EUOGrove: marzo 2025

31 marzo 2025

PLENO MARZO 2025

ROGOS E PREGUNTAS

📅 31 de marzo de 2025

▶ Intervención: minuto 1:15:22

🔗 Enlace ao vídeo

Preguntas realizadas

🔻 Escola de Música Pepe Silva

Preguntamos se estaban listas as bases de licitación para sacar a concurso este servizo por catro anos.

🔻 Subida a Meloxo

Preguntamos polo estado das cesións dos terreos necesarias para executar a obra de mellora.

🔻 Ordenanza de Patinetes

Preguntamos se se realizaran charlas informativas nos centros educativos e outros espazos.

🔻 Sancións por uso de patinetes eléctricos

Preguntamos se se executara algunha sanción en base á nova ordenanza.

🔻 Paso de peóns en Beiramar

Preguntamos polo motivo da eliminación do paso de peóns que conectaba a fonte dos cabaliños co parque de Confín.

🔻 Merendeiro do Monte Central Xaquín Álvarez Corbacho

Preguntamos pola localización do merendeiro instalado neste espazo.

🔻 Aplicación “O Meu Concello”

Preguntamos polo motivo polo que esta aplicación seguía sen estar activa.

🔻 Orzamentos municipais

Preguntamos se o goberno tiña intención de presentar un borrador de orzamentos para negociar coa oposición.

Rogos e solicitudes

🔻 Limpeza do exterior do Auditorio

Solicitamos a limpeza da contorna do edificio debido á imaxe de suciedade que presentaba.

🔻 Control de acceso a rúas peonís

Solicitamos reforzar o control de vehículos e patinetes na rúa Castelao e noutras rúas peonís.

🔻 Paso de peóns de Beiramar

Solicitamos o informe municipal que xustificou a súa eliminación.

🔻 Monte Central Xaquín Álvarez Corbacho

Solicitamos reparar bancos, balaustradas e outros elementos deteriorados.

🔻 Mercado Municipal

Solicitamos a documentación relativa aos postos, locais e bancadas do mercado.

19 marzo 2025

EU insta ao goberno municipal a solicitar as axudas para modernizar e dinamizar o mercado municipal

A convocatoria da Consellería de Emprego, Comercio e Emigración permite aos concellos acceder a ata 320.000 € para obras de mellora, rehabilitación ou accións de dinamización e pode cubrir ata o 80% do investimento.

Anxo Meis reclama ao executivo local que solicite estas achegas para modernizar e dinamizar a praza de abastos, evitando así perder unha oportunidade clave para o comercio local.

O Grove, 19 de marzo de 2025 – O grupo municipal de Esquerda Unida pide ao goberno local, e en concreto ao concelleiro de Mercados, que non deixe pasar a oportunidade de acollerse ás axudas que ofrece a Xunta de Galicia para a dinamización e rehabilitación das prazas e mercados municipais. Estas achegas, dotadas cun orzamento de 3,3 millóns de euros, buscan fortalecer a rede de Mercados Excelentes e mellorar as infraestruturas comerciais da comunidade.

O concelleiro de Esquerda Unida, Anxo Meis, indicou que “o mercado municipal é un espazo clave para a economía local e o comercio de proximidade, polo que resulta fundamental aproveitar este tipo de investimentos para modernizalo, facelo máis atractivo e mellorar os servizos tanto para vendedores como para clientes”.

A nova convocatoria da Consellería de Emprego, Comercio e Emigración permite aos concellos acceder a ata 320.000 euros para obras de mellora, rehabilitación ou accións de dinamización. Segundo indica Meis, “a liña de subvencións pode cubrir ata o 80% do investimento, polo que o Concello debe presentar un proxecto ambicioso para modernizar un espazo esencial para o comercio local”. Así mesmo, a liña de axudas inclúe un período de execución bianual, o que, para Esquerda Unida, supón “unha oportunidade única para planificar actuacións de maior calado sen presións de prazos excesivamente curtos”.

Desde Esquerda Unida consideran que a solicitude destas axudas sería un paso decisivo para revitalizar o mercado municipal, fomentando a súa competitividade e fortalecendo a súa función como motor económico e social da vila. “Non podemos quedar atrás mentres outras localidades avanzan na modernización dos seus mercados. O goberno municipal debe actuar con dilixencia e presentar un proxecto sólido antes do prazo límite do 14 de abril”, subliñou Meis que insiste en que “hai financiamento dispoñible, polo que só falta vontade política para non perder esta oportunidade”.

O grupo municipal presentará un escrito solicitando información ao goberno local sobre as súas intencións respecto a esta convocatoria. “Se a resposta é que non teñen previsto solicitar estas axudas, estaremos ante outro exemplo de desinterese pola dinamización económica do noso concello. O noso compromiso está claro: esixiremos que se aproveiten todos os recursos dispoñibles para mellorar o Mercado Municipal”, concluíu Meis.