de cumprir cuns axustadísimos prazos de execución se quere evitar verse na tesitura de ter que devolver a subvención que o goberno provincial aporta a esta obra.

O voceiro do grupo municipal de EU quixo destacar a demagoxia e a actitude manipuladora con que o alcalde actuou dende o minuto cero. “Hai aproximadamente un ano o goberno municipal contrataba un vehículo con megafonía para anunciar a celebración dunha sesión plenaria e puña a funcionar a cámara web para retransmitir esa sesión. Convocaba a asociacións culturais para intervir nunha sesión plenaria na que dicía que se ía aprobar o auditorio. Algo que era mentira. Unha sesión plenaria na que se nos quixo botar aos leóns aos grupos que mantiñamos un criterio distinto ao do goberno municipal respecto ao endebedamento do Concello. Hoxe, cando si se vai votar o proxecto de construción do auditorio, vemos dúas persoas no público”, indicaba Lamelas durante a sesión desta semana.

O voceiro de EU destaca o feito de que “o tempo veu dar a razón” ao plantexamento desta formación. E é que o alcalde “mentiu” hai un ano cando quixo forzar á oposición a aprobar un crédito bancario de 4,5 millóns, asegurando que se trataba dunha operación indispensable para sacar adiante a infraestrutura cultural. “O que defendíamos daquela era a necesidade de buscar financiamento alternativo doutras administración para que o Concello non asumise en solitario o custe do auditorio. Un financiamento que daquela o alcalde vía imposible e que, finalmente, si chegou. 

“Tamén se mentiu no pleno no que se solicitou a subvención de 1,5 millóns, dicindo que era necesario ter o crédito antes para poder optar a ela. É vostede un mentireiro, señor Cacabelos, e non teño apuro en dicilo porque os feitos constátano”, indica Lamelas. “Daquela dixémoslle ao alcalde que non pedise 4,5 millóns, facendo que o Concello cargase co custe da obra, que buscase financiamento alternativo. E o Concello endebedouse en 4,5 millóns cando podían ter sido 2. Pero, grazas a aquel crédito, aprobado co beneplácito do Partido Galeguista Demócrata, agora o goberno local dispón dun millón e medio de euros de libre disposición”, indica o voceiro de EU.

EU critica que se acometa a humanización de Alexandre Bóveda sen contar antes cun plan de mobilidade para o conxunto do casco urbano

Alerta do colapso que pode producirse nas rúas da contorna ao derivar cara a elas o fluxo de tráfico

Denuncia a falta de credibilidade do goberno local; que despois de meses falando da elaboración por parte da Policía Local dun mapa de circulación anuncia o encargo dunhas novas directrices de ordenación do tráfico á Universidade de Vigo

O Grove, 14 de xuño de 2018.- O grupo municipal de Esquerda Unida lamenta que, unha vez máis, o goberno local poña o carro antes que os bois. A pesar de tratarse dunha medida que indubidablemente terá un impacto significativo sobre o mapa do tráfico do conxunto do casco urbano, a humanización da rúa Alexandre Bóveda ten comezado sen que o Concello dispoña antes do necesario Plan de Mobilidade. Unha falta de planificación que podería derivar no colapso da rede de viais adxacentes; na súa maior parte estreitos; e polos que transcorren tamén, cabe lembrar, os Camiños Escolares Seguros que conducen ao CEIP Rosalía de Castro.

Antes de peonalizar rúas ou modificar sentidos de circulación parece lóxico pensar nas implicacións que esas medidas terán dende un punto de vista global. Pero non semella do mesmo parecer o goberno local do PSOE, que nun novo alarde de improvisación pon en marcha a humanización de Alexandre Bóveda sen contar previamente cunhas directrices que garantan un ordenamento axeitado do tráfico no conxunto do municipio.

Xa no pasado pleno o voceiro de EU, Juan Lamelas, advertiu ao alcalde da urxente necesidade de que O Grove dispoña dun Plan de Mobilidade Urbana; máis aínda, habida conta das importantes modificacións que xa se teñen introducido e das que, segundo os anuncios do consistorio, están por vir.

Moi lonxe de criticar as peonalizacións e outras actuacións de humanización dos espazos públicos, Esquerda Unida reclama reflexión e traballo previo, e apunta o temerario de realizar cambios tan significativos como cambios de sentido sen ponderar previamente as consecuencias. Nesa liña, EU lembra que o Concello aínda non convocou as comisión de traballo e seguemento do Plan de Mobilidade. Para máis inri, a pesar de que o alcalde anunciara en repetidas ocasións que a Policía Local era quen estaba a encargarse da análise e redeseño do mapa do tráfico grovense, o rexedor sorprende agora anunciando o encargo dunha nova diagnose á Universidade de Vigo. E faino exactamente ao mesmo tempo que comezan as obras para extender a humanización da Catorse ata os Conchases. Unha vez máis, política de feitos consumados e a salto de mata.

Os cambios en Alexandre Bóveda moi probablemente implicarán un aumento da densidade do tráfico en rúas como Sol, Raposeira, Hortos ou Rejo; así como no cruce da Avenida de Portugal coas da Igrexa e Rosalía de Castro. Unha operación que, efectuada sen a necesaria análise previa, podería resultar totalmente contraproducente. Ademais de perigosa, habida conta da proximidade do colexio de primaria Rosalía de Castro, e dos Camiños Escolares Seguros.

Prensa:

EU lamenta las peatonalizaciones sin disponer de un plan de movilidad [noticia web]

Advierten de los perjuicios para los "Camiños Escolares" y calles como Sol, Raposeira y Hortos [noticia web]

EU critica que se humanice Alexandre Bóveda sin un plan de movilidad del casco urbano [noticia web]

O Grove inicia la humanización de la calle Alexandre Bóveda. EU alerta del colapso de tráfico que causará en viales cercanos [noticia web]